 |
اسكريبت ساجد ورحمة الفصل الثالث بقلم حبيبة المصري
"مرحباً بكم سيداتي سادتي في مطبخ رحومة لجلب الرجل من معدته"
جملة أفتتاحية قولتها وأنا بصور فيديو بعمل فيه أكلة جديدة أول ما هياكلها سيجو قلب أخته هيقوم يجري زي الحصان، كملت و قولت بثقة :
- دلوقتي يا سيداتي هنعمل بيتزا بطريقة رحومة، قلمك و ورقتك معايا يا ست الكل عشان نجيب جوزك من معدته ..
بعون الله هنعمل بيتزا بطريقة روما اللهلوبة، كُبايتك معاكِ يا ست الكُل و كيس دقيقك و بينا على المطبخ
و قومت مشوحة بإيدي كدا هو و مشيت للمطبخ وانا بتنطط زي الأرنب، كدا كدا محدش هيشوف الفيديو أصل بيني و بينكم لو ساجد لمح فيديو ليا هيوئدني.
وصلت للمطبخ و جبت أكتر كباية بيحبها سيجو سجاجيدو عشان أعمله بيها البيتزا، قد أيه أنا أخت صالحة.
بصي يا سيدة منك ليها، هتجيبي كوباية أزاز زي دي و أهم حاجة تكون بودن، طب لو معنديش بودن يا رحرح اعمل أيه؟، اقلبي الفيديو يا سيدة لازم الكوباية تكون بودن، نرجع لموضوعنا ... هتحطي أربع كوبايات دقيق، وبنفس الكوباية حطي كوباية مياه دافية وبنفس ذات الكوباية هتحطي نص كباية زيت، وعشان نوازن الملح و السكر هنحط 3 معالق كبار سكر و أتنين إلا ربع ملح، أمشي ورا رحرح أنتِ مغمضة، وأهم حاجة يا ست الكل معلقتين خميرة، و تركاية من عند روما اللهلوبة حطي كوبايتين نشا عشان العجينة تمسك نفسها، اسمعوا مني يا سيدات
و عدى الوقت و جه ساجد من شغله و بسرعة حطيتله البيتزا و وقفت وانا رافعة راسي و قولتله بكل ثقة :
- دوق ابداعات أختك يا كبير
بصِّلي بتوتر ولقيته مسك السكـ'ـينة وجه يقطع البيتزا لقاها مبتتقطعش !
بصِّلي و بص للبيتزا و مسكها بإيديه وحاول يفصلها بس برضو متفصلتش !
بصِّلي وقال بسخرية :
- أنتِ عملالي بيتزا ضد الأكل ولا ايه يا رحرح ؟
بيتريق عليا، الصايع اللي شوية و هلمه هو و صحابه من الملاعب، فا قولتله بغيظ :
- متتريقش عليا
- متريقش ايه يا رحرح، دا أنتِ خدتي بمثل شوَّق ولا تدّوق بالمعني الحرفي !
أتقمصت، ما انا مش بعد ما أتبهدلت دقيق و وقفت ساعتين أعمل فيها يتريق علي البيتزا بتاعي، هي آه متتاكلش بس ميتريقش عليا برضو !
شكلي كدا صعبت عليه فقالي بقلة حيلة :
- متتقمصيش طيب، هبعت أجيب شاورما و أمري لله
طيوب ومش بيحب يزعلني، حبيبي ده
وبعد شوية وصلت الشاورما و نزل جابها وطلع وهو بيخرجها من الكيس سألني بفضول :
- أنا بس نفسي أعرف ايه المكون الزيادة اللي حطيتيه في البيتزا
وبكل ثقة قولتله :
- حطيت كوباية نشا عشان العجينة تمسك نفسها، مش بالله كريتف ؟
أنا لقيته ساب الساندويتش من أيده و بصِّلي بنوع من الشلل و سألني سؤال واحد :
- بالله يا مؤمنة عمرك شوفتي حد حط نشا على البيتزا قبل كدا ؟
- لا طبعاً، ما عشان محدش عملها قبل كدا بقول أني كريتف
مش محتاجة اقولكم أنه سكت عشان لو زود في الكلام هيديني بالبيتزا الحجر بتاعتي في دماغي يفتحهالي ..
و سلام أنتو بقا عشان ورايا ساندويتش شاورما ...
~~~~~~~~~~~~~~~
وطبعاً مش محتاجة اقولكم أوعوا تمشوا ورا رحمة لجلب الرجل من معدته عشان ميتحفلش عليكم👌🏻
