رواية كبرياء شيخ الفصل الثالث عشر 13 بقلم زينب

احمد:طلعت من المستشفى ادور على جلال بس هو يعرف منو هما لكيته رايح فارت روحي اخذت تلفون عمار جان مخلي عد الولد واتصلت علي بس ما يرد ظليت احاول واروح واجي احس روحي طلعت بعد ما عندي صبر قررت اروح وحدي وشيصير خل يصير ردت اركب السياره وكضني عادل بالكوه هسه تنزل 

عادل: وين رايح يمعود انزل لخاطر عمار

احمد:روح من وجهي لا انزل ابتلي بيك

عادل: انزل هاي انه كدامك 

احمد:ما سمعته وحركت السياره وما اشوفه الا واكف كدام السياره كضيت بريك ونزلت وانه فاقد ما احس احد كدامي وركعته بوكسي ركض عليه وسام وابن عمي مرتضى وكضوني وهما يهدون بيه 

عادل:اتركوه خلو يكمل 

احمد: شفته واكع وينزف ركضت علي كومته وحضنته 

اسف يا خوي اعذرني ما جنت بوعي ليش وكفت كدامي خليني اروح أطفئ ناري

عادل: شلون اخليك تروح وحدك للموت كلنا محروك دمنا هو اخونا مثل ما هو اخوك لازم نتصرف صح تريدنا نصفك يم عمار بالمستشفى اهدى وخلينا نتفاهم 

وسام: احمد انت العاقل شـْ◌ـّـْلون تصرف هيج جا شخليت النا لو صار بيك شي ابوي هل مره صدك يموت خلينا نتصرف بعقل وكل شي ينحل وهذا العار والله بيدي اجيبه الك واخلي بين رجليك 

مرتضى : شيخ انت عندك صديقك بغداد النقيب دك علي وانطيه بس الاسم وهو ينبشه الك من جوه الكاع

احمد: صح نقيب كرار بس لازم اعرف اسم هذا العار بالاول

عادل: ارجع اتصل على جلال بلكي يرد

احمد: اتصلت علي محد يرد يمكن الولد تعبان ونايم هسه الوقت متأخر والساعه صارت ٢ بالليل كلت خليها على باجر هم اشوف عمار بلكي تتحسن حالته واطمأن علي ويبرد كلبي ياله اعرف اتصرف ورجعت لكيت ابوي مكابل غرفة العنايه وحالته حاله رحت اخذتله غرفه بالخاص حتى يرتاح خفت لا يعلك ضغطه 

يابه تعال ارتاح بالغرفه وانه اوكف بمكانك والولد يردون يشوفون عمار ما يقبلون يدخلون هوايه لهنا ولازم نقيس ضغطك

الشيخ:خلك مني هسه شسويت على ذولي الجلاب

احمد: لا تشغل بالك بويه بس اعرف مكانهم والله الا اضوكهم المر وهسه امشي وياي للغرفه ارتاح منا لباجر وداعت عمار الا اكلب بغـدا د عليهم جهنم 

الشيخ: امشنا بويه وخلي اخوتك يدخلون يشوفون أخوهم هسه كلبهم نار

احمد: صار بويه

اخذت الوالد للغرفه حتى يرتاح وصحت للمرضه قاست ضغطه لكته شوي صاعد حجت وياه وكلتله دير بالك حجي على روحك وانطته دوه شوي سكن ونام وطلعت دخلت الولد يشوفون عمار وظليت بره ظل بالي على امي اتصلت بيها دك التلفون انفتح الخط

الوووو 

سلمى: الو

احمد: منو وياي

سلمى: انه سلمى 

احمد: امي وين وليش تلفونها عندج 

سلمى: هي نايمه وانه ظاله يمها اخاف تحتاج شي 

احمد: كعديها اريد احجي وياها

سلمى: احمد بالكوه نامت خطيه خليها على باجر بس تكعد تظل بس تبجي 

احمد: كتلج كعديها اريد اسمع صوتها ما مطمن 

سلمى:براحتك لا تتعصب هسه اكعدها

رحت للشيخه كعدتها وكعدت مفزوعه عبالها صاير شي كتلها هاج احمد يريدج

الشيخه: الوووو بجي ها يمه بعد امك لا تكلي صار شي مو زين

احمد:ليش البجي هسه ردت اطمن عليج ظال بالي يمج واطمنج على عمار

الشيخه: احجي الصدك لا تجذب علي صوتك يكول غير شي 

احمد: لا يمه لو اريد ما اخليهم يكعدوج ويخلوج نايمه ردت اطمنج ولا يظل بالج

الشيخه:الله يريح كلبك مثل ما ريحت كلبي 

احمد:يله يمه لازم اروح وديري بالج على صحتج ولا تخافين كلها كم يوم وبس يتحسن تلكينا داير ما دايرج 

