رواية بين هذا وذاك الفصل الرابع بقلم مريم سمير
_ أنا طالب سباك ، هو انتي مين ؟
= فين الحوض المسدود يفندم؟
_ هو أنتي السباك!!
هزيت راسي ب أيوة ف شاورلي علي مكان المطبخ ، روحت وطلعت العدة بتاعتي وبدأت اشتغل ، كانت نظرات الاستغراب مالية وشه ، نفس النظرات الي بتتبصلي ف كل بيت اروحه ، بس من أمتي الواحد بيعمل الي هو عاوزه؟ ساعات كتير بنتجبر نعمل حاجات عشان بس نعيش!
= كد تمام يفندم ، تقدر تجربه دلوقتي
_ الله ينور ، انتي شكلك شاطرة اوي
= متشكرة ، الحساب لو سمحت عشان أمشي
_ بسرعة كد؟ لاء لازم تشربي حاجة الأول
= من ذوق حضرتك بس انا لسه ورايا شغل
قرب خطوة _ انتي اسمك اي؟
= ودا يهمك في أي؟؟ ، ممكن الحساب عشان أمشي ؟
طلع الفلوس وحطها قدامي _ اصلك حلوة ، اوييييي
بصيتله من فوق لتحت = شكلك يعني ميديش انك مراهق للحركات الي بتعملها دي! ، شكلك راجل محترم ف ياريت تفضل محترم عشان رد فعلي مش هيعجبك أبدا
_ اي دا؟ ، طب حلو
=..
_ أنا ممكن اديكي فلوس كتير اوي تكفيكي شهور قدام بدل المرمطة دي ، بس كل حاجة وليها مقابل مش كد؟
لفيت أيده حوالين ضهره = ايدك الي فكرت تترفع عليا دي لما اكسرهالك أي الدنيا ؟
_ انتي بتعملي ايييي! سبيني بقولك
= لو اتكررت تاني صدقني مش هرحمك ، ايدك دي تفضل جمبك بدل ما احسرك عليها انت سامعني؟؟
زقيته قدامي وخدت الفلوس ومشيت ، مش اول مرة يحصل معايا الموقف دا في اتعودت عليه ، روحت حاسبت الاسطا ومشيت ، تاني يوم لقيت الاسطا بيطلب مني اروح الشقة تاني!
_ الشقة دي أنا كنت امبارح فيها يريس ومخلصة شغلي
° منا عارف بس صاحب الشقة بلغ إن الحوض اتسد تاني
_ طب معلش ودي حد مكاني
° اديكي شايفة يمريم كلهم برا في طلبات شغل
خدت العدة وروحت علي العنوان الي معايا ، رنيت الجرس ف فتحلي ، دخلت خلصت شغلي ووقفت قدامه
_ أنا.. آسف حقك عليا بجد علي الي عملته امبارح ، أنا مش عارف عملت كده ازاي
= حصل خير يفندم ، ممكن حسابي عشان أمشي ؟
_ ممكن اسألك سؤال قبل ما تمشي ؟
= اتفضل
_ بتشتغلي الشغلانة دي لي؟ ، انتي مش متعلمة؟
= لاء متعلمة ، معايا كلية تجارة ، بس فيه ظروف بتحصل بتخلي الواحد يعمل حاجات لحد ما يلاقي فرص احسن ، في الوقت الحالي مفيش فرص أصلا ف بحاول
_ بصي انا حابب اساعدك فعلا
= هتساعدني ازاي؟ مش فاهمة ؟
_ مش انتي لسه قايلة انك خريجة كلية تجارة؟ أنا عندي شركة خاصة ب الهندسة وانا مدير فرع فيها ،ممكن اكلملك المدير بتاعي وتشتغلي معانا
= بتتكلم بجد ؟ هتعمل كد فعلا !!!
