رواية غاليتي الفصل الخامس
غالية مشت لقتهم كلهم راقدين والحوش ظلام
ركبت للدار لقت صفاء ومروه راقدات
خشت غيرت دبشها وتغطت ورقدت اتفكر في المنجي
وكيف مسك يدها سكرت عيونها وابتسمت
(( أحدهم عبث بقلبي ❤ فـ جعله ينبض بإسمه كل دقيقه ))
سمعت صوت باب الدار انفتح
سكرت عيونها ودارت روحها راقده ..
هناء قربت منها وبصوت واطي : غاليه غاليه
وبحتت فيها لقتها راقده
صبت غيرت دبشها ولقت مروه متعريه غطتها
ورقدت احدا غاليه في السرير وتغطت ..
___________
وسام ضحك : يعني تبي تقنعني قعدة العشاق الي طبيت عليك فيها ومافي شي بينك وبينها
المنجي يبحت في البحر : انقولك الصراحه هكي انا خاشه خاطري البنيه
وسام سكت وفكر في امه وكلامها لما قالت ان ام المنجي عاجبتها لينا
المنجي بحت فيه : كنك سكتت
وسام ابتسم : مستغرب لاني عارفك كويس يامانجا
المنجي ضحك وخبط على قلبه : جت من اتحركه يالوس
وسام ضحك وصبّا : انخليك في التكبيد ابتاعك انا ظلمت قدامي
المنجي صبا وخذا دخانه : لا حتى انا خلاص
وسام مصبي وايتكسل : ذكرني بكرا في موضوع نبيك فيه
المنجي يثاوب : خير ؟
وسام مشى : بكرا انقولك ؛ وجك توا ✋🏼
المنجي مشى للشاليه وخش وسكر الباب
ركب مالدروج بحت في دار البنات وضحك ..
خش لداره سلح ماليته و رقد في فراشه
وقعد يفكر
غارت من اخت وسام !!
معناها حتى هي نفس الشعور اتجاهي
مش شرط اتحبني بس معجبه بيا اقل حاجه
شفتها في عيونها لما بحتت فيهن انا متأكد
لكن توا نعرف كيف نكشفها بطريقتي
_____________________
10:30 ص
الصبايا يفطرن برا قدام الشاليه والرجاله جوا
امينه اتبحت في هناء : راك اتغصي 😒
هناء فمها مليان : ياامي جعانه خليني ناكل
سعاد : كنك مع البنت خليها صحتين وعافيه
غاليه اتبحت في باب الفيلا
كنه معش ناض .. اوووف هذا كله راقد
هناء بحتت فيها : خاطري نعرف كنك
غاليه : كني ؟
هناء : من امس مش طايقتيني
غاليه تشرب في شاهي وحليب : لا عادي مافي شي
هناء ردت تاكل : باهي بجوك زيدي اكذبي
امينه بحتت فيهن : تعاركتن على اخر العمر ؟
هناء : هي الي جايتها الحاله
سعاد بحتت في غاليه : ربي يشفي كنك ؟
غاليه تشرب في الشاهي والحليب وساكته
امينه : خلاص توا افطرن
المنجي طلع وسكر عيونه مالشمس : صباح الخير
سعاد : صباح الورد
امينه وخرتله الكرسي الي احداها : صباح الهناء قمعز افطر
هناء : سمعت امي قالت صباح الهناء يعني صباحك انا بجلالة قدري 🌚✋🏼
المنجي بحت فيها وضحك : لنقانك فاضيه
وبحت في الطاوله : وين التوأم المختلف ؟
سعاد ضحكت : لا ينوضن ظهر تو مزال فجر عندهن
بحت في غاليه لقاها تشرب ومش معدله
المنجي بحت في امينه : كذا ياامي صبيلنا طاسة قهوه ولا تصغري
امينه مسكت البكرج : هياا حاضرين
سعاد قربت منه الدحي : افطر مالك ومال القهوه ياوليدي
المنجي شايرلها بصبعه بمعنى لالا : وين فطور ع الصبح مش متعود عليه
امينه : توا تاخد مراه تخليك تاكل بالغصب
