رواية كبرياء شيخ الفصل العاشر 10 بقلم زينب

احمد: وصلت كمره واهلها للبيت على اعصابي اريد بس اعرف شنو الي صار بينهم وليش وصلت لهل الحاله معقوله واحد يحب اللاخ بعدين ارجع واكول لا مستحيل كمره كويه ما تخاف من شي لو جانت تحبه جان كالت بس كلت يمكن خافت مني من هددته بالكاع احس عقلي راح ينفجر وما ظل عندي دماغ زين انه ليش خايف واذا طلعت تحبه لا شلون تحبه غير اشرب من دمها هي بعد صارت مرتي والي يمسهايمسني واذا طلعت عليها حجايه اول واحد يلوحه الشرار انه لازم اعرف شنو سالفتهم واحطله حد وصلتهم لبيتهم حتى مانزلت وياهم مالي نفس اشوفه وشخطت السياره وكبل رجعت لبيتنا لازم الكه شداد واعرف كل الي صار وصلت للبيت تلكاني ابو جبار كلي شداد اجى جان مسافر سألته وين هو كالي كاعد بالمضيف ويه الاهل دخلت للمضيف سلمت السلام عليكم الكل رد السلام الا هو شافني ودنك 

كتله شداد كوم رايدك بسالفه طبعا كلته بنتر الكل تفاجئ واولهم ابوي 

الشيخ: شعلامك وانه ابوك اكعد خل نتفاهم وانشوفه وين جان 

احمد: لا يبوي السالفه بيني وبينه وما اريد احد يدخل

الشيخ: آفا عليك شلون تحجى هيج جدام العالم 

احمد: بويه ما قصدت احد بس سالفة شداد ما ينسكت عنه والصار لازم اعرفه منه من لسانه يله يشداد امشنا راح اسبقك وأروح وانت تعرف المكان 

خمس دقائق وتلحكني

عفتهم وأخذت العنود ورحت لمكانا انه وشداد هو مكان كلش حلو يشبه البحيرة الصغيره وداير مدايرها كله خضار وصلت ربطت الفرس وكعدت على صخره وهو شويه واجى 

شداد: طلع احمد من المضيف والكل اخذ على خاطره منه انه هديت العالم وكتلهم شغله بيني وبينه لازم نكعد ونصافى بيناتنا طلعت من المضيف ورحت لنفس المكان الكال علي احمد وشفته كاعد على صخره ومدنك انه حزت بنفسي اشوفه هيج هومهما يكون هو الشيخ وجبير السلف انه شلون اكسر بي هيج تقربت منه هو شافني وصفن علي وشفت دمعه نزلت منه انه ما تحملت اول مره اشوف احمد هيج مكسور كعدت كباله على ركبي وكتله اي عقاب تشوفه الي انه جاهز

احمد: تعرف شداد ما تصورت يجي يوم واشوفك هيج راكع كدامي بس كلي ليش 

شداد: والله مو بيدي والله كلبي يمشيني احمد انت تعرف هذا الشعور انت مريت بي وتعرفه جكد يلسع 

احمد: ليش ما كتلي من البدايه ولك والله لو اعرف ما جان خطبتها ولا جان كسرت كلبك 

شداد: خفت شيخ والله خفت من سمعت من هديه وانه ليلي ما انامه 

احمد:خفت من شنو لا تظل تحجي بالالغاز كلي كلشي حتى اعرف اتصرف

شداد: ما يحتاج شيخ

احمد: ليش فهمني لو من اول مره سمعت من هديه جان اجيت وكلتلي جان بطلت كلشي ومحد يكدر يوكف بوجهي وانت تعرف كلش زين 

بس كلي شلون تخاف وانت من شوكت تخاف معقوله شداد يخاف

شداد: بعد صار الصار والفأس وكع بالراس 

احمد:من شوكت تحبها

شداد:ههههه شيخ بداعت ابوك لاتسألني هذا السؤال ترى انه روحي خلصانه

احمد:جاوبني

شداد: صارلي سنين احبها ومراقبها ٢٤ ساعه وبيوم الما اشوفه اظل الوب

احمد: بلعت ريك وخفت اسأله هذا السؤال بس تجرأت وكتله

هي هم تحبك 

شداد: يا ريت يا شيخ

احمد: وضح اكثر لاتخليني بشك

شداد: لا تخاف شيخ كمره ماكو مثلها مره بالسلف الكل جان يتمناها وانه واحد منهم ويمكن اكو اكثر من واحد مثل هاي حالتي واكثر 

