رواية سراج السادة الفصل الثاني والثلاثون بقلم غسق ادريس
يكسو العِظام و هي رميم فكيف بقلبك.
الباقِياتُ الصَّالِحاتُ:
-سُبحــانَ الله
-الحمــــدُ لله
-لا إلهَ إلا الله
-اللهُ أكبـــر
-لا حَول ولا قوة إلا بالله
-سُبحــان الله العَظيــم
-سُبحــان الله وبِحَمـده
-أستَغفِــر الله وأتوبُ إليه
-اللهُمَّ صلِ علّى مُحمد وآل مُحمد
التصويت قبل قرأة البارت والتعليق بين الفقرات
♥.
حساباتي
انستا: gasag_211
تلغرام'@asd_wwe1
تيك توك: gassa_adreas
"
"عاتكة "
سمعت صوته من خلفي
_دلهب :: انا الميت ماقبل واحد يشاركني بدفنتة مو ..........
سكت وماكمل كلامة واني دخلت للبيت مامهتمة
باوعت لفاطمة تباوعلي مبرطمة شفايفها
اخذتها من معصم ايدها بعصبية ودخلتها للبيت
مشيت ب اتجاه البيت معصبة ليش يصيح اني شسويت ويصيح واذا سويت مامسوح اله يصيح علية !!
دخلت للصالة شفت امي كاعدة تنظف بيها دفعت فاطمة ب الصالة وصحت بيها بعصبية
_عاتكة:: اذاااا طلعتيييي برااا بعد فاطمة اكول لفقار عليجج
خلت فاطمة ايدها على وجهه وركضت تبجي لامي
باوعتلي امي مصدومة وكالت ب استغراب
_رقية:: شبيجج ويا اختج عاتكة
سولفت الها كل الي صار حتى موقف دلهب وشلون صيح علية دارت امي على فاطمة كعدت كدامها ابتسمت وحجت
_رقية:: ليش ماما فطومة مو كلت لاترحين برا
_فاطمة:: ففتتااارر (فقار)
_رقية:: اي فقار هوا يجي ياخذج انتِ ماتطلعين وحدج بعد خوش؟
هزت فاطمة راسها ب اي ايدها بحلكها تبجي
باستها امي وكالت
_رقية:: يلا روحي اعتذري من اختج عاتكة وبوسيها بخدها
باوعتلي فاطمة مقوسة حلكها بخجل ودموع
ضحكت واشرت الها تجي
اجتني تركض كعدت واخذتها بحضني ابوسها بخدها
وهيا تبوس بية
اختفت عصبيتي ماجنت معصبة بسبب فاطمة لا اني جنت خايفة عليها عصبيتي بسبب موقف دلهب
من هذا موقفة كرهتة خاف جنت قبل اشوف مواقفة بعيني هسة لاا !!!
" قس "
بدت الحرب ويا جميلة وبنت اخوها شذى ضد البقية وب الاخص حفيدات العلوية لباب شدن حيلهن ويا جميلة وبنت اخوها
العلويات الكبار جانن رافضات هاي العداوة والمشاكل بس بكل مرة العلويات يسكتن ويكفن شرهن تجي شذى وجميلة بسالفة ثانية
رابع يوم للمشاية الاربعينة ب الموكب
جنت كاعدة اغسل ملابس الزايرات اني وعاتكة وملاك ب المغاسل الخاصة ب الزوار
جانت المغاسل معزولة عن مجلس كعدة النساء
اجت خدلجة تمشي ب اتجاهنا بيدها سلة متروسة ملابس نزلت السلة ب الارض وكالت
_خدلجة:: بنات هاي عبي الزايرات يردن يطلعن العصر نغسلهن ونشفهن ب الغسالة
_عاتكة:: عزليهن وانطيني العبي اغسلهن
نزلت خدلجة تعزل الملابس عن العبي واني وملاك نطلع الملابس الي كملن من الغسل حتى نظيف غيرهن
التفتت على عاتكة من كالت
_عاتكة:: بنات مسحوق الملابس السود خلص
_قس:: خلن صابون
_ملاك:: لااا ولج يصير املح خليني اجيب من البيت
مش ملاك ب اتجاه البيت تجيب المسحوق واني والبنات بقينه واكفات عند المغاسل
باوعت لسلة الملابس متروسة ملابس سود
رغم التعب الي احنا نحس بي بس شعور بداخلي فرحان
اني كاعدة اخدم زوار الحسين حتى التعب عند اهل البيت راحة
هاي الاربع ايام الي مرت جانو الزوار يطبون ويطلعون لاحظت كل الي يجون يكونون قدماء يعني جايين قبل ورجعو السنة هاي اجو مرة ثانية من حبهم للسادة
رفعت عيوني ب اتجاه شذى شفتها جاية تمشي ب اتجاهنا شايلة بيدها ملابس وكفت كدامنا وشمرت الملابس ب الارض
اشرتلنا على الملابس بيدها تريد تمشي
_شذى:: غسلن هذن وياجن
موضوع غسل الملابس جان طبيعي هذا واجبنا نخدم الزائرات بس اسلوب شذى ب الطلب والكلام جانت مستفزة وغير مرضية وهذا السبب الي دفع خدلجة تصيح عليها
_خدلجة:: لاتشمرين الملابس ب الارض هيج وبعدين محد هنا يخدمج تردين صيري معدلة وغسليهن ب ايديج
التفتت شذى على خدلجة تباوعلها بعين ونص ماراضية
رفعت ايدها وحجت
_شذى:: ليش انتِ مو جاية هنا حتى تخدمين وكاتلة روحج على الاجر لو اني غلطانة؟
_خدلجة:: واني هم الي اعرفة انتِ جاية تخدمين ماجاية تراوين طولج؟
حجت شذى ب انزعاج
_شذى:: وشنو شفتيني كاعدة مو افتر حالي حالجن
_خدلجة:: لا لا خطية مبين من عيونج والمكياج الي لابختة بوجهج
ضحكت شذى وحجت بغرور
_شذى:: حبيبتي يامكياج اذا على خدودي ف اني بيضة وطبيعي من الشمس يصيرن خدودي ورديات واذا على شفايفي ف من الله مصبوغات والبياض هاي احنا كلنا كطعن
التفتت عاتكة تباوعلي واني اباوعلها حاصرتنا الضحكة
عوجت خدلجة حلكها وصاحت رافعة ايدها
_خدلجة:: يااا صلاة النبي الاميرة سنووايت ماعرفناج لعد غير تكولين. ولاكانو شفتج مساع تحطين حمرة سحريا على خدودج المصبوغة
عوجت شذى حلكها وكلبت عيونها ب انزعاج
التفتت اني والبنات على ملاك من اجت ب اتجاهنا ييدها مسحوق الملابس السود وبطل كلور
باوعتلنا وحجت مستغربة
_ملاك:: شكو شبيجن؟
_شذى:: لاماكو شي بس العلوية خدلجة مقهورة وراح اطك من الغيرة
زفرت خدلجة نفسها بعصبية ساكتة
باوعت لملاك ولشرتلها تنطيها الغسول انطت ملابس غسول الملابس السود لخدلجة و بطل الكور خلته ب الارض
سكت الكل متجاهل شذى الي بقت واكفة مكتفة ايديها تباوع النا
طلعت الملابس الي ب الغسالة وخليتهن ب السلة حتى اشرهن على الحبل شلت السلة من الارض ومشيت اني وعاتكة مبتعدات عن المغاسل بقت ملاك وخدلجة وشذى ب المغاسل وحدهن
