رواية أرض الخناجر الفصل الخامس والثمانون بقلم ايلول
يعَنبر يَا تعب ظهري زرعتك والشمس تَلهب
يا أول حصد بالروح مِدلل بالگلب تلعَب
══━━━━✥◈✥━━━━══
-الو.
همست ايدي على گـــلبي متوتره منه مدري شجاني حجه بجديه
-مرحبا ست رنـــه.
-مراحب استاذ بريا.
-شلونج عيوني.
-اكلك شكو هبطتني
-ليش
-ما ادري ليش خابرتني بهيج وكت مو على اساس بالواجب؟
سكت فترة ما ادري شبيه احس اسمع خطواته يتمشى
-بريا؟
-همم.
-شبيك يروحي صاير شي؟
تحسر ورد گال
-ما اگدر اصبر اكثر مال اضل سنة بعد والله ما اتحمل رنـــه اتمنى تحسين شكد تعبان ورايدج.
بلعت ريك متوتره والتفتت اعاين لحسين رافع حاجبه ويهزّ بأيده شلون سمعني گلت البريا يروحي، مشيت للغرفة ساكته سديت الباب وكعدت احاجيه بصوت ناصي
-شكو بريا شبيك مو هستوك التحقت؟
-اي بس بالي يمج من اعاين هواي بعد ما اگدر اتاني كلّ هالمده من حقي ارد من الدوام ارتاح ببيتي ويم مرتي مو صح؟
يحجي بحسره مقهور وانه اسمع ساكته رد گال
-رنـــه
-هاه عيني.
-هاي هيه بعطلة نصف السنة نتزوج بلا عرس وهوسه مثل ما تردين.
سكتت مقهوره رغم شكد جنت متأمله يقتنع بس دام حسيت بيه ما مرتاح انقهرت
-ها شگلتي؟
-بريا انه ما اريدن اقهرك والله العظيم وادري انت شكد سويت شغلات علمودي عفت اخوك وبنيت بيت يمنه وصبرت لمن طــروادة كالك تكضي سادس وهواي شغلات تحملت علمودي وهسه رضيت هيج بس حتى لا تضوجني والعباس كلهن بگلبي ولا ناسيه موقف منهن،عليك الحسين مو تضوج.
-شعندي غيرج انا وما اصبرلج؟
دنگت مختنگه وعيوني متروسه دموع واسمع صوته من يصيحون عليه ويگلهم "هسه ااي اجيت" رديت گتله
-بريا
-ها حبيبي؟
-لا بطلت خلي نسوي عرس شلون ما انتَ تريد.
-وسوينه شستفاد انا اذا انتِ ما مرتاحة وما فرحانة؟ المن رايد كل هذا والمن اتعب وأخسر للوادم لو الج؟ ما اريدن الشي الما يسعدج وتسوينه غصب حتى لا تضوجيني.
-جا انه هم ما اريدن اسوي شي وانتَ ضايج
-ما ضايج وعلي فكرت بحجيج وسولفت الميثم گال احسن وحگها، بس تلبسين ابيض رنـــه انا اريدن اشوفنج بالأبيض.
مسحت عيوني من طبت شمس وبس شافت التلفون على ادني هزت راسها وضيگت عيونها تسأل ياهو .. رديت گتله
-اي البس ابيض بس كون صدك ما ضايج بريا عليك بداعت حور كون گلبك راضي ومرتاح
-ما ضايج حبيبي انا لو شفتج مرتاحة وتضحكين گـــلبي يرتاح .
شمس:: بريا؟
هزيت راسي اي وهيه ما حجت كعدت بحضني تتصنت گتله
-وطرواده خاف ما يرضى.
-صــيهد وميثم يقنعونه.
-ان شاءلله ... بربر
ضحك يحجي همس
-ارد والله اعوفن دوامي وارد لا تحجين همس ولا تغيرين اسمي تعاركي سوي اي شي خليني راكد بشغلي.
-ههههه عاين احبنك والله اموتن عليك.
-يا بويه... مو گدي وعلي اااخ گـــلبي يصخن بحجاية منج
-هههههه اول مره اسمع گلب يصخن
شمس:: گلبه صخن مريض؟
عاينتلها اهز راسي اي مبتسمه وهو گال
-خل احاجيها وينها
فتحت السماعة وانطيتها التلفون كالتله
-هلو بربر.
-يا يااابه منين اتلكاها منج من خالتج شلونج ولج شمسنا.
-انه زينه.
-يا بعد روحـــي خالي عساج دوم زينه.
-خالو جاب لزهره هدوم وما ..وما جابلي.
