رواية ام الدويس الفصل الثالث بقلم محمود الأمين
خبر موت ابو نواف كان بالنسبالي صدمة كبيرة مش بس عشان كان بيمول مشروع عمري لأ.. انا كنت بحب الراجل ده جداً وبعتبره أبويا.. مكنتش متخيل أنه يموت بسرعة كده
أستغفر الله العظيم الاعمار بيدي الله.. بس معلش هو في سؤال محيرني
هو أبو نواف عايز مني اي.. يعني كاتب اسمي في الوصية ليه بصفتي مين؟
الموضوع كان محير جداً ومكنش قدامي غير اني اسافر بسرعة زي ما قال الراجل ده اللي كلمني
..
وفعلا بلغت مراتي.. كانت مستغربة في الاول بس في الاخر قلتلي
_ أنا هروح عند أهلي وحاول متتأخرش
_ لا متخفيش هو يوم واحد هشوف اي موضوع الوصية دي وهرجع تاني
_ في الحقيقة انا مش مصدقة الموضوع ده ومش مرتاحة بس خلي بالك من نفسك
_ متخفيش.. هشوف وهرجع اوعدك مش هتأخر
..
وفعلا سافرت.. رحلة إلي المجهول جوايا احاسيس كتير من فرحة ممزوجة بحيرة وتساؤلات
ووصلت بعد رحلة طويلة.. وصلت المطار واخدت عربية توصلني لعنوان ابو نواف
طول الطريق في حاجه جوايا بتقولي ارجع وبلاش المشوار ده.. ارجع انت ماشي في طريق هلاك
لكني مكمل لازم افهم كل حاجه
المهم وصلت لعنوان ابو نواف اللي كان عبارة عن قصر كبير جداً.. شكله من بره تحفة معمارية حتة من الجنة
دخلت من البوابة الحديد وانا بقرب لحد ما وصلت خبطت علي الباب مرة واتنين محدش بيرد لكن في التالتة اتفتح الباب وخرج منه شاب لابس لبس كويس ومهندم جداً.. وقلي
_ أنت هشام مش كده؟
_أيوه أنا.. ممكن اعرف حضرتك مين؟
_ أنا طه.. وعلي فكره انا مصري زيك.. بس عايش هنا من زمان وابو نواف الله يرحمه كان بيعتبرني ابنه
_اممم طيب.. واي موضوع الوصية دي؟
_ ابو نواف كتبلك كل حاجه قبل ما يموت
_ اي!... أنت بتقول اي؟.. حضرتك بتهزر صح؟
_ لأ بتكلم بجد.. ابو نواف كان بيحبك جداً وقرر يوصيلك بالثروة كلها
_ أنا مش قادر أصدق
_ بس لازم تعرف انك هتسمع كل حاجه دلوقتي.. ابو نواف كان عارف انك بتشوف حاجات غريبة وعشان كده وصاني احكيلك كل حاجه
_ تحكيلي اي؟... قصدك علي الست اللي بشوفها ولا أي؟
_ قصدك أم الدويس؟
_ أم اي!؟
_ أم الدويس.. الدويس يعني منجل بالمصري والست دي حكايتها اسطورية.. ورغم كده كل الناس بتقول انهم شافوها
هي اسطورة امارتية.. قالوا عليها انها كانت طيبة وبتعامل الناس بود.. لكن في يوم الناس صحيت علي خبر مفزع.. ام الدويس مقتولة حد دبحها بمنجل
ده كلام خرفات وحكاية اسطورية
تشبه حكاية الاسطورة الصينية اللي شوهت نفسها عشان جوزها اتعرض لحاجة بشعة وتضامنا معاه شقت بوقها عشان تكون زيه
لكن سابها وقررت تنتقم من كل الرجاله من وقتها
...
_طيب مال ده ومال ابو نواف مش فاهم؟
_ هحكيلك.. مع احترامي لابو نواف هو ميت دلوقتي.. إلا إنه كان بتاع ستات كان بيتجوز كتير جداً ويطلق
وطبعا الاكتر عندنا في مصر
كان وقتها متجوز 3.. التلاتة دول كانوا بيخلفوا بنات لكن ابو نواف كان نفسه في الولد.. هيموت ويخلف ولد
لحد ما في يوم وهو راجع
من المطار.. شاف واحدة ست من الستات بتوع ضرب الودع ووشوشة الحجر.. الست كانت غاية في الجمال
ابو نواف وقف العربية عشان يشوف مين دي؟
نزل من عربيته وقرب منها
لقي قدامها حاجات بتبيعها.. زي اكسسوارات وحاجات تاني كتير
ومن غير مقدمات ولا حتي صباح الخير.. ابو نواف اتكلم وقالها تتجوزيني
الست بصتله وابتسمت وقالت
_ كان نفسي بس مينفعش يا ابو نواف
_ أنتي كمان عارفة أسمي؟!