الشيخه: الله وياك يمه انتم ديروا بالكم على روحكم ولا تتهورون حلوا كلشي بالتفاهم والمسايس ولا تتصرفون بطيش

احمد: • ﺂنٰ شۨـِﺂءۙ ﺂللـِه۫ہ ٰلا تشغلين بالج بهل الامور 

سديت التلفون من الوالده وظليت كاعد الليل كله ولا اهدالي بال صار الصبح وانه ولا غمضت عيني رحت اطمنت على ابوي وعمار وحجيت ويه الدكتور كلي تعدى مرحله الخطر كلنا فرحنا بس قاطع فرحتنا الدكتور وكال المريض دخل بغيبوبه وكال احتمال يظل ايام بهل الحاله ظلينا ندور عليهم جلال طلع ما يعرفهم يعرف بس من االاسم اتصلت على نقيب • ̷ڪٰ͜رٰآر وهو هم ظل يدور عليهم بس ماكو تكول فص ملح وذاب ظلينا ايام على هل الحال وانه افتر بشوارع بغداد ادور عليهم وعرفنا بيوتهم بس ماكو طلعوا شاردين عرفوا من طلاب الكليه انو عمار ابن شيوخ ومن البصره وهما ما يضيع الهم حك وصحى عمار من الغيبوبه وتحسنت حالته قررنا نقله نكمل علاجه بالبصره لأن ابوي كلش تعب وهو ما يرضى يفاركه وامي قررت تجي لبغداد فخفنا عليها وقررنا نرجع وكلفت نقيب كرار يظل يكمل دواره عليهم وخليت كم واحد من زلمنا يراقب بيتهم وقبل لا نرجع قررت اشوف جلال وافتهم شنو صار بالضبط اتصلت بي وهو اجى للمستشفى هم حتى يشوف عمار قبل لا يرجع للبصره وصل وسلمت علي وسألته

شنو صار بالضبط

جلال: والله شيخ شكلك اخوك ترى هم غلطان 

احمد: شلون فهمني كل الصار

جلال: اخوك حب بنيه بالكليه وفاتحها اكثر من مره وهي كل مره تصده وتكله انه ما اصيرلك ابعد عني وعمار عاند لوهي لو ماكو وانه اكثر من مره حذرته وكتله خل تولي شوف غيرها هاي البنات تارسات الكليه بس هو ما قبل يكول انه الشيخ شلون ترفضني 

احمد: ما اعرف ليش من يسولفلي حسيته نفس قصتي ويه كمره بس الفرق بينا هو يمكن يحبها بس انه صارت شغلة عناد 

زين ليش رفضته لازم اكو سبب وهو يحبها لو عناد بيها 

جلال : يعشقها مو بس يحبها اول مره اشوف عمار هيج متبهذل راد يعرف السبب بالبدايه ما كلتلها بعدين حاول يضايقها هواي مللها وكلتله انو هي مخطوبه لأبن عمها 

احمد: هي صدك مخطوبه

جلال: بالبدايه صدكها وابتعد عنها وكال ما يصير اجبرها علي بس بعدين سمع من الطالبات صديقاتها انو هي تتباهى رفضت عمار وهو ابن شيوخ وجذبت علي كلتله مخطوبه بس حتى يفك عنها  

احمد: يعني ما مخطوبه وكل هذا فلم

جلال: اي قرر يحجي وياها بس هي رفضت وهو عاند سحبها من ايدها بالكليه كدام الطالبات وأخذها لمكان بدون رضاها وسألها ليش سوت هيج

وهي ظلت تصيح علي وتهدد وتكله انه من كل عقلك اخذك انت المعيدي الشروكي وهو فار دمه ضربها راجدي وعافها ورجع وكال بعد لو تظل بس هي بنيه بالدنيا ما اخذها انه تعيرني بأصلي من تروح فدوه للتراب اليمشي علي كل واحد شروكي

بس هي وصلت الخبر لأهلها وكلتلهم على كل شي حتى ضربة الراجدي

طبعا ماكو اهل يرضون هيج يصير بنتهم واجى اخوها وابن عمها وياهم كم واحد بس شافوه طلع من الكليه وهما استلموه انه جنت واكف يمه جتفوني....

