رواية علي حافة الثأر الفصل الرابع عشر بقلم زينب نور
صفن بوجهي : شبيك مو هذا الدا تريده من البارحة ؟
- شنو الغير رأيج ؟
-هيج شفت
- اكو احد جوا قنعج لو شنو الموضوع ؟
- اكولك الغي الموضوع اني هم صوجي اقبل بواحد مثلك امشي
عفته ومشيت ..
هو مشى ورايا صعدت الباص
كعد يمي .. بقى ساكت تنرفزت .. حجيت : صوجي جبتك ويايا اصلا لو جاية وحدي كان الشفرة صارت اهدى واركز ..
- اكلج انت عاد لا تذلينا .. لا كايلج حطي اسمي ولا رايد سفر كلساع ناطة معيرتني جاي بشغل وانت الطلبتي
- لانك متستاهل
- ما استاهل شنو
- اسكت ما اريد اسمع منك ولا حرف
دار وجهه ..
اللي بالباص قدم فناجين كهوة ع الوفد باوعلي : تريدين ؟
درت وجهي منه .. كاله : اثنين
اخذ منه ولزم فنجانه وفنجاني وندسني بأيده : اخذي
فزيت دا اكوله ما اريد بس ايده بصف ايدي بسرعة انضربت ايده اتبدت الكهوة على بنطرونه
فز من الحرارة ولزم بيده
ارتبكت بسرعة وكتله : العفو مجان قصدي
دفع ايدي منه وصاح : العفو يابه بس كلبنكس اذا عندك واخذ هاي
همست - شبيك قابل متقصدتك
انت ليش اسلوبك هجومي
- ترا حركتيني
- قابل ادري وحركتك
اجه وجايبله كلينكس مبلل واخذ منه الفناجين
صار يمسح ببنطرونه .. واني اباوعله : اني مو كتلك ما اريد شكو جبتلي ؟
- هسه كافي !
- لا تكلي كافي يلا
دمعت عيوني
- هسه شبيج انت
- وخر
- ذب الكلنكس وضل يمسح ببنطرونه ويعدل توسخ باوعلي جرت دموعي : لج بابا شبيج
- ما بيه شي
- جا ليش تبجين ؟
- معليك
- هسه حرك صغير ما يسوى عوفي
- اي بس اني ما متقصدة
- واني كتلج متقصدة تهمتج ؟
.. شو بالله
لزم ايدي واني امسح بخدي
نترته : وخر يلا لتلزمني
جر ايدي قوي ولزمها بيده : عوفها لتخلي صوتي يطلع
- معناها اسكتي
- ما اسكت عوفها
عصرها حيل : ايدي ايدي ايدي ايي
رخى ايده وسحبها ودنك باسها : اسكتي كافي
- اي دعوف ايدي يلا
- ما اعوف
-اييييي
جريتها قوي .. ضل يباوع كدام بس الإبتسامة بانت بملامحة .. حجيت : وحجيت على شنو دا تضحك ان شاءالله ؟
باوعلي ابتسم : مضاحك
-لااااا
دنك وهو يكح كصته باصبع واحد ويضم شفايفة وحدة باللخ علمود يخفي أبتسامته ..
اخذت نفس ودرت وجهي للشباك اباوع ..
عبالي حيطير من الفرح من اكوله موافقة .. لا الموافقة ترضيه لا الصد يعجبه .. جداً ضايقني
متعرف شيريد حتى من يبتسم ميحجي شعوره بصراحه ..
وصلنا الفندق ..
اني نزلت وطلعت كبل .. صاح : وين تعاي
عفته ومشيت ..
لكيت كم واحد واكف عند المصعد ..
اجا وكف وراي هو .. توقعته يحجي ما حجه ..
دخلت المصعد هو وراي .. داس رقم الطابق والويانا واكفين .. حيل اتضايقت من سكوته .. وعدم اهتمامه .
انفتح باب المصعد طلعت مشيت هو طلع ورايا وصلني للـغرفة كال : راح اطلب منهم يوصلون الغدا لغرفتج
- ما اريد غدا ولا اريد اشوفك تمام ؟
- تمام
سديت الباب بقوة بوجهه ودخلت ..
بدلت وتوجهت للسرير كمت اتكلب بمكاني .. اريد انام بس عقلي مشغول بيه .. وبتصرفاته العبثية .. تضايقت كلش حسيت نفسي محتاجة ابجي .. محتاجة اطلع العبرة اللي ابلعومي والضيق اللي بصدري انفس عنه .
رن التليفون ..
باوعته هو .. انطيت رفض
رجع اتصل مرة ثانية .. دست رفض بقوة وشمرت التليفون بعيد عني وكعدت ابجي ..
بجيت لحد ما ارتاحيت ودخت ونمت ..
للساعة ٨ ..
اندكت باب الغرفة
كمت من مكاني كوه وفتحت الباب .. شفته كدامي
- شرايد
- بدلي ونزلي
- ما اريد
حجيتها وردت اسد الباب
لزمه : كلت بدلي ونزلي راح اكعد جوا انتظرج اذا ما نزلتي
- اي اذا ما نزلت شتسوي
- ساعتها تعرفين شسوي
- لا ترا انت كلش شفت نفسك
دا احجي عافني ومشى
طلعت وراه .. كتله اني مو احجي وياك
خزرني وهو يزمخ : كاميراااات منا طبيييي
دخلت بسرعة طوبكت الباب قوة
امداني واني منين خفت وشكو واذا كاميرات قابل طالعة عريانة لابسة هدوم .. والله يا الله جايبته مساعد وحماية لو جايبته يتحكم بيه ويخزرني هذا شحاسب روحه
دخل يولي ..
مشيت للسرير تمددت
حسيت النوم طار من عيني
الله لا ينطي حتى بنومت ممخليني مرتاحة
.. كله صوجي والله صوجي محد كبره وصعده فوك راسي وخلا يتصرف هشكل غيري .. اني الانطيته مجال بس سهلة والله لا انزل اعلمه شلون يحترم نفسه وميتعدى حدوده .
كمت غسلت ورفعت شعري ولبست جينز وتيشيرت عريض وبوتين ابيض ونزلت .
لكيته كاعد بالمطعم شافني ابتسم
تقربت منه .. حجيت : اسمع
- انت اسمعي تاكلين ونطلع لو نطلع وتاكلين برا ؟
- لا انت التسمع افتهمتتتتتتت
- يلا ماشي اسمعج كولي .. كلي اذان صاغية امري
- هسه صارت صاغية .. انت ما تجي بالعين واغاتي
- اني وياج اجي بكلشي والله.. عين واغاتي عين حمرة اليعجبج انت تأمرين بيه .
- اسلوبك معاجبني ايد
- اغيره وليهمج
- انت شرايد
- رايدج
- انت چذاب لا رايدني ولا شي انت دا تلعب عليه
- تمام ست .. اسف
- لا تكول ست خوش لا تكول يلا
حتى الست منك ما اريدها
- ان شاءالله .
حجاها وكام من مكانه
حجيت : وين ؟
- شتريدين ؟
- من احاجيك مترد عليه بسؤال تجاوبني كموظف مهني خوووش
- تمام ست طالع اتمشى .. هسه عاجب ؟
- وانت جاي هنا تتمشى لو تساعدني وتحميني
- يلا كومي خل احميج
- انت شنو هذا المنطق الهمجي
ثخنت صوتي كومي يلا خل احميج
هذا مو اسلوب
- هو اني ادري ما تجين غير باسلوبي
حجاها وجرني من الكرسي بقوة ..
