رواية الضحية الفصل الرابع بقلم امل عبدالرازق
- لبنى نادت على محمود قبل ما يدخل شقته وقالتله : بعد اذن حضرتك يا بابا عايزه اتكلم معاك في موضوع مهم
- محمود: طب الموضوع دا ميستناش لبعد صلاة المغرب اكون خدت شاور واتغديت ونمتلي ساعة، زي ما انتِ شايفه لسه راجع من المدرسة حالا
- لبنى: لأ يا بابا الموضوع دا مهم ولازم اتكلم معاك فيه وحالا كمان، وياريت توطي صوتك عشان فريده متحسش انك رجعت من المدرسة وتسمع كلامنا، تعالى ندخل شقتي نتكلم فيها براحتنا
- محمود: في ايه يا لبنى قلقتيني يا بنتي، فيها ايه لما فريده تعرف ان انا رجعت، خير ان شاء الله يا لبنى
- لبنى: طب يا بابا ادخل الشقة نتكلم جوا؛ لأن الموضوع دا حساس و انا اصلا خايفه اتكلم مع حضرتك فيه، بس لازم اريح ضميري واقولك
_______
- ليلى: الوو يا فريده عامله ايه يا حبيبتي، طمنيني عليكِ يا قلب امك
- فريده: الحمد لله انا بخير يا ماما، طمنيني عليكِ انتِ وعلى اخواتي البنات، و بيذاكروا ولا لأ
- ليلى: انتِ بجد كويسة يا فريده، ومحمود كويس معاكِ
- فريده: والله يا ماما انا كويسة خالص ومحمود طيب جدا وبيعاملني كويس
- ليلى: ربنا يطمن قلبك يا بنتي ويكون محمود عوضك الجميل في الدنيا، اخواتك كويسين خالص الحمد لله
- فريده: يا رب يا ماما، مش هتيجي بقى تتغدي معايا يوم انتِ واخواتي، انتو وحشتوني اوي
- ليلى: انتِ عارفه ابوكي يا بنتي، مش هيوافق ان انا اجي، انا ما صدقت انه خرج عشان ارن عليكِ واطمنك علينا واطمن عليكِ، بالله عليكِ يا بنتي ما تزعلي مني
- فريده : انا عذراكي يا ماما، ان شاء الله هقول لمحمود يجيبني عندك يوم من أوله، اهم حاجه تخلي بالك من نفسك ومن صحتك
______
- نورهان: ما بلاش موضوع خطوبتك منها دا يا رامز، لبنى مقفوله من فكرة الجواز دلوقتي، خلينا كدا حلوين، وبعدين انت ايه اللي جابك عند بيتهم مش خايف حد يشوفنا مع بعض هنا يا غبي
- رامز: هي فعلا مش وقتها وبعدين الموضوع محتاج تخطيط، المهم خلصي حوار مرات ابوها بسرعة عشان انا عايز فلوسي، تعالي نمشي من هنا نقعد في اي كافيه
- نورهان: حاضر، بس تعرف يا رموزتي انت دماغك دِ مافيش زيها، فكرة ان انا اكلمك من رقمها و ارسل ليك صور ليها من على الواتس بتاعها فكرة حلوه وذكية، اهي هتلبس في الحيطة ولسه مكملتش اسبوع
- رامز: طبعا يا بنتي هو انا اي حد ولا ايه، المهم الخطة تنجح، وانا فبركت ليها شوية صور عسل، مقولتيش ايه رأيك فيهم
- نورهان: خطتنا هتنجح انا قلبي حاسس، والصور لو مكنتش عارفه انك اللي عاملها كنت صدقت انها حقيقية، المهم خلي موبايلك في ايدك عشان لو والد لبنى رن عليك من موبايل فريده يتأكد من كلامنا لازم ترد عليه كأن فريده هي اللي رنت
- رامز: ايوه طبعا، هرد واقول ايوه يا فريده يا حبيبتي وحشتيني، اكيد لسه الغبي جوزك موصلش، وحشتيني في الكام دقيقة دول
- نورهان: هناخد اللي وراهم واللي قدامهم وهنعيش ملوك يا رموزتي، وقتها اول واحده هطيرها من طريقي هي لبنى الغبية
______
- محمود كان مصدوم من الكلام اللي سمعه من لبنى وبقى مش مستوعب اي حاجه ورد عليها وقالها: انتِ متأكده من الكلام اللي بتقوليه دا يا لبنى، متأكده ان فريده بتخون ابوكي اللي هو انا
- لبنى: متأكده من الكلام اللي سمعته زي ما انا متأكده ان انا شايفه حضرتك قدامي
- محمود: لا حول ولا قوة الا بالله، انا لله وانا اليه راجعون اللهم أجرني في مصيبتي، دِ مكملتش في بيتنا اسبوع، لحقت تعرف راجل تاني، دِ مطلعتش من باب البيت اكيد في حاجه غلط
- لبنى: لأ يا بابا اكيد تعرف الراجل دا من زمان، انا زي ما قولت لحضرتك كنت ناسيه حاجات ليا عندك في الشقة بعد ما روقتها انا نورهان في اليوم اللي مراتك جيت عندنا فيه، قولت اسيبكم على راحتكم اول اسبوع فسمعت صوت الباب النهارده بيتفتح قولت يبقى بابا خرج، طبعا انا معايا نسخة من المفتاح بتاعك زي باقي المفاتيح اللي حضرتك سايبها معايا ما عدا شقة كريم، ففكرت ان فريده نايمه لسه فقررت افتح الباب بالراحة اجيب حاجتي و اخرج وبلاش ازعجها، وبالفعل عملت كدا وهي محستش بوجودي
- محمود: هي كانت فين لما انتِ فتحتي الباب ودخلتي يا لبنى
- لبنى: كانت في الاوضة وقافله الباب على نفسها وبتضحك بصوت عالي جدا وبتقول للي بتتكلم معاه خلاص محمود خرج ومش راجع الا بعد العصر، وهفضل اكلمك طول الوقت دا، اصلا جوازي منه عشان فلوسه ومتخافش هعرف أضحك على الراجل دا كويس اوي، ومعلش يا حبيبي انا لازم أقرب منه عشان خطتنا تنجح واحسسه اني بحبه ومش فارق معايا الفلوس عشان اكسب ثقته
- محمود: فريده قالت كدا يا لبنى
- لبنى: ايوه يا بابا، انا انصدمت زيك كدا، اول ما شوفت البنت دي وانا قلبي اتقبض، مكنتش طايقاها يا بابا، واحده صغيرة وحلوه زيها تتجوز راجل في نفس عمر ابوها ويمكن اكبر كمان
