رواية خيط الدم الفصل الثلاثون 30 بقلم زينب طالب

انتَ اول راحة

احسها

من بعد تعب

السنين اني

فعلاً جاي اشوفك

عوض رب العالمين .

شفق...

نايمة بفراشي او بالأصح اتصنع النوم أريد اهرب من الواقع الأني بيه صورتة متروح من بالي ولاكلامة الأيام لمرت عليه واني بالمركز چانت من اصعب أيام حياتي صحيح مادخلت سجن ولا شفت احد غير اكرام واصدقائة ومحد ضايقني بس صعبة حيل صعبة علية

احس نفسي مو اني مو شفق لچانت قبل مقتل ابوها كل همها دراستها وطلعتها مع صديقتها ولاشفق لبعد مقتل ابوها همها شلون تحافظ على اختها وتعيش عائلتها وبنفس الوقت تدور منو قتل أبوهاا قتلوا شفق اكثر من مرة وطعنوها اكثر من طعنة 

جسمها عبارة عن طعنات وگلبها ينزف دم من يوم شافت ابوهاا مقتول گدام عينها واختها ميتية سريريا وبيبيتها مذبوحة گدامها شفق انتهت ويااهم اخرر شي حاولوا يسلبون اعز شي ممكن لبنية تمتلكة وهو شرفهاا مالگت گدامها غير تدافع عن نفسهاا وتحافظ على شرفها وتنتقم بنفس الوقت قتلتة بدم بارد وبگلب ينزف 

استوعبت لسووتة بس بعد فوات الاوان اديها ملطخة بالدم وتعتبر مجرمة وقاتلة نفس داخلة مراكز وعليها قضيةة معقولة هااي نهاية شفق هااي قصتهاا نهاية حزينة بطلة القصة مجرمة؟!

بس لالا مااقبل بهيچ نهاية موأني الأستلسم ولااني اوگع مرريت بهوواي مواقف وگمت اگدر اعبررر الصار اي اگدرر اكيد اگدرر 

نفتح الباب بدون مااباوع عرفتة هو تقرب وبأديه الصغير يمسح دموعي لچانت مغرگة وجهي ويحچي بحنية

سند :: ماما كافي نوم وبچي تعالي رجعي مثل قبل اشتاقيت الچ بابا طلع واني وحدي هناا گعدي

باوعتلة مكسور خاطري عليه شنوو ذنبة هالطفل هذا لازم اتقوى لخاطرة هو وأبو اخذت ايدة بستهاا وگمت وياه واني احچي

::يددلل وليدي اگووم شنو تريد نسوي جوعان اسويلك اكل؟

سند :: لابابا راح يجيب لان انتِ متگدرين تسوين شي وخالة جوري راحت

::خالة جوري هم خطية مدري شبيها حتى ماسألتها ملتهية بضيمي اوگف هنا اغسل واجيك

دخلت غسلت وجهي وطلعت لگيتة منتضرني باب الحمام ابتسمت لمنضرة شلون واگف اخذتة ورحنة للمطبخ عيني صارت على المكان غمضت عيوني مااريد اذكر اخذتة ورحت بالطرمة گعدنة على الدچة ننتضر صارم يجي سألتة

::بيبي شلونهاا

سند :: زينة بس هية زعلانة لأن اني ماابقى هواي يمهاا 

:: گللها كلما تشتاقين الية اجي اشوفچ لأن مااگدر اعوف ابوية خطية

سند ؛: اي اگلهاا من اروح 

::عفية وليدي الشاطر

ضحك بوجهي لان مدحتة سمعت الباب انفتح رفعت راسي صارم گدامي من شافني ابتسم متعجب قفل الباب وتقرب علينةة گعد مقابيلي وحچة بحنية

صارم :: شلونچ اليوم حبيبتي

::احسن 

صارم :: شعجب گاعدة هناا؟

::خنگة جوة وسند ضايج گعدنة ننتضرك شنو جبتلنة

صارم :: جبتلكم غدة يلوگ لهلعيون لذبلانة

ابتسمت بوجهة بحزن سحب ايدي باسهاا وگومني دنگ على سند شالة على گلبة ودخلنة جوة حضرت الصينة وگعدنة بالصالة ناكل بهدوء مااشتهي روحي ماتهوى الاكل بس اگلب هيچ مد ايدة على يوكلني باوعتلة حچة بتوسل

صارم :: فتحي حلگچ لخاطري شوفي روحچ شفق صايرة هيكل عضمي يلة حبيبتي اكلي من ايدي

::روحي ماتهوة الاكل وداعتك

صارم :: جبري نفسچ حبيبتي يلة بنيتي لخاطري

فتحت حلگي اكلت ماردت اردة خطية تعبان حيل اكلت منة وخلصنة شلت الاكل راد هو ينظف المطبخ ماقبلت نظفتة وكملت ورحت للغرفة

باليل بعد ماصارم نوم سند بغرفتة اجة لگاني بمكاني گعد يمي اخذ ايدي بين اديه باوعتلة حچة وياي

صارم :: الى متى شفق؟

::شنو

صارم :: لشووكت تبقين هيچ عاجبح حالچ حبيبتي صار اكثر من شهر على هالوضع انتِ

::موبيدي صارم مو بيدي فكرة اني قاتلة شخص ترعبني وكلماا ريد انهض واتذكر المنضر ارجع انكسر من جديد