صحت : ايييي وخر
حط ايده على حلكي : اش شبيج ترا ناس كاعدة اتخبلتي
- انت التخبلت وانت المخبل مو اني وخر مني
- دمشي كدامي يلا
- ما امشي ومعاجبني امشي
- لا تمشين
حجاها ولزم ايدي من معصمي وسحبني
كمت احاول اجر : عباس وخر ايديك عوووفني عباس لتطلع صوتي ..
عبرنا من الرسبشن .. ناس تمر
سكتت واني احاول اسحب ايدي .. بس مدا يعوفها طلعنا برا .. جريتها منه بقوة ودفعته : انت من صدك ما تستحي تدري
- ادري .. يلا امشي
- ما اريد امشي وياك .. ولا اريدك ولا تخليني هسه امرهم يرجعوك وما اشوفك خوش
- وما تأمريهم ؟ شنو دا تعايرني انت .. صارلج ساعة السانج رشاش وتنجاوزين وساكت لان مو صحيح ارد ومحترم فلا تخليني والحسين اغير اسلوبي واندمج والقران وعاجبج ارجع بدون امر هسه الم كلشي وارجع
حجاها ومشى مني رجع دخل للفندق !
تخصرت وضليت اباوع يمين وشمال زهكانة ..
امشي واعوفه لو ارجع واسأله ؟
يولي يروح يضرب راسه بالحايط اني معليه
مشيت لنهاية الشارع ..
افتريت ورجعت ومشيت دست المصعد ورحت لغرفته
دست ع الجرس.. فتح الباب .. باوعت الجنطة لهناك ، حجيت : اذا مفكر على كيفك تروح غلطان
- وليش هو منو الكالي ترا ارجع هاي اني جاي ارجع شتريدين
- ممنوع ترجع
- ليش
- لان هيج اني اريد
- اكدر افهم شتريدين بالضبط حتى ترحمينا من هالتصرفات المالها داعي
- لتتجاوز ولاتعدى حدودك
- اكلج شو تعااااي
جرني دخلني للغرفة
صحت : وخر ما اريد ادخل افتح الباب
- ما كاتل روحي عليج
حلينا هنا وروحي وين ما تروحين
شتريدين فهميني متضايقج احجيج بالحسنى ما يرضيج احاجيج بالعنتكة ما تردين شسوي
- منو الما يعجبه شي اني لو انت ؟
اني اللي حرت وياك شسوي ويعجبك
كتلت روحك حتى اوافق من وافقت رفعت خشمك عليه معاجبك !
- يمتى رفعت خشمي اني ووافقتي على شنو !؟
- لتحاول تسحبتي بالكلام الموضوع انتهى بيناتنا واني عرفت ردك
- ااااه ما دام عرفتي ودي بدون ما احجي ما تكليلي بالله شعرفتي
حجاها وجتف اديه جوا اجناحاته ..
باوعتله : انت انسان ملعب يعجبك تلعب ميعجبك ترتبط ارتباط حقيقي وواضح كدام الناس
- وشلون استنتجتي هالشي بالله !؟
- لانك رفضت بعد ما انت طلبت
- يمتى اني رافض عجيب
- لعد سكوتك شنو ؟
- ويمتى اني ساكت يا بشر مو كعدتج من النوم حتى نحجي وانت نازلة غلط وتهجم وتجاوز ومعاير زين شلون تريدين ادخل وياج بارتباط وانت شايفتني اقل منج .
اذا شايفة علي روحج بفلوس بالعافية عليج عمي الفلوس والمنصب والمكان واني مجرد حارس مأمور اكضي شغلي وارجع ما مطلوب مني لا اقدم عريضة ويا منو حجيت ولا ارر اذا احد اتصل عليه ومنو وليش وشعنده .. هيج تريدين ؟
- انت دا تضايقني هواية
اختنكت ودمعت عيني
- بشنو ضايقتج
باوعتله ودرت عنه مشيت واني اهفي على عيني واكوله : ما اعرف ..
ودا اريد افتح الباب اتهرب من انو ابجي كدام احد .
لزمني وسحبني من الباب : لا اوكفي خل نتفاهم بما انو اجيتي بنفسج .. بالله كليلي اني شلون اعرف المتضايقة منه اذا انت بنفسج ما تعرفين !؟
- تصرفاتك مو حلوة
- هسه كاعد نحجي طبيعي ليش تبجين
- ما دا ابجي بس ضايقتني
- تمام ماشي اني ضايقتج عمي اسف
بس تعاي اجا كعدن ي ع السرير وكمبص كبالي : اذا احجي ما تتهربين ؟ ومتشردين ولا تغيرين الموضوع لو من هسه كليلي لا تحجي
- شتريد
- اريد اعرف اللي انت تريدينه كلتيلي موافقة وفرحت بس مو المفروض نتفق على كلشي كبل لا نخطي خطوة ؟ شنو المطلوب مني بعد الارتباط شنو المطلوب منج .. حقوق واحبات امور شلون نخطط طريقنا الراح نمشي هيج لو مو هيج .
- اني ما اريد شي ؟
- متريدين شي شلون !؟
احنا نريد نعقد عقد زواج هذا الزواج تريدينه سر ومحد يعرف بيه وبيناتنا لو تريدينه بالعلن ؟
- لا سر ليش اني ما اقبل سر واذا انت رايده سر اني انسحب
- حلو متفقين على نقطة .. نريد زواج وتأسيس بيت صح ؟
كام من كدامي وهو لازم ايدي وكعد شوية عني ع الجرباية وهو بعده لازم ايدي : اذا زواج بالعلن معناها اكو حقوق واكو واجبات عليه وعليج مستعدتلها ؟
- اللي هي ؟
- اول شي هذا زواج مو مدير وحارس
يعني سالفة تأمريني وتصيحين وتتخبلين وهالامور متصير احترمج كزوجة وتحترميني كزوج ..
- هذا شي طبيعي واساسا اذا اتزوجنا مراح تبقى الحارس الشخصي
- لا خلينا نحللها وحدة ونجي على هاي النقطة ولو هسه اتفق وياج .. اني هسه شنو ؟
صفنت بوجهه .. حجه : شنو شغلي ؟
- حارس وسايق
- رحم الله والديج شغلي حارس وسايق هذا اني بالوقت الحالي مستعدة تتقبليني مثل ما اني !؟ ويمكن باجر عكبه بعد شهر سنة انفصل يوم يصير عندي ما اقصر وياج يوم ما يصير عندي تجوعين وياي لو تعايرني بوضعي ؟
- لا اذا انت صارتلك فرصة تكو..... قاطعني
- ما مدور فرص واني جاي احاجيج اني هذا عباس حارس اليوم اشتغل باجر لا .. تتقبليني مثل ما اني لو ناوية تغيرني حتى تتقبليني
- يعني انت ما رايد
- عوفج من الاني اريده .. اني اريد اعرف انت رايدتني بهذا وضعي والا ما ترضين بيه !؟
- لا اني حبيتك هيج بس اذا اتزوجنا اكيد اساعدك حتى احسن
- حلو يعني افتهم من كلامج متقبلتني بهذا وضعي !؟
- اي ؟
- اهلي !؟
- شبيهم
- اجذب عليج اذا اكلج اني اكدر اعوف امي واختي واكابلج .. اخوي متزوج وعازل واختي ارملة وامي مريضة مال اعوفهن واعزل مستحيلة سبق وطلاك مرة صار عليه اهون من ان اعوفهن واطلع .. هذا وضعي !
- بس امك منو كال تتقبلني
- احنا مبدئيا منتهين منها لا امي واعلي قابلين بيج ولا اهلج يقبلون بيه صحيح ؟ هذا عود اذا اتفقنا ع الزواج نكعد نتفق شلون نحليهم يرضون باللي احنا نريده لان هاي حياتنا واحنا النختار طريقنا بنفسنا مو واحد يمشينا .