احمد: لا تكمل بعد ما اتحمل اسمع اشيط بالزايد 

اخ من جنس حواء كل هل المصايب من وراجن دخلنا للمستشفى وسلم على عمار طبعا عمار كوه يحجي بعده ما صار كلش زين الدكتور كال بمرور الايام يرجع كلشي طبيعي 

رجعنا البصره طبعا نقلنا عمار بسيارة اسعاف وصلنا كبل رحنا للمستشفى حتى يكمل علاجه لكينه امي كدامنا هي وشداد ولد عمي وخوالي بس شافت عمار طلت تبجي كوه سكتناها طبعا لو شايفته على هذيج الايام جا نجلطت

هما استلموه وانه وابوي والولد رجعنا للبيت كلش تعبنا كتلهم راح اروح اسبح وارتاح واجي 

كمره: رجعت من بيت الشيخ لهلي عشتوا بيوم عقدي صارت هل مصيبه جا بيوم العرس شيصير سولفت لهلي كلش انقهروا على عمار وظلوا يوميه ابوي والولد يرحون لبيت الشيخ ويطلون يمهم لليل بحكم احنا صرنا نسابى لازم يوكفون وياهم بالحلوه والمره وانه وامي وخالتي يوميه نروح للشيخه ونظل يمهم لليل ونرجع وطبعا ما اخلص من مضايقات سلمى حتى امي انتبهت عليها والشيخه هم بس ما تكدر تحجي ولا انه اشتكيت هما مصيبتهم مصيبه بس اتجنبتها ومرت ايام حاولت احجي ويه احمد تركت الحقد على صفحه كلت مو وكته ودزيت اكثر من رساله واتصلت اكثر من مره بس هو ابد ولا عبرني ولا كلف نفسه يدزلي رساله ولو كلمه وحده على الاقل بس يطمني قررت اعوفه انطيته العذر كلت هو بيا حال هسه اكيد ملتهي ويه اخوه انه شنو كجا مرحبا كلي خلك وحده يكرها بس حزت بنفسي من اسمع سلمى تحجي للنسوان تكللهم يوميه احمد يتصل بيها حتى يطمن على امه واوضاع البيت كلش انقهرت حسيت نفسي صدك غريبه عنه مو بس غريبه لا ودخيله عليهم بعد قررت بس يجون ما اوصل بعد لهنا وكافي خل يصير زعل انه هم بشر من دم ولحم وعندي احساس 

وبيوم الرجعوا من بغداد تفاجئنا رجعوا للبيت جنا كاعدين بالصاله احنا النسوان سمعنا صوت السيارات كمنا نشوف وطلعنا شفنا الشيخ ولده نزلوا الشيخ جان كلش تعبان وكوه يمشي واحمد حيل متغير ومبين علي التعب وضعفان ومسومر وجها ما يكصه السيف هو عاد جان عايز والولد هم ما يتحاجون هذا وسام الوجها كله يضحك • ﺻـِﺼﹷٰﹻﺂﺂر ازيد من احمد والي يحجي وياهم لو يجاوبوه لو يحكروه تلكتهم مرت عمهم وسلمى سلمت عليهم كلهم ردوا السلام بس احمد رفع ايده ودخل ولا جنه يشوف احد ردت اسلم علي بس من شفته خفت وتراجعت وهو عبر من يمي كلش ولا جني موجوده  

باوعتلي سلمى بشماته وعيونه تكلي حيل بيج انه من شفتها غوركن عيوني بالدموع وكلت لأمي هسه نرجع بعد ما ابقى دقيقه هنا

ام كمره: ولج يمه شبيج شجاج نرجع جا احنا طايرين عيب من الشيخه اذا سمعت احنا رايحين شتكول علينا 

كمره:خل تكول الي تريده ما اظل هنا اذا ما اجيتي وياي هسه اخابر على واحد من اخوتي يجي ياخذني

ام كمره: ما اروح ويـٍّْـٍُّّـٍّْ❥ـاج✟ ولا انتي ترحين ولا تعاندين الناس ما نافصيج هما بيا حال وانتي تتمضيكين 

كمره: يمه والله مختنكه ما اريد اظل جا هو غصب

ام كمره: اي غصب ظلي وسكتي وروحي ساعدي البنات بالمطبخ لحد مازيصير غروب وكلنا نروح

كمره:باوعت لأمي بحقد عفتها ورحت للمطبخ شفت خالتي هناك استغربت من شافت حالتي

فهيمه: شبيج خاله وجهج مكلوب جنج وحده عجوز ما كول عشاها

كمره: ماكوشي خاله ردت اروح للبيت وامي ما قبلت 

فهيمه: ليش خاله العالم توها جايه من ضيم لزومن نظل وياهم هسه تجيهم وادم هواي والبنات ما يلحكن عليهم وانتي جنتهم ما يصير ترحين وامج تصرفه وياج عدل

