رواية غاليتي الفصل السادس عشر
غاليه اتفك في روحك : مانبش خطاني
منجي : والله تقعمزي حلفت انا
غاليه قعمزت
منجي قرب منها وبحت فيها
غاليه قلبها يدق : كنك
منجي قرب منها اخرى ويبحت في عيونها زين ويكشر في حواجبه
غاليه وخرت : كنك اتبحت هكي
منجي قرب بسرعه باسها في خدها 😘
غاليه عيطت بصوت عالي : يابايخ
وتمسح فيها خدها : عدي خود البوسه من حبيبة القلب
منجي يفنص فيها : اسس اس بلا فضايح
غاليه برمت وجها وكشرت
منجي مسك الكرسي وكرها عنده
غاليه اتفنص فيه : هيييييي كنك اتكر فيا
منجي وقف الكرسي ومسك ايديها رفعهن
غاليه اتفك في ايديها : بطل را انعيط اقسم بالله
منجي نزل راسه لوطه حطه على كرعيها
غاليه قلبها يدق : حول راسك عليش الحركات هذينا توا
منجي يحكي بصوت واطي وراسه تحت : خليني توا في شن مضايقك انا ؟ ولا شن درتلك ؟ نبي انتريح عندك شويا بس حرام فيا يعني ؟
غاليه تنهدت وسكتت
منجي : حطي يدك على شعري
غاليه : ماهو حطتها ساره امبدري شن تبي فيها يدي
منجي ايتأفأف : لازم مالنكد نحنا
غاليه عيونها دمعن : انا بختي حتى لما يسقم حالي معاك لازم حد ينطلي في النص
منجي رفع راسه ومسك ايديها
غاليه برمت وجها
منجي ماسك ايديها ويحكيلها : ترا بحتيلي هنا
غاليه : احكي نسمع فيك
منجي هزلها راسه بمعنى لالا : قلت بحتي فيا انا
غاليه بحتت فيه وماسكتها العبره
منجي سيب ايديها ومسحلها عيونها : لييش هضا كله بس
غاليه : شي انا اعصابي تعبانه عشان هناء تبي تجوز
منجي يحكيلها بصوت واطي : وراس عيونك نجيبها لكي امتى ماتبيها و نشيلك لها وكان تبي انصبي توا وانخرب موضوعها وتقعد معاك
وغمزها : نحنا ماصدقنه وسام تغلض فيها وخداها تبيها تقعد في رقبتنا العمر كله حتى هو موضوع را
غاليه ضحكت : حرام عليك
منجي ضحك : ايييوه نبي الضحكه هذي انا
ومسك ايديها : هانت قريب ناخدك حتى انا غير نين امك اتفك الرباط توا نخطبك دغري
غاليه هزت راسها : نين بابا يطق سنه لازم
منجي : الله يرحمه ؛ بعد سنه انطلع الفرح بعد شهرين نخطبك وبطلي دوه واجده وبلا نق غير قولي يارب بس
غاليه ابتسمت : يارب
منجي يبحت في ايديها : ليش مادرتي حنه حبيبي
غاليه ضحكت : اول حاجه مانقدرش ثانياً عيب عندنا البنت الشباب ادير حنه حمره زي هذي
المنجي : اهاااا باهي انا نحبها را
غاليه ابتسمت
منجي باس ايديها الاثنين : في الفرح نبيها لعند فوق دبري راسك
غاليه : ووووه عليا لالا مش للدرجه هذي
منجي رفع حواجبه : مش شووووري بذات في السيقان ناعليا نا
غاليه فكت يدها ضرباته على يده : بلا قلة ادب
منجي يضحك : بطلي خليني ناخد راحتي شويا يابيبي فكينا مالجو
غاليه تنهدت : هيا ادوي باهي خلصني
منجي : انتي يابيبي صح قصيره بس احسن حاجه مش رقيقه ومش دبه يعني فيك ماينقرص
غاليه دفاته من عليها وجت تبي اتصبي : والله اتشوف اصلا انا الغلطانه
منجي يكر فيها ويضحك : والله ماصارت غير تعالي
غاليه : لالا سيبني
منجي قعمزها ع الكرسي وحط راسه على كرعيها : ااااه يابيبي امتى بس ناخدك وانتريح
غاليه حطت ايديها على شعره : يااارب
منجي وحده من ايديها وحطها على وجه : وراس امي الغاليه نحبك ومجنون بيك ومانشوف في غيرك