- اي
- مستعدة تعيشين ابيتي بيه امي واختي !؟
- بنفس بيتكم
- بنفس بيتنا بغير بيت ان شاءالله ع القمر انت مستعدة تعيشين وياهن بنفس البيت
- اذا ميدخلون بيه ممكن
- ميدخلون بيج شلون هو بيت واحد لابد يحجن ويدخلن واكيد مو من حقهن وتصير مشاكل ونحلها هذا الوضع انت تتقبيلنا
- وليش ما تتركهم ابيت واني ابيت مثل ما هسه انت حارس ودداوم ببيتي .. عادي
- هذا زواج مو دوام .. المكان الاكون بيه اني انت تكونين ومو بيتج .. بيت اني اجره واثثثه على كد امكانيتي .. والخيار الج .. وهاي اني حدود وهذا الاريده من الزواج توافقين عليه احطج فوك راسي تكولين لا والله ما يعجبني .. القرار الج
-بس في حال عقدنا ميصير اي شي وكلشي يبقى مثل ما هو لحد ما ابلغ بابه ويوافق ع الزواج يلا نتزوج .
- وفي حال ما وافق !؟
- يعني انت تريده بالسر !؟
- اني دا اسألج في حال ما وافق شنو الراح يصير ؟ تجين وياي نتزوج حتى لو ما موافق لو ننفصل .. لازم نسولف كل ذني ونتفق عليهن حتى باجر عكبه ما نختلف نمشي باللي متفقين عليه صح لو لا.
- اي بس ما اعرف .. اني اكوله وراح اسعى انو يوافق
- ولو ما وافق
- هيج هيج اني راح اكون متزوجة وماخذة قراري .. هو لازم يوافق واذا ما وافق استمر بزواجي وهو يتقبله براحته مثل لما هو راد يتزوج بيداء اني موافقت لكن اتزوج فيما بعد اتقبلت الموضوع بس مالي علاقه بزواجه وهو هم هيج لازم يتعامل .. من حق كل واحد بينا يختار طريقه والإنسان اللي يناسبه
- انت تشوفيني اني اناسبج ؟
- لا
ابتسم : معناها ليش رايدة نربط
- هيج حابه
- بس هذه حياة مو ثوب حابته اليوم وباجي تملي وتنزعي!
- اكيد اني كدام حياة متغيرة شي اللي راح اقبل بيه وشي اللي راح اسعى انو اغيره حتى يناسبني وهمينه توعدني انو تساعدني نخلي حياتنا افضل مو تكعد تستمر بشغل واحد ووالله هذا اني وروحي ضربي راسج بالحايط
- اول شي اني ما كايلج صربي راسج بالحايط ثانيا ماكو احد ما يتمنى يشتغل بمكان افضل بس مو على حساب كرامته انت تعيرين هواي .. سفرة وانت الحطيتي اسمي وانت القدمتي جوازي بدون علمي وفيزتي واني ما ادري وهاي كدامج كاعد تعايريني ولام هدومي اسلوبج مو صحيح لا تحاسبيني على ردة فعلي اذا جنتي انت الغلط مو اني .
- اي وانت كل ما كمت وهددت راح اروح راح اترك الشغل .. هيج ميصير
- غير من وراج !؟ شايفة روحج لا ؟ ساعة روحي تصير بيج وساعة اشوف ابليس ولا اشوفج من تصرفاتج
- والحل
- تحترمين
- وانت
- واني يمتى متجاوز عليج
- لا انت حاسب روحك ما متجاوز !؟
- هسه عمي نحترم .. متفقين ؟
هزيت راسي
دفع ايدي : ديلا كومي لعد خل نتزوج
فزيت : شتريد
- نعقد مو غير شي شبيج خفتي
- كومتك تخوف عبالك دا تريد تهجم
ابتسم : اهجم شسوي يعني ؟
- شوف رجعت للسخافة
حيجاها وكمت من مكاني حتى اطلع
كام يضحك بصوت عالي
فتحت الباب تبعني .. وسد الباب وراي : خوافة
- مو خوافة بس انت سخيف
- شمسوي عمي اني زلمة فقير لا تتهجمين علينا بويه بت الاكراد على كيفج ويانا
- امشي اجلح
- اني اجلح الشرفنص
حجاها وضربني بطرف ايده على راسي
التفتت عليه : ليش تضرب
- هاي تسميها ضربه !؟ جا من راح اتزوجج واشاقيج شراح تسوين من اتشاقى ويا علياء اختي من بعيد اتصيح دخيلك ما بيه حيل شقاك .
- ليش
- اجعصها تجعص
- بس مو حلو هيج
- هاي بعد قسمتج .
ابتسمت : لا عفية اني اكره العنف
حجيتها ودخلنا للمصعد
انسد الباب علينا وهو يغمزلي : واني اكثر واحد يحب العنف
- ليش دائما قصدك سخيف وتلميحاتك سخيفة و غمزاتك صير محترم
- هههههههههههه صعب
استغربت : صدك والله صعب !
- ههههههههههههههههههههههه
- هاي شبيك
فتح المصعد - دامشي امشي
- وين حنروح
- ترا الوفد راحو لامسية غنائية وسالوني اذا تحبين تروحين كلتلهم تعبانة
- وليش مكتلي
- شلج بحفلة غنا وركص بنص الشباب ترا زحمة
- هاي من هسه
- هاي من هسه
- اي والله من هسه اني ما ارضى بهالامور ليش الزعل بعدين
- وليش مترضى بهالامور شنو العيب لو حضرت حفلة غناء
- كلها على بعضها عيب
- ووين العيب؟
- والله عاد اني اشوفه عيب هنا رأيج مو مهم
وكفت : صدگ تحجي ؟
- اي والله اني ما ارضى لا امي ولا اختي ولا حتى المرة الاريدها تحضر بحفلة ركص وغناء
- وشنو رأيج مو مهم
- طبعا هالموضوع ما بيه نقاش حتى اخذ رأيج .
- جيد معناها الغي الموضوع كله مدام مالي رأي بالحياة وياك .
- براحتج
- شنو براحتييييي
- جا شكلج منتظرة مني اغير رأيي واكلج لا فدوة روحي بس لا تزعلين هالامور من هسه اكلج ما ارضى بيها
- بس بعدنا ما متزوجين
- بس انت وافقتي وناوين
- الغي الموووووووضوع
حجيتها والتفتت اريد امشي منه
صاح - يا بويه براحتج غاصبج اني
التفتت عليه : انت شكد حقير
- اتفقنا متتجاوزين وكاعد تخربين الاتفاق
- مالي اتفاق وياااااك خوووووش
دفعته حيل
ردت امشي احتركت حرك من اسلوبه الهمجي انداريت عليه : على فكرة لو اني اهمك من صدك وتحبني مجان رديت عليه بهذا الرد البارد بس انت واحد متستاهل متستاهل
حجيتها ومشيت بسرعة ، تبعني بنفس السرعة : اوكفي بشنو رديت بارد تعاي
- ميهمك ابقى لو اروح اصلا اني ما اهمك
دمعت عيوني : منو كال ما تهميني بس قابل اغصبج عليه غير قرارج هذا
- مدا تحاول تغير من نفسك شي لازم اني اتغير واتقبل كلشي اني هيج ما يعجبني
- اي هاي اني قابل اخدعج واكلج اني سبورتي واركص وياج هاي هيج اعجبج احطج فوك راسي ما اعجبج شسوي اتغير شلون ارضالج تتمركصين يعني
- شنو هالمنطق شنو اتمركص ترا عيب
- اسف .. شتريدين كليلي
- لا تكولي هذا اني يعجبج يعجبج ميعجبج ولي
- اني ما كلتلج ولي
- لا معنى كلامك هشكل
- ماشي عمي هسه يا بنت الناس هاي الامور اني ما ارضى بيها وما ارضى تلبسين ضيك وما ارضى تلبسين قصير وسلام ايد ومصافحة ويا زلمة هم ما ارضاها .. بعد
- لا كولي موتي
عفته ومشيت
ضحك ومشى وراي ولزمني من زندي سحبني: اني لو ما احبج ما اكول هالأمور ترا ... اكول هي وحدة اتونس وياها واكللها اي على كلشي حتى استفاد واغلس بس اني رايدج الي مرة ومرتي ما ارضى تلبس او تسوي هيج
- ما استغرب بعد يومين تكلي البسي عباية واتبوشي
- لا عاد العباية والحجاب ذني مساحتج اني ما ادخل بيهن ما زال لبسج معقول وعريض ومحترم بعد حلال حرام يمج انت وربج .