المنجي ابتسم : باهي امتى ناويه تجيبيها ليا المراه هذي ؟
غاليه وقفت شرب شاهي وبحتت فيهم
امينه فرحت : تدوي من جدك نويت اديرها ؟
المنجي ضحك : والله جديات ونبي نبدا نبني فوق احمد مالاسبوع الجاي
سعاد ضحكت : ماشاءالله ان شاء الله بسلامتك
المنجي : سلمك
هناء ضحكت : عندك وحده في بالك ولا لا ؟
المنجي بحت في غاليه لقاها اتبحت فيه : في وحده عاجبتني بس انشوف امي قبل بلكي عندها وحده 😏
غاليه برمت وجها ع الجيهة الاخرى وقعدت تشرب 😑
امينه ابتسمت : في وحده خدت عقلي
المنجي : من ؟؟
هناء ضحكت : مش متحجبه ماضنيش يوافق ولدك حصله ماتعجباش نوعيتها
المنجي : لا عادي مش موضوع توا انتفاهم معاها وانحجبها بعدين غير من هي ؟
.... وكسر عينه شور غاليه لقاها تشرب و قالبه وجها
امينه بحتت في سعاد وغمزتها : لينا اخت وسام
المنجي ضحك : اهااا لا هي ماشاءالله عليها في الشكل سمحه ...... وبحت في غاليه وضحك 😏
هناء : جميله بكل عليك وجه وشعر فيها
غالية صبت : انشيلهن هذينا
سعاد : خلي بلكي نويجي ياكل
غاليه اتلم في السفره : قالك مايحبش يفطر
المنجي زراته الضحكه وبرم وجه مايبيهاش اتشوفه
هناء بحتت فيه وبحتت في غالية
________________
12:30 م
امال اطيب في الغداء : دويت لصاحبك امس
وسام : مشيت نبي ندويله لقيته في موعد غرامي
لينا خشت اتلم في شعرها : صباح الخير
وسام : صباح النور
امال : تي قولي كيف موعد غرامي
وسام ضحك : انا مشيتله لقيت بنت احداه استغربت شافني قالي تعال
لينا صبت ع الدولاب تضرب في النسكافيه وقعدت تسمع
امال : باهي مشيتله
وسام مشيت قلت السلام عليكم ردت السلام بعدها قاللها صبي ودوالها حاجه بصوت واطي
امال : هذي القصيره الهاديه مش التوأم صاح ؟
لينا كشرت وجها : اسمها غاليه
وسام : قتله كيف صار قعد يضحك قالي مافي بيني وبينها شي بس انا خاشه خاطري البنيه
امال تحرك في الطنجره : اهااا يعني هو بس يبيها
وسام : وانا نعرف صاحبي كويس مكبد فيها
لينا كشخت وطلعت
حنان خشت ماسكه مراد : صباح الخيررر ياخالوووو
وسام فتح ايديه : حبييييب خالوووو .. هاتيه هنااا هاتي
ومسك مراد : وين مانجا ؟ نعدو لمنجا
مراد : أداا مانجا
وسام يضحك : عدا مانجا ؟ توا نمشوله بعدين
__________________
4:30
صفاء : مروه شرفي الطرف الي غادي يبحت فينا
مروه اتبحت ومعمشه عيونها : وين مانشوفش
صفاء ضربتها : مش هكي يابهيمة اكيد فطنلك 😐😫
العيل برم وعدا
صفاء : عاجبك اهو طفش
غاليه : من الي طفش 😑 ؟؟
مروه ضحكت : من امتى انتي هنا ؟
صفاء : اسمعي ياغاليه بالجو فكينا من جو الاخت الكبيره
غالية ضحكت : تي بااهي سألتكن من انا
صفاء : واحد طرف كان هنا وعدا توا من اختك الكلبه طفشاته
غاليه ابتسمت : كان فيه نصيب توا يجي
صفاء : بدت الشيخه فتنه عاد 😑
غاليه تضحك : لا ماني شيخه بس هذا الحق
وخطم واحد نابشهن : كان تعطوني الي في النص بس
المنجي مصبي ع السور شافه دوالهن
ورقاله : تفضل ياشاب ؟!!!!