صارم :: بس انتِ مچان نيتچ القتل ولاانتِ رايحة برجلج وقاتلتة هو الاجة وناوي نية سودة عليچ 

وانتِ بدورچ دافعتي عن نفسچ لأن لو ممسوية هيچ شنو چان صاير بيچ متخيلة شنو صايرر

::اعرف اعرف بس والله تعبت تعبت اريد منظرة يرووح من بالي صووتة كلامة انفاسة برگبتي احسهاا لهسةة صارررم عشت دقائق من حبس الأنفاس وياه بس الله ليعلم بيهاا شلوون انسى شلوون يلة علمني هااي اني گدامك گلي شلوون انسى

صارم :: تذكري هالشخص شنوو سوالچ تذكري شلوون تزوجج بالاكراه وشلون ساومچ قبل وشلون قتل بيبيتچ شفق هذا الشخص قتل بيبتيج بلاا ذنبب بس حتى يحررگ گلببچ لمفروووض لو تقتليه الف مرررة ميأنبچ ضميرررچ شبيچ اصحييي اصححي

::بسسسس بسسس لاتذكرني صاارم ليشش تحررگ گلبي ليشش

صارم :: مااريدچ تفكررين بيههه اريددچ تصحين على رووحچ متكيفين اخذتي ثار بيبيتچ بأيدچ

وناامت هسة مرتاحة بگبرهااا فكري من هالجانب حبيبتي

بقيت ابچي بصووت عالي اتهسترت سحبني لحضنة واني ابچي بقووة وهو يمسح على راسي بدون كلام 

ماحچة شي بعدد خلاني افررغ لبگلبي كلة الى ان سكتت ع گعدتنة تمدد ونومني بحضنة غفيت من الم راسي

ايامي مرت نفسيتي تحسنت شوية صحيح مو مثل قبل بس احسن طلبت من صارم نعوف هالبيت لأن ماشفنة من وراه بس الهم صورتة تتراوالي بكل مكان وصدگ مااعترض ابد 

بااع بيت اهلة اطة لأمة حصتهاا وهو طلع الة فلوس تجيب النة بيت زين اشترة بيت بنفس هاي

المنطقة ماقبلت ارجع لمنطقتنة القديمة

اليوم لميت اخر كم شغلة وانتقلت لبيتي بدون حتى مااگل لوحدة من البنات لان هدوء ملتهية بأبنها ودوامها وجوري هم بدوامهاا وحملها متعبها

صارم شاطر جاب عمال نقلوا الغراض وحتى ذاك البيت نظفوا وكمل كلشي اخذت بس ملابسنة وطلعت سديت هالباب م وانتهت ايامي هناا ومتأملة ينتهي حزني هم

دخلت للبيت الجديد چان بناء حديث والعمالة هسة طالعين من عندة چان عبارة عن طرمة تكفي سيارة وحدة مابيه حديقة مدخلين مدخل استقبال والمدخل الثاني مطبخ وصالة بالنص ودرج يصعد للفوگ صحيات على الجهة الثانية وبلأخير غرفتين وحدة داخلها حمام اخذناها النة والثانية صارت لسند

فوگ بيه غرفتين وحمام بقن فارغات خليت غراض زايدة بيهن اسبووع كامل يلة استقرينة من گعدت هناا حسيت نفسيتي تحسنت ارتاحيت مثل الهم ونزاح عن گلبي بس وين ارتااح واني ماتمر فترة الا انفجع بشغلة

چنة گاعدين اني وسند اقريه لان هاي السنة سجلتة اول وهو شاطر عين الله عليه دخل صارم من برة بعد ماجاه تليفون وطلع يحچي بالطرمة باوعتلة وجهه مخطوف ومحتار شلون يحچي وياي سألتة خايفة

::شبيك صارم صايرر شي؟

صارم :: غيري هدومچ وامشي وياي شفق

::وين نروح شصاير؟

صارم ؛؛ بالطريق اگلچ بس امشي

مالحيت اكثر بدلت لسند وبدلت اني وطلعنة سألتة

::سند ويانة يرووح

صارم :: لا اوديه لأمي

::والله خوفتني احجي وو

مارد علية صعدنة بالسيارة لأشتراها لان زاد كم فلس من البيت اخذلة سيارة تفيدة شغل وطلع الطريق كلة ساكت وصلنة سند لبيبيتة وطلعنة وصلنة لمنطقتنة القديمة رجف گلبي لزمت ايدة باوعلي ورجع دار وجهه وگف براس الفرع مسح وجهة يهدي روحة وحچة بدون مقدمات 

صارم :: شفق بيت اهلچ احترگ

صفنت بوجهه شفتة ساكت صحت ممصدگة

::شنوو شتحچي صاررم شنوو احترگ اكيد تتشاقة وياي مووو

صارم :: أحترگ شفق بيت اهلچ احترگ بأمچ وامچ بالمستفى حالتها تعبانة 

::لالا اكيد تجذب شنوو احتررگ بيت ابووية تعبة ذكرياتةة ريحةة بيبي بيه طفولتي اني واختي لا مااحترك مااحتررگ

عفتة ونزلت من السيارة اركض مامصدگة نزل وراي لزمني من ايدي واني امشي سرريع يحچي وياي مااسمعة اريد اوصل اريد اشوفة بعيني شنوو احترگ شحرگةة امشي سريع وهو لازمني ويمشي وياي الى ان وصلت للبيت وگفت گبالة بهتانة