مشيت ب اتجاه الحبل اني وعاتكة جانت ايدها عايقتها عن الحركة رغم هذا كله جانت تحاول وتشتغل على كد الي تكدر اله
وكفنا نشر الملابس على الحبل
شريت العباية ووكفت اجر نفس براحة تعاي شوفي يا نضال ولج ب البيت ماشيل الكشر من الكاع شوفيي هسة هلا هلا لو تشوفني نضال وتدري بية شسوي هنا تطلع ضيم السنوات هاي كلها بية
باوعت لعاتكة الي جانت صافنة حجيت اشد جواريب الزائرات حتى لايطيرين
_قس:: عاتكة انتو وجميلة مو بينكم مشاكل وماتتراهمون سوا شعجب اجت للموكب؟
حجت عاتكة كاسرة صفنتها
_عاتكة:: رنا زوجة السيد معز تحب تخدم ب الموكب ف هيا طلبت تجي ولان السيد جادح وغل وغضنفر كلهم راح يجون هنا واختهم كفاية كذالك ماقبلو جميلة تبقى وحدها
التفتت على عاتكة وحجيت ب انزعاج
_قس:: لو باقية ب البيت تخاف وحدها ولا تخوف الكل بجيتها وجايبة وياها بنت اخوها يلعبن شوطين
ضحكت عاتكة توها تريد ترد وسمعنا صياح خدلجة باوعت لعاتكة ب استغراب
مشيت بسرعة ب اتجاه المغاسل وعاتكة خلفي
دخلت للمغاسل مصدومة من المنظر الي شفتة كدامي جانت خدلجة وشذى نايمات ب الارض
وخدلجة نايمة فوك شذى تجر بشعرها وملاك فوكهن ادك على راسهن ب الغسول الفارغ تريد تفاكك بينهن
ركضنة اني وعاتكة عليهن نجر خدلجة من شذى الي جانت تشلع بشعر شذى بعصبية وقهر
احنا جرينا خدلجة من شذى وهيا شذى جرت خدلجة من شعرها صار العكس شذى نامت فوك خدلجة
عاتكة جانت ماتحل ولاتربط واكفة على صفحة تصيح
يعني صوتها راح يفك النزاع
وملاك لا هاي سالفة ثانية جانت شايلة علبة الغسول الفارغ وتضرب على شذى من فوك
ركضنة عليهن اني وعاتكة نفاكك بينهن وهنا ابد مركزات ب الكتل بس صرخت شذى من خدلجة جرتها من شعرها صرخت بصوت عالي متوجعة
خلت ملاك ايدها على حلكها كاتمة صرخه شذى خوفاً لا واحد يسمعها
التفتت من شفت العلويات جايات يركضن ب اتجاهنا مصدومات من الصريخ وجميلة خلفهن تركض تريد تفزع لبنت اخوها
جانت خدلجة متصدرة ب العركة لان شذى بزر نستلة كوا تحرك ايدها
جانت العلوية جهاد سابقة جميلة بخطوة من شافت جميلة ركضت على خدلجة تريد تجرها وتضربها
جرتها العلوية جهاد ودفعتها بعيد
باوعت جميلة على العلوية بعصبية بس سكتت بدون رد
جرت العلوية جهاد خدلجة والعلوية لباب سحبت شذى من جواها
باوعت لشذى من فوك ليجوا مصدومة ملابسها مبللة وريحة الكلور تفوح منها
والصدمة لون ملابسها الي متغير من الاسود للابيض جان شعرها مفتوح وجهه منه واكفة بسبب كتل خدلجة
جانت العلوية جهاد واكفة بوجه خدلجة مانعتها تقترب لشذى. فتحت العلوية جهاد عيونها مصدومة من رجعت خدلجة ركضت على شذى تريد تكمل عليها
دفعتها العلوية جهاد من كتفها وصاحت بيها خازرتها
قبل لا العلويات يسألن على السبب وشنو الي صار اجت جنة السيد معز تركض ب اتجاهنا
وكفت كدامنا وصاحت تضرب على خدها
_رشا:: علويات السيددد واكف برا يصيحح
_لباب:: سمعووو الصوت !!!
_رشا:: اي علوية حتى السيد فقار واكف برا عمة صوت الصريخ واصل للموكب الناس كلها سامعة
ضربت العلوية لباب على خدودها بقهر وعصبية
باوعت لخدلجة ورفعت ايدها تريد تضربها منعتها العلوية جهاد مرجعة خدلجة ورا ضهرها
باوعت العلوية جهاد للعلوية لباب وحجت بهدوء
_جهاد :: عمة لاتضربيها بدون ماتعرفين السبب
_لباب:: ولججج يا سببب تكلج الزلم سامعين صوتها تصرخ
_خدلجة:: لا اني ماصرخت هاي المكروصة الواكفة يمج هيا تصرخ
ركضت العلوية لباب على خدلجة تريد تضربها بعصبية
والعلوية جهاد مانعتها
عضت العلوية لباب على صبعها وصاحت بعصبية
_لباب:: وتراددد ولكممم فوك مصيبتها ترادد
_جهاد:: عمة فدوة اروحلج لاتزيدين المشكلة خلينة نفهمممم
دارت العلوية جهاد على العلويات الي واكفات واشرت الهن
_جهاد:: رجعن لشغلجن لاتعوفن الزائرات وحدهن
ضليت صافنة من انسحبن العلويات كلهن هاي صدك عود؟ انسحبن بدون مايعرفن السبب بدون فضول لمعرفة المشكلة وشنو الي صار يعني بدون رزايل وصياح هدوئهن طاغي عليهن حتى ب المشاكل ماعدهم حس العصبية والفضول لمعرفة السبب
اتذكر مرة اني ونضال راجعات من بيت عمي شفنة نسوان وزلم يتعاركون ب الشارع ما رجعنا للبيت الى من نحلت المشكلة بكد فضولنه
ولج نضيلة تعاي شوفي الضيمممم
الكل انسحب عدا العلوية لباب وجميلة وملاك وعاتكة واني بعد اني مايصير انسحب احتمال يحتاجون شاهدين على المشكلة
دارت العلوية جهاد على خدلجة وشذى تباوعلهن بهداء
رغم عصبيتها وانزعاجها من الموقف بس ماحبت تصرف بدون ماتعرف السبب
باوعتلهن ثنينهن من فوك ليجوا حالتهن حالة حتى خدلجة مو اقل من شذى بس نكول شذى متضررة اكثر
حجت العلوية جهاد بهدوء موجهة الكلام للاثنين
_جهاد:: شنو الي وصلجن لهاي المرحلة ؟
سكتت شذى مدنكة راسها عكس خدلجة الي جانت تباوعلها بعصبية منتضرتها تحجي
قبل لايحجن هنا الاثنين صاحت جميلة تباوع لشذى
_جميلة:: احجيييي شذى احجييي لاتسكتين خلينة نعرف الصح من الغلطط شوفيييي حالتج اللهههه اكبر ولكم جايينن نخدم لو نعارك بخدام الاماممم
غلست العلوية جهاد عن جميلة وتجاهلت كلامها
باوعت العلوية جهاد لخدلجة وحجت
_جهاد :: احجي خدلجة
باوعت خدلجة للعلوية جهاد وحجت صوتها محتقن من العصبية بس كاتمتها حجت خدلجة تشرح الي صار كلة !