العيل رفعله يده وضحك وعدا : اسمحلنا يااخينا معلش
المنجي فنص فيه وعدالهن
: قعمزن ع الشط ولا جوا لكن هنا نص الطريق لا
غاليه مدت يدها لصفاء : صبيني ياصفصف
صفاء صبتها وتحكي مع المنجي : نطلب منك طلب اتردني ؟
المنجي : شنو الطلب
صفاء : عادي تعطينا الماي فاي في الليل 🙊
غاليه فنصت فيها : صفاء 😐
المنجي ضحك : خوديه ماعندي ماندير بيه
صفاء فرحت : شكراً بكل انت احسن اخ وحق ربي 😍
المنجي يضحك : لما تركبي فوق تلقيه في روشن داري تم ؟
صفاء : تم تم 😍 هيا مروه نفتحو نت .... ومشت تجري
مروه مشت تجري وراها : شكراً يامانجا 😍😂
المنجي ضحك وبحت في غاليه
غاليه كشخت عليه وخشت
المنجي : بدري
غاليه كشخت عليه : من عمرك ماشيا نلبس دبش العوامه 😏
المنجي خبط على بطنه وسكت
___________________
احمد يقلب في للمحطات : غار خلينا نمشو للبحر اليوم وانروحو بكرا
اميره تبرد في اظافرها : لالا مانبش
احمد : باهي نمشو الصبح بكرا وانروحو مغرب
اميره اضايقت : وااااو ياميدو يعني لازم نلصقو في هلك عروس مازلت تصهدني الشمس
احمد ضحك وقرصها : وراس ميدو باهي
اميره تضحك : تي حووول يدك
احمد صبا وقرب منها : نمشو 😉
اميره تضحك : حوووول قتلك
احمد : باهي نمشو 😉😘
______________________
الصبايا قاعدات ع البحر ويشربن في قهوه
والبنات مقعمزات ع الشط وحاطات كرعيهن في الميه
خطم المنجي يمشى مع وسام
لينا بحتت في غاليه لقتها ااتبحت فيه
سجى بحتت في هناء : تعالي شويا على جنب
هناء بحتت فيها : شن في
سجى بصوت واطي : اليوم وسام حكا لماما في الصبح خوك دواله علي جارتكم قاله نبيها و خاشه خاطري
هناء انصدمت : تي مستحيل تدوي جد انتي
سجى ابتسمت : وليش مستحيل البنيه نزيكه وسموحه وتنحب روحها حلوه
هناء : اكيده تنحب هذي خيتي بس ان هي والمنجي مستحيل
سجى بحتت في غاليه : بحتي كيف اتبحت فيه وهو مصبي
هناء بحتت لقت غاليه اتبحت في المنجي وعيونها قلوب
وسام تليفونه رن : دقيقه بس يامانجا ... وعدا
امينه لقت المنجي بروحه
جابت طرف كيكه وجاته : منجي هاك كيكه
المنجي سلح النظاره : لالا مانبش
امينه بصوت عالي : دارتها لينا سممممحه
المنجي بحت في غاليه : هاتي به ...
وكلا منها : سمحه فيها جو
غاليه كشرت وجها ( سمسام .. خليك ان شاء الله دايرتلك فيها سحر وتقعد اتعاني عمرك كله وانت اتلمد تاكل من اي حد )
المنجي بحت فيها وحركلها حواجبه
غاليه كشخت عليه وبرمت اتبحت في البحر
المنجي ينادي فيها : غالية
غاليه انصدمت وقلبها يدق بحتت فيها
شايرلها بيده : تعالي
غالية بحتت في البنات لقتهن يبحتن فيها ضحكت ضحكة صفراء لـ لينا وصبت 😏
غالية : نعم
المنجي سلح النظاره : مش قلتي تبي تعومي ؟
غالية كشخت : عدي عوم مع لينا
المنجي ضحك : كليتي كيكه ؟
غالية برمت وجها: مانبش
المنجي ياكل في الكيكه : قويه بكل
غاليه كرتها منه وعزقتها في البحر
المنجي ضحك بصوت عالي وطاح ورقد ع الرمله
امينه برمت اتبحت فيهم
سعاد مبتسمه
امال اتبحت وساكته
غالية تبي تمشي : خطاني ترا
المنجي قمعز : تي والله ترجي الله ؛ هيا انعومو
غاليه : مانبش انعوم
المنجي يضبح للبنات يعومن : صفاااء
صفاء من جوا : كنكم
المنجي : غاليه تبي تخش اطلعي خوديها
غالية كشخت عليها : اتخشش فيا عشان يفضالك الجو مع لينا مانش خاشه 😡
المنجي يضحك : والله كان ماتخشي انقوللها هيا انعومو وانخش معاها
