رواية ملف الحرامي الفصل الثالث بقلم محمود الأمين
عتمان كان ميت وجثته كان منظرها صعب بطنها مفتوحة وخارج منها دود.. دود كتير ده غير وشها الي كان مسلوخ.. الناس كلها خرجت تجري من المنظر كانت حاجة صعبة.. وبمجرد ما الناس خرجت البيت مسكت في النار هو كمان وكنا سامعين صوت.. صوت صريخ حد بيصرخ جوه.. الناس قالت ان حد فينا مخرجش لكن كلنا كنا خرجنا محدش كان فاهم ده صراخ مين!!! واليوم ده عدي وبدأت الدنيا تهدي تدريجي والبلد بدأت تهدي بس وهي دي حكاية عتمان الدجال
....
_انا مش عارف اقولك اي يا ابو فهد.. الموضوع خارج نطاق العقل والمنطق
_منا يبني قولتلك عارف ولو فضلت احلفلك من هنا لبكرة مش هتصدقني ان كل ده حصل قدامي لدرجة اني شكيت في نفسي وقولت علي نفسي مجنون
_طيب يا ابو فهد كان ناقص واحد
_ اه فتحي ولحد دلوقتي محدش عارف هو راح فين واعتبرناه مات
_وده اي حكايته يا ابو فهد
....
فتحي ده راجل كبير في السن وكان فاتح عطارة في البلد ومعندوش غير ابن واحد اسمه عمر.. المهم ان عمر كان صحفي وكان بيحب يسافر القاهرة كتير عشان كليته وشغله.. لحد ما في مرة من المرات اتصل عليه واحد وقال انه صديق عمر وان عمر مجاش الكلية ولا السكن بقاله شهر.. الراجل قلبه اتقبض يعني اي ابني فين... وفضل يعيط وانا من الناس الي رحت اسأله مالك يا حج فتحي ولما حكالي.. قولتله
_يعني انت عاوز تقنعني ان ابنك متصلش بيك بقاله شهر وانت مطمن عادي لحد ما جالك التليفون ده من زميله
_ لا يا ابو فهد ابني تليفونه اتكسر وهو في البلد وانت عارف الظروف علي قد حالها ومعرفتش اجبله تليفون جديد.. بس هو قال انه هيسافر وهيكلمني ومكلمنيش وقولت يمكن معرفش يتصرف
_ انا مش عارف اقولك اي.. ربنا يستر
لكن المصيبة يا يوسف يبني ان زفت الطين الي اسمه عتمان قال للحج فتحي ان جثة ابنه كانت مدفونة علي جنب الطريق الملعون في ملف الحرامي.. الراجل لو شوفته وقتها كان صعب عليك فضل يبكي زي العيال الصغيرة.. وطلع يجري علي الطريق والناس حاولت ترجعه لكن محدش لحقه كان فص ملح وداب ومن يومها محدش سمع عنه وقولنا انه مات ومعتقدتش انه هيرجع
....
_ اهي دي تتصدق منطقية شوية يا ابو فهد
_والله يبني ربنا يسترها احنا خلاص وصلنا البلد
.....
وصلنا بلد ريفية فيها محالات كتير وبيوت صغيرة الناس علي وشها بؤس ميتوصفش.. لاحظت وانا واقف ان في بيوت محروقة فعلاً.. دخلنا انا وابو فهد المحل عشان نجيب البضاعة.. معرفش كان عندي فضول اعرف الي حكاه ابو فهد ده حقيقي ولا لا
فسألت بفضول غبي الراجل صاحب المحل
_هي البيوت دي محروقة بسبب ملف الحرامي؟
كنت حاسس اني غلطت في الراجل مش سألته.. الراجل برق وبص لابو فهد ورجع بصلي وقال
_ انت مش اخدت البضاعة تقدر تتفضل يا استاذ بعد اذنك
طبعاً حسيت باحراج الراجل طردني بس كده واضح ان كلام ابو فهد صح.. بصة الراجل لابو فهد بتقول كده... حملنا البضاعة علي العربية ورحنا على بيت ابو فهد عشان هنبات وهنمشي الصبح.. كان واضح على ابو فهد انه زعلان منى بسبب الي انا عملته.. واول ما دخلنا البيت ابو فهد اتكلم بحزم وقلي
