رواية قلب مغتصب كامله جميع الفصول بقلم ورود الخالدي
حنان:::
عيني اذا ..انزلج ٢٠ الف من سعر الجنطة لعد شنو ربحي بيها تعرفين محلي ماركات وانتي زبونه قديمة
هاي انتي كلتيها بلسانج زبونه قديمة ..يعني المحل محلي!!
ههههه..اي مو تدللين ..وهاي ال٢٠ الف نزلتهن عود كولي حنان ممداريتني!!!
تدرين بيه ما اكولها اصلا كل صديقاتي خليتهن زبائن عندج وين اكو منج انتي..
اخذت الجنطة ودفعت الفلوس وطلعت ..طبعا مكروهه بس شسوي..لازم اداريها صديقاتها صارن معميلاتي بينما سديت المجرات دك تليفوني باوعت هذا رقم اثير..اهووو بس لا يريد بعد فلوس..فكرت ما ارد عليه يعني نهبني نهيبه بهالشهرين الفاتن ..ميفكر ميكول ..خاف رجلها يحس بالفلوس الي دتسحبهن..خليته يدوك الى ان خلصت الرنه بس هم رجع اتصل شلته
الووو هلو اثير!!
ابشرج!!؟؟
خير ان شاء الله!!
هاي هيه ..خلصت اوراقي واسبوع الجاي اطير لالمانيا!!
اي صلوات..
بس اكو مشكله زغيره
اثير لاتكولي فلوس بعد ولا تجيب طاري فلوس ..ما اكدر اسحب فلوس بعد ابو رائد اذا حس . بيه السالفه نتكلب عليه
هههههه لا..لج يافلوس موشغله فلوس!
لعد
هيج شغله بسيطة
دكول وفضها
سماء!!!
شبيها قندرة!!
ما ..اكدر اخذها وياي مرهمت شغلتها.. ومكدرت اخليها ملحق وياي بالجواز؟؟
شنو مرهمت ..لعد شلون رهمت منى!!
منى مرتي ورهمت ملحق زوجيه !! بس سماء..سالفتها مليوصة لازم اسافر واستقركم شهر وبعدين اسحبها ..!!
ياااا تحجي صدوك؟؟
اي والله راح تبقى هنا تكمل هالسنه كليتها تعرفين هي مرحله اخيرة...واحتمال بالعطلة ادز عليها واسحبها يمي!!
اي وين المشكله عوفها بالشقه وخليلها كم فلس مصرف؟؟
هاي ياشقه حنان تره شقتي ايجار....وحتى لو دفعت ايجار كم شهر شلون اعوفها وحدها بالشقه !!
ليش راح ياكلها الطنطل!!؟؟؟
حنان احنا ماعايزين حجي ودفاتر عتك ..اني راح اسافر اسبوع الجاي..وسماء تنتقل يمج ع كد هالسنه الدراسيه هذا خصم الحجي!!
شلوووووون !!!!تنتقل يمي شنو شو انت مترهي وتحجي قابل البيت بيت الخلفوني لو بيت الحجي..شنو بكيفي اجيب قندرة اكعدها يمي ...هيج الحجي راح يقبل لو..رائد راح يتقبل وجودها...لو بنات الحجي راح يقبلن انت تريد تجلطني تريد تهجم بيتي؟؟
عمي عليمن هجمان البيوت ..اخذيها يمج عسما تخليها خدامة تخدمجن شو يوميه تجين تشكين المنى ماالحك اطبخ والبنات ميشتغلن والحجي يوميه زعلان ع الاكل اخذيها يمج تخدمجن تطبخ وتنفح وانتن مدللات
ليش منو كلك اني محتاجة خدامة لو ما اكدر اجيب خدامات ..