- اني من هسه احس اختنكت اوامرك هواية انت من اشتغلت ويايا مأمرتك هلكد
ضحك : هههههههههه بس انت راح تصيرين مرتي مو وحدة تشتغل عندي حتى قارنين هالمقارنة .
- عباس مو هيج بعدين شغلي ويا الرياجيل شنو ما اشتغل
- ليش اني كتلج ماكو شغل
- واشون اسلم عليهم
حط ايده على صدره وكال : وعليكم السلام
هيج
- لا وبعد ما اركع ؟ وانت شنو المطلوب منك بالله بعد هالعريضة الطويلة من الاوامر ؟
- امريني ؟
- شأمرك انت خليت شي
- لا اذا عندج امور تكولينها .. اسمعج
- اني ما اطبُخ وما اعرف اشتغل ولا اغسل ملابس واذا اتزوجنا تجيبلي مساعدة او تبقيها لام غيث تستمر بشغلها.
- واني راتبي مليون وكسور راتب المساعدة شكد بالله وانطيها وشكد انطي للايجار والبيت
- فلوسها عليه بس تبقالي ..
- بعد هذا راجعلج اذا انت توفرين لنفسج مساعدة وتشترين راحتج بعد هذا حقج اني مالي حق .
- ما اقبل بنات يخابروك
- حقج
- في حال اتزوجنا تاخذ بيت او تأجر .. يكون طابقين شي لامك واختك وشي الي .
باوعلي : هم كول لا ؟
- هسه اني كلت شي هاي مثل ما تردين
- ممنوع تتواصل ويا طليقتك ابدا ابدا لا بحجة اطفال ولا بغير حجة .. ما اقبل
- تأمرين .
- بعد خلي اتذكر
- عفية ..
- جوعانة
- هذه الاتذكرتي ؟
ضحكت وكلت : ييي
مد ايده : امشي اوكلج من عيوني
- لا ممنوع
استغرب : ليش
- انت مو كتلي ممنوع تصافحين رجال او تلزمين ايده عيب ميصير !
- ها وانت بسع طبقتيهم براسي !!؟
- ييي
- وجعييي
- هاي عليمن ؟
- عليج
- وكفت : ما اقبل
- اتشاقى وياج
- حتى لو .. خلي الشقى بعيد عن التجاوز
- لا جا ومن تكليلي اجلح هاي شيسمونها ؟
- يضايقك ؟
- بيناتنا لا .. كلي مالتج شيعجبج تسوي وتحجين اللي يريحج بس كدام احد لا .
- شوف معناها ميضايقك بس اني اتضايق اذا تغلط عليه حتى لو بشقى !
باوعلي صفن بوجهي : وجن انت والله ما تنطن عين والحسين .
ابتسمت ومشيت منه ..
رحنا كعدنا بالمطعم نزلنا اكل
وصرت اكل بحماس .. جنت جوعانة كلش ..
شلت راسي لكيته يباوعلي : ليش دا تباوع
- كلش جوعانة !؟
- اي
مد ايده واخذ ايدي وفتحها .. باسني براحتها
ابتسمت وكملت اكل .
احرجني بنظراته
كمنا وهو يهمسلي : نروح هسه ؟
- وين ؟
- نعقد
-هسه !
- اي ليش يعني عندج شي ؟
- لا يعني ما عندي شي بس هسه دنيا ليل
- يعني باجر
-اوكي
ابتسم : يلا على راحتج .. تكومين نفتر
- ماشي
كمنا اني وياه طلعنا افترينا
بس ما ارتاح بالطلعة لان الاسعار بالامارات تقريبا غالية عليه وميحب اني اصرف وانطي .. فاتحججت وكتله : خلي نرجع للبيت راسي دياذيني
فهو وافق بسرعة ورجعنا للفندق ..
مشينا كعدنا بالكافتريا نزل نركيلا .. وكعد يشرب واني اسولف وياه .. صار يحجيلي عن حياته ومراهقته وايام السقوط والاحداث وديحجيلي مواقف من حيات واني مركزة وياه بكل حواسي واستمعله بشغف وهو متحمس يحجي ويسولف ومستمتعين بالكعدة.
محسينا بالوقت غير الساعة ٢ ..
والكافتريا اللي احنا بيها شبه عزلت ..
انتبهت كتلا : كأنوا تأخرنا
- لا والناس هم الظاهر تعبوا شوفيهم كاعدين منتظرينا
- لعد حكوم اروح لغرفتي
- انتظري خل نروح سوا .
مشيت اني وياه للمصعد .. دخلنا هو داس على رقم الطابق واني بقيت واكفة .. حسيت بشي من الأحراج .. توتر خوف ..
همس ..
يعني باجر تصيرين الي ؟
ابتسمت بس مجاوبت من التوتر
انفتح باب المصعد طلعت كبل .. وصلني للغرفة فتحتها .. حجه : محتاجة شي ؟
- لا
فتت للغرفة فوراً حتى بدون ما الوحله .. سديت الباب بسرعة ووكفت وراه احس قلبي دينبض بسرعة ..
احس خطوة صعبة
اروح اتزوج هيج بدون ما اكول لامي وله ابويه
اتزوج واعقد وحدي بدون ما احد منهم يكون ويايا.
تقربت للسرير شكرت الجنطة وباوعت للمرايا ..
بقيت اباوع لنفسي بدون ما احجي .. واني افكر اتراجع
بس محابة اتراجع
بنفسي اجرب شعور الحب
واذا بقيت ورا اهلي ما اجرب شي
كل واحد منهم عايش قصة حبه على كيفه اذا اجيت اكولهم اني اريد هيج محيوافقون
يمكن يشوفون اختياري غلط
واني كذلك اشوفه بس شغور من داخلي حاب هالغلط .
شمرت نفسي ع السرير بدون تبديل بالساعة اني صافنة بالسكف وافكر ..
نعست واتعاجزت ابدل ملابسي لو امسح مكياج ..
نزعت بس الحذاء من رجلي واتلفلفت بالبطانية ونمت .
كعدت الصبح ع التنبيه ..
ما اعرف ليش كعدت فرحانة وعندي طاقة حلوة
رحت ركض ع الحمام اخذت دوش دافي .. وادندن ويا الحمام .. طلعت لافة شعري كملت مكياجي وشسورت شعري وبرمت ..
ولبست تنورة قصيرة لحد الركبة وبدي ستن وسترة رسمية لونها خاكي .. وبوت مفتوح من يم الاصابع وكعب عالي رفيع .