غاليه ابتسمت وتلعب في شعره : باهي انا نبي انصبي توا البنات يقولن وين عدت هذي
منجي ضحك : يامسكينه هذي فرصه مره ف العمر امي محنيه 😂
غاليه تضحك وقرصتله خده : مطول لسانك
________
10:30 ص
هناء راقده ف الفراش واتضبح : بناااات نوووضن
غاليه فتحت عيونها : كنك
هناء : نبي الحمام نبي حد يفكلي الحنه
غاليه اتنوض في رشا : شوشو نوضي فكي لهناء حنتها
رشا اتكسل وبحتت في الساعه : حي عليكن وقت بكل طولنا
غاليه صبت فتحت الروشن ومشت شور الباب
رشا : ماطولش في الحمام
هناء بحتت في رشا : انزلي للحمام الي لوطه
رشا صبت : توا ننزل اصلا نبي نجيب شكاير بيش انحتحت فيهن الحنه
غاليه طلعت مالحمام بحتت مالقت حد
مشت شور دار منجي و فتحت الباب بشويا وخشت وردت الباب
لقاته راقد على بطنه ومتضبط المخده
قعدت تضحك
سمعت صوت حد يحكي تحت
طلعت تجري وسيبت الباب مفتوح
المنجي فتح عيونه ايتأفأف : عليك صبح اززززف
وقعد يضبح : ياهنااااء هنااااء
عيشه صبت فم الباب : كنك اتهارج صبح
منجي ايتكسل : ياخالتي من الي فتح الباب بالله
عيشه ضحكت : انا فتحته نوض سادك
منجي يثاوب : كم الساعه توا
عيشه : والله ماني عارفه
هناء خطمت ماشيا للحمام
عيشه : تعالي وريني حنتك
هناء مدتلها يدها ورفعت الجلابيه : شن رايك
عيشه : لا ماشاءالله صابغه
اميره طلعت ولابسه : صباح الخير
عيشه : صباح الورد
وبحتت في ايديها : ماشاءالله على حنتكن سلمني عجانه
هناء تضحك
اميره بحتت في هناء : مازلتي ماده وجك انتي خفي روحك
هناء : هياا انخش للحمام بس و نلبس حتى غاليه لبست
اميره : هيا باهي احمد مزال يلبس عندكن وقت توتن فيه روحكن
غاليه طلعت مالدار ماسكه فيلو هناء في الكيس ابتاعه : لميت حاجتك كلها ف الشنطه
هناء ماشيا للحمام : خلاص مزال نلبس ونطلعو
امينه مصبيه ع الدروج : انزلن افطرن درتلكن كبده واشربن معاها عصير عنب
المنجي طلع مالباب وينزل في كناتيرته : صباح الخير
امينه : صباحك مبروك ياحبيبي انزل افطر كبده مع البنات اتقوتك رايح ناقص
المنجي خبط على بطنه : تي وين ناقص بحتي الكرشه
امينه : الله واحد عليك وليدي ماشاءالله خليك نبيك اتزيد
منجي ضحك : مرات المدام مايعجبهش بعدين
امينه بحتت في غاليه : تعجب الملك ماملي اتمناك وتحلم بيك حتى في الحلم
غاليه مصبسه اتلم في شنطت هناء قدام الدار
________________
5:30 م
غاليه اتصور في هناء : ماشاءالله تبارك الرحمن
هناء مبتسمه : شن رايك كله تمام
غاليه عيونها دمعن : مش مصدقه بككككل
هناء : خلاااص را نبكي والدنيا تسيح
غاليه اتصور : بحتي فيا واضحكي
هناء : تعالي صوري معايا سيلفي
غاليه قربت منها وصورت معاها
وحطت التليفون في جيبها : انلبسك البرنوص توا ؟
هناء : اها اكيد منجي قريب يوصل
غاليه : مش مفروض يزفوك هل العريس
هناء ضحكت : ماهو منجي خو العريس 😂 هو الي يبي يزفنا
غاليه تضحك
يسمعن في صوت بيابات
هناء قلبها يدق : وصلووو وصلووو غاليه اتلبس فيها البرنوص
دق الباب الكوافيره فتحت خشت مراه كبيره سلمت عليهن
:- انا عمت وسام
هناء ابتسمتلها : اهلا وسهلا
غاليه اتمشي فيها بشويا لعند وصلت للباب
لقت منجي مصبي يرجا فيهن وفاتح بيبان السياره
