رواية غاليتي الفصل الثالث عشر
سعاد تعصبت : المرزيه لها شهر مخطوبه مارفعت عليه سماعة تليفون ارزيها في عمرها
امينه شهقت: معقوله ياغاليه هكي
غاليه اضايقت صبت وسيبتهم
مروه : اصلا هو بارد ولصقه ماصح وجه
سعاد فنصت فيها : احترمي روحك وصبي من هنا ياحيوانه
امينه بحتت في سعاد : تاريتها مش ساهله نص انصيص
سعاد تمسح في دموعها : لا مش ساهله تقول راضعه العناد في الحليب
امينه : انتي كان فض الموضوع على خير سقديها بدري بدري خير ماتخرب على روحها
سعاد : غير يروح مختار ويطمني وراسها الا مش دايره حتى عرس يجي ياخذها بدبشها ويفكوني مالوجيج انا ركبني الضغط مالتخميم
امينه : ايوه ديري هك وتريحي خلاص
هناء اضايقت : بس انتو بع يعني مش بالغصب كل شي بالسيف الا حبني يابنادم
سعاد : اسكتي انتي شن فهمك
هناء : والله جديات يعني شن كان صار كان خداها منجي
امينه فنصت فيها وساكته
هناء قلبت وجها
سعاد : والله مانلقى اعز منه ؛ غير نصيب
امينه نطت بسرعه : ايوه نصيب هي قولتك
_________________
مختار مقعمز في المار قدام العنايه : غير وسع بالك ماتنحلش بالطريقه هذي
عبدالقادر متعصب : ولدي بين الحياة والموت حسبي الله ونعم الوكيل فيك يامختار وفي عيالك الفـ.....
مختار قريب يبكي ويحكي معاه : غير صبرك باهي ياعبدالقادر توا تنحل وينوض والمسخ ولدي خليه معزوق في الحبوس ان شاء الله حتى يعدموه
عبدالقادر : انا قتلك يصير في ولدي حاجه والله نحرقلكم حتى حوشكم تحسابوها فوضى
رجب : غير وسعو بالكم انتو خوت واخرى نسابات توا الوضع يختلف
مصطفى بحت في رجب : اين نسابات خليها ساكته
المنجي خش : السلام عليكم
مافش حد رد عليه وقاعدين ايتعاركو
مصطفى بحت في رجب : انت يرضيك تخطب لولدك بنت تقعد اتقول مانحكيش معاه قبل الخطبه !! حتى كان ملتزمه انقولو لكن هذين طروح بنات
عبدالقادر فنص فيه : فكنا من قطاف الصبايا خلينا في خوك ؛ وانت يامختار لا بينا نسب لا شي الي هناك فضيناه
مصطفى بحت فيه : باااتي !!
عبدالقادر : سكر فمك را نكفخك
مختار : غير استهدى بالله ياخيي
المنجي تعصب : خلاص معش تجداه ياعمي مختار
مختار بحت فيه وسكت
المنجي يدف فيه بالكروسه : اوكي البنت عندنا و لا خطبه لا هايك
مصطفى صبّا : انت من وشن دخلك ؟
المنجي فنص فيه ويتحزز : والله اتزيد عليا انزمطك سنونك
رجب يكر في المنجي : اطلع الحكاية مش ناقصه تلبيز
المنجي يفك في روحه من باته : بعدك انا كبدي عليك دم واندور فيك
مصطفى يبحت في مختار : جايب معاك بلطجية ياعمي ؟
مختار يمسك في المنجي من سوريته : خلاص يامنجي اطلع
المنجي قرب من مصطفى ويحكي ومسكر سنونه : تي والله مانك راجل ياف....
رجب تعصب : منننجي
المنجي سكت و وخر
عبدالقادر : اطلعو برا معش نبي انشوفك لا انت لا جيرانك الي بيني وبينك ولدي الي في العنايه يموت يامختار معناها شوف شن هايصيرلك
المنجي يعيط من بعيد : جرب قرب منهم والله نرتكب جريمه مصطفى يشايرله بيده : يفتحلك ربي اسقد
المنجي : عدي يا ......
