رواية غاليتي الفصل العشرون والاخير
سعاد جت تجري : يامنجي تعال الدكتوره طلعت
منجي صبا يجري يبحت فيها وساكت
الدكتوره : مبروووك بنوته زي القمر ماشااءلله
المنجي ابتسم : الحمدلله يارب ؛ وغاليه ؟
الدكتوره ابتسمت : الحمدلله كويسه بس تعبت واجد البيبي حجمها كبير ماشاءالله
منجي حط ايديه على وجه : اللهم لك الحمد يارب
امينه : وين البنت
الدكتوره : في الحضانه يلبسوها وتوا يجيبوها تفضلو في دار المريضه انطلعوها من غرفة الولاده وانجيبوها لكم
_________________
1:30 م
منجي طلع مشى للجامع صلى الظهر
وجايب حاجات مالدكان وجا ..
دق ع الباب وخش : السلام عليكم
غاليه ابتسمت
امينه وسعاد : وعليكم السلام
منجي قرب صبا احداها : حمدلله ع السلامه
غاليه بحتت فيه : الله يسلمك
سعاد مدتله كرسي : هاك تريح
غاليه مسكت يده : لالا توا يقعمز احدايا ع السرير
منجي قعمز عند كرعيها : شنو تعبانه مازلتي
غاليه سكرت عيونها : شفت الموت بس تاريته التعب كل يهون بعد سمعت صوتها
منجي ضحك : وينها هي
امينه : قالو مزال يجيبوها بعدين ولما جوبوها اترضعها طلعونا مالدار خايفين عليها
منجي فرحان : ورضعت جوها تمام
غاليه هزت راسها بمعنى لالا : انا ماقدرتش انرضعها انتألم بكل
سعاد : لازم اتحملي واترضعيها هو الم في البدايه الحليب متحجر
امينه : مافي كيف حليب الام يفيدها عشان تنتج
منجي : ان شاء الله خير غير اترد صحتها قبل بعدها ساهل
الممرضه دقت ع الباب وخشت ادف في كروسه
بحتت في غاليه وابتسمت : السلام عليكم ؛ شن حاسه روحك توا
غاليه ابتسمت : الحمدلله
الممرضه : هضا غداك ولازم تاكلي كويس عشان بعد شويا نجيبوها لكي تحاولي ترضعيها مره ثانيه
منجي صبا : انا عندي شغل ضروري نطلع انديره وانجي
امينه : اربح ياباتي ربي يفتحها في وجك
غاليه اضايقت : حتى يوم جيبتي شغل ماتبش تشوف البنت باهي
منجي ضحك : المهم شفتك انتي واطمنت عليك ؛ نص ساعه غير عاطي موعد للراجل بس
امينه : خلاص خلي الراجل يشتغل جايته بنت ومصاريفها يبي يزيدن بعدك هو من غادي مش ماسك يده بكل
غاليه برمت وجها ع الجيهة الاخرى وسكتت
سعاد جت احداها تفتحلها في الاكل : هيا سلم بنتي ماشاءالله بحتي الغداء حتى العصير الطبيعي حاطينه كولي هيا
امينه صبت : نمشي للحمام انتوضى بيش انصلي خيرلي
وفتحت الباب وطلعت
غاليه اتأفأف : كل كلمه نبي ندويها انا وراجلي تبي اتنط مش معقوله را
سعاد بصوت واطي : مشيها المهم راجلك كويس معاك تحملي على عيونه بحتي حتى المستشفى الي جيبك فيها كيف شكلها وقريب يفرشلك الارض ورد
و وكلتها : افتحي فمك هيا
غاليه تاكل : بس ياماما انا ماعندش وسعة بال را ونافس واعصابي تاعبه يعني كان رديت ماتهزبيش
سعاد فنصت فيها : لاااا مهما كان ام راجلك وامك امينه هذي خيرها عليك ليوم القيامه ادير مادير تبي اتحملي
امينه فتحت الدار وخشت
سعاد : تعالي كولي ياامينه
امينه تفرش في الصلايه : لالا والله ماعندي نيه خليني انصلي بسرعه خيرلي
________________
3:00 م
غاليه اتعيط : مش قادره حوليها ياماما
سعاد : لازم اترضعي بنتك هيا سلم بنتي
