رواية دار الايتام الجزء الثالث (اللقاء المنتظر) الفصل الثلاثون
إستمرار الحياه شئ لابد منه.❣️
...........
يوم جديد علي الجميع.
في شركه ليل..
كان الكل في مكتبه و بيشتغلوا
تمارا طول الوقت كانت سرحانه ومن بدايه ما شافت جاسر مع امينه وهي مش مظبوطه ساكته
وهاديه بطريقه مرعبه وعلي غير العاده تكون بالهدوء ده و بمجرد ما تتقابل عينها بعين جاسر تبتسم
يمكن شافت جاسر كتير مع بنات بحكم الشغل ويمكن شافت الطريقه والسلام الخاص بالمجتمع المنفتح اللي هما عايشين فيه ويمكن قدرت مع الوقت تتخطي الجزء ده و أتعودت لكن لاول مره تحس انها مضايقه ولاول مره تحس ان جاسر في حاجه خصوصا خرج بحجه انه هيجيب لبس ورجع من غير اي حاجه واول مره ميحكيلهاش اي حاجه
كانت مانعه نفسها من الكلام لحد ما تشوف هو هيعمل ايه لكن اللي كان هيجننها سكوته.
جاسر كان حاسس ان فيها حاجه متغيره لكن مكانش يعرف انها متغيره بسبب انها شافته مع امينه
ومكنش متوقع انها خدت بالها انه رجع من غير لبس خصوصا لما مسألتش لكن كان مقرر انه يتكلم معاها ويحكيلها عن امينه لانه كان حاسس بالذنب انه مخبي عليها.
خرج جاسر من مكتبه.
جاسر....تمارا
تمارا...ايوه.
جاسر...جهزي نفسك عندنا ميتنج كمان نص ساعه هنكون متحركين
تمارا....ايوه عارفه متقلقش انا جاهزه.
جاسر...طيب تمام انا هروح بس اتكلم مع ليل بخصوص الورق ده ولحد ما اخلص تكوني جهزتي.
تمارا....تمام.
خرج جاسر وراح علي مكتب ليل خبط ودخل.
ليل....تعالي يا جاسر ايه بصيت عالورق اللي قولتلك عليه.
جاسر....بص جاسر حواليه علي عشق بتوتر.
ليل...ماقلقش عشق مش هنا أتكلم براحتك.
جاسر....هي راحت فين.
ليل....بتخلص حاجه في الشركه التانيه خاصه بالحسابات متشغلش بالك اخلص قيل ما تيجي.
جاسر...تمام بص بقي كان معاك حق تشك في شركه كروز.
ليل....أشمعني؟!
جاسر....بص يا ليل من ناحيه الشغل الظاهري هما زي الفل ومفيش اي حاجه ممكن تدينهم او تبين حاجه مش تمام لكن الشغل الباطني بيقول غير كده المعلومات اللي طلبتها انا شغال عليها انا وتمارا من بدايه ما اتكلمت معانا وقدرت اوصل ان في لعب من ورانا من ناحيتهم يعني تحركات غريبه اسم مجموعه السيوفي بيتذكر منهم كتير مع ناس مختلفه مع ان الفتره دي مفيش بينا اي شغل وعملت حاجه كده مش عارف هتفرحك او تضايقك
ليل...حاجه ايه دي.
جاسر....من بعد ما عرفتنا اللي في دماغك بصراحه في حد كده جه في بالي اقوله وكنت حاسس انه ممكن يساعدنا .
ليل....مين ده؟ و هيساعدنا ازاي؟
جاسر....يوسف!!
ليل....يوسف مين؟
جاسر....يوسف العمروسي يا ليل صاحب بدر وعامر.
ليل...يووووسف طب ويوسف هيساعدنا في ايه.
جاسر...انت نسيت انه عنده شركه برمجه كبيره
ليل....ايوه صح بس يوسف هيساعدنا ازاي؟
جاسر...هو بالفعل ساعدنا يا ليل وقدر يخترق الشبكه الخاصه بشركه كروز و معايا و الفلاشه دي عليها بلاوي ومن ضمن بلاويهم دي صوت وصوره للكاميرات بتاعتهم في اوضه الاجتماعات
وفي اجتماع منهم كان قبل حفله الدار بأربع ايام بيتفقوا فيها علي دخول الشركه وزرع القنبله وزي ما بدر قالك قبل كده ان اللي حط القنبله قاصد ميفعلهاش وانه مجرد كارت ارهاب ده فعلا اتقال في الاجتماع وطبعا في شويه بلاوي هنا زي الفل توديهم ورا الشمس ومش بس كده دي تمحي أسم شركه كروز من السوق بأستيكه.
ليل....بسعاده براڤو عليك يا جاسر ما يجبها إلا رجالها.
جاسر....ايه ده انا قولت هتبهدلني علي الطريقه اللي جبت بيها المعلومات🙄 تتحسد.
ليل....ابهدلك ايه ياراجل ده انا مصدقت عايز اخلص من الحوار اللي عاملي قلق في دماغي ده.
جاسر....طيب قولي ناوي علي ايه.
ليل....كل خير سيبلي انا الموضوع ده بقي.
جاسر...بس اسمع لو ناوي تبلغ خد بالك يوسف ممكن يروح في داهيه لان الاختراق ده حصل من غير إذن.
ليل....انا عبيط ولا ايه فاهم طبعا
انا هجيب الرجاله دي وهعرف أقررهم بنفسي واخليهم يعترفوا كمان.
جاسر...انا معاك في اي حاجه إلا اننا نأذي الراجل
ليل....يا ابني آذيه ايه انت شايفني عيل صغير بقولك ايه انا هلاغي دياب كده واعرفه اني معايا تسجيلات ليهم واسأله المفروض اعمل ايه قانوني لو لاقيته مش فارق معاه الطريقه هعرفه ان يوسف اللي ساعدني لو حسيت انه مش عادي وهيقلقني من الطريقه مش هعرفه عشان كمان يوسف ميبقاش شكله وحش.
جاسر ...تمام اوي هقوم انا بقي عشان في ميتنج المفروض امشي انا وتمارا.
