رواية أرض الخناجر الفصل السابع والخمسون بقلم ايلول
══━━━━✥◈✥━━━━══
ما دامَتلي فَرحة
ولا دَمعتي ترُوح
مدري شعندهَ وكتَي
وياي مِتعاند
صِرت حتى مِن أنَام
أحلامي مو حلوات
لو مَكتول أفز لو كاتل وشَارد
══━━━━✥◈✥━━━━══
مــاسه :: كضيت بــدور من ايدها حيل مرتبكه حجة بقلة صبر
-اصعدن
اخذت بــدور وفتحت الباب صعدت هي بالاول وانه وراها صارت بالنص وكاضتها من أيدها خايفه جن شفت صــيهد مو ســليم
حرك السيارة ساكت يمشي على كيف وحجه بهدوء
ســليم:: وين چنتن
عصرت ايدي بــدور بأيدي اسكتها خاف تحجي تحمحمت وحجيت كبلها
-هنا خويه بالمحل اشتريته غراض
شال عيونه بالمرايه يعاين لبدور وهي تعاين گبل وجها ما يكصه السيف خفت من ضل يعاينلها من المراية البالنص وكف السيارة يم مدرستها وقفل البيبان عاينتله مرتبكه
ســليم:: ست بــدور
عاينتله بــدور بخزر وهو من المرايه بس عيونه مبينه گالها
ســليم:: هواي حجي واصلني اذا طلع من هالحچي شي صح رجليج احشهن حش واذا لگيتج النوب دايحه منا منا ظهرج افصمه سمعتي
ووي حچايته بــدور فتحت عينها حيل ومدت أيدها تصيح
بــدور:: ياهو انتَ وتحش رجليَّ اشايف روحك
جريتها بخوف اريد اسكتها مالحكت دار علينه وبظهر ايده طكها على حلكها متسودن وانه روحـــي رايحه جريتها الحضني ساده حلكها وهي مفرفحه بس تريد تفرغ روحها من عدي وتغلط خازرها بغضب ويحجي من بين اسنانه
ســليم:: علي صوتج النوب وشوفيني شسوي
يحجي وبدور متسودنه تجر بأيدي تريد تحجي وانه بأثنين ايدي كاضتها وساده حلگها ارجف واحجي وي ســليم
-ابن عمنا على عيني وراسي بس اخوتي يكصون اديك لو دروا مديتها على وحده بينه لا تعيدها
احجي وياه وهو خازر بــدور ما يعاينلي بطني مردت روحي من الوجع كد ما بــدور تدفع بيه وكلساع تحط عكسها ببطني تريد توخر من عدي وتغلط عليه
ســليم:: هديها خل تنزل لمدرستها عاينــي بــدور وروح عمي شامل لو سمعت حچاية عليج النوب أنحرج وكل يوم تلكيني بباب مدرستج اريدن اشوف شلون ترحين تخمين بعد
وبدور تغلط وصوتها مكتوم جوه ايدي نزل هو يحاجي الشرطي لان باب المدرسة مسدود هديت بــدور دفعتني تبجي وتغلط متسودنه شفتها مشكوكه جريتها من ايدها حيل
-سددي حلكج بس خل نرد للبيت لو ما سولفت لوهب عليج عاتبيني انزلي وحرف ماتحجين لا يخابر صــيهد
نترت ايدها من ايدي حيل تبجي
بــدور:: ابن القنادر ابن النعل يمد ايده علي الحيوان ابن الحيوان
تغلط بحرگه وتمسح بوجها وشفايفها هو رد للسيارة وهي نزلت طبت لمدرستها عيني وراها مختنگه حرك السيارة ســليم يوصلني لمدرستي مسحت دموعي ايدي على بطني عاينتله من المراية اعصاب
-خويه شسامع على اختي
ضل ساكت وانه روحي رايحه لمن وصل يم مدرستي وگف السيارة وگال
-ماعدها شي بس الجاي تمشي وياهن مو خوش ومصاحبات هل يرحلهم وهي مرافگتهم خل تصير ادميه لا تجبرني اسولف لاخوتج
-لا والله العظيم هي بس تروح للمحل تشتري وتجي والله العظيم
حط ايده على عيونه ودار علي يأشر بأيده ويشرح محترگ گلبه
ســليم:: خويه اسكتي يرحم اهلج ولج انا مريت من يم المحل وياي صاحبي نزل يشتري ورد يحجي عليهن گال بنات وره المحل يحجن وي صحبانهن تالي المح بت عمي واكفه على صفحة تحرسلهن انتِ صدك تحجين انا مو زين مني وساكت بالحسين لو كضيت عليها شي النوب الا اگطعها
فاتحه عيني كلها مصدومة وهو بحرگه يحجي ميت من آلقهر شلت ايدي ارجف مسحت دموعي ومديت ايدي ليدة الباب اريد افتحه حاجيته مختنگه
-لا تحجي لصيهد فـــدوه
مسح وجهه ودار هز راسه اي ونزل گبلي نزلت من السيارة روحي رايحه حچه وي الشرطي فتحلي الباب طبيت للمدرسة مختنگه وزادنها علي بالادارة من رزلتني المديرة لان متأخرة وكوه كضه الدوام كل فكري ببدور شلون تسوي هيج كله مني لو ما ساكته المره الاولى لو حاجيه لامي متوبتها جا ماعادت هالسالفه
للحلة بباب المدرسة تلاكت وياي رنـــه سلمت عليها وهي تدردم وتحجي ع المدرسة
رنـــه :: هذا شني الرابع صدك يحجي عمي رجعوني للثالث
-هههه ليش ولج سهل
-يا سهل يمه يشلوط
دنكت ساكته نمشي بهوسة البنات نريد نطلع للشارع كضتني من ايدي درت عليها عاكده حاجبها مستغربه
رنـــه:: بيج شي مــاسه
-تعبانه خيه حمّل ومدرسة وهموم البيت ومشاكل طلعانه روحي
-شكو صاير شي عليمن مشاكل
تحسرت ساكته تمنيتها ضاله وي بــدور بنفس المدرسة هي راحت لعبود وانه رحت للسيارة مرينه على بــدور صعدت دايره وجهي منها حرف ماحجيت وياها لحد ماوصلنه نزلت هي مشت للبيت گبلي نزلت وراها طبيت لبيت اهلي رغد وندى بالمطبخ وهوسه يتعاركن وي سعاد بس طبيت الغرفة امي بستها ورحت لبيتي صارت ماريا بوجهي طالعه من الحمام العيون مورمه مدري ليمت تبطل بچي
صفنت بوجهي بحيره ذبيت الجنطة وعبايتي وكعدت بالهول بهدوم المدرسة محتاره شوي وماريا مدتلي كلاص ماي عاينت لوجها واخذته من أيدها متحسره
ماريا:: باين عليكي تعبانه نهارك ماكان منيح
ابتسمتلها اهز راسي لا ومديت ايدي اكض ايدها حتى اوكف جرتني تساعدني وكفت على حيلي
-مابيه شي انتِ شلونج عيــونج حمر عليمن تبجين
دنگت ساكته عافتني وراحت الغرفتها بدلت وطبيت للمطبخ محتاره بالغده اجت وراي مبينه ما مرتاحه قلقانه عليَّ من شافتني تعبانه وكفت بباب المطبخ تعاينلي بس هي بالقرية لابسه الوان عاينتلي فاتحة المجمدة واعاين بيها گالت
ماريا::فيني ساعدك بشي
-راح يجون اخوانج وانه بعدني ما مسويه غده شنسوي شتگولين
احجي واسأل بلكن تتعود علينه رفعت اجتافها ما تدري كتلها
-نسوي تمن ونگلي سمچ وياه
ماريا:: متل ما بدك
طلعت السمچ وهي طبت يمي للمطبخ گتلها
-تعرفين تطبخين تمن
واكفه على صفحة خجلانه لفت شعرها كبايه هزت راسها اي
ماريا:: وين لاقي الطنجرة والرز