" خدلجة "
جنت واكفة ب المغاسل اطلع الملابس من السلة واحطهن ب الغسالة حتى الحك اغسلهن واشرهن قبل لايكعدن الزائرات لان اعتمدن علية بغسلهن من كد ماجانن تعبانات ومايكدرن يكومن على حيلهن
بدت الغسالة تفتر والملابس والعبي بداخلها
عفت السلة ب الارض ومشيت ادخل الصحيات اغسل على ما يكمل مؤقت الشطف
المغاسل جانت جبيرة اول دخلة المغاسل ممر طويل ومفتوح السادة عدهم ثلاث غسالات ب المغاسل على صفحة موجودة صب جبير مثل الحوض للغسل والوضوء
على الجهه اليسرى الصحيات من جهه والجهه الثانية الحمامات الخاصة ب السباحة
من كملت غسل طلعت من الحمام اعدل بملابسي باوعت لملاك شايلة ملابسها تنظف الحمام
مشيت ب اتجاه الغسالات اريد اشوف المؤقت وين وصل
باوعت لشذى شفتها واكفة عند الغسالة نفسها الي اغسل بيها الملابس السلة كدامها تطلع الملابس من السلة وتحطهن ب الغسالة
رحت الها اركض بعصبية باوعتلها وصحت بيها
_خدلجة::انتتِ شنووو سالفتجججج يمعودة؟؟؟
باوعتلي ب استغراب رفعت حاجبها ب انزعاج وحجت
روحها مايعة كوا تحجي
_شذى:: شكوووو
جريت سلة الملابس منها مانعتها تكمل
صحت بيها
_خدلجة:: مو اكوو ملابس ب الغسالة شلون تضيفين عليهننن بعد؟
_شذى:: وشكووو بيها انتِ شبيج كلهن ملابس.
_خدلجة:: لججج شنو كلهن ملابسسس موو يختلطن الملابسسس وبعدين الزائرات يحيرين الي الهن والي الغيرهننن شبيج انتِ شبيجج ؟؟!!!
بعدتها عن الغسالة معصبة من سالفتها بعدين العبي يتشابهن ويضيعن وكل زائرة تطلع بوقت معين تجي الزائرة الثانية تكعد تشوف الملابس مو الها وتصير هوسة بين الملابس وكلهن لونهن اسود
وكفت كدام الغسالة اباوع للملابس بعد ماكو حل حتى ماكدر اطلعهن خليهن سوا ومن اجي اطلعهن اعزلهن عود ولو اني ماعرف افرق بينهن
التفتت على شذى شفتها مكتفة ايديها تباوعلي
باوعتلها من فوك ليجوا وكلبت عيوني ب انزعاج
حسيت بخطواتها تتقرب مني من الخلف
درت عليها مزعوجة
مشيت خطوة اريد ابتعد عنها ماحب الاحتكاك الي يصير بينة لان ادري النتيجة مشكلة
جاي امشي وماحس غير دفعتني من كتفي بعصبية
_شذى :: وين طفرتي
زفرت النفس بعصبية احاول اسيطر على اعصابي ماريد افتعل مشكلة نهايتهة غير مرضية
تجاهلت كلامها وحركتها ورجعت اريد ابتعد
رجعت كررت حركتها مرة ثانية ودفعتني من كتفي
_شذى:: مووو احجي وياججججج !!!
_خدلجة:: ابتعدييي شووو
دفعتها من كتفها بعصبية مامتحملة حركتها
رغم دفعتي جانت خفيفة بس هيا دراما بحيث بدفعتي انشمرت ب الارض وطاحت على ضهرها
للاسف الشديد جان بطل الكلور ب الارض وغطة البطل مفتوح لان ملاك اخذت من البطل حتى تنظف وتغسل الحمام
طاح بطل الكلور على ملابسها
شالت بطل الكلور مبعدتة عن ملابسها مصدومة
واني هم انصدمت ماتوقعت هيج رغم السبب مو سببي لان هيا الي شمرت نفسها ب الارض مو اني
بس من شفت ملابسها انكلب لونهن انزعجت اعرف هسة راح تسويها سالفة طويلة عريضة وجيب الي يخلصنة من لسان جميلة وشذى
توقعت السالفة راح تنتهي ب صياح وعرك منها وغلط بس لاا؟؟
شذى جان الها رأي اخر
شالت بطل الكلور من الارض بسرعة وهيا معصبة وركضت علية تريد تشمرة علية
لزمت ايدها ابعدها عني جنت منطية ضهري للغسالة
رفعت ايدها مصرة تشمر الكلور على ملابسي
هيا نزلت البطل تصب على ملابسي واني ابتعدت منها
صار الكلور كلة بداخل الغسالة
ماكدرت تسيطر على بطل الكلور نص البطل صار بداخل الغسالة
صرت اني وشذى وحدة تباوع بوجه الثانية مصدومة باوعت الداخل الغسالة لون الملابس بدة يكلب
باوعتلي شذى فاتحها عيونها كلها بصدمة
_شذى': انتِ السببببب
_خدلجة': شذى !!!!!!
