رواية شيخ البصره الفصل الخامس عشر بقلم مجهول
عمران بضحكة:- هسه اتركي رجاء ياخيتي
وخلينا نلحك على الزلمه كبل ما يوكع روحه بهالمصيبه. بس شلون ؟
بلسم ابتسمت:-
....اني اعرف شلون ....
ثاني يوم الصبح
بلسم:- صباح الخير
الاهل :- صباح النور
بلسم انداريت على بابا:- بابا صدك اليوم احتمال اتأخر عندي محاضرة تشريح ولازم نروح للمستشفى.
الاب:- اي باباتي تريدين اني اوديج و اجيبج؟
بلسم بأرتباك:- هااا لا لا حبيبي اتفقنا احنا كروب نأجر سياره نروح سوه ونرجع سوه.
الاب:- ماشي حبيبة بابا بس ديري بالج على نفسج.
بلسم:- تمام حبيبي ..بوست امي وابوية وطلعت
اجه الخط رحت للكلية دخلت اول محاضرتين صارت ساعه ١٠ ونص استأذنت من الدكاتره وطلعت .. لكيت عمران دينتظرني طلعت من الجنطة شال و عباية لبستها و صعدت بسيارته و رحنا للبصره .
((البصره))
ضرغام:-
كعدت الصبح وصبحت على الحجية
يمه عندي موضوع اريدن اخذ رايج بي.
الحجية:- اي وليدي تعالن نروح لغرفتي ناخذ راحتنا.
دخلنا للغرفة وكعدت يم الحجية.
ضرغام:- يمه انه فكرت بكلامج وقررت اتزوج
الحجية:- اييييي يا يمه الساعه المباركة واشوف مريتك يمك.
ضرغام:- اشوفج ما سألتيني منهي العروس؟
الحجية:- منهي يايمه؟
ضرغام نزلت راسي وتنهدت :- رجاء بنت عمي حامد.عبنها خالة رقية وعلاوي و اكيد تحن عليهم.
الحجية:- براحتك يا وليدي انه الي يهمني اشوفك مرتاح ومستقر.
ضرغام:- الله كريم يمه حضري رويحتج اليوم العصر نمر عليهم ونحجي بالموضوع و هسه انه اترخص عندي شغله يم واحد صاحبي.
الحجية:- روح يمه ربي يوفقك و يريح بالك .
طلعت وكملت شغلي رجعت اتغديت وبعدها دخلت انام حتى العصر اخذ الوالده واروح لبيت عمي.
بلسم:- وصلنا للبصرة تقريباً ساعه بل ٤ -٤ ونص وكفنا يم بيت عمران نزل جابلي عباية مال راس من زوجته.
ضرغام:- كعدت من النوم بل ٤ دخلت سبحت وبدلت ثيابي ولكيت الحجية منتظرتني كاعده بالمطبخ بست راسها ..اخذتها وصلنا لباب الحوش وجان يدخل علينا عمران .
عمران:- السلام عليكم .
ضرغام والحجية:- وعليكم السلام.
ضرغام:- ها عمران وينك من الصبح ماكو مو متواعدين وية ابو كاظم خليتني اروحن وحيدي.
عمران:- هاااا مو صارت عندي شغيله صغيره ورحتلها، المهم انه رايدك بموضوع ضروري.
ضرغام:- خير شنو الموضوع؟
عمران :- اكو بنية من المنطقة جايه و واكعه دخيل تريد تشوفك وتحجي وياك.
ضرغام:- عمران بس انه لازم اروحن لبيت عمي.
عمران:- مانطول شغلة ربع ساعه.
ضرغام باوع عالحجية.
الحجية:- روح يمه كمل شغلتك . بيت عمك ماطايرين وانه انتظرك جوه.
دخلت الحجية وانه وعمران رحنا للديوان عبن البنية الكال عليها منتظرتني هناك.
