رواية أرض الخناجر الفصل السابع والثمانون بقلم ايلول
صــيهد:: خاب شني عود بس انتَ خالها لا اطيح حظك.
ضحك وعمه صاحت عليهم
-جا يمه ليمت تطبخون تضحكون علينه لا خليتونه نطبخ ولا انتم فضيتوها وطبختوا.
حركتهم حرك خلتهم كلمن يركضله ذبحوت خروف وشعلوا البريمزات بالحوش يطبخون، واحنا وهوستنا وهوسة الجهال تارسه بيت كهلان وفرحتنا كامله لان بــدور موجوده وكلمن يسولفله بصفحة
كمت وي ريـــمه للمطبخ نعاينن للولد من الشباج يضحكون ومتعاندين وي ســليم هوه يحرك گلب مــيثم بماريا وصيهد يكله
-الا اخذ بنتك الحلوه الابني
ســليم:: والله ما انطيها لو تبوسون الگاع سنتين عليتوا گـــلبي محد منكم كض مــيثم ورزله.
كهلان:: انا وكفت وياك
-ولا واحد منكم وكفلي
ركضوا وراه يردون يكتلونه طلع بره الحوش يضحك الد ما كملوا الغده صبينه ومدينه سفره وحده على طول الدوانيه همه كعدوا بصفحة واحنا كبالهم وكل وحده بينا جهالها بحضنها، بس كهلان حاط عبد الله سمه يوكله ويساعد ريـــمه عليهم.
شلت راسي مبتسمه اعاينلهم واحد واحد ياكلون ويسولفون هوستهم تارسه گـــلبي فرح.
الوره الغده همه ضلوا بالدوانيه يلعبون بلي واحنا بالهول نسولف اعاين بوجوه الكل مبتسمه واكتب كلشي لحظة بلحظة.
رغد كاضه بنتها فردوس وكاعده هيه وماسه على صفحة يسولفن ، وماريا وبدور وي عمتي ايمان، وريمه وجويريه وندى هم على صفحة يسولفن وهاجر وزهره. وشمس وحور الكل عنده شخص مقرب .
للعصر بدوا ينسحبون واحد وره الثاني طلع صــيهد للحوش. وصاح على جــويريه مشوا هيه وكرار وليال ووتد وكفوا بالحوش هوه يحجي وي الولد واحنا نحجي وياها سلموا
وراهم صاح وهـــب
-يله بويه وينكم
كامن ندى وبدور وعمه ورضا طلع گبلهة اخذن فاطم وليث ابن بــدور ومشوا .
طلع مــيثم ومشت وياه مــاسه وجهالها أمير وحور وشايله بأيدها ريم سلموا وراهم وسلطان وسليم طلعوا بنفس الوكت .
واكثر يوم ضحكت وفرحت بيه اجه ببالي ابلغ الكاتبة يكون هاليوم هو اخر ذكر لاراضينا وقريتنا اللي تغيرت كلها.
رجعت للبيت وبالليل طلعت كعدت بالمرجوحة راسلتها احجيلها عن هاليوم وأشاركها صور تخصه اتفقنا يكون هذه اخر المحطات.
شلت راسي من التلفون دخل بريا كعد يمي بالمرجوحة سندت راسي على صدره هادئه والابتسامة ما تفارگ شفتي
-بريا
-عيونه.
-احبنك.
لمني على گلبه بأثنين اديه
-اموتن عليج بدويتي
النهاية لم تكن بتلك السعادة كانت تحمل جراحاً لا تشفى الى الابد
══━━━━✥◈✥━━━━══
دخلنه اراضيهم وعشنا وياهم اشهر طوال يصعب عليَّ اختمها بس لكل بداية نهاية🥹💚
الله يرحم كل الارواح اللي نقتلت بسبب وبدون سبب اتمنى السعادة للكل واتمنى يجي يوم واسمع شمس دكتورة مثل ما امها رادت
وان شاءالله اذا بقينا عدلين البعد عشر سنين وربي طول اعمارنه، وصارت وي اولادهم احداث تستحق تنروي راح انزل جزء ثاني يخصهم💚
الـــريحانات 🌱حبيبات الروح
انتم اساس كلشي الله لا يحرمني من وجودكم.
استودعكم الله 💚
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
