رواية ملف الحرامي ( كاملة جميع الفصول ) بقلم محمود الأمين

هذه القصة مبنية علي أحداث حقيقية حدثت بالفعل 

....... 

عمرك فكرت تسمع حكاية مرعبة عن مكان وانت

 واقف فيه او معدي عليه؟.. هيكون اي هو شعورك وقتها هتكون خايف وقلقان ولا هيكون عندك فضول تكمل وتعرف حصل اي.. تفتكر هما هيسبوك بعد ما تعرف.. ولا فضولك ده هيكون سبب نهايتك 

..... 

طول عمري انسان فضولي وعندي شغف اعرف كل حاجة بس مكنتش اعرف ان مجرد قصة هتقلب حياتي وتعيشني في عذاب.. وبسأل نفسي كل يوم هو الدور عليا؟ هو انا ممكن اكون الضحية الخامسة ولا انا واهم نفسي علي الفاضي وكل دي تخاريف 

.... 

الجزء 1

كتير بنسمع عن أساطير وحكايات لا تخضع للعقل والمنطق.. بنسمع لكن مش بنشوف والي شاف غير الي سمع.. كتير بتلاقي ناس بتحكي عن قصص هما عشوها ولما بيخلصوا بتقول مستحيل الكلام ده يكون حصل 

لكن انا النهاردة جاي احكي ليكم عن معاناتي بسبب فضولي الزائد.. جاي احكي ليكم عن طريق الموت او ملف الحرامي شوفوا انتوا واختاروا الاسم الي يريحكم لكن انا هحكي عن مكان موجود في مصر وبالتحديد في الجنوب مكان في النهار بيكون عادي وبليل بيكون مخيف ومفزع 

خلينا نبدأ حكايتنا وهعرفكم بنفسي انا

 يوسف عبد العزيز سني 25 سنة من احدي محافظات الصعيد.. عايش مع ابويا واخواتي متجوزين وكل واحد عايش في دنيته.. وزي كتير من الشباب خلصت كلية حقوق وملقتش شغل ده بعد طبعا ما قضيت سنة كاملة في الجيش 

مكنتش عارف اعمل اي الظروف والعيشة حاجة صعبة ولا تحتمل وعشان كده قررت اني هخف الحمل من على ابويا الي رباني وعلمني وطلعنا للدنيا وآن الاوان انه يرتاح واشيل انا الحمل.. بعد تدوير كتير علي شغل وللاسف كانت النتيجة صفر.. مكنتش عارف اتصرف ازاي.. بقيت حمل تقيل علي ابويا وهو عمره ما اشتكي لكن انا كنت حاسس وعشان كده بقيت ادور كل يوم.. لحد ما اخيرا لقيت سوبر ماركت والمرتب معقول لكن المشكلة ان المكان بعيد شويه كان في مرسي علم 

اخويا اخد ابويا يعيش معاه لاني هروح واخد سكن هناك.. بدون الدخول في تفاصيل صغيرة ومملة.. روحت واتعرفت علي صاحب الشغل والي كان اسمه الحج سامح وقلي اني مطلوب مني شغل المحل واني كل شهر هروح اجيب بضاعة لكن من منطقة بعيدة شويه عنهم.. بسبب ان المكان ده اسعار البضاعة في مناسبة وقلي ان في واحد اسمه 

ابو فهد هيكون معاك بعربيته عشان تجيبوا البضاعة 

كل حاجة كانت تمام كنت مبسوط جداً وعندي احساس قوي بالمسؤلية تجاه نفسي وتجاه ابويا 

بدأت اشتغل وكان شغل بسيط ببيع للناس كل مستلزمات الحياة من اكل وشرب 

لحد ما جيه اخر الشهر والحج سامح طلب مني اروح مع ابو فهد عشان نجيب البضاعة... ابو فهد كان راجل في الستين من عمره بشرته سمرا ولابس جلبية وقلي 

_ اهلا بيك يا ولدي نورت عربيتي المتواضعة 

_ بنورك يا عم ابو فهد متشكر جداً 

_ عاوز تنام يبني نام الطريق طويل ولسه بدري 

_ ربنا يخليك يا ابو فهد لو جاني نوم هنام 

بصراحة عربية ابو فهد كانت علي قد حالها حبتين من العربيات الي بيكون لها صندوق يعني عشان نشيل في البضاعة.. المهم فضلنا مشيين بالعربية والليل دخل علينا خلاص.. قولت لابو فهد انا هنام شويه.. قلي ماشي يبني زي ما تحب 