بس لا تخاف هي شريفه وسمعته واخلاقه ذهب 

احمد: ما جاي اسأل عليها اعرف هذا كلش زين مو الشيخ احمد الي يتزوج وحده مو زينه اريد اعرف هي تحبك لو لا

شداد: ما تحبيني ولا تكبلني وما تطيقني وتكرهني كره العمى والطريق الي تشوفني بي تغيره بعد شتريد تعرف ها نسيت » آℓكـ๋͜͡‏ـلـُكٌ خطبتها اكثر من عشر مرات وهي رفضت هسه كول تأكدت لو لا 

احمد: انه اسمعه وكاض كلبي بأيدي اخاف من جوابه بس من سمعته مثل الماي البارد وطاح على كلبي وكتله 

اذا تعرف كلش زين هي ما تريدك ليش جبرتها تروح وياك جاوبني

شداد: انعميت على عيوني شيخ ما تحملت تصير لغيري وانه طول عمري اتاني ولو نظره منها 

احمد: تعرف لو سامع هذا الحجي قبل لا تصير مرتي جان صارت الك حتى لو هي ما تحبك لو بس كايلي ومورجني على مشاعرك وما خليتك تحترك بنار الحب لأن انه مجربه واعرف جكد يجوي بس انت اختاريت السكوت والغدر مع الاسف عليك ردت تغدر بيه بصاحبك بخوك ولك جان كلت هذا شيخ واله سمعته بين الناس والسلف شلون اسوي هيج شلون انطاك كلبك احجي كول دافع عن نفسك 

شداد: شحجي بعد انه واحد ساقط ما يفيد الحجي وياي اضربني شيخ صرخ اخذ حقك انه استاهل اي شي انفيني من السلف شتريد تسوي انه حاضر بس كمره لا تجيسه مالها ذنب 

احمد: اسكت ولا كلمه ولا تجيب اسمها على لسانك وهاي اخر مره تنطق بي ان سمعتك مره ثانيه ذكرت حتى لو حرف منه والله اجيب اخرتك ولا اعترف بخالي ولا حتى بأمي ولمحه بعد ما تلمحها فهمت لو لا

شداد: حاضر شيخ تأمر

احمد: هذا الحجي يظل بيني وبينك طير مخلوق ما اريده يعرف خصوصا هديه كل شي ينتهي بيني وبينك انت ابن خالي وبس 

هااا ونسيت اكلك طلعها من كلبك وعقلك هذا عقابك واتوقع ماكو اقسى من هذا العقاب ولو ما خالي وامي صدك بالله أحط جيله براسك واخلص منك ومن عارك 

صح الكلام الي كلته اله قاسي بس يستاهل خل يراجع روحه الف مره حتى لا يسوي مصيبه جديده كلشي أتوقع منه بس يغدرني هاي ما توقعته منه وعاقبته بحبه ادري الم الحب ما ينحمل خل يحترك بناره لأن هو ضيعه بأيده والله لو ما متصرف هيج جان طلكتها وعفتها اله بس بعد الي صار والسوايه السواها لا يحلم يشوف ضفرها 

عفته ورجعت للبيت لكيت الكل كدامي واولهم امي 

الشيخه: ها يمه ظل بالي ؏ـۣۛـٰلــيــۣكُـہۢۛ ۦ✿⇣ وين رحتو وهو وين 

احمد: بجهنم الحمره ولاتسأليني بعد

الشيخه: يااااا شجالك يمه تفور شصاير بينكم 

احمد: شغله بيني وبينه ولا تحاولون تعرفون هذا سر رآآح يروح وياي للموت 

الشيخ: واحنا شنهي هنا خراعة خضره موش بعينك ورجنا خلينا نعرف شصاير حتى نتصرف

احمد: العندي كلته وهسه صاعد لغرفتي وما اريد مخلوق يجيني ولا حتى اسمع دكة باب

الشيخه:براحتك يمه

الشيخ: شنهي براحته يا مره خلينا نعرف راسنا من ساسنا احنا موش اهله 

الشيخه: مو هل تشوفه صاير نار كبره خلي يهده وبعدين نعرف كل شي ترى ماكو شي ينظم وخصوصا بسلفنا 