_اسمع يبني انت سمعتني كلمتين ملهمش لازمة بس في النهاية انت ضيف عندي يعني ليك الواجب تقعد من غير ما تسأل انا غلطان اني حكيت واتكلمت.. اقعد في اوضتك وشوف لو كنت هتنام عشان هنمشي بدري قال الكلمتين وخرج ابو فهد وانا كنت حاسس باحراج وفضلت لقول علي نفسي غبي بسبب السؤال الي سألته... لكني نمت من التعب والارهاق وصحيت الدنيا ضلمة مش شايف حاجة حاولت اتحسس السرير عشان اقوم لكن انا مش على السرير انا علي ارض ملمسها صلب زي صخر حاولت اقوم لكن انا جسمي مشلول.. اقدر اقول اني متكفن ايوة متكفن.. ظهر نور بسيط قدرت اشوف انا فين كان اشبه بنور شمعة.. انا كنت في كهف.. الكهف الي حكالي عليه ابو فهد وشوفت حواليا اكفان.. اكفان كتير بتتقطع والميتيين بيصحوا.. اعوذ بالله من الشيطان الرجيم.. اعوذ بالله من الشيطان الرجيم
وكلهم جايين ناحيتي.. صرخت ولقيت ابو فهد بيصحيني وبيقولي اصحي مالك في اي
كابوس.. كابوس صعب
_ طيب يلا قوم خلينا نفطر ونمشي
_ حاضر يا ابو فهد
قومت وفطرنا واتحركنا واحنا الاتنين ساكتين تماما لحد لما وصلنا لملف الحرامي الطريق الي في لغز مش مفهوم لحد دلوقتي.. لكن بدأت اشوف اكفان اكفان كتير نفس الي كانت في الكابوس.. بصيت لابو فهد لكنه مكنش شايف حاجة وماشي عادي.. هو في اي دي اكيد تهيؤات ورجعنا مرسي علم نزلنا البضاعة في المحل والحمد لله
وكنت فاكر ان الموضوع كده خلص كل الايام بعد كده كانت كوابيس كنت بحلم بالطريق والكهف والاموات وحياتي بقيت جحيم طول عمري انسان فضولي وعندي شغف اعرف كل حاجة بس مكنتش اعرف ان مجرد قصة هتقلب حياتي وتعيشني في عذاب.. وبسأل نفسي كل يوم هو الدور عليا؟ هو انا ممكن اكون الضحية الخامسة ولا انا واهم نفسي علي الفاضي وكل دي تخاريف
...
لحد ما في يوم اخويا اتصل وقال ان والدي تعبان.. استأذنت الحج سامح ونزلت اجازة عشان اشوفه.. كان فعلا باين عليه التعب وقدرت اوفرله العلاج وحمدت ربنا اني اشتغلت عشان متحوجش لحد
وبعد اسبوع كنت راجع الشغل.. لاحظت الحج سامح زعلان فسألته
_ مالك يا حج سامح؟
_ خبر محزن جدا وصعب جالي دلوقتى يبني
_خبر اي؟
_ ابو فهد مات.. مات يا يوسف لقيوه مقتول في بيته
انا الكلام نزل عليا زي الصاعقة.. ابو فهد مات.. اتقتل.. خلاص الدور عليا خلاص
اتكلم الحج سامح وقال اه بالحق هو بعتلك الجواب ده قبل ما يموت
اخدت منه الجواب وفتحته وكان مكتوب فيه (تعالي بسرعة يبني هيموتوني انت الوحيد الي هتقدر تنقذني يا يوسف ولو وصلك الجواب ده متأخر ادعيلي يبني ادعيلي)
قفلت الجواب وانا في حيرة مش عارف منا مسيري هرجع البلد عشان الشغل تفتكروا الدور عليا ولو سبت الشغل.. هما هيسبوني؟
اتكلم الحج سامح وقال
_هو اي الجواب ده يبني
_لا ده كان عاوزني ازوره عشان تعبان.. ربنا يرحمه
...
الخوف الي جوايا بقي رعب بعد موت ابو فهد مش عارف اروح هناك تانى ولا اسيب الشغل ده ولا اعمل اي بالظبط
بعد فترة قرر الحج سامح انه هيوفر عربية تاني عشان نروح نجيب البضاعة وفعلا بعد يومين كان جيه واحد اسمه عدنان ومعاه عربية كويسة نوعا ما وجيه الميعاد عشان نرجع البلد من تاني.. عشان نعدي علي الطريق الملعون من تاني مش عارف اقول اي ولا اوصف احساسي انا بجد مرعوب.. ركبنا العربية واتحركنا وبدأ الليل يدخل علينا وقربنا من ملف الحرامي كل خطوة ناحيته كنت بحس بالجحيم بيقرب لحد ما وصلنا عنده وزي ما توقعت العربية عطلت.. جسمي تلج.. لقيت عدنان هينزل.. قولتله
_انت هتعمل اي
_ هنزل اصلح العربية
_ لا بلاش تنزل بلاش
_ بلاش اي ومالك خايف كده ليه رجالة اخر زمن
ونزل ومفيش خمس دقايق وسمعت صرخة كانت صرخة عدنان الحقيقه معرفش بقي مات ولا اتاكل وسمعت صوت خبط علي ازاز العربية بصيت وانا عارف هشوف اي.. ايوة هما من تاني خلاص انا الي عليا الدور.. انا الي عليا الدور
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