امينه : لا حول ولا قوة الا بالله لازم اتشدي روحك
غاليه تبكي : الم غريب مش قادره انرضعها
البنت تبكي غاليه ماسكتها : بسم الله ؛ ياربي كيف اندير
باب الدار دق
سعاد غطتلها بالانصوله
انفتح الباب وتباوعتهن هناء : اهلااااا ياام العروس
حمدلله ع السلامه
غاليه ابتسمت : الله يسلمك
اميره خشت وراها : اهلين يالولي
وجن ايشوفن ف البنت : ماشاءالله تبارك الرحمن
اميره مدت ايديها : عطيها ليا هاتي
امينه : سمي قبل
اميره خدتها : بسم الله ماشاءالله ياحبيبتي انا
غاليه ابتسمت : دعيتلك ياميرو وانا انجيب ان شاء الله ربي يعطيك ويفرحك
اميره ابتسمت : ان شاء الله يارب
هناء طلعت تليفونها : عري وجها انصورها الكلبه محلااها
امينه : حرام عليك ملائكه تقولي عليها كلبه
هناء ضحكت : خليني انوريها من مرات ولدي نطلع عمه واعره
امينه ضحكت : معناها مش طالعه لأمك
غاليه بحتت في سعاد و ماسكه ضحكتها
امينه : من جابكن
هناء تنهدت : مع خويا الي مشحورنا مالقوايل
امينه : كنه احميده معاكن
اميره هزت راسها : لا مع المنجي
امينه : عليش مشحوركن شن في
دق الباب وانفتح
منجي تباوعها : انخش تمام
امينه : خش مافي حد
منجي خش ماسك باقة ورد و كيس صغير
: السلام عليكم
وبحت في اميره : هذي بنتي
اميره تضحك : اها بنتك
منجي يضحك : دقيقه بس
ومشى لغاليه مدلها الورد وباسها على راسها
يحكيلها بصوت واطي : ربي يخليكي ليا يااحلى ام
غاليه مسكت الورد وابتسمت : ومايحرمني منك يارب
منجي مد الكيس لهناء : هاكي و وروني البنت
اميره عرتله وجها : شوف جمالها
منجي يبحت فيها زين وابتسم : ماشاءالله شنو يابابا
البنت اتحرك في ايديها
منجي : كنها ادير هكي
اميره تضحك : لازم اتحرك راهي بنادم ؛ هاك امسكها انصوروك معاها
منجي : لالالا مانمسكها
غاليه ضحكت : امسكها كنك
منجي ضحك : مافيهاش عظام والله مانقدر
هناء ماسكه الكيس : باهي وهذي الي شحورتنا عليها
منجي ضحك وخداها منها طلع منها علبه وعطاها لغاليه
غاليه فنصت فيه : منجججي معقوله هكي
منجي ابتسم : غار شوفيها قبل
غاليه فتحت العلبه وضحكت
امينه : ورينا شنو
هناء ضحكت : حديدة لير
امينه : ماشاءالله مبروك
سعاد ابتسمت : اتبيديها بالهناء وسلم صريفك الله لا يغيبه
غاليه ماسكه الحديده ومبتسمه
منجي : البسيها به
امينه : تطلعي عندي ياغاليه باهي
غاليه اضايقت بس ابتسمت : لا عادي انا نبي نطلع في حوشي قبل
امينه : انتي جايبه من يبي يعانيك بروحك لالا اطلعي عندي
سعاد اتبحت وساكته
غاليه : حتى ماما قالتلي اطلعي عندي قلتلها خليني في شقتي
منجي ابتسم وبحت في امه : توا نقعد معاها انا وانجيبو وحده مالبنات اتبات معاها
امينه : بنات صغار شن عرفهن كيف يعانن
هناء فنصت فيها : لا يعرفن كانن يعانن معايا في اوسيفه امينه قلبت وجها : باهي براحتك
سعاد : انا لا عندي راجل يبي غداء لا شي توا انبات معاك انا
غاليه بتسمت : الي يبي يبات معايا مرحبتين بيه انا المهم نطلع في حوشي
________________
8:00 م
منجي فتح باب الشقه : خشي ياعمتي
سعاد ماسكه البنت : بسم الله
غاليه ماحوتك ماتمشي : ماما انغيرولها دبشها