- محمود: كملي يا لبنى اللي حصل
- لبنى: خرجت من الشقة وقفلت الباب بالراحة خالص، وروحت شقتي وبدأت اعيط بس نورهان صاحبتي فضلت جنبي انا مش عارفه من غيرها كنت هعمل ايه
- محمود: هي نورهان صاحبتك كانت معاكِ، وعرفت بقى باللي حصل ولا لأ
- لبنى: ايوه طبعا يا بابا ومن غيرها مكنتش هعرف اثبت حاجه على مدام فريده، بسبب مساعدتها انا عرفت اللي ورا البت اللي انت جايبها مكان امي
- محمود: انا مش مستوعب اللي حصل من فريده، شكلها ميقولش كدا خالص، اللي يشوفها يقول دِ بنت بريئة ومخلصة، طالما مش عايزه تتجوزني وافقت عليا ليه، انا اكتر حاجه اكرهها الكذب والغدر والخيانه، لو حتى بنتي كانت هي اللي بتكذب عليا وخانت ثقتي فيها صعب اسامحها لو حصل ايه، قوليلي نورهان ساعدتك ازاي
- لبنى بان عليها التوتر وخدت نفس عميق وردت على محمود وقالتله: عشان انت طيب ونيتك صافيه ربنا كشفها، نورهان قالتلي اروح اخبط عليها واقولها ان ليا حاجات جوه واسلم عليها طبعا، واقولها ان رصيدي خلص ومحتاجه اعمل مكالمة منه ضروري، وكدا نعرف ندور فيه وممكن نمسك عليها حاجه
- محمود: طب وفريده مش عامله باسورد لموبايلها، عرفتوا تفتحوه ازاي، لو عرفتوا تفتحوه مسكتوا عليها حاجه
- لبنى: هي وافقت ان انا اخد الموبايل وقولتلها تلغي الباسورد عشان لو الموبايل قفل مني اعرف افتحه، وبالفعل عملت كدا، خدت الموبايل وفتحت الواتس والماسنجر ولاقيت عليها صور ليها بلبس البيت وكلام وتسجيلات ليه بصوته وصور ليه كتير بقى ، كله على موبايلها، وانا صورت الحاجات دي على موبايلي عشان بردو لو مش مصدقني
- محمود: فريده ساذجه جدا، يعني توافق انك تاخدي الموبايل قولت ماشي، إنما تلغي الباسورد وتسيب الرسايل دي عليه! يعني مش خايفه مثلًا إنك تشوفيها؟!
- لبنى: ربنا أراد انه يكشفها، وبعدين انا فاجئتها بطلبي وهي طبعا عشان تكسب حبك لازم ترضيني واكيد مستحيل تتوقع ان انا اخد الموبايل عشان اكشف حقيقتها، وكل كلامها مع الولد دا النهارده بس يعني بتحذف الشات دايما
- محمود: ربنا كشفها وانا عارف هاخد حقي منها ازاي، عموما يا لبنى اوعي تتكلمي في الموضوع دا مع حد، لأن مهما كان دي بنت زيها زيك وحرام تتسببي في فضيحتها، ووجود نورهان في بيتي انا معترض عليه بس انتِ عملتي اللي في دماغك وانا ساكت عشان ارضيكِ، لكن تجيب شاب تقابله في بيتي دا مسمحش بيه نهائي
- لبنى: شاب! شاب مين يا بابا؟
- محمود: الكاميرات اللي قدام البيت جابتها الصبح تقريبا الساعة ١٠ واقفه مع شاب قدام البيت اتكلموا شوية ومسك ايدها وخدها ومشى
- لبنى: و انت عرفت منين يا بابا
- محمود: انتِ عارفه ان انا منزل ابليكشن من خلاله بقدر اوصل الكاميرات بالموبايل عشان اعرف اتابع كل حاجه في غيابي، عموما في شوية حاجات وصلتني بخصوص نورهان، قريب اوي هعرف كل حاجه ووقتها الكلام هيختلف
- لبنى: زمانه اخوها الصغير يا بابا، هي قالتلي انها رايحة تجيب ليهم شوية حاجات للبيت، سيب نورهان في حالها دي غلبانه انا ماليش غيرها، كفايه انها بتحبني
- محمود: عموما متثقيش فيها اوي كدا، هي مش موضوعي دلوقتي خليني في فريده لحد ما اعرف هي عايزه مني ايه، اوعدك مش هسيب حد مش كويس يدخل البيت دا
________
- شاكر: إلحقيني يا ليلى مش قادر أقف على رجلي، حاسس ان جسمي كله وارم وبالذات رجلي ومش عارف أقف عليها، مش عارف اتنفس كويس ومشوش، كل شوية استفرغ والمسكن بقى مش جايب نتيجة وحاسس ان ضربات قلبي مش مظبوطه
- ليلى: مالك يا شاكر فيك ومال وشك اصفر كدا ليه، بنتك منه بقالها اكتر من شهر بتقولك روح اكشف جسمك وارم وانت ولا هنا، مستخسر فلوس الكشف، يا راجل دا انت معاك فلوس توزن اتنين منك، حرام عليك هتتحاسب، كل شوية تاخد حبوب تسكن الوجع شوية وتأثيرها يروح بعد شوية اهي مبقتش جايبه نتيجة
- شاكر فقد توازنه ووقع على الأرض واخر جملة قبل ما يفقد الوعي قولي لفريدة تسامحني وسامحيني انتِ والبنات يا ليلى انا سايب ليكم فلوس كتير
_______
- فريده: مالك يا محمود من ساعة ما رجعت من برا وانت متجنبني خالص ومش بتتكلم معايا يا دوب قولت السلام عليكم وبقالك اكتر من ساعة ساكت، في حاجة حصلت في المدرسة ضايقتك؟
- محمود: انا كويس يا فريده، انا فعلا متضايق شوية، متشغليش بالك انتِ بيا
- فريده: اتكلم معايا يمكن ترتاح او ممكن مثلا اقدر اساعدك، عندي خبر حلو هيفرحك
- محمود: خير ان شاء الله، ايه الخبر اللي هيفرحني
- فريده: لبنى جيت الصبح خبطت عليا بعد ما انت مشيت وحضنتني سلمت عليا وتقريبا بدأت تتقبل وجودي و ان شاء الله هنبقى اصحاب، انا فرحانه اوي وبفكر اروح انادي ليها تتغدى معانا وانت ترن على كريم يجي هو كمان، نفسي نبقى أسرة واحده كلنا ونحب بعض ونخاف على بعض، وكمان نفسي اتعرف على خطيبة كريم اوي اوي
