رواية الفصلية الفصل الحادي عشر بقلم زينب نور
.
الشيخ يوسف:السلام عليكم
الكل:هله وعليكم السلام
ام فارس(زوجه العم بس راح اختصر واكول ام فارس):هله بلشيخ اشلونك امورك ان شالله تمام
الشيخ:هله ام فارس اي الحمد لله بخير انتو شلونكم
ام فارس:عله الله الحمد لله
الشيخ:دومكم ان شالله...اكول شيخه اشو تئخرتو بلسوك ادري من الصبح طالعين وهسه ساعه1مدكليلي شعدكم
الشيخه:والله هاي اخيتك العجب ميعجبه ذوقهه صعب وضلينه ندخل محل ونطلع من الثاني
الشيخ:ادري جان خليتوهه عله غير طلعه مو شرط اليوم تكملن كلشي
الشيخه:هوة احنه مكملنه كلشي بس نص الغراض
ام فارس:يله تدلل ملوكه هوة شكم مﻻك عدنه خل تدلل بعدين هوة الزواج مرة بلعمر خوما كل يوم معرسه
الشيخ:تسلمين مرت عمي لعد براحتكم
الشيخه:يله يبنات وين صار الغده
افنان:هسه شيخه راح نكمل مبقه شي
أمل:انه راح افرش السفرة
افنان:اي روحي
.............
ميار:رجعن النساوين من السوك واحنه بدينه نصب الغدة راحت أمل فرشت السفرة وام محمد وبنات عم الشيخ نورس ورانيه ينقلن المواعين وافنان كملت صب اما اني فداساعد افنان ومن خلصو راحو يتغدون جان الشيخه تصيحني
الشيخه:ميار وينج
ميار:مسحت ايدي بلخاولي المعلك ورحت ركض وكفت باب الاستقبال:نعم شيخه امريني
الشيخه:يله تعاي تغدي مو كلت بعد تاكلين ويانه
ميار:بس شيخه اخاف ازعجكم
الشيخه:ﻻ ازعاج وﻻ شي يله يمه امل سويلهه مجال يمج
أمل:اي يله تعاي يمي حته نحش بلوادم
ميار:ابتسمت وكعدت انطتني أمل الخاشوكه واكو يمي ماعون تمن شعريه ودجاج كعدت اكل بس شنو مستحيه فرد مرة عبنه الشيخ كاعد وصاير جدامي وكل ما ارفع راسي اشوفه يعاين عليه
..................
الشيخ:تونه كعدنه دنتغده والشيخه صاحت ميار (الحجي الي فوك::اتعاجز اعيده)كعدت صارت كدامي صراحه ماعرف شصارلي تخربطت علومي وانه اشوفهه تاكل جدامي ول لو تشوفون اكلهه دكولون عصفور وجاي ياكل كل لكمه أصغر من الي كبلهه اووووف يكلبي شجاي يصيرلك ماعرف
....................
ميار:كملنه غده ورحنه ننكل المواعين ووحدة تفرغ وحدة تغسل وحدة تنشف وترجع للكاونترات زوجه عم الشيخ هيه والبنات راحن بعد ماتفقو عله باجر يجون نفس الوكت يطلعن يحجزن البدله والصالون ويكملن الباقي واحنه كعدنه نكف المطبخ انه سويت الجاي وكلت الأمل تاخذه جان دكلي
أمل:ميار رحمه لجدج السابع عشر ان شالله يتزوج من حور الجنه وتلكفه بيبيتج السابعه عشر وتلزمه تزوعه العافيه عبنه خانهه وتزوج عليهه
ميار:يااا شبيج نفتحتي هاي كله عبني كتلج اخذي الجاي
أمل:اي واكوله بكل صراحه نعم عبنج كتيلي اخذي الجاي يابه انه ميته تعببب اروحن اشرد للغرفه وانام احسن ما تلزكون سالفه ثانيه براسي
ميار:ياا عابت اي والله اخذه انه احسن الي من النك مالتج
............
الشيخ يوسف:خلصنه غده وكمنه غسلنه وزوجة عمي اترخصت واخذت البنوات وراحت عبن فارس اجه عليهن اخذهن وراح مع أنه اصريت عليه يبكه يشرب جاي بس ما قبل سلم علينه وراح انه هم دخلت جوة كعدنه انه ورامي والشيخه نتناقش بسالفه خطوبه مﻻك واجت افنان هم كعدت ورة شوي جت ميار قدمتلنه الجاي وانه عيوني تﻻحكهه
لحد ما طلعت من الاستقبال انه شربت الجاي وصعدت اريدن انام تعبان اليوم تعبت جثير
................
ميار:قدمتلهم الجاي ورجت للمطبخ بس شني الشيخ نضراته وراي وراي حته كمت احسن نفسي عريانه بسببه المهم رجعت للمطبخ وكملت شغل جابت ام محمد الاستكاين غسلتهن ورحت لغرفتي ضليت افكر باهلي مشتاكتلهم وافكر بمستقبلي بهل بيت هل ياترى راح اضل طول عمري فصليه او راح يصير شي يكلب الموازين ماعرف كلشي بيد الله خل انام شوي راسي راح يطك من جثر مافكرت
.......................في مكان اخر..................