غمضت عينيا ونمت معرفش قد اي الصراحة لكني لما فوقت لقيت العربية واقفة.. قولت اكيد وصلنا لكن الي اكتشفته ان العربية عطلت وللاسف المكان الي عطلت في لا يبشر.. طريق صحراوي مفهوش حد ومفهوش حتي كشافات تنور الطريق 

لاحظت ان ابو فهد عمال يستغفر ويقول استرها معانا يارب.. وحاسس وباين عليه الخوف والقلق.. قولتله 

_ مالك يا ابو فهد في اي واي الي موقفنا هنا؟ 

_العربية عطلت يبني ربنا يسترها 

_طيب انت مش بتعرف تصلحها ولا اي؟ 

_ بعرف يبني بعرف لكن مقدرش انزل هنا مقدرش 

_ليه يا ابو فهد فهمني؟!! 

_ انا اتصلت بابن عمي وهو جاي دلوقتي هيساعدنا ولما نتحرك هحكيلك يبني... استرها يارب 

مكنتش فاهم سبب خوف ابو فهد بصراحة بس ده واحد قاعد وعلى ملامحه خوف وذعر رهيب.. زي ما يكون شاف عفريت 

فضلنا قاعدين في العربية نص ساعة لحد ما جيه ابن عم ابو فهد والي كان اسمه عثمان ونزل معاه ابو فهد عشان يصلح العربية وانا فضلت قاعد عشان ادور العربية.. والحمدلله بعد كام محاولة العربية دارت واتحركنا.. لسه التوتر باين علي ابو فهد والراجل بقي عرقان وبيترعش.. سألته

_ احكيلي بقا يا ابو فهد اي الحكاية 

_ الحكاية غريبة ومحدش يصدقها حاجة كدة عاملة زي حواديت زمان لكن اقسملك ان كل حرف هتسمعه حصل.. احنا في طريق غريب طريق طلع عليه الناس ملف الحرامي لحد ما فعلاً بقي ده اسمه 

_ ملف الحرامي ده اسم غريب اوى يا ابو فهد، ليه الاسم ده؟ 

_الطريق ده كان زيه زي اي طريق لكنه كان ملف ضيق كانت العربيات تتقلب فيه وياما ناس ماتت بسببه وعشان كده الحكومة قررت توسيع الملف... لكن الحوادث موقفتش لحد ما طلعوا عليه الاسم ده عشان بيقولوا ان الطريق ده بيسرق عمر الناس فوصفوه بالحرامي 

_ بيسرق عمر الناس!! 

_ اه يبني زي ما بقولك كده والله بس مش هي دي الحكاية... الحكاية الي انا هحكيها غريبة هي حكاية 4 رجالة من رجالة البلد الي احنا في الطريق ليها دي لما احكيلك هتفهم وهتقدر الخوف الي انا فيه.. الطريق ده ملعون يبني ملعون 

_ اهدي بس يا ابو فهد وصلي علي النبي كده واحكيلي 

_عليه افضل الصلاة والسلام... الحكاية بدأت مع

 عبد الباسط شاب من سنك كان ابن تاجر مشهور هناك

كان معاه عربيته ورايح وجاي علي الطريق.. ومكنش بيحصل اي حاجة غريبة لحد ما في يوم عبدالباسط اتأخر والساعة عدت 12 بليل.. الناس قالتله انه يبات عندهم ويمشي الصبح لكن هو صمم يمشي وقال عادي انا واخد علي السهر وركب عربيته ومشي لحد ما وصل الملف وبمجرد ما وصل العربية عطلت.. عبدالباسط قال عادي ونزل عشان يصلحها ودي كانت اكبر غلطة عملها عبدالباسط.. فتح الكبوت بتاع العربية عشان يشوف العطل فين ونور كشاف تليفونه.. لكنه حس بحركة وراه حاجة بتنكش كده واتلفت بالكشاف عشان يشوف وكانت الصدمة... علي حسب كلامه انه شاف عقارب عقارب كتير وشكلها غريب عن شكل العقارب العادية... جري عبدالباسط وركب عربيته وفضل جواها بيترعش وخايف المنظر كان غريب وصعب لكن عبدالباسط بيقول انه شاف واحد كان متكفن وواقف علي رجليه وبيقوله افتحلي الباب افتحلي 