تتشكى بزعل شلون طــروادة جاب هدوم مدرسه الزهره رادت مثلها وولا اقتنعت ضلت ياهو تكضه تكله خالو ماجابلي هدوم ضحك بريا يسولف وياها ويقنعها بعده يحاجيها كالتله
-يله باي باي.
وسدته بوجهه تضحك اخذتها وطلعنه من الغرفة للهول زهره تكتب وتتعارك وي علاوي لان يجر دفاترها يريد يشخبط وحسين يصيح عليها يدافع العلاوي صارت ملاطم لمن كضيت الخيزرانه يله سدوا حلوكهم وحتى شمس ام السان سكتت
شويه وطبت ريـــمه راده من بيت اهلها غسلت وكعدت بالهول ميته من التعب مشه علاوي يمها يبوسها ويعدل بشالها وشمس ركضت جابتلها كلاص ماي من المطبخ للهول يتبدى لمن وصلته الها ضال بيه نص اخذته ريـــمه تضحك شربته وجرتها الحضنها تشبگها وتدغدغها
ريـــمه:: ليش هلكدد حلوووه انتِ هاه ليشش
وشمس تصرخ وتضحك تمد ايدها الي عافتها ريـــمه وعاينتلي تسأل
-اكلج اليوم ماعدنا شي نروح الندى زحمه الهسه ما واصلتها انه.
-جا انه نعسانه اليوم اريد بس يصير الليل حتى انامن خليها باجر الصبح.
-رنـــه ما الحك الصبح شو بين ما نتريك واعجن واروحن البيت اهلي يطبك علينه الغده وتصير ركض بركض
هزيت راسي خوش نروح بالليل، كمت حطيتلها حطب بالتنور وي غروب الشمس وصوت القرآن اللي يشغلونه قبل الاذان، شلت راسي اعاين للاشجار والسعف النخل اللي كل شويه يهتز بسبب الطيور اللي بدت ترجع لبيوتها گبل لا يلتم عليها الليل، شلت راسي لباب الحوش متحسره وفزيت من انفتح بساع عاينت بوجهه گـــلبي دك حيل وبس لمحني ابتسم
-الله يساعدك
كهلان:: هلا بيج تعاي هاج.
مشيت بساع اخذت العلاليك منه بعده ما مغسل اديه واجوه علاوي وشمس يركضون شالهم اثنينهم كل واحد يبوسه من خد اعاينله مبتسمه وهو صفنته بعيون شمس وحسرته من يبوسها توجع الگلب.
طلعت ريـــمه شايله صينية العجين سلمت عليه يعاينلها بقهر لان يدري بيها شكد جاي تتعب ببيت اهلها وتحاول تضم تعبها وتضحك وتسولف عفتها تخبز ومشيت أحضر العشه اجه كهلان وراي للمطبخ يسأل
-شو ريـــمه ضايجه شني شبيها؟ امها هم محاجيتها؟
-والله ما ادري، هيه ماضايجة بس لان جاي تتعب وي امها.
-الولد يعاونونها؟
-اي والله ســليم وسلطان ولا متيهينها خو ســليم كاعد يمها هو يشيلها ويحطها بالعربانه بس هيه ميلاد چلبه شافت ريـــمه تتعب من تسبحها كامت كل يوم تريد تسبح الحقيرة.
-اشش
سكتني ما راضي أحجي عليها گال
-ميخالف انتِ من تريد تسبحها روحـــي وياها عاونيها
-اي هوه اروحن بس ودي اكضها واحط راسها بالسطل اخنگها الچلبه والله كوه اروحن علمود ريـــمه اخافن عليها لا يصير بظهرها شي.
-ميخالف خويه كله الخاطر ريـــمه .
هزيت راسهي اي وهو طلع يمها تدنيت اعاين عليهم من. الشباج وجها صار احمر من التنور وهوه وكف بصفها يسولف وياها ويتلفت شاف حسين وزهره اخذوا سله وسجينة ومشوا يحوشون خضره وعلاوي وشموسه يلعبون ملتهين مد ايده على خدها وعدل حجابها ابتسمت بخجل وتلفتت تگله
-شبيك؟
كهلان:: شبيه كضيت خدج شسويت؟
-جهالنه مناه
-ملتيهن محد جاي يعاين علينه.
حجاها وتلفتوا اثنينهم يتأكدون محد يشوفوهم صارت عينهم بعيني ماده راسي من شباج المطيخ صافنه بيهم والضحكة شاكه حلكي، ريـــمه ضحكت وكهلان دار وجهه ومشه وره حسين وزهره للخضره، هزت راسها ريـــمه متحلفه بيه غمزتلها وطبيت آكمل العشه.