دخلت واشوف وحده لابسه عباية و منزله حجابها على وجهها .
ضرغام وانه داير وجهي :- السلام عليكم اخيتي.
بلسم حاولت اغير بنبرة صوتي:- وعليكم السلام خويه.
ضرغام كعدت بعيد شوية وكلت :- اتفضلي بشنو محتاجتني وانه اخوج ان شاء الله ما گصر بلي اكدر عليه.
بلسم سكتت :- بس انه رايدتك بموضوع وحيدك.
عمران رأساً كام انه اترخص شيخ رايح للبيت .
ضرغام وهو يباوع لعمران انو شلون تخلينا وحدنا ؟
عمران سوه نفسه مامنتبه على ضرغام وطلع كبل .
ضرغام:- احممم اي خيتي سولفي.
بلسم كمت على حيلي وكعدت قريب لضرغام واحسه اتفاجئ.
ضرغام :- اجت وكعدت يمي وانه عدلت كعدتي بلا هسه اليدخل ويشوفنا وحيدنا شيكول؟
بلسم حاصرتني الضحكة وخاصة من دااحجي مثلهم بس لازم الزم نفسي:- شيخي انه جايه وعندي طلب.
ضرغام:- اي اتفضلي خيتي.
بلسم:- شيخ انه احبن واحد..
ضرغام فتحت عيني ونزلت راسي .
بلسم:- بس هالواحد شلع كلبي اروحن يمنى يروح يسره تعبني وانه احاول افهم هو شيريد.
ضرغام فز من مكانه :- وانه شدخلني بهالحجي خيتي تره انه شيخ والي كدري وانتي جايتني تحجيلي بالحب مااستحيتي؟
بلسم كمت وكفت:- شيخي بس استريح وانه افهمك.
ضرغام رجعت كعدت وهي هم كعدت حطيت ايد على ايد :- كملي .
بلسم:- شيخي انه احبنه بس هو يريد يروح يتزوج وحده ثانيه وانه كضيت عمري انتظره تاليها يعوفني؟
ضرغام:- هالزلمه مواعدج بشي؟
بلسم:- اي شيخ مواعدني بالزواج .
ضرغام:- لعد ليش ماتزوجج وراح يتزوج وحده ثانية؟
بلسم:-
وخرت الحجاب من وجهي حيل عود متنرفزة و بصوت عالي:- غير ماعنده احسااااس.
ضرغام فتح عينه على وسعهن:- بلسسسسم؟؟؟؟
بلسم:- اي بلسم.. وكفت وتخصرتله :-اكدر اعرف يا شيخ ضرغام ليش رايح اليوم تخطب رجاء؟؟؟رجااااااء؟؟؟؟
ضرغام بعدني مصدوم واباوع على بلسم اووووف شكثر اشتاقيت لعيونج اريد احضنها بس هسه هي مو على ذمتي.. ...قويت نفسي وكلت:- ليش يهمج اذا خطبت؟ وانطيتها ظهري.
بلسم رحت وكفت كباله:- طبعاً يهمني .
ضرغام :- عكدت حاجبي ليش يهمج مو رحتي وعشتي حياتج وية حبيب الكلب؟ عليج حلال وعلي حرام؟؟؟
بلسم:- ضحكت بعلو صوتي :- ضرغام صدك تحجي؟؟؟
ضرغام:- صك سنونه نصي صوت ضحكتج چنها ضحكة ......
بلسم:- بفشله:- اني اسفه .
كعدو بلسم وضرغام و فهمته الموضوع كله وهو منزل راسه وبحلكه ابتسامة ديحاول يخفيها.