غاليه ابتسمتله : ارفع الذيل من لاوره را ايتوسخ مالشارع
عمت وسام مشت تبي تركب لاوره
غاليه بحتت فيها : اركبي قدام
:- لالا خليني احدا كنتنا اركبي انتي ولا اتحشمي منه خوها
غاليه ضحكت : لالا عادي
منجي فنص فيها : اركبي ف السياره
هناء : منجي امسك الذيل
منجي جا وراها و ماسك الذيل ابتاعها : ارفعي من قدام راك اتجي على وجك
____________
6:00 م
امينه مصبيه ف المدخل هي وعيشه وامال ام وسام
عيشه : طولو بالبنت معش جت
امينه : اكيد قريب يوصلو
عيشه : جربي رني على منجي به
امال رن تليفونها ردت : الو ... خلاص نحنا فم الباب نرجو فيكم ... وسكرت الخط بحتت في امينه : هذي فاطمه صبيتي قالت وصلو
ويسمعن في صوت البيابات
مصبيات فتحن الباب ويرجن
خشت فاطمه : وسعن قفطانها كبير حيدن هك
هناء خشت و وراها منجي رافعلها الفيلو : قدمي شويا اخرى
هناء تمشي بشويا
عيشه قربت رفعتلها البرنوص : ماشاءالله تبارك الرحمن
امال جت سلمت عليها : نجيلي مرات وليدي الله واحد عليك
امينه عيونها دمعن : ماشاءالله على بنيتي
هناء بحتت في المنجي : تعال صور معايا
منجي هز راسه بمعنى لالا : غاليه في السياره
امينه مسكاته من يده : صوره وحده مع خيتك هنا فم الباب
جت المصوراتيه صبت قدامهم
هناء سلحت البرنوص منجي جا صبا احداها وصورو
بعدها بحت فيها وضحك
هناء ضحكت وبحتت فيه : صار مني ؟
منجي يضحك وباسها على راسها : هاتخلي مكانك في الحوش نعنشكلك
هناء عيونها دمعن وسلمت عليه : ربي يخليكم ليا
منجي مالباب وسكره وراه
غاليه ابتسمت
منجي ركب ف السياره : طولت عليك
غاليه : لالا عادي
منجي : توا نمشي انحطك ف الحوش بعدها نمشو للوس
وفتح الروشن وطلع يحكي للي وراه : ياصلوووحه اسبقووني توا نلحقكم
غاليه كراته من يده : را اتلبز سوريتك مالسياره افطن
منجي خش وبحت في دبشه : لا مغسوله السياره جو تمام
غاليه اتكت ع الكرسي وتنهدت
منجي : شنو حبيبي
غاليه : تعبت بكل نبي انروح نرقد
منجي : كولي قبل ماترقدي الله يربحك راك تنقصيلي
غاليه ضحكت : حاضر هانقعدلك فيله
غاليه تليفونها رن طلعاته مالشنطه : هذي ماما
وفتحت الخط : الو
سعاد : وينك هذا كله
غاليه : جايا ف الطريق هضا وين حطيناها ف الصاله
سعاد : معناها وصلتو بيها متأخر
غاليه : هما طولو علينا هناء واتيه بدري كانت
سعاد : كيف طلعت
غاليه : ماشاءالله زي الاميرات صورتها لكي توا انوريك لما نوصل
سعاد : خلاص نرجا فيك
غاليه سكرت
المنجي : راقيلها عشان طولتي ؟
غاليه اتصور فيه : لالا عادي
منجي ضحك وبحت فيها : في شن اديري انتي
غاليه علت صوت المسجل : سوق وانت ساكت ماتبحتش فيا دير روحك مش فاطن نبي انصور فيديو
منجي ضحك بصوت عالي : صورني وانا مش فاطن
________________
سعاد مقعمزه في دار المقعد اتفرج ع التلفزيون
مروه خشت عليها ماسكه سفره قهوه
صفاء لحقتها بالكيكه
سعاد ابتسمت : ماشاءالله من امتى
مروه ضحكت واتصب في القهوه : ندربو عشان بعد تمشي غاليه نمسكو مكانها
سعاد خدت القهوه شربت منها
صفاء اتقص في الكيكه
سعاد : مزال غاليه تحكي مع منجي
صفاء ومروه بحتن في بعضهن
صفاء : كيف يعني
سعاد : فكني مالغمز تحكي معاه يعني مزال اتكلم فيه
مروه : لا اصلا ....
