 |
اسكريبت زوجتي ومصيبتي ( كامل) بقلم دينا الحمزاوي
ده كان صوتي وأنا مرمي على الأرض في نص الصالة، ماسك بطني وبصرخ زي البطة المشوية.
طلعت حبيبة من المطبخ وهي لابسة جوانتي ومريلة وشها كله دقيق، وقالتلي ببرود:
_ إيه الصويت ده يا زين؟ اتلسعت تاني ولا دي فقرة جديدة في حياتنا؟
_ أنا بموت يا بنت حسن الأقرع... قلبي بيوجعني!
_ قلبك ولا معدتك يا نصاب؟
_ كله بيوجعني يا ست الكوارث، روحي هتطلع.
قالتلي بهدوء غريب :
_ كنت واكل إيه؟
_ نص طاجن بامية، وربع بط، وشوية رز... وحاجة بسيطة كده اسمها جاتوه شوكولاتة.
_ ما شاء الله يعني، ده انت مش واجعك قلبك، ده جسمك كله كده!
_ يا حبيبة بالله عليكِ هاتيلي الإسعاف بسرعة.
_ طب قوم اركب العربية نروح المستشفى.
_ مش قادر أتحرك يا بنتي، حاسس أن روحي هتطلع!.
لقيتها بتقولي بقرف:
_ طب على الأقل اغسل وشك قبل ما تموت، منظر العرق ده يكسف!
_ بتموتيني قبل ما أموت؟!
ـــــــــــــــــــــــــــــــ
المهم، بعد ربع ساعة كنت في الطوارئ، والدكتور بيقوللي:
_ نبضك عالي، أكيد توتر أو أكل زيادة.
أنا بصيتله وانا بتألم:
_ دكتور... أنا كنت باكل حبًا مش أكلًا.
حبيبة قالتلي بصوت عالي:
_ حب إيه يا حبيبي، ده كان بيبلع البط بلع!
_ مدام، ممكن حضرتك تهدي شوية؟
_سيبها يا دكتور، ده أنا متجوزها عشان ربنا يختبر صبري.
ـــــــــــــــــــــــــــــــ
رجعنا البيت وأنا لسه بتنهّد، لقيتها حاطتلي شوربة وقالت:
_ اشرب دي، دي هتهدي معدتك.
شربت منها معلقة واحدة بس، عيوني دمعت فورًا.
_ يا مصيبة! دي شوربة فلفل مش شوربة فراخ!
لقيتها ردة عليّ بكل بلاهة :
_ أصل كنت فاكرة إن الحر بيساعد الهضم.
_ حر؟ ده بيحرق الأحشاء! أنا داخل مرحلة الانفجار النووي.!!
ـــــــــــــــــــــــــــــــ
في اليوم التاني، وأنا نايم على الكنبة سمعتها بتضحك في التليفون.
_ آه يا طنط، لا ما تقلقيش، هو أحسن... شوية تسمم بسيط بس.
_ شوية تسمم بسيط؟! دي كانت تجربة موت يا بنت عم حسن الأقرع!
لقيتها بتقولي بملل :
_ بطل دراما يا كتكوت.
_ كتكوت؟ ده أنا كنت هبقى المرحوم كتكوت!
ـــــــــــــــــــــــــــــــ
وفي نهاية اليوم، وأنا حاطط كمادات على بطني، قلت بصوت مبحوح:
_ منك لله يا حبيبة، والله العظيم كنت هموت.
_ يا حبيبي هو الجواز لو مفيهوش شوية تسمم، يبقى فين الإثارة؟
_ إثارة؟ ده مسلسل رعب مش جواز.
ـــــــــــــــــــــــــــــــ
المهم يا عزيزي نتعلم من الاخ زين ان
لو مراتك قالتلك "جرب أكلي الجديد"، قولها "ربنا يسهل" وامشي.
الجواز مش بس حب... الجواز تدريب على البقاء على قيد الحياة.
وكانت معكم طنط دودو🎀🐥
