رواية وجه محروق الفصل الخامس عشر بقلم جمانه السعيدي
اصيل...ثاني يوم كعدنا من الصبح اني ومنار اتريكنا
ورحنا البيت لمياء
البنات راحو للدوام واني ومنار بقينا ويا لمياء
منار نظفت البيت وطبخت غده
اني كل شويه اروح للورشه وارجع البيت لمياء
تردون الصدك اني مو اروح علمود لمياء اني اروح علمود منار اتعودت عليها بلبيت
احس البيت موحلو اذا هي ماكوووو
للضهر غدينا لمياء وانطيناها العلاج وانتظرنا لمن رجعن
البنات من الدوام يله رجعنا البيتنا
طبعا لمياء ماكو على السانه غير الشكر
مامصدكه احنا مهتمين بيها وما عفناها بمرضها
صحيح كل إنسان يباوع للناس بعين طبعه
ولمياء جانت تباوع علينا بعين طبعها الاناني
مامصدكه احنا ممكن نهتم بيها ونراعي صحتها
للعصر منار اجت يمي بلورشه
منار...تدري اني مشتاقه الامي رغم كل يوم احجي وياها
واطمن عليها بس كلبي طك عليها
جمانه السعيدي
اصيل...شنو رائيج نروح الاهلج
منار...وين انروح الاهلي ما سمعت ابوي شكال
مايريد يشوف وجهي بلبيت
اصيل...مالج علاقه اليله اني اخليج تشوفين امج
منار...خاف نصير جثث والناس تترحم علينا
اصيل...لا مو الهلدرجه اني عندي خطه
منار...شنو هاي الخطه نتنكر خوما نتنكر
اصيل...انتي بس تعالي وياي
بليل بدلنا وطلعنا
منار...اصيل اني خايفه اذا ابوي كتلني خطيتي بركبتك
اصيل...غير اموت قبلج حبيبتي انتي
منار....وصلنا للبيت اهلي
اصيل...اني راح ادك الباب وادخل واعوفلج الباب مفتوح
من ندخل اني وابوج جوه انتي ادخلي وكبل للمطبخ
بعدين ادخلي جوه شوفي امج
منار...ومن نطلع شلون
اصيل..اني ادزلج رساله اطلعبن قبلي وتنتضريني برا
بلكت ابوج اليوم مو عصبي ولله يهدي علينا
اصيل...دكيت الباب طلعلي ابو منار طبعا كل مره اروح عليهم هو يفتح الباب لان عبدلله مايسمع
دخلت وعفت باب الشارع مفتوح
المهم سلمت علي ودخلنا جوه
كعدنا نسولف طلعت التليفون دزيت رساله المنار
اصيل...هااا دخلتي
منار...اي دخلت
اصيل...تمام
اصيل....شلونك عمي صحتك احوالك
ابو منار ...تمام الحمد لله انت شلونك منار شلونها
خوما بعدها عاوجه راسها اذا ما تسمع كلامك
اضربها المره مايعدلها غير الضرب
اصيل...لا مو الهلدرجه ترا منار متربايه احسن تربيه
كل يوم اترحملك على هاي التربيه الحلوه
ابو منار...الله يسلمك
اصيل...بس مايصير هاي القطيعه منار تريد اتشوف امها
تشوف اخوها خطيه
ابو منار...خل تولي بس واحد ينطيها عين اضل كل شويه اروح الاهلي اشوف اهلي
خليها هيج تكعد بيتها وتسكت
اني عمك الدنيا علمتني أشكال واللوان
المره شبع بطنها واضربها تمشي مثل الساعه
ابد لا تنطينها عين
اصيل...دخيل بختك ياعمي منو بعد يضرب بهذا الوكت
ابو منار....اني اضرب اضربها وشوف شلون تنعدل
جمانه السعيدي
اصيل...هسه اني جاي اترخص منك منار تريد تشوف امها
ابو منار....موافق بس بشرط
انت اجيبها بايدك وتبقى تنتظرها تكعد هنا ساعه ساعتين
وتاخذها وتروح
ماعندي بنات تبات لو تجي يوم يومين
اصيل...الف رحمه على والديك هو اني مااكدر ادخل للبيت اذا هي ما موجود
تعودت عليها بلبيت
بس اني جبتها وياي ودخلتها حتى اشوف امها