طلعتله التمن غسلته واطيته الجدر وكفت يم الطباخ
-ليلى هسه اجيج انه
دارت علي مقهوره لان گلت ليلى دنكت ساكته طلعت من يمها خابرت على وهـــب ماكلني القلق خايفه احجي وخايفه ما احجي واتندم بأخر دكه يله رد
وهـــب:: ها حبيبي
-ها وهـــب شلونك
-هلا يابعد روحـــي شلونج
-زينه، اكلك وين انتَ
-توني طبيت للبيت كولي
-ما تجي شويه اريد احجي وياك
-جايج
سديت التلفون وطلعت للهول حيره تجيبني وحيرة توديني شويه وداك باب الحوش مشيت للمطبخ احاجيها
-ليلى اخوي اجه ترحين للغرفة لو تضلين هنا
دارت عليَّ مدري شتحمس بالجدر بعدها ماكاضيه التمن گتلها
-يله ضلي هو شويه ويروح
مشيت بساع فتحتله باب الحوش وطبوا شايل رضا على اجتافه يضحك وياه مارضى يطب للبيت وكفنه بالفي نزل رضا وهو راح يركض يتلمس الوردات ويبوسهن يصيح
رضا:: الله بابا شوف
ووهب يعاينله الضحكه شاكه حلكه
وهـــب:: اخذ وحده لامك بابا
ورضا شال اصبعه ماراضي يگله
-لا هيج شم
ودنك للورده يشم بيها مكيف ضحك وهـــب ودار علي تلاشت ضحكته هز راسه يسأل
-شني شبيج
عاينتله متردده واطكطك بأصابعي وهو يعاينلي عاكد حاجبه
-وهب فدوه كون من اسولفلك مو تصيح وتخبص الدنيا
-سولفي جا هو من تضلين تجرجرين تحرگين گـــلبي
يعاينلي متاني احجي وانه مدري منين ابدي
-عاين اكو محل شايفه هذا الي يم السده شوي عن مدارسنه
-اي
-اي عاين بــدور گبل لا تطب للمدرسة تروحله هي وصاحباتها وهذن صاحباتها ما اريدن اظلمهن بس ماارتاحلهن يضحكن بصوت عالي وشسمه خايفه على بــدور حاجيتها گبل حلفت ماتعيدها وعادتها حرت شسوي
بساع ضاج يعاينلي بشك ثواني حسيت روحـــي تندمت بيهن لان حجيت
وهـــب:: شعدها تروح
-ما ادري وي صاحباتها يشترن
-شتشتري شني عايزها شي يوم كالت اريدن للسوك وما اخذتها يوم رايده شغله وما جايبها شو كايمه تمسلت بــدور
حجه بعصبية ينتر جريت ايده اتوسل
-وهب فدوه لا تخليني اتندم لان سولفت انه مالكيت حل هل حجيتلك انتَ حاجيها بهدوء حتى تبطل تروح لان لو هالمره هم ضليت ساكته تضل ماتخاف من اكلها احجي للولد
دار وجهه من عدي بعصبية
-وهـــب فدوه
عاينلي بقهر هز راسه خوش
-هاي هي انا احاجيها لا يضل بالج
-مو تطكها
-لا
-مو تحجي لصيهد
-لا يابه شبيج
-عاين خاف هي تضوج ضاله وحدها هم جيبوها يمي لو تودونها يم رنـــه بدور تحس محد منّكم يحبها صايره حتى ويانه ماتحجي
هز ايده ضايج
وهـــب::هاي هي يابه انا احاجيها وانتِ لا تفكرين ولا تضلين ضايجة سهله
مد ايده على خدي ودار عينه الرضا
-يله بابا رضا تعال
ورضا كاض الورده ويعاينلي ماينطيه گلبه يشلعها باسها واجه يركض لوهب شاله وباسه طلعوا سديت الباب وراهم حسيت شوي گـــلبي ارتاح من سولفت لوهب حتى لو ماحجيت السالفة كلها بلكي من يحاجيها تعرف غلطها وماتعيدها
رديت للمطبخ يم ماريا ساده جدر التمن وصافنه بالفراغ
عدلت وكفتها من مريت گدامها وكفت يم السنگ واحجي وياها
-اليوم اخوانج ياكلون من إيدج
احجي وياها مبتسمه وهي هزت راسها لا وعاينت لوجهي مقهوره
ماريا:: بيكرهوني
-لا عاينــي لآن انصدموا اعذريهم وعلي بس يتعودون عليج النوب يضلون يتسودنون
تحسرت ساكته رادت ترد للغرفة ماخليتها ضلت يمي انه اسولف عليها وهي بس ساكته ما تناقش سوت زلاطه وانه اگلي سمچ بس كملت اندك باب الحوش من راح وهب قفلته درت عليها
-اجوا لو مــيثم لو بريا افتحيلهم باب الحوش
ضلت تعاينلي بقلق هزت راسها لا مشيت انه بساع فتحت باب الحوش طبوا اثنينهم بريا يحجي شلون قافله باب الحوش وميثم باسني براسي يسأل عن صحتي درت لبريا شايله ايدي
-لا تصيح عيني ماعاجبك روح لبيت عمي شامل
ضحك نمشي سوه للهول
بريا:: اروحن أفتك منكم
ابتسمتله وميثم يجاملنه ماله واهس بأي شي طب مــيثم يغسل وبريا بالهول يحجي وياي
-هم شفتيها
-منو ليلى
سألت متقصده راحت ابتسامته دار وجهه من عدي يتحمحم
بريا:: اريدن اهدومي من الغرفة جيبيهن الي
-اختك بالمطبخ جاي تسوي غده روح لغرفتك انتَ
مسح رگبته وطب للغرفة اجه مــيثم يعاين وراه لمن بريا سد الباب جرني الحضنه يبوس راسي وكصتي
مــيثم:: شلونج
شلت راسي اعاين لوجهه مبتسمه
-زينه تدري منو سوالك غده اليوم
عگد حاجبه يعاين لوجهي
-ليلى
جر ايده مبتعد
-مــيثم
عافني ومشه للغرفة مشيت للمطبخ والكه ماريا يم الحايط بصف الباب عاينتلي عيونها متروسه دموع دارت وجها مسحت عيونها وحجت مختنگه
ماريا:: خلصت انا رايحة عالأوضه
حجتها ومشت بساع لغرفة بريا توها تريد تفتح الباب وفتحه بريا صارت وجه بوجهه وياه شالت راسها تعاين لوجهه ودموعها تجري وخر بساع وهي طبت للغرفة وسدّت الباب ضل واكف كاض هدومه يعاين لباب الغرفة ظهره علي وانه وي روحـــي احجي "كون يطب يحاجيها بجاه الحسين"
دار وجهه عاين علي واكفه بباب المطبخ ومشه للحمام ساكت رديت للمطبخ اصب الغده وگلبي يمها شلون وياها البنيه راح تتسودن اتخيل روحـــي بمچانها جا ماضليت هنا اموتن
رتبت الصينية وميثم بس كضه صلاة اجه يمي للمطبخ شال الصينية للهول اخذت ماي ورحت وراه بريا بعده يصلي كعدت يم مــيثم يعاينلي وانه مسويه روحـــي ما فاهمه اريدن هم يهتمون ويشفونها اكلت شربت بريا كضه صلاة لف السجادة وكعد يم الصينية كباله تصير الغرفة يعاينلها ويرد يعاينلي وميثم هم لمن تحمحم گال
مــيثم:: ما وديتي للبنيه غده
شلت راسي اعاين لوجهه محتار ابتسمت
-روح صيحلها تجي تتغده ويانه مو بس تقهرون بيها ترى عيونها راح تعمي من البجي ماتمر ساعة اذا ما بجت بيها
درت على بريا من هز ايده ضايج
بريا:: شمسويلها عليمن تبجي چن احنا الچنه عايشين بين امنه وابونه وهي العاشت يتيمه
عاينله مــيثم خازره وبريا ضايج ذب الخاشوكه من ايده يريد يگوم
مــيثم:: اكعد
