رواية أحزان قمر كامله جميع الفصول بقلم جمانه السعيدي
اني قمر مواليد ٨٨من محافظّة البصره موآصفاتي بيضه وكصيره عيوني سود وشعري اسود طويل
احنا خمس نفرات اني الجبيره وعندي اخ ازغر مني واخت ازغر شي وماما وبابا
امي ربةّ بيت انسانه بسيطه وطيبه ومسالمه كلش
ابوي نائب ضابط عصبي بشكل لايطاق ويضرب على اتفه الاسباب احنا عايشين ابيت جدي
خالتي مزوجه عمي وعدهم اطفال اتلاثه ومرت عمي الثاني غريبه وعدها اطفال اثنيين وعندي عم ما مزوج وعمات اتلاثه وجدي وبيبيتي كلنا عايشين ابيت واحد
البيت جبير داخل بستان
المنطقه ريفيه وماكو ماي داخل البيوت اكو نهر كدام بيتنا
انجيب منه الماي
طبعا تعرفون عائله جبيره والنسوان الي بلبيت تشتغل اربعه وعشرين ساعه
امي جانت تتعب حيل بس متحمله علمودنا
وياريت بس شغل البيت وتهون
ياما وياما نمنا ليالي على صوت امي وهي تصرخ لان ابوي جان دائما يضربها
طبعا بعهد النضام السابق جان العسكري يلتحق واحد وعشرين يوم وينزل سبع ايام
لكن هذني السبع ايام ابد مانتهنا بيهن ونكرهن من ورا عصبية ابوي
جان يضرب امي بلنطاق النطاق حزام عسكري عريض وقوي
واحنا نسمعها تبجي لكن احنا ازغار ومابيدنا حيله
جانت امي تجمع ملابسنا وتاخذنا البيت جدي زعلانه نبقى كم يوم ويرجعنا جدي
بس ابوي ابد ماجان يهتم الزعل امي
من نرجع يومين زين وبعدين يرجع اكثر من قبل
بدت احداث حياتي تتغير من صار عمري ثمان سنوات
الهسه اذكر هذا اليوم المشوم وابد مايروح من ذاكرتي
الضهر طلعت امي تخبز هي وزوجت عمي
واني كاعده يمها العب خلصت خبز
وزوجت عمي دخلت الخبز وامي راحت للنهر كبال بيتنا تغسل واني دخلت للبيت ورا زوجت عمي
وسمعت امي صرخت بصوت عالي
رجعت اركض عليها لكيت الكهرباء لازمتها وتعت بيها
كمنا نصرخ اني وزوجت عمي التمت الناس على الصوت
بس نسوان ملتمات عليها فكرت
اذا جان اكو رجال موجود يكدر يخلصها
اذكرت عمي احمد الزغير راح للجامع يصلي
كلت الاخوي خل انروح انصيح عمي من الجامع بسرعه
كمنا نركض بكل سرعتنا نركض حفاي حتى مالحكنا نلبس شي برجلينا
وصلنا للجامع مالكينا اي احد الصلاه مخلصه ولمصلين كلهم طالعين
اني هنا عمري ثمن سنوات واخوي ست سنوات
المهم رجعنا نركض للبيت لكينا الناس شايليها ومدخليها للبيت ويضربون بيها بعوده خشب بلكت ترجع الوعيها
لكن هي كانت زركه واطراف اصابعها مفجورات من قوة النتله
صاحو ماتت ماتت ام قمر
وبدا الصريخ والعياط اني حضنت اخواني وكمت ابجي
ابجي ما ادري هاي الدنيا شضامتلنا
ابجي خايفه وحزينه شلون بعد امي راح انعيش
منو راح يحتضنا ويحس بوجعنا
شنو راح يكون مصرينا
شلون راح نواجه الحياة
ويه ابو عصبي ومتسلط ومايتفاهم ابد
طبعا ابوي جان ملتحق للجيش ومايدري بوفاة امي
خابرو ابوي وكالوله جدي حيل متخربط لازم تجي تشوفه لان احتمال يموت
اذكر من وصل وشاف جدي كاعد على كرسي بلباب
استغرب من الوضع
واحنا رحناله ركض ونصيح ماما ماتت ماما ماتت
وكع بلباب ماكدر يمشي
كعد على حيله وكام يبجي
أول مره اشوف ابويه يبجي
اجتمعو علي عمامي وكومو من الباب