سعاد قاطعتها : كذب مانبش
صفاء بحتت في مروه : خلاص خليها تعرف
وبحتت في امها : اها ياماما مزال تحكي معاه وهو يبيها مايضحكش عليها انتو عليش كل مره دايريلها قصه
سعاد تشرب في القهوه وساكته
الباب يدق
مروه صبت : اكيده هذي غاليه
ومشت تفتح الباب
مروه : من ؟
غاليه : افتحي انا
مروه فتحت : شن صار صورتيها
غاليه خشت تسلح في محرمتها : صورتها لكن اها ؛ درتن قهوه ؟
مروه : مزالت ساخنه توا نجيبلك فنجان
غاليه خشت لدار المقعد : خيرات
سعاد ابتسمت : مرحبتين
غاليه قعمزت : شن دايرين
سعاد : وريني كيف طلعت هناء
غاليه طلعت تليفونها واتوري فيهن الصور : هنا قبل ماتلبس
وهنا لما لبست
هناء وهي اتبخ في العطر
هذا سيلفي انا وياها
اتقلب في الصور جت صورة المنجي وهو يضحك
غاليه ارتبكت وطلعت من الصور بكل
صفاء بحتت في مروه
سعاد : روح بيك منجي
غاليه هزت راسها بمعنى اها : ماهو قتلك هو الي هايروح بيا
سعاد : شن رأي هله في الموضوع ياغاليه ؟
غاليه وجها انحمر : اي موضوع
سعاد : موضوعك انتي ومنجي
غاليه سكتت ..
سعاد : شنو موافقين ولا لا ؟
غاليه ارتبكت : مش عارفه ياماما ماهو موت بابا الله يرحمه قلب الدنيا و انا قبلها كنت مخطوبه ف هو مزال ماحكالهم اخرى
سعاد : اهااا يعني هو ناوي خير ؟
غاليه هزت راسها بمعنى اها : قالي اول ما انتي اتفكي الرباط يجي يحكيلك ويوم الي بابا يطق سنه يدفع ويدير فاتحه وبطلع الفرح طول
سعاد تنهدت : الله يسامح الي كان السبب كان هكي راه توا واخدك
غاليه : الله يرحمه ويسامحه
____________________
12:00 ص
المنجي خش للحوش
لقى امه وخالاته ف الصاله يهدرزن : السلام عليكم
عيشه : وصلتهم امتى
منجي : امبدري غير لهيت مع الشباب
امينه : متعشي ؟
منجي : لالا
امينه اتضبح : ياساره ولعي ع الرز للمنجي
امينه بحتت في الشكاير : شن جايب معاك
منجي : شوية حاجات للحوش ... وخش للمطبخ
لقى ساره ورشا
المنجي : مرحباا
ساره رافعه سروالها واتسيق : اهلين
رشا تغسل في الموعين جت خدت منه الشكاير : مسكنا مكان هناء اليوم
منجي يضحك وجا يبي يخش
ساره : امسح كرعيك قبل وخش
المنجي مسح كرعيه وخش قعمز ع الطاوله : حطولنا ناكلو
ساره مشت شور الغاز : هياا قاعده انسخن
منجي تليفونه رن طلعه من جيبه وفتح الخط
غاليه : حبيبي
منجي : ايوه
غاليه : وينك هضا كله
منجي : في الحوش
غاليه : كنك تحكي هكي احداك حد
منجي : اهاا قاعد انتعشى
ساره احداه : كويس الرز ولا انزيدك
المنجي : اوكي هكي تمام
غاليه رقالها : من هذي الي اتقولك انزيدك ؟؟
منجي : اهاا باهي شويا وانرن عليك
غاليه سكرت الخط بلا ماتحكي
المنجي تأفأف وحط التليفون ع الطاوله
ساره قعمزت ع الكرسي احداه : منجي
المنجي ياكل : نعم
ساره : نبي نحكيلك في موضوع بس خليه بيناتنا
المنجي بحت فيها : خير ان شاء الله شن في
ساره ابتسمت : عندي بنت صاحبتي وتعرف حتى هنيوه المهم معجبه بيك بكل وخاطرها تعترفلك وهكي يعني
المنجي ضحك : والله !