عاين لميثم ساكت وضل كاعد بمچانه كام مــيثم راح يحاجي ماريا وانه وبريا نعاين وراه دك الباب وفتحه بساع جانت كاعده بالگاع ووكفت تمسح بوجها صفن بوجها ساكت وهي دارت تدور الشال خلته على اجتافها تحمحم مــيثم فاتح الباب وضال كاض اليده
مــيثم:: تعاي تغدي
لمت الشال على صدرها تحاجي بصوت يرجف مرتبكه
ماريا:: يسلموا ما بدي
ضل يعاينلها محتار
مــيثم:: تعاي سمسم ما ترضى تاكل الا تجين
شالت راسها تعاينلي وانه رافعه روحـــي حتى اشوفنها ابتسمتلها اجت متردده وبريا يعاينلها ضايج اجت وميثم وراها سويتلها مچان بيني وبين بريا اطيتها خاشوكه مكيفه بيها دنكوا ياكلون ساكتين وهي تخلي تمن شويه بالخاشوكه وتاكلهن كوه على روحها اثنينهم يعاينولها من جوه ليجوه مــيثم فلس سمچ من العظام خلاه على التمن گدامها وعاينلي يحاجيني
مــيثم:: ليش ما تاكلن
-انه اكل بس ليلى ماجاي تاكل
درت لليلى احاجيها
-خاف ما تحبين السمج
توها تحاجيني وشرگت تكح غاصه بالتمن دكيت على ظهرها وبريا بساع صبلها ماي بكلاص ومد ايده وي ايدي بخوف يطك على ظهرها وهيه انتهت تريد تجر نفس ماكو مــيثم كام من مجانه متخرذل بس نريدها تجر نفس ماكو الشحطه خنگتها كوه فكت شربت ماي روحها رايحه درت عيني الهم اثنينهم عايفين مچانتهم وخايفين عليها
كاموا يغسلون وانه وياها ضلينه بكعدتنا -بعدج مختنگه
هزت راسها لا عيونها مدمعه من الكحه صحت لبريا شال الصينية للمطبخ وماريا مدتلي ايدها تگومني بس تريد تغسل وتشرد للغرفة وانه چلبتلها
-ليلى تعاي صبي چاي خل اغسل المواعين انه
اجت وراي للمطبخ البنيه ما مرتاحه حتى وياي احسها متقيدة تقهر ضلت يمي لمن كضيت غسل مواعين يله شالت صينية الچاي ومشينه سوه للهول بريا وميثم يسولفون على التحاق بريا وره العاشر يلتحق مد ايده مــيثم اخذ الصينية من ماريا حطها گدامه هو يصبلنه چاي ومستمر يسولف وي بريا كعدت وكضيتها من أيدها كعدت بصفي مدنكه وبريا يعاينلها بطرف عينه اخذت چاي من مــيثم وحطيت كوب گدامها
كضت الكوب مدنكه ماتحط عينها بعين واحد منهم لمن بريا گال
بريا:: ليش اجيتي
شالت راسها تعاين لوجهه تبلعم وميثم خازر بريا يريده يسكت وهو مايشيل عينه منها تلفتت بينه وبين مــيثم مرتبكه ومن مــيثم ماحجه ردت عاينت لبريا
ماريا:: مجبوره متل ما انتو مجبورين فيي
ضحك بريا مستهزئ
بريا:: اي بله شني الجبرج
دارت وجها تداري دموعها لا تنزل وهو ولا تنازل رد گالها
-سولفي بت روزا احجي المن اجيتي هنا شني غايتجن انتِ وهي
عاينتله عيونها متروسه دموع مدت أيدها لامه اصابعها تأشر وتحجي بغصه
ماريا:: لك والله مافي غايه هي تركتني متل ما فلتّ عنكن
صفگلها بريا وميثم جر رجله يعاينلهم ساكت وانه أشرله واكرص بيه بس اريده يسكت بريا وبريا يحاجيها باستهزاء
-ترديني اصدگج عفتي عيشتج بالخارج واختاريتي القرية لسواد عيونه عادي اذا هي ما تريدج چنتِ تگدرين تعوفينها وترحين وين ما تردين شمعنى رضيتي تجين ليجاي
اختنگت وكفت ترجف تريد تروح للغرفة وكف بوجها بريا يصيح
بريا:: ليش اجيتي
وهي ترجف وبس تريد تعبّر للغرفة تشهك جراها من أيدها كضها حيل دفعته متسودنه وصرخت بوجهه
-اتركني
هداها بريا رجعت ليوره وكف مــيثم وهي عيونها فاتحهن على وسعهن خازره بريا والدموع تمطر على خدها شايله ايدها بغضب تصيح
ماريا:: شو مفكّرني انتَ فاكرني عشت متلي متل اي بنت فاكرني تربيت وكبرت بين الفحش والثراء ودلع الأبوين يلي مافي احن منن
طكت رجليها تصرخ بكل صوتها متسودنه وتحجي بحرگه تتراجف
-مفكّر حالك إنت الوحيد يلي عانى اليُتم والخذلان ولك ما أنا متلي متلكُن عشت طفولتي بيد المربّيات أتعنّف وماحدا داري عني ولمّا كبرت شوي تركوني لحالي وفلوا عروسيا من شان ينبسطوا ما حدا منن فكّر فيي ما حدا خاف علي يتركوني لشهور أتخبط لحالي وأيمتى ماخطر عبالهم بيجوا لعندي
انتَ شوو بدك شو فاكِر حالك الوحيد المظلوم هون الوحيد يلي تيتم من أول ما نولد
الوحيد يلي بيحقله يصَرخ ويكسّر ما حدا منكن عاش يلي أنا عشتُه عالقلة إنتو ربيتوا بين أهلكن أنا كنت وحيدة سامعني كنت وحيدة
دفعته من ايده وطبت للغرفه وهو يلوب بحرگه ميت من القهر مــيثم شال ايده بوجهه يحذره
مــيثم:: اخر مره تحجي وياها هيج
بريا دار وجهه وطلع من البيت وميثم كعد ع القنفه ايده على راسه وانه حايره بينهم وبينها الاثنين حقهم لا هي متقبلتهم ولا هم متقبلينها كام مــيثم مقهور طب للغرفة
شويه وخابرتني رغد تريد تجرجرني بالحجي
-اكلج شني شبيها بــدور
-شبيها
-جا اندري غير انه اسأل شبيها مساع وهب صعد لغرفتها حاجاها وهاي صارلها بالساعتين بس تبجي
حلفتها ماتحجي يم امي وحجيتلها السالفة كلّها انقهرت محتاره
رغد:: خاف النوب سليم يتعارك وي صــيهد ويعيره ببدور
-لا ما اظن يسويها
رغد:: خيه يا ما يسويها لو احترك گلبه من سالفة مايشوف گدامه
-رغد انتِ هم اكعدي وي بــدور سولفي شاقيها لا تخلنها دوم وحدها
-خيه وعلي ماعايفتها حتى شغل بالبيت ما اخليها تشتغل على ابو ثالث ودراستها صعبة وبالليل اصيحلها تنزل تنام يمنه انه وامي
-الله كريم اكلج عليمن متعاركات وي سعاد اليوم
-ختوولي هالچلبه والله كتلتها كتله ارتاح گـــلبي ولج شلون رضا يكول لوهب بابا متسودنه وكلساع توز بجدي وجده عليهم تكلهم هالنغل يصيح لوهب بويه شنهي منين اجاه ابوه بس طلعوا جدي وابوي كتلتها
-والله چلبه
ضليت احجي وياها شويه اسأل على كل الأخبار سديت التلفون من سمعت بريا طب للدوانيه تعال الله جابك گمتله توه يتمدد يگلب بتلفونه وكفتله بالباب
-اجي لو تريد تنام
كعد على حيله. -تعاي خويه
كعدت گدامه بعده ضايج