طول النهار بس تحجي بامها وخفت انت ما تقبل
كتلها من اني ادخل ادخلي شوفي امج
ابو منار....زين ميخالف
اصيل...دزيت رساله المنار تعاي سلمي على ابوج المشكله انحلت
منار...تحجي صدك اخاف بس ادخل يكتلني
اصيل...لا على مسؤليتي تعاي سلمي علي
منار...اي هسه اجيت
شويه واجت منار هي وامها بس دخلت دنكت على ايد ابوها باستها وباست راسه
ابو منار...بيج بخت بزوجج انسان محترم ويعرف الاصول
اصيل...تسلم الله يخليك
كعدنا ساعه ورجعنا للبيت قبل لا ندخل بيتنا
رحنا شفنا لمياء واطمنا عليها
ورجعنا للبيت
منار...همزين اتصلحت الأمور بيني وبين اهلي
اصيل...مو كتلج امشي وراي ومالج شغل
منار...طلعت فعلا ساحر
اصيل...هااا سحرتج
منار...ياعمي مو بس اني انت ساحر الناس كلها
حتى ابوي الي مايقبل على كلشي سحرته بكلمتين
اصيل...عدلت ياخة قميصي هذا القبول من الله
منار...اروح اسبح وانام
اصيل...يمتى اسحرج وتكومين تركضين وراي
منار...عوفها للزمن هو كفيل يحلها
اصيل...ثاني يوم رحت سئلت اذا منار تكدر اتقدم
لكيتهم سادين التقديم لان صار ٣ اشهر الدوام بده
قررت السنه الجايه اقدملها من وكت
رجعت للبيت بس دخلت سألتني منار هاااا
اصيل....فات الوقت التقديم مسدود على السنه الجايه انشاء الله
منار.. انشاء الله كلشي بيد رب العالمين
اصيل...والنعم بلله
جمانه السعيدي
بعدها بيومين كاعدين العصر جان تدخل علينا ام منار
بس حالتها حاله
منار...هااا يمه شكووو شبيج
ام منار مابيه شي
منار...شلون مابيج شي وجهج ازرك ابوي ضربج
اصيل...عوفيها ترتاح
ام منار...اريد مي حلكي يابس
منار.. اذا مو ابوي ضاربج اني ماافتهم
اصيل...حسيت وجودي يحرجهن طلعت للورشه
بقيت بلورشه البعد الاذان اجت منار للورشه
منار...يله تعال نتعشى
اصيل...ليش ضايجه
منار...ماتشوف مره جبيره بعد مو مال ضرب
يعني ابنها ازوج وبتها ازوجت وهو بعده على نفس اسلوبه
ولله امي مسالمه وحتى ما تئذي نمله
اصيل...اسكتي لا تزودين النار حطب احنا ماعرفنا شنو المشكله
منار...كتلها ليش اجيتي هنا مارحتي الخوالي
تكول مااريد السالفه تكبر
بس اروح الخوالج تصير مشكله جبيره اذا يشوفون وجهي ازرك هيج
اصيل.. ليش تسئلينها هيج سوال بيتي مفتوح الها بكل وقت ممنوع تحجين هيج
خليها تبقى عدنا هله بيها هذا بيتها
منار...نزلن دموعي مسحتهن
اصيل.. انتي ليش مكبره الموضوع عادي تصير بااحسن العوائل
منار...قربت على اصيل حضنته ضجت على امي
اصيل...رغم الموقف مؤثر بس اني فرحت بهاي الخطوه
حضنت منار وكتلها لا ازعلين
منار...يله تعال نتعشى
اصيل...اوكفي عليمن مستعجله هاي لحظه يذكرها التاريخ
منار...فتحت اديه اريد ابتعد عنه خوب انت ما صدكت
اصيل...تعرفين اهلج مايجي منهم اله كل خير
منار.. هههه يله امشينا امي بقت وحدها
جمانه السعيدي
اصيل ..دخلت لكيت عمتي كاعده بلغرفه الي اني انام بيها
منار خاله مندر وهي كاعده علي
اصيل...هله بعمتي نورتي بيتنا
عمتي...النور نورك
اصيل....أقسم بلله اليوم بيتنا حلو لان انتي اجيتي
عمتي....الله يحفظك
تعشينا وكعدنا نسولف ونضحك حاولت اغير جو شويه
لان المره حيل ضايجه
طلعت جبت حلويات وكرزات