ليل....استني يا حلو صحيح نسيت
جاسر...خير تاني؟!
ليل....امبارح واحنا في اسكندريه خرجت عشان تجيب لبس رجعت زي ما خرجت كنت فين يالا🤨
جاسر...هكون فين يعني روحت بصيت علي لبس بس مفيش حاجه عجبتني وقفت شويه علي البحر ورجعت.
ليل....هصدقك انا كده🤨
جاسر....وانا هكدب عليك ليه يا جدع وبعدين هروح فين يعني🤨
ليل...مش عارف بس مش مطمنلك.
جاسر...لا اطمن يا اخويا 😏
ليل....ماشي يا جاسر هنشوف🤨يلا أتكل خليني اشوف الفلاشه قبل ما عشق تيجي.
جاسر....اشطا يلا سلام.
.................
عند روكا.
صفيه....ما تروحي ترتاحي شويه يا نوني.
نوني....وانا بعمل ايه بس ده عصير للبنات
صفيه.....ساره سيباها كده يا بنتي
ساره...والله يا مامي هي مش راضيه تقعد ابدا و كنا واقفين سوا
نوني....مش راضيه تسيبني والله بس حرام دي حبيبتي مش بتقعد خالص كفايه عليها ولادها شكلها تعبان.
صفيه.....ربنا يديكي الصحه يا حبيبتي
نوني....اللهم امين يلا تعالي انا خلصت يلا نشوف البنات.
ساره....طيب سيبي الصنيه انا هاخدها.
نوني...ماشي يا حبيبتي يلا.
في الجنينه.
سيلا....خلاص مش زعلانه يعني.
روكا....خلاص يا سيلا صدقيني مش زعلانه بس لازم تعرفي يا سيلا أنك غلطتي غلط كبير اوي في حق بدر وحق نوني وحق نفسك قبلنا كلنا مهما كان حبك ليا او لأي شخص مينفعش تيجي علي نفسك عشان حد خصوصا في حاجه زي دي الامومه تستاهل يا سيلا صدقيني.
سيلا....بس انتي ايدك كانت تقيله اوي🥺
روكا....كان لازم افوقك يا سيلا انا لو كنت اطول اعمل اكتر من كده كنت عملت بس مرضتش اقسي عليكي اكتر من كده لاني عارفه انك عملتي كده من حبك فعلا بس كمان كنت مضايقه منك بجد وكنت وقتها شاده شويه مع عامر وقبلها الموضوع بتاع ليان اللي فتحته مع عشق كل ده كان ضاغط عليا وانتي جيتي كملتي
سيلا....خلاص بقي حقك عليا ياستي.
روكا...لو عليا انا مش زعلانه ومقدرش ازعل منك بس كمان لازم تراضي بدر وفي اسرع وقت بدر سامحك بس من جواه اكيد لسه الموضوع مأثر فيه وواجعه بلاش الوجع يكون بايدك يا سيلا فهماني.
سيلا....بحب حاضر ياروكا أوعدك اني هصلح كل حاجه.
روكا...وانا واثقه فيكي❣️
نوني....البنات الحلوين عاملين ايه.
روكا....تعالي ياحبيبتي احنا بخير.
صفيه...يارب ديما يا حبايبي
ساره....العصير ده نوني عملته بايدها يلا اشربوه.
روكا....مش قولتلك يا ساره عايزه قهوه.
نوني...مفيش قهوه هو ده اللي موجود😒
صفيه...يابنتي ارحمي نفسك شويه من القهوه و السجاير دول
روكا....فين بس انا بقتلي كام يوم مش بشرب
صفيه....ربنا يبعدهم عنك خالص
نوني...يارب ربنا يهديها.
............
عند جاسر وروكا خلص الاجتماع
قرر جاسر يقعدوا شويه عشان يتغدوا.
طلب جاسر الاكل كانت ساكته خالص وسرحانه
جاسر....ايه يا حبيبي فينك روحتي لحد فين؟
تمارا...ابداً معاك ياحبيبي.
جاسر....لا يا تمارا مش معايا خالص حاسس انك متغيره فيكي حاجه
تمارا....لا خالص انا كويسه صدقني.
جاسر...بأبتسامه مش مصدقك ياوحش الحته🤨
أبتسمت تمارا غصب عنها صدقني مفيش يمكن بس اللي حصل اليومين اللي فاتوا والحاله اللي روكا فيها مأثره عليا.
جاسر....ربنا يصبرها يارب بس روكا قويه هتقدر تفوق وتبقي كويسه.
تمارا....بيتهيألك يا جاسر في اوقات الوجع بيدخل يعلم جواك وبيسيب أثر جامد فيك مش بسهوله تقدر تتخطاه ابدا.
جاسر....عارف يا تمارا بس ده حال الدنيا مضطرين نستحمل حجات كتير فيها .
تمارا.....اكيد.. عارف يا جاسر اوقات كتير كنت بتمني لو البني ادم عنده فرصه واحده بس يوقف بيها وجع او ينسي ذكري وحشه .
جاسر....طب لو بأيدك الفرصه دي كنتي هتوقفي ايه وتنسي ايه.
تمارا....حجات كتير اوي بس اولهم كنت هنسي الماضي كله لحد الوقت اللي انت دخلت فيه فحياتي.
ابتسم جاسر....طيب والوجع.
تمارا....هوقف الوجع اللي ممكن اتوجعه علي ايدك انت يا جاسر.
بصلها جاسر شويه بحزن بس انا عمري ما اقدر اوجعك يا تمارا.
تمارا...بأبتسامه حزينه عارفه يا حبيبي انا بقول لو يعني
جاسر....لا اطمني يا ستي عمري ما هوجعك ولا اقدر اوجعك..
تمارا.....بأبتسامه مصدقاك يا جاسر
كمل جاسر كلامه وهو بياكل
الدنيا دي صغيره جدا يا تمارا
تمارا....اوي بس أشمعني.
جاسر...تخيلي اني اشوف واحده زميلتي من ايام الجامعه في العزا بتاع والد روكا.
كملت تمارا اكل لكن كانت بتسمعه بأهتمام من غير ما تبصله.