-بريا كلي البنيه شني ذنبها انتم زلم وفراگ اهلكم أثر بيكم شلون وهي بنيه اقلها انت جان عدك مــيثم خلاك بعيونه وانتَ وميثم جان عدكم ناس حنينه تدير بالها عليكم عمتي رباب وعمي شامل ما عافوكم ولا امي عافتكم وكل ولد عمكم وكفوا بصفكم بس هي ضلت عايشه وحيده محد الها وهسه من اجت يمكم اجت تدور اهلها حتى تخلص من الغربة انتم ما تريدونها
احجي محترك گـــلبي عليها وهو مدنك ساكت
-والله البنيه مظلومة
هز راسه خوش وابد ما حجه لمن عفته وگمت رحت لماريا رغم تعبانه ونعسانه بس خايفه اعوفنها كعدت يمها اشاقيها واهون عليها
-اعلمج تحجين عراقي مثلنه
- بعرف شوي
-هههههه شتعرفين بله
صفنت عيونها من البجي منفخة گالت
-شلونج شلون صحتك بيي هيك كان يحاكيني
-باعي خيه للزلمه تگولين شني شلونك شخبارك للبنيه شلونج شخبارج
احجي وهي مبتسمه وجلبتلها من الولد طلعوا اخذتها كعدنا بالحديقة افتر عليها الا تحجي عراقي ملت من عدي تحجي كلمة عراقي وتلزگها بثانية لبناني
"""
رنـــه :: كاضه أوراق الامتحان وكاعده بالهول متانيه طــروادة حتى اتباها عليه لان يگلي خربتي صرتي كسولي ومابيج خير جبتله ميه ميه كامله محد من شعبتي جايبها وبأصعب شي بالرياضيات شيريد بعد عفراء گالت
-اصبلكم تتغدون
وريمه من يمها عاينت للساعة وگالت
ريـــمه:: راح يوصل ماضل شي
راحن اثنينهن للمطبخ وانه ضليت مكابله باب الهول منا لمن اجه طــروادة اول ما طب شلتله اوراق الامتحان ورافعه حاجبي جان ضايج وتعبان اخذهن من ايدي عاين بيهن وضحك مكيف وانه متخوصرتله
-ها ياهي المابيها خير
-ههههه عفيه
ردلي الاوراق وفتح محفظته انطاني 5 اخذتها منه وعفراء واكفلته بباب المطبخ تضحك بس صله وتغدينا لكيت عفراء بالمطبخ تگل لريمه
-بس تقرأ عليج خوش علويه والله
وريمه مدنكه تغسل مواعين وتگلها
-مابيه شي انه
-مو هل تنسين
ضلت مدنكه تغسل ساكته وعفراء محتاره بيها اخذت الچاي من يمهن ورحت للهول اجت وراي عــفراء هز راسه يسأل وهي هزت راسها لا تحسر ساكت صبيتله چاي اراقب بيهم لمن ريمه كضت مواعين واجت يمنه للهول كعدت بصف عفراء هادئه وطرواده يعاينلها بحيره ضايج وعفراء بس كضت چاي گالت الطرواده
-يله خل نمشي گومي ريـــمه
عاينتلها ريمه وهي ما اطتها مجال جرتها من أيدها للغرفة وطرواده خابر صــيهد وراح جاب سيارته گمت وراهن للغرفة ريمه ابد ما راضيه بس عفراء جبرتها اخذوها وراحوا
تمددت بس اريدن اناملي شويه وشمس كل ما اغمض عيني تطگني
-حاله. -ها حاله
-دمدمدم
ماده اديها اثنينهن وترطن جريت اديها ابوسهن واعضهن شلون ادين يحنصن ماخلتني انام تلغي منا لمن كعدت العب وياها شويه واجه عبود
عبود:: شني اهلنه وين
-راحوا للسحاره
فتح عينه كلها واتلفت
-شمالج
-خاب والله شبيك علويه مدري شني تقرأ على ريمه
غماني ما راضي شال شمس يبوسها ويلعب وياها ضلينه بالحوش لمن اجوا طبك السيارة بباب الحوش كلش نزلت عفراء كاضه ريـــمه ساندتها وريمه روحها رايحه كوه تمشي وكفت بخوف
-شبيها
وعفراء ما مهتمه بس تريد توصل ريـــمه للغرفة مشيت وراها نومتها بفراشها غطيتها تطكطك بأصابعها عاينت الريمه بخوف وجها أصفر ومخلوبه روحها طلعت عفراء لغرفتنا وانه افتر وراها ذبت عبايتها
-شني شبيها
-شبعانه سحوره مدري شلون ضاله بعقلها لهسه
تحجي بحرگه عيونها حمر جرت دشداشتها من صدرها ونشغت من كل گلبها مختنگه
-الهي يكون حوبتها وحرگت گلبي ما تتعداهم
مسحت عيونها وطلعت للهول افتر وراها ساكته خفت طــروادة بس طب للبيت عاين لحسين گاله
-كضيت دراسة
حسين:: اي بالحسين
-تعال وياي للگاع
وحسين ركض مكيف وكفت يم عفراء بالمطبخ تفور اعشاب ومشت لريمه كعدتها شربتها ورجعت نامت عبالك مو بوعيها طلعنه من يمها عفراء جنها طــروادة من يضوج تضل تفتر عاينتلي گالت
-مساع گلتي شفتي فرح راحت لاهلها
هزيت راسي اي
-شفت ســليم وداها
راحت للغرفة لبست عبايتها
-وين رايحه
-هسّه اجيج راح اودي هاجر يمجن لا تخلينها تشوف ريـــمه كليلها نايمه
-يمه رايحه لميلاد
تعدل بردن العباية ودارت علي خازرتني عيونها حمر
عــفراء:: وشني ميلاد ما تهز شعره من راسي
سكتت خايفه عليها طلعت من بيتنا لبيت عمي شاكر وانه گـــلبي يلوب ضليت واكفه بباب الحوش واعاين وراها دفعت باب الحوش وطبت روحـــي راحت خايفه لا ميلاد تطكها النوب محد بالبيت والمح هاجر طلعت من حوشهم جايه علينه وعفراء تعاين وراها لمن هاجر طبت لبيتنا يله عفراء ردت طبت لبيت عمي شاكر
سلمت على هاجر وزهره اجتها تركض شبگتها تبوس بيها كتلها
-هاجر ريمه نايمه روحي شوفي طيوري بين ما تكعد
سكتت وهم تعاين لباب الحوش خايفه مثلي جرتها زهره من ايدها اخذتها للحديقة وانه ضليت مكابله باب الحوش واعاين لبيت عمي شاكر الوب وميته من آلخوف ومدري شمالني حيل خفت على عفراء
طبيت للغرفة اركض جريت عبايتي لبستها وطلعت امشي بساع لبيت شاكر وريت عمري كله مارحت ريت انكسرت رجلي وما رحت
دفعت باب الحوش وطبيت ما الهن صوت گـــلبي انخمش يمه وين اختي طبيت للمطبخ ارجف واسمع صوتهن جاي من غرفة ميلاد وهي تصيح وتغلط بصوت عالي تنعل وتصيح على عفراء
ميلاد:: اذبحها اگطعها مالج غرض ببتي
مشيت بخوف يم باب الغرفة مردود وما مطبوك كلش والمح ميلاد بالگاع وعفراء فوگها خانگتها حيل
عــفراء:: والله اموتج تردين تسودنينها
دفعت عفراء ووكفن اثنينهن يتمالخن وانه اعاين بطرف عيني واحجي وي روحـــي بخوف اذا ميلاد ماگدرت لعفراء ما اتدخل بس اذا تطكها اطبن اساعد عفراء ونكتلها ميلاد تهدد وتصيح
-باجر اخليهم يطلكونها واردها يمي
دفعتها عفراء حيل وشالت ايدها بغضب
عــفراء::والله تحلمين تحلمين ريمه تردلج ولو ما كفيتي عنها وروح اهلي لاخلي موتج على أيدها
وميلاد تضحك بشر وتخوصرت ما مهتمه
-عفيره خايبه انه ميلاد جايه تهدديني خايبة اسودنج