سعاد : توا انغيرلها انتي خشي غيري روبك والبسي واحد اخر و تريحي في سريرك ماعليك فيها
غاليه : لازم انتعود انغيرلها لبسيها قدامي
سعاد ضحكت : حاضر توا انوريك ؛ غار انا نبي انصلي ماصليتش انحطها في سريرك
غاليه خشت للدار ماشيا للحمام : اها تعالي ياماما حطيها هنا ع السرير
سعاد خشت حطتها ع السرير : بسم الله
منجي خش للدار بحت في السرير وضحك
فتح الدولاب لبس توته و مشى بشويا قعمز ع السرير احداها
فتح عليها البطانيه
و مسك صوابعها يشوف فيهن : شنو يابابا نوضي سادنا نوم
يحرك في صبعه على خدودها : الحمدلله يارب
غاليه طلعت مالحمام بحتت فيه وضحكت : شن اديرو انت وبنتك من ورايا
منجي ضحك : تعالي شوفي ايديها كيف صغار
غاليه مشت قعمزت احداه اتبحت فيهم ومبتسمه : نحبكم انا انتو اغلى حاجه في حياتي
منجي : ان شاء الله اتعبيلي الحوش كله عيال
غاليه : لالالالا هي بنت وحده تجربة الجياب ماعاد انكررها
منجي ضحك : غير قولي ان شاء الله
غاليه اتغطي فيها : صقع عليها وانت لبستك خفيفه في شهر 1 نحنا را
منجي : حبيبي علقتلك الدفايه هنا
غاليه : ننغم منها مانقدرش
منجي : توا بعد ترقدي انطلعها في الليل ؛ اليوم عمتي بايته عندنا نطلع انجيب عشاء من برا
غاليه هزت راسها بمعنى لالا : الصقع هضا يبي حاجه جاريه مش وكال مطاعم
منجي مسك يدها باسها : مش خاطرك في حاجه حبيبي
غاليه مسكت يده : لا يابيبي ربي يخليك ليا والحديده شن لزمتها والنبي
منجي : انتي جبتيلي احلى بنيه في الدنيا كلها ؛ بعدين كان نقدر انجيلك اكثر راني والله ماقصرت وانتي مش خساره فيك .. وطبس يبوس في البنت
غاليه طبست باساته على شعره : بس حبيبي مره اخرى الحاجه عطيها ليا بروحنا ف الحوش
منجي بحت فيها : عليش كنك
غاليه : مش على حاجه بس هكي مانحبش انوري انا
منجي ابتسم : حاضر المهم ماتسلحيهاش من يدك
غاليه ضحكت : حبيبي منظري بيها تقول ماشيا عرس حرام هذي مش عمليه را
سعاد اتضبح من ورى الباب : غاليه
غاليه مقعمزه ع السرير : خشي ياماما تعالي
سعاد خشت : شنو اجتماع الاب وبنته
منجي يضحك : تشبه امها ياعمتي صاح
سعاد ضحكت : مزال ماتبانش توا
منجي يبحت فيها : نفس العيون
غاليه ضحكت وطبست باستها : تشاينيز زي ماما انتي
سعاد جت قربت مالسرير : هياا صبو انغيرولها
غاليه جت تبي اتصبي مش قادره
منجي : كنك شن تبي
غاليه : شنطتها عشان اتغيرلها ماما
منجي مشى جابها : امتى تاخد اللهايه
سعاد تضحك : كنك مستعجل توا تاخدها عطيها ليا اليوم في الليل جربيها
منجي طلع للمعيشه ايتفرج ع التلفزيون
_____________
2:30 ص
البنت تبكي
غاليه راقده واتأن : اممم ااه
منجي فتح عيونه ومد يده حطها على خدها
يحكيلها بصوت نعسان : غاليه نوضي حبيبي شوفيها
غاليه فتحت عيونها : حرام عليكم نبي نرقد
منجي قعمز ولع الوناسه : هياا حبيبي تحملي شويا اكيد جيعانه البنت
غاليه قعمزت اتأفأف وماحوتك ماقعمزت : مدها ليا
منجي يحك في عيونها : وين انشيلها مانقدرش
غاليه : هي ملفوفه مش هاتحس بيها ارفعها بس
منجي خايف ومد يده بشويا شالها : هاكي بسرعه
غاليه سقمعت قعميزتها وخدتها : بسم الله