جاسر...استغربت اوي اني شوفتها
تمارا....وايه المشكله اكيد تعرف روكا او بباها وشوفتها مجرد صدفه يعني خصوصا ان والد روكا باين جدا انه معروف اوي.
جاسر....مش حكايه معروف بس بجد اتصدمت من المفجأه والصدفه الغريبه انا مشوفتهاش من 14 سنه.
تمارا......الدنيا بتلهي الناس يا جاسر وطبيعي اكيد بقي ليها حياه.
تمارا كانت بترد عليه وهي من جواها مبسوطه انه قالها بس محبتش تبين انها كانت ملاحظه.
كملت كلامها بس يعني ايه اللي مخليك متفاجئ كده؟
جاسر....هقولك.. امينه كانت زميلتي في الجامعه بس هي اصغر مني بسنتين كانت هي في تانيه وانا رابعه لكن كانت من شلتنا يعني اتعرفنا عليها لما دخلت سنه اولي كنا وقتها انا وباقي الشله في تالته وطبعاً كان طبع فينا اي حد داخل جديد نمسكه تريقه بس الحقيقه امينه الوحيده اللي مقدرناش نتريق علينا كانت شخصيه جميله ولذيذه ومش بس كده اول أسبوعين كانت ديماً لوحدها خالص وعكس الباقي اللي اندمج وأتعرف وكانت كمان بتخاف جداً تحسيها لسه بيور كده طيبه اوي وتحسيها حد منك اختك الصغيره حد من الاخر يخليكي تحسي بالمسؤوليه تجاهه وطبعا في شاب ضايقها كنا بره الجامعه وكان معاه كلب فا حب يستظرف ولما حس انها خايفه وبتبعد بدأ يرخم عليها طبعا صرخت وخافت وبدأ صحابه بنات وشباب يتريقوا عليها واحنا طبعا كل ده شايفينه
وبدأت هي متقدرش تسيطر علي نفسها وتعيط طبعا انا اول واحد مقدرتش امسك نفسي قومت وباقي الشباب جم ورايا وكانت خناقه زي الفل ومن بعدها بقت من ضمن الشله قضينا مع بعض السنه و كنا بنتقابل في الاجازه ديما وبقينا صحاب اوي جينا بقي في السنه اللي بعدها كانت هي في تانيه واحنا اخر سنه لينا قضيناها كلها مع بعض لحد اخر يوم في الامتحانات وبعدها كانت الصدمه.
تمارا....بفضول و إثاره من الحكايه
حصل أيه.
جاسر....أول مره أشوف أمينه من 14 سنه كانت يوم العزاء..
تمارا...مش فاهمه؟!
جاسر...أمينه أختفت حرفياً مكانش في حد فينا عارف يوصلها فجأه الموبايل أتقفل فجأه امينه مش بتظهر فجأه أمينه غيرت مكان سكنها ومحدش يعرف عنها حاجه وكأن أمينه دي أتبخرت.
تمارا....طيب والدها مكانش حد معروف او عيلتها.
جاسر....والدها كان رجل اعمال بس مش معروف كل اللي كنت اعرفه عنه انه شغال في الاستيراد والتصدير لكن مش رجل اعمال كبير و السنتين اللي قضيناهم علي قد ما كان فيهم تفاصيل كتير وخروج بس عمري ما عرفت اسمها بالكامل او اسم شركه والدها ومش انا بس انا وباقي الشله لدرجه اننا كنا هنتجنن
تمارا.....طيب ولما شوفتها قالتلك كانت فين.
جاسر...بأرتباك حاول يخفيه.لا ملحقتش اكيد انا موقفتش معاها غير خمس دقايق بس يادوب خدت رقمها وسلمت عليها وسلمت عليا وبس.
تمارا...غريبه بس اكيد حصلها حاجه.
جاسر...بشرود وحزن ربنا واحده يعلم حصلها أيه.
تمارا....المهم انها في الاخر كويسه.
جاسر...الحمد لله.
تمارا...صحيح انت امبارح خرجت وقولت هتجيب لبس مجبتش ليه.
جاسر وهو بيشرب ابدا ملقتش حاجه حلوه لفيت شويه ومعجبنيش اتمشيت شويه علي البحر ورجعت.
تمارا....بأبتسامه تمام.🙂
كانت سعيده جداً انه حكالها وكانت بتحاول تصدقه خصوصا انه كان بيحكي بهدوء وقدر يقنعها.
..........
في مساء اليوم اخيرا جات لحظه الرحيل بعد تظبيط شقه ليل ورجوعها زي ما كانت نزل دياب ولمار راحوا علي الڤيلا اخيرا
لمار كانت مبسوطه اخيرا الڤيلا خلصت وكل حاجه زي ما كانت عايزه وصلها دياب واطمن عليها وكان في أنتظارها شغاله جديده عشان بكون متطمن عليها انها مش لوحدها هي وزين وسابها تاني بعد ما وصلها وراح يقابل ليل
...........
اتقابلوا في كافيه.
ليل....مستعجل علي ايه بس يادياب احنا هنطير من بعض.
دياب...لا طبعا بس خلاص احنا اخيرا نقلنا الڤيلا وكان لازم اجبلك المفتاح لحد عندك صدقني مش عارف أقولك أيه ولا أشكرك أزاي
ليل....عيب يا دياب متزعلنيش منك دي شقتك واي وقت تحتاج اي حاجه انت عارف اني موجود
دياب...طبعا ياليل دي مش محتاجه كلام.
فضلوا يتكلموا شويه مع بعض وهما بيشربوا قهوتهم وفتح دياب موضوع الشركه واللي حصل فيها
استغل ليل سؤاله وحكاله كل حاجه من غير ما يجيب سيره يوسف.
دياب....طيب كويس جدا هو طبعا التسجيلات دي في النيابه مش هيخدوا بيها لانها من غير إذن والمفروض النيابه هي اللي تعمل كده بس كمان دي خطوه كويسه علي الاقل انت تبقي عارف مين هو الخصم اللي حاول يأذيك.
