رواية عفو عام الفصل الخامس بقلم جمانه السعيدي
اكو عوائل محترمه بس يجيبهم الابتلاء عن طريق واحد من الابناء
يكون مختلف مجرم من هو زغير ومايفيد بي الكلام والتعليم
عائله صاحبت دخل محدود تتكون من ٣ ابناء والام والأب
الام والاب ناس محترمين وكل الناس تشهد بااخلاقهم
الاب هو الابن الاكبر لعائلته ازوج اول واحد بلعائله
الاهل حيل كانو فرحانين بزواجه
وخاصه زوجته من اقاربهم بنيه محترمه وبت عائله
صار عدهم الطفل الأول ولد
ولا كأنما ولد عبالك نازل من السما وشايل رساله سماويه
لان هو الحفيد الأول بالعائله
كان مسموحله بااي شي يغلط يضرب بعد ولد
وهذا الطفل الأول بهذا البيت
بيت الجد كلهم مشتركين بهاي التربيه الماكو منها
المهم هذا الطفل فات طول عمره وكيح وجسر ويضرب
ويغلط عكس اخوانه الي كانو محد سامع الهم حس
كبر هذا الولد على المشاكل مستحيل يطلع للشارع اذا ما يجيب الاهله مشكله
كثرة الشكاوي من الجوارين علي
الاهل شمايضربو ويعلمو مايفيد بي الكلام خلاص
الولد تعلم يمشي الشي الي براسه ومايخاف من اكبر واحد
كبر هو وإخوانه اهله اشترو بيت قريب على بيت جده وطلعو لكن هذا الولد مو كبر صار انتقام على اهله
كل سنه هما لازم يفصلون بسبب مشاكله
الي ما تنتهي عاف المدرسه وكام يمشي وياا شله ساقطه مثله واتعس منه
اذا كان شيطان صار كبير الشياطين
مره طلع وياا جماعته يشوفون لعبة طوبه بملعب قريب عليهم اكو ولد جاي يتفرج حاله حالهم
بس ولد مؤدب والناس كلها تحلف بااخلاقه
هذا الشيطان ماكعد وسكت لا اتحرش بي وبدا يضربه
ضربه بسجينه والولد وكع سابح بدمه
نقلو للمستشفى وأهل هذا المجرم اجو اخذو عطوه
لمن تستقر حالة الولد الضحيه
الولد بعد عدة عماليات ومصاريف مالها نهايه
أصبح مشلول مقعد لاحول ولا قوه
اهله يدفعون بعربانه الدكاتره أكدو راح يبقى طول عمره مقعد
اهل المجرم دفعو فصل
وهذا المجرم انحكم خمس سنوات سجن
ابو يكول همزين انحكم الله خلصنا منه ومن شره
استحي ارفع عيني من امشي بلشارع من ورا تصرفاته
جمانه السعيدي
المهم انسجن خمس سنوات وطلع
الكل كان متوقع راح يكعد ويسكت بعد السجن ويبطل مشاكل
اقل ست اشهر ورا ما طلع من السجن
واجت الشرطه قبضت على مره ثانيه
اهله استغربت شكووو ليش لزمتو
تعالو اسمعو شنو آخر جريمه قام بيها هذا الشيطان
بعد ما طلع من السجن
اكو مشكله عشائريه بين عشيرته وغير عشريه
هاي المشكله صارلها اكثر من أربعين سنه
قبل لاينولد هذا المجرم بااكثر من عشرين سنه
وعشيرة هذا المجرم هي الي كانت سبب الخلاف بينهم وبين ذيج العشيره
عشيرة المجرم رغم هي كانت السبب بهذا الخلاف
الا ان ذيج العشيره انتصرت عليهم
وكدرت تكتل ٦٠ واحد منهم بوقتها حكومة النضام
السابق دزو قوة عسكريه يله كدرت توقف هاي المجزره
وحكمو على العشيره الثانيه يشيلون الغير منطقه
حتى يتوقف القتال بين العشيرتين
هاي القصه جانت حيل معروفه بذاك الوقت
المهم نرجع الهذا المجرم