ولج هاي منج بيج ..شتعرفين عن الخدامات البنكلاديشيات لو الفلبينيات كلهن ..حراميات لو عدهن سوالف مكسره
من حجه هالشكل كلبي كام يفور ..وفكرت ع الاقل الخدامات البنكلاديشيات لو الفلبينيات مو حلوات..ورائد مراح يخلي عينه عليهن..بس هاي سماء المكموعة الكلبه بت الكلب ..ملكة جمال حتى اني اليكولون احلى وحده بالعشيرة هي احلى مني ..غيراذا رائد يخلي عينه عليها اتخبل!!
هااا شو صفنتي!!
مترهم اثير...مترهم ابد بعدين اني اموت منها ومن اهلها صح ايمان الله يرحمها ..مجانت معاديتني بس من نرجع للواقع ايمان هم صفت ويه رجلها الكلب ..وتبرت مني..هسه تريدني اخلي بتها ابيتي بعد ما اتبرو مني ليش اني اتكفلها..خوعمامها ياخذوها ؟؟
يا عمامها...حنان شنو تعرفيها وتحرفيها تره عمامها متبرين منها بسببج ويعيروها بيج اصلا..عمامها يتمنون تموت ولا الناس تعرف عدهم بت اخو انتي خالتها...وتعرفين كلها تبرت منج بس اني ومرتي بقينا وياج...وهالبنيه ما الها ذنب ..وين متروح تنطرد ..
واني شنو لفو للمطرودات!!
اي ..كتلج هذا الشي مؤقت منا لما ادبر اموري بألمانيا
اثير انت تطلب مني شي فوك طاقتي مااتحملها والله اشوف دم سنوني ولا اشوفها بت الفراش الحافي
هسه الفراش يمج ..شو الله خذا ..بساع بساع ..حنان حتى رصيدي خلص اسبوع الجاي ادزها لبيتكم!!
اوكف ..اوكف ادزها شنو غير افتح الموضوع ويه الحجي واقنعه !!
يقنع..يقنع ان شاء الله
رائد:::
رجعت من البصرة ..هلكان من التعب ...الطريق طويل من البصرة لبغداد ..احس راسي يريد ينفجر وميت من الجوع ..فكرت ادخل اسبح وابدل واروح اتغده بأي مطعم اي متعود اعرف هاي العوبه مرت ابويه طبخها زباله..والبنات ميعرفن يطبخن ..من يوم الي راحت بيه امي عن الدنيا ما اكلت لكمة طيبه بهالبيت لو تهنيت بلحظة بحياتي مرات اصفن واغمض عيوني واتمنى الزمن يرجع كم سنه ليورة واشبع شوف من عيون امي..اوووف الام نعمة محد يحس بيها بس اليفقدها مستعد ادفع الباقي من عمري بس ترجعلي..
اول مفتت للبيت دخلت لغرفتي اخذت ملابس سبحت وبدلت ردت اطلع ابويه صاحني!!
وين رايح بابا تعال اتغده!!
يابه شتغده تمن معجن لو مركة مسيسه!! رايح للمطعم!!
لك تعال اتغده هو احنا جايبين غده من المطعم كالعادة!
اتغدو انتو اني طالع
سمعت حنان صاحتني!!
رائد تعال اتغده مو اريد احجي وياكم !
خير حنان شتريدن واني شنو دخلي وتحجين وياي ذاك رجلچ ومصي دمه وسحبي منه الفلوس الترديهن!!
سوت نفسها ضاجت الحيه
شفت..شفت ابو رائد شفت الحجي مالته هسه اني شكلت ..قابل كفرت كتله تعال تغدة ويانه واسمعنا شنو نحجي ..دوم هيج اسلوبه وياي ..ولا جني مرت ابو..ولازم يحترمني عبالك اخته الزغيرة
ابويه ضحكلها وكلها
ههههه حنونتي لا تضوجين هو هذا رائد حجيه مثل السم ..بعدين لوما يمون عليج ميحجي هالشكل
هاي ياميانه الي تجيب الاهانه حجي..
يله تعالو..خلي نتغده وصيحي للبنات هم وسدو هالنگرة بيناتكم..