ليل...فعلا يمكن انا ارتاحت كتير لما عرفت علي الاقل بقيت مركز في إتجاه واحد بدل ما كنت مشتت بس انا حاليا مش عارف اعمل ايه او ايه الخطوه اللي المفروض اخدها بصراحه كمان فكرت في اسلوب مش قانوني شويه لكن معنديش غيره وهو اني اجيب العيال دي وأواجههم باللي عملوه واوريهم الفديوهات عشان مينكروش لحد ما اخليهم يعترفوا قدام النيابه.
دياب....بردو مش حل ممكن تودي نفسك في داهيه ممكن يروحوا قدام النيابه وينكروا كل ده ويقولوا كمان انهم اعترفوا تحت تهديد منك.
ليل....ساعتها هطلع الفديوهات
دياب....ما انا قولتلك مش هايخدوا بيها ومش بعيد تدخل نفسك في حوار كبير و الشركه نفسها ترفع عليك قضيه لاختراق اجهزه الشركه و تودي نفسك انت واللي ساعدك في داهيه.
ليل...طب والحل؟!
دياب....انا شايف انك تاخد جزء من الفديو ده علي فلاشه وتقول ان الفلاشه دي وصلتلك في ظرف وتقدمها للنيابه.
ليل....طيب ولو قالولي مين بعته
دياب....هتقول متعرفش ظرف جالك من ضمن مظاريف كتير للشغل..بس قولي صحيح مين اللي ساعدك🤨
ليل....ينفع مجاوبش🙄
دياب....بضحك يبقي حد اعرفه 😂 قول ياراجل متقلقش هو اينعم اسلوب غلط بس هنقول يعدي.
ليل....جاسر اللي طلب من يوسف وبما انه ليه في البرمجه والاختراقات والجو ده قدر يساعدنا.
دياب....تمام يبقي تمسك في اللي قولتهولك لان معلومه زي دي تقفل شركه يوسف خالص.
ليل....متقلقش ان شاء الله هروح بكره النيابه ويارب ياخدوا خطوه سريعه عشان اخلص.
دياب....متقلقش هياخدوا خطوه سريعه المهم طبعا انا نقلت انهارده وانهارده الاربع ان شاء الله يوم السبت عايزكم عندي نعمل عزومه حلوه كده بمناسبه البيت الجديد اولا وثانيا عشان نحاول نخرج روكا من الجو اللي هي فيه ده.
ليل...انا تمام بس احنا المفروض كنا هنسافرلهم يوم الخميس طبعا لو كلنا فاضيين ويرجعوا معانا.
دياب...لا محدش هيسافر وانا هكلم روكا وعامر وهخليهم يرجعوا متقلقش انت بس بلغ باقي الشباب. بقي
ليل....تمام هبلغهم بس لو مش هينفع أكد عليا.
دياب....ماشي بس اعمل حسابك خلاص عاليوم ده
ليل...ان شاء الله.
...............
خلص اليوم ورجع دياب قعد مع نفسه بيفكر في اخر حل للغز القضيه اللي مجننه لحد ما بقي مفيش قدامه غير حل واحد وبس.
في صباح يوم جديد راح بدر علي مكان الشغل كان معاه ظابط وكام فرد شرطه.
دخل دياب الاوضه اللي حصلت فيها الجريمه ووقف في وسط الاوضه بيلف فيها ومركز جدا.
الظابط....ايه ياباشا طلبت اننا الصبح نكون هنا في جديد ولا ايه.
دياب....لازم يكون في جديد يا عيسي..
عيسي...حضرتك كنت شاكك ان في باب سري او مرايه او مكان في الحمام او حتي تحت الارض يخلي الشك يروح ناحيه شخص هرب منها ورجع كل حاجه مكانها بعد ما عمل الجريمه وعلي الاساس ده فضينا الأوضه من كل العفش اللي فيها وبقت زي ما حضرتك شايف مفيهاش غير حيطان ومفيش اي أثر لا لباب سري ولا في فتحه في الارض يبقي ايه الجديد.
دياب بتركيز لعيسي أقعد يا عيسي.
بصله عيسي بتركيز وقعد علي كرسي وقعد دياب قدامه علي كرسي تاني وكان وسطهم تربيزه
ومكانش في اي حاجه في الاوضه غيرهم.
طلع دياب من جيبه ورقه كبيره مكتوبه بخط ايده وفيها رموز ورسومات كان عيسي باصصله بتركيز.
دياب وهو ماسك القلم وبيشاور علي الورق.
اخر مره أتشاف فيها المجني عليه من البواب كان قبل الحادثه بثلاث ايام بس البواب قال انه مخرجش وعربيته كانت موجوده في الفتره دي ولانه راجل غريب وقليل الكلام وتصرفاته علي حد قوله كانت غريبه مكانش بيطلع غير لو طلب منه حاجه يجيبهاله.
التقرير الطبي أثبت ان حاله الوفاه كانت بقالها يومين مش تلاته يعني معني كده انه مات بعد يوم من ما شافه البواب.
عيسي...بتركيز حلو.
دياب....الراجل ده مات وهو في الاوضه دي الباب بتاعها مقفول من جوه والشباك كمان مقفول من جوه يعني عشان حد يعمل كده لازم يكون الباب والشباك مفتوحين عشان يلاقي مكان يهرب. الرصاصه جياله في دماغه من قدام وهو كان قاعد قدام الشباك بمتر واحد يعني لازم تكون جياله من الشباك مش الباب لان اولا لو من الباب كانت جات في راسه من وراء ولو هنقول كان معاه حد ولف الكرسي المسافه بين باب الشقه والاوضه حوالي 12 متر مش 30.
عيسي....ايوه ولو هنقول حد لفه والمسافه تجيب 30 متر بردو السؤال اللي كان معاه هرب ازاي وازاي قفل الباب من جوه.
دياب...بالظبط ومش بس كده حتي لو من الشباك حاجه من اتنين لا الازاز يتكسر في حاله لو مقفول او يكون الازاز مفتوح وطبعا لا الازاز مكسور ولا هو كان مفتوح الازاز مقفول من جوه قفل محكم والاهم من كده ان كان في طرطشه دم او لمسات ايد لكن من غير بصمات وده يبين ان اللي عمل كده كان لابس جوانتي عشان البصمات...وطبعاً فكره الانتحار دي مستبعده تماماً عشان المسافه.