بين ما صلينه وصبينه بس كضينه عشانه كالتله
ريـــمه:: نريد نروح البيت عمتي ايمان نوصل مرة وهـــب .
طــروادة:: جا اظن الولد راح يجون هناه.
-عود حسين يسويلكم چاي .
رفع حاجبه حسين ما راضي ويهز بأيده وزهره تتشمت بيه من جوه ليجوه بدلنه ومشينه هوستهم واصله الباب الحوش، البنات ملتمات وصوت وهـــب وصيهد والجهال خبصه كالت ريـــمه
-هذا رجلي يضحك علينه شلون يگول الولد راح يجوني وهمه هل كاعدين هناه.
-ما اسمحلج تحجين على اخوي هسه شويه ويرحوله.
طبينه للمطبخ سلمنه عليهن كضيت ماريا اكرص بيها
-دايحه لو يمي جا ما اجيتي شعندج هناه.
ضحكت تشاورني
-ســليم يمكم ما اجي.
-انهجم بيتج أحلف عليج تتمنينه.
كرصتني تضحك وجرتني جــويريه تغلط
-تتشاورن گدامي خايسات.
ضحكت اباوسها
-شلونج ام اسينات.
مــاسه:: اسكتي رنـــه هسه تزعل وتروح للمشتمل تبجي.
ووي حجايتها ضحكن كلهن ناصبات عليها
بــدور:: حركت گلب امي ... وامي گالتلها صــيهد جان خاطب وحده اسمها اسينات بجتها.
جــويريه:: جذابات ولا بجيت.
ميتات من الضحك عليها، عفتها تبوس وتحضن بشمس تريد تاكلها طبينه جوه ريـــمه سلمت على الولد وانه سلمت بس على وهـــب صاح صــيهد
صــيهد:: عمي بالحسين يا رنـــه اطيح حظج.
ووهب يجر بياخة دشداشته يعدلها ويضحك يگله
-بس انا تحترمني تشوفني الچبير.
اعاينلهم مبتسمه وعمتي ايمان والبنات يضحكن كالتله جــويريه
-حرامات وصيتلها على دجاجات لا تجيبلها بعد ما تستاهل.
شال ايده مأيدها. وجر تلفونه يريد يخابر وانه ما فاهمه يا دجاجات كالت امه
ايمان:: خايبه الفاهيه وصالج على دجاجات من هذن الزينات راح تخسرينهن من امداااج.
وماسه ورغد يكرصن بيه كتله
-جا انه احترمك ابو كرار.
جــويريه:: گليله انتَ صكاري.
درت عليها رافعه حاجبي
-انتِ اسكتي وخليني ساكتتلج.
ضحكت وصيهد يصيح
-جا ليش سلمتي بس على وهـــب.
-من قوة الأحترام ما گدرت اسلم عليك.
ضحكوا كلهم وهو خابر كهلان ويگله
-تعال هناه
وكهلان ما يرضى يطب بيوتهم جانوا يتشاقون النوب گلبوها وزعلوا صدك ما رضوا يرحون يمه الا هو يجيهم عفناهم وطبينه الغرفة عمه ايمان عاينت بوجهه ندى مبتسمه صايره حيل حلوه والبنات مهتمات بيها وهي مكيفه بفاطمة وكل ما وحده من عدنا تكضها رضا يصيح
-هاي اختي.
بــدور:: دروا بيها اختك ووخر لا تخبصنه.
رضا:: السيد السيد هااه السيدد.
يحجي بحرگه ويهز براسه ركضت رغد تسد بحلكه وندى عضت اصبعها متحلفه بيه وبدور تريد تبجي وتشكي الامها
بــدور:: يمه شووفيه شوفيه هسه يحجي يم صــيهد.
كعدته خاله ايمان بحضنها تعلمه وهوه يگلها
-ختولي
-جا مو هيه صاحبتك وتنومك بغرفتها بعد ما تخليك تنام بغرفتها تطردك.
دار وجهه الها يحجي محترك گلبه ويريد يبجي
رضا:: هيه تكلي بعد... تكلي بعد ولا احبك احب السيد.
بــدور ضمت روحها بالفراش تريد تختفي واحنا نضحك خنك وعمتي ايمان تسد بحلك رضا ومتحلفه ببدور.