غاليه ضحكت : هاهاهاها قوللها وانا شن دخلني
المنجي : باااه تمام ..... وبصوت عالي : يااااا
غاليه تعصبت : خلااااص اسكت توا انخش 😤
المنجي يضحك
صفاء مدتلها يدها : هياا تعالي
المنجي : افطني راك اطيحي
غالية اول ماخشت الميه طقت لعند رقبتها
المنجي يضحك : خشي باهي
غالية اتنط : لالا مانعرفش انعوم
المنجي : تي راك عالشط قاعده
غالية : بطل براده هذا طولي شن اندير
المنجي بصوت واطي : انجيك
غالية : شنو مافهمتش
المنجي غطا على فمه : إ ن ج ي ك
غالية فهماته وضحكت : لا اتجيني لا انجيك
قعد يضحك وقمعز ع الرمله
وسام جاه : يامانجا
المنجي برم بحت فيه : تي وين عديت
وسام : راجل اختي دار حادث وهو مروح من درنه
المنجي صبا : لا حول ولا قوة الا بالله شن صارله
وسام : قالو كسور و تثريد ...
وبحت في هله : لازم انروحو
المنجي : باهي غار جيبها لهم بشويا فكنا مالشورخ عارفك انا
وسام بحت في امه : امي
امال : خير كنك
وسام شايرلها بيده بمعنى تعالي
امال جت مفجوعه : كنك شن في
المنجي : مافي الا كل خير كنك مفجوعه
وسام : مافي شي اسمعي ديري سبله على اساس انروحو بيها قدام حنان
امال : شن في كنها حنان شن في وووك عليااا 😱
وسام فنص فيها : ريتك انتي ياامي ماينقالك شي
المنجي بحت فيه : غير اصبر ياراجل ؛
وبحت في امال : عمتي امال عبدالله وهو مروح دار حادث وماصارله شي
امال شهقت : عليك كااااينه
وسام : قلنالك ماصارله شي السياره ادمرت بس لكن هو كويس
المنجي : جيبيها لها بشويا انتي ماتفجعيهاش
وسام يبحت في البنات يبي يشوف هناء
لكن هناء عاطيه بظهرها ماقدرش يشوفها
امينه : شن دوتها مروحين كنكم
امال : راجل اختي قالو داير حادث لكن هو كويس مافيه شي
حنان : باهي رني عليها بالتليفون
امال هزت راسها : لالا صبي لمي روحك وشوفي دبش ولدك ع الحبل راك تنسبه ونادي خواتك
حنان صبت مشت اتكلم في خواتها
امال بحتت في امينه وسعاد : راجلها دار حادث في طريق درنه
امينه انفجعت : ياناعلياا شن صارله
امال : لا قالو كويس جت في السياره
سعاد : الحديد ايتعوض المهم هو حمدلله على سلامته
امينه : حمدلله على سلامته
امال : الله يسلمكن ...
وجت اتسلم عليهن : بالسلامه انتلاقو ع الخير ان شاء الله ومشت
هناء جت لأمها : كنهم مروحين
امينه : راجل حنان دار حادث
هناء : مسكيييينه وشن صارله
سعاد اتلم في الطاوله : كويس قالو مافيه شي
هناء : باهي تمام .... ومشت شور البحر
مروه : ارقدي على ظهرك وارخي روحك
غالية : وكان سيبتيني شن انديرلك
مروه تضحك : والله ماني مسيبتك بس هياا
غالية رقدت وخايفه : لالا مانقدرش
صفاء تضحك بدموعها : معش نقدرررر 😂😂
المنجي مقمعز ع الشط يدخن ويضحك عليهن
هناء خشتلهن : قصدكن ولا وحده فيهن تعرف اتعوم قاعدات ع الشط .... واتكشخ على غالية
غالية بحتت فيها وبرمت وجها : هياا مروه انجربو اخرى مروه مدتلها ايديها : هياا تعالي
المنجي صبه سلح ماليته وخش غطس
غاليه قعدت ماسكه في مروه واتفرج عليه كيف يعوم
وهناء اتبحت فيها : غاليه
غالية بحتت فيها : نعم
هناء : لما تبي ادسي حاجه دسيها ع الجميع لكن عليا لا
غالية استغربت : كيف يعني
هناء بحتت في صفاء ومروه : سيبونه شويا بروحنا يابنات
مشن البنات يعومن
هناء بحتت في غالية وكملت كلامها : انا صاحبتك وعشنا كيف الخوات واكثر مش هانحسدك
غالية ضحكت : شن تحكي انتي ؟
هناء : المنجي ياغاليه !