نزلت للمطبخ الصبح هو كاعد يشرب جاي
تقربت منه : صباح الخير
ابتسم : صباح النور
نزل عينه للبس راحت البسمة : شنو هاي ؟ شتفقنا
- شنو
- مو كلنا ممنوع قصير
- صح
- وهاي شنو
- بس بعدنا ممتزوجين
- صدك .. اي معناها خلي اخابر صاحبتي كبل لا اتزوج
- خابرها وسلملي عليها
حجيتها واني اتعداه واروح للبوفيه اخذت ماعون وكف وراي : صدك تحجين
- ييي
- بس اتفقنا احنا
- عدنا مؤتمر مهم اليوم
- وبالمؤتمرات نكسر القواعد
- لهسه مصارت قاعدة
- دا تضوجيني
- بس اليوم لتصير وكيح .. خليك حباب
- قصدج المعهن وابتسم مو
- شتلمع
- الكرون مالتي
صرت اخذ اكل والمفردة مدا افسرها .. طخت براسي : هاي يعني قصدك انت عندك كرون .
صفن بوجهي .. اخذ واحط : شبيك
هز راسه : دكملي كملي
اخذت ماعون وصبيت كلاص جاي حطيته بالماعون ومشيت كعدت ع الطاولة اللي هو كاعد بيها .. وطلعت الماك بوكت وفتحته كدامي
اجت مرة جبيرة من اللي ويانا بالوفد
حجت : صباح الخير
ابتسمت : اهلا صباح النور
- انت بنته لكاكا دلشاد
باوعت لعباس : نعم اني
مدت ايدها كمت الها صافحتها ومدت نفسها تباوسني وتكولي : فلا ادري انت هو كالي انت ويانا بالوفد .. بس معرفت انت مشايقتج كبل شتحتاجيني كوليلي اني مدير تنفيذ لدائرة ....
- اهلا وسهلا بيك شكراً الج
بقت تسال وتستفسر
صرت اجاوب باجوبة مختصرة .. اترخصت ومشت
باوعتله : تعرف بابا !
- وشنو يعني
-اخاف تروح تكله احنا هيج
- احنا اول وتالي راح نتزوج
- بس بابا اذا عرف هيج ديصير يقلب الدنيا فوك راسي
- ختولي شتريد تسوي
- انت متهتم بس اني اهتم
- وهسه شنسوي
- لازم ناخذ حذرنا بكلامنا وتصرفاتنا
- اي هاهية مثل متحبين
بقيت اباوعله : اكلي
اخذت كوب الجاي ..
حسيت نفسي انسدت من الاكل
اشتغلت كم حاجة ع الماك .. ودزولنا خبر نجتمع بالصالة ..
لميت الماك وحطيته بالحقيبة واخذت جنطتي الصغيرة
مد عباس اخذ مني حقيبة الماك .. وطلعنا بالصالة .. كعد ويايا مدير عام من ضمن الوفد ضل بتناقش ويايا عباس واكف على يساري ..
وصل الباص رحنا للمؤتمر ..
صرت حذرة لا اخذ ولا احجي ويا عباس
كمت اتصرف برسمية عالية ..
كملنا المؤتمر ..
طلبت سيارة تأجير جابولياها وانطيت عربون بيها
وبلغت عباس نطلع كال : شنو هذا سيارتمن
- وفرولنا سيارات خاصة خلال اقامتنا بابو ظبي فرصة نتجول بيها افضل من الباص .
صعد هو كدام ..
واني كعدت ورا ..
ساق السيارة من كدام المركز .. ليكدام كتله اتوقف
وكف السياقة .. بدلت مكاني وكعدت ليكدام يمه
ابتسم هو ومد ايده بأيدي شبكها ..
حطينا اغنية ( انسى كل الناس ) ماجد المهندس
وانغامها .. فتحت الشبابيك وصار الهوى العالي يطير بينا ..
كتلا : تخيل هسه شوان ديراقبنا
باوع بوجهي : صدك تحجين ؟
- مو بعيدة !
- ترا دنغني انسى الناس انت تجيبين شوان .. بابا انسي
- انساه ليش اني رايدته بس دا اكول يراقبنا
- وراقبج .. شكو ؟
- يسويلي مشكلة
- انت ليش خايفة
- انت مخايف ؟
- واخاف من منو ؟
- يعني بابا يعرف
- ليش احنا مو نريده يعرف بعد ما نعقد
_ واذا مقبل
- انت مترددة بالموضوع
- لا بس اخاف تصير عراقيل او مشاكل
- لا تفكرين ابويه .. اتونسي وريحي روحج وطز بالراح لابو الاجا هو العمر كم يوم ينعاش حتى نعيشه بخوف وقلق من فلان وعلان .
قنعني وسكتت
ورحنا نفتر بشوارع ابو ظبي ..
صفينا عند مول طبكنا السيارة ونزلنا نتمشى .. اخذت فستان واسع وطويل لونه ابيض ودخلت اقيس .. وطلعت كتلا: شلونه ؟
- كلش حلو ابقي بيه ..
ضحكت
اخذ الفستان وبقينا نفتر ..
هو سأل عن جامع او شيخ .. ومدلي ..
فاجاني وكالي : دلوني بشيخ بجامع قريب منا
- نعقد بجامع
- ووين المشكلة
- لا بس هسه
- البارحة تكليلي هسه اليوم تكليلي هسه جا يمتى ؟
- مدا تحس دا نتسرع ؟
- نتسرع بيش ترا اتفقنا بس عقد
- اعرف بس احس .. لو اخر يوم السفرة نعقد ونرجع لغداد
- وشنو السبب !؟
- مو افضل
- وين الافضل بالموضوع
- يعني ما ادري اشوف هيج افضل حتى محد يشك بينا .
- انت صدك تحجين
- ليش ؟
- شنو ليش !؟
- عباس اني بس ... قاطعني
- هاهية هاهية افتهمت مو مشكلة
- شبيك ليش دا تضوج
- لا ضايج ولا شي عوفيها
اخذت نفس وطلعنا من المول ..
عكس ما جنا قبل لندخل المول جنا نضحك وفرحانين هسه عقد وجهه وقفل ع الموضوع مدا يقبل نحجي
حجيت : ليش ضايج
- اني كتلج ضايج
- يعني الا دكولي مدا تحجي
- شنحجي ؟
- اي شي
- اي احجي اي شي لازمج ؟
- عباس لتعاملني هشكل
- شلون تريديني اعاملج
- هسه انت تريد نعقد اوكي امشي نعقد بس لتكلبها هيج
- لا لا نعقد ولا هم يحزنون
- ليش ؟
- ماا اريد
- شنو السبب ؟
- غيرت رأيي
- ليش ؟
- غيرت رأيي وبس
- عباس ميصير هشكل
- شنو اللي مصير
- تصرفاتك محلوة
- مو قصة تصرفات بس من نرجع لبغداد نعقد افضل
- ابغداد ليش
- احسن
- عوف احسن وافضل وانطيني اسباب ترا بديت اتضايق
- حتى تتطمنين اكثر هنا ناس واوادم وخاف يشوفوج ويروحون يكولون لبابا لو يكولون لشوان لو شوف منو بعد ع القائمة
- دا تقلد !؟
- اكلج اقفلي ع الموضوع رحمة لاهلج .
سكتت ..
بس اتضايقت كلش .. دمعت من القهرة
لزم ايد : هسه ليش تريدين تبجين مو هذا اللي تريدي
- لا
- جا شنو اللي تريدينه
- ما اريد شي
- لعد شكو دا تبجين ؟
- كافي عوفني
جريت ايدي جرها - لا ما اعرف .. كلشلي شتريدين واني خادم عمي بس كولي شنو اليرضيج ؟
- متعاملني هشكل
- هاي خادم شتريدين مني تؤمرين بعد ؟
سكتت .. وهو سكت ضل يسوق
شوية ورجع يباوع بوجهي .. خاف بعدني ابجي باوعتله هادئة ابتسم وجر ايدي باسها
ابتسمت ..