الي كان يسمع هاي القصه دائما ويسمع شلون عشيرته انهزمت وفقدت ٦٠ رجال بلقتال
كل هاي السنيين ومجاي يكدرون ينسون هاي المشكله
شوفو هو لا حاضر المشكله ولا رايح واحد من اجداده بهاي المشكله
بس كان حاقد على هاي العشيره الي كانت ادافع عن
حقوقها بذاك الوقت
تكدرون تكولون حقد متوارث عبر الاجيال
هسه نرجع للمجرم
هذا المجرم طالع هو وصديق اله للريف يغيرون جووو
تعبانين وجوعانيين مقربين على واحد فلاح
طالبين منه ماي لكن هو مصمم يضيفهم
ذابح الهم ديج وطابخه ومعشيهم
سائلين انت وحدك هنا راد عليهم اي وحدي
هاي كاعي وبيها حلالي وعندي كاع ثانيه بقت بيها مرتي وولدي
هذا المجرم سائله انت من يااا عمام يعني من اي عشيره
الرجال المسكين طالع من العشيره الي تقاتلت
وياا عشيرتهم قبل
رغم هذا الرجال كرمهم وعشاهم وضيفهم احسن ضيافه
ورغم هذا المجرم هو اصلا ماحاضر المشكله القديمه
ولا اله احد حاضر بيها
بس غريزة المجرم اتحركت وقرر يقتل هذا الرجال
بس لان هو من العشيره الي كانت عدها مشكله وياا عشيرته قبل اكثر من ٤٠ سنه
اتفق هذا المجرم هو وصديقه يقتلو هذا الرجال
وياخذون شعنده من فلوس وينهزمون
فعلا طلبو منه يباتون عنده والصبح يطلعون
الرجال فرح بيهم وفرشلهم بلغرفه الي كان ينام بيها
مجرد ما نام الرجال ذبحو ودفنو بكاعه واخذو فلوسه وطلعو
اهل المقتول اقصد الفلاح المسكين اجو بعد يوم يتفقدونه وهم جايبله اكل
بس مالكووو بلكاع بقو يدورون علي ماكووو
عممو مواصفاته بلمراكز والمستشفيات ماكووو
فات اكثر من شهر وهو ماكوووو
صحيح لو كالو دم المسلم مايضيع
الولد الي وياا المجرم صاحبنا الي شاركه بقتل الفلاح انلزم بشغله ثانيه بايك من واحد فلوس ومصورته الكامره
الشرطه لزمته وبدت تحقق ويااا
من ضمن الجرائم الي اعترف بيهن قتل هذا الرجال الفلاح
واعترف على صديقه الي نفذ الجريمه ويااا
الشرطه اخذته الموقع الجريمه وحفرو وطلعو الفلاح
المسكين الي كل مشكلته هو من العشيره صاحبت المشكله القديمه
رغم هو اكرمهم وضيفهم بس ولد الحرام ماتصير الهم جاره
اجو الشرطه على صاحبنا ولزمو وهو صار اقل الست اشهر طلع من السجن
هللمره هاي المشكله صعدت المشكله القديمه
ووقتها اجت تنفتح جبهه جديده بين العشيرتين
الله يستر منها
بس تحالفت اكبر العشائر الجنوبيه ودخلت حتى تحل هاي المشكله
لان اذا انفتحت هاي الحرب راح تخلص على العشيريتين
اهل الولد دفعو هما وعشريتهم ٥٠ مليون فصل
الولد انحكم اعدام
وابو الولد المجرم راح للمحكمه وكاللهم لا اطلعون ابني من السجن اعدمو وخلصوني منه ومن مشاكله
بس أقل ٨ اشهر واجا العفو وطلع هذا المجرم مره ثانيه
ابو ماقبل يروح يستلمه
عمامه راحو جابو من السجن
وسوله حفله لان طلع من السجن
هو حاليا كاعد بيت عمه لان ابو حالف علي مايدخل بيته
ياحكومتنا الشريفه
واحد مثل هذا عنده سوابق مجرم ومصمم على الاجرام
شلون اطلعو بلعفو
قابل تاب قابل صار مصلح
بلعكس راح يتشجع على الاجرام اكثر
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