- محمود: فين موبايلك يا فريده
- فريده: موبايلي! ليه بتسأل على موبايلي يعني
- محمود: مالك مستغربه كدا ليه، هو عيب يعني اسأل على الموبايل ولا اي، انا عايز موبايلك اشوف فيه حاجه مهمه، وبعدين انا جوزك يعني عادي أسألك عليه مافيش مشكلة ولا انتِ شايفه ايه
- فريده: مش قصدي، انا بس استغربت الكل عايز موبايلي النهارده، حتى لبنى خدته الصبح اكتر من ساعتين كانت عايزه تعمل مكالمة مهمة و انت دلوقتي عايز تشوف فيه حاجه مهمة، عموما ثواني هجييه من الاوضة
- محمود: قوليلي هو فين بالظبط وانا هجييه لنفسي وروحي انتِ جهزي الاكل
______
محمود جاب الموبايل وشاف اخر رقم فريده اتكلمت معاه رقم مامتها وقبل رقمها كان في رقم غريب مدة المكالمة بينها وبينه اكتر من ساعه ونص فقرر يرن عليه
- رامز: ألو يا قلبي وحشتيني اوي في الشوية دول، ايه لسه المغفل جوزك موصلش ولا ايه، فوفو قوليلي صحيح هتقدري تخرجي من البيت امتى عشان وحشتيني
- محمود سمع كلام رامز وكدا اتأكد من كلام بنته وعرف ان فريده خاينه، قفل المكالمة مع رامز وبدأ يفتح الواتس وشاف ما لا يسر القلب أبدًا، شاف مراته مكلمة راجل غريب وأرسلت ليه صورها بلبس البيت - طبعا خلينا عارفين ان الصور المفبركة رامز ارسلها ليهم وبعد كدا ارسلوها من موبايل فريده ليه - ومع كل اللي محمود شافه لسه عنده احساس جواه بيقوله ان فريده مستحيل تعمل كدا وانها بريئة وبعدين هي محاولتش تقرب منه زي ما لبنى قالت بالعكس كل واحد فيهم ملتزم بوعده مع التاني، قرر في الآخر انه هيواجهها قبل ما ياخد اي قرار يخليه يندم بعد كدا، ما هو لازم الإنسان يتأنى ويفهم كويس ويسمع من كل الأطراف
- فريده بصوت حزين: محمود انا جهزت الاكل وهيبرد
- محمود عرف انها زعلانه بسبب طريقة تعامله معاها وقالها: تعالي يا فريده شوفي كدا الصور اللي على موبايلك دي
- فريده خدت الموبايل من محمود وهي مستغربه كلامه لكن اول ما مسكت الموبايل عيونها وسعت وبقت مصدومه من اللي هي شيفاه وصوت نفسها بقى مسموع وقالت بصوت مهزوز: محمود والله العظيم انا مش عارفه حاجه، دي مش صوري والله، اقسم بالله ما انا يا محمود، انا حاسه ان قلبي هيوقف، انا عمري ما اتجرأت حتى أتصور كدا
- محمود: لأ يا فريده دا انتِ لبستي واتصورتي والصور ارسلتيها لراجل كمان، دا انا اللي المفروض جوزك محترمك ومقدرك ومفكرتش حتى اشوفك بالصوره دي، عشان انا وعدتك انك زي بنتي، إنما تغدري بيا وتخونيني يا فريده دا اللي مستحيل اسمح بيه، يعني دا جزائي منك في الآخر!
- فريده بدأت تعيط بحرقة ووجع وقالتله: والله العظيم انا ما اعرف حاجه عن الموضوع دا، انا مظلومه يا محمود، طب انا اعمل كدا ليه؟ دا انا حتى موافقة عليك بكامل ارادتي، والله يا محمود قلبي كان بدأ يحبك ويطمن ليك، انا عمري ما اكون خاينه، انا معملتش اللي انت بتقوله اقسم بالله، مستحيل اغضب ربنا بكبيرة من الكبائر يا محمود، انا مستحيل اسيب الجنة واختار النار
- محمود بصوت عالي: ما اللي هيجنني اني حاسس انك متعمليش كدا، بس تبرري ب ايه وجود الصور دي على موبايلك، وكمان كلامك المكتوب دا، والراجل اللي رنيت عليه ومفكر انك انتِ اللي بتكلميه وبيقولك وحشتيني وجوزك المغفل فين، انا هتجنن
- فريده فقدت توازنها وقعدت على الأرض وبدأت ترتعش وضمت جسمها ليها وقالتله وهي بتعيط: والله انا مش عارفه رقم مين وراجل مين اللي بتتكلم عليه، انا بريئة من كل الظلم اللي وجهته ليا، انا معرفش حاجه، انا مش عارفه مين الراجل ولا فاهمه حاجه، والله انا عندي الواتس دا عشان شغلي بس وبتواصل مع المُعلمات عليه، والله انا ما عملت غير كدا، حتى مافيش معايا أرقام رجاله غير اهلي، انا مستحيل اعمل كدا! مش انا يا محمود والله، انا.. انا اللي هتجنن انا مش عارفة ازاي الحاجات دي على تليفوني وازاي وشي على حاجه زي كده، لكن والله انا بريئة معملتش حاجه من دي
- محمود قعد جنبها على الأرض وخدها في حضنه وبدأ يمسح دموعها وقالها: اهدي يا فريده، انا عارف انك بريئة، عشان خاطري اهدي ومتعمليش في نفسك كدا انا خايف يجرالك حاجه، لو مشيت ورا الصور والرسايل كدا انتِ انسانه خاينه ومش كويسة، بس ربنا رزقنا بعقل نفكر بيه والحاجات دي كلها حصلت النهارده وكلها مع بعض، قوليلي يا فريده لبنى جيت خدت الموبايل منك امتى
- فريده بعدت عن محمود وقالتله وهي لسه مش قادره تتحكم في دموعها: جيت بعد ما انت مشيت علطول وانا لاغيت الباسورد عشان تتكلم براحتها ومنين ما الموبايل يقفل منها تعرف تفتحه، اكيد لو انا بعمل حاجه غلط كنت مستحيل ألغي الباسورد او حتى اسيبها تاخد موبايلي وتمشي
