رواية عشق الضابط الفصل الخامس عشر بقلم زينب نور
اجه الليل و فرشنا فراش و احمد راح بس غدير ترجع ويانه باچر بقينا سهرانين تقريبا الساعة ب ٣ بليل چانت نبأ تشوف ل غدير صور البلكونه مالتهم شلون جبيره و بيها مرجوحه مال شخص واحد تتعلك ب السكف !
- الله نبأ تجنن وباجر من الصبح نروح ، اكدر اروح اشوفها هسه ؟؟
- روحي بس ع كيف لا تطلعين صوت لأن الساعة ب ٣ !
- ولله ع كيف ما اطلع صوت ابد !
- ديلا روحي .
طلعت غدير من الغرفة
( غدير )
طلعت و فتحت الفون شوي اسمع اغاني هادئة فتحت الانستا لكيت يوسف مسوي لايك لكل منشوراتي حتى لأقدم منشور نزلته ضحكت وكلت
- ع الأقل لا تبين لهل درجة معجب !
- شسوي مو بيدي !
انصدمت من الصوت درت وجهي وشفت يوسف واكف كبالي ويضحك
- اسفة مقصدي هيچ اكول ..
- لا لا تتأسفين ، ما كلتي شي غلط فعلا اني معجب بيچ من اول ما شفتچ بصراحة .
بقيت ساكته و ما رديت دنكت راسي مستحية وما اعرف شكول هو تقرب ورفع راسي
- باوعيلي غدير , اني حياتي كلها خلصتها ع الدراسة جنت المتفوق بين اخواني و ب السادس دخلت بحالة هوس بسبب الدراسة و طلعت معدل زين خلاني ادخل قسم زين وبجامعة محترمة ...
سكت شويه واني ما قاطعته وكمل
- من دخلت جامعة توقعت خلص كافي دراسة خل أستمتع بحياتي بس ما عرفت اكون اصدقاء و حتى الواجب الي يدخلنه بي الدكتور ك مجموعة اني اكول الهم ان راح اسوي الواجب واكتب اسماءنا علي يعني افضل اشتغل ل وحدي و المشاعر الي اجتني من شفتچ اول مرة اعيشها اني عمري ما مسلم ع بنيه ب حياتي كلها اني هسه جاي استغرب شلون حجيت هيج هواي واني مرات يفوت ايام ما حاجي .
اني جنت اباوع علي وصافنة ب كلامه وهو جان كامش ايدي سحبت ايدي منه ودرت وجهي
- ما اعرف شنو اكول الك يوسف ، بس أعتذر منك اني ما ابادلك نفس الشعور .
- اني اعرف احمد حبيبچ .
انصدمت ودرت وجهي علي
- شنو ؟ منو كلك ؟
- ماكو داعي أحد يكلي اكدر أحلل الأشخاص الي وياي و واضح حركاتكم مبينه واحد يحب الثاني !
- لعد اذ تعرف ليش اعترفت انك معجب بيه ؟
- بخصوص هاي السالفة اني نفسي ما ادري بس ما كدرت اتغاضه ع مشاعري !
- شنو المطلوب مني هسه ؟
- هسه ؟ ما مطلوب منچ شي انتي تلقائيا راح تحبيني .
- لا ولله شهل ثقة هاي ؟
- مو سالفة ثقة بس اني راح اسوي كلشي علمود تحبيني.
- الحب مو إجبار وبعدين اني احب احمد وعلاقتنه كلش زينة ف رجاء ابتعد مني !
- اوكي , تصبحين ع خير غدير .
- تصبح ع خير .
( خلصت غدير )
خلصت اجازتنه ورجعنه للبيت وصلنه حمزه للبيت نزلنه كلنه
- ميس ممكن شوي تبقين ؟
- اي
نزل الكل وبقت ميس وي حمزه اعتقد انطاها رقمه وانستا وهل سوالف .
اني صعدت ل غرفتي بعد ما سلمت بس ميس كالت الي خلي جنطتچ ونزلي نكول ل ماما وهي تكول ل بابا .
وكفنا يم ماما ب المطبخ
- هلا عيني الي عافني يومين سووها وحشه عليه .
- حقچ عليه يا احلا ام ب الدنيا
- خير شعدچن ؟
- ميس اجاهه عريس !
انصدمت وعافت السكينه من أيدها وكمشت ميس
- صدك ولج ؟ منو نعرفه ؟
- ماما يصير اخو محمد حمزه .
- ولله خوش ولد ومحترم وعائلتهم كلش محترمة .
