رواية شيخ البصره الفصل السادس بقلم مجهول
انطيتهم الجاي وصعدت لغرفتي اريد ارتاح
ساعه ارتب بالغرفة ساعه اطلع كتاب من كتبي مال الكلية واقره شوية
ومرت الايام والاشهر وصارت سنه
سنه واني بعيده عن اهلي
ضرغام يخليني احجي وياهم بالاسبوع مره من تلفون الحجية لأن اول مادخلت للبيت وهو اخذ تلفوني مايقبل ينطينياه واني هم ابد ماطلبته .
اني وضرغام مثل الغربة هو يفوت اني اصعد اني انزل هو يطلع. وهكذا..
واتعرفت على خطيبة فلاح اسمها بثينة كلش حبابه وفقيرة
وكلش تحب فلاح بس احس فلاح مايحبها ودائماً يتهرب منها .
صارت السنه مال اخوهم الله يرحمه وكلهم راحو زارو واني وياهم . رجعنا للبيت هلكانين من التعب رأساً نمنا ..
كعدنا الصبح وحاله حال الايام الفاتت سوينا ريوك ونظفنا و طبخنا الغده واتغدينا
غسلنا المواعين و صعدت سبحت ودخلت لغرفتي ..
ضرغام:- كملنا الغده وكلت خلي اصعد اشوف البنات وعلاوي
بهالاثناء طلعت بلسم من الحمام ماانتبهت عليه لابسه الدشداشة ولافه الخاولي على شعرها و ريحة الشامبو تسطر والخدود حمره وهي بيضه چنها كطنه.
بقيت صافن عليها فاتت لغرفتها واني تدودهت نزلت وحتى نسيت اني على شنو صاعد
وبقيت الوكت كله صافن واتخيل شكلها كأنه مشايف مره بحياتي .
بلسم:-
صارت ساعه ٤ العصر وجان يندك الباب
بلسم:- اتفضل.
رقية:-شلونج خاله بلسم.
بلسم :- هلو حبيبتي تعالي تعالي.
سدت الباب وبقت واكفه وبيدها كتاب ومترددة.
بلسم :- كولي حبيبتي اساعدج بشي؟
رقية:- هااا ..... اي لا.
بلسم:- ابتسمت بوجهها و رحت عليها كعدت على ركبتي حتى اصير بمستواها.
بلسم:- رقاوي حبيبتي تره اني مو شريره مثل نسوان الاب بالقصص والمسلسلات
بالعكس كلش حبيتكم انتي وعلاوي و الحجية وعمتج سهاد كلكم حبيتكم ومستحيل أأذيكم .. ومثل ما كلت لعلاوي هالحجي راح ارجع اكوله الج.
لاتعتبريني مرت ابوج اريدج تعتبريني صديقتج او اختج الجبيرة واي شي تحتاجين تعاليلي اني اساعدج.
رقية:- مو خالتي رجاء تكول ديري بالج منها هاي وحده شرانية و راح تاخذين ابونا من عدنا وتشمرينا بالشارع.
بلسم:- استغفر الله واتوب اليه . لا حبيبتي مستحيل اسوي هالشي وبمرور الايام راح تعرفيني اكثر ومره ثانية اذا خالتج حجت هيج كدامج كليلها عيب هذا الكلام ابوية مايرضى . اتفقنا؟؟
رقية:- اتفقنا 😊.
بلسم :- هههههه يلا كليلي شنو تريدين اقريج؟
رقية:- انكليزي موزينه بي مااحبه.
بلسم:- لييييش بالعكس الانكليزي كلش حلو وهسه اعلمج طريقه اخليج تتقوين بالانكليزي اكثر وتحبيه هم.
اخذت رقية و رحنا لغرفتها وكعدنا نقره اني وياها واعلمها شلون تقوي اللغه وماشاء الله على الذكاء الي شايلته هالبنية .
