 |
اسكريبت ام سيد كامل بقلم روان سالم
ـ السلام عليـ... إيه ده في إيه؟ مين اللي مات؟
ـ أدخل أدخل يا محمود
ـ أنا آسف والله يا حماتي معرفش إن عندكم حالة وفاة! البقاء لله
ـ ونعم بالله يا ابني، بس مفيش حالة وفاة ولا حاجة
ـ أومال ليه كلكم لابسين أسود كدا ومشغلين قرآن بصوت عالي؟
ـ أدخل لمراتك وأفهم منها... ويا ريت لو تقدم معاد الفرح شوية عشان خلاص زهقنا
...
ـ حنين... في إيه بتعيطي ليه؟
ـ شوفت اللي حصل يا محمود؟
ـ إيه اللي حصل يا قلب محمود
ـ أم سيد ماتت
ـ أم سيد مين؟
ـ قطتي
ـ أم سيد قطتك ماتت وعاملة عزا ليها؟
ـ أومال عايزني أعمل فرح؟ دي أم سيد!
ـ اه صح دي أم سيد!
ـ أنت بتقلل من أحزاني؟ طب طلقني
ـ أطلقك إيه مش لما أتجوزك الأول أبقى أطلقك! بعدين هطلقك عشان أم سيد ماتت!
ـ لا عشان أنت بتقلل من أحزاني
ـ أنا عملت كدا؟
ـ أيوا، حساك عايز تضحك عليا!
ـ لا يا ستي مش هضحك حاضر وحقك عليا
ـ وحضرتك لابس أخضر ليه؟؟؟!
ـ أومال كنت ألبس إيه؟
ـ تلبس أسود... دي أم سيد ماتت
ـ الله يرحمك يا أم سيد ويبشبش الطوبة اللي تحت راسك... بس أنا لسا عارف دلوقتي إنها ماتت كنت هلبس الأسود من قبلها إزاي يعني؟
ـ كان لازم تعرف إني زعلانة وتلبس الأسود
ـ وهعرفها إزاي دي بشم على ضهر إيدي؟
ـ لا يا خفيف، بس كان لازم تسألني ليه شيلت صورة البروفايل على واتساب وفيسبوك وأنا ساعتها أقولك
ـ صورة البروفايل؟؟؟؟!
ـ أيوا!
ـ اه فعلًا، أنا إزاي شخص وحش كدا ومسألتكيش على صورة البروفايل اللي شيلتيها، ربنا يكون في عونك والله إنك مستحملاني
ـ بحبك بقى أعمل إيه؟
ـ وأنا كمان بحبك والله، بس معلش عندي استفسار صغير
ـ أتفضل
ـ بالنسبة للفرح؟ هيتأجل عشان أم سيد ولا في ميعاده عادي؟
ـ هو أنت لسا عندك نفس تعمل فرح؟؟؟ مش بقولك إنك بتقلل من أحزاني؟
ـ لا فرح إيه؟ مش مهم أصلًا، يكفي إن الشارع كله عارف إني كاتب عليكِ... أنا بقول نعمل حفلة صغيرة كدا لينا وللعيلة بس وتاجي على بيتي على طول
ـ نعم؟؟؟؟! أنت عايزني أتجوز من غير هيصة وزمبليطة؟
ـ ز... إيه؟؟
ـ زمبيلطة
ـ زمبيلطة اه... طب وأم سيد؟؟
ـ اه يا أم سيد!
ـ طب بتعيطي تاني ليه دلوقتي؟
ـ عشان أم سيد!
ـ ربنا يرحمها يا حبيبتي... بس الحي أبقى من الميت!
ـ قصدك إيه؟ أنت عايزني أنسى أم سيد؟؟؟!
ـ لا أنا بقول بس نقدم موضوع الفرح ده شوية ونعمل حداد عليها في بيتنا بقى عشان حاسس حماتي مش طايقة الهبـ... مش طايقة موت أم سيد
ـ بتضحك عليا عشان نتجوز صح؟
ـ دي محتاجة سؤال؟ أكيد طبعًا
ـ بس أنا مليش نفس أعمل فرح وأغاني والكلام ده! أم سـ..
ـ أم سيد ماتت عرفت خلاص... بعدين مين جاب سيرة الأغاني؟ إحنا هنعمل فرح إسلامي أصلًا!
ـ أيوا صح نسيت معلش عشام أم سـ...
ـ والله العظيم عارف إنها ماتت، خلاص كرهتيني في الاسم!
ـ أنت بتكلمني كدا ليه؟
ـ لا حقك عليا أنا آسف
ـ...
ـ طب ممكن نتجوز وتتقمصي في بيتنا؟
ـ وأم سيد؟
ـ يلعـ... هنعملها حِداد وهنعملها كولدير ماية صدقة جارية كمان
ـ طيب
ـ طيب إيه؟
ـ طيب خلاص يلا نتجوز
ـ بركاتك يا أم سيد! هقوم أبلغ حماتي وحمايا وهروح أجيب البدلة السودا... دي أم سيد ماتت بردو ولازم ألبسلها الأسود!