جريت بطل الكلور من ايدها وصبيتة على ملابسها من حركة كلبي وعصبيتي هيا هم ماقصرت
جريتها ب الارض معصبة وشايلة عليها من قبل والي صار ب الملابس هسة صرت اتخيل رد فعل الزائرات من يشوفن الملابس والي صار بيهن
دفعتها ب الارض اضرب بيها بدون وعي من ماجنت اشوف غير الملابس بعيوني هاي امانة شلون هيج يصير بيهنن؟! يعني اني خنت الامانة والسبب كلة شذى وحقدها
طلعت ملاك من الحمام تباوع النا بصدمة تريد تافكك بينة وصار الي صار وانتو اجيتو
" ملاك "
باوعت خدلجة على العلوية جهاد وحجت الدمعة بعينها
_خدلجة': عمة يرضيج الي صار شنو اكول للنسوان من يكولن الملابس وين
عضت العلوية جهاد شفايفها بقهر
والعلوية لباب صارت عيونها على ب الارض تريد تستوعب كلام خدلجة والمشكلة الي طاحت بيها
مشت جميلة ب اتجاه الغسالة تشوف الملابس خلت راسها ب الغسالة ورفعتة مصدومة
باوعتلنه ساكتة ماحجت شي
مشيت اني اشوف الملابس وانصدمت ب الي صار ب الملابس لونهن كلة كالب
باوعت لعمتي اجت ب اتجاهنا هية والعلوية لباب يشوفن الي صار وصدمتهن مو اقل من صدمتنا صارن وحدة تباوع بوجه الثانية اني بهاي الحظة اتخيلت رد فعل الزائرات من يشوفن لون الملابس شلون سلمن الملابس بيض والي صار ب الملابس هسة ماينحجي
مسحت عمتي جهاد على وجهة تريد تستوعب الي صار والعلوية لباب صافنة مانطقت شي
باوعت خدلجة لعمتي جهاد وللعلوية لباب عيونها كلها دموع
صاحت صوت محتقن من غصتها
_خدلجة:: يمة شفتي الملابس جاوبيني شنو اكول للزائرات حتى عيب اباوع بوجههن
سكتت العلوية لباب هيا نفسها ماتعرف شلون يصارحون الزائرات باوعت لشذى مدنكة راسها عيونها ب الارض
حسيت بيها خجلانة من فعلتها بس بعديش
حتى الخجل مايسوا هسة
باوعت لعمتي جهاد صافنة
رفعت راسها باوعت لخدلجة وشذى وحجت
_جهاد:: شذى متندمة على فعلتج؟
هزت شذى راسها ب اي وحجت
_شذى:: متندمة ماجنت اعرف هيج راح يصير اصلا والله ماجان قصدي
هزت العلوية جهاد راسها ب اي وحجت
_جهاد:: ماعاتبج اني ولا راح احاسبج على فعلج وماكدر احملج الذنب لان انتِ وخدلجة الاثنين غلطانات انتِ عصبيتج وتهورج جان سبب لاندفاعج للغلط. وخدلجة انتِ هم غلطانة مانكدر نشمر الوم بس على شذى لان هيا ماتعرف او يمكن نست وجمعت الملابس كلهن بدفعة وحدة جان لازم تتصرفين ب هدوء اكثر بس انتِ جنتي مزعوجة من شذى وضايجة منها بسبب اخر مشكلة صارت لهذا مانطيتي عذر لشذى
جانت عمتي تحجي بهدوء وهنا الاثنين يسمعن الها بتركيز وثنينهن مستحيات ومدنكات
رجعت عمتي كالت
_جهاد:: اني مزعوجة من الي صار بس هنا المشكلة احنا مانكدر نغير الي صار ولانكدر نرجع لون الملابس القديم بس نكدر نشوف حل ثاني ونحلها بهدوء
دارت عمتي علية وكالت
_جهاد:: ملوكة عمة ترحين للنساء تجيبين شكو قطعة ملابس جديدة ب البيت واذا ماكو ترحن تشترن ملابس جديدة مفهوم؟
_ملاك:: اي عمة بس وقياس الملابس؟
_جهاد:: هذن الملابس الي ب الغسالة نشفنهن وجيبن على قياسهن حتى العبي اشترن جدد العصر يكعدن الزائرات لاتتأخر الملابس القديمة غسلنها لاتنسن
باوعت عمتي لخدلجة وشذى واتحسرت ب انزعاج تحاول تسيطر على عصبيتها
دارت عمتي على العلوية لباب واخذتها من ايدها
_جهاد:: يلا عمة امشي نكمل شغلنة
_لباب:: تعبت من مشاكلهن جهاد
_جهاد:: صار الي صار عمة هنا مامتقصدات هم وان شاءالله ماتتكرر
اخذت عمتي جهاد العلوية لباب ومشت بيها طالعة من المغاسل التفتت جميلة على شذى وغمتها براسها
_جميلة:: ثولة مابيج خير
_شذى:: عمةةة فدوة كافي
_جميلة:: حضييي امشي امشي
جرتها من ايدها ومشت من المغاسل لحكتهن خدلجة وطلعت وراهن صرنا اني والبنات وحدة تباوع بوجهه الثانية
ضحكت قس وحجت
_قس:: هاي لو كل المشاكل تنحل بهدوء هسة احنا بخير
_عاتكة:: خطية خدلجة ماتستاهل
سكتت صافنة صدك خطية شذى شدت وياها من اول يوم التقن حقها تنفعل
رفعت راسي اباوع لشاهيناز جاية تمشي من بيد بيدها صحن فواكة
اجت ب اتجاهنا تاكل عنب وتحجي
_شاهيناز:: خوش فواكة
_قس:: باع هاي خوش فواكة لج احنا قبل شوي اكلنة وجبة دسمةةة دسمةة
عكدت شاهيناز حواجبها ب استغراب وكالت
_شاهيناز:: شنو ماكلات ليش ماصحتني
ضحكت قس وكعدت تسرد السالفة والمشكلة الي صارت وشاهيناز كل شوي تتغير ملامحها للصدمة
صاحت ب اندهاش وصدمة
_شاهيناز:: لااا لاا ليش محد صاحتني
_ملاك:: انتِ ملتهية ب الاكل جاية تاكلين لو تخدمين
_شاهيناز:: شسالفة عينج على بطني
باوعتلها وهزيت ايدي صارت عيني على الغسالة باوعت للبنات وحجيت
_ملاك:: شوفن حل للملابس خليني اشوف ملابس جديدة للزائرات
طلعت امشي من المغاسل ب اتجاه البيت
دخلت للبيت ماخليت غرفة ولا وحدة من العلويات والي موجودات ماخذت منها ملابس شكو قطعة ملابس جديدة اخذتهن والعبي العلوية زهراء جانت جايبة عباية جديدة اخذتها انطمطم مصيبة شذى بيها
خليت الملابس على جهه صافنة شلون راح نصارح الزائرات مادري شنو حل عمتي ماعرف
لبست عباتي وطلعت اني وميزان اخوي الملابس وياي
مشة بينة ميزان للسوق واني الطريق كلة اهز برجلي متوترة من رد فعل الزائرات حسيت صدك الامانة انخانت ويانا
اشتريت شكو ملابس من السوق وحتى اكو قطع متشابهةة اشتريت منها افتريت السوك كلة اني وميزان اخوي مارجعت الى من جبت كلشي وياي
نزلت من السيارة ودخلت للبيت فتحت باب البيت
شفت عمتي والعلويات واكفات ب الصالة مزعوجات بس مايردن يحجن حتى لاخدلجة ينكسر خاطرها ولا شذى وحتى ماتصير مشاكل بشكل عام
انطيت الملابس لعمتي وجمعتهن كلهن باوعتلنة عمتي وكالت
_جهاد:: بس يكعدن الزائرات صيحيني ولمن الملابس كلها ب المجلس
هزينة راسنا اني والبنات ب اي
وفعلاً بس صارت كعدة الزائرات رحت اركض لعمتي
اخذت الملابس اني وشاهيناز وقس ودخلنة خلف عمتي للمجلس
جانن الزائرات كاعدات وعيونهن منتفخة من النوم حقهن هسة يروح الانتفاخ ويا الصدمة الي جبناها الجن
باوعت عمتي للزائرات وابتسمت ترحب بيهن وتسولف وياهن وتعرف منين جايات
ب الاخير ابتسمت عمتي بخجل وكالت
_جهاد:: اني فعلاً ماعرف شنو احجي ولا شلون انطيكم السالفة
_:: لا شسالفه علوية احجي واحنا نسمعج
ابتسمت عمتي وكالت
_جهاد:: انتن تعبانات واني ماريد اتعبجن اكثر بس واللهي اني خجلانة منجن
_:: لاعلوية ليش الخجل احجي ولاتستحين ابد خياتج احنا
هزت عمتي راسها وكالت
_جهاد:: لا اني لازم اخجل لان خنت الامانة الي سلمتوني ياها
_:: يا امانة علوية؟
_جهاد:: الملابس الي سلمتنها للبنات حتى يغسلنها صار اكو تقصير غير مقصود من البنات وو
رفعت عمتي ايديها بخجل واشرت على الملابس
التفتتن النسوان على قس من رفعت ملابسهن تستعرضهن وشلون صار لونهن
صارن عيونهن على الملابس مصدومات من منضرهن وقس ماممقصرة كل شوي ترفع هدم جديد تزيد الصدمة
جرتها شاهيناز من ايدها تمنعها تكمل استعراض لان على صدمة النساء اتوقع راح يرجعن لبيوتهن مايكملن مشي
حجت عمتي.