ضلينه نسولف ونضحك وكل شوي امد راسي اعاين للولد بالهول لان شمس ضلت يمهم صــيهد الما يتحاجه نزل لعبة مكياج بنات بتلفونه وكعد يلعّب وياها ووهب يلعب وي حور ويگلهم
وهـــب:: عروستنا احلى
صــيهد:: لا عروستنا احله حطينالها كرون.
شمس:: مو حلوووه خالو مو حلوه.
صيحت محترك گلبها من شافت اللعابه بتلفون وهـــب حلوه ولعابتهم هيه وصيهد حاطيلها حمره سوده جنها مصاصة دماء.
صــيهد:: حور تعاي عوفي وهـــب يولي تعاي العبي وي شمس.
وحور تهز راسها لا مكيفه بوهب صاح صــيهد على جــويريه راحت يمهم سوت عروسه الشمس احلى من عروسة وهـــب وحور.
اعاينلهم واضحك، وفجأه الكاهم يعاينون الشمس صافنين بوجها بحسرة ويدنكون يبوسون راسها ويترحمون العفراء ومنذر.
رديت كعدت يم ريـــمه گالت الندى
-هاي دلاعتها من عندي... وكهلان لمن يشوفها يله يدلعها.
ندى:: ضحكت منحرجه ومستحيه منهم
-لا والله ماكو داعي
ريـــمه:: ولج رجلج كل ما يمر من يم بابنه يصيح وين دلاعة فطمنه.
رغد:: ومتحلف بسليم يگول غير المية لا يشوفني.
ريـــمه::ســليم ضامله ربع مشكك
ندى:: اخذت فاطمة من أيدها اضــحك حيل تونست بجيتهن يمنا بعدهن ما طالعات وبدور گالت أجه كهلان فتحن باب الغرفة البنات مادات روسهن يشوفنهم لان بعدهم بره وصوتهم عالي ما ندري يتعاركون يتشاقون صيحت عليهن يسولي مجال اشوف محد تسمعني شفت السالفة ما تفيد عفت فاطمة بفراشها وگمت مديت راسي وياهن واكفين كبال باب الهول همه يجرون بيه يردونه يطب للهول وهوه يجر بروحه منهم ويگلهم
-احنا اتفقنا تجون ييمي.
صــيهد:: اي طب لبيتنا والنوب نجي يمك.
وسحلوه سحل للهول صــيهد يعاينله بفرح مكيف بيه ووهب خابر على الولد، طلعت عمتي سلمت عليه وحاجته
ايمان:: بيت اخوتك يمه شلون بله تضل دوم ما تطب بيوتنا؟
وهو منحرج مدنك ويحاجيها
-لا عمه بس هوه صــيهد گال انا اجيك.
كعدوا سوا وصيهد بس شال راسه النه خازرنا وخرنه من الباب ردينه كعدنا ريـــمه گالت
-جا خل اروحن انه حتى اضل يم امي وسليم يجي يم الولد .
جلبنه برنه تبقى ما قبلت كالت نعسانه مشن ووهب من طلعن يله شاف زهره صاح عليها وهي ضمت روحها بعباية رنـــه مستحيه منه وهو تخبل
-ولج جا ياهي الجانت تصيح عليَّ هبهب؟ وياهو الياخذج للمدرسة شو عطلتي جم شهر نسيتيني؟
كهلان:: كبرت كامت تستحي.
صــيهد:: اخلاق الخايسه خوش متربيه.
وهيه ميته من المستحى وتضم روحها ووهب قفّل عليها الا تحاجيه جراها حسين يضحك سلمت على وهـــب وهو يگلها
-بعد ولا اخذنج للمدرسة
كهلان:: كليله ما نريدك راح احطلج خط ياخذج ويجيبج.
وهي تضحك ساكته، اخذنها وراحن وحسين شويه ولحكهن كاموا الولد يردون يرحون للدوانيه كبل لا يجون مــيثم وسلطان وكفوا وكهلان راد فاطمه اخذها اله وهـــب اعاينله مبتسمه صلى على النبي بس خلاها بايده باسها بخدها يحاجيها
كهلان:: ماشاءالله... فاطمة خالي.
وهـــب:: شني خالها عمهاا!
-حجّي يفيدك الولد عمهم والبنات خالهم بعد هاي لازم نقسمها .
ايمان:: اي هيج احسن جا اخوكم وأخو البنات.
ضحكوا وصيهد يسحل بيهم رجعولي فاطمة وراحوا للدوانيه، كعدنا نسولف انتبهت عيون مــاسه على ماريا هي وبدور كاعدات على صفحة يتهامسن ما نسمع شنو يحجن دارت باوعت بوجهي هزيت راسي شكو ابتسمت اشرت ماكو شي .