ضرغام :- صار العصر و فتت سبحت و بدلت ثيابي حتى اروح للديوان
طلعت شفت علاوي يلعب بالحديقه صحته
علاوي حبيبي تعال بوية هاك فلوس و روح اشتري الك ولخواتك مروة و رقيه ..
بعدين تذكرت انه صعدت اطمن عالبنات وشفت هالمكموعه طالعه من الحمام و نسيت نفسي.
ضرغام:-
صعدت مره ثانية وشفت باب بلسم مفتوح شوية و صوت رقية يمها بقيت واكف اريد اسمع شديحجون.
وسمعت حجي بلسم وشلون اتطمن كلب رقية وسمعت رجاء شحاجية وشلون تحرك بنتي وتحجي براسها . عقل ما ظل براسي كلت بس اشوف هالرجاء الا ازفها .
نزلت بسرعه رحت للديوان وبالي يم بلسم و شكد عجبتني ردة فعلها من حجي رجاء وتداركها للموقف بدون ماتقلل من احترام رجاء كدام رقية لأن مهما يكون هي خالتها.
بلسم:-
صار الليل و نزلت اسوي عشى وية سهاد كملنا عشانه و غسلنا مواعين وطول كعدتنا ضرغام مانزلت عينه عني .
واني ارتبكت حتى عشى ماعرفت اتعشى.
شربو الجاي وسوالف منا ومنا وفلاح بس يتشاقه وية البنات ويضحك .
ضرغام:- ولك فليح يلا ماتفضها شوكت تتزوج؟
فلاح:-بعد وكت يا خوية مصار يومين على سنة مرتضى.
ضرغام:- وليش الانتظار ؟؟ مرت سنة اخوك والبنية دتنتظرك والحمدلله الله منعم علينا ورازقنا شنو الحجه بعد؟
الحجية:- صحيح حجي اخوك شمنتظر وليدي حتى عيب من الاوادم شتكول علينا ؟ وانه اريد افرح بيك واشوف بزرك قبل ما الله ياخذ امانته.
فلاح:- اسم الله عليج يمه عمرج طويل ان شاء الله. خلص هالاسبوع اكمل تجهيز الغرفه و وراها نحدد العرس .
ضرغام:- على بركة الله .
بلسم:- سلمت عليهم وصعدت لغرفتي حتى انام .
ثاني يوم جان يوم جمعة من الصبح اجتي رجاء الحية وامها . بحجة ديشوفون رقية وعلاوي
كعدنا سوينا الغده اني وسهاد واشوف فلاح خطيه يلوب و ضايج انقهرت عليه صبينا الغده وهو ماقبل ياكل .
شفته ديريد يطلع للحديقه كتله ها فلاح ليش مااكلت؟
فلاح:- مااشتهي والله بس تكدرين تصبيلي جاي؟
بلسم:-اي تدلل من عيني.
طلع فلاح للحديقه وكعد واني دااصب جاي جان تفوت رجاء
رجاء:- تهي بهي مو اكولن بنات بغداد ما يستحن وعينهن ماتنكسر محد يصدكني.
بلسم:- شنو قصدج؟
رجاء :- ماتستحين لازكه للولد شعليج انتي اتغده ولا ماتغده. لو هي عياره؟
بلسم:- هنا صدك صرت عصبية وكلتلها ولج شكد نكسه انتي وتفكيرج انكس. وخري من كدامي لا اطلع قهر الله بيج.
رجاء:- يمه خوفتني الفصلية ههههههههه والله يا الله
روحي روحي وديله الجاي يالحنينة هههههههه.
بلسم :-استغفرت ربي واخذت الجاي وطلعت وديته لفلاح وشفته صافن .
اتفضل هذا جايك.
فلاح:- اي والله اخيتي عاشت ايدج.
بلسم:- الف عافيه..فلاح؟
فلاح:- نعم؟
بلسم:- ليش احسك ماتريد تتزوج بثينه واسفه عالتدخل بس اني اشوف بيك محمد واسامة اخوتي .
فلاح:- تدرين انتي الوحيده الي انتبهت على هالشي .