والغريب ان عبدالباسط حاول يدور العربية دارت.. ومشي بسرعة من المكان.. رجع بيته بيتنفض ووقع من طوله وفقد الوعي.. والده جري بيه علي المستشفى.. اتكشف عليه والدكتور قال لوالده انه سليم مفهوش اي حاجة لكن لما فاق عبدالباسط كان كلامه مش مفهوم كان بيخترف وبيقول عقارب والراجل ميت محدش كان فاهم كلمة منه والكل قال ربنا يلطف عبدالباسط اتجنن... يوم والتاني وبدأ عبدالباسط يفوق من الحالة دي.... ورجع لطبيعته وبدأ يحكي للناس الي حصل معاه... واكيد يبني انت من الصعيد وعارف ان لما واحد بياجي يحكي حاجة غريبة الناس بتتجمع حواليه عشان تسمع وفيه الي صدق عبدالباسط وفي الي قال عليه انه مجنون.. ورجع بيته 

اليوم ده يبني انا فاكره كويس عشان انا كنت معدي بعربيتي دي بالصدفة قدام بيتهم وسمعت صراخ صراخ زي ما يكون واحد بينضرب بكرباج.. والغريب ان محدش من اهل البلد قرب من البيت.. نزلت من العربية وخبطت على الباب.. فتحلي والد عبد الباسط الحج سليم وهو باين عليه التوتر قولتله 

_ في اي يا حج سليم واي صوت الصراخ ده

_ مش عارف اي بيحصل للواد ابني ده... تعالي شوف انا مش فاهم يا ابو فهد مش فاهم حاجة 

دخلت وشوفت اكتر حاجة صعبة شوفتها في حياتي.. عبدالباسط علي السرير جسمه عليه اثار ضرب او حروق مش فاهم ده اي... وكان بيصرخ وبيقول ابعدوا عني ابعدوا عني.... قولت للحج سليم الواد ده لازم يتنقل المستشفى دلوقتي.. جينا نلمسه هتصدقني ان صوابعنا سابت اثار حرق علي ايده... قولت للحج سليم 

_ لا يا حج انا هروح اجيب الشيخ عبدالتواب ابنك اتلبس 

عليه جن انا عارف بقولك اي 

_ الي تشوفه يا ابو فهد انا ابني هيروح مني 

خرجت فعلاً وروحت جبت الشيخ عبدالتواب.. وده راجل يبني معروف عنه انه بيعالج من المس والسحر وبيفك الاعمال.. وصلنا انا والشيخ عبد التواب لبيت الحج سليم ودخلنا ولسه صوات الصراخ مستمر.. الشيخ اول ما شافوا قال اعوذ بالله من الشيطان الرجيم 

احكيلي اي الي حصل معاه ووصله لكده... وبدأ يحكي الحج سليم للشيخ عبد التواب الي حصل.. الشيخ قال 

_ ابنك بيتعاقب لانه جاب سيرة عشيرة من الجن والعشيرة دي ساكنة في الطريق الصحراوي وللاسف هما مش هيسبوه غير لما يموت 

_ لا اعمل حاجة يا مولانا يموت اي!!! 

_هحاول وربنا يسهل.

وفضل الشيخ يقرأ عليه ايات من القرآن الكريم.. وحاجات تاني مش مفهومة.. وخرج وقال بكرة هيكون كويس 

عارف اي الي حصل يبني... عبدالباسط انتحر ورمي نفسه من البلكونة.. مش قادر اوصفلك البلد اتقلبت ومحدش كان فاهم انتحر ليه!!! 

بس يبني هي دي حكاية عبدالباسط 

_ بس دي حكاية غريبة اوي يا ابو فهد وبصراحة كده من غير ما تزعل مني انا مش مصدق حاجة من الكلام ده 

_حقك يبني ومقدرش ازعل منك وهقولك حاجة هتستغربها اوعي تفتكر اني جاهل لا انا راجل مدير مدرسة بس انت عارف العيشة بقت غالية ازاي 

_ طيب يا ابو فهد انا عاوز اسمع باقي الحكاية انت مكملتليش مين هما ال3 رجالة الي باقيين 

_هههه مش كنت بتقول مش مصدقني عاوزني اكملك ليه بقا 

_ عادي الطريق لسه طويل وعاوز اسمع 

_حاضر هحكيلك الحكاية الاغرب والي لحد النهاردة صاحبها عايش بس عايش زي المجانين ومحدش فاهم منه حاجة 

_وده مين ده يا ابو فهد؟