وقاعده اتحاول اترضعها : ااااه مش قااادره لالا
منجي : انوضلك عمتي
غاليه هزت راسها بمعنى لالا : خليها راقده تعبت اليوم
منجي بحت فيها : باهي شن اندير
غاليه سكرت عيونها : توا انحاول
وعاضه فمها وعيونها يدمعن : ياربي هياا
البنت تبكي واتعيط
غاليه تعبت : باهي شن اندير انا كانك مش محصله حليب
وحطتها ع السرير : انديرلها رضاعه وانجي خليك احداها
منجي يحطلها في اللهايه في فمها : ياعياطه شنو الهرجه الي دايرتيها هذي 😘
وسمع صوت قزاز انكسر
انفجع وصبا يجري لقى غاليه طايحه في المامر فاقده الوعي
وطايحه الطاوله الي في الزاويه و مكسوره الفازه الي كانت فوقها
سعاد ناضت طلعت تجري من دار المعيشه
منجي قعمز على ركبيه يرفع فيها : غاليه ردي عليا حبيبي كنك
سعاد اتحط في يدها على راسها : بسم الله علي بنيتي
منجي شالها رفعها : من الاول حسيتها مش صافيه
سعاد : انشيلوها باهي
منجي مفجوع شالها مشى بيها للصاله : جيبي حاجه لفيها ليا بيها توا انشيلها
سعاد مشت تجري لفتها له بأنصوله : اربح وطمني الله يربحك
قعمزت سعاد في الصاله معش قدرت اتصبي : يارب احفظلي ابنيتي يارب ماتوريني فيها شر
______________
3:30 ص
منجي درس قدام المستشفى وشالها نزل يجري بيها
ويدور في حد وقعدو طول الليل ايدورو في دكتور عشان يكشف عليها
__________
8:00 ص
الدكتور طلع من عند غاليه
منجي مصبي قدام الدار
الدكتور ابتسم : انت زوجها
منجي صبا : ان شاء الله
الدكتور : باهي تفضل معايا شويا معلش
امينه خشت تجري : السلام عليكم
رجب : السلام عليكم شن في
منجي بحت في امه : خشيلها في الدار
الدكتور بحت في رجب : انت باتها
رجب : كيف باتها انا الي مربيها
الدكتور : باهي تفضلو معايا
مشو معاه للمكتب
الدكتور قعمز : تفضلو
منجي على اعصابه : شن في يادكتور يعني دكتورة النساء حولتها قالك ادير كشف وانها مش شور الولاده
الدكتور : غير وسعلي بالك وركز معايا شويا
رجب : غير يادكتور طمنا
________
غاليه راقده
امينه تحكي بالتليفون : اهي راقده احدايا ... لنا نص ساعه واصلين ..... مافي حد قاعده نرجا فيهم عند الدكتور
وانفتح الباب رجب خش
امينه : اهو رجب جا ياسعاد اصبري توا انرن عليك
رجب خش قعمز وساكت
امينه بحتت فيه : كنك شن صار ؟
رجب تنهد : اطلعي شوفي ولدك برا
امينه طلعت بحتت لقت منجي مقعمز في المامر وجرت عيونه باكي
صبت بحتت فيه : شن قالك
منجي عيونه يدمعن ويمسح فيهن
امينه قلبها يدق : كنك ادوي
منجي حط يده على عيونه وانهار : سرطان في في الثدي عمره سنه وبادي في الروايه
امينه انصدمت ومعش قدرت اتصبي مسكت في الساس وسكتت
رجب فتح الباب وطلع : خش للبنت ناضت
منجي بحت في باته : كيف ندويلها يقولي ادويلها الدكتور كيف انقوللها على كارثه زي هذي
امينه تبكي : عليك خباره سوده ع الصبح يالطيف اجعل للبلاء تصريف
رجب تنهد : غير صبي شوفها اقعد معاها ادور فيك
غاليه راقده في السرير واتبحت في الدار
منجي فتح الباب وخش
غاليه : حبيبي شن في
منجي ابتسم وقعمز احداها : مافي شي دختي شويا بس وانا خفت جبتك
غاليه : وين بنتي