واني اشوفة عبارة عن سواد هيكل مفخم ماباقي منة شي رجلية احسهن مايشيلني گعدت بنص الشارع مهدود حيلي صارم يمي يحجي وياي مااسمع شنو يگول بس وشة بأذني المنضر مال البيت وجع گلبي دمرني دموعي تنزل بقهر وشفافي ترجف باوعت لصارم مامصدگة يباوعلي بأسف

گمت بصعوبة متجهة للبيت دخلت امشي بروح خاوية واني اتجول بيه صارت ذكرياتي السعيدة والحزينة گدام عيوني هنا ابوية چان يگعد ويسولف النة اني وجوري وهنا بيبي تباوع مسلسلات هندية واني اصنف عليها هنا امي عاركتني وضربتني لأن تجاوزت عليها وهناك جوري گاعدة تبچي وامي تجبرها تتزوج رافد

هناا لگيت ابوية واگع والدم مغرگة وهنا بنفس المكان صارم ضرب وليد لأن مد ايدة علية وامي هددتني وطردتني من البيت اخخخخ گلبي شگدر انسى وشنو انسى البيت عبارة عن رماد مابيه شي صااحي گعدت على ركبي بالگااع بنص البيت وصرخت بعلووا صوتي

:: ياااابة وينككك يااابة تعاااال شوووف بيتك وتعبب عمرررك شصااار بيه يااابةةة وينككك

كلشششي من ريحتك رااح مابقى عنددي شيي منك لابيت ولا اي شي اخذت كلشي وياااك ليشش هسچ ليششش والله موتتني يابةة حرگت گلبي حبيبي گوووم شوووف عزيزتك شصايرر بيهاا من بعددك يغااليي

بلاعمي صارت تحرگني تقررب صارم مني گعدد گدامي باوعتلة وحچيت بكسررة

::اخذ كلشي بروحتة اخذ ضحكتي وحياتي واخذ بيبي واخذ البيت مابقالي شيي لعد مياخذني ويخليني ارتااح ليشش يسووي هيچ بيةة ليش يشلعع گلبييي

صارم :: شفق حبيبتي كاافي اروحلچ فددوة ولچ شوفي نفسچ گوومي مااريد اشوفچ هيچ گوومي ويااي

::وين ارووح خليني هناا صارم عوفني اني فگر اذا بقيت يمك افگرك عوفني من شفتني لليوم يومية مصيبة تصير وانتَ مبتلي بيةة خليني هناا اموت واخلص من حياتي

صارم :: وحياتي اني منو يحليها شفق من اشوف عيونچ كل تعبي وهمي يروح حبيبتي انتِ وجه الخير علية مو فگر انتِ بدخلتچ لحياتي يلة صحيت على نفسي لاتحچين هيچ حبيبتي يلة گومي لاتبقين هناا 

بقيت صافنة بوجهة بحيرة ودموعي تنزل سحبني من ايدي وطلعني من البيت بقينة نمشي بالفرع مالتنة وكل ذكرياني تمرر علية صعدت بالسيارة شغلها وطلع حچيت وجهي للشارع

::وديني اشوفهاا

صارم :: عوفيها شفق

::صارم وديني ترة اروح وحدي

صارم :: شسوين ترحين الها ليش تجيبين الأذية لنفسچ

::اريد احچي وياهاا اخذني الها

صارم :: استغفر الله

باوعلي حاير ما درت وجهي طلع بية للمستشفى واني افكر شلوون راح اشوفها شنو اگللها اعاتبيها لو الومها لو انسى كلشي واروح اهوون عليها الهماا

وصلنة للمستشفى لزم ايدي ومشينة سأل وين موجودة دلونة غرفتهاا تقربت اسمع صوتها جااي من جوة تتوجع الالم بصوتها كافي يخلي جسمي يرجف طلعت الممرضة بأيدها ادوات التعقيم حجيت وياها 

::شلونهاا

__مو زينة حرقها مرحلة متقدمة مااعتقد تطول 

::اگدر اشوفهاا 

__عقمي نفسچ ولبسي وفوتي بس لاتتأخرين 

هزيت راسي وعافتني وراحت سويت مثل ماگالت الية ودخلت صارم بقى ينتضرني برة چانت تون بصوت عالي منضرها يقشعر البدن ملفلة من فوگ ليجوة مابيها مكان سليم تقربت منهاا سحبت كرسي وگعدت اباوع عليهاا وهيةة تتلوى گدامي لحد هاي اللحظة ماحاسة بوجودي مشاعري جامدة مااعرف شسوي هسة شنو اگول وشنو احچي فتحت عيونهاا شافتني وصاحت بحرگة

سهام :: شفق ولچ شفق حرگني بعدد مااطيتة كلشي باعنيي وحرگني شفق يريد يمووتني ولچ حبيتة وانطيتة كلشي وفضلتة عليچن حرگني بيدة

::منو هوو شتحچين

سهام :: تتشممتن بيةة موو اخخخخ يمةة ولچ جسمي يوووجعني انطيني شي دووة اريد ارتاااح ولچ رحميني شفق رحميني