الشيخ: والله هذا موش احمد الأولي تغير فد نوب الدراسه بره الديره غيرته علينا وعلى طبايعنا انطيته المشيخه وزوجته بنيه من عدنا كلت بلجن يحن لديرته واهله بس ماكو فايده حتى بت الوادم ما شافها من اهد يوم الخطبه

الشيخه: شيخ والي يسلمك لا تضغط علي خلي على راحته احنا ضغطنا علي بسالفة الزواج وخليناه يتزوج وهو ما راضي قبل بس حتى يرضينا اخاف نلح بالسالفه ويهج ويرجع يسافر هو بس يريد حجه وهسه جملها شداد مو زين كال راح اصعد لغرفتي دسكت لا ينزلنا بجنطته ويكول انه مسافر 

الشيخ: عمي سكتنا خل نشوف تاليها وين يصفى بينا الدهر

احمد: صعدت للغرفه سبحت وبدلت ملابسي وردت انام واتذكرت هديه

طلعت وكفت على الدرج وصحت بعلو صوتي هدييييييييه بسرعه تعالي لغرفتي

هديه: انه بالمطبخ واكفه وسمعت صوت يرعد بأسمي الشيخ احمد يصيح علي وانه ظليت ارجف اخاف اصعد اجت الشيخه على الصوت 

شيخه فدوه اخاف اصعد 

الشيخه:ليش يصيحلج مسويه شي جايد

هديه: لا والله شيخه حتى اليوم كله ما شايفته اخافن اصعد فدوه صعدي بمجاني

الشيخه: خايبه شولاج صعدي شوفي اخاف من نظفتي الغرفه ودرتيلج شي 

هديه: ما ادري شيخه بس والله خايفه

الشيخه: صعدي بسرعه لا يتعصب بالزايد

هديه صاعده وامرلي لله 

صعدت وانه اعد الدجات وحده ورى الثانيه بدلي ما يخلصن وصلت ودكيت الباب وصاح فوتي بس بصوت رج الغرفه رج وانه تخردلت اجيت الوف وانزل بس تعوذت من ابليس كلت خل ادخل اشوف ابليس الثاني هل الايام هما هواي يتشابهون دخلت وكلت

ها شيخ امر

احمد: راح ادخل بالموضوع بدون لف ودوران من شفتج انتي وشداد وكلتلج شكو انتي لفيتي الموضوع لف وهسه يله غردي وبالج واياج تلفقين ترى عرفت كل شي 

هديه: سمعت الشيخ وانه انخمط كلبي ظليت ساكته 

احمد: سألتج جاوبي لا تظلين ساكته ما راح يشفعلج السكوت 

هديه: شيخ والله ما سويت شي هو اجى وسألني ما جان يعرف راح تخطبون كمره وانه كتله سد السالفه ولا تفتحها بعد كمره موش الك وروح امي هذا الصار

احمد: وذاك اليوم من سألتج ليش ما نطقتي ليش ظميتي السالفه

هديه: خفت والله شيخ هي بعد السالفه صارت والخطبة انحجت خفت احجي كلت انت وشداد اخوه ما يصير اخرب بيناتكم 

احمد: وشمعنه انتي بالذات شداد يسألج 

هديه: هو يعرف كمره تعزني وصاحبتي عمن جنا بالمدرسه سوه ودائما يكلي حتى اقنعها بس هي عنيده شيخ ورأسها يابس ما تقبل حتى تسمع اسمه واخر مره كتلها علي كالتلي راح تخرب صحبتنا بسبت شداد 

احمد: يعني جنتي مرسال بينهم

هديه: لا شيخ على بختك مرسال شنهي لحد يسمعك شيخ وابوي يذبحني وروح امي كمره ما تهواه ولا فد يوم جابت اسمه على لسانها لا تشيل خطيتها 