-وانه بت رباب ومو بت ابوي لو ما حطيتلج حد يشهد الله علي لو ما كفيتي من ريـمه اطيبها من سمج واحجيلها كل سوالفكم اخليها تكحل عيونها بدمكم وانتِ تعرفين قصدي
گـــلبي يدك بساع وخوف ما فاهمه شي وما مهتمه الشي بس اريدن اخذ عفراء واردن لبيتنا ميلاد نزّلت ايدها خازره عفراء ونترت بوجها
-شتحجين
عــفراء:: سوالفكم هواي ما ينعدن بس لريمه مستعده تذبحكم علمودها امي والسويتوه بيها
مسحت عيوني رجليَّ رجفن حانيه ظهري واعاين بتك عين گـــلبي انعصر وي حچاية عفراء وهي رجفت ودموعها جرت شالت اصبعها بوجه ميلاد تهدد من بين شهكاتها
عــفراء:: احچيلها شلون خليتوها تشرب امي سحورتكم
فتحت عيني على وسعها وشهگت مصدومة اريد اجر نفس مااگدر التفتن على الباب اثنينهن واجت عفراء تركض جريت ايدي منها وين اروحن وين اطي وجهي نار حركتني طلعت من الحوش اشهك رجليَّ يرجفن ما ادري وين اروحن ركضت لبيتنا ما اشوف دربي عيوني احسهن عمن ريـمه هي الموتت اهلي
طبيت للبيت ارجف
-ريـــمه
واحس بأيد عفراء جرتني حيل ساده حلكي ملختها روحـــي مفرفحه وهي ماتهدني سحلتني الغرفة اهلي ساده حلكي حيل
-اششش اموتج سدي حلگج
صرخت ابجي حسيت نار تحرك بگلبي وهي كاتمه صوتي حيل جرتني لصدرها شابگتني
-ولج يمه
-رنـــه فدوه اروحلج صوتج ريـــمه لو درت تموت رنـــه فـــدوه
شلون سكتت شلون گدرت تعاين لريمه وهي تدري شلون رضت طروادة يتزوج كتالت اهلي دفعتها بس اريدن افلت روحـــي منها اريد املخ ريـــمه وهي ما تهدني
عــفراء:: احجيلج السالفة كلها اسمعيني رنـــه
-شسمع كل الصار بينه بسبب ريـــمه موت اهلي بسببها
ابجي واصرخ وهي سدت حلكي حيل وتعاين للباب بخوف
عــفراء:: معليها لا تخلّيني اطكج
جرتني لصدرها حيل وساده حلكي بجيت اشهك نار بگلبي
عــفراء:: حاسه بيج رنه انه سويت مثلج واكثر من دريت بس لا امي ولا ابوي رضوا لان هي چانت صغيرة كلشي ماتعرف تنفذ الي امها تريده ماجانت تدري شني غاية ميلاد ريمه من هي طفله مسحوره امي تگول جانت لو اجت يمنه نوبات صاحيه ونوبات جنها مو بعقلها وماجانوا يدرون بيها مسحوره ماعقلوها ام تسحر بتها ريمه عزيزه عدهم ولو يمر يوم وهي ماجايتهم يكضون باب الحوش بلكن من تمر للمدرسة يشوفونها وميلاد وشاكر يحرمونها تجي متقصدين على ابو ها شوي كبرت النوب فجأة خلوها ترد تجي وهي كل ما تجي تجيب عصير لامي وامي تكيف تشرب عدها عيد ريمه عزيزتها مسويتلها عصير وجايبته منا لمن امي تمرضت واخذها ابوي للساده گالوله مسحوره ابوي بساع فطن وحاجيلهم على ريمه ودروا ريمه مو بس مسحوره ريمه تطيع ميلاد لدرجة اذا كالتلها احركي روحج تحرگها
ابوي ضل يفتر بأمي على الساده وبكل مره يجيب علاجات وياه لريمه كل ما تجي يمهم يشربونها لمن شوي شوي ريمه استوعبت وهي السولفت لامي كالتلها امي ودتني اخذت من غراضج هدوم داخليه ومشط بيه شعرج والعصير الاجيبنه الج تحط بيه شي وتدرين من سولفت لامي تبجي وامي شابگتها تبجي وياها جيه خلو اكثر بت تحبها هي التسحرها وراها ما ندري شصار ريمه من راحت لاهلها شسوت وحرموها بعد تجينخ امي السحر اثر على صحتها والقهر اخذ من حيلها وفراگ ريـــمه حيل قهرها جانت تگل للولد يجيبونها الها تگب عركه الها اول مالها تالي شاكر وميلاد يحيرون شيسون بيهم من يجيبون ريمه النه لمن امي بطلت كامت ما تگول اريدن ريمه تضل مگابله باب الحوش وتعاين للدرب وحتى من تعالجت من السحر هي ضلت توهوس وصحتها ما ردتلها تعايشت وي مرضها سنين لمن المرض أكل جسمها رنـــه امي ماتت مريضة مو مسحوره
وخرت من صدرها ابجي بحرگه
-منين تمرضت مو من السحر
-عالجها ابوي من السحر وألله رنـــه تخيلي روحج بمچان ريمه لو انتِ امرج مو بأيدج مسحوره وتجين تشربيني سحر واتمرض بسببج لو دريتي شيصير بيج
تحجي وانه أذني تصفر كوه اتنفس وحلكي ناشف وخرتني من حضنها بخوف
-رنـــه
هدتني وكامت تركض تجيب جهاز السكر اعاين وراها عيوني مغوشات من فتحت باب الغرفة هاجر جانت واكفه بالباب غمضت عيني ايدي على گلبي ودموعي تجري
قاستلي السكر خايفة وبس شربت الحبايه ضليت متمدده هي تحجي وانه احس بروحي ما اريد اسمع شي تمنيت روحي مادريت ولا رحت وسمعت شي بيه يتمنى يذبح ريمه يتمنى يعاتبها ويطردها وارد اتذكر حالها ومواقفها وبچيها على آمي بفاتحتها بجيت لحد ما تعبـــت غفيت بدموعي
كعدتني عفراء ويَ الصلاة تعاينلي بخوف دنكت تبوس راسي
-رنـه عليج بروح امي لاتحجين خل ريمه تصير زينه وانه احجيلها كلشي
اعاينلها ساكته احس عيوني مورمات جرتني من ايدي كومتني هاجر رايحه لبيتهم وريمه بعدها نايمه غسلت وكعدت بالحوش على گن الدجاج اسمع الاذان ودموعي على خدي مختنگه گـــلبي يوجعني مسحت عيوني من انفتح باب الحوش وطبوا حسين وطرواده
طرواده بس غسل اديه شغل ضوه الحوش واجه يمي يعاين لعيوني عاگد حاجبه وانه مدنكه اخافن لا ينشدني عليمن باچيه
مد ايده جوه حنجي يرفع راسي وحجه بخوف
-شبيج رنـه ياهو وياج
وخرت ايده مدنكه اهز راسي ماكو شي ودموعي تجري
-ولج ياهو وياج
-ماكو شي مختنگه
مسحت دموعي بظهر ايدي مدنكه كعد يمي وجرني لصدره ضميت وجهي اله ابجي بصوت وهو يبوس براسي وحسين مكابلنه
طروادة:: فدوه اروحن لعيونج بسج هسه غير اعَرف عليمن هالبچي ياهو مضيك خلگج
-محد
حسين::خاف عفراء محاجيتها
وخرني طروادة من صدره يمسح بعيوني ضايج واجت عفراء عاينت وبهتت من شافتني عبالها حجيت لطرواده نزل من گن الدجاج گالها
طــروادة:: ياهو وياها شني محاجيتها على شغل البيت
وعفراء تعاينلي بخوف ساكته وهو لان مره رزلتني گدامه على شغل البيت وبجيت عباله هسه هم هي محاجيتني گالها
طــروادة:: انعل ابو البيت لا تحاجنها لحدّ يحاجيها
عــفراء:: يابه والله ما محاجيتها رنـــه