_ تقابليني بكرة الصبح ونروح سوا ويبقي معاكي ال CV بتاعك؟
= مش عارفة اقولك أي ، انا متشكرة اوي
_ ولا اي حاجة ، واتمني بجد تكونى مسمحاني ومش زعلانة مني
= لاء ابداً مفيش حاجة ، نبدأ صفحة جديدة
مشيت من عنده وانا مش مصدقة ، قدمت علي شركات كتير اوي في البلد ، كنت بضيع ساعات عشان استني دوري في الانترفيو ، والنتيجة كانت واحدة ، يا متقبلش يا إن ابن واحد علي معرفة صاحب الشركة الي يتعين ، معرفتش الاقي أي فرصة! كل البيبان اتقفلت في وشي لحد ما لجأت لشغلي دا ، منكرش إن ليا سيط عندنا في المنطقة والكل بيعملي حساب ، اني بصلح ساعات كتير حاجات الرجالة زمايلي في الشغل مش بيعرفوا يصلحوها ، عشان كد كنت اشطر واحدة في المكان ، لكن؟ مكنتش مبسوطة ، كنت عاوزة احقق حلمي اني اشتغل ب شهادتي وابقي ست ناجحة في المكان الي عوزاه مش المفروض عليا ، كان عمري ١٨ سنة! لما بقيت أنا راجل البيت بعد وفاة بابا ، مكنش ينفع مشتغلش خصوصا إن ماما تعبانة ومحتاجة مصاريف علاج ، واحنا محتاجين احنا الاتنين مصاريف أكل ، لبس ، معيشة! ، ف مكنش عندي اي اختيار تاني .
طلعت البدلة الفورمال بتاعي ولبستها ، صحيت بدري وانا بدعي إني اشتغل هناك ، إن ممكن المرادي تعوضني عن كل فرصي الضايعة .
= احممم ، اتأخرت عليك ؟
_ لاء ابداً ، أنا مستني بقالي خمس دقايق بس ، اتفضلي
ركبت معاه العربيه = معلش هتعبك معايا
_ لاء تعب ولا حاجة ، أنا كلمت مديري وإن شاء الله هيوافق ، اربطي حزام الامان من فضلك
وكأنه انسان تاني غير الي شوفته من يومين! انسان لطيف وذوق ، بني ادم سوي علي عكس الراجل الي كنت عاوزة اكسرله دماغه من كتر غيظي منه!
وصلنا وقعدت برا وهو دخل المكتب بعدها بشوية جه وقف قدامي _ ادخلي ، أنا هستناكي هنا
دخلت وقابلت المدير ، قدمتله ال CV وفضلت افرك في صوابعي ° الحقيقه الملف بتاعك هايل وانتي كمان عليكي توصية جامدة ف مقدرش ارفض طلب لأحمد ، مبروك انتي اتعينتي معانا في الشركة بس ارجو تثبتي وجودك عشان كل الي هنا بيشتغلوا ب ايدهم واسنانهم عشان نطلع ب احسن شغل ، احمد هيوريكي مكتبك الجديد
= اوعدك يفندم هعمل كل الي اقدر عليه ، أنا بجد متشكرة اوي
خرجت وكنت حاسة إن قلبي بيطير جوايا مش لامسة الأرض ، بيبقي عندنا جناحات جوا احلامنا!
_ ها عملتي اي؟ اتقبلتي؟
= أيوة ، أنا مش مصدقة ، أنا بجد مش عارفة اقولك أي والله ، أنا متشكرة اوي يا احمد ، اويييي
_ الف مبروك ، اوريكي مكتبك؟
مشيت معاه ، وصلت ل اوضه واسعة فيها مكاتب كتير
_ اهو يستي ، دا مكتبك ، وواحدة واحدة هعرفك طبيعة الشغل والمطلوب منك بالظبط وانتي عليكي الباقي
بدأ يكلمني علي الشغل ، فضلنا نتكلم ساعتين! ، فهمت حاجات وشوفت حاجات علي الكومبيوتر وازاي أعملها
_ ما شاء الله انتي ذكية اوي
= شكراً ، وشكراً علي وقتك بجد
_ ولا حاجة ، اسيبك دلوقتي واشوفك بعدين
كان فيه ضغط شغل من اول يوم ، بدأت أنجز فيه ، وعلي الجانب الآخر اتعرفت علي ناس معايا في المكتب ، كان يوم مرهق بس اتبسطت اوي بيه .