رجب يدف في مختار بالكروسه وطلع بيه
والمنجي يمشي قدامهم داهش ويمسح في عرقه
_____
وصلو قدام السياره
المنجي ايركب في مختار
مختار عيونه يدمعن : حسبي الله ونعم الوكيل
رجب ركب يسوق : خلاص وسع بالك توا ربي يحلها من عنده
المنجي طبس عليهم مالروشن : ماشيين شور الحوش ؟
رجب : اها وانت وين ماشي
المنجي : عندي كم مشوار وتوا نلحقكم
رجب : ماطولش بيش انشوفو القصه هذي شن دوتها
المنجي يفتح في باب سيارته : تم
_____________
سعاد ماسكه التليفون وتتصل : مايردش عليا مش عارفه كنه
صفاء خشت : انتي اترني على بابا قصدك العشيه كلها ؟
سعاد بحتت فيها : اها كنه
صفاء : تليفونه في الدار مسيبه
امينه : خلاص قعمزي
سعاد قعمزت : يارب استر قلبي مقبوض مش متريحه
الباب رن ...
سعاد تلبس في محرمتها بحتت في غاليه : اجري افتحي
امينه : يارب استر
غاليه مشت تجري فتحت الباب و داهشة
رجب يرفع في مختار من العتبه بالكروسه وغاليه ترفع معاه
وحطوه ع الارض و
مختار قعد يدف في الكروسه بروحه
و خش للمربوعه : عاجبك الي داره ولدك
سعاد : وين عاجبني اتشوف فيا نضحك اتقي الله يامختار را النار الي انت فيها حتى انا غاطسه فيها
امينه فنصت فيها : غير وسعو بالكم وقوللنا شن صار
رجب خش : السلام عليكم
امينه بحتت فيه : شن صار ؟
رجب قعمز داهش : بات العيل سفيه ومايعرفش يدوي للاسف هو خوك الكبير لكن ننقانه عقله صغير
مختار : لزنا و تعارك مصطفى مع منجي
غاليه اتبحت زين وقلبها يدق
مختار بحت في سعاد : وقال لاعاد في نسب لا سو
سعاد اتخبط في كرعيها : خرب على اخته المرزي حسبي الله فيك ياخالد
امينه : بلكي كلام في لحظة حمقه
رجب : حتى كان العيل ناض وجا وقالك نبو البنت تقعد هبل كانك رديتها
مختار متعصب : لاعاد ياخدها لا شي
غاليه خشت تجري للدار لقت البنات ايتباوعن
هناء : شن قالو ؟
غاليه تضحك : يابنات قالو لبابا معش نبو خطبه لا شي
صفاء ضحكت : الحمدلله الي الواحد سمع خبر كويس
مروه : ماتفرحيش واجد بلكي مايصيرش ويطلع كلام في لحظة حمقه
هناء دقتها على ظهرها : سكري فمك
غاليه فنصت فيها : عليش اتنكدي عليا توا انا ردت فيا الروح
هناء : يارب تطلع صح يالولي
رجب : كان ع البنت توا ربي يجيبلها نصيبها
مختار متضايق : توا يستر الله كان ما يموت و ايصير الي قاله
رجب : كنك يامختار ياراجل وراك رجاله ماتشيل هم بكل
سعاد بحتت فيه : شن الي قاله ؟
مختار سكت
رجب : كلام فاضي مايقدرو يديرو شي
سعاد : باهي غير قولولنا بس شنو
مختار : قال كان مات العيل نحرقولكم الحوش وانهججوكم مالمنطقه وكلام كيف هالكلام
سعاد اتخبط على كرعيها : حي عليا حي ؛ حي ياسعاد علي كاينتك السوده
امينه مسكت ايديها : غير وسعي بالك ان شاء الله مايصيرله شي عليش تسبقو في الاحداث
رجب بحت في سعاد : طاسة اميه النبي
سعاد صبت : توا انقول لغاليه ادير قهوه
________________
المنجي في السياره ومعاه انس
انس راكب قدام : يحسسوك انك مش موجود
المنجي يسوق : انا جبتك بالعاني خلي يحسو ان عندهم راجل ياانس ازف يسد خوك
انس ضحك : ياراجل خالد خويا امسخ عارفه ! انا لقيت مشاكلهم وجو شين حليت مالحوش
المنجي : اهو توا لا مشاكل لا خوك قاعد انت راجل الحوش حتى خواتك مش كيف لما يقعد الحوش فاضي ومش كيف لما تقعد قاعد
انس يسمع فيه وساكت
المنجي : اتفقنا اترد للحوش يعني جو تمام ؟