ساره تضحك : المهم يعني لو اعترفتلك وهكي شن ردة فعلك انت ؟
منجي حط الكاشيك : الحمدلله
ساره : كمل عشاك
منجي خبط على بطنه : الحمدلله ؛ باهي شن المطلوب مني يعني توا
ساره : هي بنت ناس و عسل بكل خايفه تحكيلك اتردها قالتلي اسأليه
منجي سكت شويا وبحت فيها : قوليلها يفتحلك ربي عندي من ماليه عيني وزياده
ساره رقالها بس قعدت تضحك : قصدك غاليه
منجي صبا وطلع وماردش عليها
ساره اضايقت ورقالها
رشا صبت احداها : ماهو عارفتيه مكبد فيها مازلتي تحاولي
ساره ابتسمت : لا مش انااا صاحبتي وصتني وانا حبيت نسأله لها بس
رشا ضحكت وماصدقتهش مشت اتكمل في المواعين
_____________
2:30 ص
منجي طلع هدرز مع هله وخالاته و ركب داره غير دبشه
ورن علي غاليه لقاها مقفل : ياالله الصبر عليك نكديه طايح فيها
رن على صفاء
صفاء ردت : ايوه
منجي : صفصوفه يااحسن وحده
صفاء تضحك : مانجا يااحسن واحد
منجي : وين اختك النكديه
صفاء : قاعده قالبه وجها ودايره روحها راقده
منجي : هاتيها بالله عليك ياصفاء
صفاء نزلت من سريرها
وصبت احداها : غاليه هاكي منجي
غاليه كشرت وجها : مانبي حد
منجي : صفاء افتحي المايك
صفاء فتحاته : فتحته
منجي راقيله : عندك دقيقه وحده تفتحي تليفونك بلا نقاش
وعلا صوته : تسمعي ولا لا
غاليه خافت : نسمع
منجي سكر الخط
ورن على تليفونها قعد يجرب لعند فتح
غاليه ردت : من فضلك معش تهزبني
منجي راقيله : لعند امتى في النكد عايشين عشان غيرتك الزايده
غاليه متضايقه : طبعا غيره زايده تبي تاخد راحتك وانا نسكت وانتفرج
منجي متعصب : شفتيني ماسكها انبوس فيها امي قالتلها سخنيله رز وحطتلي انقوللها لا معلش ياامي صبي انتي
غاليه تعصبت : وانت كنك صغير ماتعرف اتسخن
منجي يحكي ومسكر سنونه : اول واخر مره صوتك يعلا !!! افطني لروحك لعند هنا مانرحمكش را
غاليه سكتت و قعدت تبكي
منجي دهش : استغفر الله العظيم يارب استغفر الله
غاليه تبكي
منجي : خلاص اسكتي .. وعيط في وجها : اسكتي قتلك
غاليه كتمت البكيه وسكتت ...