اذا رحنا نعقد يعني اخاف احد يشك بينا
- حبيبتي على راحتج اذا تحسين هالي ياذيج لو تخافين عوفي
- لا بس ملازم نبقى بالفندق اللي احنا بيه
- شلون
- نأجر غير مكان وبس الصبح نجي لهنا ونحضر ويا الوفد .. قبل لا احد يحس
- براحتج اذا تحبين هيج بعد احسن
كمت اباوع بالتليفون واخابر
استقريت على انو نأجر شاليه لمدة اسبوع .. وكلت بس بالنهار نرجع من وقت ويا الوفد واتعامل كدامهم برسمية وبرا .. نتصرف على راحتنا
حجزت الشاليه ..
وكتله : خل نروحلا ..
اخذنا السيارة ورحنا للمكان
جان رائع اطلالة مميزة جدا مسبح جدا كبير .. ومكان مفتوح وفارغ وهادئ ومكان يجبرك ترتاح نفسيا
ضليت اني وياه نفتر بالبيت ..
حجه : وراح نكعد بيه هسه ؟
- بكيفك
- ما اعرف
- قصدك نعقد ونكعد بيه
- انت شتشوفين
- اوكي ماكو مشكلة
- يلا امشي
راح هو يسال ويستفسر .. لكى جامع
دخل اتفق ويا الشيخ .. واجا كالي : يلا
اني كالها ..
لزمت كلبي احس توترت .. دخلت وياه للجامع
انطاني حجاب خليته على راسي ولفيته منا ومنا ..
كعدنا كدام الشيخ وحضروا اثنين من اللي بالجامع .. عقد الشيخ وردد العقد واحنا رددنا العقد وراه ..
وكال : زواج مبارك
نطقها اني صرت ارجف من الخوف ..
سلم عليه عباس .. وكمنا .. طلعنا الجامع
باسني براسي .. عرف بيه متوترة
اخذ حنجي باصبعه وباسني بخدي : لتخافين كلشي على كيفج ومثل متحبين لتخلين هالموضوع يضايقج .
ابتسمت ابتسامة مزيفة مملوئة بالتوتر
حط ايده بأيدي واخذني .. اشترينا عصاير و اكل و حلويات وفواكه .. ورحنا للشاليه
اكو كرسي استرخاء ع المسبح .. كعدت عليه ..
حجيت : حنكول لبابا مو
- واول منرجع
بس هسه اتركي هالموضوع خلينا نخلي الاكل ونرتب هالمواضيع هنا
واشرلي ع العلاليك
ابتسمت : ماشي
صار يفتحلي واني ارتب ع الطاولة
حطينا العصاير و الحلا والاكل .. وصرت انكنك واكل ..
وهو كاعد ع الكرسي اللي كدامي ودياكل ..
تركت واخذت العصير واني اتمدد ع الكرسي واسحب الفستان شوية عن اقدامي حطيت رجل .. وكتله : اي هسه امك اذا تعرف بيك هنا شتسوي
- شتسوي
- حتكول كلمتها الشهيرة
هاذ مو شغل كوا_____ه
- ههههههههههههههه هي طيبة بس مرات تصير مزعجة
- لان مريضة
حجيت : عاجبني ادخل المسبح دا تشوفه شلون نظيف
- تعرفين تسبحين
- ااااا .. انت شوف وبس
كمت من مكاني .. وكفت على حافة المسبح
رفعت اديه وطفرت بنص المي وكمت اسبح وصلت للجهة الثانية
ضحك وكام من مكانه .. وفز ورايا وطفر بالمسبح
صرت اضحك بصوت عالي واسبح بالاتجاه المعاكس .. وهو يلحكني بس هو جان سباح اسرع مني لزمني من فستاني بالمي وسحبني
كمت اضحك بقوة واسحب بنفسي
مد ايده وطاوق خصري وكال : وين تريدين تشردين
رفعت اديه وطاوقت ركبته واني اكوله : اني مديرتك وامرك .. صير حباب
- والله يا ست المديرة اذا تبقين هيج وبهالوضعية لو يجي ابو طبر هسه ما يخليني حباب
صار يسحبني اله داخل المي ..
دخلت جوا .. كام يسحبني واني اشرد منه
فلتت ..
لزمت الدرج .. صعدت هو صار ورايا كعدت على طرف المسبح .. هو صعد وكالي : ادني ليغاد
حجيت : اني كلش فرحانة
باوعلي : عسى ايامنا تبقى كلها فرح .
- بعمري محبيت ولا عشت شعور الحب بس دا احس بسعادة كلش عظيمة ما انطيها لأي احد
-الهوى بيه خيط برودة .. اكول لو تبدلين ملابسج افضل مما تتمرضين.
- بس ملابسنا مجبناها
كام من مكانه ..
وراح دخل جاب برنص كالي : نلبسه على ما تنشف ملابسنا
- يا سخيف اعرف وين تريد توصل
ضحك: لا والله يا فاسدة اريدج تبدلين بس الظاهر انت
ضربته: اني لو انت
سحبني من خصري بقوة لما ضربته
وقيدني باثنين اديه وهو يكولي : ضربتيمن ها ضربيتمن
كمت اضحك واحاول ابعد عنه
سحبني اله حيل وباسني بشفايفي بقوة
جان شعور عجيب ..
لدرجة ادية وجسمي كله توقف معرفت شلون ابادل ولا حتى ابعده ..
اخذ راحته بدون ما اني امنعه
لحد ما هو بعد وجهه ويتنفس قوي .. واني شعور غريب توتر على رغبة على شعور جديد بالحب محاسته قبل.
صار يمسح على شعري وهمس : ضايقتج ؟
اخذت نفس ووخرت منه ..
سحبت البرنص .. ودخلت جوا .
بدلت وسحبت السشوار صرت انشف شعري
دك الباب هو ودخل .. عدلت البرنص حجه هو : راح انشف الملابس بالغسالة .. انشف ملابسج
- ياريت
- هم زين اكو شسوار حتى نضربهم حرارة ينشفون اكثر
- اوكي .
اخذهم وراح واني نشفت نفسي ودفيت ..
كعدت بالغرفة افكر .. دخل هو وبيده سلة الملابس ..
- وين الشسوار
- ذاك يمك
- نزل الليل محتاجة شي اجيبه خاف يعزلون
- لا بس نعسانة
- جان ابالي نشوف فلم اكو كومة اقراص افلام كلش حلوة
- يلا نشوف فلم وانام .
- اي معناها نشفي ذولة على ما اشغل الفلم
خلا سلة الملابس ومشى
كمت اطلع قطعة قطعة وانشفها بالسيشوار .. لبست فستاني الواسع واخذت ملابسه ونزلت حافية جوا ..
اخذ ملابسه وراح يلبسهم واني لزمت الريموت اكلب يا فلم .. اختاريت ابراد بيت وانجلينا جولي السيد والسيدة سميث ..
رحت رتبت صينية حلويات وعصاير .. وخليتها ع الطاولة .. حط ايده على خصري : مرتاحة حبيبي
انداريتله : جداً
ابتسم وسحب ايده من خصري بخفة ولزم ايدي ..
وباسني بوسة خفيفة بشفتي ومشى وسحبني كعدنا كدام التلفزيون ..
شغلنا الفلم ..
صرنا نباوع اول ربع ساعة اني عيوني طفوا وغفيت ..
حس هو .. ومددني وخلا راسي على رجله صار يمسح على شعري ويتحسس نعومته .
حسيت بشعور جدا جميل ودافي وكله اجواء حب
عشت عمري بالحسرة والقهر والخوف والترقب وحارمة نفسي اعيش بهيج تجربة ارتاح بيها من كل الضغوط .