بلسم:- كعدت يمه وكتله زين ليش؟ بثينه كلش تحبك.
فلاح:- ادري بيها تحبني وخوش بنية
بس انه من جنت اداوم كلية حبيت طالبة وياي وصارت بينا علاقة وردت اخطبها بس كلتلي اهلي مايقبلون اعيش بمحافظات كلتلها مو مشكله اخذ بيت ابغداد ونكعد بي انه وياج
شو هاي صارت كل يوم تطلع حجه شكل. وحسيتها تتهرب مني.
لحد مابيوم سمعت بيها انخطبت لأبن صديق ابوها
واني انهاريت وشفتها حتى ماعاتبتها لأن شيسويلي العتب؟ بس قهر زياده.
اتخرجت ورجعت للبصرة بس الدنيا طافره من عيني
شفت بثينه واهتمامها بيه وقررت اخطبها عسى ولعل انسى حبيبتي القديمة. بس الي صار انو لا كدرت احب بثينة ولا كدرت انسى.
وهسه حاير خايف اتزوج واظلم بثينه وياي.
بلسم:-ماتدري يمكن من تتزوجها وتعاشرها تكوم تحبها؟ جانت امي دائماً تكلي اخذي الي يحبج و لا تاخذين الي تحبيه لأن الي يحبك راح يتقبل عيوبك و يتحملك و بثينة وردة مال الله تحبك وتخاف الله بيك و صدكني راح تسعدك وبالنتيجة انت هم راح تسعدها.
فلاح:- ارتاحيت نوعاً ما من حجيت وية بلسم شكثر مثقفة و واعية هالبنية الله يحفظها ويهدي اخوي عليها .
بهالاثناء ضرغام صاح رجاء يريد يعاتبها على كلامها وية رقية
ضرغام:- رجاء تعالي عندي حجايه وياج.
رجاء راحت طايره:- اي ابن عمي جيت.
كول عيوني انت .. أمر.
ضرغام كاعد عالتخم وبيده سبحته وأشر بأيده عليها:- انتي شلون تسمحين لنفسج تحجين براس بنيتي رقية و تنحشيها على بلسم؟
رجاء:- انه ما قريت براسها انه حجيت واقع .
ضرغام زمخ بيها وكام على حيله:- يا واقع هاذ؟ هاااا انه فاتح بيتي الج ولأهلج حتى تجين تسوين مشاكل وطلايب..
شوفي يا رجاء اذا مره ثانيه اسمع لو احس حاجية حجاية لو متصرفة تصرف يمس بيتي واهل بيتي تره ماتلومين الا نفسج.
رجاء بمكر :- انت ماتصدكني عبن هالبنت لاحسه مخكم وماتشوفونها شتسوي من وراكم.
وماتصدك شوف بعينك من الشباك شلون لازكة بفلاح وتحاول تتقربله وهاااا هاي مو اول مره دائماً اشوفها تتمضحك وياه عبنه هو شاب وبعمرها مو اكبر منها 😏.
ضرغام فتح الستاره وشاف فلاح وبلسم ديسولفون بالحديقة ويضحكون
اندار على رجاء وضربها راشدي
ضرغام:- امشي اطلعي بره لا بارك الله بيج وانه عندي حجي ثاني وي عمي واذا مره ثانيه شفتج داخله هالبيت لا اكص رجلج واعلكهن بالباب
امشي اطلعي بره .
رجاء كامت تبجي وتكول:- يجي يوم تعرفها على حقيقتها بنت بغداد الصايعه واخذت عباتها وامها وطلعت .
وانه كبل طلعت للحديقه :- شعدكم كاعدين هنا؟
فلاح :- هلا خوي ماكو شي بس بلسم جابتلي الجاي و سولفنا على تحضيرات العرس.
ضرغام يباوع على بلسم و يعصر ايده:- كومي كدامي فوتي جوه كاعده وتتمضحكين لا حياء ولا مستحى.
بلسم:- يا الله بلشنا .