بلسم:- اني ادري تصرفي غلط من صعدت وياه بس انت ليش دائماً هيج؟؟ تحكم عليه بدون ما تحاول تستفسر او تفتهم مني؟ ليش اني دائماً ادورلك اعذار وانت لا؟
ضرغام:- وهسه شنو المطلوب مني؟
بلسم:- ابتسمت تقبل يا شيخي اطلب ايدك للزواج؟
ضرغام باوعت على بلسم واحس الضحكة راح تطفر من حلكي عكدت حاجبي :- كملتي كلامج؟
بلسم بتعجب:؟؟؟؟؟؟ 😳
ضرغام:- اذا كملتي خليني اروح اكو عالم منتظريني ولازم اروحلهم.
بلسم:- باوعت عليه بصدمة بس كلبي ينعصر واحس روحي شكدددد رخيصه وماعندي كرامة.
يعني ماهمك جيتي لهنا واني احاول افهمك الي صار؟
ضرغام :- لا ما يهمني انتي فتره وعديتي من حياتي خليني اخذ وحده هي تحبني ولا وحده انه احبها وتشلع كلبي مو هذا كلامج ونصيحتج لفلاح؟
بلسم:- ماسيطرت على دموعي... مع الاسف الطريق الي كطعته حتى اوصلك وافهمك والمذلة الذليت نفسي بيها ومع الاسف سنين حياتي الراحت علمود واحد مايستاهل مثلك.
ضرغام :- روحي من كدامي مااريد أأذيج انتي محرمه عليه مااكدر امد ايدي عليج.
بلسم:- طلعت واني دموعي مامسيطرة عليها واشهك والعن الساعه الي اجيت بيها هنا.
ضرغام:- طلعت بلسم وهي تبجي
متت قهر عليها بس بداخلي طاير من الفرح لأن عرفت هي بعدها تحبني وتريدني.
بلسم:-
طلعت وشفت عمران واكف منتظرني اندار وهو مبتسم واختفت ابتسامته وهو ديشوفني ابجي.
صعدت بالسياره و ضرغام واكف بالباب
راحله عمران ماادري شديحجون و رجع عمران وصعد حتى يوصلني.
طول الطريق واني دموعي على خدي وساكتين لا اني حجيت ولا عمران سأل
ذبني براس شارعنا وهو ساكت راح و دخلت للكراج مال بيتنا حتى نسيت انزع عباتي
شافتني امي ونهى:- بسم الله الرحمن الرحيم شبيج بلسم؟
بس اني عفتهم وصعدت ركض لغرفتي نزعت عبايتي وشمرتها ونمت عالجرباية بهدومي وطكيت بجي
دخلت عليه امي ونهى
الام:- شبيج بنتي وشنو هاي العباية ؟
بلسم:- عوفيني ماما الله يخليج.
الام:-شنو اعوفج .. جرتها من ايدها .. كومي كومي فهميني شبيج جايه ودموعج بعينج و لابسه عبايه وين جنتي احجي؟
نهى:- عمة على كيفج مو هيج التفاهم.
الام:- ولج يا تفاهم؟؟؟؟ وانتي باعيلي واحجي وين جنتي؟؟؟
بلسم دفعت ايد امي:- رحت للبصره ارتاحيتي،؟؟؟
ماحسيت غير كف اجاني من امي فرت راسي
اول مره احد من اهلي يمد ايده عليه.
لزمت خدي وباوعت على امي .
الام:- احنا الظاهر احترمناج هوايه و انطيناج اكبر من حجمج وثقه زايده.. بس يرجع ابوج واني اعرف شأحجي وياه يا كلبه.
عليمن رحتي هاااا و منو اخذج حقيره.
امي تهد عليه و نهى لزمتها:- عمة على كيفج والله مو هيج ..اعصابج لايصير بيج شي.
الام:- ولج حتموتني هالبنية..راحت سنتين ورجعت مو هي لااا لا موهي بنتي الي ربيتها وتعبت عليها.
بلسم:- امي تحجي واني بس الدموع تنزل من عيوني ومنزله راسي .
نهى:- امشي عمة نزلي ارتاحي وخليني احجي وياها.