_جهاد:: حقجن تنصدمن اني هم مصدومة من شفت الملابس يمكن صدمتي اكثر من صدمتجن لان اشوف بهل ملابس امانة وانتن سلمتنها بكل ثقة والبنات رغم هنا ماجانن قاصدات الي صار بس هنا خانن الامانة واني اعتذر حيل خجلانة منجن حتى الكلام كوا يطلع مني
ضحكن قسم من النسوان والقسم الثاني كالن عادي وهنا ملابس وعدنا ب الجنطة غيرهن
ماشوف غير قس رجعت تعرض ب الملابس والنسوان يضحكت يردن يعرفن هذا المن وذاك المن
طلعن بيومها من البيت يضحكن ماقبلن ياخذن الملابس كالن بس العبي بس عمتي رفضت وحلفتهن وفعلاً اخذن الملابس ونحلت المشكلة بهدوء وسلام
" قدس "
بيوم الي رجعت ويا العلويات للحلة جنت صاعدة بالسيارة عيوني كل شوي تروح لغضنفر اريدة يهتم لوجودي اريد عينة تصير بعيني ابدد !!!
ماجان مهتم الي ولاكأنو فرحان برجعتي
صح هوا اجة يرجعني بس ماشفت بدر منه موقف على طول الطريق
حتى من وصلنة للحلة لبيت السيد عبد المقتدر نزلت من السيارة عيوني صارت علية
جان واكف يحجي ويا العلويات واني واكفة خلف العلوية زهراء عيوني علية ابد مالتفت ولا باوعلي
قهرني حيل قهرني ليش هيج يسوي ادري بي متقصد يتجاهلني ويقهرني هيج
هوا اذا مامهتم ليش رجعني ليش اتعنة للديوانية
دخلت للبيت مقهورة اريد انفجر كوا متحملة وكاتمة عصبيتي
دخلت اني وقس لغرفة ملاك حتى نرتاح ونام
فزيت بليل شفت البنات نايمات بمكانهن
رجعت راسي على المخدة اريد ارجع اكمل نومتي بس ماكدرت ضليت اتكلب على المخدة
اتحسرت بتعب ماعرف شنوو جاي يصير وياي
هواي امور بدت تتغير مو للاحسن لاا للاسواء
حتى غضنفر صرت افتعل المواقف حتى اقهره وازعلة مني
اخذت التلفون من الميز فتحت التلفون ودخلت على الوتساب اول صفحة صارت كدامي هية صفحة غضنفر
دخلت على حالتة شفتة ناشر صورة
الكل جان موجود بيها كل السادة واصداقهم واكفين والموكب بظهرهم
ابتسمت على الصورة الثانية
جان السيد واكف يحجي ويا غل ومعراج وفقار خلفة شايلين كلاصات الحليب بيدهم
طلعت من حالتة اكلب ب الحالات
جاي اشوف حالة اخوي باسم واجاني اشعار من غضنفر خلاني اطفر من مكاني
دخلت على صفحتة جان داز رسالة
_💬 غضنفر:: ليش كاعدة مو وراج كعدة من الصبح؟
ضحكت فرحانة اي هاي التحرشات الي يحبها قلبي
كتبت الة
_💬 قدس:: مايجيني نوم
شاف الرسالة وكعد يكتب واني الضحكة شاكة حلكي مو مهم الرسالة شنو المهم راسل
كتب
_💬 غضنفر:: انا برا كاعدة تعاي طلعي
بس شفت الرسالة طفرت من مكاني متونسة
فتحت فلاش التلفون اخذ الشال
فززني صوت ملاك من كالت
_ملاك:: وين؟
_قدس:: غضنفر يريديني برا
_ملاك:: اي اي ركضي شدي محركاتج
_قدس:: نداءء الطبيعة
طلعت من الغرفة اركض تحسوني خفيفة اي والله اني هم احس هيج بس شعور حلو بداخلي
حسيت نفسي جنت محتاجتة يبادر وفعلاً بادر بعد مابيها مجال للزعل والتكبر
مشيت لخارج البيت حاطة التلفون على صدري عيوني تتلفت ادور على غضنفر
شفتة واكف برا مدنك راسة وايدية بجيبة
مشيت ب اتجاهه متوترة مدري منين اجاني الخجل والتوتر
حس على خطواتي من اجيت
التفتت ب اتجاهي عيونه بعيوني
دنكت راسي اضيع نضراتة
حجة
_غضنفر :: ها قدس
_قدس:: ها غضنفر
رفع راسة يباوع لبعيد رجع حك حاجبة وكال
_غضنفر:: اكلج انتِ وين نايمة؟
باوعتلة ب استغراب وكلت
_قدس :: بغرفة ملاك ليش؟
_غضنفر :: تجين تنامين يمي؟
_قدس:: ها؟؟؟؟
_غضنفر:: اقصد الغرفة الي نايم بيها محد وياي تجين وياي انا هم مايجيني نوم
هزيت راسي ب اي متوترة
كلت
_قدس:: اي عادي وين الغرفة
_غضنفر:: تعاي
اخذ ايدي ب ايدة ومشة خلف البيت ضليت صافنة اباوع ب اندهاش للبستان
رغم الرؤية مو واضحة بس جانت اكو ضوة متوزع على طول البستان ضليت اباوع للبستان مبتسمة حتى الهوا هنا غير اكو برودة ب الجو
مشة غضنفر ب اتجاه مكان منعزل وهوا يحجي
_غضنفر:: هاي غرفة قديمة السيد الجبير جان ينام بيها
وكف كدام باب دفعة نزع شحاطتة واني نزعت النعال الي برجلي دخلنة للغرفة
فاتحة عيوني ب اندهاش ماعرف اوصف جمال الغرفة وعطرها جانت ريحة بخور عود
والغرفة كلها كتب حياطين الغرفة كلها رفوف والرفوف متروسة كتب
وب زاوية الغرفة جان اكو فراش وبطانية
باوعت لغضنفر وحجيت ب استغراب
_قدس:: تنام هنا؟
_غضنفر:: اي احب هذا المكان محاوط ب العلم
مشيت ب اتجاه الكتب مبتسمة
التفتت على غضنفر وحجيت
_قدس:: جنت تقرة؟
_غضنفر:: اي قبل لا اشوفج مشاهدة حالتي على الوتساب تعاي اقرالج هذا الكتاب قصصة حلوة
سحبني من ايدي ومشة ب اتجاه الفراش جان اكو كتاب موجود على الفراش كعد غضنفر وكعدت يمة اخذ الكتاب من فوك الفراش وفتحة يقرة قصة النبي الموسى واني اسمع اله جنت مصدومة من القصة ماجنت اعرف احداث القصة هيج طويلة واكو مواضيع اني ماسمعتها توني سمعتها
خليت راسي على كتف غضنفر اسمع اله وهوا يحجي
ماحسيت على نفسي من خليت ايدي على ايد غضنفر امسح عليها
سكت غضنفر عن الكلام يباوع لايدي
حجيت بشرود
_قدس:: غضنفر
_غضنفر:: ها
_قدس:: خلينة نجيب طفل