- محمود: والموبايل فضل معاها اد ايه بعد ما خدته
- فريده: تقريبا ساعتين او اكتر
- محمود بدأ يفكر بصوت مسموع: يعني الرسايل دي كلها اترسلت في الوقت اللي كان الموبايل مع بنتي فيه، انا غيرت كالون الباب قبل ما انتِ تيجي البيت بيوم ولبنى بنتي كانت برا، وهي قالتلي انها دخلت الشقة تروقها مع صاحبتها وكمان نست حاجه ليها، وجيت النهارده فتحت الباب بالراحة عشان تاخد حاجتها وسمعتك بتتكلمي وحصل اللي حصل وخدت الموبايل منك وشافت الحاجات دِ، اللي اصلا مرسوله في الوقت اللي الموبايل كان معاها فيه، بنتي متعرفش تعمل القرف دا من نفسها كدا، بنتي في حد لاعب في دماغها، انا واثق من برائتك وعارف ان الصور دي مفبركة، حقيقي يا فريده انا مش عارف اعتذرلك ازاي
_________
- منه: طمنا يا دكتور بابا ماله
- الدكتور: للأسف والدك عنده فشل كلوي وحالته الصحية متدهورة جدا، لازم يغسل كلى وكمان محتاج رعاية شديدة، ولو في حد ممكن يتبرع ليه بكلية هيرحمه من العذاب اللي هيشوفه
ليلى قلبها وجعها لما سمعت كلام الدكتور وقالتله: لا حول ولا قوة الا بالله، انا لله وانا اليه راجعون، اللهم أجرني في مصيبتي، والحل يا دكتور دا كله متبهدل اوي
- الدكتور: الحل انه يغسل كِلى وتخلوا بالكم منه وادعوله ربنا يعينه ويشفيه
شاكر كل اللي على لسانه جملة واحده وهي : انا عايز اشوف فريده انا عايز اشوف بنتي خلو فريده تسامحني انا ظلمتها وربنا بياخد حقها مني
_______
- فريده خدت نفس عميق وقالتله: انا عشان ماليش حد بيحصل فيا كدا، انا عشان ضعيفه بتظلم، انا هحبس بنتك واللي معاها، انا مش هسكت المره دي عن حقي، انا ليا ربنا واكيد هينصرني، انا يتكلموا في شرفي وأخلاقي، مش هسكت عن حقي والبيت دا مش هقعد فيه دقيقة بعد كدا، لو هعيش في الشارع، انا ايه عندي اغلى من شرفي، ربنا مش هيسيب بنتك وهيترد ليها كله ما هي الدنيا داين تدان
- محمود: لوحدك ازاي يا فريده و انا روحت فين، اوعدك حقك هيرجع، بس عشان خاطري بلاش تفضحي بنتي وتعملي مشاكل ليها ولنفسك معاها، ارجوكي يا فريده بلاش، انا فسدتها بدلعي قولت يمكن متأثره بالتنمر اللي اتعرضت ليه، يمكن موت امها عامل فيها كدا، مش بترضى تروح لدكتور نفساني ولا راضية تعمل عملية عينيها، تعبتني معاها وكل يوم بتفسد اكتر، انا عرفت كلام مش كويس عن البنت اللي هي مصاحباها، هوقعهم في شر اعمالهم يا فريده، ارجوكي ثقي فيا وانا هجيب حقك بس ساعديني
- فريده: وانا هساعدك ازاي وهما دلوقتي بيخططوا يخربوا حياتي كلها ويقضوا عليا
- محمود: خلينا نحسسهم ان خطتهم نجحت وانا هخليكي تروحي عند اهلك يومين تريحي أعصابك او اخدلك شقة في اي مكان تشاوري عليه، عشان بس اعرف ادور وراهم كويس، دول شوية عيال فاسده بيلعبوا وبنتي منهم و....
- قاطع كلام محمود رنت موبايل فريده وقالها: دا رقم منه اختك
- فريده قلبها اتقبض وقالت: يا رب يكون خير، الو يا منه عامله ايه يا حبيبتي
- منه كانت بتعيط وقالتلها من وسط دموعها: تعالي يا فريده المستشفى بسرعة بابا تعبان وحالته صعبه وعايز يشوفك
- فريده بخوف: ماله بابا يا منه، في ايه يا منه طمنيني
- منه: تعالي المستشفى بسرعة ولما تيجي هتعرفي كل حاجه، هبعتلك العنوان في رسالة على الواتس
- محمود: خير يا فريده في ايه، ماله والدك
- فريده: منه بتقول بابا تعبان وحالته صعبه وعايز يشوفني ، بالله عليك وصلني المستشفى اللي هو فيها
- محمود : بعد كل اللي عمله معاكي وخايفه عليه كدا
- فريده: دا ابويا، عارف يعني ايه ابويا، يعني مهما حصل هيفضل اول راجل في حياتي وهو سبب وجودي في الدنيا بعد ربنا، مهما حصل منه علمني وحافظ عليا من الشارع وجوزني جوازات حلال وكان بيجهزني زي اي عروسة، حتى لو كان قاسي بس من اكيد بيحبني لأني بنته، كنت لما تضيق بيا الدنيا مش بلجأ غير لبيتنا، اي حد يتعوض الا الاب والام والاخوات، ربنا وسيدنا محمد صلى الله عليه وسلم وصوني ب امي وابويا حتى لو كانوا كافرين لازم ابرهم، بالله عليك وصلني ليه بسرعة
- محمود: غيري لبسك بسرعة وانا هشغل العربية وهوصلك حالا
_____
- لبنى اول ما سمعت صوت باب شقة محمود بيتفتح فتحت بابها وقالت ل ابوها: رايح فين يا بابا
- محمود: كل حاجه انكشفت يا لبنى ورايح اوصل فريدة لبيت أهلها
- لبنى قالت بشماته وهي حاسه بلذة الانتصار: ايوه كدا خلي البيت ينضف من الأشكال دي
- الجملة زعلت محمود ورد عليها وقالها: هو فعلا هينضف وقريب اوي
خرجت فريده بعد ما لبست طرحتها وبصت للبنى بحزن وعيونها وارمه من العياط وقالتلها: حسبي الله ونعم الوكيل، ربنا بينصر البريء دايما وسابتها ونزلت
______
- لبنى: كنتي فين يا نورهان كل دا