حچيت برود

::چا مارحمتيني انتِ

سهام :: ولچ اني امچ لاتصيرين هيچ اخخخخ ولچ وليددد حرگني شفق شلووون ماسجلت البيت بأسمة حرگني وحرگ البيت بلغيي عليةة شفق لتتخليه يشررد اخذذي حقيي منةة

::واني منو ياخذ حقي منچ يمة

سهام :: ولچ جسمممي يووجعني سكتييي اخخخ وينكم طلعيي امشي طلعيييي بتتت الكلببب عوفييين وطلعيي

::لاتغلطيننن على ابوييي لاتغلطييين شسوالچ هووو وانتِ بهالحاالة وتسبينن بيه

سهام :: الله يحرگةة كتلتةةة وماخلصتت منةة روحة ضلت ملاحگتني الى ان حرگتنيي اخخخخ يابةةة ولكممم لحگوني الوجع موووتني

::شتحچين انتِ شتحچيين شنووو كتلتية شتحچيين يمةة لاتجذبين جذابة والله جذابة

سهام :: اخخخخ طلعي ولچ طلعييي الله يحرگچ ويحرگ ابوووچ اجيتي تشمتين بوجعي طلعيي منااا روحييي

::سكتي سكتييي سكتيي لاتجذبيين موانتِ لاالا وموانتِ لاتخبلنيي 

بقيت اصرخ عليهاا واهزز بيها نسيت وضعهاا وهية تصرخ كل صووت يهزز البددن على صوتي دخل صارم يركضض سحبني منهاا والممرضات دخلن طلعني برةة واني انگزز اريد افتهم منهاا 

::عوفني صاررم عووفني ولكك بس احاچيهاا تكلي اني كتلت ابوووچ ولكك امي كتلتة لالالا متسوويها موو تجذب عليةة تريد تحرگ گلبيي صاارم عوووفني ولك عوفنييي

فقدت بقيت ادگ على وجهي بالگوة سيطر علية

صاؤم :: اششش شفق شفق اهددي سمعسني تجذب عليچ سكتي شفق لاتصدگيهاا سمعييي 

هو يحچي واني احس الدنيا صارت سودة بعيني وشة بأذني ادية رخت وگعت لحگ غلية لزمني فقدت مادريت بشي بعد

فتحت عيوني نايمة والكانونة بأيدي شفتة يمي باوعت بعيونة نزلت دمعتي وحچيت بغصة

::امي كتلت ابوية منين اخذ ثاري؟

صارم :: موهية شفق لاتصدگين 

::هية أعترف الية وگالت كتلتة

صارم :: وليد كتلة وهية تسترت عليه مچانت تريدة يموت 

::شمدريك؟

صارم :: اعرف

::تعرف ومتگلي؟

صارم :: شگلچ يعني شفق شگلچ اذا اني من عرفت مصدگت واذا گتلچ قبل يمكن تكتليها بيدچ وتروحين نفسچ

::أحچيلي صارم شلوون شلوون گلي لتتضم علية شي اريد أعرف

صارم :: مو هسةة گومي نطلع مناا

::لالا هسة هسة ترة والله مااروح ويااك گلي ولاتجذب علية

باوعلي بقلة حيلة وحچة

صارم :: من يوم لرحت لبيت ابو عماد واني عرفت كلشي الكاميرة چانت موجهة على بيتكم مو كلش واضح بس لشفتة ابوچ لازم امچ وية وليد من شافهم راد وليد يخلص نفسة من ادين ابووچ ما گدر اخر شي غدرة دفعة بكل قوتة وگع على الصبة على راسة وراها گام يرگع براسة بالگاع الى ان دمة صار يطافرر امچ واگفة تباوع وتبچي ماادخلت يمكن چانت تريدية يموت لان نفضحت بهاي اللحظة طلعت بيبيتچ شافتهم وليد من شافها طفر عبر من السياج وأمچ بقت على وگفتها بيبتچ مسوت شي راحت لأبووچ تشوفة من تأكدت مات گامت تلطم شفتها فقدت بذيچ الساعة

هو يحچي واني دموعي تنزل اتخيل ابوية شلون يرگع براسة بالگاع حتى يخلص علية ويطم عارة وأمي لوأگفة ومامنعتة يسوي هيچ شلون تحمل الألم مو ألم واحد اثنين الم الخيانة والم الغدر من اقرب ناسةة صديقة وزوجتة يارب شنوو هالبشر ذولي

مسح دمموعي وكمل كلامة

صارم :: من عرفت ماردت منچ تعرفين چنت ماالية سلطة عليچ خفت تضيعين نفسچ لو تسوين شي يخليهم يأذوچ وانتِ محد الچ 

::امي تدري انتَ تعرف؟

صارم :: أي من أجت لبيتنة رحت الها للبيت وهددتها متوصل الچ وكشفتها نكررت وحاولت تجذبني بس شوفتها التسجيل يلة نردعت منچ

::زين ليش هيچ سوت مسألتها صارم گلي برد گلبي

صارم :: تگول مچان ناوي يقتلة بس من شافة بيتة ونفصحنة مابيدينة نسوي شي غير نخلص عليه امچ عمرها ماحبت ابوچ شفق ومن شافت وليد گدر يقشمرها باعت العشرة ونجرفت وياه 