حجيتها وسكتت احس توني استوعبت الكلام الي حجيت بعدت ايدي عنة رفعت راسي اباوعلة جان يباوعلي عيونة ذايبة
دنكت راسي خجلانة من نضراتة ومن كلامي حتى ماعرف ليش هيج حجيت ماعرف شجاني
سد غضنفر الكتاب وخلاة على صفحة مد ايدة يمسح على خدودي واني عيوني على ايدي افرك بيهن بتوتر واكل بشفايفي
حجة بصوت ذايب
_غضنفر:: قدس
_قدس:: ها.. ااا
خلة ايدة جوة حنجي ورفع راسي
صارت عيوني بعيونة جان رايد يشوفني هل راح ارفض هذا القرب او لا
من شاف نضراتة الموافقة بعيوني سبحني ب اتجاهه حاضني بهذا اليوم وبهذا المكان صرت زوجة غضنفر روحياً وجسدياً
مارفضت قربة ابد حسيتة جان محتاج هذا القرب ومتمنيه واني هم جنت محتاجتة بس جنت خايفة واليوم كسرت الخوف وصرت زوجة لسيد غضنفر
" يلا كافي عيب امشن امشن نطلع لاتندمجن هواي خجلت خجلت انه 😂♥. "
" معراج "
طلعت من الموكب شايل الصينية بيدي
باوعت لدلهب واكف بنص الشارع يلم زوار
صفنت على دلهب لا هذا مايجيب الزوار هذا يهدد الزوار على الاكل
وكف دلهب الزاير يباوع لوجهه بتمعن عاكد حواحبة ضرب على كتف الزائر وكال
_دلهب:: وجهك اصفر عندك نقص ب فيتامين القيمة وشلوننننننن السادة مسوين قيمة تخليك تركض لكربلاء على ايديك
جر الزاير من ايدة وجابه ب اتجاهنا
باوعت لزاير كاتم ضحكتي الزائر ماجة لان جوعان لا اجة لان خاف من دلهب
التفتت على راصد وجزام كاعدين على الكراسي ثنينهن ياكلون قيمة وتمن
التفتت على فقار واكف يحجي ويا مفرقد ومشواق
مشيت ووكفت بنص الطريق الصينية بيدي
الزوار ياخذون من الصينية واكو لا يدخلون للموكب ياكلون
بدت الصينية تخلص من السفريات
نزلت الصينية والتفتت ارجع اجيب سفريات
رفعت راسي اباوع لبعيد
وكفت بمكاني وابتسمت درت على الولد وصحت
_معراج:: جادح اجة ولدد
التفتتو كلهم على جادح مصدومين من جيتة
شفتة اجة ب اتجاه الموكب لابس دشداشة سودة والسبحة بيدة يباوع النا مبتسم
مشينة كلنا ب اتجاهه نرحب بيه وبجيتة ماجنة متوقعين راح يجي
تسالمو هوا وجزام واحد ضرب ضهر الثاني بقوة
باوع جادح لجزام وضحك
_جادح:: ها شو تخدم ب الموكب
_جزام:: يجوز بعد جم يوم تشوفني متشيع
ضحك جادح وابتسم
كال
_جادح:: وين السيد
_مشواق:: تصالحتو؟
رفع جادح حاجبة وكال
_جادح:: السيد طلبني ب الاسم
ضحكنة انا والولد فرحانين
مشة جادح ب اتجاه الموكب يشوف السيد وانا والولد نباوعلة من بعيد
التفتت امشي ب اتجاه غل شفتة يباوع لجادح مبتسم ب ايدة صينية سفريات
صارت عيني على بنية شابة اجت تمشي ب اتجاه غل عيونها علية
دار غل وجهه كدام يباوع بس صارت عينة على البنية
اتغير وضعة وحالتة كلها دنك راسة ورجع رفعة مايعرف وين يباوع ب الضبط صارت عيونة تروح يمنى يسرى
جنت مستغرب حالتهم ثنينهم الاثنين وضعهم غريب
وكفت البنية كدام الصينية باوعت لغل ومدت ايدها تاخذ الصحن من الصينية بس عيونها ما ابتعدت عن غل
اخذت السفري وبقت واكفة تباوع لغل
عكدت حواجبي منزعج من وكفتها
اجت بنية وراها شاب باوعتلها وصاحت
_:: خلوددد شسالفة موو قبل شوي اكلتي راح تنفجرين
حجت البنية الي اسمها خلود بشرود عيونها على غل
_خلود:: بس هاي من بيت السادة تختلف هواي
رفعت راسي شفت فقار ودلهب يباوعون النا ب استغراب هز فقار راسة بمعنى شنو جاي يصير قوست حلكي بماعرف باوعت الناس صارت عيونهم علينة غل ماجان منطي رد فعل بس صافن يباوع للصينية والبنية عيونها علي حتى دمعت من كد التركيز
تحركت انقذ الوضع واتلاشة جية السيد لان اذا اجة وشاف الوضع اكيد يرجعنة لنجف دفرات
اخذت الصينية من غل وصحت
_معراج:: غل جيب غير صينة انا اوزع هنا
هز راسة غل ساكت انتبهت علية ايدية ترجف بتوتر كل شوي يبلع ريكة مشة لداخل الموكب مبتعد عن المكان
انتبهت على البنية عيونها علية حتى بعد ما ابتعد
سحبتها الي وياها تهمس ب اذنها وتسحب بيها مبتعدة عن الموكب
فتحت عيوني مدهوش شنو جاي يصير منو وهاي وليش هيج مركزة ويا غل حتى هوا من شافها وضعة كلة تغير
رجعت كملت السفريات الي ب الصينية ووزعتهن كلهن
مشيت ب اتجاه الموكب بالي كلة عند غل صار عندي فضول اعرف الي صار قبل شوي
دخلت للموكب شفتة كاعدة يخدم ب الزوار ويصب جاي انطيت الصينية لمشواق ومشيت احجي ويا غل
رفع راسة باوعلي ورجع دنك
حجة بدون مايحط عينة بعيني
_غل:: لاتسألني على شي لا اعرفها ولاتعرفني
_معراج:: واضح عليها تعرفك
_غل:: لا وين اعرفها
شال كلاصات الجاي يوزع
دنكت راسي واستغفرت معقولة صدك ممكن كلشي صار ب الصدفة وحتى البنية ماجانت قاصدة
انا مافكرت ولادخلت بذنبهم بس الفضول والاستغراب الي حاوط فكري خلاني اتوقع واحد يعرف الثاني او ممكن بينهم صلة قرابة ماعرف
طلعت ماشي ب ب اتجاه الولد والسادة
باوعتلهم واكفين كدام نار حطب حاطين قواري الجاي عليها
باوعت لجادح يباوع للسيد مبتسم بغرور
والسيد يباوعلة ويدور عنة كل شوي
ضحكت اعرف نضرات جادح هاي
باوعلي جادح وغمز كال بصوت مسموع