- نورهان: يااااااه لو تشوفي فرحة اخواتي بالأكل واللبس، امي بتدعيلك بدعيلك من قلبها يا لبنى، كان نفسي بجد تكوني موجوده وتشوفي الفرحة في عيونهم وازاي فلوسك كانت سبب في سعادتهم
- لبنى: فرحتي قلبي يا نورهان، دي فلوسك انتِ يا حبيبتي مافيش فرق بينا، المره الجايه انا لازم اجي معاكي اتعرف عليهم، انا حبيتهم من غير ما اشوفهم
- نورهان: اسكتي يا لبنى مش في واحد كلمني وقالي انه عايز يتقدملك وشكله بيحبك اوي كمان
- لبنى: انا مش بحب السيرة دي يا نورهان، اكيد مرفوض من غير ما اشوفه اصلا، المهم خطتنا نجحت
- نورهان: طب شوفي صورته الأول وبعد كدا ابقي احكمي عليه وبعدين انتِ مش هتفضلي قاعده كدا لازم تتخطبي وتفرحي، قوليلي بقى ايه اللي حصل
- لبنى: بابا صدق كلامي كله والنهارده راح يوصل فريده عند اهلها كان شكلها متبهدل جدا، انا فرحانه اوي اوي
- نورهان: انا بجد فرحانه ان احنا نجحنا، لازم رامز ياخد حلاوته بقى عشان من غيره احنا كنا هنضيع، هو مستحيل كان يعمل كدا ولا دي أخلاقه بس اتنازل المره دي عشانك، وهو بردو العريس يا لولو، بيحبك يا لبنى اوعي تضيعيه منك
- لبنى: طب سيبيني افكر يا نونو، خلينا نحتفل بقى بنجاح خطتنا
______
- شاكر: سامحي ابوكِ يا فريده، انا ظلمتك كتير يا بنتي حقك عليا، انا اسف على كل اللي صدر مني، انا غلطان في حقك يا حبيبتي، انا ظلمتك وظلمت امك واخواتك وكنت عايزه اطلع من وراكي ب اي مصلحة
- فريده: متتعبش نفسك وتتكلم كتير يا بابا عشان صحتك، انا مسامحاك من قلبي واكيد كلنا مسامحينك بس انت قوم لينا بالسلامه
- شاكر: ربنا بياخد حقك مني في الدنيا ولسه لما اروح عنده هتقتصي مني هناك على كل اللي انا عملته فيكي
- فريده: ازاي تقول كدا يا بابا، انا مسامحاك والله، انا بس كان نفسي احس بحنانك عليا وحبك ليا، كان نفسي تحتويني، بس امي عملت اللي عليه، والمهم انك عرفت غلطك استغفر ربنا وردد دعاء سيدنا يونس وقول لا اله الا انت سبحانك اني كنت من الظالمين
- شاكر: لا اله الا انت سبحانك اني كنت من الظالمين، ربنا يسامحني ويعفرلي، انا ليا حساب في البنك وعامله ب اسمك يا فريده، متستغربيش، انا عارف ان انا بخيل ودي أسوأ صفة في اي انسان، البخل مرض وقرف للانسان واللي حواليه، بس انا كنت عارف ان الفلوس دي كلها هتكون ليكم في الاخر
- فريده: طب ارتاح يا بابا وكل حاجه هتكون كويسة، قولي يا دكتور ايه الإجراءات اللي لازم اعملها عشان اتبرع لوالدي بكليتي
- شاكر كان تعبان وصوته مجهد وقالها: مستحيل يا فريده، انا مش هسمح بكدا ابدا، انا مش هطول في الدنيا يا بنتي، انتِ لسه صغيره والعمر قدامك، حافظي على نفسك انا مش عايز حاجه غير انك تسامحي ابوكي بس
- الدكتور : ثانية واحده يا جماعة الدكتور اللي كان هنا قبلي وشخص الحالة شخصها غلط، هي الكلية فعلا تعبانه واكيد من كتر العلاج والمسكنات، بس الحمد لله مش فشل كلوي هو بس محتاج يتابع مع دكتور متخصص ويخلي باله من نفسه ويشرب ميه كويس
- فريده بسعادة: بتتكلم جد يا دكتور
- الدكتور: ايوه والله ربنا سترها معاه، بس محتاج يخلي باله من صحته ويوقف الحبوب وياكل اكل صحي ويلتزم بتعليمات الطبيب
- ليلى: اللهم لك الحمد والشكر، الحمد لله رب العالمين، شكرا يا رب على كرمك، الحمد لله حمدا كثيرا طيبا مباركا فيه، شايف ربنا حنين عليك ازاي يا شاكر، ياريت سكون دا درس ليك وتتعلم منه، انت مش ضامن عمرك وفي أي لحظة ممكن ساعتك تيجي، شوف فريده كانت مستعدة تعمل ايه عشانك
- شاكر مسك فريده من ايدها وشدها لحضنه وقالها: اوعدك اني هتغير وهعوضك انتِ و اخواتك عن كل لحظة اتوجعتوا فيها، انا عارف انك اكتر واحده إتأذت، انا اسف يا بنتي احساسي بالذنب بياكل في قلبي، انا جيت عليكي
- فريده عيطت في حضن ابوها وقالتله: انا كنت محتاجاك اوي يا بابا، المفروض اهرب من الدنيا وقسوتها و اتحامى فيك! بس كان الوجع منك انت، كسرتني يا بابا وبسببك بقيت ضعيفة وهشة وأي حد بقى بيجي عليا، مكنش ليا ضهر بالرغم انك كنت موجود، ومع كل دا اول ما عرفت انك تعبان حسيت ان قلبي انخلع من مكانه وجيت جري اشوفك خوفت يكون دا آخر لقاء بينا، كان نفسي اقولك اني سامحتك من غير حتى ما تطلبها
- شاكر باس راسها وقالها من وسط دموعه: انا اسف يا فريده، مهما اتأسف ومهما اعمل مش هيعوض لحظة واحدة اتوجعتي بسببي فيها، قلبي موجوع عليكِ وعلى الحاله اللي وصلتك ليها يا بنتي، وأمك شافت مني كتير واستحملت عشانك انتي واخواتك، كان نفسها تاخدكم بعيد عني عشان متتأذوش بس مكنتش لاقيه مكان تروح بيكم فيه بعيد عن ظلمي وفسادي، انا اسف يا ليلى، ان شاء الله لو ليا عمر هعوضكم، مش هتيجي في حضن ابوكي يا منه انتِ وساره، وانتِ يا ست الكل يا نور عيني وسندي في الدنيا ومراتي وحبيبتي