غالية استغربت : كنه منجي
هناء : شن في بينك وبينه
غالية وجها انحمر وعيونها دمعن : من جدك انتي
هناء : توا عليش تبي تبكي انا نسأل عادي لازم دموع يعني
غالية مسحت عيونها : لا اصلا ماتوقعتهش منك
هناء : انا وجعتني ان نسمعها من سجى ولينا وانا مانعرفش
غالية تعصبت : على اخر العمر هذينا يخربن بينا
وجت تبي تطلع
هناء وقفتها : مش يخربن بينا المنجي حكا لوسام
غالية انصدمت : كيف
هناء : هو قال لوسام ان يبيكي
غاليه سكتت ..
هناء : وانا نعرفك وحافظتك انشوف فيك كيف لما اتشوفيه اتلخبطي و عيونك قلوب قلوب و لما فطنت بعد حكولي البنات شفتك كيف اتبحتي فيه وكيف خديتي الكيكه ابتاع لينا وعزقتيها
غاليه تسمع وساكته ....
هناء حطت يدها على كتفها : انا اختك ياكلبه لما الدنيا كلها ضدك انا معاكي يعني متحشمه تقوليلي انك تحبيه
غالية بحتت فيها تحكي ومتردده : انا مانعرفش شعوري اتجاهه شنو
هناء ضحكت : واضح من انك كرهتيني لاني قلت لـ لينا ناخدوكي له
غالية ضحكت ومسحت دموعها : لانك حقيره
هناء ضربتها : وهذا كله تقوليلي انك ماتحبش
غالية ضحكت : بطلي يابارده
هناء : توا انديرلكم جوو مع بعضكم 😉 ياريتني نعرف را خليتك ترقدي معاه في الدار 😂
ورفعت يدها : المنجي 🙋🏻
غالية اتسكت فيها : ياحيوانه لاااا راك اتقوليله
المنجي جا وداهش مالعوامه
هناء : انا نبي انعوم جوا خود غاليه خششها ليا
غاليه وجها انحمر : لالا خليني هنا خشي واطلعي
المنجي برم : امسكي في كتوفي توا انخششك
هناء خشت تعوم وتضحك
غالية مسكت في كتوفه و متحشمه
المنجي ينابش فيها : ننزل بيك تحت الميه ؟
غالية خافت ومسكت في رقبته : حي عليك والله انعيط
المنجي هيا : 1 2 3 ...
ونزل بيها تحت الميه وطلع
غالية اتكح وقعدت تبكي
المنجي برم ومسكها ويضحك : تي كنك
غالية تبكي : والله تشوف سيبني
المنجي ضحك : قدها انتي سيبني هذي
غاليه تبكي
المنجي : حي ع الخناين وقرصلها خشمها
غالية انحرجت : بطل براده معش تقربني
المنجي كلم هناء : تعالي خوديها
هناء تعوم على ظهرها : انا يادوب شايله روحي كان نمسكها هانغرقو انا وياها
المنجي يحكي لغالية : وانتي مقابلتيني هكي امسكي في يدي وارخي روحك
غالية تمسح في دموعها : لالا مانش
المنجي : والله ماني طالقك عيب
غالية رخت روحها وخايفه : حي علياا لالا انخاف
المنجي : ماتخافش ماسكك
___________________
8:30 م
احمد يدق ع الباب
اميره ماسكه شنطتها : مافش حد يفتح شكلك غالط
احمد : لا المنشف الي معلق هضا منشف باتي
رجب فتح : مرحباااا مرحبااا كيف صارت الجيه هذي
احمد ضحك : مفاجأة ياحاج ؛ وين الباقي
رجب : امك وعمتك جوا يوتن في العشاء
امينه بحتت : احميده 😍
احمد : احويجه شنحالك
امينه اتسلم عليه : الحمدلله كيف صارت الجيه
احمد ضحك : رايفنا عليكم صبينا وجيناكم
اميره ابتسمت 😊
امينه اضحك : زين مادرتو
احمد سلم على سعاد : وين عمي مختار
سعاد : جوا في االدار خشله
اميره بحتت في امينه : وين هناء ؟