منجي : مع عمتي في الحوش
وعيونه يدمعن يبرم في وجه ويسمح في دموعه
غاليه فطنتله واستغربت : حبيبي
منجي بارم وجه : نعم
غاليه : شن في كنك
الدكتور دق ع الباب
منجي يمسح في عيونه : لفي المحرمه على راسك
وبحت في الباب : تفضل
الدكتور خش ابتسم : شن دايره ياغاليه بعد التحاليل
غاليه اتبحت في المنجي : شن في يادكتور
الدكتور كر كرسي قعمز : انا مانبش اندس عليك بس انتي انسانه قويه وعندك بنت قالولي صح
غاليه هزت راسها بمعنى اها
الدكتور : ربي لما يحب عبد يبتليه واذا ابتلاه معناها يختبر في صبره وانتي انسانه مؤمنه ولازم تصبري
غاليه قلبها يدق وساكته
منجي معش تحمل صبا فتح الباب وطلع
بحت في باته : خش اقعد معاها
امينه جت اضبطاته : خلك قوي انت سندها انت الي تنسند عليك
منجي يمسح في عيونه : ان شاء الله خير اللهم لا اعتراض على حكمك
_____________
#بعد_مرور_شهرين 🌹
7:30 م
غاليه لابسه طاقيه صوف ومتغطيه في السرير
منجي فتح الباب وخش ماسك البنت : خير ياماما
غاليه ابتسمت : ياحبيبة ماما
منجي مدها لها : هاكي
غاليه مسكتها اتبحت فيها و عيونها دمعن
اميره خشت : ياقلبي وحشتيني
غاليه : اهلين ياميرو ان شاء الله ماتعباتك
اميره ابتسمت : وجها خير عليا بنتكم والله
امينه بحتت فيها : ليش كنك
اميره ابتسمت : انا حامل
امينه اضبطتها : ماشااءلله طيب فيك
غاليه بحتت في المنجي : ليش ماجت معاك ماما ؟
منجي : جوها ناس يساولو فيها وهي مش راقده من امس في الليل
غاليه : سجلت البنت امينه زي ماقالت امك ؟
منجي هز راسه بمعنى لالا وقرب منها بصوت واطي : مش معقوله البنت بيبي واسمها امينه ساهل خليه توا نطمن عليك قبل بعدها ساهل توا انسجلها
امينه صبت : انا انروح عندي عرم حاجات نبي انديرهن
منجي : انوصلك
امينه : لالا باتك قاعد لوطه
اميره : انا توا يروحني منجي لما يجيب عمتي سعاد
امينه : هيا مع السلامه
غاليه مسكت راسها وسكرت عيونها : اميره خوديها مني
اميره جت خدت البنت : تعالي ياعمري عند عميمه 😘
منجي بحت فيها : شنو كنك
غاليه تنهدت : تعبانه واصله حدي لا متت لا تريحت ليا شهرين انتعذب
منجي مسك ايديها : وراسي انا كان تحبيني معش تحكي هكي ان شاء الله ربي يطول في عمرك والله انا مانسوى حاجه بلاكي
غاليه حطت راسها على كتفه وعيونها دمعن : خايفه بكل
منجي باسها على راسها : من شنو خايفه انا معاك ماتخافي من شي
غاليه بحتت فيه : اتحبني حتى انا هكي بلا شعر وبلا ملامح
منجي تنهد وباسها على جبهتها : انتي بنيتي واول فرحتي مافش احلى منك في عيوني
غاليه بحتت في اميره : خلوها تبات معايا اليوم
منجي استغرب : من بيعانيها وشن خطر عليك اليوم
غاليه تنهدت : هكي نبيها تقعد مرايفه علي رقدتها في حضني
الدكتور دق ع الباب وفتح
منجي صبا سلم عليه : دكتور شنو حالك
الدكتور ابتسم : الله يسلمك ان شاء الله باش مهندس اسمحلي دقيقتين نبيك شويا
منجي طلع معاه برا وسكر الباب
الدكتور : ماقالتلك شي ؟
منجي تنهد : لا والله ؛ عطيني امل يادكتور
الدكتور : الامل في الله
منجي : ونعم بالله