انس : خلاص تم توا انجرب نقعد وانشوف الجو لكن كان لقيته زي قبل لنقانك تسمحلي را
المنجي : غير اقعد وقت المشكله هذي وارجاها تنحل بعدها ساهل
__________
غاليه اتمد في القهوه
سعاد تاخد في الفنجان : شن سكرها ؟
غاليه : ناقص
سعاد شربت مالفنجان : تمام ميه ميه طعمتها ؛ بس جيبي السكريه بوك يحبها حلوه
مروه سمعت الباب طلعت فتحت
انس : شن جو
المنجي : مرحبا
مروه : تمام
انس يسلح في كاويشه : من في ؟
المنجي : هلي بس
وخش للمربوعه : السلام عليكم
غاليه جايبه السكريه وجايا شافت انس
انس : دايرين قهوه ؟
غاليه تبي اتخش للمربوعه : اها
انس : صبيلي فنجان به
غاليه خشت بحتت في المنجي وحطت السكريه ع الطاوله
مختار : جيبي قهوه لخيّك
المنجي : لا شربنا برا
انس خش سلم عليهم
سعاد بحتت فيه : كيف عرفت بلي صار
منجي : كان معايا و انا الي قتله و ركب فيا شيلني توا للحوش
مختار : باهي الي عرفت ان عندك هل
انس رقاله : بدينا في الجو الشين
رجب غمز مختار : غار الدنيا تلاهي وهو لاهي في دنيته اهو اول ماصارت حاجه جا ودار الواجب
امينه : توا خالد مافش حد مشى شافه ؟
مختار تعصب : الله لا يسامح كل حد يشوفه ولا يسأل عليه خلوه زي الكلب الضال ان شاء الله مايربح
سعاد : مهما كان الواحد ولده
مختار هزبها: ولدك تبيه عدي اقعدي معاه انا لا ولدي لا ليا دعوه بيه واني عطيت قلة السماح ومن توا انقولها كان متت ولدك هذ مايحضر عزايا ولا يخش حوشي ولا له دعوه ب بناتي
رجب : بعد عمر طويل ان شاء الله
مختار : لا مافش حد يندري على روحه وانا وصيت وماني مسامح كان صار وخليتوه يجي عزايا
______________
9:30 م
امينه اتعلق في جلبابها في الصاله : اسمله على سعاد كل يوم كاينه واهو موضوع بنتها خرب وتوا تقعد في رقبتها
المنجي مقعمز ع الطاوله في المدخل
ورجب احداه قاعد ع الكنبه : وعليش تقعد في رقبتها توا يجيها نصيبها
امينه قعمزت ع الطاوله : من يبي ياخذها وخوها هكي اسمله عليها حتى هي
المنجي يلعب يالتليفون ومتعصب
هناء اتنشف في الدروج : توا تشوفو طيحتها كيف مسقمه
امينه فنصت فيها : انتي اسكتي وخليك في شغلك
رجب : ربي قال (( لا تزورُ وازرةٌ وزرَ أُخرى )) يعني عشان عندهم ولدهم امسخ معناها العيله كلها امسخه
امينه : لا الله يسمحلهم لكن حتى السمعه اتخرب ونحنا ليبيين وعارفين بعضنا
رجب : مش شرط
امينه : تذكر خوك ادريس زمان البنت الي يبيها عليش باتك ماباش ياخذها له ؟
رجب : متذكر بس الوقت يفرق
امينه : لا مايفرق باتك قال مش واخذها على جثتي لان جدتها ام امها زمان كانت ابتاع وجيج
هناء ضحكت : نعنجد هذ
امينه بحتت فيها : اهااا والله الواحد العار يلحقه يلحقه وننقانه ولدهم دار العار
رجب بحت في المنجي : كان ماصار موضوع ولد سيد غاليه توا نخطبها لك
المنجي بحت فيه وساكت
امينه شهقت : انت اتشجع فيه يارجب ياخذها
رجب تعصب : وشن فيها مربيينها نحنا و بنتنا ماهي برانيه ياخذها منجي خير مالبراني
امينه اضايقت : لا ماياخذها كان اخر بنت
المنجي ايتأفأف : شن ماسكه عليها كنك ؟؟؟
امينه : ماني ماسكه عليها شي لكن النسب الواحد يدور الهل
المنجي : وكنهم هلهاا ؟؟؟
امينه : ماكنهم شي لكن خوها
رجب اضايق : خلاص توا انهو السيره خلي انشوفو شن يصير مع الناس قبل
المنجي صبا وخبط عالطاوله بيديه : هذينا رايات الصبايا اصلا ..