بقينا ساعة كاعدات سوه وراحن هنه ورغد وجويريه من كرار نعس هم اخذته وراحت كمت الغرفتي نومت فاطمة بالكاروك وبدور صاحبة رضا واخذته يمها تمددت بفراشي احمد ربي واشكره على نعمته وابتسم كل ما اتذكر وهب ولهفته على بنته وشلون يبوسها ويحضنها ومن رضا يگله تحبها اكثر مني يگله لاانتم عيوني الاثنين هيه عين وانتَ عين يقتنع ويسكت.
غمضت عيني غفيت والابتسامة على وجهي الحد ما حسيته يجرني من ايدي الحضنه ضميت وجهي بصدره لمني بأثنين أديه على گلبه
-بس لو ادري انا شمسوي بحياتي وربي رزقني بيكم؟
-ما مسوي شي بس لان اني انشلع گـــلبي قبل عوضني بيك.
-ههههه يعني انتِ تستاهليني وانا ما استاهلج؟
ضحكت امسح على خده
-مو بس تستاهلني انتَ تستاهل عيوني
مد ايده يرفع وجهي يبوسني ويحلف شكد يحبني، ضميت روحـــي بحضنه مبتسمه وفرحانة بيه حييل، توني غفيت وفززتني فاطمة تبجي كعد وياي وهي ولا سكتت اخذناها ورحنه يم بيبيتها كعدت هي خلتها بحضنها تسكتها واني ووهب تمددنا بفراشها صاحت
ايمان:: كوموا من فراشي هلاه.
وهـــب جر الغطا وسوه روحه يشخر جنه نتشاقه ونمنا صدك للصبح اسمع صوت بــدور تحجي وي امها واشم ريحة چاي وبيض
بــدور:: جا ليش نايمين هناه؟
ايمان:: مستهترين.
فتحت عيوني اشوفنهن بــدور مسويه ريوك الصينية بينها وبين عمه وفطوم بلحافها بصف عمتي، كعدت على حيلي
-صباح الخير.
-صباح النور
ضحكت متفشله منها وهيه تعضلي اصبعها متحلفه
وهـــب شويه وكعد مشه للگيعان، وكمت وي بــدور اشتغل هل مده عمه استغلتها ابشع استغلال بحجة اني ما اگدر اكوم خلتها تشتغل وتطبخ وتغسل كالت
بــدور:: فـــدوه بعد لا تحبلين مناه لمن اتزوج
-ههههه ولج هي تريد تعلمج على شغل البيت قبل لا تتزوجين.
ضحكت ودارت وجها صافنه ومبتسمه ضربتها
-هااه
بــدور:: عاينــي مو افكر بالسيد گبل لا انامن گمت احلم بيه النوب مو احلام مال اوادم.
-هههههه بله شحلمتي
بــدور::البارحة تحلمت تزوجنا يعني انه العروس ولابسه بدله وكاضني من ايدي وهم انه موجوده وراي امشي واصفكلي واهوسلي شلون ما ادري النوب من صعدنا بالسيارة صار لبسنا غير لبس والسيارة سوده درت وجهي عليه لكيته مراد علمدار.
هزيت ايدي اضــحك
-عابتلج وعابت الاحلامج الخايسه الناس احلامها تتفسر انتِ احلامج ماينلزم منها خيط.
ووي ضحكتنا طبوا صــيهد وكرار عاينت البدور وكفت عدل رغم صــيهد ما محاجيها هيه مدري شبيها هلكد ترتبك گال الكرار
صــيهد:: روح بويه العمتك...بــدور ديربالج عليه خل اخذ امه للقاح.
هزت راسها اي وفتحت ايدها الكرار شالته تبوسه وصيهد عاينلها ساكت دار وجهه مشه ورد عليها يحاجيها بهدوء
صــيهد:: جبتي هدوم للمدرسة؟
بــدور:: احم لا بعدني.
صــيهد:: عوفي كرار يم ام رضا وبدلي ناخذ جــويريه تلقح ونمشي للسوك.
ضحكتله وبساع ركضت بدلت وراحت وياهم من بعد ما انسجن عمي وليد صــيهد هواي تغير عصبيته قلت وتصرفاته وي اخواته اختلفت بكل موقف يريد يحسسهن هوه شكد يحبهن حتى لو بدون ما يحجي، كالت عمه
ايمان:: جانوا يحركون گلبه مخلينه نار وتمشي بيناتا.
-اي اتذكر يضغطون عليه، هسه لان محد يحرك گلبه كل تصرفاته تغيرت.
