 |
اسكريبت حب حياتي كامل بقلم تيرو
"كُل مره أشوف صورة ليكِ أقولك إنها أحلي صورة، إكتشفت إن كُل صورك أجمل من بعض!"
لقيته بعت المسدج فضلت أبص لها و أركز و اسأل نفسي..
مُعجب و بيلمح
مش بيلمح و أنا موهومة..
مُعجب بيلمح و لا أنا موهومة
مُعجب بيلمح و لا أنا موهومة..
وبعدين هفضل فـ الدوخة دي كتير!
يخربيت التلميحات.. ما مُعجب بيا يتنيل يتكلم بصراحة.
فضلت ألعب بأدوات الرسم اللي معايا، و أعمل أشكال و أشخبط عليها و أنا بفكر، ماهو أنا أول مره أتحط فالموقف ده، و مش بحب أتحط فحاجة تحير عقلي كده.
يا أبيض يا أسود
ده مبدأي عمومًا، و خصوصًا في علاقاتي مع أي ولد فحياتي.
يا أما بنحب بعض و بينا علاقة.
يا أما مانعرفش بعض خالص و مافيش بينا كلام.
لكن جو الاستعباط ده أنا ماعنديش خُلق ليه.
"و يمكن مش مُعجب بيكِ؟"
"مش مُعجب بيا إزاي!
بقولك بيقولي كلام حلو قوي."
"عادي ياستي بيجاملك."
"لا مش بيجامل، مش بيرُد بالشكل ده غير عليا أنا."
"مين قالك!
ما جايز هو شخص مُجامل، كلامه حلو مع كل الناس بيقولوا عليهم سويت توكر أو رجالة برج الدلو!"
"تصدقي أنا ماعرفش هو برج ايه!
بس بدخل أشوف كُل تعليقاته عند كُل البنات، يا أما كلام عادي خالص يا أما مش بيعمل كومنت أصلًا."
"حورية يا حبيبتي
مش معني إنه كتب لك كلام حلو على صورك فكُل مره بتنزلي فيها صور إنه مُعجب بيكِ و هيتجوزك!"
"اُمال بيقولي كلام حلو ليه؟؟"
"عادي يا حبيبتي، مُمكن اه يكون مُعجب بيكِ بجد، بس مش لدرجة إنه يتجوزك يعني!
إعجاب و خلاص، مُجرد بنت حلوة
و طبعًا الولد مايقدرش يحوش نفسه قُصاد أي بنت حلوة تعجبه."
"يعني ايه!
بيقولي كلام حلو و مش هيتجوزني!!"
"اه طبعًا، مُمكن جدًا."
"لأ معلش..
أنا اللي مُعجب بيا يجي يكلم أبويا على طول."
ماقتنعتش بكلام "ليلى" صاحبتي لا
وبعدين يا حورية!
هتعملي ايه!
هتسبيه كده يتكلم معاكِ و يقول أي كلام براحته.
إذا كان هو مُعجب بيا و بيكتب ليا كلام حلو على صوري، أنا كمان مُعجبة بيه أضعاف بس عُمري ما أروح أقول!
"أعمل ايه عشان ألفت نظره!"
"ماتعمليش حاجة."
"يعني ايه ما أنا عايزاه يكلمني."
"ماهو لو عايز يكلمك هيكلمك."
"طب مش بيكلمنى ليه؟"
"الله أعلم."
"ماشي أنا عايزاه يكلمني و ياخد خطوة أعمل ايه؟"
"سبيه هو اللي ياخد الخطوة و تيجي من نفسه مش منك!"
"أنزل صورة جديدة ليا طيب!"
"لأ."
"أجرب يمكن يتكلم!"
"قولت لأ."
"حاضر هنزلها حاضر."
أبان إني أوڤر، لكن الحوار كُله إني مش متعودة إن حد يعاملني بالرقة دي، و يقولي كلام حلو كُل شوية..