هناء : فوق هي وغاليه يغيرن والصغار برا طلعن
_________________
غاليه تضحك : بس انا خايفه تخايلي هلك يضايقو بعدين مني ولا معش يحبوني
هناء اتنشف في شعرها : مش هو يبيك وانتي تبيه خلاص معناته حاربي الدنيا
غاليه رقدت ع السرير : ياناعلياا هنيوه مش مصدقه مزال حاسه روحي نحلم
الباب دق ✊🏼
اميره فتحت الباب : هاااي 😊
غالية قمعزت : اهلين
هناء ابتسمتلها : اهلا شن المفاجأة هذي
اميره قمعزت ع السرير : ماهو انتو مروحين بكرا قال عمي لوطه قلنا ناخدوها نحنا وانمددو الحجز كم يوم
هناء : اهاا باهي كويس اتغيرو جو ...
اميره بحتت في غاليه : شن جوك ؟
غالية ابتسمتلها : تمام
اميره : قبل نبي انجيب معايا اختي بعدها ماقدرتش اتجي معايا قلتلها توا انجيبها اتبات عندي اليومين الجايات وهناء تركبي اتباتي معانا انغيرو جو
هناء : ان شاء الله وانتي طيبه
امينه من لوطه : انزلن حطن العشاء
غالية صبت : هياا هي جايين
____________________
12:30 ص
المنجي قاعد في السياره يسمع في اغاني ويدخن وفاتح الفيس
جاه اشعار فايبر لديك رسالة جديده
فتح لقاها من هناء
- : وينك انت
المنجي : كنك
_ : كنش نسأل عليك
المنجي : من امتى اتخافي عليا يعني ؟
_ : تعال باهي للشاليه
المنجي : بايت في السياره اليوم خليكم مع احمد ايتحمل المسؤولية شويا
_ : كان قتلك اني غالية هاتجي ؟
المنجي ضحك : وشن يأكدلي انك غالية ؟
_: مش عارفه كيف تبيني انأكدلك ؟
المنجي : رسالة صوتيه توا بسرعه
غالية تضحك و حطت يدها ع المايك وحكتله
المنجي فتح الرساله (( يعني ضروري منه الزر اهو سمعت صوتي توا من طلعت ؟ ))
المنجي ضحك : طلعتي غاليتي
غالية تحشمت وقلبها يدق : باهي تعال كسدت بروحي
المنجي : هيا اني جاي ..
أحمد جاي لابس شورت ومبلول
اميره صبت مدرتله منشف : مش عارفه وين عقلك بس اتعوم توا
احمد ضحك : ماقدرتش نصبر
هناء تشوي في سبول : غالية هاكي ابتاعك
غالية خدتها واتبحت يمين ويسار
هناء : شن قالك
غالية ضحكت : قالي توا انجي
احمد بحت فيهن : اكثر اثنين شفتهن يوشوشن
اميره فنصت فيه وبصوت واطي : اييييوه ابدا في البصاره توا هياا نركبو عشان اتغير
احمد خش للحمام يدير دوش
ركبت اميره ماسكه الشنطه دقت على دار الصبايا
امينه راقده ع السرير : خش
اميره فتحت : معلش ياعميمه وين نرقدو انا واحمد ؟
سعاد : نعطوكم هنا
امينه بحتت فيها : الدار الي فيها المنجي فيها فراشات توا انجي انلم دبشه وفرشي انتي وراجلك 😒
اميره قلبت وجها : كيف نرقدو على فراشات ؟؟ خلي البنات يجن فيها وتوا ناخدو دارهن
امينه كشخت عليها وصبت فتحت الدار : تحملي اليوم والصباح رباح اقعدي فيه بالطول والعرض ياحنه
اميره كشخت : عليك حاله بصراحه
امينه اتلم في دبش المنجي واتأفأف : كناين اخر زمان كلمه بكلمه مع العمه
__________
المنجي جا لقاهن ياكلن في سبول : شن الجو
هناء بحتت في غاليه وضحكت : تمام
وبحتت في المنجي : نعطيك سبول ؟