هزت راسها اي متحسره، بعدهم يرحون الابوهم وبعده ما يريدهم ولا يريد يشوفهم وباليوم اليرجعون بيه محد منهم يحجي حيل ينقهرون،شويه واجت رغد يمنه سألتها امها على ميلاد
رغد:: والله يمه نفس وضعها
-هم ترحين يمها؟
-اي يمه جا ريـــمه تتعب هم عدها عيال ما تلحك، وهم الخاطر سلطان .
هزت راسها عمه مأيدتها واني مدري شبيه اجه ببالي موقف من عمتي تمرضت وما گدرت تمشي وميلاد تشمتت بيها دك بگلبي وسكتت ما حجيت شي كالت رغد
-ســليم يريد ماريا وميثم قافل ما يرضى امس حاجاه سلطان يكله لا والله ما انطيها وسدوا السالفة لا تخربون خوتنا.
ايمان:: ليش؟ جا شبيه ســليم وما يرضى
-مو يمه اكو سالفة صارت ســليم كالهم شلون الحجيت وياها اضيع وكت ماكال احبنها ورايدها وميثم ماعبر هاللحجايه ولا يرضى يعديها.
-خل ســليم يسكت مناه لمن يصير عمرها عشرين ويردّ يخطبها
رغد:: تحسرت ساكته ومحتاره ســليم بسرعة ينقهر ويگب وسلطان مقهور عليه، عفت سيوفي يم امي يلعب وي كرار ورضا ومشيت الهم. سلمت وطبيت لگيت سلطان حاطله طشت ويغسل برجلها وسليم يكص باظافرها التفتت الهجوره من طلعت من الحمام ابتسمت بس شافتني وأشرت تسأل على سيوفي گتلها
-ضل يم امي.
ميلاد:: ما جبتيه وولج
-عبالي انتِ نايمه كلت خاف يبجي ويكعدج.
-لا ما تردين تجيبينه يمي امدداج وامده خلفتج الخايسه حظي لا فلحت بخلفة ولا فلحت بچنه بيها خير وين المخسبگه صارت براسي بس هيه وبس.
درت وجهي ساكته طلعت للمطبخ اسويلهم غده واروح لكيت الجدوره على الطباخ اجت وراي هاجر همست
-لا تضوجين.
-لا عادي اكلج هاي ريـــمه طابخة لو انتِ.
ضحكت تهز راسها لا
-هاه؟
-سليم
-يا يا فـــدوه صاير ابو بيت ههههه
طب للمطبخ حس بينه نحجي عليه گال
ســليم:: شوفيه عليج الله ما اطبخ احسن من ريـــمه.
-اي عمي معدل.
ســليم:: عوزي بس مره مو؟
هزيت راسي اي اضــحك وميلاد غلطت وتدعي اجه سلطان يمنه وسد باب المطبخ الداخلي نحجي على طبخ ســليم وطبت ريـــمه جايبه خبز وياها
ســليم:: رغد تگول تروحلك فـــدوه ريـــمه طبخك تاج راسها.
ريـــمه:: درت الرغد اضــحك وهي تحلف ما كايله هيج،ضلت شويه يمنه وراحت هيه وسلطان درت السليم انشده
-ماكو اي خبر على سجاد؟
تحسر يعاين بوجهي وهاجر بس انجاب طاري سجاد طلعت للحوش گال
-متانين يردولنه خبر يشوفونه صدك مسافر الغير دوله لو شني الفلم والله كريم.
سكتت متحسره، ضميت الخبز وطبيت يمها ما ادري عليمن محترك گلبها بس شافتني تفلت تغلط وتدعي عاينتلها ساكته الدكتور گال نفسيتها تغيرت بسبب كعدتها وبتر رجلها استحيت اكله هي من يوم يومها هيج بس هسه زادت، نظفت البيت رغم هاجر ما مقصرة وسليم يساعدها هواي ويطبخ لان يخاف عليها من الطباخ، غسلت هدومها وطلعت يمه هوه وهاجر بالحوش هوه يعاين بتلفونه وهيه تنشف بشعرها على الشمس التحمس
كعدت بصف ســليم وبساع عاينت بتلفونه گلبه على بطنه جريته من ايده
-خل اشوفن عليك الله.
-ولج وخرري
يدفع ايدي وانه كضيت التلفون بعد ولا هديته بس راد يفلته من ايدي عبالي يحجي ويَ ماريا خفت گال
-بالعباس ما حاجي وياها شبييج؟
-جا ويامن؟
-بس هددي وانا اروايج.