كمره: جنتهم لو صخلتهم ليش ما تسكتين يا خاله فدوه اروحلج انه 

فهيمه:ولج ترحين وتعوفين الساحه لهاي سلمى وامها العوجه حتى تظل تسرح وتمرح لحالها بالبيت والشيخه ما موجوده وتصير هي ام الراهي 

كمره:وشعلي بالبيت عسى ما يحترك قابل انه منو

فهيمه: شلون ٲℓانــتيہ منو ولج ٲℓانــتيہ مرت الشيخ لازم تصيرين الكل بالكل

كمره: خاله والله مرات احس انتي داخله على طمع يا شيخ يا بطيخ

خاله انه وحده ما معترف بيه دوليا خل يحس بيا اول مره

فهيمه:انتي بهاي فهاوتج كلشي راح تضيعين وبعدين تظلين تعضين اصابعج ندم وكولي ما حذرتج 

كمره: خاله بيناتنا الحجايه بس اخلص منا اذبح خروف لوجه الله وتعالى واروح مشي منا لكربلا 

فهيمه: صمي حلكج وسكتي محد راح يوديج بداهيه غير هذا لسانج يرادله كص 

كمره: حطيت ايدي على حلكي وكتلها صميت وما احجي شي بعد عفت خالتي تكرك ويه النسوان المطبخ صار هوسه ناس طالعه وناس داخله كمت ويه البنات عاد الهي روحي بلكي يمشي الوكت ويصير الغروب حتى ارجع لبيتنا يا زوج بعد الي يجي هنا تعبت وكعدت على صفحه يصير بين المطبخ والدرج تعبت مو من الشغل من حجي النسوان والبسامير الاسمعه منهن وانه ابلع واسكت كاعده وخاله ايدي على خدي دخل شداد شفته من بعيد ردت اكوم وما اشوف غير احمد نزل من الدرج هو تفاجئ بيه ظليت واكفه متصنمه لا اكدر اروح ولا اكدر ارجع وهو بس يخوزر بيه ابده يفترسني انه جنت مسويه الشال مثل العصابه بس على راسي لافته منزلته على ضهري بحيث ركبتي كلها طالعه شداد بس لمحني دار وطلع ما ظل واكف وما حسيت غير ايد سحبتني وصعدني الدرج بس بكل قوته سحني سح وصلني للغرفه فتح الباب وشمرني شمر بالكاع وكعت على وجهي بحيث طك خشمي دم حسيت بحروره نزلت بوجهي رفعت راسي شفته واكف كمت وكفت وما اشوف غير راجدي اجاني طير نص وجهي من قوة الراجدي ظليت كاضه وجهي رأسا نزلت دموعي ردت احجي بس هو سكتني

احمد: اش ولا كلمه ولا نفس اي كلمه تطلع منج انوب بالحزام

والله لو ما العالم برة جان عرفتج منو احمد 

كمره: ظليت ابجي بحركه وظليت اشهك والدم ترس وجهي وهو ولا عباله 

درت وجهي وردت اطلع وهو رجع كضني من زندي وحجى 

احمد: وين موليه بهذا وجهج 

كمره: معليك بيه عسى احترك

احمد:وحركتهم 

كمره: مسحت وجهي بأيدي نترست دم راد يلزم ايدي سحبت روحي منه وكتله

لا تحلم تلزمني بعد وما تشوف وجهي بعد ولا عبالك انه جايه هنا بإرادتي ترى مجبوره والله 

هو ما اهتم الي سحب ايدي ودخلني للحمام وفتح الماي وظل يغسل بوجهي 

شويه ودك نقاله سمعته كللهم ربع ساعه وانه يمكم راد يرجع علي كتله روح شوف شغلك عاد هو طبك باب الحمام بسرعه وطلع ظليت كاعده بالكاع ابجي بحدي منا لمن شبعت يمكن ظليت كاعده ساعه بالحمام محد يدري بيه ردت اطلع رجع خشمي صب دم غستله وطلعت عاد جبسته بكلينس شويه انكطع بس حسيت خشمي ورم طلعت من الغرفه نزلت تلكتني هديه شافتني تخبلت كلتلي شبيج وجهج شصاير بي انه وجهي فضيحه بسرعه ينكلب احمر كتلها ماكو شي انطكيت باب الحمام وخشمي نزف دم سألتها على امي لأن بس تدري تظل تلطم كالت يم النسوان ماكو غير خالتي هي تنقذني سألتها وينها كالت بالمطبخ كتلها ما اكدر ادخل للمطبخ بهذا وجهي اخذتني عاد هي لغرفتها وراحت صاحته الي