_جادح:: مايتحمل فراقي السيد
_عبد الرؤف': اولادي قوري النومي وينننن
_جادح:: كال جادح اذا ماتجي انااا ارجع لنجف
_عبد الرؤف:: كملتو توزيع القيمة؟
_جادح:: بويةةةةة
ضحك جادح واحنا ضحكنة ويا
باوعلنا السيد خازرنة
سكت الكل كاتم ضحكتة
رجعنا لشغل وجادح كل شوي يبسمر السيد
والسيد يسكت مايحجي كلنا نعرف السيد يحب ويعز جادح مايكدر على فراقة رغم الموقف الي صار بس الكل اتناسى حتى السيد
جامت فاطمة بنت السيد مهدي الصغيرة موجودة برا تباوع للنار المشعولة
ركضت على النار ركضت متلهفة لان شكل النار حلو وهية صغيرة ماتفهم هاي النار راح تحركها
بس قبل لاتوصل للنار فقار شالها وبعدها عن النار يخاف عليها لاتحترك
التفت السيد علينة وكال
_ عبد الرؤف:: احنا هيج نركض للاذية والاختيارات الغلط لان نشوف نارها الحلوة مانشوف حرارتها من الداخل وشلون راح تاذينة بس نلمسها. ومثل ما فقار بعد فاطمة عن النار يخاف لاتحترك الله سبحانه وتعالى يبعدنا عن الاختيارات الغلط الي احنا نريدها يبعدنا عن الشين. احنا نضوج لان الله ماكتب النه الي ردناه وركضنه اله مثل ما فاطمة ضاجت لان فقار بعدها عن النار. بس الواقع كلشي يبعده الله عنك حلو
هاي احنا ب الواقع هيج دوم من نريد شي ومايصير نضوج وننقهر ونعاتب ونزعل من الله شلون بعدنا عنه بس احنا مانشوف اذية ولسعة اختيارتنا بس الله يشوف
........
" قس "
اخذت الصينية من العلوية لباب ومشيت اريد اوزعهن للزائرات
جانت العباية وطويلة واني امشي بسرعة احاول اسيطر على مشيتي
صارت كدامي البردة وكفت اريد ارفع البردة حتى ادخل
صحت من شفت البردة تنرفع بسرعة
_قس:: لاااا لااا لحظة
رفع السيد معراج البردة بسرعة مامنتبه لوجودي رجعت للخلف متوقعة راح اسيطر على الصينية ماحسيت نفسي غير ب الارض والسفريات فوكي
رفع السيد معراج راسة يباوع ب استغراب
باوعلي وفتح عيونة بصدمة
حجيت بصعبية اهمس ويا نفسي
_قس:: من اكلهم اعمص يكولون متنمرة
_معراج:: انا اعمص؟
رفعت راسي اباوعلة بخجل من استوعبت الي صار امداج قس سمعج تتنمرين علية
باوعتلة وحجيت بخجل
_قس:: احجي على البردة سيد
سكت ماراد علية دنك يريد يشيل الصينية باوعتلة ووكفت سابقتة اريد اشيلها قبلة هوا جاي ينزل يشيل الصينية دنك راسة
واني دنكت ماشوف غير نظارتة نزلت بنص السفريات
رفعت راسي باوعتلة
رفع راسة عاكد حواجبة هاي جانت اول مرة تصير عيني بعين السيد معراج
انتبهت على عيونة صح صغار يعني ماجذبت من كلت عمص شنو متوقعين اكلكم رموشة طوال والحواجب كثيفة؟ لالا اصلا كوا يباوعلي
دنك راسة اخذ النظارة من الصينية ووكف يمسحها من الاكل شلت الصينية ووكفت
باوعتلة وكلت ب انزعاج
_قس:: وخر
_معراج:: العفو تفضلي بس الناس تكول بلا زحمة
_قس:: اي واني مو الناس
حجيتها ودخلت للبيت شايلة الصينية بيدي تحسوني شخصية لالا وين العباية كلها تراب ومرك باوعت لصينية الاكل كلة اترب ماكدر انطي للنسوان
التفتت صافنة هسة وين اودي الاكل حرام اشمرة وحرام انطي للنسوان لو جهال خواني هنا جان انطيتة الهم
رفعت راسي عيوني صارت على السيد غل دخل بيدة صينية اكل متروسة مدنك راسة باوعتلة صافنة علية ماعرف شلون سرح بالي مركزة اباوعلة
رفع راسة صارت عينة علي اجه ب اتجاهي شايل الصينية بس ابد ماحط عينة بعيني حتى من وكف كدامي حجة وعيونة بغير مكان
_غل:: خوية هذا الاكل للزائرات
كسرت صفنتي اباوع للصينية هزيت راسي ب اي ومديت الصينية الي بيدي
_قس:: هاي الصينية هم للزائرات بس الاكل كلة طاح قبل شوي
_غل:: مامقسوم اخذي الصينية هاي وانطيني العندج انطيني للحيوانات
عكدت حواجبي مستغربة
حجيت
_قس:: اكو حيوانات؟
_غل:: اي اكو بستان ورا البيت موجود بي الابل والغنم والبط والدجاج وحتى الخيول
ابتسمت من كال خيول حيل احب وانجذب للخيول
هزيت راسي ب اي وحجيت
_قس:: اي احسن لعد تفضل سيد هاي الصينية انطيني العندك
رفع الصينية ب ايد وحدة ومد ايدة الثانية ياخذ الصينية الي بيدي خليتها ب ايدة مديت ايدي اخذ الصينية العندة ماعرف شلون ماسيطرت على شيلتها ولان متروسة سفريات بس شلتها ب ايدي صرخت من طاحت من ايدي للارض
رفعت عيوني بخجل اباوع للسيد متفشلة شلون طاحت الصينية مني توقعتة راح ينزعج او يضوج بس لا
ابتسم يباوع للصينية وكال
_غل:: كذالك مامقسوم واضح الاكل هذا من نصيب الحيونات
_قس:: اسفة والله سيد مادري شلون طاحت
_غل:: لاخوية عليمن الاعتذار قضاء وقدر هسة اجيب صينية اكل ثانية انتظريني
اخذ السفريات الي طاحن ب الارض وزاد عليهن السفريات القديمة شال الصينية وخلاها على صفحة طلع من المكان يجيب غير صينية
غميت كصتي امداج شجاج الفاهية ندارتج وين راحت لو فالحة بس السوالف الشينة اخخخ ينضال تعاي شوفي تعايييي
بقيت واكفة الوم بنفسي شجاني اني شجاني حتى تندمت اجيت اخدم على هاي الفشلة يجوز هوا ظهر جانبة الطيف بس بداخلة جان يحجي علية ويكول هاي فاهية وثولة اي امداج قس