نزلت امي و كعدت يمي نهى:- بلسم ... بدون مااحجي والومج.. برأيج تصرفج صح؟
بلسم باوعت على نهى بعصبية:- لا مو صح اني وحده زماله علكت كلبي بشخص ما يستاهل و رحتله وذليت نفسي وتالي شمرني حالي حال اي وحده رخيصه من الشارع.
نهى حضنتني:- شدتحجين حبيبتي بلسم؟؟ احجيلي شنو الي صار؟
سولفت لنهى على الي سويته والي صار:-
نهى بعصبية كامت :- ليش هيج بلسم؟؟ ليش هيج تذلين روحج؟ شفتي شلون رفضج وراح ياخذ وحدة من ملتهم من بعد ما رفضتي الدنيا علموده..
بلسم لزمت راسي حيل وابجي:- كاااافي نهى كاااافي ارحموني ... تره الي صارلي مو قليل كافي.
نهى حضنتني وكامت تبجي ويايه :- اني اسفه حبيبتي.
بعد مرور ايام
دخلت بحالة كأبه حتى اكل كمت مااكل ..واني افكر احتمال هسه عقد و اتزوج و احجي ويه نفسي ليش هيج ديصير بيه؟ معقول لهالدرجة حبيت انسان عديم احساس واستغلالي؟ معقول عاديت الكل حتى كرامتي علمود شخص باعني و رخص بيه.
اندكت الباب
بلسم بتعب:- ادخل.
دخل بابا واني نزلت راسي حتى بعينه مااكدر اباوع.
الاب كعد على حافة الجرباية و هو حاير مايعرف منين يبلش يحجي... بابا ..هم فديوم اني مدت ايدي عليج؟ هم فديوم حرمتج من شي؟ شكد اقسى على اخوتج بس انتي و اختج عندي خط احمر
.... تتذكرين من جنتي صغيره اجيتيني بيوم من المدرسة وشعرج مخربط وخدج مصلوخ ..كتلج شبيج باباتي منو مسوي هيج بيج؟ كلتيلي معلمتي ضربتني لأن ناسيه دفتري.. باوعت عليج وانتي جنتي صف ثاني ابتدائي مضروبة و ادري دمعتج بعينج بس مانزلت ابد اخذتج ثاني يوم للمدرسة وحجيت وية معلمتج كلتلها شلون تمدين ايدج على طفله واعتذرت من عدنا ورادت تصالحج وانتي عفتيها ودخلتي للصف عبالك مرية صغيره ردت كرامتها وارتاحت.. من صغرج واني اعرف بيج صاحبة كبرياء و كرامتج فوك كلشي .. بس هسه ماكمت اعرفج ليش هيج يا بابا ليش هيج تسوين بنفسج وبينا؟
بلسم:- احس الغصه خنكتني واحس ركبتي راح تطك نزلت راسي مااعرف شنو اجاوب ابويه.
الاب:- بابا اني مجاي الومج وازيدها عليج الي سويتيه مااكلج مو غلط لا غلط وستين غلط بس اني ادري انتي حبيتيه لهالشخص وصدكيني يا بابا الشي الي كاتبه ربج الج مايصير لغيرج لكن اريد بنتي بلسم القوية الطموحة ترجعلي . اريد بنتي الحنينة الي تضحك و تتشاقه وابتسامتها تسحر حياطين البيت . اريد بلسم روحي ترجعلي.
بلسم:- بچيت وشمرت نفسي بحضن بابا .
الاب:- لاتبچين حبيبة بابا كومي غسلي وجهج وانزلي اتعشي ويايه تره الكعده محلوة بلياج.
بلسم:- هزيت راسي ب اي و كمت غسلت و شديت شعري و نزلت
شفت الكل كاعد دينتظرني ..بابا دك على الكرسي يعني تعالي يمي هنا .. رحت كعدت و الكل ابتسم وبدينا ناكل .