- منه: طول عمري كنت بتمنى حبك وحضنك يا بابا، كان نفسي تكون فخور بيا وبنجاحي، كان نفسي تبقى معايا وانا بستلم شهادة تخرجي، انا كنت بحاول اكرهك بس معرفتش لأنك بكل بساطة ابويا
- كل الموجدين كانوا متأثرين بلم شمل الأسرة من جديد، الأب والأم هما روح اي أسرة "كلكم راعٍ وكلكم مسؤول عن رعيته" خليكم حنينين على ولادكم بلاش تكونوا انتو وضغوط الحياة عليهم، الحضن منكم بالنسبة ليهم امان ونجاة والابتسامة بتشفي جروحهم، لو مش هتكونوا ليهم مصدر الأمان وهتستبدلوا دا بوجعهم وتقسوا عليهم بلاش تجيبوهم الدنيا احسن، زي ما الابن عليه حقوق اتجاه اهله، كمان الأهل عليهم حقوق اتجاه أبنائهم
_______
- محمود: الوو يا كريم طمني عملت ايه
- كريم: انا عملت اللي حضرتك قولتلي عليه وخليت حد تبعي يعرف كل التفاصيل عن الرقم اللي حضرتك أرسلته ليا يا بابا، دا رقم شاب مش محترم اسمه رامز، اتعمله اكتر من محضر بسبب تهكيره لموبايلات البنات وتهديدهم بالصور وبيتحبس وبيخرج بعد فترة وفي حد بيدفع لأهالي الضحايا فلوس وبيرحوا يسحبوا المحضر تاني، وزي ما حضرتك قولتلي الصبح خليت عماد صاحبي يمشي ورا نورهان والشاب اللي كان معاها وطلع هو رامز اللي كلمت حضرتك عنه، وسمع بعض الكلام اللي اتقال بينه وبين نورهان وعرف منهم انهم مش ناويين على خير حتى للبنى اختي، كل هدفهم يجمعوا فلوس بس، وبردو يا بابا رامز كان جالي المعرض من فترة عايز يشتغل معانا وانا قولت ليه منين ما تتوفر الفرصة انا هتواصل معاك
- محمود: الله يرضى عنك ويرضيك يا كريم، رن عليه وقوله وقوله انه اتقبل ولازم يجي يقبلك بس في البيت عندنا ودا عشان تفهمه تفاصيل الشغل وانت مش هتعرف تروح المعرض النهارده، قولي عرفت حاجه عن نورهان؟
- كريم: روحت في المكان اللي كنت وصلتها فيه قبل كدا عرفت انه اصلا مش بيتهم وكانت مأجراه لمدة يوم واحد بس، وتقريبا كانت مش عايزانا نعرف عنوانها، بس الست اللي كانت مأجرة ليهم البيت قريبتهم اصلا ودفعت ليها قرشين وقالت كل حاجه، نورهان عايشه في منطقة كلها عشوائيات بنت واحدة ل ام عايشه معاها والأب مسافر من سنين ميعرفوش عنه حاجه
- محمود: ازاي بنت واحده اختك قالتلي ان ابوها متجوز وراميهم وهي اللي بتربي اخواتها
- كريم: يا بابا كله كذب واحنا ضحية لعبة كبيرة واول واحده هتتأذى منها لبنى، ومليون في المية اللي حصل بسببهم
- محمود: طيب جيبلي رامز البيت ضروري وانا هتصرف في الباقي، ربنا يحميك يا ابني ويفرح قلبك بيك ويكتر من امثالك
- كريم: يا رب يا بابا، طمني على مدام فريده ووالدها عامل ايه دلوقتي
- محمود: الحمد لله يا حبيبي بخير، انا ابني راجل وجدع ويستاهل كل خير، ان شاء الله هنرجع حق فريده ولازم اعلم اختك درس مش هتنساه
______
- لبنى: الوو يا كريم رانن عليا ليه
- كريم: ايه يا ست لبنى اخ عايز يكلم اخته ويطمن عليها فيها ايه دي، وبعدين ايه الصوت اللي جنبك دا
- لبنى: دي نورهان معايا في البيت، منحرمش منك ولا من سؤالك يا كوكي، قولي صحيح روان كانت قالتلك ايه على الخروجة بتاعتنا
- كريم: طايره من الفرحة يا لبنى، بتمدح فيكِ وبتقولي قلبها طيب اوي، وبتحبك ونفسها تكونوا اصحاب، انا عارف انك طيبة يا لبنى وهتحبيها، روان بنت أصول وحنينه، ربنا يديم المحبه
- لبنى: بجد هي قالتلك كدا يا كريم
- كريم: ايوه يا لولو، انا فرحت اوي لما سمعت كلامها بصراحة كنت خايف اوي تجرحيها وتكسري بخاطرها، بس قلبي كان بيقولي ان اختي مستحيل تقل مني قدام خطيبتي لأن احترامها لخطيبتي من احترامها ليا ولبنى بتحبني، المهم هقفل انا بقى عشان عندي مشوار مهم، وسلميلي على نورهان كتير اوي
- لبنى كانت بتفكر في الكلام اللي قالته روان عنها بالرغم انها قللت منها وجرحتها هي ونورهان، ردت على كريم وهي لسه شارده: يوصل يا كريم مع السلامه
قفلت لبنى مع كريم ووجهت سؤالها لنورهان وقالتلها : هو انا بجد وحشه يا نورهان، انا تصرفاتي كلها غلط صح؟ ظلمت فريدة ومفرقش معايا فضيحتها وكسرت بخاطر روان واتكلمت عليا بكل خير، انا اللي وحشه صح
- نورهان: مين دي اللي وحشه يا لبنى، دا انتِ قمر وصح جدا، كل تصرفاتك صح ومن حقك، دا بيتك من حقك تخافي عليه وتبعدي عنه أي حد طمعان فيه، افرحي يا لبنى ومتنكديش علينا في يوم جميل زي دا، عرفنا نطفش مرات ابوكي يا بت
_______
- محمود خبط على شقة لبنى وقالها: تعالي يا لبنى عايزك في كلمتين مهمين في الشقة بتاعة العيلة اللي بنتجمع فيها وياريت تجيبي نورهان صاحبتك معاكِ
- لبنى: خير يا بابا، في حاجه حصلت ولا ايه
- محمود: تعالي بس ووقتها هتعرفي كل حاجه
- لبنى: حاضر ثواني وهاجي وراك...