هديت التلفون وهوه يحلف يغير رمزه فتحه داخل على محادثة قديمة وي ماريا يقرأ برسايلها ومن ضوجته مني مسح المحادثة وغير الرمز
-والله ما قصدي اضوجك بس خفت لا ترد تحجي وياها والنوب مــيثم يقفل بالزايد اسفه.
هز راسه لا وعاين بوجهي مقهور
-مو عليج انا.
-لا تضل ضايج تنحل والله ويجي يوم اجهز عرسك واركص.
ابتسم ورد دنك يعاين بتلفونه، حيل متغير ونفسيته تعبانه خاصه من كام يضل بالبيت وي امي وهاجر ويسمعها اربعة وعشرين ساعة تغلط وتدعي عليه وعلينا، جان دوم يطّلع ويمشي ومتونس وي وهـــب وبريا وحياته عباره عن طلعات ومقالب وفجأه صار محبوس بالبيت.
نوبات اضل يم امي انه واكله اطلع ما يرضى يگول حتى لو اطلع ما مرتاح يضل بالي يمج خاف تطكج.
عفته يتشاقة وي هاجر ومشيت البيتي ، العصر رنـــه تفتر وره حسين تقنع بيه ما يمشي وي جماعته يلعب طوبة وكهلان يكلها عوفيه خل يطلع بس هيه تخاف باسها وطلع ضلت كاعدتله بباب الحوش وبس صار الغروب وهوه ماكو انخبصت واديها يرجفن روحها راحت مناه لمن طبوا هوه وكهلان بجت ومشت الغرفتها زعلانه منهم مشوا وراها اثنينهم يراضونها.
كهلان ما يرضى بخوفها على حسين لان زايد عن حده ويأثر على شخصيته بالأخص هو عقله وتفكيره وكلامه ابد مو يم عمره وتبينه اكبر، ويتفلسف هواي وكهلان يحب هالشي بيه ويحب يطلع ويختلط بس بحدود.
كعد وي رنـــه وفهمها لان ابد ماجاي تخليه يطلع حتى اذا راح للدكان تريده يروح ركض ويرجع ركض.
سكتت وكهلان التهى وي صيهد بالامتحانات مال الدور الثاني خله خلكه وياه وصدك نجح، كهلان جابله جكليت بألف كاله هواي عليك
وهو كل حجايه والثانيه يهدد ياخذ دجاجات رنـــه الجابهن الها خبصنه بيهن وكل ما يشوف الديج واكف على السياج يقوقي يصيح
صــيهد:: هذا يبجيله على سجينه يريدني اذبحه واكله.
وكهلان يدافعله وما يرضى حتى لا رنـــه تحجي لان يدري بيها لوحجت.
بعد ما تسكت.
لمن بدأ دوامهم كهلان نقل رنـــه وي بــدور دام صارن نفس الصف حتى يدرسن سوا ويرحن ويجن سوا، وشمس من شافتهم يكعدون الصبح يبدلون ويمشون للمدرسة تسودنت تبجي لمن يورمن عيونها عاينتله عايف ملازمه على صفحة وشايلها يحجي وياها ويفهمها ابد ولا اقتنعت مجلبه بيه وتبجي
كهلان:: بس تكبرين اسجلج بالمدرسة.
-ماااا.. مااا.
شبگته تشهك عاينلي بحيره گتله
-لو اكو روضة قريبة علينه جا سجلناها.
-أسجلها حتى لو بعيده واحطلها خط؟
-اي والله احسن ولا تضل يوميه تبجي ورايحه عيونها وراكم.
دك الباب صــيهد يحجي لان كهلان اتأخر عليهم گاله
-روحوا انا راح اخذ شمس للروضه.
عاف الكليه بدلتلها اخذها وراح للروضة سجلها ومار للسوك جابلها هدوم وشافلها خط ومازن بس درى بيها اجه العصر اخذها، وردها بالليل مشتريلها علاكتين هدوم وحلويات وما خلى كهلان يدفع فلوس الخط وكهلان ما يرضى تعاندوا بالأخير اتفقوا كل شهر على واحد منهم.
وشمس وصارت بالروضه تكعد من الخمسه وادري بيها تجي يمي وره صلاة الصبح اخلي الباب مفتوح تجي الغرفتنا تبوسني وتهمس
-خاله... خاله يله
-همم.
-اروح للروضه.
فتحت عيوني جريتها الحضني ابوسها
-بعد وكت خاله وين من غبشه.
-شكد بعد
-نامي بعد ساعة واكعدج.