مسحت عيوني كوه احجي الغصه خانگتني
رنـــه:: محد محاجيني انه مختنگه وحدي
سكت محتار طبينه جوه سأل على ريـــمه گالتله
-بعدها نايمه. -ما كعدتيها
-كعدتها تعاين بوجهي وترد تنام
مسح وجهه متحسر وعفراء جرتني من ايدي وياها للمطبخ تتلفت وتحجي بخوف
-رنـــه مو تحجين عليج بروح اهلي
ضليت ساكته اعاينلها وهي حيره تجيبها وحيّره توديها
عاينت لطرواده يصلّي بالهول تطكطك بأصابعها زفرت نفس بحسره
-ما احچي بس طلعي ريمه من بيتنا طلعيها مثل ما جبتيها
صفنت بوجهي هزت راسها لا
عــفراء:: اذا ردت لاهلها تموت
-خل تموت. -رنـــه
شهكت فاتحه عينها حيل مصدومة عفتها ومشيت للغرفة واسمع من طروادة صاح عليها وراحت وياه لريمه
ربع ساعة عدت وسمعت ريمه تصرخ هاي الگلت عليها خل تموت ما تهمني من سمعت صوت صريخها ركضت ما اندل الباب منين ألخوف آكلني واشوفنها بأيد طــروادة تصرخ وهو شابگها حيل وعفراء تغسل بوجها وتقرأ عليها اعاينلها ابجي حالها مرد گـــلبي مجلبه بطرواده كل حيلها وتبجي بصريخ وحرگه لمن طاحت بأيده تسودن يريد ياخذها للمستشفى وعفراء ما ترضى نمرد گلبه وعفراء ترش عليها ماي بارد وتطك بوجها فتحت عيونها ذبلانه كوه فاتحهن مدت أيدها ترجف لايد عفراء وتهمس بصوت مبحوح
ريـــمه:: يمه
جرتها عفراء لحضنها شبگتها تبجي وريمه عاگده حاجبها تستوعب وتعاين بخوف تريد بس توخر من حضن عفراء وتتلفت غمضت عيونها كاضه بأيد عفراء زفرت نفس طويل
ريـــمه:: مابيه شي
وخرتها عفراء من حضنها تمسح بوجها
عــفراء:: تعاي غسلي حتى تصلين
كومتها وخرت من الباب طلعت هي وياها وطرواده ضل كاعد اديه على راسه مسحت وجهي احاجيه مختنگه -لا تنقهر
شال راسه يعاينلي متحسر
-هسه تصير زينه لا تضوج
وكف حط ايده على جتفي يردد
-الله كريم
طلعنه من الغرفة سوه شما يحترك گـــلبي من ريـــمه لمن اشوفن وضعها انسى افعالها واحيرن بحالها
غسلت وتوضت وعفراء طبت وياها للغرفة وما عافتها بس كضت صلاة كالتلها اريدن انام وحتى عشا ما تعشت
كوه فتحت الكتب ودرستلي شويه ما اگدر اركز ما صدكت صار الليل بس حتى أرد انام
"""
ريـــمه ::احس من وسط نومي فجأة فتحت عيني صاحيه ارمش بثگل ايدي على معدتي جنت احس مثل الحجار بيها ويوم عن يوم احسه يخف جريت الغطا علي زين التف بيه وبدون ما افكر بأي شي احس گـــلبي يدك بخوف معصور غمضت عيني اذكر حجي العلويه من تتهامس وي عفراء وتكلها سحرها قديم وكل مره يتجدد وينعگد وعفراء تكلها امها التسحرها مو
لفيت الغطا على روحي حيل أمّي تسحرني احس روحـــي بحرب كلشي بيه رافض يصدك حجيهم واحس هيج بصيص صغير يقنعني بكلامهم وبشر اهلي گمت من فراشي مختنگه طلعت من الغرفة كلّها نايمه فتحت باب الحوش وجريت نفس اترس ريتي
طلعت للحوش هاسكي مربوط وبس شافني وكف على حيله يزير عبرت من يمه بصف الحايط لمن وصّلت للحديقة كعدت بالمچان الاحبه جوه الشجرات نسمات هوه بارده جبرتني امسح بجف ايدي على زندي واحضن روحـــي متحسره اتذكر حجي ابوي وهو يحاول يقنعني يحب عمي شامل ويقنعني امي الماخذه گراب الخنجر مو هو كله جذبه كل حجيهم جذب بجذب
مسحت دموعي احجي وي روحي ابوي عزيز روحي بس بعمره ما جان اعز من عمي شامل غمضت عيني اذكر كل سوالف ابوي وامي ضد طرواده وكلهن انه الچنت اسويهن انه الخلوني احرك گيعانه وانه الرادوني ارد اضيع تعبه مره الثانية ورادوا يحرگون گلبه على هاسكي
حطيت ايدي على راسي اذكر افعالهم وآحد واحد وحقدهم وكرهم لبيت عمي شامل كلهم وشكد ابوي حرض اخواني ينهون على عفراء من خطبها منذر حتى حسين وزهره يكرهونهم
ماراح يبرد گلبهم ولا يكتفون الا ينهون عايلة عمي شامل كلها هزيت راسي لا ابجي واحلف بصوت
-هالمره ما اكسر گلبكم عمي عمه والله وانه الاوكف بوجه اهلي وما اخليهم يجيسون واحد من اولادكم
ضليت كاعده بالحوش لمن بدأ خيط الصبح يتعلى على الظلام ويفرض نفسه وكأن كل ذرة ضوه تخترق ظلام روحي وتراويني انه وين رايحه ويا درب رجليَّ سالكه ليش عايفه النور وتابعه الظلام جريت نفس بقوة رفعت راسي للسما وغمضت عيني النسمات البارده تحاوطني وصوت الطيور من اول ما صحت ترست مسامعي
التفتت على فتحة باب الحوش طبّ للحوش كوه يمشي من النعاس ما منتبهلي وهاسكي نبح عليه شال راسه شافني هاسكي ينبح يريده يجيه غسل اديه بالحوض واجه وكف يم هاسكي منطيني ظهره وهاسكي كعد ماد رجليه ويدنك براسه يريد طــروادة يلعب وياه ماجاسه عافه واجه يمي كعد گبالي يعاين لعيوني ساكت وانه صافنه بعيونه
-شلون صرتي
سكتت أعاين لعيونه بياضهن مشخط بشرايين حمر من آلتعب مد أيده مسحها بقميصه نشفها ومدها يحضن خدي غمضت عيني وملت براسي على أيده بارده لأول مره احسها بارده وخدي الحار
-ريـــمه
فتحت عيني بعينه يحرك ابهامه على خدي
-شبيج
-مابيه شي
زفرت نفس متحسره وخرت ايده من خده نزلها وبعده يعاينلي
-ليش كاعده
-ما ادري فزيت
هز راسه خوش درت وجهي من عده اعاين للحديقة گـــلبي يدك حيل رديت اعاينله صافن عليَّ ورمش بثگل يعاين لعيوني
-اريد أكلك شي
شال ايده مسح وجهه متحمحم رفع شعره بين اصابعه وهز راسه اي. -گولي
بلعت ريك بحيره صوتي مختنگ
-انه خايفه
الغصه ذب حتني گوه احجي عگد حاجبه مستغرب ومد اديه يكض ايدي اثنينهن جراهن لامهن بين أديه
-منين خايفه
دنگت راسي عيوني مغوشات من الدموع
-ما مرتاحه احس بروحي راح اسوي شي يأذيك بس مو بأيدي خايفه على كل الموجودين من عدي جرني من ايدي لصدره
-بس لا تعانديني ولا ترحين لاهلج وكلشي ما يصير ريـــمه عيوني
وخرني من صدره كاض وجهيّ بأثنين اديه
-شو عاينيلي ريمي
شال راسي يمسح بدموعي بأبهامه
-مانعوفج تردلج عافيتج وصحتج وكتها تميزين وين الغلط ووين الصح اردج ريمه الصغيرة الاحبنها الي ياما وياما نامت على صدري وبين ايدي العاقله الي يحبونها امي وابوي وهي تموت عليهم