غطيت بالنوم .. هلكد ما اطمئنيت و عشت شعور دافي
هو لما كمل الفلم .. حسيت عليه شالني .. همست واني نايمة : نزلني اني امشي
- هشششش
اخذني للغرفة ونومني ع السرير انداريت انطيته ظهري
سحب الغطا من جواي وغطاني .. ونزل جوا
ما اعرف شكد نمت ..
وحسيته يدخل الفراش سحبني اله وحطني على ايده .. اني انداريت وخليت وجهي بصدره .. بعد شعري من وجهي وباسني بكصتي
حسيت وكأني الليل نايمة بين الغيوم
هلكد ممرتاحة وحاسة بشعور حب معيشني فوك.
كعدت الصبح هو نايم بفانيله داخلية سودا وشورت اسود .. شلت راسي اباوعله شعور غريب هو بصفي ونايم بفراشي ..
رجعلي ذكريات باول حلم شفته بيه لما اتخيلته بفراشي
صار الحلم حقيقي ..
صرت اتنهد واني اباوع وجهه كبالي ..
وين وعودي وحلفاني ما اتربط بواحد عربي
تالي هالعربي نساني اسمي وحالي ومالي وخلاني اسيرته .. وشيريد ويطلب يتأمر
بس مرتاحة
وكلش مرتاحة
اعرف بروحي بنية بس اول مرة احس بأحساس انثوي لما صرت يم رجال حسسني بأنوثتي .. وكأني اميرة هالزمان وهو موجود .. يخاف عليه يحبني يدللني يهتم بيه .. حسيت بقيمتي يمه .
تقربت وبسته بخده
مط نفسه واتحرك واندار نام على بطنه وحضن المخدة
ابتسمت وكمت من مكاني ..
طلعت اقرب مكان للتسوق
اتسوكت امور الريوك كله ورجعت للمطبخ ..
بعدين فكرت نفطر برا افضل رجعت نقلت الاكل كله قريب من المسبح من ناحي الشمس رتبته ورحت فورت مي ..
واكفة دا ادوس الدكمة مال الترمز .. حتى اطفي
مد اديه ولفهن على خصري ابتسمت وانداريتلا .. رفع اديه وزمني من ركبتي وباسني
ابتعد .. همس : صباحي انت
- صباح النور .. جوعان
- ليش مسويتلي ريوك ؟
- مو مسوية بس جبت
ضحك بهمس وصوته مطبك وهو يكولي : مو اكول ما تطلع منج وتطبخين
- ما اعرف
باني بركبتي بوسة قوية وكالي : مو مشكلة يلا تعالي
اخذ ايدي كتلا : بس الترمز دا اجيبه
- اني اشيله لا تحتركين
- صوتك صاير يخوف كانما مال وحش
ضحك : لان هستوني كاعد
اخذ الترمز واني اخذت جاي ابو الفتلا حطيت بالكوابة وهو صب مي حار ..
: شنو عاجبج نروح لو نبقى
- لا عندي ندوة مهمة لازم احضرها
- نروح ويا الوفد
- لا نروح بالسيارة .. عادي بس لازم نروح للفندق
- ليش
- نغير ملابسنا ونجيب ملابس هماتين
- ها صح .. نرجع نبقى هنا
- اي المكان يريح النفس
- كلش .. فد مزاج .. سامعة باليكول الماء والخضراء والوجه الحسن .. هسه كلهن كبالي .
ضحكت واني اشرب الجاي ..
حجه : منتبهه لشي
- شنو
- لهسه ما كتلج باسمج مستصعب الموضوع
- انتبهت .. وحتى كلمة احبج مكلتها
ابتسم : الكلمة مالها معنى لو كلتها
- ليش
- اني لهسه ما سويت اللي يثبتلج حبي حتى اكولها الكلمة بدون فعل .. ما بيها معنى
- وشتسوي
- اقل شي اسعدج
- بس اني حالياً اسعد وحدة بهالعالم
- السعادة لما الكل يعرف قصتنا ونعيشها كدام الكل بدون ما نتختل من احد ..
- ان شاءالله ربي يوفقنا ونكدر نقنع الكل
- ممجبورة تقنعين احد .. هذه حياتنا وانت مسؤلة عن نفسج يكفي تنطيهم علم
- ولو زعلوا !؟
- يرضون بس اذا خربتي حياتج حتى ترضيهم راح تخلصين عمرج زعلانة
- مثل لما جنت بعمري السابق اسكت حتى ارضي بابا واني طول الوقت حزينة
- وشصار !؟
- بس عمري مر بدون فايدة ولكيت نفسي بنص التلاثينات واني كلشي ممحققة لا عندي زوج حقيقي ولا عندي عائلة ولا عندي اطفال ..
شوف .. بهذه الحياة
ممكن تعمل وتجتهد وتحقق وتصير عندك دخل لا بأس بيه وتحقق ذاتك ماديا لكن بنص ذولة انت بأشد حالات التعاسة .. سعادة الإنسان بالإستقرار .. والأستقرار عبارة عن بيت واهل وعائلة .. واني كل ذولة ما عندي .
- الدنيا ما تكمل ويا احد العنده ذني ينقصه العندج .. والعكس .. العنده مكان ومنصب وفلوس ما عنده عائلة او يمكن عنده بس يفتقد للتفاهم ..
- هو هذا اللي جنت اخاف وما انزوجت شوان اخاف اعيش عمري وياه بعدم التفاهم واصنع بيت ميت وينولدون اطفال بنص بيئة مريضة .
لهذا اختاريتك ..
اني اكمل نقصك وانت تكمل نقصي ونكتمل .
ابتسم ..
كملت اكلي واخذنا غراضنا ورجعنا ع الفندق دخلت سبحت بسرعة وبدلت رسمي وحضرت كم قطعة ملابس .. واخذتهم ويايا تركتهم بالسيارة ونزلت للندوة حضرتها
خابر ابويه يستفسر عن امور السفرة والشغل
انطيته كل احداثيات العمل ..
وطلعت للمول .. اخذت ملابس الي ولماما
ورحنا للشاليه .. هو كاعد كدام المسبح ديخابر امه
اني لبست شورت وكيمونة قصيرة .. دا اريد اسبح بالمسبح
وهو كاعد ديحجي مريت من يمه ..
ضيع كلامه وراسه تعلك وراي .. جان يكولها : بعدين نحجي يمه بعدين نحجي باي .
سده : تعاي تعاي تعاي .. شلابسه
- دا اريد اسبح
- ولابسه هيج
- واشون اسبح بفستان مثل البارحة !
- لا احد يروح يشوفج
- ماكو احد وممنوع هنا احد يقتحم خصوصية احد ثاني
- وشلون بيه اني
- انت شنو ؟
- ارحمي هالعبد الفقير اتفقنا بس عقد يمعودة
ضحكت : اي وشمسوية غير نسبح
دا امشي سحب ايدي .. سويا
- اشون
تقرب مني ودفعني ع الحافة و حضني من خصري وجرني اله : انت وين ؟
ضحكت : بس تعوفني اوكع
قرب نفسه عليه يبوسني واندفع عليه للمي
صرخت وغطسنا بالمي اثنينا ..
كمنا شي نلعب حوا المي شوي نتشاكس شوي نحضن بعض ونعيش جونا ..
فوك الساعتين احنا جوا المي ..
حسيت بجسمي كله تجغد .. طلعت من نص المي .. وسحبت المنشفة لفيت نفسي وتمددت ع الكرسي .. طلع هو وصار يمشي كدامي على طرف المسبح ..
