رواية ليلي والذئب الفصل السابع بقلم جمانه السعيدي
ليلى...نزلت من السياره مشيت وكفت كبال المحل
اي ولله هو محل ميمون
دخلت جوه ثنيين ولد شباب يبيعون بالمحل واكو نسوان
تشتري جوه
اتقدمت على أول واحد
ليلى...السلام عليكم
...عليكم السلام
ليلى...من رخصتك وين الولد الي جان يشتغل هنا اسمه ميمون
....ميمون باع المحل علينا صار شهر ونص
ليلى...ليش هم تعرف ليش باع المحل
...اعتقد مطلوب فلوس هيج هو كال
ليلى....هو كال مطلوب
....اي كال اني مستعجل على بيعت المحل لان مطلوب
ليلى...هاااا هيج الحجي
....ليش محتاجه شي اذا تردين شي تفضلي راح نسويلج خصم
ليلى...لا شكرا
طلعت برا احجي ويا نفسي شنو مطلوب والمن مطلوب
انطلب على المحل
لو اكو شي ثاني اني مااعرفه
قبل قضية سمر كان يسحب مني فلوس المليون والمليونيين
ومايرجعهن
ليش انطلب شنو السبب وليش ما حجالي ليش ماكل مطلوب تعاي ساعديني
شو مااذكر مشتري شي ولا علي ضغوطات بلبيت مثل المصرف
خاف اهله محتاجين
جان سمعت هيج خبر ما ينظم ابد
والمحل جان يشتغل خير من الله
بعد شنو المشكله
لازم ادقق ورا واعرف ليش باع المحل هو و بضاعته
جبت كم حاجه من السوك مو كل الأشياء الي رايحه عليهن
لان نسيت اني شمحتاجه
هلكد ماا هاي الشغله شغلة بالي
جمانه السعيدي
رجعت للبيت خليت المسواك هو نايم
قررت لازم اتابعه وافتهم شنو القصه
كعد المغرب دخل سبح واني حضرت العشى
خليت الاكل كعدنا اني وياا وعلاوي
ليلى...شنو الوضع
ميمون...من اي ناحية
ليلى...بلنسبه للمحل مراح ترجع مو هذا المكياج اغلبه
تنتهي مدة صلاحيته ويصير اكسباير
ميمون...لا اكيد راح ارجع ناوي ارجع وانزل بضاعه جديده
واشتغل احسن من قبل
ليلى...زين تمام يمتى انشاء الله
ميمون...... بهل الايام
ليلى...زين اريد كم شغله شامبوات على كريمات
وواقي وحمره وكحله
ميمون...اي ميخالف اني اروح واجيبلج
ليلى.. اني اروح وياك واختار الأشياء الي تعجبني
ميمون...لا ماكو داعي اني اعرف ذوقج شنو اني اجيبلج
ليلى...اني اريد اروح
عاط بيه بصوت عصبي
ميمون...اهووو شكد تلحين مو كتلج اني اجيبلج
ليلى سكتت مااريده يشك بيه لو يكون حذر مني
حتى اكدر افتهم شكووو شصاير من وراي واني ماادري
جمانه السعيدي
طبعا هو طول هاي الفتره ال٣ اشهر
ياخذ مني مصرف
يعني مو يكول انطيني لا اني اخلي فلوس بلكنتور
وهو ياخذ منهن
٥٠ مرات ١٠٠ مرات اكثر يكول ذني قرضه
من ارجع للشغل ارجعهن اللج
اني ما تهمني الفلوس لان هو هسه كاعد واني اشتغل
اني مااريده يطلع وجيبه فارغ كدام جماعته
الموضوع عادي كان بلنسبه اليه
بس شغلة بيع المحل مدوختني وليش ماحجا وياي بهذا الموضوع ليش اعرف من غيره
سكتت ثاني يوم هو نايم حاولت افتح تليفونه
لازم الكه شي بلتليفون يخليني افتهم
هو كل الوقت تليفونه بايده مايفاركه ابد
شكد حاولت افتح رمز التليفون بدون فائده
انتظرته لمن يكعد
ليلى...هلو حبيبي
ميمون...هلوووو
ليلى...يله حضرت العشى كباب عروك اعرف انت تحبه
ميمون...اي اجيت
ليلى...حضرت الاكل وكعدنا ناكل اني ويااا
واسولفله على المحكمه والقضايا كملنا اكل جبت الجاي
هو خال تليفونه على الشحن
ليلى...حبيبي ممكن اتصل من تليفونك باامي
ماعندي رصيد والخدمه خلصت من تليفوني
ميمون...اتصلي على اختج واحجي وياا امج
ليلى...اشتراكهم اليوم خلص
ميمون... هسه دقيقه
ليلى...اني اجيبلك التليفون
كمت نزلت التليفون من الشحن وانطيته اله
اخذ التليفون كدامي وفتحه شفت الرمز
اتصلت على امي حجيت وياها شويه ورجعتله التليفون
اليل كله تليفونه مانزل من ايده
اني تعبت ونمت وهو بعده كاعد
الصبح كعدت متأخره اخذت ابني ورحت الاهلي ومناك طلعت للمحكمه
بيومها مااعرف شلون خلصت شغلي بلمحكمه
لان فكري كله يم ميمون والف سؤال اجا بالي
ليش باع المحل والمن مطلوب
رجعت للبيت بعده نايم
اخذت تليفونه وطلعت برا فتحته