ضرغام:- شلون ولج؟؟ ماسمعت؟؟
بلسم:- ولا شي داخله .
ضرغام:- وانت فضها يلا و خابر على بيت خالك اليوم نروحلهم نحدد يوم العرس .
فلاح اتنهد :- ان شاء الله.
ضرغام دخل وهو يفكر بكلام رجاء ساعه يستغفر ويتعوذ من الشيطان وساعه دمه يفور ويريد يصعد على بلسم يشرب من دمها.
الحجية:- يمه ضرغام ليش طردت بنت عمك؟ خابرني عمك يعتب ويكول ماظل عند ابنج احترام.
ضرغام:- انه عندي كلام ويه عمي لأن هاي بنته وحده ساقطة ومايشرفني تكون بنت عمي ..
تجيب سيرة بيتي بالشين والله احطن جيله براسها واخلص منها .. كاعده وتحرض بنتي عليه وعلى بلسم .
الحجيه:- اووووف كم مره كلتلها جوزي من البنية تره يجي يوم ويعرف ضرغام
وما جازت .حسبي الله ونعم الوكيل.
كوم يمه كوم اتوضى وصلي ركعتين لوجه الله كون تهدأ اعصابك وعمك انه عندي حجي وياه.
ضرغام :- لايمه لاتحجين انه اليوم اروح وافهمه .
صار العصر و رحت لبيت عمي وسولفتله الحجي الصار
عمي مارضى على بنته و كلي :- يبه انه اعتذر ماجنت اعرف الحجي كله
وهاي رجاء انه ارجع اربيها من جديد ومااخليها توصل صوبكم .
ضرغام:- عمي انت ومرت عمي على عيني وراسي بس هاي رجاء اذا شفتها دخلت بيتي تره مايصير خير،
العم:- مايصير خاطرك الا طيب وبنتي انه اعرف شلون أأدبها.
طلعت من بيت عمي وانه سالفه توديني وسالفه تجيبني رجعت للبيت اخذت الحجية و فلاح ورحنا لبيت خالي وحددنا موعد العرس الاسبوع الجاي.
رجعنا للبيت و البنات حضرو العشى بس انه بالكوه اكلت بسبب رجاء وكلامها
انه واثق من اخوي فلاح مستحيل تطلع منه الشينه
بس هالبنية غريبه صح ماشفت منها العيبه عدا لسانها الطويل بس هذا مايمنع انو تحط عينها على اخوي خصوصاً انه اكبر منها بهواي و ماتقربت الها وهي بعدها شابه وتريد تحب وتنحب. اصفن اصفن و بعدين احس على روحي واتعوذ من الشيطان واستغفر.
مشت الايام و اجه يوم حنة فلاح وچان البيت مخبوص و البنات ديتحضرن ديروحن لبيت العروسة
وانه لابس ثيابي وعباتي ولازم سبحتي بأيدي وكاعد بالمطبخ انتظرهن يخلصن حتى اوصلهن.
نزلت سهاد ومروه ماشاء الله مروه كبرانه صايره مره وحلوة .
ونزلت رقاوي ولابسه فستان وردي و وراها نزلت بلسم 😳 .
بلسم:- اجه يوم حنة فلاح وجنت كلش متحمسة لأن هالسنه جان روتين فضيع بس شغل واكل اي حماس ماكو.
البنات حضرو ملابسهم وسهاد كالت:- حبيبة وانتي شراح تلبسين؟
بلسم:- عندي فساتين هواية راح البس واحد منهم .
رحت ولبست هذا الفستان.
وحطيت هذا المكياج وسرحت شعري وفتحته.
فاتو عليه البنات و جان سهاد تفتح حلكها:- 😮
اللهم صل على محمد وال محمد اكلج حبيبة انتي متأكدة اصولج عراقية؟ يعني لا لبنانية ولا اجنبية..
بلسم:- ههههههههه ليش شبيهن العراقيات يجننون .
مروة و رقية:- الللللله خاله طالعه عبالك فنانه.