عيسي.....تمام لحد كده وزي ماقولت لحضرتك احنا فضينا من الاوضه كل العفش اللي كان فيها
بسبب شك حضرتك ان في مكان سري او باب او مرايه وللأسف ملقيناش حاجه.
دياب....بالظبط..
عيسي....طيب قولي بقي ايه الجديظ او بتفكر في ايه.
دياب....بص يا عيسي لما قعدت وركزت كويس لقيت في حاجه مهمه تايهه عننا يمكن مكتوبه في التقارير لكن مكناش واخدين بالنا منها للأسف.
عيسي....ايه هي؟!
دياب....التقارير أثبتت ان الرصاصه جايه من مسافه 30 متر
وأثبتت كمان ان الرصاصه جايه بطريقه مستقيمه مفيهاش ميل فا ده معناه ان الرصاصه جايه من الشباك فعلا زي ما قولنا وتحديداً من البرج اللي قدام البرج ده. مش من الابراج اللي جمبه لاني زي ما قولتلك الرصاصه جايه مستقيمه وجايه من غير اي ميل ولا حتي زاويه دي جايه في نص راسه.
طبعاً انا حاول اعصر دماغي واركز البرج اللي قدامك ده ياعيسي معمول بنظام ان كل بلكونه خارجه عن البلكونه اللي قبلها بحوالي أتنين متر گانها شبه السلالم..لو ركزنا صح يا عيسي هنلاقي ان البلكونه اللي قصاد الشباك بتاعه المسافه بينهم حوالي 28 متر مش تلاتين.🙂
عيسي...بصدمه امال ازاي أتحسبت 30 متر.؟
دياب....لانها فعلا جات من المسافه دي بس مش من البلكونه اللي قصاده دي من البلكونه اللي فوقيها😉👌
عيسي....لا لا معلش لحظه أزاي من اللي فوقيها وحضرتك بتقول ان الرصاصه جايه بطريقه مستقيمه مش بطريقه فيها ميل او زاويه..ولو هنفرض ان كلام حضرتك صح وهنستبعد حكايه الميل والزاويه أزاي الأزاز متكسرش في حاجه غلط.
دياب....بالعكس مفيش حاجه غلط
عيسي....طيب قولي أزاي هتيجي الرصاصه اصلا مستقيمه والبلكونه اللي قدامه بينها وبين اللي فوقيها حوالي 3 متر طول. طبيعي تيجي مايله ال3 متر دول عشان تقدر توصله.
دياب....كلامك صح ومنطقي بس في حاله لو اصلا هو أتقتل في الاوضه هنا.
عيسي....بعدم فهم مش فاهم تقصد انه اتقتل بره الاوضه وانه جه هنا بعد ما أتقتل.
دياب....براڤو بدأت تفهم
عيسي....لا معلش انا فعلا مش فاهم لو اللي حضرتك بتقوله ده صح وانه اتقتل بره الاوضه نسيت ان الباب كان مقفول من جوه..بلاش الباب طيب هيتجاب ازاي وهو مقتول مخافوش حد يشوفه البواب مشافهوش وهو جاي مقتول من بره.
دياب...لانه متقتلش بره يا عيسي هو اتقتل في البرج هنا.
عيسي...بابتسامه صدمه لا بجد دماغي وقفت متقتلش بره البرج واتقتل هنا والمسافه حسابها غلط يعني لازم يكون بره الاوضه طب ازاي والباب مقفول هيكون اتقتل أزاي يعني؟؟!
أبتسم دياب وساب القلم ورجع ضهره لورا وربع ايده وبهدوء رفع راسه وبص للصقف وشاور لعيسي بصباعه علي فوق.
بص عيسي علي مكان ماهو بيشاور فضل علي وضعه ثواني ورجع بصله وهو مصدوم😳
أتقتل فوق ونزل هنا عن طريق السقف😳
دياب...بأبتسامه كفاره يا راجل اخيرا.
المسافه ياعيسي عشان تكون 30 متر ملهاش حل غير انها تكون في الشقه اللي فوق وبما انه مخرجش من 3 ايام يعني لازم يكون اتقتل هنا وطبعا المسافه بين الشقه دي واللي فوق 3 متر واكيد لو من فوق هتبقي الزاويه مستقيمه والاهم ان الصقف زي مانت شايف معمول بنظام ساقط ومتركب مربعات والغريب اننا مفكرناش خالص فيه..طبعا لو قدرنا نفك حاجه من المربعات دي هنلاقي الفاتحه.
أبتسم عيسي بنصر اخيرا القضيه بتتحل.
ساعات بسيطه والدنيا كانت مقلوبه في البرج و قدر مجموعه كبيره بقياده دياب يقتحموا الشقه اللي فوق ووصل دياب لفتحه في الأوضه واتأكدوا بنفسهم انها فتحه تنزل للشقه اللي حصلت فيها الجريمه..ومش بس كده بعد تفتيش الشقه لقوا فيها خزنه فيها ورق خطير جدا لاسامي تقيله في البلد كلها مصايب لقوا سديهات وفديوهات صوت وصوره وكأن المجني عليه كان بيأمن نفسه والاهم لقوا خمس قطع آثار وقدروا يرفعوا بصمات الشقه.
لقوا 3 كوبايات عصير واحده فيهم كان فيها منوم واثار دم جمب الشباك وعلي الكرسي وطبعا قدروا يتأكدوا انه فعلا أتقتل في الشقه دي وبعد ما خلصوا جريمتهم نزلوه من الفتحه علي الشقه تحت.
وبعد التحقيقات اتعرف البواب علي كام شخص من اللي موجودين في الڤديوهات وقال انهم كانوا بيجوالوا اوقات كتير
وان يوم الحادثه مخدش باله منهم ولا هما طالعين ولا نازلين.
واثناء التحقيقات عرف دياب ان الشقه اللي فوق كمان كانت ملك المجني عليه بردو ولما سأل البواب ليه مقالش قال انه مكانش بعرف انها معلومه مهمه وانه اتلهيي في الحادثه.