° هي دي؟
_ أيوة يا عم هي ، أي رأيك ؟
° حلوة اوي ، عشت وشفت واحدة قاومت احمد عاصم
_ مش هتطول معايا يخفيف ، شهرين بالكتير وهتطب
° بس شكلها جد اوي ، مش هتعرف تيجي معاها سكة
_ عيبة في حقي الكلمة دي ، اتفرج وهتشوف ، خليك انت في المدرجات وشجع
° العب هنرجع للمجد تاني ؟ ، طب اقولك ، رهان علي خمس تلاف وسهرة عندي علي اليخت
_ انت فارد نفسك اوي لي؟
° عشان النوعية دي انا عارفها كويس ، مش هتيجي غير دوغري ، مقابل دا بقي يحلو لو خسرت هاخد عربيتك الجديدة شهر
سكتت شويه ° أي خايف تخسر ؟
_ مبخسرش ، اتفقنا
° بس حلو اوي الدخلة الي دخلتها عليها انك طيب وبتساعد وعاوز مصلحتها
_ أي رأيك ؟ قولت مستحيل تيجي بالدخلة القديمة ف قولت ادخل بالتقيل ، بس عاوز الحق؟ هي عجباني
° اقسم بالله ؟؟ طب حاسب بقي لا انت الي تطب
_ بقولك أي انزل من علي ودني ويلا عشان نشوف شغلنا
خلصت شغل أخيراً! الساعة كانت جت عشرة ، بدأت ألم حاجتي واحطها في شنطتي ، خلصت ونزلت استني ميكروباص _ مريم ازيك ؟ واقفة عندك بتعملي اي؟
= هو مفيش مواصلات بتعدي من هنا خالص!!
_ للاسف لاء والموقف بعيد شويه عن هنا
= خلاص تمام ، هطلب اندريفر
_ لاء اركبي اوصلك ، ممكن يتأخر لحد ما يجيلك عشان المكان هنا بعيد
= مش عاوزة اتعبك ، كفاية الي عملته
_ مفيش حاجة والله ، اركبي
ركبت = انت طيب اوي يا احمد ، ربنا يقدرني واعرف ارد أي حاجة من الي عملتها
ساق وفضلنا ساكتين قطع صمتنا كلامه _ الشغل عجبك؟
= هو حلو بس تقيل اوي
_ واحدة واحدة هتتعودي عشان لسه في الاول بس ، أنا كنت زيك كده ومكنتش متخيل اني ممكن ابقي مدير فرع اصلا
= عشان انت طيب وابن حلال ف ربنا بيكرمك ، وممكن تبقي مدير الشركة كلها في يوم مين عالم
سكت ف استغربت = أنت كويس؟
_ ها ، أيوة ، وصلنا
نزلت من العربية = شكراً اوي
_ انتي متخيلة قولتيلي كام شكراً النهارده ؟
ضحكت = تصبح على خير
_ وانتي من أهله
طلعت وقعدت اتكلم مع ماما واحكيلها اليوم كله، كانت فرحنالي اكتر مني ، هي كانت اكتر واحدة عارفة أنا عافرت قد أي عشان اشتغل ، وشاهدة علي كل محاولاتي الي منجحتش في ولا واحدة فيهم ، وعلي عياطي في ليالي كتير عشان فشلت ، كان لازم اشاركلها كل حاجة بالتفصيل زي ما اتعودت ،
° ابن حلال اوي ، ربنا يوقفله ولاد الحلال
_ يارب يحبيبتي ، بس انا بجد مش عارفة اردله كل دا ازاي
° أي رأيك تعزميه عندنا علي الغدا واهو اتعرف عليه واشكره أنا كمان؟
_ بجد يماما؟
° اه والله ، اعزميه يوم الخميس إن شاء الله