ارتاحيت شوية من بابا حجه ويايه و كلت هاهيه لازم انسى واعيش حياتي.
ثاني يوم كعدت الصبح بكامل نشاطي دخلت سبحت وبدلت هدومي ونزلت صبحت على امي وابوية
بلسم:- صباح الخير ماما صباح الخير بابا وبوستهم وامي فاتحة عيونها مصدومة.
الاب:- صباح الخير ياروح ابوج .
الام:- اللهم لك الحمد تعالي ماما تعالي اتريكي.
بلسم كعدت اتريكت عالسريع وسمعت صوت الهورن مال الخط و بوست امي وابوية وطلعت.
الام:- يارب يارب وفقها وريح كلبها وبالها و وكف ولد الحلال بطريقها.
الاب:- امين امين.
بلسم:- دخلت محاضراتي واخذت المحاضرات الي فاتتني لأن تقريباً ٣ ايام اني غايبه ماحضرت.. طلعت و
بقيت انتظر الخط تقريباً ربع ساعه واجه و رجعت للبيت هلكانه من التعب.
كبل اتغديت وصعدت نمت ..
كعدت من النوم وسويت كهوة حتى ابلش اقره
كعدت على المكتب و لابسه بجامتي ولافه كفشتي كباية ولابسه نظارات طبية ومصعده تك رجل عالكرسي وتك اللخ بالكاع.
سمعت سيارة طبكت يم بابنا واندك الجرس
مادرت بال كلت اكيد واحد من جماعه محمد ..
ورة تقريباً ربع ساعه صعدتلي امي.
الام:- بلسم.. بلسم.. كومي ماما.
بلسم:- واني منزله راسي اريد الحك اكمل قرايتي :-وين ماماتي دااقره والله ماعندي مجال.
الام:- دااكلج كومي فديوم بحياتج اسمعي كلامي .
بلسم:- عفت القلم من ايدي هفففف ماما وين اكوم غير تفهميني؟ اذا انتي مادتحجين شي بس كومي كومي.
الام:- ولج ثوله كومي بدلي هدومج وانزلي جوه جايينا خطار.
بلسم:-رجعت راسي ليوره بملل يااااا الله بدت رحمة الله. منو هذولة الخطار؟
الام:- كومي عاد بلا حجي زايد..
شو امي عافتني ونزلت .. كمت فتحت الكنتور حيل وادردم وية روحي لبست اول شي اجه كبال عيني جان بنطرون اسود و بدي ابيض وفوكاه قميص جينز. بس شديت شعري ذيل حصان عالي .
نزلت شفت نهى بالمطبخ دتحضر كلاصات عصير .. كالت:- هاي انتي بعدج مداخله ؟؟ امشي فوتي شمنتظرة؟
حولت عيوني الها دااقلد عليها..ضحكت وعفتها وصلت للصالة دكيت الباب و دخلت
انداريت واني هيج شكلي صار 😳😳😳.
شفت الحجية و سهاد و بثينة وبيدها طفل صغير و رقية.
ماحسيت الا رقيه شمرت نفسها بحضني
حضنتها وبستها كبرانه حبيبتي .
ورحت مشيت عالسريع وحضنت الحجية وبستها من ايدها وراسها
بجت الحجية :- افيش يا ريحة بناتي شلونج يابعد امج؟
بلسم عيوني مدمعه:- الحمدلله حبيبتي مشتاقتلكم.
رحت على سهاد بستها وحضنتها قوي جنت كلش مشتاقه لشوفتها.
بوست بثينه صايره دبدوبه و بست ابنها كلتلها شنو هاي خلفتي مره لخ؟
بثينه:- هههههههه شسوي يا خيتي فليح متخبل عالجهال و فوكاها يريدني بعد احبل.
بلسم:- عهههههههههههههه الله يحفظهم حبايبي.
الام:- تعالي بنتي اكعدي .
رحت كعدت يمهم و سولفنا شويه عن اخبارهم واخباري .