دخلت على البرامج واحد واحد
جمانه السعيدي
وهنا لكيت المصيبه الأكبر من بيعت المحل
شي وكف عقلي محادثه كلبت كياني
لكيت محادثه بين وبين ولد صديقه
صديق ميمون....يمتى تسدد مو الفلوس جاي ازيد عليك
هاي الفلوس كل شهر ازيد اكثر
ميمون ...انطيني مجال كم يوم بعدني ما بعت الذهب
خاف ابيعه وانكشف
اصبر عليه شويه توني انطيتك فلوس المحل
صديق ميمون...يعني شكد اصبر مو طولت عليه
ميمون...اخاف خاف بعدني مراقب وهذا الولد هاشم بعدهم
ما عدمو بعدها القضيه
خاف ابيع الذهب وانكشف
صديق ميمون...لا تتأخر عليه
ليلى...جمدت بمكاني الذهب هذا اكيد ذهب
سمر
كعدت بلكاع مااكدر اوكف على حيلي ميمون
هو الي قتل سمر علمود الذهب
واني ذبحت نفسي حتى يطلع من هاي التهمه
وذاك المسكين راح ينعدم بسببي
معقوله هو هذا ميمون الي ازوجته شلون اتحول هيج قاتل
يعني قتلها علمود الذهب
هيج القتل شي سهل علي
على شنو مطلوب وليش يبيع المحل ويقتل علمود هذا الدين
منيين اجا هذا الدين
لازم ابقى ورا واعرف هو ليش مطلوب
وهذا الطلب يخلي يقتل سمر حتى يحصل الذهب
معقوله انسان طبيعي يقتل ويكدر يمثل البرائه الهلدرجه
شلون صدكته شلون وثقت بي
ميمون صار خطر عليه وعلى ابنه لازم ياخذ جزائه
موبعيد اذا يحتاج فلوس وماانطي يقتلني مثل سمر
الي يقتل مره اتصير عنده الشغله كلش عاديه
يقتل الف مره
هاشم لازم يطلع من السجن لان مايصير ينحكم بمكان ميمون
اني الي دخلت هاشم السجن
واني الي راح اساعده حتى بطلع منه
اخذت سكرين للمحادثه بينه وبين صديقه وحفظته بتليفوني
جمانه السعيدي
كعد ميمون وطلع يغسل
راسا رجعت تليفونه المكانه
لازم اتصرف طبيعي ميمون صار خطر
اذا اكتشف اني عرفت هو قتل سمر
يمكن يقتلني وراها
بس شلون راح اكدر اسيطر على نفسي
حضرت الاكل تغدينا وهو استغرب مني
ميمون...شبيج اليوم شكلج مو طبيعي
ليلى...لا بس تعبانه من المحكمه اريد اكمل غده وانام
ميمون...انتي كل يوم بلمحكمه شمعنا اليوم
شكلك كله متغير
ليلى... اليوم عدنا هواي قضايا وبقيت واكفه كل النهار
ميمون...اخذي استراحه كم يوم
ليلى...اي هي هم هيج الضاهر لازم ارتاح
بس عندي قضيه اريد اخلصها وارتاح
ميمون...زين
ليلى...ترجع تنام لو تطلع
ميمون...لا راح اطلع اكو ولد صديقي من زمان ما ملتقي بي
ليلى...زين اني راح انام
ميمون...تمام
ليلى.. اخذت ابني بحضني وسويت نفسي نايمه
وهو سبح وبدل وطلع
نومت ابني وكمت اريد ادور الذهب وين وين ذهب سمر
اذا لكيت الذهب هذا اكبر دليل يدين ميمون
اكيد الذهب بيتنا لعد وين يخلي
اني بعد ماعرفت هاشم بريئ مستحيل اسكت
واعوفه ينعدم والمجرم الحقيقي برا يلعب
مستحيل اسكت
اذا انعدم هاشم اني اكون شريكه بهاي الجريمه
ماخليت مكان بيتنا مادورت علي غرفة النوم غرفة الخطار
المطبخ
ورا الطخم ورا الطباخ ورا الغساله
بلفراشات ماكو كلشي مالكيت
صارت الدنيا ليل واني تعبت حيل لان كل شغله اطلعها لازم ارجعها المكانه
حتى ميمون ما يشك بيه
تعبت حيل دخلت سبحت وحضرت الاكل وبقيت منتضرته
للساعه عشره بليل يله رجع
اتعشينا هو بقى كاعد واني تعبت حيل دخلت نمت
ثاني يوم جمعه ماعندي محكمه
كعدت الصبح وقررت ادور بعد اكو عدنا غرفه زغيره
اني مسويتها مخزن
غرفه ٢× ٣ اخلي ببها فراشات الشتا والمكنسه الكهربائيه
والحصه التموينه واي شي زايد بلبيت
سديت باب الغرفه الي نايم بيها ميمون
وبديت ادور على كيف مااريد يطلع اي صوت
خاف يكعد ويكشفني
فتحت الفراش كلشي مالكيت
دورت سطل التمن والشكر العدس كلشي مالكيت
اخير شي وكعت عيني على سطل صبغ احنا خالين بي عده
درنفيسات وبراغي وبلايس وجاكوج
وبعد غراض ناعمه هواي
فرغته وحده وحده على كيف مااريد يطلع صوت قوي
اخير شي لكيت علاكه سوده جوه الغراض
فتحته لكيت بيها علاكه ثانيه فتحتها بيها الذهب
يايمه عززوا هذا ذهب سمر
شكرا لزيارتكم عالم روايات سكيرهوم