اضطريت اروح اكعد يم ابويه واول ملتمينا كالت:
طبعا احنا يوميه مشكله ع الطبخ وع التنظيف ..مو!!
سماح كالت:
اسمعي حنان ..مو مسويه نفسج ملتهيه الصبح بالمول وتردينا نطبخ وننفخ..كدام هذا بابا ورائد والله ما اشتغل لو تنكلب الدنيا ..حتى اديه صارن سمر..من غسل المواعين وخطيبي يعيب عليه ..
اوكفي خلي احجي
اي بله احجي
اني لكييت الكم حل لهلمشكله؟؟
اي ..واخيرا راح تجيبولنا خدامة...بس مو تجيبها منين مجان لازم مكتب ثقه ذاك اليوم خدامة اهل صديقتي بايكة الذهب والفلوس ومنهزمه
لا من مكتب ولا شي..اخويه راح يسافر والخدامة العدهم راح تجي..عدنا!!
فكرت كلت هذا اثير الگ....د..منيله خدامة هو يسحب فلوس منها وعايش براسها هو والبومة مرته!!
اول مرة اسمع اثير الكاعد بالايجار عنده خدامة!!!
هي مو خدامة بالمعنى الصحيح هي بت اختي ايمان..من راد يسافر اخوية اثير مرهمت تسافر وياهم ..وهي اصلا طالبه كليه فكال تكمل هالسنه الاخيره وبعدين يسحبها..وطبعا معدها مكان تروح اله فكال اخذيها تخدمج لان هي حيل شاطرة تطبخ وتنظف وتغسل وفول بشغل البيت ووو..
طبعا حسيت كلبي طك هاي الساقطة ممكفيها ..كاعده ابيت اهلي ممكفيها..ماتت امي بسببها لاتريد تجيب وحدة من اهلها وتعيشها يم اخواتي ..فكمت وزمخت بيها!!
بت اختج شنو خدامة شنو... شو انتي بكيفج تقررين ..وطبعا ابويه ساكت شتفصلين هو يلبس شوفي محد يفوت لبيتنا..وعلى جثتي هاي البنيه تجي..لهنا خوش كلاوات هاي..شلون رهمتيها طالبه كلية مرحله اخيرة من صفحة..ومن صفحة خدامة خوش ...تخططين مدام حنان
اول مسمعتني زمخت بيها سوت روحها تبجي وصعدت فوك وطبعا ابويه لحكها..اي عادي خوش لقطة هاي كل مرة تتزعل وابويه يلحكها يتوسللها ويراضيها وتمشي الي براسها علينا
فتت لغرفتي ردت اخذ سويج سيارتي وموبايلي واطلع بس دك تليفوني العمال بالموقع خابروني وبقيت احجي وياهم وطولت المكالمة ..وبس سديت الخط وردت اطلع ابويه لاكاني بالممر مال المطبخ!!
يابه .شو انت معظم الامور ..وحتى اني مخليتني احجي هيج اني ربيتك تحجي بمكاني ومتحترمني!!
هاي هيه هيج فهمتك تكولك ابنك يحجي بمكانك وميحترمك عادي كولشي يطلع منها!!
بابا اسمعني ..تره حنان مو قصدها تفرض اوامرها!!
لا قصدها يابه تريد تؤمر وتنهى ..تريد تسيطر ع البيت بالضبط مثل ما هسه مسيطرة على عقلك والدليل انت مأيدها ويجوز موافق تجيب هاي بت اختها تعيش بيناتنا حالها من حالنا!!
استغفر الله حالها من حالكم شنو تره هي تموت منها وحلفتلي بالقرآن جايبتها مجرد خدامة وفترة كم شهر!!
خدامة شنو حجي تكولك طالبة كلية واكيد راح تفرغ الها غرفة خاصة ..حتى تقره الخاتون ..وهالشكل راح تشاركنا حياتنا!!
ابد والله ..ماتنام بأي غرفة من غرف بيتنا هنا تفرش وتنام بالمطبخ حالها حال حاويه الزبالة هاي..واذا شفت منها اي تصرف ميعجبك اطردها طردة الچلاب ..وميصير خاطرك اله طيب!!