فهيمه: ياااا عزااا خاله هاي شصاير بيج 

كمره: خاله عفيه اخذيني للبيت ما اكدر اظل احس خشمي ورم

فهيمه: اي غير تنتبهين هاي شجاج وين اخذج هسه بهل ليل واخوانج ملتهين ويه الوادم 

كمره: خاله خابري على حسين فدوه بعد ما اتحمل بس كليله لا يحجي خل يجي ياخذني بسكته وانتي وصلي الخبر لأمي بس لا تخوفيها 

فهيمه: ظلي نايمه ورفعي خشمج راح اخابرله وانتي هديه جيبيلنا شوي ثلج 

هديه: صار 

كمره: وفعلا خابرت خالتي اجاني حسين خطيه شافني وظل يرجف اخذني طلعنا من ورى البيت حتى لحد يشوفنا راد ياخذني للمستشفى كتله ما يحتاج بس وصلني للبيت احس الدم انكطع من خليت علي ثلج 

احمد: وصلت للبيت جنت كلش تعبان ردت بس اوصل حتى شويه اريح جسمي ما انتبهت على احد صعدت كبل سبحت وبدلت ملابسي وتمددت شويه ردت انام ذكرت المستشفى لازم ارجع محد ظل يمه اخواني كلهم رجعوا وياي كتلنا التعب نزلت ويا ريت ما نازل شفت كمره كاعده على صفحة وخاله ايدها على خدها وصافنه ردت اعبرها ما كدرت شفت شداد دخل وشافها بس هو مباشرة طلع وهي مثل التفاجأت ظلت ما تعرف شسوي من شافتني انه هنا عقلي وكف من شفت شدت شالها وركبتها طالعه تلج وشويه من صدرها ما عرفت شسوي سحبتها حيل وصلتها للغرفه وشمرتها للكاع ما همني شيصير بيها طلعت حركتي كله بيها وما خليتها تنطق ادري بيها من تحجي لسانها متبري منها عبالك سجين بس من شفت وجها انترس دم صدك ضجت من تصرفي قسيت وياها كلش رادت تطلع ما خليتها سحبتها غصبن عنها ودخلتها للحمام جاي اغسل وجها ودك التلفون يردوني بالمستشفى عفتها وطلعت بس ظل بالي يمها وصلت للمستشفى لكيت الامه كلها كدامي رحت يم عمار شفته نايم 

امي هم يمه شافتني وكالت

الشيخه: يمه شجابك وانت تعبان

احمد: يمه شلون اعوفكم اصلا ما اخذت عيني نومه 

الشيخه : انه يمه لا يظل بالك ارجع يمه ارتاح باجر الوادم كلها تجي ينهد حيلك وما تلحك ترتاح 

احمد: ان شاء الله منا لشوي وارجع بس يجي واحد من الولد

فعلا اجى وسام هم جان تعبان بس كلي ارجع ارتاح انت الشيخ وبأجرما تلحك تحك رأسك ظليت شويه ورجعت الناس الي عدنا خفت ظليت ادور بعيوني بلكي الكاها ماكو ظل بالي يمها انه شجاني وهيج تصرفت وياها سألت هديه عليه كالت راحت من زمان ظليت الوب عليها صعدت للغرفه اول ما دخلت شفت المكان الوكعت بي تذكرت ولعنت روحي هي شنو ذنبها بس والله شطت من شفتها عبالك جاي تعرض وهي صايره تخبل تجذب ما تحملت شداد يشوفه هيج وانه اعرفه هو شنو من عشك يعشكها كضيت التلفون ودزيت رساله ماكو جواب وظليت ادز حركت التلفون بالرسايل وهي ماكو دكيت هم ماكو اخر شي طلعلي مغلق عاد انه فرت شلت التلفون وركعته بالكاع......