::بس هو چان يحبها مأاذاها ابد

صارم :: هواي نسوان ناكرات المعروف وميقدرن النعمة لعدهن بس ربچ يخلي نهايتهن سودة واكبر مثال بنين وامچ اثنينهن نفس الصنف ونهايتهن تعيسة 

::صارم گلبي يوجعني والله صعبة حيل صعبة شگد امي سوت مصايب بيةة ماأذتني بگد هالمصيبة هاي امي كتالة ابووي صاررم ولك امي امي امي وعشيقها كتلوا ابووية اخخخ يانار گلبي

صارم :: شفق حبيبتي اهدي

::وخررر مني انتَ تعرفف وضام عليةة عووفني وخررر عني

دفعتة وگمت واني أبجي دم مو دمووع عبالك ابوية اليوم ماات طلعت من الغرفة وهو يمشي وراي ويحجي يريد يلزم ايدي واني اعت روحي منة مريت من باب غرفتها اسمع صريخهاا من جوة تمنيت ادخل واذب عليها تيزاب اريدها تتعذب اكثر من هالعذاب هذا يمكن قبل لااعرف گلبي حن عليها ونقهرت شوية بس هسة لو اشوفها تشتعل مرة ثانية گدامي مااطفيها

عديتها وطلعت من المستشفى واني امشي مااعرف وين اروح بس مااريد اوگف ولااريد احد يمي صارم يمشي وراي بس عافني براحتي ماضايقني امشي وأبچي والناس تباوع علية مشيت ومشيت تعبت حيل گعدت على الرصيف خليت راسي بين رجلية 

وگعدت حسيتة گعد يمي حچة بهدوء خايف من ردة فعلي

صارم :: شفق حبيبتي گومي تعبتي خلينة نرجع

::معليك مني ماأرجع وياك

صارم :: ليش شفق اني شعلية ليش تحمليني الذنب

:: انت تعرف وماگتلي جذبت علية وخليتني عايشة بجذبة

صارم :: لمصلحتچ سويت هيچ خفت عليچ وعيونچ

:: مااعذرك صارم گلبي شايل عليك روح مني

صارم :: مااعوفچ امشي وياي وزعلي بالبيت وين اعووفچ

::لجهنم معليك بيةة مااروح وياك

صارم :: وسند شفق اذا ماشافچ يتأذة هسة يلة گدر يستقر حبيبتي عندة دوام مو تگولين اني امة شلون تعوفية

باوعتلة بحقد عرف منين يلزمني گمت وياه ورجعت امشي حيل وصلنة للسيارة صعدت ورة وطبگت الباب حيل مااعترض على شي صعد ومشى بينة راح اول لبيت امة اخذ سند صعد يمي اخذتة لحضني ورجعنة للبيت دخلت رحت لغرفة سند غيرت ملابسي وتمددت بفراشي مالي خلگ احچي وية احد اسمعهم كل شوية يفتحون الباب من يشوفني مغمضة يطلعون ردت ابقى وحدي 

بقيت افكر بالصار واحس عقلي يريد ينفجر والله لصار احس عقلي مجاي يستوعبةة اخخخ يابة شگالت الك روحك بذاك اليووم وبيبي چانت تعرف وعايشة وياهم شلوون گدرت تتحمل شلون عايشة وية كتال ابنهاا 

بين تفكري ودموعي غفيت بتعب حسيت احد يغطيني ويبوس راسي عرفتة صارم ماگدرت احجي وياه عفتة ورجعت نمت

ثاني يووم من الصبح گعدت على صوت جوري گعدت لگيتها گبالي وعيونها مورمة من البچي وبطنها كبرانة شوية باوعتهاا اجت شبكتني تبچي

جوري :: صدگ شفق صدگ لسمعتة امي ووليد همة لكتلوا ابووية ولچ احجي وگليلي جذب گليلي جذب شفق

:: اي جوري اي ولچ شفتي لياحال وصل بيها الاجرام كتلتة وتزوجت كتالة اخخخ ولج من البارحة لليوم ناار وشابة بگلبي مجاي استوعب لصار جوري

جوري :: من گلي اكرام ماعولت البس واجيج گليلي هيةة وينهاا شصار بيهاا شفتيها

::اي شفتها الله لايهنيها بالمستشفى مثل الجلب مشمورة تصارع الالم 

جوري :: عساها وابو زايدد ان شاء الله خليني اگلچ شي يفرحچ شوية

::شنو

جوري :: اليوك ومن الصبح لزموا وليد بالمطار جاي يشرد الحقير

::عليچ الله شلوون

جوري :: من البارحة صارم مبلغ اكرام واكرام سوة اللازم بحيث ماطول 24 ساعة ولزموا وهسة هو بالسجن واكرام بالمستفى ياخذ اقوال سهام حتى تصير على القضية اثنيهن هم قاتل ابوية وهم حرگها وناوي يكتلهاا

::الله يحرگهم اثنينهم

جوري :: يلة گومي غسلي وتعالي برة 

::مااريد اطلع خليني هناا مااريد اشوف احد

جوري :: شنو متزاعلين؟

:: يعرف ومگلي شايفة هيچ

جوري :: يخاف عليج اكيد

::لا موعذر هذا لاتبرريلة

جوري :: يلة لاتعصبين بكيفچ بس گومي غسلي خلي نتريگ

طلعت وياها غسلت وسويت ريوگ اكلت شوية لخاطرها روحي ماتشتهي العسل بس علمودها

هية بقت يمي لليل يلة راحت مرت يومين واني انام بغرفة سند اكمل شغلي وافوت للغرفة حچي مااحچي وياه اريد اتوبة حتى ميظم شي علية بعد