احمد: راح اصدكج بس كليلي وها مره • ﺂنٰ جذبتي علي انه اذبحج مو ابوج 

هديه: كول شيخ وانه حاضره 

احمد: هذا الحجي بيني وبينج حتى كمره ما اريدها تسمع كليلي الصراحه وانطيج الامان

هديه: كول شيخ 

احمد:كمره ليش ترفض كلمن يتقدم الها 

هديه : هااا شيخ ما اعرف والله

احمد: احجي لا تخافين اذا اكو احد بكلبها كولي ما معقوله ترفض الزين والشين هيج وهي مو زغيره المفروض بعمرها متزوجين 

هديه: لا شيخ ماكو احد بكلبها وأخذها مني حجايه اكيده 

احمد: شلون تأكدتي

هديه: انه اكثر من مره سألته وكتلها ليش جاسحه نعمتج وترفضين بالوادم والبنات يتمنن بس واحد يجيهن وانتي عشره عشره اخافن تحبين وعاشكه

احمد: اي وشكالت

هديه: والله يا شيخ شهرتني وخزتني وكلتلي ان عدتي هل السالفه بعد لا اعرفج ولا تعرفيني شلون تكولين هيج ترديني انزل راس ابوي وإخوتي وهما روسهم دوم مرفوع انه حتى لو احبن ادوس على كلبي ولا فد يوم امس شعره من هلي 

احمد: من سمعت كلام هديه على كمره كلش ارتاحيت وكبرت بعيني كلت معقوله اكو هيج بعالمنا هذا بنات تحسب حساب اهلها ورجعت كتله بس هيج ماكو بعد اي شي

هديه: لا شيخ ماكو شي بس مره سمعت من خالتها فهيمه انو هي ما تريد تعرس وتظل عد اهلها بلجن اهلها يغيرون رايهم ويخلونها تكمل الدراسه بغداد هو هذا شرطها حتى تزوج 

احمد:خلص فهمت اي شي صار هنا ما اريد احد يعرف بي حتى ذاك اليوم ويه شداد تسدين السالفه وما تحجين وخصوصا ويه امي 

هديه: شيخ جا شلون هسه الشيخه اكيد تسإلني شجاوبها 

احمد: عاد انتي بلف السالفه استاذه احجي اي شي 

هديه: هههه شيخ هاي الشيخه ما يفوت عليها شي 

احمد: يعني انه الغبي يفوت علي الشيخه لا

هديه: لاشيخ السموحه ما قصدت هيج بس هي تلح علي وانه ما اعرف اسكت بسرعه اكتهن كلهن

احمد: حتى اذبحج بأيدي 

اذا كلتلج كليلها ضيعت ساعته الجديده وجنت ادور عليه وهاي الساعه هديه عزيزه علي 

هديه: اي هاي خوش حجه 

وهسه انه اترخص شيخ

احمد: هاااا نسيت عندج رقم كمره

هديه: اي شيخ عندي 

احمد: بسرعه جيبي 

هديه: صار 

طلعت من الغرفه وسديت الباب وانه اخذت نفس عميق عبالك جنت كاعده بغرفة تحقيق فطنت لكيت الشيخه جدامي وانه فزيت 

الشيخه: شراد منج احمد

هديه: شيخه ساعته الجديده ضايعه وخبصني خبص الا ادوره والكاها يكلي الصبح جانت موجوده على الميز وين اختفت كتله يجوز واحد من اخوانك اخذها عندك اهواي البس منهن بس هو عصب علي وكلي الا هي لان هديه من شخص عزيز علي

الشيخه: هااااا بس هيج

هديه: شيخه اذا ما مصدكتني دخلي وسألي 

الشيخه: لا مصدكتج روحي من جدامي

هديه: رحت وانه اكول بكلبي اروحن ليش لَہ هو انه صايره مثل النفاخه كل ساعه واحد كاضني ولاطشني بمجان وكل شويه مجذبتلي جذبه شكبرها خل اوديله الرقم لا يتسودن علي روميو

نزلت وأخذت النقال وصعدت وانطيته الرقم ونزلت وانتهت المهمه بسلام 

احمد : اخذت الرقم من هديه وسجلته بنقالي ودزيت رساله الها .....