الدكتور : هي النوع الي عندها شرس انتشر بسرعه وهي مش مساعدتنا السرطان تبيله مناعه و مقاومه معنويه والمدام معنوياتها للصفر
منجي تنهد : والله ماعرفت ماندير يادكتور مشلول ومافي يدي شي انديره لها
الدكتور : هي اليوم طلبت مني انك اتبات معاها
منجي استغرب : قسم نساء كيف نبي انبات ؟
الدكتور : حاولت نلقالك ثغره وانخليك بس ماتطلعش برا الدار نهائي يعني حمام وعندك جوا وحاول انك ماتطلعش نهائي
منجي استغرب : ان شاء الله خير تبي حتى البنت معاها اليوم
الدكتور : يمكن الجو الأسري هضا يرفعلها معنوياتها شويا
___________
9:30 م
غاليه اتكلم في التليفون : اهو توا ركبولي تغذيه و منجي قالي جاي في الطريق هو وماما
هناء : انتي لازم تاكلي ضروري زري على روحك
غاليه ماحوتك تدوي : انا الميه انحطها في فمي انرجعها مش قادره بكل
الباب انفتح
سعاد خشت باسها
غاليه : خلاص اهم جو يانونا توا انكلمك بعدين
هناء : خلاص انا نبي نطمن عليك بس توا بكرا انشوفك
منجي خش وماسك البنت : جينا ياماما راهو
غاليه مدت يدها : منجي صبيني نبي انرجع
منجي مد البنت لسعاد و صباها بسرعه شال معاها التغذيه للحمام
غاليه ادف فيه : اطلع برااا
منجي فتح الشيشمه يغلسلها في وجها : اشش خلاص
غاليه ماحوتك ماتنفس : نبي الحمام كلملي ماما اتسلحني
منجي تنهد : اسكتي ولا حرف
وطبس سلحها دبشها
غاليه تبكي واجعتها روحها
منجي عيونه يدمعن وبارم وجه
_____
سعاد ماسكه البنت وتبكي : يارب بنيتي تبرا يارب خود من صحتي وعطيها
منجي فتح الحمام وطالع ماسكها من يدها
غاليه تبكي منهاره
سعاد تمسح في دموعها : ليش تبكي ياماما كنك
غاليه تبكي : قوليله معش يخششني للحمام نعرف انخش بروحي
منجي متضايق وساكت
سعاد : باهي توا معش يخششك غير اسكتي بس
منجي رقدها ع السرير ويغطي فيها : ارقدي هياا تريحي
غاليه رقدت ع الجنب وغطت وجها وتبكي
سعاد بحتت في منجي وماسكه بكيتها
_________
7:00 ص
سعاد ناضت مسكت البنت وجت تبي تطلع
غاليه بصوت واطي : وين ماشيا
سعاد : ماشيا لمبروكة الي احداك في الدار انسهري معاها شويا كملي نومك ارقدي
غاليه تنهدت : مارقدتش اصلا
سعاد : كنك مارقدتش
غاليه بحتت في المنجي راقد ع الكرسي : اششش خلاص عدي را ينوض نومه خفيف
سعاد لفت البنت كويس وطلعت
غاليه فجأة وهي راقده اتبحت في السقف اتشوف في ضبابه سوده قدامها قعدت اتعمش واتضبح : منجي مننننجي
منجي فتح عيونه صبا بسرعه جا احداها : شنو حبيبي كنك
غاليه مدتله ايديها : صقعانه تعال اقعد احدايا
منجي تنهد يحك في عيونه و قلبه يدق قعمز احداها ع السرير واضبطها : حطي راسك هنا وارقدي هياا انا معاك
يبوس فيها على راسها
غاليه سكرت عيونها واتأن من الالم : امممم اممم
منجي يضبط فيها ومتضايق : سلامتك ياغاليتي ياريته فيا ولا فيك
غاليه بصوت واطي : حبيبي
منجي : نعم حبيبي
غاليه : قولي الشعر الي كنت اتقول فيه ليا وانا تاعبه مالحمل
منجي ضحك : حاضر ؛ بس شن خطره عليك
غاليه : هكي بس قولي نبي نسمعه منك
منجي حط يده على يدها من فوق ويحرك فيها
يبي يقول الشعر وعيونه دمعن وخانقته العبره :
غير ويش يوجع فيك ياغاليتي .. قلبي فداك وصحتي وعافيتي ❤