اليوم اجاني الضهر چنت بالمطبخ اسوي غدة وسند يمي يحچيلي عن يومة بالمدرسة حچة وياي ومارديت علية صااح بية

صارم :: مو احچي ويااچ شفق

::نعم شرايد

صارم :: امچ ماتت اليوم

وگع الماعون من ايدي وانكسر ركض علية لزمني

صارم :: تأذيتي شفق حبيبتي شبيج

::شبية مابية مابية شفتني هسة شگيت ثوبي عليها وملخت شعري واذا ماتت واذا شنوو يعني تستاهل الموت تستاهل

صارم :: بس اهدي ليش ترجفين حبيبتي

::هم گلي اهددي هادية اني هادية شمسوية وخرر عني

دفعتة ودنگت لميت الكزاز وبقيت بالمطبخ كملت الاكل وصبيتلهم ماگعدت وياهم بقيت اشتغل بالمطبخ واني اعيد حچايتة براسي امچ ماتت بس هية مو امي مو امي امي ماتت من زمان من يوم كتلت ابووية ماتت من يوم باعت جوري ماتت من يوم شمرت بيبي بدار العجزة ماتت من يوم طردتني من البيت ماتت من زمان امي

دخلت للغرفة ااباوع لروحي للمراية عيوني يابسة بقيت احچي وية نفسي ابچي شفق ابچي ريحي 

گلبچ بس لااا ماتستاهل ابچي عليها ماتستاهل

ابدد ماابچي ماابچي

گعدت بمكاني صافنة بالفراغ صارم دخل علية باوعتلة

::جوري عرفت

صارم :: اكرام عندة خبرر اكيد عرفت هسةة

::خلي يجيبها هناا

صارم :: عوفيها هو يعرف يهديها بعدين امچ متستاهل احد يزعل عليها

::اعرف بس جوري گلبها طيب تتأذة اعرفها

صارم :: عوفيها حيري بنفسچ شوفي روحچ

::معليك مني

صارم :: بكيفج شفق بكيفچ

حچاها ورگع الباب وطلع بقيت صافنة وراه يمكن زودتها وياه بس ماعندي خلگ افكر بشي ثاني

طول اليوم بقيت بالغرف ماطلعت ابد حتى الباب قفلتة علية گاعدة وصافنة بالفراغ واگول شحصلت هسة شنو لأستفادت خسرت الدنيا والأخرة بعمايلهة 

گلبي مايطيني اگول الله يرحمهاا لان متستاهل الرحمة ابد

مرت الايام ومشت حياتي بين البيت وبين سند اني وصارم علاقتنة بردت فرد مرة مابينة بس السلام

يمكن مل من عندي ومن مشاكلي واني ماعندي قابيلة ابادر وارجع اصالحة احس روحي ميتة وامشي بس جسدد

اليوم صارم اخذ سند وراح يودع بيبيتة لإن راح تسافر ترجع يم اختها تگول ماالية گعدة بالعراق سند وراح من يمي اروح اصالح اختي واگعد يمهاا صارم مااعترض لأن اصلاً ماقبل يصلح علاقتة بيها شگد حاولت وياه وبادرت چان قافل عليهاا وحقة ماالومة

رجع سند من عدهاا يبچي اخذتة لحضني شبگني يحچي بشهگةة

سند :: بيبي راحت بالطيارة وبعد مااشوفها

::يروحي لاتبچي سنود شوكت ماتشتاق الها نتصل بيها ونشوفها بالكامرا

سند :: بس اني احبها اريدها تبقى هنات

::هية هم تحبك حبيبي بس هية محد يمها راحت لأختهاتقبل تبقى وحدها بالبيت محد يمها

سند :: لامااقبل لان هية تخاف

::خلاص لعد راحت يم اختها وانتَ من تشتاق الها اتصل بيها متفقين

سند :: بكيفچ

::هههه يروحي يلة تعال غير ملابسك

اخذتة غيرت هدومة وبقيت يمة اسولف وياه ونسيتة السالفة ووعدتة هواي شغلات الى ان نام بستة وطلعت صار اكثر من شهر اني انام يمة اليوم گلت كافي خليني اروح اشوفة لان من دخل چان ضايج وعيونة حمر تعجبت معقولة ضااج على امة وهية راحت ولهسة ماسامحهاا

دخلت للغرفة لگيتة متمد رفع عيونة يشوف منو من شافني تعجب بقى يباوع بعيوني بقيت بمكاني واگفة مستحية منة مااعرف شبية گام على حيلة سحبني من ايدي ومشى بيةة للسرير تمدد واخذني لحضنة بدون اي كلام حضني حيل وباسني براسي اسمعة يحمد الله ختلت بحضنة حيل ونمت مرتاحة من بعد ايام صعبة مرت علية

بعد مرور عدة اشهر....