المنجي يعيط : شن اندير عشان نرضيكي يعني انجي نخطبك توا ولا شن اندير ؟؟؟؟ انا نبي انتريح معش انتحمل النكد كل مره عشان جاينه حد
امينه فتحت عليه الدار لقاته يعيط : كنك قالب الدنيا
المنجي بحت فيها ويحكي في التليفون : شويا وانرن عليك
غاليه تبكي : ساره صاح الي خشت سمعت الباب
منجي خبط على جبهته : نعن ..... اليوم الي جت فيه ساره ؛ ... وسكر في وجها
عزق التليفون ع السرير وقعمز داهش ع السرير
امينه : خشت وسكرت الباب : كنك اتعيط مع من
منجي داهش : شي ياامي كنك
امينه : منكده عليك معيشتك شن تبي فيها دايره فيك هكي قريب يركبك السكر والضغط
منجي قريب يعيط في وجها ماسك روحه بالسيف : اتفك امها الرباط تخطبيها ليا
امينه تعصبت : ردينا لنفس القصه
عيشه دقت ع الباب وخشت
المنجي متعصب : وحق لا اله الا الله را انلم دبشي وانسافر وماعاد اتشوفيني
امينه متعصبه : سافر بالسلامه عندي تسافر خير
المنجي انصدم : خلي الضي يطلع بس
عيشه مسكت امينه : وسعو بالكم كنكم
امينه : انا تعبت وهو كل يوم قصه عشان غاليه
عيشه بحتت في المنجي : ياوليدي خود رضا امك تربح
منجي متعصب : انا مانفهمش و يطلع الضي والله ماني قاعد فيها
امينه اتفنص فيه : والله يامنجي اتزيد عليا انرن على سعاد انقوللها خلي بنتك اتخاطا ولدي
منجي خبط المرايا بيده : جرررربي ديريها
امينه عيطت : ووووووه ووووووه شن درت في يدك
جن البنات يجرن مالدار
وركبن خالاته وعماته
واحمد طلع يجري
عيشه قربت منه تمسك في يده : وريني شن صارلك
منجي يحط في يده ورى ظهره : ماحد يقرب مني الله يستر بيتك ياخالتي
امينه تبكي : والله كاني متت ماني مسامحتك والله لا تربحك يامنجي ياكبير عيالي
منجي انصدم ويعيط : تدعي عليااا عشان مانبش ناخد الي تبيها تي والله كان اخر بنت ماواخذها
احمد يكر في امه : عليك قصه معش انتهت مش ظلم هي خليه ياخد الي يبيها مالك وماله
امينه اتهز في راسها بمعنى لالا : كان اخر بنت مانك واخدها بعد نموت خوذها
امباركه اتهدي فيه : خلاص غير وسع بالك وهات انلفلك يدك
منجي داهش وخذا كناتيرته يلبس فيها : جو تمام
كر مفتاح سيارته وتليفونه ودخانه ونزل
امينه مصبيه تبكي ع الدروج : تعال هن وين ماشي
وصبت تجري وراه
احمد طلع يجري وراه
المنجي ركب في سيارته
احمد مصبي احدا السياره : وحد الله ياراجل كان صبرن نين يروحو العرب
المنجي داهش : اطلع من راسي يااحمد
وحرق العجل ومشى بسرعه
اميره لابسه ديشمبر ومصبيه قدام الدروج : خلاص ياعميمه وسعي بالك توا تنحل وكل شي ع النصيب
امينه تبكي : لازم ينكد علياا لعبت بعقله مش عارفه شن لاقي فيها
امباركه : بنيه قزونه ياامينه وكويسه بلكي ياخد فيها الاجر
امينه تمسح في دموعها : اناا ماقلتش مش كويسه انا ام وخاطري ناخدله وحده نا نبيها
عيشه ساكته وخلاص خاطرها ياخد بنتها
امباركه : باهي ياخد الي تبيها انتي وكان مالقى معاها راحته خليه ياخد الي يبيها ومتريح معاها
امينه قعدت اتعيط : وووووووه علياااا يرعش فياااا يبي يجلططططني
عيشه تمسك فيها : خلاااااص اسكتي مش مستاهل الموضوع
احمد خز يهزب : ياامي فجر راهو الناس يسمعو برا والله عيب الي اديرو فيه اقسم بالله عيب كان باتي قاعد را ماديروش هكي
امباركه اتصبي فيها : صبي معايا وحدي ربك
امينه صبت تبكي : لا اله الا الله
احمد بحت في اميره : خلاص خشي ؛ وانتو هيا الي هذا على فراشه فضولنا هالسيره
البنات خشن للدار وسكرن
والصبايا نزلن
احمد خاش للحوش ويهزب : الواحد قعد كل يومين نفس القصه
اميره اتسكر في الباب : خلاص وسع بالك اهدا
احمد قعمز ع السرير : جديات تخليه ياخدها وانتهينا تعبنا ازف
اميره سلحت روبها علقاته : انجيبلك كباية عصير اتروقك واتهديك شويا