_ ماشي يحبيبتي ، يلا ننام احنا اتأخرنا اوي ، تصبحي علي خير
خرجت للشغل بدري عشان اوصل ف ميعادي ، كان طول اليوم مختفي ، فضلت اشتغل لحد ما جه وقت البريك
_ قهوتك اي؟
بصيت قدامي = ياه انت كنت فين؟
_ كان عندي سحلة شغل ومواعيد ، بس سيبك انتي ، اهم حاجة انك خدتي بالك من غيابي
= ها؟ لاء ابداً ، كلنا خدنا بالنا مش المفروض انت الي بتوجهنا؟
_ امممم ، طب قهوتك أي عشان اجبلك معايا؟
= مظبوط
راح جاب قهوة ورجع قعد قدامي = ماما عزماك علي الغدا يوم الخميس الجاي ، مصرة تشكرك بنفسها
_ ملوش داعي والله ، أنا معملتش حاجة
= لا ازاي ، دي مأكدة عليا ف اعمل حسابك بقي
_ متشكر اوي ، إن شاء الله هاجي
قطع كلامنا بنت جت قعدت جمبه
° مبقتش يعني تهتم ب الموظفين القدام ولا راحت علينا خلاص؟ بقوا الجداد الي واخدين عقلك
_ ليلي!!
° اي؟؟؟ كنت عوزاك ف شغل ، دا لو مش هعطلك يعني
= احممم ، طيب انا هستأذن عشان البريك بتاعي خلص
_ مريم استني يمريم
مشيت بسرعة ورجعت ل شغلي ، طلع عارف بنات هنا! وكمان ممكن يكون بيعاملهم زيي؟؟
كان عندي شغل كتير مطلوب يتسلم النهارده ، قعدت خلصته ، أخيراً!! ، خدت نفس ب أريحية ، عمتا الست ملهاش غير بيت جوزها ويارب اتستت بلا شغل بلا وجع دماغ!!
_ مريم مريم؟؟
= نعم؟
_ استني ، كنتي مروحة؟
= اه ، فيه حاجة ؟
_ ممكن اوصلك ؟
= لاء ملوش داعي متتعبش نفسك انا بعرف اروح لوحدي ، وبعدين انا طلبت خلاص اندريفر وزمانه جاي
_ طب هقف معاكي لحد ما يجي عشان محدش يضايقك
= الشهامة دي بقي متوزعة علينا بالتساوي ولا انت بتعمل اي؟ انت بتجيب وقت منين أصلا ؟
_ أنا بجد اسف علي الموقف البايخ بتاع الصبح
= لاء مفيش حاجة ، دي حياتك وانت حر بس ياريت تبقي تعرف البنات الي ليك علاقة بيهم أنهم يحطوا حدود في الكلام شوية
_ أنا عارف اني حياتي بايظة شويه واني طايش حبتين بس انا بجد عاوز اتغير
= الاعتراف بالحقيقه هي أول طرق العلاج ، اظن لو ركزت في شغلك اكتر هيبقي احسن ولا انت شايف اي؟
_ هو انتي حياتك كلها شغل؟ مفيش دم؟
ضحكت = لاء مفيش ، حياتي كلها شغل وماما غير كده متلاقيش
الاندريفر وصل ف ركبت ، أنا لي مضايقة ؟ أنا مالي!! دا واحد عرفاه بقالك فترة صغيرة اوي ، ركزي في حياتك عشان تبقي حاجة وبطلي اوهام وكلام فارغ ميجيبش همه! ، يغير ولا ميتغيرش حاجة متخصكيش!
فوني رن ف رديت _ ازيك يمريم؟
= الحمد لله ، مين معايا ؟
_ أنا احمد
بصيت علي الرقم ورجعت حطيت الفون علي ودني
= وجبت رقمي منين !!!