::سندد ماما جيب النفااخ خلينة ننفخ يلة راح يجن خالاتك

سند :: اي ماما اي

ركض للغرفة جاب النفاخ گعدنة اني وياه ننفخ بيهن اليوم مسوية حفلة لسند لان نجح من الاول راح للثاني انتضرت البنات يعطلن وسويتها هدوء كملت السنة وراحت للثالث وجوري نجحت للسادس اعدادي

كلهن عطلن يلة سويتهاا عزمتهن وگالن جايات بالطريق صارم جاب العشة والكيك وطلع لان گتلة حفلة بناتية روح شوفلك ديرة

للعصر دخلن علية اثنين استقبلتهن هدوء ابنها كبر

وگام يخطي وجوري جابت بنوتة سمتها شفق على اسمي شگد اعترضت ماردتها على اسمي اخاف تطلع مثل حضي بس هية اصرت وسبحان الله حتى ملامحها وعيونها علية بس البياض والغمازات على امها اخذتهاا اعضض بيهااا تخبل مدنفشة

::ولچ جووري شوو منعسة چنتي شنوو مامنومتها

جوري :: من الصبح گعدت لهسة ولاقبلت تنام عليچ الله دخليها جوة نوميها 

::اي ادللي. وانتِ هدوء ابنچ وين

هدوء :: بالاستقبال يم سند هسة يطگ النفاخات كلهن

::فدوة الةة عوفيه

عفتهن يجهزن واخذت شفق الصغيرة نومتها وطلعت لگيت مكملات كلشي شغلت هدوء اغاني وگامت ترگص الجهال وياهاا صحت بيها

::ها ها شنوو چنچ محروومة

هدوء :: اوووف سكتي وخليها الرگص بنفسي وجعفر مايخليني شايفة هيچ الزلم تكيف نسوانهم ترگص الا اني مايقبل

جوري :: وبدلة الرگص وين ودريتها

هدوء :: ذيچ تسمع حسچ بالكنتور بس الا البسها الةة لو اعرف اشبگة چاا وين البسهااا

::ههههه والله مخبلة

هدوء :: معليچ تعالو سند جيبلي جدر من جوة

::ياشلچ بيه

هدوء :: يبوو شگد تسألين معليچ امشي سندد

ركض سند جاب الها جدر تربعت وگعدت وكامت تطبل وتهووس والجهال تتناگز گدامها گامت جوري ترگص على الواهس واني اصورهن واضحك عليهن

هدوء :: سمعن سمعن ورگصن يلةة اريد تذبن لحم

يخية تباركيلي عررس وليدي

يخية تباريكيلي عرس وليدي

انة لحبيت جعفوري ع اطباعة

انة لحبيت جعفوري ع اطباعة

يطوني هلي لو اسوي طرگاعة

انة لحبيت جعفوري على اطباعة

وگلللوووووشششش

جوري :: جعفوري شدخلة بالنص ترة حفلة سنودد

هدوء :: معليچ لچ رگصي

اطبل وتغني وسند يرگص وموسى صافن على امة ويصفگ خبلت الولد 

ههههههه الله يعينك يشيخ جعفرر ولچ راح ادزلة التصوير

هدوء :: لا على بختچ يضل ساعة يطيني دروس بالتقوى والأيمان عوفيني اتونس

بقينةة لليل نغني ونرگص تعشينة واكلنة كيك وصورنة كلش تونست وياهنن لليل كلش يلة اجوي زلمهن واخذوهن وراحن

سند تعب حضرت الة هدومة وبدل ودخل نام واني لملمت البيت وانتضرت صارم باوعت لروحي بالمراية لابسة فستان اسود على جسمي يصير تحت الركبة

ربع ردن وشعري مشسورتة ومكياج قوي طوخت الحمرة وتعطرت لمن سمعت الباب نفتح ركضت استقبلتة فتح اديه الية ركضت علية شالني وفرني

بالصالة واني اضحك

:::ههههه صارم نزلني لأاوگع

صارم :: بيدي وتوگعين؟

::ههههه عليك الله نزلني دخت 

صارم :؛ اسم الله عليچ من الدوخة 

نزلني وبقى يباوع بوجهي خجلت من نضراتة حيل

دنگت راسي مد ايدة رفع راسي ودنگ طبع قبلة على شفافي وحچى بصوت ذايب

صارم :: تعجز حروفي عن وصف جمالك سيدتي

ابتسمت بوجهة مستحية شالني بحضنة واخذني للغرفة نومني على السرير رفع نفسة يباوع بعيونة سألتة

::ليش تباوعلي هيچ ترة اخجل

صارم :: احب اتمعن بتفاصيلچ 

:: واني احب نضرتك الية 

صارم :: شنو يعنيلچ صارم؟

::كل هلي هو

صارم :: وانتِ كل هلة يابعدهم يابعد گلبي وحياتي

حچاها وبدة يوزع قبلاتة على كل اجزاء وجهي واديه ترسم تفاصيل جسمي تفاعلت وياه وصرنة واحد يعبر للثاني حبة بطريقتة الخاصة...