وذاك الوكت متأكد انتِ ماراح تغلطين
هزيت راسي لا ابجي
-ريمه التحجي عنها انا ما اذكر شي منها
-جنتِ صغيرة المهم انا اذكر كلشي واذكرج
مسحت عيوني ساكته وهو يعاينلي مبتسم كرص خدي بين اصابعه
-لا تبجين امشي وراي ومالج غرض انتِ بس لا تعانديني وتسوين شي بدون علمي وهي تصفه
هزيت راسي اي أعاين بوجهه جرني من ايدي وكفني يمشي للبيت طب للغرفة ويجر بأيدي للچرباية تمددت غطاني وطلع غمضت عيني أفكآري متناقضه وفجأة اتذكر موقف وي عمه لو وي عمي مواقف عاديه ماكو شي مهم اذكره
عاينت للباب من رجع طب طروادة متوضي مد السجادة يصلي اعاينله افكر بالمره الي سمعته گال لعفراء ضميت صور ريمه عدي كعدت على حيلي لمن كضه الصلاة لف السجادة
-كهلان
وكف السجاده بأيده
-ها عيوني
خلاها بمچانها نزلت من الچربايه الم بشعري وكفت گدامه شلت راسي اعاين لوجهه
-تتذكر من مره كلت لعفراء انه ضام صور ريمه عدي
-اچذب عليها
حجاها مبتسم
-لا ما تجذب أريد اشوفهن
ابتسم ومد ايده يكرص خشمي
طــروادة::عيب
صفنت بوجهه مرتبكه وهو يضحك
-بس اشوفهن
-مصاليخ زحمه
فتحت عيني حيل ضحك ومد ايده على رگبتي جرني لصدره يشبگني حطيت ايدي على بطنه شبيه كلساع وجارني لحضنه دفعته اريد اوخر
-شبيك كهلان
هدني مبتعد ومبتسم
-شتردين
-لا تشبگني شبيك
-جا شسوي
درت من عده امسح برگتبي گـــلبي يدك حيل رجعت عاينتله
-راويني الصور
رفع حاجبه
-بشرط
سكتت اعاين لوجهه متانيه يحجي
- الصورة التشوفينها تقلدينها يعني اذا جنتِ بالصوره ضاحكه تضحكين اذا جنتِ بالصور تبجين هم هسّه تبجين واخليج تشوفينهن وحده وحده وياهي التشوفينها تقلدينها
-شنّي السآلفة
-بكيفج وخري خلّ انامن ها وبيهن صور لو شوفتيهن يجوز تذكريهن
سكتت وهو راح تمدد بالفراش كام كلش مايحترمني گبل من يلكاني بالغرفة يعوفني ويروح ينام بغرفة اهله هسه صاير مدري شماله
تمدد ومد ايده فرشها على مخدتي يعاينلي
-تعاي الفج بحضني
-شبيك
احجي مرتبكه وهو مبتسم
-شبيه غيّر اريدج
-والله ما تكضني شنّي السآلفة
جر الغطا فوگ راسه ينام فتحت كنتوره اعاين بيه ادور الصور طلع راسه من الغطا
-ما تلگينهن
درت عليه ضايجة
-اقلدهن
ضحك ونزل من الچربايه بساع وخرت من يم الكنتور فتحه وطلعهن من جوه هدومه مديت راسي اعاين وياه وخر ضامهن
-لا تغشين
-بس خل اشوفهن
-وحده وحده تشوفينهن وياهي التشوفينها تقلدينها
-اي يله خل اشوفهن
مديت ايدي الايده اريد اجر الصور شال ايده ليفوك ويعاينلي يضحك
-اكعدي
خزرته مقهوره انه وين وهو وين كعدت بالگاع راح للچربايه جاب مخده واجه كعد كدامي يعاين بالصور مبتسم وأنه الوب مايخليني اشوفهن گلب بيهن وعزل وحده من نصهن
-نبدي بهاي تسوين الاگوله يله تشوفينها
-ترى ذليتني هن صور
نترت شايله ايدي بوجه طكني على ايدي
-لا تنترين لا اكص اديج بت ميلاد
يحجي بس مو بحرگه كوه كاض ضحكته وانه المحترك گـــلبي وخازرته
ضحكت اهز بأيدي
-گتلي تعاي عدنا وبعد ما اگلج بت ميلاد
-صح حقج هاي وحده علي يله بعد اكلج بت رباب شبيج تنترين بت رباب
يحجي وضحكته تارسه وجهه برد گلبي من گال بت رباب ابتسمت مسحت وجهي
-خل اشوفهن شلعت گـــلبي والله
ضحك وجرني من زندي عليه حيل شهگت مصدومه وجهي جا نردم بوجهه استندت بأيدي على رجليَّه اعاين لوجهه وهو مبتسم بمكر قرب وجهه لوجهي اكثر نفسه بوجهي ويحجي همس
-بوسيني
فتحت عيني حيل وجريت ايدي منه اريد اوخر ما يهدني يجرني عليه اكثر
-اذا وخرتي تحلمين تشوفينهن بعد
وانه بس اريد افك اصابعه من زندي جرني عليه اقوه
-ريمه
حسيت شاربه طخ بشفتي شلت عيني خازرته ويحرگ گـــلبي بابتسامته
-اذا تردين انا الابوسج صايره جبانه فد نوب
-مو جبانه أكره تستغلني
-ههههه استغليني انتِ هم
عاينت بعيونه وجريت ايدي من عده
-وخر انه ابوسن لا تجرني
هد آيدي يعاينلي مبتسم جريت ردن دشداشتي مسحت شفايفي
-لا تمسحين
-مالك غرض
-بوسي يله
بلعت ريك گـــلبي احس يدك ببطني تدنيت يمه رفعت روحي على ركبي قربت وجهي لوجهه وكل ما اتدنه لخده يتحرك ويخلي شفايفه گبال شفايفي مديت ايدي لوجهه كضيته من لحيته ضحك ثبتت وجهه وتدنيت لخده ارجف توني احط شفايفي على خده ومد ايده فوگ خصري يجرني عليه اكثر
-كهلان
حطيت ايدي على ايده ابعدها من عدي عافني وخرت من عده مسح رگبته مرتبك جر الصوره ودارها عليَّ جريتها من ايده اعاين بيها الصوره بالهول مالتهم هو كاعد يم الصينية بكد حسين لو اصغر منه وانه بعمر 3 سنين كاضته من وجهه وبايسته بخده شلت راسي اعاينله
-كلهن هيج
ساكت عيونه كوه فاتحهن هز راسه لا
مد ايده الايدي يحجي بهدوء
-تعاي
مشيت بأيده ما ادري شني اليريد يسويه جرني لحضنه كاض ايدي اثنينهن عبرهن على رگبته همس بأذني أنفاسه دافيه
-اشبگيني
عيوني غمضن من وحدهن قربني عليه اكثر شبگته من رگبته جسمي يرجف وهو شابگني من خصري بقوة اديه محاوطاتني يلغي كل مسافة بين جسمي وجسمه دفن وجهه برگبتي وانفاسه على جلدي ملت برگبتي متقشعر بدني من ملمس شاربه الي احسه احتك بكل جزء من رگبتي احس دفو شفايفه طغى على كل شعوري واخذ كل تركيزي وهو يمشي على رگبتي
حرك راسه بدون ما يوخر رخيت ايدي ذبلانه دار بوجهه لجهة رگبتي الثانية وهمس
-لا تهديني گتلج اشبگيني
بدون اي تفكير رجعت ايدي لرگبته احضنه بنفس ألقوه عيوني ما كادره افتحهن غارگه وسط شعور دافي حلو مابيه آي خوف اديه تمسح على ظهري بلمسات ترجفني رفع شفايفه الاذني نفسه ثگيل يبوسني وهمس بأذني
-ريمه تشوفين ألصوره
فتحت عيني بساع صاحيه جريت روحي من عده مبتعده جسمي يرجف مسحت رگبتي روحـي رايحه
وهو يعاينلي گوه فاتح عينه مسح شفايفه بأبهامه والتفت للصور شال صورة منهم مدها الي اخذتها من ايده ورجعت ليوره مستنده ع الچرباية