وركب داره وطبق الباب
امينه بحتت في رجب : انا ماصدقته سكت ليش اتذكر فيه بالموضوع ؟
رجب : وانتي عليش قاعدتيله عالوحده كل واحد ياخد الي يبيها لا تدخلي لا شي عشان مايجيش في يوم ويقولك كله منك ولا تصيرله حاجه تقعدي تندمي في روحك
امينه اتأفأف : انا عندي له وحده تقوليش ناخذها له
هناء : لينا صبيتي ؟
امينه ابتسمت : سويره بنت عيشه ومنسجمين لقيتهم يهدرزو يومتها
هناء عزقت الخيشه وصبت تجري : تي اتلصق فيه وهو مش طايقها مانضحكوش على بعضنا ياامي
رجب فنص فيها : ادوي كويس مع امك 😒
هناء : اصلا خبر يقهر ياباتي بحت كيف تحكي هو يبي غاليه خلاص خودوها له
رجب بحت في امينه : كم مزال على عرسها الفرخه هذي ؟
هناء تحشمت ومشت اتلم في السطل
امينه : 3 شهور خلاص ماهناك شي
رجب : مش ناقصها شي البنت
امينه ابتسمت : تذكر زمان وانا نشري واندسلها وانبتتلها شن كنت اتقولي ؟؟ اتقولي مزال بدري البنت في الثانوي كنك مستعجله عليها انقولك ماتندري ع الدنيا شن داسه
رجب : صحيح نذكرها
امينه : اهو انخطبت ومش ناقصها حتى كاشيك كان نبي انبتت في الظروف الي توا راني حاطه اضعاف الي شريته لها
رجب : يعني مش ناقصها شي
امينه : مزال الدبش الي تلبسه وكم تيير والكنادر والشناطي و حاجات خفاف
رجب : وين خفاف حتى الدبش توا قعد بحسابه
امينه : جت في دبش خير من موعين ويتات كامل ؛ واحميده الاسبوع الي فات مدلها 1500 قاللها ابدي اشري دبشك خذت قفطان وتيير
رجب استغرب : بس ؟؟
امينه : هابا على اسعار توا ! تلقاها بلوزه شيفون سعرها 300 كل شي بالغلا والكوا
رجب : كل شي برزقته المهم البنت تنستر قدام ناسها
ونا توا نسحب الصبح ونعطيها اتكمل شويا من دبشها
امينه : وتوا ندوي للمنجي يعطي اخته تفتوفه اتمشي بيها امورها
_____________
المنجي في داره مقعمز ع السرير ويدخن
ويفكر كان صح ماصارش من موضوعها صح !!
ناخدها ولا لا .؟
بس انا معش نقدر لان فقدت فيها الثقه ..
لكن نحبها مش قادر انعيش بلاها
نقهرها وناخد ساره ..!