_ هو انتي فاكرة إنك بتملي بياناتك الشخصية دي عبثاً ؟
= اه يعني خدته من بياناتي؟ طب ومسمعتش عن آداب المهنة؟
_ لاء كنت غايب في المحاضرة دي ، بكلمك افكرك بعزومة بكرة ، ولا كانت عزومة مركبية؟
= لاء متقلقش أنا مبرجعش في كلامي ، تنور في أي وقت
قفلت معاه ، كنت نسيت! ، طلعت بسرعة وبدأت احضر في الاكل عشان اجي بكرة اسخنه بس ، عملت محشي وبشاميل وفراخ مشوية ، غطيت علي الاكل ونمت علي نفسي من كتر التعب ، سندت راسي علي الكنبة ومدرتش ب نفسي غير وماما بتصحيني ، اتأخرت علي الشغل! قومت بسرعة لبست ونزلت ، وصلت لقيت المدير عامل ميتينج للشركة ، دخلت ف كلهم بصوا عليا
_ أنا متأسفة جدا يفندم والله ، إن شاء الله مش هتتكرر تاني
° ادخلي يمريم تعالي
قعدت في كرسي قدامه ف رجع كمل كلامه
° الصفقة دي لازم شركتنا الي تاخدها ، دي من صفقات العمر ، فيه شركة منافسة عارضة مبلغ مغري ف العرض ممكن يروح مننا ، ف لو راح متلوموش الا نفسكم مهما كان الموضوع مستحيل
بدأنا كلنا نبص لبعض ، قربت من احمد وانا مش فاهمة حاجة _ هو الكلام علي اي؟
= أرض عقار لازم تتباع وصاحبها هيدينا ٢٠ في المية لو اقنعنا العميل ياخدها بالتمن الي هو حاطه
_ طب واي المشكلة بقي؟
= فيه شركة منافسة عاوزة تاخد الأرض ب تمن اعلي ولو صاحب العقار خد فكرة الصفقة هتروح مننا ف..
_ مطلوب مننا نقنع العميل أنه يشتري الأرض النهارده وب اسرع وقت عشان احنا الي ناخد النسبة؟
= مظبوط ، ازاي بقي؟ علمي علمك
العميل وصل وقعدنا كلنا في غرفة الميتينج
° أنا مش هاخد الأرض بالسعر الي بتقول عليه دا ، لازم نوصل ل سعر وسط يرضيني ويرضيكم!
_ بس الأرض دي ممكن تجيبلك ملايين!
كلهم بصولي ف اتوترت بس حاولت اتكلم بثقة
_ العقار اكتر حاجة المفروض تستثمر فيها ، يعني ممكن تبني عليها مشاريع تدخلك دخل ثابت كل شهر ، ممكن تبني عليها عمارات ، ممكن مصانع ، وممكن تستني عليها سنة أو اتنين وتبيعها ب ضعف تمنها حالياً
° بس المبلغ كبير اوي
_ لو حضرتك مش قادر عليه خلاص مش مشكلة ، فيه عميل تاني ممكن يدفع الي عاوزينه من بكرة
= نعم؟
خبطت احمد في رجله = ها؟ اه مظبوط
° لاء لاء الأرض دي محدش واخدها غيري
_ وحضرتك عارف المكاسب الي هتجيلك منها في ياريت منضيعش وقت بعض اكتر من كده ولا انت شايف اي؟
سكت شويه ورجع بصلي ° تمام أنا موافق ، فين العقود؟
مضينا الصفقة ، العميل مشي ف المدير ندهلي
° برافو عليكي يمريم ، أنا هصرفلك مكافأة حالا
_ متشكرة يفندم ، بفضل ربنا ثم توجيهات سعادتك
رجعت مكتبي تاني ، من أسعد أيام حياتي!
= انتي محصلتيش!
رفعت وشي وضحكت _ شكرا يا احمد
= الظاهر اني جبت صفقة العمر للشركة وانا مش واخد بالي!