..اكول شيخي انه لكيت حل
...وشني الحل بله يل فهيم اطربني
..شيخ بعيد عن الاستهزاء انه ضليت ابحوش(ابحث)ورة الشيخ يوسف وعرفت اشياء خطيرة جثير
...عدل كعدته اي شني عرفت كول ﻻ تسكت
..اسمع ضليت ابحث ورة الشيخ لحد ما وصلت بيت حرمه اسمهه.....وسئلته بس مارضت تحجي اله بفلوس وعرفته تقرب الشيخ جثير وتصير منه............حاجيته وعرفت منه كلشي ونطيته الفلوس وكلت اكلك ان ردت اخليك تلتفي بيهه وبقه بس التخطيط شلون وشوكت ندمر الشيخ
...اي هسه عجبتني ما غلطت من حطيتك ايدي اليمين اكول عاد الحرمه شلونه حليوة وﻻ ﻻ
..هههه عليك سوالف ﻻ تخاف الحرمه حليوة
...اذا هيج انه اريدن بقرب وكت اشوفنه بي وعندي فكرة براسي حته بليس كاعد يستغفر منهه
..ههههههه والله صار عندي فضول اعرف بيش جاي تفكر
...كلشي بكته حلو هسه انته ماعليك غير دبرلي وكت مناسب اشوفن بي الحرمه..اكول هيه شكد يطلع عمرهه
..هههههه تدلل اعتقد عمرهه25او اكثر
...اي صغيرة ماتعيب يله انه ارجع للبيت وانته تكفل بلباقي
..انشالله
...في امان الله
..الله وياك
...........................بيت الشيخ.....................
الشيخ:كعدت من النوم ساعه4ونص وانه عندي كعده ساعه5كمت عله السريع بدلت هدمي وغسلت ونزلت جوة مالكيت احد كاعد شربت كﻻص مي وطلت ركبت سيارتي ورحت للمضيف والطريق كله افكر بوضعي الي معاجبني اخر فترة من اجت هلبت لبيتنه وانه ﻻ ليلي ليل وﻻ نهاري نهار
...........
ميار:كعدت ساعه5وربع طلعت للمطبخ سويت الجاي وكعدت انتظر لحد مفار صبيت بلكوب وطلعت بلحديقه اشرب شويه وصارت حركه بلبيت عرفتهم كعدو عاد دخلت شفت أمل تفرك بعيونهه وبعدهه نعسانه
ميار:صح النوم يحلو
أمل:اكلج مو حاله هاي بعد الزك المخده براسي وانامن بلمطبخ يعني من ورة الجوع اكعد واضطر اعوفن الفراش والله شني انه جوعانه
ميار:هههههه والله يالله هياته الاكل جدامج اكلي محد ﻻزمج
أمل:اي هم صح اكول انتي شجاي تسوين؟؟
ميار:جنت برة اشرب جاي
أمل:امم تمام انه راح اكل كليجه وجاي وراها نصلي ونجي نحضر العشه
ميار:تمام براحتج
افنان:ها هلو
ميار:هله حبي
أمل:ﻻ هله وﻻ مرحبه
افنان:ليش عيني كاعده بيتج
أمل:ﻻ كاعده بقصر الملك فيصل هههه ...شبيج اتشاقه وياج
افنان:ههه خرب ببليسج ادري جاي تشاقين
ميار:بنات شني نسوي للعشه
افنان:والله مادري هسه اروحن اسئل الشيخه ونشوف
ميار:تمام براحتج ... شوية ونزلت مﻻك واجت للمطبخ
مﻻك:هيي انتي فصليه سويلي جاي وجرك وجيبليا للحديقه بسرعه
افنان:حبيبتي ملوكه عيب هيج تتصرفين
مﻻك:انتي اسمج فصليه ﻻ تدخلين لتخليني اراويج شي مشايفته بحياتي وانتي هييي شعندج واكغه يله بسرعه
ميار:حزت بكلبي حجايتهه ونهضمتت بس سكتت ورحت اسوي جاي اجت ورايه افنان كالت
افنان:وﻻ يهمج حبيبه هاي شافت روحهه نخطبت كالت اي كبرت وخلني اسوي الي يعجبني بس انه الهه اله اكول لرامي يكول للشيخ عله تصرفاتهه صايرة متنطاق
ميار: ﻻ فدوة لدكليله هسه تصير مشاكل
افنان :ﻻ اكله هيه حته عليه تجاوزت خل يوكفوهه عد حدهه باجر عكبه هيه عد عيال والله ليلعبون بيهه لعب مع انو الصدك همه فقرة انه خايفه عله الزلمه واهله ﻻ هيه تلعب بيهم لعب
ام محمد: سﻻم عليكم
افنان:هله وعليكم السﻻم اشو تئخرتي خاله
ام محمد:اي والله جانو يمنه خطار ومكدرت ااعوفهم واجي
افنان:براحتج خاله يله انه اروحن اشوف الشيخه وام محمد بلا زحمه عليج اخذي الجاي لملاك كاعده بلحديقه
ام محمد:من عيوني
افنان:تعاي ميار ويايه يم الشيخه
ميار:ماشي ام محمد شويه واجي
ام محمد:اخذي راحتج يمه ماعندي شي
مﻻك....................
.....................................................................
شنو تتوقعون مﻻك راح تسوي؟؟
منو الحرمه كرايب الشيخ وشنو راح يخططون؟؟؟؟
اكثر شخصيه حبيتوهه بلقصه؟؟
--------------------------------------------------------
شكرا لزيارتكم عالم روايات سكيرهوم