لكن انا مانشوفش في غيرها
(( مامن صوب غلا قدامي .. غير علي واحد متعامي )) ❤
_____
9:30 ص
غاليه وعت مالنوم و طلعت مالدار
لقت امها قاعده اتلمع في الرواشن
غاليه : صباح الخير
سعاد بحتت فيها : صباح النور
غاليه : سيبي ياماما توا انديرهن انا اصلا نبي انظف الحوش
سعاد : حمل الجماعه ريش خليني انفش غلي فيهن
غاليه قعمزت على يد الكرسي : مافش خبر من حد ؟
سعاد : مافش لعند توا والله الليل مارقدته لا انا لا بوك
وبوك يحس في قلبه ينخص فيه ماقبل حوته غفا في الصبح وانا رقدت ساعتين
غاليه : باهي تريحي انتي وانا توا اندير الغداء اليوم
سعاد : نوضي خواتك يبدن في الضم والتسييق
غاليه صبت عند الباب : انديرلكم دجاجه محمره ورز ابيض وسلاطه ؟
سعاد : ديري اي حاجه حتى خفيف من عنده نيه ياكل
غاليه خشت فتحت الروشن على خواتها
مروه غمت روحها بالمخده : معقوله هكي
صفاء بحتت فيها بعين وحده : كنك جايتك الحاله عالصبح
غاليه اتهوي في الدار : نوضن ضمن نبي اندير الغداء
مروه اتكسل : عليش وين امك ؟
صفاء : خلينا نرقدو طشه اخرى
غاليه : امكن تعبانه ومش راقده بعد الي صار
صفاء تباوعت مروه من فوق : صح لازم انمدو يد العون 😂
مروه تضحك : امشي يامريضه 😂😂
صفاء : والله اتصبي
غاليه اتبحت فيها وتضحك : فعلا يعوين الي ماعنده هم
____________
5:00 م
اميره اتضبح مالدروج : هناااء
امينه طلعت مالمطبخ : هناء في الحمام كنك
اميره : عميمه امتى ماشيين لأبله سعاد
امينه : توا غير نلبس وانوتي روحي بس
اميره : درتو حاجه حلوه ؟
امينه : لا والله مادرت ولا عندي جهد
اميره : انا درت طاجين بسبوسه احمد كلا منها شويا قبل مايطلع وقالي معش عندي نيه انقصها وانشيلها ولا يقولو متشمته جايبه حلو
امينه : لا مش برانيه سعاد حطيها في فلوكه ناكلوها مع القهوه
اميره : هياا انوتي روحي وننزل ارجوني
امينه : على مهلك
__________
انس يلبس في كاويشه : وين باتي
سعاد اتلم في الكنادر مالمدخل : عدا لسيدك جمال
انس : واااااو مقدم سنينه
سعاد : وانت وين ماشي
انس : ماشي مع مانجا
سعاد ابتسمت : ياريتك ديما اتبعه وتطلع زيه
انس : ننقانه اصلي بكل
سعاد : وين ماشيين باه ؟
انس : عنده واحد صاحبه دكتور في الجلاء ماشيين نسألو على عادل شن وضعه
وتليفونه رن
انس فتح الخط : ايوه ....... هياا اني طالع ..... تم ياطير
سعاد : سلم وليدي ياريتك ديما هكي تقعد واتفرح باتك ساده هم
انس فتح الباب وطلع
سعاد اتسكر في الباب وراه : ربي يهديك ويسقم حالك
غاليه تباوعتها مالدار : كنك تحكي بروحك ؟
سعاد بحتت فيها : لا انس كان قاعد وعدا مع منجي
غاليه : شن خطرها الصحبه الجديده
سعاد ابتسمت : انا عارفه منجي يقولك هضا مزال صغير بلكي نصلح منه قبل مايضيع
غاليه : يستر الله كان ما منجي هو الي يضيع
سعاد اضايقت : وانتي ماتقولي كلمة خير بكل امتى عمرهم جونا قالو انس داير مشكله ؟؟
غاليه : الله اعلم هو يجي في الشهر مره
سعاد : عمره انحبس خوك ؟؟
غاليه : لكن يسكر و جو شاليهات يعني سمعه كويسه بكل
سعاد تعصبت : كان على وجيج الشاليهات و السكير ماعندي مانديرله نص الشعب الليبي يسكر بالدكنوني المهم ما يأذي في حد
غاليه اتأفأف : يعني انتي راضيه علي يدير فيه ؟