عمــري5 سنوات الصوره قريبه على وجهنه شابگته من رگبته وهو شابگني وحاط وجهه برگبتي بالصوره وجهي مبين ووجه ما مبين شلت راسي اعاينله خيط الضوه يدخّل للغرفه من الفتحة الي بنص البرده
عيونه ذبلانه وانه حسيت كل الصور نفس الشي
-ما اريدن اشوفن بعد
زفر نفس متحسر شال الصور عافهن گدامي وگام للچربايه ينام احذتهن اگلب بيهن كل الصور تجمعنه وكلهن لوحضن لو نايمه وبايسني براسي لو شايلني ضميتهن وطلعت من الغرفة من سمعت صوّت عفراء وشمس
-صباح الخير
عــفراء:: صباح العافيه هلا شلونج
شلت شمس ابوسنها
-الحمدلله زينه
-جا شني طــروادة بعده ماجاي
-اجه من زمان نام
ابتسمت رافعه حاجبه جنها اخوها
عــفراء:: يمج
-جا يم خالتج
طكتني على ايدي تضحك هي ضلت تشنگ العجين وانه طلعت للحوش حطيت حطب بالتنور وشعلته لمن جابت العجين شايلته على راسها وكاضه شمس من أيدها اجت هي تخبز وانه كاعده يمها اتشاقه وياها واضحك نفسيتي مرتاحة سمعت دجاجات رنـــه يتزاعگن
-ابوگ بيضه من دجاجات رنـــه
عــفراء:: النوب تزوعج العافيه اكعدي عدنا بيض احمر
ضحكت لمن كضينه خبز وطبينه للبيت هي كعدت رنـــه واخوانها وانه ضليت اعاين للغرفة توه نام شيكعده شلون يروح للدوام وهو بعده ما شبعان نوم عفته لمن كضينه الريوك يله كعدته عيونه حمر وكوه فاتحهن طلعوا هو ورنه اثنينهم مطنگرين راحوا للدوام
ضلينه بس انه وعفراء كضينه شغل وكعدنه نسولف لمن اندك باب الحوش كمت فتحته صار بوجهي ابوي تلاشت ابتسامتي اعاين لوجهه
-شلونج بويه
-زينه
حجيتها ودرت وجهي للبيت اجت وراي عــفراء وكفت بباب الهول
شاكر:: ريـــمه بويه تعاي ليغاد اريدن اشوفج
عــفراء:: ما تجي تعال شوفها هنا بالدوانيه
شال ايده بحرگه يغلط على عفراء
شاكر:: انتِ مالج غرض سودنتي بتيي چلبه بت الچلاب
دفعته من ايده اسكته
- كافي هسه اجي بس البس عبايتي
سديت الباب بوجهه وطبيت للبيت وعفراء ماراضيه
-ماترحين
-بساع اجي
-ريـــمه تردين تتمرضين
جريت عبايتي لبستها واعاينلها مديت ايدي على أيدها
-لا تخافين
سكتت ما راضيه طلعت من يمها ابوي ضال واكف بباب الحوش مشيت بصفه لبيت اهلي يحجي علي
-شني بويه هيج هي لا تجين لا تنشدين لا تكولين اشوفن ابوي
امشي وياه ساكته لمن طبينه للحوش سد الباب يعاينلي
-شلونج بويه
-زينه ليش جبتني صاير شي
عاينلي مصدوم جرني من ايدي للدوانيه طبينه من الباب الخارجي كعد وكعدني بصفه كاضني من ايدي ويحجي على كيف
-بويه انا ما اريدن اخليج غاد ببيت شامل وكل ماردت اطلكج من طــروادة اخوتج يوكفون بوجهي انتِ تعاي كليلهم ما اريدنه يطكني وموش زين وياي خل يطلكونج وتفض هالطلابه هاي لعبت رواحنه
حطيت ايدي فوك ايده جريتها من ايدي الكاضها هزيت راسي لا ورفعت عيني اعاين لوجهه
-بس رجلي ما طاكني ولا غالط عليَّ وزين وياي
عگد حاجبه ضايج
-بويه ما يريدج
-لا يابه يريدني وانه مرتاحه يمهم ومدلليني ليش تريدني اتطلك
سكت يعاين لوجهي بصدمة
-انا علمودج بويه جيه جنتِ ماراضيه
مسحت على أيّده متحسره
-لا يابه مرتاحه لا تفكر بيه
-هاي هي بويه الله يهنيج ويسعدج جا انه شأريد
ابتسمت اعاين لوجهه احجي وي روحي انتَ الكلش حنين شلون گدرت تكسر بأخوك كضيت ايده بأثنين ايدي مدنكه اعاينلها وامسح عليها. -يابه
شلت راسي أعاين بوجهه
-ليش خليتني ابوگن گراب خنجر عمي شامل
فتح عينه حيل يعاين بوجهي هزيت راسي اي
-اتذكر شلون وديتوني واتذكر حتى حجيكم
جر ايده من ايدي بنتر دار وجهه من عدي
-مالج غرض بهالسالفة
-الي يابه انتم حطيتوني بنصها وخليتوني انه الابوگن الگراب شلون هسه صار مالي غرض
دار عليَّ عيونه متروسه دموع حط أصبعه وسط اسنانه عضه بقهر
-اااخ لو ما ماشي بحچي امج كله منها هي السودنتني على اخوي
جريت ايده امسح بأصبعه وهو حسرته تهد الحيل
-سودنتني عمّت عيوني وخلتني انغش وامشي بحجيها
- بويه بعدك تمشي بحجيها وراح تضر ولد عمي مثل ما سويت بيه
-لا وروح عمج هسه هم امشي بحجيها بعد ولا تشوفيني اتعارك وي طــروادة بس يضل ابن اخوي وشحد وأحد يحاجيه الظفر ما يطلع من اللحم انه اعاركنه جيه مايعرف يتصرف ودوم يمشي غلط
يحجي ويمسح دموعه بچفيته
-يابه انه اموتن لو صار بيك شي وتدري بروحك عدي اعز من الهوه بس لو ضليت تعادي طــروادة وتحاربه بگيعانه لو توز جديّ عليه راح اسولف لاخواني على گراب الخنجر
فتح عيونه حيل مصدوم وانه گـلبي يدك بقوة نزلت عيني منه مرتبكه وانفتح الباب طبت هاجر تضحك وتركض شبگتني جريت نفس اشمها
-يابعد روحي هجوره
شاكر:: روحن غاد بويه
گمت وي هاجر للبيت تلاكت وياي امي طالعه من المطبخ وكفت بلعت ريك بخوف عاينتلي وجها مزلغ
-شلونج يمه -هلا بيج
دنكت ماحطيت عيني بعينها وهاجر تجر بايدي تريد نصعد فوگ صعدت وياها للغرفة طلعتلي لوحة راسمها بيها غيث رسمها صاير قوي كلش
-الله يرحمك يا روحي غيوثي عمه
أشرتلي بأيدها تسأل حلو رسمها لو لا
-يخبل شراسمه بعد
درت عيوني للبوفيه للدفتر سدت البوفيه تأشرلي براسها ماراسمه شي
-رسمج صاير كلش حلو وقوي متعلمه
ابتسمت تهز راسها اي
-هجوره يله انه اروحن طــروادة ما يرضى اجي هنا واذا تضوجين خلي الولد يجيبونج يمي خوش
هزت راسها اي ضمت اللوحه قفلت البوفيه واعاينلها المفتاح بيه خيط وتشده بملابسها وتضمه جواهم ضحكت
-چنج جده
حطت ايدها على راسها تأشر مسودنه اخذتها ونزلنه جوه امي وابوي بغرفتهم ومحد من الولد موجود بس هاجر ورديت لعفراء تعاينلي بخوف
-والله مابيه شي شسالفه خيه
سكتت محتاره خابرت رجلها يريد يجي ياخذها وهي ما ترضى كالتله
-اريد اكضي الحجه وي البنات
اضــحك وياها سدت المكالمه منه وخابرت جــويريه حجينه وياها اثنينا