و المُشكلة الأكبر إني حاسة إنه مُعجب بيا و مش عارف يتكلم إزاي، و مُتأكدة إن إحساسي صح
ماهو كُله إلا إحساس البنات، و بالذات لما يكون واحد مُعجب بيها بتبقي عارفة و فاهمة من أول الحكاية خالص، بس بتعمل نفسها عبيطة لغاية ما يعترف لها بنفسه و من تلقاء نفسه، وقتها بتبقي لحظة إنتصار عالعالم كله.
خدت القرار و قولت يحصل اللي يحصل، لو حصلت أي حاجة تضايقني أو تحرجني الموضوع هيخلص بـ بلوك و كأنه ماحصلش.
"لو سمحت أنا عايزة أقولك حاجة."
"يانهار قمر!
حورية بنفسها داخلة تكلمني!
أنا مش مصدق و الله."
"ليه يعني؟"
"ليه ايه!
تخيلي القمر هيكلم إنسان!
معجزة تخترق الطبيعة!"
"مُمكن نتكلم عادي بدون مُجاملات."
"و مين قال إني بجامل
واضح إنك محتاجة تقفى قصاد مرايا."
"طب أنا مش عايزة أسمع الكلام ده تاني!"
"ليه بس؟"
"عشان بمُناسبة ايه!
أنا مابحبش أسمع كلام لطيف من شخص غريب، مش من البنات اللي بتفرح بالكلام ده، مش برتاح نفسيًا كده."
"بس أنا ماعملتش حاجة غلط و لا ضايقتك!"
"بتجاملني طول الوقت و بتقولي كلام حلو، تقدر تقولي ليه بتعمل كده!"
"عشان دي الحقيقة، أنتِ جميلة و أنا ماشي بمبدأ الحلو أقوله يا حلو فعينه."
"يا سيدي أنا مش عايزة، ده بيضايقني."
"خلاص اللي يريحك..
طب أنا دلوقتي عندي مُشكلة.
لما أعوز أقولك إنك حلوة، أقولك إزاي!"
"ماتقوليش."
"ماقدرش."
"مُشكلتك مش مُشكلتي."
"أول مره أشوف واحده بترفُض تسمع كلام حلو من خطيبها."
"خطيب مين!!"
"مش أنتِ حجتك إني شخص غريب فمش عايزة تسمعي مني كلام حلو..
سهلة و محلولة
أبقي قريب، و وقتها نغني سوا ليل و نهار."
"و أنت بقي هتخطُبني عشان تقولي كلام حلو!"
"ايه ده هما بيعملوا حاجة تانية فـ الخطوبة!"
"ماعرفش."
"خلاص نتخطب و نعرف مع بعض."
"أنت بتهزر و أنا مش بتاعت هزار
يا أبيض يا أسود."
"أبيض إن شاء الله."
"هو ايه ده معلش؟"
"فُستان الفرح."
"على فكرة أنا مش بهزر!"
"و لا أنا خُدي بالك..
أنا ماكُنتش عارف أجيبها لك إزاي.. قولت يمكن هي دي الطريقة، أكيد هتعرفي من كلامي إني مُعجب بيكِ، بس واضح إن الكلام ضايقك و مافهمتيش منه حاجة.. فـ واضح إن مافيش حل غير إني اخبطلك الكلام كده وش أول ماكلمتيني."
"عارف لو طلعت بتغني عليا أو بتهزر دلوقتي هعمل ايه؟"
"هتعملي ايه؟"
"هفضل أدعي عليك ليل نهار."
"أفهم من كده إنك موافقة و هتدعي عليا لو طلعت مش جد؟"
"ماقولتش إني موافقة!"
"أنا اعتبرتك موافقة."
"ماقولتش إني موافقة!!!"
"مُشكلتك مش مُشكلتي!"
|شايفاه آه في خيالي
سامعاه آه آه بيقولي
يا حياتي تعالي تعالي تعالي ...|