كمره: رجعني حسين لبيتنا وطول الطريق يقنع بيه اروح للمستشفى وانه ما اقبل كلش انغثيت ونهانيت بلا سبب وهاي مره ثانيه يضربني انه شنو ذنبي ليش هيج يعاملني انه بالكوه جاي اغصب روحي علي اكول يجوز انه متوهمه يجوز يطلع خوش إنسان يجوز بمرور الوكت اتعلم علي بس ماكو فايده انه مو عبده عنده كلشي واله حد وانه احس حدي لهنا وبعد كافي قررت بعد ما اشوفه ولا اسمع صوته ولا اروح لبيتهم واول فرصه تسمح الي اطلب الانفصال انه عيشتي وياه مستحيله وصلت للبيت رحت بدلت ملابسي لأن كلهن دم وغسلت بَس الوجع ابد ولا بطل ظل يزيد دورتلي على مسكن حتى بس شويه يهدأ الوجع وانام وارتاح بس من التفكير تمددت على الفراش وغفيت وما حسيت غير امي يمي تمسح على راسي خالتي كلتلها انه نضربت بخشمي بالباب فتحت عيوني شفتها بسرعه نزلت دموعي وظليت ابجي من كل كلبي وشمرت روحي بحضنها كلش مهضومه ولكم ما متعلمه على الاهانه والضرب انه كمره المدلله عزيزة البيت عاد هي نشغت خطيه

ام كمره: شبيج يمه ليش تبجين هيج احد غاثج 

كمره: لا يمه بس ما اكدر اكمل ويه الشيخ يمه حبوبه خلصوني منه

ام كمره: فهميني شنو صار وليش هيج تناشغين لازم صاير شي يمه مو منه لله تردين تعوفين الرجال

كمره: يمه ما اكدر على عيشتهم صعبه علي هما شيوخ واحنا ناس عاديين مو كدهم والله يمه بكلبي شكللها سحني وضربني وكسر خشمي وهسه تكلي شنو السبب وتظل تجر طول وعرض ويدخل شداد على الخط وتصير سالفه

عريضه وطويله وشلون اخلص منها

ام كمره: هذا مو حجي يمه انتي صوجج لو من البدايه رافضه جان محد ادخل بس هسه صار بينكم عقد سيد ومحكمه واذا تطلكتي شيفكج من حجي الوادم الما ترحم ترى ما يذبون الصوج بي يذبون عليج 

كمره:يمه انه مو اول وحده تنفصل قبل الزواج وهذا حقي ردت اتعود علي بس ما كدرت احسه لا انه ثوبه ولا هو ثوبي 

ام كمره: يمه تعوذي من ابليس انتي هسه شفتي منه خلي يطلعون من المصيبه الصارت عدهم والله كريم هسه همه مو بحال مشاكل ثانيه يا بنيتي وهسه كليلي شلون نضربتي بالباب ما شفتي 

كمره: يمه جنت تعبانه انتي تعرفيني من اتعب بعد ما اشوف دربي وهذا الصار

ام كمره: بس شو جاي اشوف خشمج ورم وجاي يصير مكانه زراك بس لا انكسر

كمره: لايمه يجوز توها حمت الركعه طلعت هسه منا لباجر يصير زين 

ام كمره: • ﺂنٰ شۨـِﺂءۙ ﺂللـِه۫ہ ٰيمه منا لباجر اذا ما صار زين اخذج للدكتور شو انه ما مطمنه 

كمره: الله كريم يمه 

ام كمره: يله يمه ارتاحي ولا تنامين على وجهج لا يزيد الورم 

كمره: طلعت امي ورجعت تمددت وشفت نقالي جنت مسويته صامت شفته هو حضرة الشيخ دز رساله ما اكترثت انوب زادت ولا همني بعد الصار اليوم جكد جنت اكرها انوب صار الكره قاطات ولا خفت منه اخر شي اتصل وما رديت وظل يتصل كلت احسن حل اغلقه وارتاح منه بعدها نمت

وفزيت الصبح على وجع مو طبيعي وكمت اشوف وجهي بالمرايه لكيته مورم بالزايد وانوب ظل ينزف خفت ركضت لأمي وهي شافتني خطيه تسودنت جانت نايمه فزت مرعوبه وابوي هم خطيه ركض علي كض راسي وكلي رفعي خل ينكطع الدم بويه وصاح على امي ركضي على ولدج كعديهم خل ناخذها للمستشفى

راحت امي كعدتهم كعدوا خطيه مفزوعين وشويه انكطع الدم ركضت امي خطيه جابتلي شال وعبايه كتلها خل اغسل وجهي اول مره غسلت ولبست واخذوني للمستشفى راحت وياي امي ابوي واخواني اثنين وصلنا للمستشفى دخلت شافتني الدكتوره بسرعه عرفت كالت مكسور بس لازم ناخذ اشعه حتى نتأكد وفعلا اخذت الاشعه وطلع بي كسر وكتبتلي على عمليه ضروري 

اذا يظل هيج يطيب على عيب واحتمال الدم ما ينكطع انه هنا خفت ورفضت العمليه وامي لطمت على خدودها