_ ربنا يخليك تسلم ، متنساش ميعاد النهارده
= لاء طبعاً فاكر ، هجيبلك قهوة معايا
فضلنا نشتغل لحد العصر ، خلصنا بدري ومشينا سوا وصلنا ودخلنا البيت ، ندهت علي ماما تتعرف عليه ودخلت لقيت ماما سخنت علي الاكل ف بدأت أحضره في الأطباق ، خلصت وبدأت احطها علي السفرة ، كلنا وقعدنا احنا التلاتة تسلم ايدك يطنط أكلك تحفه
° دا مريم الي طابخة مش أنا
بصلي _ بجد؟ انتي بتعرفي تطبخي؟
= انت أي رأيك ؟
_ لاء والله طباخة هايلة ، تسلم ايدك
= ربنا يخليك ، هروح اعمل شاي
قضي معانا اليوم ، ماما حبيته وفضلوا يتكلموا كتير ، حكالنا عن أهله الي من بلد تانية وأنه عايش هنا لوحده عشان الشغل وبيروحلهم بالعافية كل فترة ، كان عشري ودمه خفيف وطيب متمليش وانتي قاعدة معاه .
_ أنا بجد متشكر اوي علي اليوم دا ، انتي متعرفيش أنا كنت مشتاق لجو العيلة دا ازاي ، مامتك طيبة اوي ربنا يخليهالك ، أنا لازم استأذن
مشي ،كنت لسه باصة ليه وهو بينزل من علي السلم ، أي الهبل دا؟ أنا لي مبسوطة ؟ ولي عوزاه موجود ؟ هو أي الي بيحصل ؟
مواقفنا مع بعض بدأت تزيد لحد ما اليوم عبارة عنه هو! ، بدأ يتغير والكل لاحظ دا ، مفيش بنت بقت تكلمه ، كان بيحدف دبش وتعابير وش تكره الواحدة في اللحظة الي فكرت فيها تفتح معاه حوار!!
بقينا نتسابق مين يحقق تارجيت أعلي ، بقي بيجي معايا اماكني المفضلة ، في ظرف تلت شهور بقي أقرب واحد ليا! مين كان يصدق؟ إن أحمد يبقي.. حبيبي! ، مكنش صعب احب واحد زيه ، مكنتش متخيلة أنني ممكن احب ، كان كل دا بالنسبالي ولا حاجة لحد ما لقيته ، ولقيت معاه كل المشاعر الي حسيتها لأول مرة .
مختفي طول اليوم ، اكيد في مكتبه مسحول في الشغل! ، قررت اروح اساعده عشان خلصت شغلي
كنت لسه هخبط علي باب مكتبه بس وقفني صوت صاحبه ° يا ابن اللعيبة عرفت تكسب الرهان بجد!!
_ وانت أي عرفك؟
ضحك ° المكتب كله واخد باله من التسبيل بتاعك يعم ، وكلهم بيحسدوها عليك ميعرفوش أنه اتفاق!! ، المهم ٥ آلاف هيبقوا عندك بكرة واحلي سهرة في الشالية بتاعي في اليوم الي يعجبك
_ بص يعبدالله هو في الحقيقة..
فتحت الباب فجأة = كان رهان!! ، كنت بتسلي وقتك ؟؟
_ مريم انتي فاهمة غلط
= أنا فعلا طلعت فاهمة غلط ، طلعت مغفلة مكنش ينفع اثق في واحد زيك ، كنت عبيطة اوي ومعمية ،كنت فاكرة انك بني ادم!
كنت بعيط وصوت عياطي بدأ يعلي ، مشيت بسرعة من الشركة ، روحت البيت وقفلت عليا ، فضلت اعيط ومش عارفة اوقف تفكير في الي سمعته ، ازاي كان شاطر كده ؟ ازاي خلاني احبه وكل دا طلع كدب؟ ازاي صدقته؟ ، يارتني كنت فضلت زي منا ، يارتني ما قابلته .