غاليه عيونها دمعهن وتنهدت : ااااه يابيبي
منجي : سلامتك من الآه
وسكتو هو يبكي وهي تبكي
غاليه تحكيله وحاطه راسها في صدره
ماتبش اتبحت فيه : حبيبي كان صارتلي حاجه هاتزوج ؟
منجي سكر عيونه بالقوه : ممكن اتبطلي ياغاليه
غاليه خانقتها العبره : مانقدرش انبطل لازم نحكيلك الي في خاطري لان خايفه
منجي يبكي ومسكر فمه خايفه يدير صوت وتحس بيه
غاليه : انا مسامحتك انك تجوز عادي بس مانبيكش اتحب غيري
وقعدت تبكي وتحكي : انا بس بنيتك ؛ انا بس دلوعتك ؛ انا بس البنت الي ادير عليها المستحيل وتقعد تحبها طول عمرك
منجي قعد يبكي واضبطها : وراسك انتي مانحب خاطيك ولا نبي خاطيك انتي حبيبتي وام بنيتي وتوا تبري وتقعدي ام عيالي غير بطلي الكلام الي تحكي فيه
غاليه هزت راسها بمعنى لالا وخانقتها العبره : منجي را يحطوني في تلاجه كان صارتلي حاجه ادفني دغري
منجي يسكر في عيونه بالقوه وقعد يضبط فيها : الله يربحك خلاص
ويمسك في وجها بيده : بحتي فياا بحتي فياا هنا
غاليه فتحت عيونها بحتت فيه وتبكي
منجي يحكيلها بصوت واطي ويبكي : مازال ماكملنا باقي حلمنا ؛ مش وعدتك انسفرك ماليزيا زي ماخاطرك ! مش اتفقنا نبنو استراحه فيها احواض زرع تزرعيهم بيدك ؛ مش وعدتك تقعدي بنيتي العمر كله ؛
ومسك وجها بإيديه الاثنين ويبكي وابتسملها : مش كنت انقولك مافش عندي مراه اتسوق ؛ ابري بس نشريلك احلى سياره تختاريها و انعلمك اتسوقي و ديري كل الي خاطرك فيه
غاليه اتبحت في عيونه وساكته ودموعها ينزلن
منجي كرها واضبطها وقعد يبكي
غاليه اضبطاته بالقوه : حبيبي صقعانه غطيني
منجي يكر في البطانيه وغطاها وقعد متضبطها : ارقدي هياا اهو انا معاك
غاليه سكرت عيونها واضبطاته : ماتسيبنش بروحي
منجي : والله ماني مسيبك لعند اتنوضي
وقعد يحرك في يده على يدها عشان تدفا
ويبكي بلا صوت وماسك عبرته
_____
#بعد_مرور_ساعه 🌹
غفا منجي وهو يرقد فيها
فطن يده انبلت ناض وبحت في الساعه
وقعد يلمس شنو الي مبلول
وغاليه راقده على صدره رقبتها منفصعه
بحت في يدها لقى التغذيه اتصب برا
صبا بشويا وجا يبي يحطها ع السرير غاليه مرخيه
وقعد يمسك في يدها يدها اطيح و هي متلجه
منجي قلبه يدق ويلمس فيها بشويا على وجها : غاليه حبيبي ردي علياا
غاليه ماتردش ولا اتحرك
منجي حطها ع السرير ومعش قدر ايصبي قعد على ركبيه ع الارض يحرك في وجها : ردي علياا بحتي فياا هياا افتحي عيونك بطلي حركات ماتخوفينش
عيونه تعبن دموع وقعدن دموعه ينزلن لا ارادياً
وحط راسه عليها وقعد يعيط بصوت عاالي
والدنيا كلها لمت .......
_____________
12:30 م
احمد يمسح في دموعه : من ينزل لوطه
رجب : راجلها وخوها
ودف منجي : انزل
منجي يسلح في كندرته و نزل للقبر وهو مستوه
زاهد في الدنيا
حياته انتهت
حارب وجاهد عشانها سنين ومشت في لحظه
في دقايق لقى روحه مصبي في قبرها لوطه ويتلقى فيها من خوها عشان يحطها
حطها و قعمز على ركبيه فتح على وجها شويا
ويحط في يده على عيونها ونزل راسه على راسها ويبكي
(( مش وعدتيني ماتخلينش !!
مش قلتيلي مش هاتخلي حد ياخدني منك !!