دخلت لبنى وقالت لنورهان، نورهان ردت عليها بقلق وقالتلها: طيب وابوكي هيكون عايز مني ايه؟
- لبنى: انا زيي زيك معرفش حاجه، تعالي يلا نروح وهنعرف هناك كل حاجه
________
دخلت لبنى ونورهان واول واحده شافوها قدامهم فريدة، لبنى اتضايقت وقالت لفريده: انتِ ايه اللي جابك هنا، ليكِ عين تيجي بيتي بعد اللي عملتيه، فعلا مافيش عندك ريحة الدم دا انا لو مكانك كنت اتمنى الأرض تتشق وتبلعني
- فريده قالت ب ابتسامه كانت مجهولة بالنسبة للبنى: ما هو فعلا انتِ دلوقتي هتتمني ان الأرض تتشق وتبلعك، ومش انتِ لوحدك، لما اشوف بقى مين فيكم عنده دم، اصل الكذب مالوش رجلين يا لبنى وربنا بينصر البريء، قوليلي صحيح انا عملت ايه بقى يخليني اتمنى ان الارض تبلعني دلوقتي
- لبنى كانت رايحة ترد عليها بس محمود قالهم بصوت عالي: انا جمعتكم عشان انا اللي اتكلم كل واحده فيكم تسكت لحد ما اخلص كلامي
لكم ان تتخيلوا نظرات نورهان ورامز لبعض وهما مش مستوعبين حاجه بس متأكدين ان في كارثه هتحصل
- فريده بصت للبنى وقالت: اتفضل يا تاج راسي اتكلم، كلنا سامعينك يا حبيبي
- محمود فرح بكلام فريده وقلبه دق بس لحق نفسه وقال بصوت متزن : تعرفي الشاب اللي قاعد دا نورهان وانتِ يا لبنى
- لبنى بنفاذ صبر: لأ انا اول مره اشوفه
- محمود: وانتِ يا نورهان تعرفيه ولا لأ
- نورهان بتوتر: ل لأ معرفش حد انا اول مره اشوفه
- كريم: وانت يا رامز متعرفش لبنى اختي ولا نورهان صاحبتها، حتى لو اتعاملت معاهم مره قبل كدا
- رامز رد بكل هدوء وعلامات الدهشة على وشه: لأ خالص انا اول مره اشوفهم، وبعدين انا جاي في شغل مش جاي اختار عروسة
- كريم: لا مش بتضحك وبارده جدا جدا
- محمود: طيب يا جماعة ممكن كلكم تبصوا في الشاشة اللي قدامكم لعل وعسى تفتكروا حاجه
- رامز ونورهان اتصدموا لما شاف صور ليهم مع بعض وهما في الكافيه وقدام البيت
- محمود: ها افتكرتوا حاجه ولا لسه، ياريت الكل يفتكر بس بسرعة؛ لأن انا بدأت اتضايق وحقيقي انا في غضبي واحد تاني، وفي ثواني هتلاقوا الشرطة هنا
- نورهان: رامز يبقى ابن خالي وانا مردتش اقول عشان محدش يفكر انه جاي يشتغل معاكم وواخدني واسطة
- محمود: امممممم هتفضلي تكذبي لحد امتى؟ يعني كذبك دا ليه نهاية ولا مطول معانا ولا ايه نظامك
- لبنى: هو في ايه يا بابا، انت جمعتنا ليه، انا مش هتواجد في مكان فيه اللي اسمها فريده لأنها انسانه فاسده
- محمود بدأ يفقد السيطرة على نفسه ومسك لبنى من دراعها وقالها: صوتك يا لبنى مش عايز اسمعه خالص، عايزك تسكتي وتسمعي كلامي وبس، انا معرفتش اربي، انا دلعتك لدرجة انك اتفسدتي
- لبنى بدأت تعيط من وجع دراعها وقالت: ااااااااه سيب دراعي يا بابا وجعتني، انا مش فاهمه ليه بتعمل معايا كدا
- محمود بعد هنا واتجاهل كلامها وكمل كلامه مع نورهان: قولتيلي بقى عندك كام اخ بتصرفي عليه
- نورهان بتوتر: عندي ٣ اخوات
- محمود: لسه بتكذبي بردو يا نورهان، عموما انا هجاوب عشان اعرف المحروسة بنتي على خيبتها وتشوف هي وثقت في مين، انتِ مش عندك اخوات يا نونو وعايشه مع امك ولوحدكم، وجايه تلفي على بنتي انتِ والهكر الخارق رامز، اللي اتحبس بسبب تهكيره للموبايلات البنات، الضحية جديدة مراتي وبنتي عايزين تنصبوا عليها في فلوس، بس متعرفوش انتو وقعتوا مع مين، جايين تنصبوا عليا في بيتي، انا هوديكم ورا الشمس
- رامز: ابوس ايدك اعتقني لوجه الله انا ماليش دعوه بالملك دا، انا باخد فلوس وبنفذ الشغل اللي بينطلب مني، لبنى هي السبب، انا لا اعرف بنتك ولا حاجه، لبنى اللي جيت طليت مني افبرك صور لمراتك وبعد كدا هنهددها بيها وناخد منها قرشين، وبنتك على علم بالكلام ومعانا في كل خطوة، نورهان كانت بتستغل لبنى وتاخد منها فلوس ومفهماها انها ل اخواتها لكن انا ماليش دعوه
نورهان بعصبية: بتبيعني يا رامز، لأ بقى انا مش هشيل الليلة لوحدي، انا كنت بحبك لبنى بس هو ضحك عليا ب اسم الحب وخلاني اخد منك فلوس عشان هو ياخدها مني، كل الفلوس اللي خدتها منك كانت ليه، لكن انا بحبك يا لبنى
- محمود: بسس اسكتي انتِ وهو مش عايزه اسمع نفسكم، فريده عملت ليكِ ايه عشان تعملي فيها كدا يا لبنى، عايزه تشوهي صوريتها ليه، يعني دا اللي انا ربيتك عليه، انا كنت اتمنى ليكِ الرضا ترضي، خطيبة اخوكي رنت عليا وعيطت وقالتلي اللي عملتيه فيها وانا وعدتها اني هصلح كل حاجه، ولما اخوكي يسألها تمدحله فيكي بالكذب، شايفه الفرق بينكم، ليه عايزه تإذيها، فريده قبل ما تعرف باللعبة اللي عملتيها مع عصابتك كانت بتقولي انا حبيت لبنى وشكلها هتحبني وعايزه اخليها تيجي تتغدى معايا، وانتِ في الجهة التانيه بتخوضي في شرفها، وسيبتي كل الناس الكويسين وروحتي وثقتي في حرباية بتتلون على كل لون شوية، كل ما تعملي حاجه غلط تقولك عاش يا لبنى انا في ضهرك، وهي من جواها نفسها تتلف حوالين رقبتك وتخلص منك، وكان هدفها الأول تاخد كل حاجه منك وترميكي في الشارع
- لبنى كانت واقفة تتفرج على المواجهة بين رامز ونورهان وبتقول لنفسها انا استاهل اللي جرالي، استاهل انهم يطمعوا فيا، استاهل ان ناس زي دول يدخلوا حياتي ويعملوا معايا كدا، انا اذيت ناس بريئة بسبب انانيتي وغيرتي
- محمود: ما تردي ساكته ليه، ولا مش لاقيه كذبه جديدة، انا مكسوف من انك بنتي