مروحتش الشركة تاني ، كان بيتصل بيا ومش برد ، هيقول اي؟ هيدافع عن نفسه ازاي ؟ هيكدب تاني! ، مع اني كنت محتاجة اسمع منه أي مبرر عشان اقلل الاحساس الي حساه دلوقتي .
° مريم اطلعي من الأوضة
_ معلش يماما سبيني اليومين دول
° فيه حد عاوز يشوفك
_ حد؟ حد مين؟
° البسي الاسدال بس واطلعي
_ يماما أنا..
° عشان خاطري اسمعي الكلام
قومت من السرير ولبست الاسدال وطلعت ، لقيته في وشي! _ انت ؟ انت الي جابك هنا؟
= انتي لازم تسمعيني
_ أنا مش عاوزة اسمع منك اي حاجة ، ومعتش عاوزة اشوف وشك ، ارجوك تمشي
= أنا هعملك كل الي انتي عوزاه بس مش همشي غير لما تسمعيني يمريم ، اديني فرصة ادافع عن نفسي
° طب هروح اعملكم شاي
رجعت بصتله _ تدافع عن نفسك؟ هتقول اي؟ انك كداب ؟ أنك اسهل حاجة عندك الي عملته؟ مكنش ينفع اتخدع فيك ، أنا بجد ندمانة اني عرفتك يا احمد
= لاء يمريم ، انتي انضف واحلي حاجة حصلتلي في حياتي ، غيرتيني من انسان تافه لواحد شايف الدنيا حاجة تانية ، أنا مش هنكر الي سمعتيه بس دا والله قبل ما اتغير ، ومش هنكر إن كل افعالي معاكي في الاول عشان اعرف اوقعك ، بس بعد ما دخلت البيت دا وعرفتك وعرفت قد أي انتي ست مفيش منك ولا هعرف ألاقي واحدة زيك ، شوفت ساعتها اني مينفعش ارد كل دا ب الي بعمله واتغيرت ، اتغيرت والله يمريم وانتي عارفة كده ، أنا مش هينفع اخسرك ، أنا بحبك ، بحبك وعاوزك معايا ، مش هينفع ابص جمبي ملاقيكيش ، انتي الست الوحيدة الي حبيتها وكنت عاوز افضل معاها متحركش ، سامحيني يمريم لو فيه اي حاجة حلوة بينا سامحيني
_ خلصت؟ ، ياريت تمشي دلوقتي من فضلك
= مريم أنا مش هبطل احاول ، وهعمل كل حاجة عشان تسامحيني وتوافقي تتجوزيني
_ اتجوزك؟؟ يبقي بتحلم نجوم السما اقربلك يا احمد
مشي ، رجعت عيطت ، جزء مني مصدقه وجزء رافض ينسي الي حصل ،
رجعت الشركة تاني ، اعتذرت للمدير عن غيابي ف قالي إن احمد كان مقدمله إجازة مرضي ليا!
رجعت قعدت علي المكتب ، كان لازم اسيب الشغل اوي يعني؟ مين هيخلص كل الشغل دا !!!!
عم ابراهيم معلش مج قهوة ، أيوة مج مش فنجان وياريت تحطلي فيه سم فيران عشان اخلص
بدأت اشوف الشغل وشوية لقيت صنية اتحطت قدامي فيها خاتم وجنبها القهوة
_ عم ابراهيم حوش الي وقع منك
= اقسم بالله ؟ انتي مبتفهميش؟
_ أحمد !!!! خير عاوز اي؟
= عاوز اي !! الخاتم مش جايب معاكي سكة؟
_..
= حقك عليا والله ، سامحيني بقي حرام عليكي انتي اييييي
_ يعني هيجي اليوم الي هنتقاسم فيه القلق والشغل؟
ابتسملي = اه
_ وربنا ما حد واخد القلق غيري ، ربنا يعينك علي الشغل
المكتب كله بدأ يسقف وهو بيلبسني الخاتم! ، عشت حلمي بس المرادي وانا واثقة اني اختارت صح ، اختارت راجل طيب ، اطيب راجل في الدنيا .
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