الام:- بنتي اهل الشيخ اجوي يريدون يحجون وياج بموضوع.
بلسم باوعت عليهم بدون اي كلمة.
وعيونا كلها توجهت على ام ضرغام دننتظرها تحجي.
الحجية:- اوووو انه مااعرفن الف وادور ومقدمات ومدري شنهي
شوفي بنيتي من الاخير وليدي الشيخ ضرغام دزنا نخطبج . ها اها .
بلسم بصدمة:- ب بس ضرغام مو خطب رجاء؟
سهاد:- چا لو خاطب رجاء جان اجينا هينه نخطبج؟
بلسم :-
باوعت لأمي شفتها منزله راسها ادري بيها ماتحبه .. رجعت باوعت على الحجية
بلسم:- اني مااطلع عن شور ابوية
اذا ابوية وافق خير على خير واذا رفض ف ماكو قسمة.
الحجية:- اكيد بنيتي هي هاي الاصول وان شاء الله الي بي صالح الج ولوليدي يصير.
ضيفناهم وسولفت وياهم وسألت على علاوي لأن كلش مشتاقتله. دك تلفون سهاد جان تكول:- يمه يلا كومي ضرغام بالباب.
اني ماادري شصار بيه من سمعت بأسمه.
الام:- وين رايحين تفضلو ابقو يمنا عالعشى.
الحجية:- ماتقصرين حبيبة بس هم يالله الطريق طويل و الدنيا اظلمت.
الام :- على راحتكم ...نورتونا وشرفتونا.
سلمو وطلعو واني كبل فلتت لغرفتي .
واسمع امي:- اييييي انهزمي انهزمي جبانه.
سديت الباب واني احس كلبي راح يوكف... شنو لعب عليه من كلي راح اخطب رجاء؟؟ زين اخاف متفقين هو وعمران عليه؟
والله راح يخبلني هالشيخ شكد احاول احل لغزه وماينحل.
كعدت عالميز واني بعدني ممصدكة بالصار بس ابوية مستحيل يرضى واذا قبل ف امي تقنعه بالرفض واذا مو امي ف اسامة .. يعني خصم الحجي ولا واحد من اهلي قانعين بي.
فجأة حسيت الباب انفتحت حيل ودخل اسامة:- هذولة شعدهم هنا؟؟
بلسم:- بسم الله شبيك اسامة؟
اسامة:- باعي بلسم والله العظيم اذا سمعت انتي موافقة بخلقتج بعد مااباوع.
بلسم كمت على حيلي:- اسامة مادتلاحظ انو هالحجي سابق اوانه ؟ وبعدين اني ابوية موجود وهو الي يقرر لا اني و لا انت و شيقرر بابا ......اني موافقة عليه.
اسامة :- خوش بلسم خوش.
طلع وسد الباب حيل وراه.
صار الليل واني ٥ دقايق ادرس و ٥ ساعات افكر باللي راح يصير وكلبي حتى الاطرش يسمع دكاته.
اندكت الباب وقاطعت تفكيري.
اتفضل.
دخل ابوية وهو وجهه ما يتفسر.
الاب:- اي ست بلسم سولفيلي.
بلسم بلعت ريكي:- شسولف بابا؟
الاب:- سولفي ليش هالانسان بالذات الي حبيتيه و بقيتي طول هالفتره ماتقتنعين بغيره؟
حتى حيدر ما جنتي متمسكة بي مثل ما تمسكتي بضرغام.
ليش وشنو السبب؟
بلسم نزلت راسي ثواني ورجعت رفعته بس عيوني تلمع من الدموع المحبوسة بيها:-
انت ليش ماما حبتك و اصرت عليك رغم جدو جان مموافق لأن انت اكبر منها ب١٩ سنه ؟
الاب ابتسم وافتهم قصد بنته:-بس بالرغم من رفض جدج اني ماجبرته ومااخذت امج غصب.