- لبنى: كنت دايما اقل من كل البنات اللي حواليا، كان اي حد يشوفني يسخر مني ويتنمر عليا، كرهت الناس وكرهت نفسي، كنت كل ما اشوف روان فرحانه مع كريم قلبي تولع فيه الغيرة واقول اشمعنا هي، ليه انا مفرحش كدا، ليه انا اقل منهم، بدأت اتقبلها بالعافية بس مقدرتش، تيجي انت تقول عايز اتجوز، اللي هو حتى ابويا كمان هيتجوز وهيعيش سعيد هو واخويا وانا هتنسى لا ليا ونس ولا حبيب ولا اب ولا اخ، ملقتش الا نورهان قدامي وما صدقت الاقيها، حتى مسألتش عن أصلها، كنت خايفه اعرف عنها أي حاجه تخليني ابعد عنها، مكنش في غيرها، شوفت فريدة وجمالها قلبي اتكسر، شوفت فرحتك بيها قولت خلاص خدت مكانتي عندك، انا وجودي في حياتكم بقى عالة عليكم وبكرا روان وفريده يطردوني من البيت ما كل كل واحده مع جوزها وانا هكون منبوذة، ليه انا يحصل معايا كدا
- محمود: حاسس بوجعك ويعز عليا اشوفك كدا، عشان بكل بساطه انتِ بنتي يعني حتة مني، بس دا مش مبرر لغلطك، واكيد لازم تتعاقبي
- لبنى: وانا قابله ب اي عقاب حتى لو هتحبسني، انا مش هنكر اني غلطانه بس انا فعلا كنت هأذي اي حد يقرب منكم، انا اسفه يا فريده بالله عليكِ تسامحيني ذنبك الوحيد انك اتجوزتي ابويا، بس ربنا نصرك عليا ووقف جنبي والحقيقة بانت
- محمود: هي فعلا الشرطة جايه انا كلمتهم من بدري، كل اللي غلط هياخد حقه، انا مش هسيبكم تنصبوا على الناس تاني
- رامز: ابوس ايدك يا باشا سامحني اخر مره والله، دا انا حتة عيل مالوش لازمه ولا يفرق معاك، اوعدك مش هتلمحني تاني، بس سيبني امشي ابوس ايدك
- محمود: لازم اللي يغلط يتعاقب عشان ميعملش كدا تاني، بنات الناس مش لعبة، لازم اريح الكل منكم ومن شركم كفاية فساد بقى، وإتأكد يا رامز ان المره دي محدش هيطلعك منها
- نورهان: عشان خاطري يا لبنى أوقفي جنبي واوعي تسيبيني دا انا امي ملهاش غيري، افتكري ليا اي ذكرى حلوه، انا كنت بحبك ومفضلاكي على نفسي
لبنى اغمى عليها وكنت هتوقع على الأرض بس ابوها لحقها وفي اللحظة دي وصلت الشرطة وخدوا نورهان ورامز عشان يتلقوا العقاب اللي يستاهلوه ما هو الكذب مالوش رجلين زي ما احنا عارفين
_______
- محمود: طمني يا دكتور بنتي فيها ايه
الدكتور: بنتك عندها القلب، واتعرضت لصدمة كبيرة ومقدرتش تستحمل
- محمود: بنتي انا عندها القلب ازاي، اكيد في حاجه غلط
- الدكتور: بنتك حالتها النفسية سيئة جدا ولازم تتعرض على دكتور نفسي وخلوا بالكم منها وبلاش تتعرض ل اي زعل أو تخلوها تنفعل او تبذل اي مجهود، وانا هكتب ليها على الأدوية اللازمه
- محمود: تمام يا دكتور متشكر جدا لحضرتك
- فريده: قدر الله وما شاء فعل، ادعيلها ربنا يشفيها ويعافيها
- محمود: بنتي بسبب تنمر الناس على شكلها الحزن سيطر على حياتها، بعد امها عنها خلاها بقت تحس بالوحدة، عشان خاطري سامحي لبنى يا فريده، والله دي غلبانه اوي وكانت ضحية زيها زيك، دا غير انها بتعاني من اكتئاب شديد
- فريده: مسامحاها يا محمود، واوعدك هفضل جنبها وان شاء الله ربنا يشفيها
- لبنى كانت سامعه كلامهم وبتعيط من غير صوتها وفجأة صوت عياطها بقى عالي وقالت لفريده وابوها: بالله عليكم سامحوني انا اسفه وغلطت في حقكم، انا مش عايزه اخسرك يا بابا، نفسي اعيش الايام اللي فاضله ليا في الدنيا معاك
- محمود حضنها وقالها: هتعيشي احلى الايام وهتفرحي وهتعملي عملية عينك وهتتعالجي من الاكتئاب، قدر الله وما شاء فعل، احنا مؤمنين قدر الله وما شاء فعل، ان شاء الله هنسمع تعليمات الدكتور وهتبقي قمر، بس اسمعي كلامي وسيبيني اعرضك على دكتور نفسي كويس
- لبنى: حاضر يا بابا موافقة، بس عشان خاطري سامحني، وانتي يا فريده سامحيني
- محمود: انا عن نفسي مسامحك من قلبي، هو انا عندي اغلى منك يا بنتي
- فريده: وانا مسامحاكِ من قلبي يا لبنى، و اتمنى المره دي بجد نكون اصحاب
- لبنى: اوعدك هتغير للأحسن وهنكون اصحاب وعيلة جميلة، بس هو فين كريم انا نفسي اعتذر ليه
- كريم: انا جيت على السيرة اهو، روحت يا ستي اقابل روان حلفت تيجي وتشوفك
- روان حضنتها وقالتلها: علفكره مهما عملتي انا بحبك، ومش زعلانه منك ولا كريم زعلان، احنا مش عندنا أغلى منك يا لبنى، والكلام دا من قلبي مش تمثيل والله
- لبنى: انا ازاي كنت مضيعة على نفسي لحظات حلوه زي دي، ربنا يبعد عننا أصدقاء السوء ويصرف عننا الشيطان ويهذب نفوسنا، انا اسفه ليكم كلكم
محمود خرج عشان يخلص إجراءات المستشفى فريده خرجت وراه ووقفته وقالتله: محمود ثانيه واحده عايزه اقولك حاجه
- محمود: طبعا يا فريده قولي اللي انتِ عايزاه
- فريده: انا بحبك
- محمود: نعم! قولتي ايه انتِ
- فريده: قولت بحبك وبحبك اوي وانت عوض ربنا لقلبي، ومش بحبك زي بابا وبس، لأ بحبك لأنك زوجي وسندي وحبيبي
- محمود: انا حبيبك؟!
- فريده: ايون حبيبي وقلبي وروحي كمان
- محمود بسعادة: تتجوزيني يا فريده؟
- فريده ضحكت بصوت عالي وقالتله: مالك يا محمود ما انا مراتك فعلا
- محمود: اه صح انتِ مراتي فعلا طب اسمحيلي ابوس ايدك الحلوه دِ واقولك ان انا كمان بحبك ومش بس بحبك لأ بموت فيكِ، وفخور انك في حياتي يا ملاذ روحي، مقولتليش صحيح موافقة تتجوزيني
- فريده ب ابتسامة جميلة: موافقة يا حبيبي
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