صرت اباوع جسمه واتفقده
حجه : شتحبين تشربين ؟
- اي شي
- شو نظراتج تخوف
ضحكت : ليش
- دا تتحرشين بجسمي عفية استحيييي
- لااااا
- ضحك وهو يقدملي العصير .
شربت العصير .. ورجعت راسي غفيت شوية ..
شوية وكعدني : كومي دخلي جوا نامي وبدلي ملابسج حبيبي
- شيلني
ابتسم ..
ودنك يريد يشيلني
ضحكت وكمت من مكاني ورحت بدلت ..
وحجه : ممفكرة نباوع الفلم مال البارحة نكمله
- اوكي
- بس مو هم تنامين وتعوفيني لوحدي
-وعد
- يلا نشوف الوعد
لبست ثوب ستن لحد الركبة ورشيت عطر ونثرت شعري ونزلت هو ديحضر الفلم .. باوعلي ابتسمت حجه : لج انت والله ما ناويتها على خير .
كعدت يمه ..
وكعدنا دنباوع الفلم ..
انتجيت عليه وهو حضني وصار يمشي ايده على ظهري ويتحسس نعومة الثوب ..
بهالاثناء صارت لقطة رومانسية و الابطال بالفلم صاروا يتبارسون رفعت وجهي اله واني ابتسم .. هو شاركهم اللقطة ودنك لوجهي باسني ..
بس استمر يبوس بيه بلهفة ..
واني ابادله اللهفة ..
كمت من مكاني .. كاملي وسحبني اله رفعني ..
واخذني للغرفة .. جنت كلش راغبته لدرجة نسيت نفسي وكلشي ووعودي ومجان ابالي غير اعيش اللحظة وياه
هو جان مندفع برغبته
واني ممانعت او حاولت اتمنع منه ابدا .. حتى لما بادر يريد يقاربني .. ممنعته ابدا
همس باذني وكالي ..
ما اريد اجبرج
بس اني بينتلا انو اني رايدته
بس مجنت واعية للموضوع او ما اعرف شنو الشعور اللي خلاني بيه لدرجة نساني كلشي وناسني خطورة الموضوع وان احنا اتفقنا بس عقد
لما بادر واتقرب مني ..
وقتها حسيت انو لا اني دا اسوي شي غلط
حاولت اتمنع بس هو عباله من الالم .. فما اهتم لممانعتي .. وتم زواجنا بلحضات .
اتمدد بجانبي ..
اني انسحبت فورا للحمام .. دست ع الدوش ووكفت جواه دا اريد استوعب الصار .. اني انطيت نفسي !؟ شلون صار هيج .. شلون خلاني اخضعله وانسى عقلي .. شلون هانت عليه نفسي
كمت ابجي بالحمام والمي يصب فوكي ..
صار يدك الباب : حبيبي بيج شي
اخذت البرنص ولبسته وطلعت عيوني حمر دم من البجي .. لزم وجهي : اعرف غلطت بحقج بس والله صوجي .. باعيلي
- مو ذنبك ابتعد واتركني
- بس تعاي
- عباس ارجوك
- صوجي اني ما عرفت اضبط نفسي
- ابتعد مني ارجوك
- شبيج
كعدت ع الجرباية وكمت ابجي ..
كمبص كبالي : شو يحلوه باوعيلي
- الصار مجان لازم يصير
- صح كله صوجي اني والله
- وشيفيد احنا اقترفنا الخطيئة اثنينا وبرضاتنا
- ليش خطيئة ترا احنا عاقدين وانت مرتي على سنة الله ورسولة
- وسنة الله ورسولة بالسر !؟ اروح شاكوله بابا غلطت وانت لازم تقبل برواجي لان اذا مقبلت .... انت دا تشوف وين وصلنا
- هسه شتريدين اسويلج بس كولي بدون بچي .
- عباس اتركني الله يخليك
- ما اتركج بابا .. انت حبيبتي واللي صار نتحمله اثنينا
- شتتحمل اني عدت نفس غلط اختي ..
- لو قهرتي نفسج واتضايقتي مراح يتغير من الموضوع شي .
- اعرف لهسبب دا اطلب منك تتركني
حجيتها وكمت من مكاني
سحبت بجامة وانطيته ظهري وصرت البس بيجامتي .. وسحبت التيشيرت نزعت البرنص ولبسته ونزلت هو نزل وراي ..
دخلت للمطبخ هو بقى بالصالة
كمت ابجي بقوة .. يربي اني شسويت بنفسي
عمر محد خدعني ولا هانت عليه نفسي ولا انطيت مشاعري لاحد تالي بيوم وليلة انطيت كلشي !
اني شدا اسوي بنفسي
دخل للمطبخ اني كاعدة ..
حجه : بعدج مقهورة حبيبي
كمت للترمز صبيت مي للكوب .. طلع اله كوب وحطه كبالي .. صبيتلا ...
صبيت ظرفين نسكافيه بكوبه وكوبي ..
اخذته ومشيت للصالة .. تبعني وكعد شوية عني .. لا هو يحجي ولا اني ..
حجيت : بابا لو عرف احنا متزوجين لو صاير بينا شي قبل لا افاتحه بموضوع زواجنا تتخيل شحيسوي ؟
- ما اعرف بس نواجهه
- نكدر !؟
- ليش تخلي يعرف اسبقي الخطوة وانت كوليله
- وتتخيل سهل اروح اكوله بابا اني اتزوجت يلا كولي مبرووووك
- مو هذا الاتفقنا عليه
- بس مو بهالسهووووولة
- اوكي اهدي وكلشي ينحل لتصيحين
- شنو الينحل اكدر ارجع بنية مثل قبل ساعة !؟
- الشي صار ومكدرنا ومو غلط احنا عاقدين
- انت رجال ميهمك لان ما عندك اليحاسبك بس اني
- افتهم بس اهدي نفكر بحل بهدوء اعصاب وتوتر ما راح نحل شي .
دنكت ابجي ..
كام هو كعد يمي .. فزيت من عنده ..
كافي عوفني بحالي اخذت اللي تريده خلص اتركنيييي
- اخذت اللي تريده شنو قابل اني جبرتج السوينا سويناه بارادتنا
- معناها انطيتك اللي تريده عوووووفني
- ليش دا تصيحين ؟
- لان ما اريد تتقربلي .
حطيت الكوب ع الميز .. وصعدت للغرفة
نمت وابجي وعشت ازمة اني شسويت بنفسي .. اغلى شي عندي قدمته بلحظة ضعف !
شلون كدرت اطارع مشاعري ورغبتي واتجاهل عقلي !؟
اني شسويت يربي ..
وابجي ابجي ... ومكعورة نفسي بالفراش
سمعته فات للغرفة .. كعد على طارفها .. كام يدخن
اني بقيت دايرة عنه لحد ما دخت ونمت ..
بالليل حسيت عليه وهو يسحبني ويخليني على ايده ويحضني وينام
..
الصبح واني نايمة
دك تليفوني .. باوعته بابا
كعدت من مكاني واتعدلت .. رديت
- الو
- الو فيان شلونج بابا
- هلو بابا شلونك
- زين .. نايمة ؟ مو المفروض هسه انت بالمؤتمر ؟
- اي بس المؤتمر ب١١
- وهسه بيش ؟
باوعت الساعة ويييي الساعة ١٠ ونص ..
خل اكوم بسرعة
- انت وين بابا
- بالفندق ليش
- متأكدة بالفندق ؟
- شنو متأكدة بالفندق .. يعني وين ممكن اكون !؟
- اييي بيا غرفة انت حالياً خلي اشوفج .
من كالي هيج الخوف كله سرى بجسمي .. وفزيت من مكاني
شكرا لزيارتكم عالم روايات سكيرهوم