المنجي هز راسه : لالا
وبحت في غالية : من وين جبتن النت ؟
هناء : ماي فاي احمد
المنجي : امممم
غالية بحتت فيه وضحكت : قمعز باهي كنك مصبي هكي فوق روسنا
المنجي كر كرسي وقعمز احداها : عطيني سبول باهي
غالية تاكل في السبول : صبي اشوي بروحك
المنجي غمزها : عطيني الي كليتي منها
هناء كحت وصبت : شويا انجيب اميه وانجي
المنجي ضحك : والله طلعت تفهم في الجو
غالية مدتله السبوله : هاك
المنجي قرب منها : وكليني انتي
غاليه دفت وجه بيدها : عدي يابااارد
المنجي طلع تليفونه ومده لها : اكتبيلي رقمك خطرها
غاليه ضحكت : وعليش ؟
المنجي : عشان لما حد يحطلك ورقه في الخبزه اترني على رقمي انا وتهزبيني ومعش تغلطي 😏
غاليه برمت وجها وضحكت : سامط
امينه طلعت وبحتت فيهم
غاليه تلخبطت
امينه : فيش اديري هنا
غالية ارتبكت : نرجا في هناء مشت تجيب اميه
المنجي ساكت ويدخن : باهي كنك ياامي
امينه : اركبي ياغاليه ارقدي ورانا نوضه بدري وخودي معاك هناء
غاليه صبت وحطت السبوله ع الطاوله : تصبحو على خير
امينه : وانتي بخير
المنجي كشخ : كنك ياامي
امينه : كني
المنجي اضايق : معش اتحسسيها اني غريب عليها جو في شن اديري هنا مش على اساس انا خوها ودايريلي جو خوت ؟
امينه : صحيح انت خيها
المنجي : خلاص معناها خليكم قدها تلقيني معاها معش تحرجيها مانحبش الجو هضا
امينه قمعزت : باهي به نا حكيت عادي انت كبرت الموضوع
المجي : لا نحكيلك عشان معش اديريها لها
امينه : ياحبيبي نحنا نفهمو انك خيها لكن الناس يخطمو يلقوك معاها قريب الساعه 1 في الليل شن يقولو
المنجي ينفخ في الدخان : اخر همي الناس عارفتيني
امينه : باهي به صار خير
المنجي سكت
و طلع سبسي اخرى حطه في فمه ويولع فيه : نبي نبدا نبني
امينه : وانت طيب
وسكتو شويا ..
امينه : امتى نخطبلك اخت وسام ؟
المنجي هز راسه : لالا في وحده في راسي
امينه استغربت : كيف صار مش قلت مافش
المنجي : لا غير قدام عمتي سعاد و البنات ماقدرتش ندويلك
امينه : منو هي به ؟
المنجي ينفخ في الدخان : وحده ماتعرفيهش خليني انكمل الحوش بعدها توا نشيلك لهم ان شاء الله
امينه : عيت من باه ؟ اهم حاجه عندي هلها شن سمعتهم و شن جوهم النسب شي مهم
المنجي اضايق : خلاص ياامي ناس كويسين توا تعرفيهم بعدين
امينه جت تبي اتخش : دبشك نزلته لك ارقد في الصاله تحملها اليوم عيت خوك خذو الدار
المنجي هز راسه بمعنى به
امينه : انزلك فراش ؟
المنجي : توا نرقد ع الكنبه
_________________________
4:00 ص
غالية راقده احدا هناء وتحلم
خالد ماسكها من شعرها ويدف فيها من فوق سطاح
غاليه تبكي : مانبش انموووت مانبش انمووووت
خالد دفها وغاليه طاحت من فوق
ناضت وبحتت في الدار
الحمدلله انا حيه
صبت لبست سباطها ونزلت تبي تشرب اميه
نازله مالدروج بشويااا
الحوش كله ظلام
خشت للمطبخ وضي القمر عاكس مالروشن
فتحت التلاجه دارت ضي عكست عليها
المنجي كح
غالية انفجعت وبحتت وراها ........