كمره: رجعت من المستشفى من بعد ما وصلني الشيخ للبيت وطول الطريق ينافخ ولا يباوع بوجهي عبالك مرتكبه جريمه بحقه هو انه حالي حالك تفاجأت بشداد اكثر منك صح ادري بي يحبني بس ما توقعت يتجرأ ويحاول يخطفني لا وبعز النهار وصلنا توقعت راح ينزل بس ابد ولا عبرني اي يعني شتوقع منه هو اصلا تزوجني تحت التهديد انه ضجت من تصرفه واصلا انه دايخه كوه امشي بعده تأثير المهدئ بيه دخلت للبيت لكيت امي تلطم عبالك ميته وخالتي مكابلته وتنعي ناصبات فاتحه عوزهن بس ملايه 

ام كمره: يمه بنيتي يا بعد طوايفي كتلج يمه لا تطلعين ما اخذتي حجايتي 

يمه كضيت بنيتي حضنتها واشمشم بيها وهي سكرانه حتى ما تشيل روحه

ابو صلاح: كافي يا مره عوفي البت ترتاح وخليها تنام موش زين عليها 

ام كمره: يمه شبيج وجهج اصفر ورايحه روحج ومسنحه بيج شي كولي لا تضمون علي

صلاح: يالغاليه ما بيها شي بس شويه هبوط وخلولها مغذي وهسه خليها ترتاح هاي بتج ما تتحمل حرورة الشمس ما جنها بت ريف عبالك بزر نستله 

فهيمه: ياااا خاله شني بزر نستله بس هي ما تتحمل امشينا خاله بعد خالتج وروحه امشينا اخذج للغرفه ارتاحي ومن تصيرين زينه عود احجي كلشي

كمره: اخذتني خالتي ودتني للغرفه وانه روحي رايحه اريد بس اتمدد وارتاح وصدك بس دخلت وشبكت مخدتي العزيزه نمت ما عرفت شنو صار بعد فزيت على صوت النقال يدك ردت اشيل بس شفت رقم غريب ما شلته اخاف اشيل الارقام الغريبه انه ما عايزه مصايب شو هي تدروني دواره تالي انكطع الاتصال وفتحت النقال واشوف الرسائل كامت تركع وحده ورى الثانيه

الو شلون صرتي

الو مو جاي احاجيج ليش ما تجاوبين

كمره كافي عاد لا تمتحنين صبري ترى ما تعرفيني شسوي

الو

الووووووو 

جاي اتصل ليش ما تفتحين الخط ترى اجي والله بهل ليل واسوي الج نهار

كمره: يمه عزا منو هذا وليش يسأل علي يمه بس لا شداد والله كمت اخاف منه

يمه بس لا صدك يجي هنا وكدام اهلي هل مره صدك اموت شسوي يا ربي

بعدين كلت خل احفظ الرقم واشوف بلكي مخلي صوره صخام اعرف منو هو وصدك حفظته ودخلت على الواتس اب واشوف الصوره طلعت صورة الشيخ احمد بس يا بويه شني من صوره تخبل شلون لبس وشلون هيبه وظليت ساعه صافنه بيها لحد ما دك النقال المتصل هو ردت ما اشيله على موقفه وياي اليوم وشكه بيه بس خفت كلت لا صدك يجي هسه هذا خبل كلشي يسوي شلته وكلت

الو

احمد: وين جنتي صارلي ساعه اخرط 

كمره: جنت نايمه وما ادري بي ما جان يمي

احمد: اتصلت اكثر من مره لا تكليلي تمبل مال نوم معقوله ما تشيلي لو كلتي خل اغلس هاي عادتج هل ايام

كمره: لا مو تمبل كعدت على صوته بس انه ما اشيل الرقم الغريب وانت حضرتك حتى ما كلت اسمك حتى اعرف منو 

احمد: لا العفو ست كمره غلطنا وياج يابه اعتذر شنو هل لسان حتى ما تنطين مجال 

كمره: حبيت استفزه واحجي وياه برسميه شوي تقويت علي هو اصلا بعيد علي خوب ما راح يطفرلي من التلفون

لا عادي شيخ احمد منا وهيج لازم تستأذن ياله تتصل تعرف احنا زواجنا مو عادي على يا ساعه ينتهي 

احمد:شنووووووو

الفصل الحادي عشر من هنا