نايمة على صدرة وهو يلعب بشعري سألتة 

::هم عرفت شي عن وليد وشصار وياه

صارم :: ليش تعكرين مزاجج بيه

::لامااضوج بس اريد اعرف

صارم :: نحكم مؤبد هم على مقتل ابوچ وهم مقتل

بيبتچ وحرگ امچ

::هه وشوكت ينفذون اذا هو غصون واخوها لهسة بالسجن

صارم :: يمعودة وين يتنفد الحكم بس المهم ماالهم طلعة مناك بس للگبر

::الله يلعنهم

صارم :: امين

ثاني يوم اخذني صارم للنجف طلبت منة اريد ازور ابوية وبيبي وصلنة سند لجوري ماردت يروح للمقابر بعدة صغير خفت علية وصلنة للأمام علي(ع) زرناه وراها للمقبرة وصلت لگبر ابوية گعدت يمة ابچي واحچي

::يابة حبيبي فراگگ صعب علية والله صعب صحيح عايشة بس دومك آبالي مانسيتك ولالحضظة كل يوم يمر طيفك علية كتلوك غدر 

وظلم بس الله عاقبهم اخذ حقك منهم ودمك ماراح هدر يابة حبيبي صورتك بعيوني وروحك عايشة وياي مستحيل انساك انتَ عايش بية لأخر نفس يرحمك حبيبي 

بست گبرة ورحت لبيبي 

::هاا جمارة مرتاحة حبيبتي ثارچ اخذتة الچ ولكتلچ نال جزاتة واحد مات والثاني بالسجن

ارتاحي حبيبتي ونامي حقچ وصل لعندچ

ودعتهم وگمت واني انفض التراب منهم صحيح انتو جوة التراب ورحتوا غدر وظلم بس متأكدة هسة انتو بالجنة 

لان ماكو احن واطيب منكم ولكتلوكم اتعذبوا بالدنيا قبل الاخرة 

الباشا 

سهام

وليد لقتل ابوية وهو ساعد الباشا بقتل بيبي لان اطاه كم فلس وهم حقداً وبغضاً بية دخل لبيتي وياه وقتلوها اثنينهم

كل شخص بيهم اخذ الجزاء ليستحقة بالدنيا وينتضرهم عقاب الاخرة

ايامي مرت يوم احلى من يوم بين دلال صارم الية وسند ابني حبيبي ملة على البيت وهاي السنة قدملي صارم جامعة لان شافني گاعدة وماعندي شي واخيراً حققت حلم ابوية ورجعت للدراسة وراح اصير محامية قريباً

جوري مستقرة بيتها مع رجلها وبنتهاا وحياتهم ماشية الحمد لله وحاليا ادوام سادس قاطعة علاقتها بعيالها بس عمها وحماها يجوها

اما هدوء هم عايشة مع رجلها الشيخ وخالتها وابنهم موسى ماسوت غيرة الى ان تتخرج وحاليا هية مرحلة ثالثة وبعدها نفس خبالها حتى لو صارت ام ابد متتغير اخر خبالاتها زعلت لان ماقدمت مثلها تربية تريدني وياها بس اني ردت قانون وخليتها بزعلها كم يوم واجتني وتصالحنة مرجعها الية ماتگدر بدوني ولااني اگدر بدونها

صارم هذا الرجل لمستحيل اوصفة بطيبتة وشهامتة ورجولتة وحنيتة من اول يوم وگعت عيوني عليه 

رجف گلبي من الحوف واليوم اني احتمي بيه هو سندي واماني من بعد ربي 

باوعتلة گاعد عالسطح يسوي مرجوحة لسند واگف يشد بيها واني اصورة كمل ورفع راسة باوعلي يضحك حچيت

::صارم صعدني اني اول

صارم :: يلة تعالي

اطيت لتلفون لسند يصورنة وركضت صعدت حچيت

::فرني

صارم :: تأمرين

دفعني حيل طيرني بالهوة شعري يتطاير وياي سنود يصور بينة واني اضحك من كل گلبي وگف المرجوحة باوعتلة فحطانة تقرب مني باسني بعيوني وگال

صارم :: احبنچ سمرتي ام عيون الخضر، البرعة..

ضحكت ورديت عليه

::احبك لمخبل

...

....

انتهت قصتنا بس حبنا لليوم باقي ولأخر العمر حالياً عايشين بسعادة ونعمة شي واحد ناقصني متمنية يصير اخو لسند بس لهسة الله مارزقني ادعولي حتى تكمل سعادتي، واحب اشكر كل شخص تابع قصتي وتأثر بيه وفرح لفرحنة وحزن لحزنة شكراً الكم من القلب

وشركي واحترامي لأختي زينب يعني شنو اوصف هالانسانة اعجز عنهاا شگد تحملتني اني وخواتي

ما ملت ولاضاجت ومامتندمة اختاريتها هية بالذات تكتب قصتي لان وصلتها مثل ماعشت ومثل ماحسيت بالضبط شكراً الچ زنوبة ان شاء الله اشوفچ احلى خريجة اخرر شي اني وياكم اتابع تعليقاتكم وموجودة هم بالقناة وسلامكم يوصل الية اني وخواتي شكرا الكم🩷

....

......

الى هنا ندع ابطالنا يكملون الباقي من

حياتهم بينهم ونغلق ابوابهم وندعوا

لهم بالسعادة وراحة الباال

اما انا زينب طالب اقدم لكم

كل الحب والأحترام متابعيني

الأعزاء وسلطاناتي كنتم سبباً

في نجاحي ونجاح الرواية

شكرا لكل شخص ساندني ولو

بكلمة جميلة تعبر عن اخلاقة وحبة

شكرا لكم سلطانتي انتضروني

في عمل قادم الى ذلك الوقت

استودعم الله 👑🩷

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم

شكرا لزيارتكم عالم روايات سكيرهوم