رفعت راسي شفتة دخل مرة ثانية للبيت بيدة صينية اكل ثانية مد الصينية ب اتجاهي وكال
_غل:: تفضلي خوية
_قس:: خاف هم تطيح
ضحك وكال
_غل:: لا ان شاءالله ماتطيح
هزيت راسي ب اي واخذت الصينية مشيت ب اتجاه مجلس النساء ادعي ماتطيح الصينية وارجع اتفشل لان هل مرة اركع الصينية براسي
دخلت للمجلس وزعت الثواب على الزائرات وطلعت احمد الله لان مارجعت تفشلت
مر هذا الايوم مثل الي قبلة بين الزائرات وبين التنظيف والراحة
العصر قررن العلويات يطلعن يمشن خطوات
قنعن العلوية جهاد وهيا حجت ويا السادة وافق السيد فقار وغل ومعراج وغضنفر يطلعون يمشون
طلعنة اني وعاتكة وملاك وقدس وشاهيناز وشذى وياهم والبقية لا بقن ب البيت
طلعنة نمشي والسادة محاوطينة
حتى السيد عبد الرؤف اجة ويانا جان يمشي ب المقدمة واني والبنات خلفة والسادة على يمنتنا ويسرتنا
البنات كلهن جانن منقبات عداني اني وقدس
قدس وغضنفر جانو يسمون على خط واحد واني والبنات على خط واحد
اجو مجموعة شباب يمشون بصفنة هما واضح ماقصدهم شي وهاي مشيتهم حتى ماصارت عينهم علينة
جانو يمشون على يمنتي واني امشي مرة سريع مرة بطيىء حسب مشية الباقين سرحت عنهم ماشية قريب عن الشباب مامتقصدة السالفة بس لان صارت مجموعة زوار يمشون سوا ماردت اضرب بيهم
مشيت بغير جهه حتى لا احتك ب احد
انتبهت على السيد معراج اجه ب اتجاهي يمشي على نفس الجهه الشباب وصار هوا القريب مو الولد
بس جان يرفع ايدية حتى لا اضرب ايدي ب ايدة
على طول درب المشي جان السيد معراج يمشي بصفي مانع احتكاك احد بية
جنت ماشية كدام البنات
بطئت مشيتي والتفتت اشوف البنات
صارت عيني بعين السيد غل نضرات ثواني وثنينة كسرنة عيونة
ماعرف ليش من اباوع للسيد غل يجيني احساس غريب !!
" شاهيناز "
طلعت من البيت ماشية ب اتجاه المجلس عرفت اكو زائرات جدد اجن
رفعت راسي باوعت لملاك شفتها جاية
تمشي ب اتجاهي بيدها ملابس
باوعتلها وضحكت
_شاهيناز:: ضميهن لصدرج صرت اخاف من الملابس
_ملاك:: ماتشوفيني كل شوي ادور عيوني لا شذى تلمحني
ضحكت ومشيت ب اتجاه المجلس دخلت للمجلس مبتسمة سلمت على الزائرت شفتهن شنو يحتاجن
طلعت من المجلس بيدي ربطة وعباية وحدة من الزائرات
مشيت ب اتجاه المغاسل اريد اغسلهن ماجنت منتبهة عيوني على المغاسل من بعيد
ماحسيت على نفسي غير مسحوبة من ملابسي
صرخت مصدومة من انسحبت من ملابسي بقوة شفت ملاك تسحبني من ملابسي وتمشي بية ب اتجاه
عازل الموكب والمجلس
دفعتني كدامها ووكفت خلفي تسمع جنت مصدومة مافاهمة شنو جاي يصير
عكدت حواجبي مستغربة من سمعت صوت شذى جاي من الخارج
رفعت شوي من البردة وخليت عيوني اباوع هذا المكان السيد مانع وحدة من النساء توكف هنا شطلع شذى
ماجنت مصدومة من وكفة شذى لاجنت مصدومة من وكفة فقار كدامها
جانت واكفة تباوع لفقار الي جان مدنك راسة متوتر يريد يطلع بس هيا تحجي وواكف يسمع الها ويهز راسة
حجت ب ابتسامة عيونها على فقار
_شذى:: سيد والله انت تدري حتى شخصيتك حلوة اني كلششش معجبة بشخصيتك
فتحت عيوني اباوع لملاك الي جانت مصدومة اكثر مني تباوع الهم
هز فقار راسة ب اي وكال
_فقار:: اي... اي اترخص انا
حجاها وطلع خارج المكان طالع للموكب باوعت لملاك عيونها متمركزة على شذى الي مدت راسها تباوع للشارع
رجعت ملاك البردة بعصبية ومشت راجعة بخطواتها ايديها ترجف من العصبية واني اركض خلفها
صحت بتعب من الركض كوا اجر النفس
_شاهيناز :: اوكفيييي ملاكككك مابية اركض
_ملاك :: سمعتيييييي ولج تريدةةة هاي تريدة
_شاهيناز:: شتريددد منة شبيج تكلة شخصيتك عاجبتني
باوعتلي وصاحت بقهر
_ملاك:: هياااا وين تعرفة ومعجبة بشخصيتة ماصالها جم يوم اجت وين لحكت تنعجب
_شاهيناز:: هايي شبيج ملاك عود صدك تقهرين روحج علمود شذى يمعودة اهدي
سكتت ملاك صافنة كوا تجر ب النفس
هزت راسها ب اي رفعت عيونها تباوعلي
كالت
_ملاك:: اشك حلكها هاي شذى
_شاهيناز:: ياطلابة شذى الماتخلص
_ملاك:: اني اربيها هاي بلا تربية مو مشكلة اني اعلمها انيييييي دواهااااا
حجتها ومشت ب اتجاه المغاسل واني امشي خلفها خايفة لا تتعارك هيا وشذى
دخلت للمغاسل تشيل الملابس بعصبية واني ساكتة اتشغل وياها بهدوء
ماعرف شنو السالفة مالحكنة نرتاح من جميلة اجت شذى وزادتها علينة
ثاني يوم
نزعت النقاب ونفخت نفس بتعب مشيت ادخل ب اتجاه البيت
اجيت افتح باب الصالة سمعت عمتي والعلوية لباب والعلوية زهراء يحجن بس العلويات الاكبار فرحانات
كالت العلوية زهراء بفرح
_زهراء:: غل حجة وياي قبل شوي علمود قس يريدها يريد يخطبها بفرحة الزهرة ........
"" "" "" "" "" "" "" ""
شلونقممم قايز
شلونة البارت؟
شذى ياشذى!!!!!!
خلود منو؟ وشنو دورها بطلة لو شخصية عابرة؟؟
غل وقس؟
غل ومعراج؟
قدس وغضنفر راح نفرح ب البيبي الجديد ب البارت المستقبلية مووو؟؟ 👀
وب النهاية شكرا لمشاهدة البارت ودعمي وتحفيزي على الكتابة احبكم يا اجمل مدللات:
شكرا لزيارتكم عالم روايات سكيرهوم