ام كمره: ولج ليش ما تردين العمليه الدكتوره كالت بسيطه ما تخوف

كمره: ما اسوي خشمي وبكيفي

ام كمره: وتردينه يظل اعوج

كمره: خل يظل انه قابله

ام كمره: لا مو بكيفج احنا هنا طراطير يمج ما تحسبينا حساب

كمره:ما اسوي لا تلحون علي 

ابو صلاح : بويه انتي تسودنتي اكو وحده تخرب وجه بيدها

صلاح: خويه كفي الشر محد ينظر غيرج واذا طاب على عيب بعد ما تكدرين تسوين العمليه لا تخافين احنا كلنا وياج 

ام كمره: مو بكيفها هسه اخابر على الشيخ بس هو دواها

كمره: الشيخ ماله دخل بيه وما اريد اي واحد يكله 

ابو صلاح: ليش بالله ما دخل هو مو رجلج ولزوم يعرف انه ما عدي استعداد اظم علي شي انه مو كده

كمره: بويه هو هــ͒ــسهہ بيا حال حتى يفضالي لا توصلوله خبر انه اكله

صلاح: شوكت تكليله من يعيب خشمج ويتشوه وجهج هااا شوفي انه بعمري ما غثيتج وما فكرت يجي يوم اغثج بي بس هو لازم يعرف

اذا ما كتيله انه بنفسي اكله

كمره: خويه والله مو قصدي بس هما هسه عدهم طلابه ما أريدهم ينشغلون بيه خل يطلع ابنهم من المستشفى ويصير خير 

صلاح:جا خوش اذا ما تردين الشيخ يعرف تسوين العمليه واذا رفضتي انه هسه بتلفون واحد اكله كلشي

كمره: ماشي راح اسويها بس اذا كتوله والله ما اسوي 

ابوصلاح: لا بويه هذا هو محد يوصله من عدنا بس انتي لازم تكليله ما يصير تضمين علي شي 

كمره: • ﺂنٰ شۨـِﺂءۙ ﺂللـِه۫ہ ٰ

ظليت ساعتين بالمستشفى ضربتني إبره على مود لا ينزف بعد وكتبتلي دخول مستشفى على مود العمليه خلال هذا الاسبوع ورجعت لبيتنا وأهلي كل العاده راحوا لبيت الشيخ حتى يساعدوهم وشددت عليهم ما يوصلون خبر واذا احد منهم سأل علي هاي اذا تذكروا يطلعولهم اي عذر

احمد: من بعد ما فلشت التلفون ردت بوكتها اروح لنص بيتهم واكمل عليه واملخها تملخ بس نعلت الشيطان وكلت وين ترحين افضالج انه الج وهاي العنتكه الا اطلعها من خشمج تمددت ونمت بسرعه من كد التعب التعبناه وثاني يوم كعدت من الصبح سبحت وبدلت ونزلت للمضيف الناس ما فكتنا انه وابوي لازمين المضيف واخواني بالمستشفى وامي للنسوان ما الحك حتى اروح للمستشفى اشوف عمار بس اسأل علي بالتلفون طبعا جديد لأن ذاك صار مفلش ﭑلحٰٰ͜حمٰدللـّٰ̲ۿۃٰۛ ،'بدت حالته تتحسن وصار يمشي على حيله ظل تقريبا اسبوع وقرر الدكتور يطلعه كتبله على خروج وكمره طول هذا الاسبوع ما شفتها ولا سمعت عنها خبر وكلما اسأل عليها اخوانها يكلولي زينه الله شاهد اخوانها دره ما تتركونه ابد وابوها ونعم منه ما عاف المضيف الناس تاركين شغلهم وحلالهم وبيتهم ومكابلينه وامها وخالتها نفس الشي ما تركوا امي يوميه هما يمها بس هي ام راس اليابس بايعه ثكل علي بس وين تروح مني كلش محمل عليها وبيوم طلعنا عمار من المستشفى للبيت ابوي سوى عزيمه لوجه الله تعالى يكول ما دام رجع وليدي سالم من الموت كله يهون وأما بخصوص ذولي العار ابد ما ناسيهم النقيب كرار كل يوميه اتصل بي يكول محد موجود بس النسوان بس واصله خبر ان هما رايحين الشمال هناك شاردين وزلمنا تراقب بيوتهم ردت اسافر الشمال كلها عارضت واولهم ابوي وامي ابوي كال هسه تخلص فلوسهم ويردون جكد يظلون شاردين طول العمر بس انتو خلو عينكم عليهم بس يجون تكضونهم قبل الشرطه حسابنا وياهم يختلف وعمار اجل هذا الكورس فاتته امتحانات النهائيه وحتى الامتحانات الشهريه وبيوم جنت كاعد بالمضيف اجونا زلم وشيوخ من العماره حتى يتحمدون النا السلامه اتصل علي صلاح شفته ستغربت اول تالي صلاح يتصل بيه شلته