وطبعاً القضيه طلعت وراها آثار واتضحت الرؤيه اخيرا انه حصل خلاف كبير وغالبا تهديدات ولما حسوا انه خطر عليهم قرروا يقتلوه.
وطلع قرار بالقبض علي كل شخص ظهر صورته في الڤديو وكل شخص اتذكر اسمه واتقلبت القضيه من قضيه قتل لشخص عادي الي قضيه رأي عام فيها اسامي تقيله.
كان يوم طويل جدا علي دياب من بدايته لحد اخره وطبعا مكلمش حد من الشباب.
في صباح يوم جديد كان يوم الخميس اتصل بيهم دياب و عرفهم لكن روكا كانت رافضه انها ترجع لسه بعد اقناع كتير منه ومن لمار وحتي عامر ووالدتها نفسها وافقت وقرروا السفر يوم الجمعه الصبح.
في نفس اليوم اللي اتشغل فيه دياب في القضيه كان ليل كمان مشغول جدا طلع علي النيابه هو وجاسر وعمل زي ما اتفق هو ودياب وفعلا وكيل النيابه طلع قرار سريع بمراجعه كاميرات شركه كروز وصلت مجموعه من الشرطه وبعد ما طلعوا قرار النيابه بالتفتيش ومراجعه الكاميرات كانت المفجأه انهم فعلا ورا كل ده
وبعد القبض علي صاحب الشركه
اللي مكانش متوقع انه يجي علي بال اي حد خصوصا انه مفيش بينه وبين ليل عداوه اعترف باللي حصل وقال انه مكانش قاصد الاذيه خالص كل الحكايه انه كان حابب يعمل تشويش لليل عشان كان بيواجهه خساره كبيره في شركه الحديد والصلب بتاعته وكان في صفقه كبيره ليل هياخدها و هو كان محتاجها فقرر انه يعمل اي حاجه تشتت انتباهه وميركزش مع الصفقه ويقدر هو ياخدها بسهوله ليل كان مصدوم لان هو عمره ما جه علي حد ولان كل واحد عارف دوره في الصفقات المهمه وده كان دوره هو
وقال كمان ان الصفقه اللي قبل دي كانت شركه كروز وخداها ودي كانت بتاعته لكن الطمع عمي عينهم علي قد ما كان ليل مضايق جدا وحالف انه مش هيرحم اي حد يعمل كده لكن صعب عليه صاحب الشركه خصوصا انه طول عمره محترم وملتزم وعمره ما خد دور اي حد في اي صفقه ولانه عارف انه فعلا مكانش قاصد الاذيه والدليل انه مفعلش القنبله فا قرر ليل انه يتنازل عن المحضر كله وكأن مفيش حاجه حصلت
اعتذر كتير صاحب شركه كروز وقدر حجم الغلط اللي عامله وكان باين عليه الندم فعلا واخيرا قضيه ليل كمان أتقفلت. واخيرا الابطال بيتحرروا من المشاكل اللي حواليهم.
يوم الجمعه الصبح ودعت روكا والدتها بدموع وحزن و وعدتها انها هترجعلها تاني بعد ما تطمن عالشركه وتقابل الناس اللي عايزين يقدمولها واجب العزاء
مشيت روكا وعامر وسيلا ونوني كانوا كل واحد في عربيته وكانوا ورا بعض ورفضت سيلا ان بدر يرجع ياخدها.
وطبعا الكل كان عارف انهم هيتجمعوا عند دياب.
اما عند بدر كان اجازه ومستني رجوعهم قرر انه يستغل الوقت اتصل بشركه تنظيف وطلع علي الڤيلا بتاعت سيلا نضفوها ورجعوها زي ما كانت كان كلها أزاز وبهدله وتكسير خد حوالي ساعتين وبعد كده رجع تاني علي الڤيلا في الوقت ده هما كانوا رجعوا.
راحت ريم وسما علي روكا وقضوا معاها اليوم و طول اليوم كان بيجي ناس كتير من الموظفين والمعارف يعزوا روكا ومن ضمنهم والده ليل وجاسر اللي اول ما عرفوا انها وصلت راحولها مع عشق و نور.
اما بدر مقدرش يستني اكتر من كده خد سيلا وراح ردها من تاني لعصمته كان فرحان وهي كانت طايره من الفرحه طلعوا علي روكا وعامر وطمنوهم روكا كانت مبسوطه رغم الحزن اللي باين علي وشها و علي قد ما قدروا فضلوا معاها عشان متحسش انها لوحدها.
خلص اليوم بسرعه كانت ايام تقيله بتعدي عليهم كلهم لكن كان فيها حجات تفرح شويه.
دياب...اخيرا قدر يحل لغز القضيه
ليل....قدر يعرف مين اللي ورا القنبله وقدر يرتاح.
بدر وسيلا رجعوا لبعض واتحدوا اي مشاكل وضغوطات.
جاسر قال لتمارا علي امينه وتمارا ارتاحت كتير
يوسف و ريم وسما ومهاب قدروا يتخطوا الزعل .
روكا سامحت سيلا وصحابها لكن حزنها مان اكبر بكتير مما حد يتخيله وطبعاً ليان مكانتش بتفارق تفكيرها لكن كانت مضطره انها تسكت عشان متقدرش توجع عامر.
دياب ولمار اخيرا استقروا في بيتهم.
وانهارده يوم جديد عليهم كلهم
وصل الجميع الڤيلا عند لمار ودياب. يمكن التجمع المرادي كان مختلف غير كل مره الحزن واخد منهم جزء كبير الروح اللي روكا كانت بتحطها في اي مكان كانت مختفيه مبتسمه لكن عينها بتصرخ حزن ووجع قاعده معاهم بجسمها لكن روحها شارده في مكان يخص حبيبها وتوأم روحها
حتي النقار اللي بين عامر وجاسر كان مش موجود.
عامر كان حزين عشان روكا و كان مطفي بسببها.
جاسر شارد في اللي حصل لامينه وحاسس انه مش مظبوط
كل واحد فيهم كان جواه حاجه مطفيه
نوح...بأبتسامه ايه يا جدعان وحدوووه.