اصيل...اي عمه سولفيلنا على يوم عرسج
عمتي...عرسي يوم اكشر
اصيل...يعني ماحبيتي عمي علينا هاي السوالف
عمتي...هو اني طفله اللعب وأهلي كالو راح تزوجين
اني مااعرف العرس شنو
كيفت ملابس وذهب
ازوجت عمك النوب يامصببه المصيبه
الرجال طلع عصبي ماينجرع من البدايه اني اخاف منه
لو غلطت بشي يموتني تموت
احنا عدنا ماكو مره تطلك لو اتموت من الضرب
والجوع تكعد بيتها وتسكت
اتحملت كلشي الخاطر منار وعبدلله وسكتت
اصيل...انت ماكو منج مره اصيله
منار...يااا تتحمل الضرب اصيله
اصيل.. لا لان حافظت على بيتها وجهالها
منار...المفروض ما تسكت شنو ساكته على الاهانه
عمتي...لو ما صابره ومتحمله جان هسه اني بمكان وانتم بمكان
ولله الصدك عمك كلش زين لا بخيل ولا صاحب مشاكل
ويا الناس
بس هو لو صار عصبي لاتوكف كدامه ابد
اني تعودت علي لو شفته عصبي ابتعد عنه
لمن يبرد حيل يله احجي وياااا
اصيل...بس ليش عبدلله اخرس
عمتي...عم ابو منار الله يرحمه جان اخرس
اصيل...هاااا
عمتي...انتم روحو نامو بغرفتكم مالكم شغل بيه
اني هم راح انام
اصيل.. باوعت على منار وضحكت بمعنى وين تشردين
منار...اني انام يمج هنا لو تجين انتي تنامين يمي
عمتي....شوفي قسما بلله اذا اجيتي نمتي هنا
هسه البس عباتي واطلع اروح البيت اخوي
اني حلفت روحي انتي ورجلج نامو بغرفتكم بعدكم
عرسان
اني باجر ارجع البيتي
منار...لا يمه اني انام يمج
عمتي...اني حلفت اذا اجيتي نمتي هنا البس عباتي هسه واطلع من بيتكم
اصيل...باوعت عليها وضحكت لا عمه لا اطلعين
احنا نروح انام بغرفتنا
يله منار امج تعبانه امشي انام بغرفتنا
منار....ااشرله لو تموت
اصيل...طلعت من الغرفه وكمت اصيح يله منار تعاي
عمتي...رجلج يصيح عليج كومي هذا لو ابوج
جان هسه كسرج تكسر يصيح وما تكولين هاااا
منار...طلعت من الغرفه لكيت اصيل يركص على الصامت
اصيل...هله هله هله باامج هله يابعد روحي عمتي
هله بعمتي هله هله بلزين وأهله
منار...لو تموت
اصيل....أصيح عمتي عليج
أصيل.....كمت انعى ايين المفرررر اخ يابويه
أين المفرررر عمت عيني على منار
ولج خيه طحتي ومحد لحك عليج يبووووي
ياجاسم يابويه احا احااا
عمت عيني على الزينين جمعيه يامنار ياخيه
طحتي ومحد لحك عليج
رجعت اركص و اكمز
منار....طحت بلكاع من الضحك يابويه متت
اصيل....ليش اضحكين يله تعاي
لو ادري رايح جايب عمتي من زمان
المفروض ادز كتاب شكر العمي اكتبله عاشت الايادي
الي تحرك المواقف الصعبه
تعاي بسرعه قبل لا عمتي تغير رائيها وترجع الابوج
اذا اجا ابوج باجر يصالحها اطرده من الباب
لو اشتري مسدس اهدده بي
بس هو هددنا بالمسدس الي عنده
منار...كافي متت بطني كامت توجعني من الضحك
اصيل...ضحك خير انشاء الله يابعد سنوني
يله تعاي
منار...انت اكيد تتشاقا
اصيل....اتشاقا مووو صحت بصوت عالي
عمه عمه عمه
منار...اس اس فضحتنا
عمتي...هااا يمه اصيل
اصيل....نمتي لو بعدج كاعده تردين شي
عمتي...لا يابعد كلبي عساك سالم
اصيل....هااا تجين لو ارجع اصيح عمتي
منار.. اجيت
اصيل...نسوان ماتجي اله بلعين الحمره
شكرا لزيارتكم عالم روايات سكيرهوم