سعاد : في ام ترضا بالحال هضا ؟؟ لكن الله غالب عليا ولدي و ماعدي ماندير يعني انتبرا منه مش قاتل قتيل هو في النهايه بكل
غاليه خشت للمطبخ
وتحكي بصوت واطي : يسكر عادي وانا على علاقه درتها طلعت مني عامص 😒
____________
هناء اتكلم في دار المقعد : ركبت دار النوم
وسام : توا كيف طلعو الجماعه
هناء فرحانه : صورها ليا باهي انشوفها
وسام : صورتها لكي توا اندزلك الصور ع الفايبر غير توا ماعندش نت ارجي نين ننزل
هناء : باهي تمام انا ماشيا لغاليه اليوم
وسام : شن صار في ولد سيدها نبي نحكي مع مانجا من امبدري لهيت
هناء : مزال في العنايه يستر الله
وسام : كلا هما ناس بختهم شويا بكل
هناء : بذات غاليه ماعندهاش حظ
وسام : بلكي ضربة ولد سيدها خير و فيها خيره لها
هناء : اين خيره ياويسو تخايل مات
وسام : بلكي ايتفركش موضوعها وياخدها مانجا عسى ان تكرهوا شيئاً وهو خيراً لكم
امينه فتحت عليها الدار : توا وقت تكليم ؟
هناء نزلت التليفون : هياا جايا
امينه طلعت : خفي روحك
هناء ردت اتكلم : ياقلبي توا بعد انروح نحكو ولا نحكي معاك من غادي
وسام : اوكي تم دزيلي مسجات مره مره طمنيني ع الوضع
هناء صبت عند الباب : تمام به
وسام ضحك : ياجفاف
هناء : شن جفاف
وسام : شنو تمام به هذي ؟ ! تقول نحكي مع صاحبي وانتي مافيك عرق رومانسيه بكل 😂
هناء تضحك : مسمطك
وسام يضحك : اوكي يامانجا تبي شي ؟ 😂
هناء : سلامتك ياطير 😂
وسام : تشاو
_____________
8:30 م
امينه صبت : صارت اي حاجه طمنيني
سعاد : والله كان قعدتن للعشاء اميره اول مره اتخشلي حوش
اميره ابتسمت : والله ماني برانيه ان شاء الله مره اخرى
ياابله سعاد
سعاد صبت معاهن : سلمكن جيايات
اميره : ان شاء الله ربي يطمن قلبك
سعاد اتسقد فيهن عند الباب : مع السلامه انعنكن ماتغيبن
امينه قدام الباب : سلمك توا بكرا انخطم عليك
هناء تحكي مع غاليه فم الباب : خلاص رني عليا بعدين
غاليه : تمام
امينه : هياا بالسلامه عاد
المنجي درس السياره عند باب الحوش
وطفاها ونزل
بحت لقاه امينه واميره وهناء جايات من عند عيت غاليه
امينه بحتت فيه : خلاص روحت
المنجي مكشر : اها
وبحت في هناء : شن صار
هناء : مزال ماصار شي يرجو وخلاص
اميره : ان شاء الله مايموت يستر الله
امينه فتحت الباب وخشت : كملن كلامكن جوا
المنجي خش وراهن ويسكر في الباب : كنت غادي انا وانس
امينه تسلح : قالتلي سعاد ؛ شن صار باهي ؟
المنجي : الدكتور الي نعرفه قالي مزال على نفس الحال يرجو فيه ينوض ولا ايتحرك
هناء : ومافش اي بوادر ؟
المنجي هز راسه بمعنى لالا : كذا جيبيلي طفايه
________________________
10:30 م
مختار في سريره راقد والتلفزيون والع
سعاد خشت غطاته و اطفي في التلفزيون
غاليه تباوعتها : ماما
سعاد بصوت واطي : اششششش
غاليه اتوشوش فيها : كملت الموعين تبش شي اخرى
سعاد شايرتلها بيدها بمعنى لالا
غاليه طلعت وسكرت الباب
مشت للدار واطلع في دبشها مالدولاب
مروه مقعمزه ادير في زمالتو : بنات تخايلن مات عادل و حرقو الحوش
غاليه : فال الله ولا فالك ! كنك ع الليل ؟
مروه بحتت فيها : الواحد لازم يحط كل الاحتمالات قدامه
صفاء اتجفف في شعرها ع المرايا بالمنشف : يحرق الحوش يحرقنا معاه ماناش طالعين
مروه : كلام في .....