دياب...بضحك لا اله الا الله والله ليك حق يا ابني في ايه انت وهو وهي لا بقول ايه العزومه دي معموله عشان 3 حجات مهمين
اولهم عشان روكا ترجع تفك شويه وسطنا وتاني حاجه بمناسبه الڤيلا تالت حاجه والاهم اني قدرت اخلص من جزء كبير في القضيه واخيرا حليت اللغز.
روكا...بابتسامه حبيبي يادياب مبروك عالڤيلا والقضيه وشكرا علي كل حاجه.
دياب...شكرا ايه بس يا بت يا عبيطه احنا في بينا كده بس عشان خاطري روفي كده وفكي شويه انا عارف انه صعب وعارف ان الموضوع لسه من كام يوم بس حاولي ياروكا.
روكا....بحاول يا دياب بس صدقني حاسه اني هتخطي ده بصعوبه.
عشق....مفيش حاجه صعبه يا روكا كل حاجه في حياتنا زي ما ليها بدايه ليها نهايه يمكن الوجع ملهوش نهايه وبيفضل فينا بس كمان ربنا انعم علينا بنعمه النسيان
روكا.....تفتكري انا ممكن انساه يا عشق.
عشق....مقولتش انك هتنسيه بس مع الوقت هتنسي الوجع وهيخف الايام هتبقي عباره عن مسكنات بتخفف الوجع لكن مش هتنسيهولك ادعيله ياروكا كتير وياريت تصلي وتنتظمي اكتر كل ما يجي في بالك بدل ما تعيطي ادعيله اقرأيله الفاتحه اتصدقي علي قد ما تقدري علي روحه ياروكا.
روكا....بصتلها بصدمه صح انتي صح انا ازاي نسيت حاجه زي دي
عشق...بابتسامه شوفتي بقي ان الحزن مش هيفيده باي حاجه هيخليكي بس تنعزلي وتفكيرك يقف لكن لو هديتي شويه كده وتقبلتي الوضع وحمدتي ربنا هتلاقي نفسك بتعمليله حجات كتير حلوه..
روكا....طيب قوليلي اعمل ايه انا مش عارفه اطلع يعني فلوس ولا اعمل ايه حد يقولي .
عشق...سبيها عليا ياروكا وهنعمل حجات حلوه اهم من الفلوس اتفقنا
ابتسمت روكا بحزن وهزت راسها
دياب...ايوه كده عايزين افكار حلوه يابنات تطلعها من اللي هي فيه ده انا مش واخد علي روكا كده.
سيلا....احنا كلنا معاها يا دياب المهم تبقي كويسه.
نوني....هتبقي كويسه روكا جدعه وقويه هي بس لسه مش مستوعبه صح يا روكا.
روكا....بهدوء صح يا نوني.
دياب....طيب بمناسبه بقي اني فضيت يا عشق انتي وليل مستعدين تعرفوا حكايه ليان🤨
بصت روكا بلهفه لعشق...هي عامله ايه ياعشق كويسه.
عشق...اه كويسه وسألت عليكي انتي وعامر وقولتلها انكم مسافرين عشان جالكم شغل فجأه وهترجعوا قريب.
روكا...حبيبتي وحشتني اوي.
عامر بابتسامه مسك ايدها تحبي تروحي تشوفيها.
روكا...بدموع🥺 ممكن؟
عامر...طبعا.
ليل....ايه الحكايه يادياب ذلتنا ياعم عشان نعرف.
دياب...غصب عني والله كنت مشغول ومع ذلك انا كنت بعمل كل تحرياتي عنها وقدرت اوصل لمصيبه.
عشق...خير يارب مصيبه ايه بس.
نوني...انا متوقعه ان البنت دي وراها حاجه فعلا.
دياب....فعلا.. مبدأياً كده البنت ليها اهل وانا قدرت اعرف مكانهم
عشق...طيب الحمد لله يارب.
اتجمعت الدموع في عين روكا بسرعه و بصتلها سيلا وريم وسما وعامر🥺
ليل....طيب والدتها ووالدها راحوا فين وازاي سابوها وفي اي قصه تانيه غير اللي البنت حكتها.
دياب....البنت حكت اللي حصل معاها ياليل وفعلا ده اللي حصل معاها لكن هي متعرفش اكتر من اللي شافته في اليومين دول
البنت عايشه هي ووالدها ووالدتها في لندن معندهمش غيرها الاب صعيدي الاصل في خلال سفره نزل حوالي مرتين تلاته مره منهم كان البنت صغيره عندها تقريبا 3 سنين او قبل ال3 سنين بشويه يعني متعرفش حاجه ولا تعرف اهلها اخر مره دي بقي كانوا نازلين اجازه 3 شهور وكان الاب عاملها مفجأه لوالده في الصعيد واهله.
وصلوا مطار القاهره وركبوا العربيه اللي هتوديهم الصعيد
بس القدر لعب لعبته عربيه نقل تقيل خبطت فيهم وعملوا الخادثه واتنقلوا فورا لاقرب مستشفي وكانوا مش بعيد اوي عن المطار وللاسف الاب والام أتوفوا..
صدمه اصابت عشق والبنات
عشق....بتقول ايه🥺🥺 ليان امها وابوها ماتوا في الحادثه يعني هي لما كنت بتقول بتدور عليهم مكانتش تعرف انهم ماتوا
روكا...بدموع ياقلبي حرام عليك يا دياب انا ناقصه وجع🥺💔
دياب...بقول ايه اسمعوني بقي خلوني اخلص اجمدوا كده عشان اللي بعد كده اكتر.
عشق....هو لسه في اكتر من كده
دياب....اللي عرفته ان الاب كان قاعد قدام اتوفي في الحال هو والسواق. الام كانت وراء معاها ليان وطبعا ليان اللي كان فيها خدوش بسيطه والام فاديتها لكن البنت اغم عليها ولما وصلوا المستشفي الام اتوفت ولحسن الحظ الموبايل كان سليم إداره المستشفي حبت تبلغ حد يعرفهم
واتصلوا علي اخوه كان الوقت متأخر لما عرف جري من غير ما يقلق حد وسافر وطبعا هناك خلص التصاريح كلها وبعد كده بلغ اهله ومشي وهو واخدهم عشان البلد كلها مستنياه وطبعا خد ليان اللي كانت نايمه من المسكن ومن العياط والسؤال علي اهلها.