يابه يعني شنو خاطري طيب انت بس تريد تحرجني حتى اسكت واتقبل ..اوامر مرتك!!
افه ..ميامر عليك احد بس اني مسايسها..مابيه حيل تضل ادك براسي خلي تجي هاي كرايبها كم يوم عدنا وعود انت لو وحده من اخواتك تسوولكم فلم ونطردها ..احسن ما تضل تاكل دماغي ...ابنك متحكم بالبيت وابنك يكرهني ..مخسرانين شي..اذا تحملنا ..بالزايد اسبوعين زمان
ماشي يابه هاي لخاطرك راح اسكت خلي اشوف تاليها
سماء؛؛؛؛؛
جنت اصفط بملابس خالو وملابس باجي منى..لان بعد يومين نسافر لالمانيا بس اني مستغربه يعني خالو ومرت خالو اشتروا ملابس هوايه كالو الجو هناك بارد شو اني مشترولي لا بلوزات لا قمصله ..يعني ليش محاسبين حسابي وياهم ..وحتى من خالو يشتغل باوراق السفر اشو ما اخذلي لا صور ولا شي ع مو الاوراق صح هويتي عدهم ويكدرون يطلعلولي اوراق بس غير ياخذوني وياهم اوقع ع ورقه على شي شو مجابو طاري شنو الفلم...
ثاني يوم خالو صاحني:
تعالي سمسومه الوردة خلي نسولف
اي خالو
شوفي سمسمومه انتي بقت الج بس هالسنه
اي خالو..اني هم ردت اسألك اذا تسافرون باجر شلون راح اداوم تعرف الدوام بعدله ١٥, يوم شو مسوينا اوراق ع مود الدراسه!!
والله خالو مرهمت تسافرين ويانا!!
مرهمت شنو!!
يعني راح تضلين بالعراق الى ان تخلصين هالسنه واني هم ارتب امور اقامتي وشغلي هناك بهالفتره وادز عليج اسحبج يمي!!!
اول مخلص كلامة نزلت دموعي وكتله:
يعني شنو ..متاخذوني وياكم..و..و اذا ما اخذتوني اني وين اروح...اني اخاف ابقى وحدي بالشقه!!
لا..لا..لا شلون اخليج وحدج اكيد مراح تضلين وحدج؟؟
لعد ..شلون..ويامن ابقى!!
راح ادزج لبيت خالتج حنان مؤقت!!
من سمعت خاله حنان ..احسيت گلبي طلع من صدري فگلتله :
خاله حنان شنو...مستحيل اروح ..لا..لا خالو ما اروح
ترحين خالو ...ترحين!!
خالو ..ما اروح لبيتهم عادي بقيني هنا بالشقه وحدي ..اتعود..وما اخاف بس ما اروح ..لبيت خاله حنان انت تعرفها ....تكرهني وتكره ماما وبابا الله يرحمهم اني ما اروح اعيش يمها يوم واحد ..
خالو ..شبيج انتي من كل عقلج اخليج وحدج بالشقه ..بعدين الشقه ايجار هي واثاثها وبعد ٥ ايام يخلص هالشهر وبلغت المالك انه اني راح اطلع
بجيت اكثر وكتله :
خالو ذبني بالشارع ولا ادزني لخاله حنان والله تكرهني ويجوز تضربني لان هي كل ماتجي تحرك باجي عليه وتكولها اذا تنظيفها ميعجبج بسطيها وحتى..رادتك تبطلني من الكليه ..تتذكر ..انت بعد شلون اعيش عدهم!!
انتي عقلج صدك على كدج ..خالو لتخافين هي بس هالسنه تتخرجين واسحبج يمي بعدين شنو تبطلج اني اتفقت وياها اداومين وتعاملج احسن معامله بهالكم شهر لخاطري؟؟بعدين هي وين عدها وقت حتى تضربج لو تأذيج شو الصبح بالمول والعصر بالمول ..بس الظهريه كم ساعة بالبيت وبالليل تجي تلف راسها وتنام هي والحجي!!