_ انا اعرف عنك كل حاجه.. وبصراحة انت شخصية جميلة جداً
_ طيب وافقي عليا هعيشك ملكة ومش عايز منك حاجه
..
رجعت تبتسم من تاني وقلتله هفكر
ابو نواف كان مسحور بيها.. وهي كانت شيطانة مكنتش بني ادمه لكن ابو نواف اصر يتجوزها.. وافقت عليه عشان تكون دي بداية المعاناة
من أول يوم دخلت فيه البيت.. وبقت في طاقة سلبية في البيت مبقاش حد طايق وجود الست دي
وابو نواف بقي يحاول دايما المشاكل اللي بتحصل بينهم.. لكن المشاكل كانت بتزيد.. بتزيد بشكل كبير
لحد ما حملت مرات ابو نواف.. وهو بصراحة مكنش مأمل نفسه ان المرة دي ولد.. وقال مش هحلم تاني
...
لكن بعد فترة.. عملت سونار عشان تعرف انها حامل في ولد مش بنت
صدمة زوجات ابو نواف واحساسهم ان الفلوس هتروح منهم وكل حاجه هتكون لولي العهد الجديد
خلتهم يفكروا تفكير شيطاني.. استنوها لحد ما خلفت الولد
واستغلوا غياب ابو نواف وخلصوا عليها هي وابنها بالمنجل ومكتفوش انهم دبحوهم لأ.. دول قطعوا جثثهم وخفوا المعالم خالص
وقالوا لابو نواف انها طفشت.. ابو نواف فضل يدور عليها زي المجنون
عشان يلاقي جثتين متقطعين مدفونين في جنينة القصر.. الراجل كان هيتجنن
وفي نفس الوقت بدأت مراته اللي اتقتلت تظهرله في الاحلام وتهاجمه وتطلب منه يجبلها حقها
الراجل في نظر الناس كان المجنون اللي محتاج يتعالج
لحد ما يوم صحي ابو نواف علي صراخ في البيت ولما طلع السلم يشوف في اي؟
لقي زوجاته التلاتة مقتولين ومعرفش ليه؟ ومين قتلهم؟ ومتقطعين زي اللي ماتت بالظبط.. لحد ما وصلت الراجل لمرحلة الانتحار.. قطع شرايينه ومات بعد ما كتبلك كل حاجه
واه بالنسبة للمرايا اللي عندك في المحل هي مرايتها
بس انا كنت كل ما ابص فيها اخاف معرفش ليه!
بس ابو نواف بيقولك وموصلك ده مخصوص.. بيقولك هو مكنش يعرف ان الثروة دي ملعونة ولما حاول يعرف بقي يشوف العجب
نصيحة بلاش تاخد الفلوس دي.. سيب لعنتها وابدأ من جديد
..
رفضت ورجعت علي مصر بفكر هعمل اي؟
رجعت البيت كنت عايز افرح مراتي.. ملقتهاش كانت في بيت ابوها
قولت انزل اشوف المحل واعدي اجيبها بالمرة من عند اهلها
دخلت المحل وقربت من المرايا.. ولاخر مرة اسرح واشوف اكتر حاجه مفزعة شوفتها في حياتي
شوفتني بدبح مراتي وابني .. رجعت لورا وانا مش عايز اصرخ بكتمها عشان ملمش الناس عليا
يعني اي هقتل مراتي ليه؟... روحت اخدتها من بيت اهلها ورجعنا البيت
كنت قلقان مش عارف ده هيحصل ازاي؟.. دخلت نمت وانا بين الصحيان والنوم سمعت مراتي بتقول لحد خلاص هاخد فلوسه وهسيبه ونتجوز وابننا هاخده معايا
صحيت لقيتها نايمة.. هو انا سمعتها بجد بتقول كده
الكلام بيتردد في عقلي.. لقيت نفسي مسلوب الارادة بتحرك للمطبخ وبجيب سكينة.. مش قادر انسي نظرتها ليا وهي بتقولي ليه؟ ليه؟
قتلتهم عشان كانت عاوزة تهرب مني مع عشيقها وتاخد ابنها معاها.. اللي عرفت انه مش ابني
وعاوزة تسرق فلوسي.. تستاهل تموت.. تستاهل هي ابنها
....
مساء الخير
انا الدكتور ايمن عبد الواحد اخصائي نفسي.. حالة هشام من الحالات المصنفة بالحالات الخطيرة جداً والعدوانية جداً
هشام اختلق حكاية ليس لها أصل وقتل مراته وابنه بدون سبب وكل اللي حكاه من خياله
تحريات النيابة اثبتت انه مفيش حد اسمه ابو نواف ولا في محل عند هشام.. هشام مريض نفسي وليه 5 سنين في المستشفى بيتعالج وكل يوم بيحكي نفس الحكاية
..
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