- اي بس تكدرين انتي تكولين ل بابا ؟
- طبعا اني اكول اله ، شوكت يجون ؟
- اليوم بليل .
- لعد لازم اكول اله هسه .
- اي روحي .
راحت ماما لغرفتها هي وبابا واحنه لزكنه روحنه ب الباب حتى نسمع وكلشي ما سمعنه لحد ما بابا فتح الباب ووكعنه علي اني وميس
باوع ل ميس وخزرها وملامحه مال ضايج
- عندچ رقمه ؟
ميس خافت
- اي .
- خابري هسه ، و كوليله خل يجي يكبع ويأخذ .
ميس فرحت واني هم وهو ضحك وحضنه
- كبرتوا و كبرتونا وياكم .
كملنا من الدراما وهل سوالف وبدينا نحضر نضفنا البيت و رتبناه وبعدين كمنا نحضر ب ميس و همات ب نفسنه كملنا و ما بقه شي ويجون
جنه هيج لابسين
كملنا مكياج وجان متناسق وي الفساتين
تقريبا الساعة ب ٨
نزلنا وبابا هم بدل وماما وحتى عمي و ياسر وأحمد .
المهم كاعدين منتضريهن وكبل ميس شردت للمطبخ بس اني و غدير بقينه ووكفنه يم بابا وهاي نسلم عليهم من يدخلون .
دخل أبو محمد ب البداية وسلم حرفيا جانوا جايين كلهم يعني الحمدلله الاستقبال مالتنه جبير وواسع حتى يوسف جاي !
دخل محمد وغمزلي بينما يوسف نضراته حرفيا جاي تاكل غدير كعدو وبقو يسولفون واني رحت للمطبخ اساعد ميس لأن ما اعتقد صينية وحده تكفي للجاي ف هي اخذت صينية واني هم .
دخلت ميس قبلي و بقت تندك ع كل واحد وتنطي جاي و سوالف عروستنه حلوه هم ما خلصت.
نزلت يم حمزه وطبعا الكل متوقع ان راح يكول الهه كلمة حلوة بصوت ناصي بس حسب ما سولفته ميس النه ف كال الها
- صدرچ طالع ، انتبهي !
ميس خجلت و تازمنا من كامت صعدت فستانها شويه وعبالكم اخو يختلف هم قدمت اله الجاي كلي
- جاي تجبريني اخذج ب الحرام !
غمزلي بنهاية كلامه الفرق أن محمد شوي منحرف ( شوي ؟ ) المهم كعدنا و ابو محمد حجه
- اعتقد يا ابو ميس أن ميس كالت الك سبب زيارتنه واحنا هنا من مبدأ من جمع رأسين ب الحلام له قصر في الجنة ، وتريد الصدك يا ابو ميس ؟
ضحك بابا وسئله
- شنو الصدك يا ابو محمد ؟
- ولله اني طامع ب القصر ، و الا اني معليه بيهم ، اريد قصر ب الجنة .
كلامه شوي خفف التوتر و كمل
- احنه جايين نخطب بنتك ميس لابنه حمزه و نكون ب أشد السعادة اذ صارت بنتك جزء من عائلتنا .
- ولله يا ابو محمد ماكو داعي اصلا اسئل عليكم واضح عليكم خوش ناس و اشكر الصدفة الي خلتنا نتعرف بس الجواب الاخير يم ميس اذ موافقة ع الخير و البركة.
( ميس )
الكل دار وجهه عليه وحسيت ب توتر مو طبيعي جان بابا كال الي
- حبيبتي اسئلج كدام الكل ، موافقة لو لا ؟
باوعت ل حمزه الي جانت عيونه تلمع امل
- موافقة بس بشرط .
كالتها والكل دخل بحالة توتر كال ابو محمد
- شروطج كلها أوامر حبيبتي ، شنو شرطج ؟
توترت وحمزه مبين متوتر اكثر مني
- تكون فترة الخطوبة طويلة اريد اخذ وقتي .
- طبعا هذا شي اكيد ب اليعجبكم شكد ما تردون تتعرفون تعرفو ، هسه نكول ع الخير و البركة ؟
هزيت راسي ب خجل و هلهلن امي وامه ونبأ اجت نرجس تهلهل خزرها محمد وسكتت
بين ما جان الكل متوتر ومركز وي الأحداث جانت نضرات بين يوسف و غدير وهمات احمد!
--------------------------------------------------
شكرا لزيارتكم عالم روايات سكيرهوم