خالو..والله اخاف منها!
لا تخافين ..ولا شي صبري هالكم شهر ع الاقل من اسحبج انتي متخرجه ومخلصه..وبلكي بشهادتح اعينچ هناك بوظيفه محترمة وتعيشين احسن عيشه يمي
بس خالو
لا بس ولا شي لمي هدومج وحظري نفسج حتى باجر من نسافر هي تجي تاخذج بسيارة رجلها واني ما اكطع بس اوصل يوميه اخابرج ع الواتس اب
بكيفك خالو
رجعت كعدت بغرفتي وطلعت ملابسي اصفط بيهن بجنطة ..بس ابد دموعي موكفت ..كل احلامي تبخرت جنت مفكرة اسافر وياهم واشوف الدنيا ..واعيش بعيد عن هالمجتمع الي بيه خاله حنان والي بيه عمامي المتبرين مني ويعتبروني عار ..مثل خالتي ..تالي متالي ..من بعد كل احلامي ..راح اعيش وياها..ويه الي جانت السبب ..بالعيشه الزفت الي عايشها حاليا صح خالو ..اخذني اعيش يمه.لان معندي مكان بيتنا هم جان ايجار ومن توفوا ماما وبابا بالحادث مكدرت اعيش وحدي فاخذني خاله اعيش يمه.بس عيشه الضيم مثل ميكولون مرته مستغلتني خدامة الها ولهلها من يحون طبخ ونفخ وكنس ومسح حتى ملابسها الداخليه اغسلهن اني..جنت اصبر نفسي واكول اي هذا حال اليتيم اليفقد امه واابوه بيوم واحد وخلفله ع خالو مخليني ابيته ..لان عمامي حتى من صارت فاتحه بابا مقبلو اجي بالعزة مالته لان متبرين مني ومن ماما بسبب خاله حنان الي سمعتها جانت زفت بعد ما انهزمت من بيت جدو وراحت تشتغل ويه مره موزينه بالشمال ..وع اساس خالو اثير يدور عليها ويريد يق..تل....ها ويغسل العار..بس طلع المضموم ..ابشع من الظاهر ..اصلا طلع خالو بالاخير يعرف مكانها وهي الي تصرف عليه ومعيشته هو ومرته من فلوس الحرام..وتالي ضحكت على رجال زنكيل وخلته يتزوجها ويستر عليها ويعيشها ابيت قصر ..وسمعت هم انه مرته خطيه ماتت بعد اسبوعين ..من معرفتها هو متزوج عليها...والي عرفته بعد هو عنده بنات وولد جبير .. همه ناس معروفين ..وره مماتت المرة خالتي كعدت ابيتهم الي هو قصر مثل مكلت وصارت الكل بالكل ..وحتى زوجها فتح الها مول ضخم تشتغل بيه لان هي تضوج تبقى بالبيت بدون شغل وتلبس ذهب وماركات ومدلله دلال..ولحد هاللحظة هي تصرف على خالو اثير..
اوووف كلبي مقبوض وممرتاح شلون راح اكعد عدهم ناس غربة ما اعرف شلون راح يعاملوني هو خالو ومرت خالو مخليني خدامة لعد الغربة شلون راح يعاملوني خصوصا خاله حنان مسمومة وتموت مني حتى متسميني بأسمي تسميني قندرة وتكره حتى ماما الله يرحمها الي هي اختها من امها وابوها لان الحچي وصلها انه هي قبل ميصير الحادث وتموت اتبرت منها لان بابا الله يرحمه طلب منها تتبرا من اختها..ولان فضلت ..رضا بابا عليها ..كرهتها حيل وكرهتني اني اكثر لان اني بت الرجال الي اعتبرها عار ولازم تن..ق..تل ومتبقى بهالدنيا..