بلسم:-صحيح..
بابا حياة ضرغام تختلف عن حياتنا بوكت الي صار حادث اخوه و وفاته الغضب عمه عيونه و راد يحرك كلب اسامة مثل حركة كلبه على اخوه...بس بعدها حس و راجع نفسه وحبني ..
ابتسمت
بابا تدري انت وضرغام تتشابهون بقوة الشخصية والكبرياء بس داخلكم ماكو احن منه واني الظاهر طلعت مثل ماما.
الاب ابتسم:- سكت لحظات وكال
تدرين اني اجاني ضرغام قبل مايدز اهله
٤ ايام يوم ورة يوم يجي واطرده ويرجع مره لخ صح بالبداية تعصبت منه وطردته بس من شفت اصراره و سمعت كلامه حسيت بحبه الج وكلت هو هذا الرجال الي راح يصون بنتي..
بدايتنا جانت محلوة ولو صايره بغير وقت وغير ظروف جان اختلفت هواية اشياء..
بلسم:- ابتسمت بوجه بابا وهو ديحجي بضرغام ..
الاب:- زين يعني هسه شنو اردلهم خبر؟
بلسم:- بابا صحيح اني احب ضرغام بس الي انت تشوفه صح اني موافقه عليه حتى لو رفضت.
الاب:- وانتي من كل عقلج اقبل اكسر كلبج ؟
بلسم:-حضنت بابا وبسته من كلبه قاسي عالكل الا على بناته يصير شخص ثاني . مثل ضرغام شكد قاسي بس وية رقية لو شمايصير يحاول يفهمها ومايقسى عليها.
بلسم:-بس اسامة..
الاب:- اسامة اني احجي وياه بس اهم شي انتي متأكدة من قرارج؟
بلسم:- سكتت ونزلت راسي اي بابا متأكدة.
الاب:- على بركة الله بنتي. باسني من راسي وطلع .
اني كبل شمرت كتابي يا دراسه يا صخام حتى لو احشك الكتاب بمخي ماراح افتهم شي من ورة التفكير .
نهى دخلتلي للغرفه وادك اصبعتين وتهز ركبتها
اجيبك للدرب كتلك اجيبك
متراهن عليك اصبح حبيبك
هلا هلا ههههههههههههههه
بلسم:- خربت ضحك على حركاتها.
نهى:- اضحكي اضحكيييي
بس هذا غير داهية طلع.. ناصب عليج وانتي النچرة عساس رايحة ومسويتله ملعوب تالي لعب عليج 😂😂😂😂
بلسم:- شفتي شسوه بيه؟؟.
نهى:- ههههههههههه يلا ضرب الحبيب زي اكل الزبيب..بس بصراحة كلش حبيت اهله مبينين صدك فقره..
بلسم:- اي والله حيل حبابين ماحسسوني اني غريبه من اول يوم طبيت لبيتهم.بس ضرغام الي جان شالع كلبي .
نهى:- ضرغومي ، ضرضر، غوغو شراح تدلعيه بالله وهو حتى اسمه مثله غريب عجيب.
بلسم:-ههههههههههههه شدلعه شيخ مشورب والناس ترجف منه اجي اني ادلعه غير يعلكني اباب الحوش.
ثاني يوم شارعنا انترس سيارات و كلهم شيوخ كبار و الهم وزنهم اباوع من الشباك وكل هالفلم مال قبل ٤ سنين رجع دينعاد بس هالمره غير..
هالمرة ماجاي دياخذني غصب و فصلية
هالمرة جاي واني فرحانه بموافقتي اني واهلي حالي حال البنات .
دخلو الزلم وشارعنا انسد اباوع الكراسي واصلة للشارع ..والجوارين كلهم متعجبين . هناك واشوف ضرغام ديمشي بين الزلم كله هيبه .
شكرا لزيارتكم عالم روايات سكيرهوم