مش وعدتيني تاخديني معاك وين ماتمشي !!
كنتي تقوليلي اني كل دنيتك ؟
ودنيتك فانيه ياغاليتي مشيتي وخليتيني بروحي
لمن سيبتيني !!
من ليا بعدك ؟؟
من يبي يغطيني لما انصقع ؟
من يسألني كنك متضايق ؟
من الي عارف انا شن ناكل وانا شن نشرب ؟؟
من الي يقول لا ماحد ينوضه نومه خفيف ؟؟
من يطفيلي الضي وانا راقد ؟؟
ومن الي تخليني راقد في الصبح ويفوتني العمل عشان ماتبينش نطلع في الصقع ؟؟
ااااه يااغاليه غيبتك موعرها
ااااه كسرتي ظهري
اللهم لا اعتراض بس انا حياتي ادمرت انا انتهيت
انا جسد بلا روح بلاك
خديتي روحي معاك ومشيتي وسيبتيلي قطعه صغيره منك مش عارفه كيف نبي انربيها بروحي وكيف تكبر بلا ام
لما تسألني وين ماما شن انقوللها !!
كيف انشيل مسؤوليتها بروحي بلاك !!
مش اتفقنا انكبروها مع بعضنا !!
وفي نص الطريق مشيتي وسيبتيني
مازلت نبيك وراس عيونك مازلت نبيك ياغاليتي 💔 ))
انس صباه من يده : صبي يامنجي وحد الله ياراجل
و صباه طلعه مالقبر منجي مقعمز على ركبيه ومنهار
وهما يدفنو فيها ويغطو فيها بالتراب قدام عيونه ....
دفنها ودفن معاه حب سنين
كله عدا في لحظه
_______
#بعد_ثلاث_ايام
منجي خش لحوشهم من باب المطبخ
هناء : تبي حاجه
منجي عيونه منفخات : نبي انغير دبشي فضيلي الطريق
امينه جت ماسكه البنت : تعال شوف امينه تبيك
منجي عيونه دمعن وخدا البنت من امه
قعمز بيها ع العتبه ابتاع الباب ويبحت فيها : غاليه
امينه بحتت فيه : نعم
البنت اتبحت فيها وتاكل في ايديها
منجي دموعه نزلن : اسمها غاليه ❤
(( يا فرحتن ما تمت ... يوم فرحنا نا والعزيز اشٌمت .... الموت والعدو ... 💔
يافرحتن ردناها ..
واتعبنا نصيب أيام في مسداها ..
وبنينا آمال أفراح في مرباها ..
وأحلام عشاق العلا بالجيات أسمت ..
واتيين كلتنا على مسعاها ...
فرحت العمر اللي اسنيني تمت ..
وكلتنا على روحه إيريد دناها ...
فرحة العمر اللي عليها لمت
ومو حاسبا شي وقتا يثناها ...
ينهيها وهي مسه عزيزاً ضمت ..
ملكاً ملاك الموت في ممشاها ..
وارحلت الي وردة ربيعي أسمت 💔
يوم أفراحي ..
أنريد نعلنه برين جميع أجراحي ..
ونقول للي ناوين كساحي ...
هناني الله بدعوة وليا تمت ..
حلالي ونا بيها نويت ارباحي ...
انكمل العمر ونقهر المتشمت ..
طالب الله اللي عليه إلحاحي ...
يلهمني الصبر ملي علي التمت ..
ياالله ندعولك ... 💔
امفيت انت ما لنا فزع نرمولك ..
احمولنا عليك ياالله ورسولك ..
هوّن علينا احمولنا اللى جمت ..
اثقال غير طامعين في ميمولك ..
بساعت الفرج فيدك علينا غمت ..
انت بقدرتك تقدر اتزيح احمولك ...
وماهي صعيبه ياالله وان جمت ..
ياالله اكرمها .. 💔
بجنة فسيحة ومن النار اعصمها ..
برحمتك طلبتك ياالله اشملها ..
عليها وعلينا يالله راها تمت ..
نزيلة اقبور وانت اللى عالمها ...
اشملها برحمة ياكريم اسمت 💔
او نختم كلامي بالصلاة و انسلم ..
علي شفيع امته يوم النفوس إلتمت 💔
ويافرحتن ما تمت ...... 💔 ))
تمت بحمد الله