سهاد :- اويلي عليك يا خوي شنو حيصير بيك.
بلسم:- خجلتوني والله .
نزلنا كلنا و صار ضرغام بوجهي .
ضرغام:- شفت بلسم وياريتني ماشفتها
طالعه تجنن هالطركاعه واكيد حيشوفنها النسوان ويحجن بيها
شسويت بروحي انه؟
كمت على حيلي و رحتلهن.. يلا فضنها البسن العبي و لفو الشال زين شعراية مااريد تطلع من الشال .
راحن البنات ديلبسن العبي مالتهن وانه وكفت بطريق بلسم ماخليتها تنزل.
ضرغام:- البسي عباتج و دكميها زين و شعرج هذا مايطلع من الحجاب
توصلين هناك بنص النسوان يلا تنزعيها ومن يدخل فلاح يحني عروسته تلبسين عباتج و حجابج وتكعدين. افتهمتي لو ارجع اعيد؟
بلسم:- افتهمت.
ضرغام :- عفيه.. وخففي حمرتج .
بلسم:- ليش؟ تره رايحين حفلة و هذا اللون حلو علية.
ضرغام:- اتقربت عليها وكلتلها هو لأن حلوعليج اريدج تخففينها .
بلسم:- اتقرب عليه وانفاسه يم اذني و عطره فات بخشمي تجمدت بمكاني
وكلي لأن حلو عليج اريدج تمسحيها .. اني ماادري ارتبكت مدري خجلت داانزل و عثرت من الدرج ردت اوكع على وجهي. فوكاها ضرغام حاصر ضحكته ويكول الله الله على كيفج. بوكتها اتمنيت الكاع تنشك وتبلعني من الفشله ..
خففت حمرتي ولبست العباية وطبكتها للنهاية والحجاب لفيته وناقص بس البس بوشيه حتى ضرغام يرتاح.
صعدنا بالسياره وطول الطريق ضرغام يباوع عليه بالمراية هذا شبي والله محد راح يخبلني غيره كل يوم بشخصية،
وصلنا ونزلنا وعين ضرغام تراقب اخاف احد من الرياجيل موجود.
دخلنا وجان حس الاغاني عالي وشفت بثينه طالعه تجنن
هي شعرها اسود وطويل يموت و عيونها كبار والحلك سمسماية. لعد شبي فلاح ما حبها والله تشبه الكمر.
دخلنا ونزعت عباتي و الشال والنسوان يتشاورن بيناتهن جان وحده تنط
حجية هاي بنيتج؟
الحجية :-لا يمه هاي مرت الشيخ ضرغام.
واسمعهن يتشاورن يااا هاي الفصلية والله عمي خوش فصلية حلوة.
بلسم:- اني ضجت من كالو فصلية بقيت كاعده بمكاني وكلساع وحده تجي تسأل خالتي عليه .
وراها كالو العريس راح يدخل يحني العروس
اني اتذكرت حجي ضرغام كمت لبست عباتي ولفيت الشال وكعدت يم خالتي.
دخل فلاح و جان اشوف ضرغام دخل وياه وعينه تدور منا ومنا جان يشوفني وابتسم ونزل راسه.
ضرغام:- دخلن البنات لبيت خالي واني لابت روحي
وراها رحت لحفلة فلاح لأن بغير مكان الكل فرحان ويهوس بهوسات ويركص چوبي و راها كالو خلي العريس يروح يحني العروس
انه هنا كبل رحت ويه فلاح كلت ادخل وياه اشوف بلسم راح تسمع كلامي وتلبس من يدخل فلاح
دخلنا و استقبلونا النسوان بالهلاهل بس اني منزل راسي و ارفع عيوني شوية اريد اشوفها وينها
وجان اشوفها كاعده يم الحجية ولابسه عبايتها و شالها.. فرحت كلش ونزلت راسي وابتسمت ...
خلصت الحفلة و رجعت البنات للبيت .
شكرا لزيارتكم عالم روايات سكيرهوم