الووو 

صلاح: الو شيخ انت فاضي رايدك بشغله

احمد: امررر خويه

صلاح: ما يأمر ﻋﻠﻴﻚ ظالم انت وين هسه

احمد: كاعد بالمضيف يمنا شيوخ ليش صاير شي

صلاح: هااا جا غير وكت اتصل بيك

احمد: كول شصاير ظل بالي 

صلاح: خويه اطلع من المضيف وانه اكلك ما اريد احد يعرف

احمد: خلص طالع 

ترخصت من العالم وطلعت وكتله احجي

احمد: خويه احنا بالمستشفى كمره ما رضت نوصلك خبر بس انه الله شاهد ما قبلت لازم يصير عندك علم هي ما تعرف انه هسه كتلك بس من تعرف هسه يمكن بعد ما تحاجيني 

احمد: ليش شصاير احجي لا تخوفني

صلاح: قبل ايام خشمها نضرب بالباب ما نعرف شلون من حجيها وظل ينزف ورم وما انطع النزف لحد ما أخذناها للمستشفى وطلع عدها كسر وكتبتلها الدكتوره على عمليه وعمليتها اليوم 

احمد: صدك تحجي انت 

صلاح: هذا الصار شيخ

احمد: قبل جكد صار هذا الحجي

صلاح: تقريبا عشر ايام

احمد: وليش ما عندي علم ليش اليوم بالذات

صلاح: ما قبلت نوصلك خبر وهددتنا اذا نكلك ما تسوي العمليه والدكتوره كالت اذا ما تسويها يطيب على عيب والنزيف يستمر متقطع وابوي خاف عليه كاللها ما نوصل خبر منا ليوم العمليه 

احمد: لوين تريد توصل بهذا تصرفها من كل عقلها تعاقبني 

صلاح: ليش تعاقبك شيخ انت شلك دخل هي ثوله ما شافت الباب كدامها انركعت بي هي دومها هيج ما تحافظ على روحها

احمد: انتم وين هسه بيا مستشفى

صلاح: خويه ما يصير تعوف خطارك احنا كلنا يمها كلت انطيك علم حتى تظل بالصوره

احمد: ليش هي خلت صوره والله اختك راح تخبلني وضاربتني بعرض الحايط بس يصير خير انه شويه واجي

صلاح: خويه انه ما خابرتلك حتى تجي اخاف تشوفك وتهون هاي مخبله كلشي يطلع منها خويه ظل يم خطارك وانه أوصلك الاخبار

احمد: مو بكيفه انه راح اجي واشوف شلون تهون لو اعرف اكض خشمها بيدي انت بس كلي اسم المستشفى ومعليك 

الشيخ: ها بويه خيرك يا مسشتشفى ليش عفت الوادم جوا اجاك خبر من ذوله الجلاب

احمد: يا ريت يابه

الشيخ: جا منو بالمستشفى

احمد: بويه تكدر تغطي علي ساعتين بالمضيف اروح واجي ما اطول

الشيخ: اي غير تفهمني المن حتى اعرف اتصرف

احمد: سولفت لأبوي كلشي 

الشيخ:روح بويه مريتك هاي لازم تشوفه بعد هي مسؤله منك ولا تلومها على تصرفها شافت عدنا مصيبه ما حبت تشغلنا وخصوصا انت 

احمد: راح اشعل عشيرتها كلها 

الشيخ: شجالك بويه البت بيا حال ولا تروح وحدك اخذ واحد من اخوتك وياك

احمد: ما يحتاج رايح شوي واجي 

رجعت سلمت وكتلهم صارت عندي شغله مستعجله ما اطول عليكم ورحت للمستشفى وانه الوم بروحي كله مني الصار هسه تلكاها كارهتني بكد رحمة الله عاد هي شلون جانت تحبني وصلت للمستشفى لكيت صلاح يتاني بالباب اجى جان خايف من ردة فعلي 

صلاح: شيخ والي يسلمك لا تحاسبها هسه خل تسوي العمليه وبعدين شتريد تسوي سوي

احمد: لا تخاف بس احاجيها واشجعها يجوز خايفه هسه مو وكت حساب خل تطلع من العمليه انه الها الا اكسرله الها من

الفصل الرابع عشر من هنا