الاب الكبير اسمه زكريا طاحون عيله معروفه جدا اول ما عرف الخبر وقع من طوله وجاتله جلطه في البدايه كان مبيتكلمش خالص وبيشاور هو حاليا افضل شويه بس المرض هده المهم وصلوا ودفنوا وكل ده ميعرفوش ليه مقالش انه جاي من السفر طيب هي فعلا مفجأه ولا حصل حاجه وبدأوا يسألوا عن ليان اللي بعض الناس فكروا وقالوا يمكن البنت ماتت هناك ولا جرالها حاجه وهما رجعوا البلد.
نوني....طب ازاي مش البنت كانت راجعه مع عمها.
دياب....هو ده الموضوع كله يا نوني عمها💔
بدر....بس انا كده فهمت كل حاجه😏😏😏
دياب....بالظبط زي ما فهمت يا بدر
عشق....ايه اتخطفت منه وزي ما قولنا حد بيكرههم عمل كده
روكا....انا مش فاهمه حاجه لما اهلها عايشين ليه متروحش توديهالهم و تعرفهم انها عايشه.
دياب....لما سألنا في البلد يا روكا عرفنا ان البنت علي كلامهم ماتت وان الصدمه كانت شديده علي جدها فقد ابنه وحفيدته في نفس اليوم ومن كلام الناس قالوا ان الجد كان عنده امل ان البنت تطلع عايشه.
عامر....طب ما تعرفه يا دياب
دياب....مينفعش يا صاحبي الشخص اللي وصل ليان للقطر وركبها هو نفس اللي خدها من القاهره من المستشفي.
نوني....عمها😳
دياب...بالظبط يا نوني عمها خفي البنت وقال انه ملقاش حد غير اخوه ومرات اخوه وانهم كانوا لوحدهم لما رجعوا طيب ازاي واللي استلم جثه اخوه ومراته والبنت هو نفسه من هنا شكين فيه وانا من البدايه شاكك فيه اصلا طبعا لو كنت قولت للراجل الكبير او عرفته ان البنت عايشه مكنتش هقدر امنعه انه يستلمها بس كمان البنت كده في خطر
مفيش غير جدها و جدها راجل كبير وطبعا اللي هياخدها وقتها عمها اللي حاول في الاساس بتخلص منها فا مستحيل اعمل كده.
ليل....طب وبعدين
عشق...بدموع خلاص منقولهمش هما كده كده عارفين انها ماتت
دياب...مينفعش يا عشق البنت لحد الوقت قاعده معاكي في الدار
من غير اي ورق رسمي ولو حبيتي توثقي ده لازم تبلغي والقسم يحقق وهيتعرف انها ليها اهل وبردو فالاخر هتروحلهم من الاخر هي دايره واحده ومقفوله.
عشق...طيب وبعدين.
دياب....لازم نسافر للجد ولازم اعرف عم البنت عمل كده ليه هو غالبا الموضوع في ورث وفلوس وممكن كمان تكون مراته ورا التفكير الشيطاني ده.
بدر...ده اكيد يا دياب
عامر...انا اللي اعرفه عن الصعايده انهم جدعان لا يرموا لحم ولا يفرطوا في عرض ولا ارض
دياب....بس متنساش ان كل قاعده ليها شواذ يا عامر.
عشق...طيب هنروح امته.
دياب....لو حابين بكره نخلص من المشوار ده بالمره انا موجود.
ليل...انا معنديش مشكله هسافر معاك
عشق....وانا جايه طبعا بس هو احنا هناخد ليان.
دياب....هناخدها طبعا من حق جدها يشوفها يمكن الراجل يتحسن وبعدين ده كفايه صدمته في ابنه اللي سابها ورماها ووهمه انها مجتش اصلا وماتت
عشق...بس هو احنا هنسيبها.
كل ده كانت روكا بتسمعه ومش قادره تنطق🥺💔 خايفه علي زعل عامر ومش قادره انها تخسره مبقاش ليها قلب غيره💔
دياب...اكيد لا مش هسيبها هطلب منه انه يوافق ويتنازل عن ليان وتفضل معاكي في الدارعشان البنت متتأذيش من عمها.
ليل...خلاص يبقي بكره انا وانت وعشق ومعانا الجارد هنطلع علي هناك.
وفجأه انا وروكا هنيجي معاكم
بصوله كلهم من غير ما يسألوا وبصتاه روكا وهي مبتسمه ودموعها نازله.
دياب...هتيجي لبه روكا لسه تعبانه خليك انت.
عامر....انا عايز اشوف الراجل ده
ليل....ليه في حاجه ولا ايه
عامر....لما روكا طلبت مني اننا نتبني ليان انا رفضت لاني معنديش أستعداد انسب بنت ليا وهي مش بنتي وكملن عرفت ان عشق رفضت وقالت ان التبني حرام يعني كانت مقفوله..
لكن الوقت البنت ليها اهل وعيله وهتفضل بأسمها وبص لروكا
عامر...وانا عندي امل ان جد البنت لما يشوفني انا وروكا ويعرف اننا ربنا مرزقناش باطفال واننا حبيناها بجد من قلبنا يوافق يخليها معانا وهي محتفظه بأسمه واسم عيلتها💔
حطت روكا ايدها علي وشها وانهارت من العياط في اللحظه دي 🥺🥺🥺💔
حست ان كان جواها هم كبير وكلام اكتر نفسها تقوله وخوفها من زعل عامر مانعها لكن جه عامر و كسر كل الخوف وخرج كل اللي في قلبها كان نفسه يعمل اي حاجه تخليها مبسوطه وترجع من تاني روكا بنته وحبيبته ❣️
قام عامر حضنها والبنات كانوا بيعيطوا بتأثر حتي الشباب كانوا ساكتين ومتأثرين بجد وحسوا بوجع عامر وروكا.. لكن في النهايه فرحوا لما روكا بقت تعيط وتضحك وجواها فرحه كبيره عايزه اليوم يجري باي طريفه والصبح يطلع.