غمضت عيني شابگتها وهي ولا ترجع تنام تضل تمسح على خدي وتلعب بحواجبي وشعري وتدور الخالها تكض لحيته وشاربه لمن تكعدنا تضحك وتعاين بانتصار، كعدنا تريكنا سوا ومشوا الدواماتهم.
وانه التهي بين امي وبيتنا وبس يفرغ علي البيت ما يجي ببالي غير سجاد أبجي وادعي لو اشوفن رسالة منه حرف يشفي گـــلبي وكل ما طلعت للباب اعاين للدرب بلهفة واتخيله صدفه وي طلعتي هو يرد اشوفنه واكحل عيوني ويوم وره يوم يعدن وهو ماكو منه خبر.
رنـــه من اقتربت دورة السنة مال عبود ما مرت على شفايفها ضحكه وردت جن توه متوفي.
ومن نزل بريا وكمل البيت رادها تروح وياه يشترون اثاث ما رضت وكهلان گاله عوفها البعدين، سكت منها واخر يومين گبل دورة السنة حتى للمدرسة ما راحت وين ما اروحن الگاها تبجي
وكهلان حاله يمرد گـــلبي يحضر ويجهز لدورة السنة وبس يصير وحده يقرأ قصايد ويبجي على عــفراء وعبود
الولد ما عافوه بس حسوا بيه رجع تعب، مشينا كلمن بسيارته مدري منين يضل بينا حيل ونحمل كل هالوجع جرنا البنات من يم گبورهم جر زرنا وردينا لبيوتنا چم يوم عدن جن فاتحة عدنا محد اله نفس بشي.
وبدورة السنة مال ابوي مشوا بيت سلطان وبيت مرتضى وبس ردوا مرتضى ضل يشمر حجي على الولد وتعارك وياهم، سديت باب الحوش ما مهتمه تعبـــت من كثر لمشاكل درت الرنه احاجيها.
-ترى بريا راح يلتحق والولد يريدج تمشين وياه تختارون الغرفة.
رنـــه:: عاينتلها ساكته هوه الهسه ما قانع كهلان كالت
-رنـــه شبيج؟
-جا هوه الهسه ما قانع كهلان تدرين البارحة يكلي شني بريا متوازي عود اذا كلش بعطلة نصف السنة امشوا اشتروا غرفة وغراض للبيت.
-جا ليمت يحاجيه؟
-اندري.
كمت للغرفة خابرته كال
-عگب باجر التحق
-وانتَ الهسه ما قانع كهلان يعني شلون تريد تصدمه بالعطله لو شنو؟
-والله رنـــه ليش الجذب كلساع اريدن احاجيه بس كل ما امشي يمه للگاع الكاه كاض المسحاة اخافن لا يهفني بيها .
-هههه
-هسه راح اروحله للگيعان احاجيه وان شاءالله خير
-ان شاءالله
سديت التلفون منه وكمت من اجت بــدور درسنا سوا ضلت يمي ساعتين وراحت وراها بشويه اجه كهلان ضايج بس شافني كال
-شنهاي تلعبين بكيفج انتِ
عاينت بوجهه ساكته واجته ريـــمه بساع گالتله
-سالمين شصاير؟
عاين بيناتنا خازرنه ورد صاح
-تلعبن بكيفجن؟
-هوه شصاير غير نفهم؟
-شني يعرسون بعطلة نصف السنة وسكته؟ وانا مو كلت من تكضي سادس؟
ضليت ساكته وريمه التحجي
ريـــمه:: وعلى الثلث أشهر؟ حگه الولد هناه هنااه من خطب المثله هسّه مخلف.
-اسكتي انتِ اسكتي
-اكلك لا تصيح وتسودنا الدنيا غروب أمشي توضى وصلي وعود وره العشه تنحل.
مشه من يمنه وجهه ما يكصه السيف وريمه تأشرلي ميخالف اسكتي ضليت ساكته صبينه العشه حجه بهدوء
-خلصي السادس وتزوجي ما اريدن تلتهين وما تطلعين معدل.
عاينت بوجهه ساكته عگد حاجبه مستغرب من ما كتله خوش. وريمه بساع حطت علوش يمه وغيرت السالفة كضينه عشه تونه انصب چاي واجوه الولد عرفت بريا وداهم .
حطيت اذني اسمعهم صــيهد گاله
-همه متفقين ما يردون عرس بعد انتَ عليمن ضايج ؟
مــيثم:: كهلان ترى والله العظيم بريا راد عرس وزفة بس رنـــه مالها خلك هوسة العرس وما تريده اذا هي الاساس ماحابه العرس المن نسويه بعد للوادم؟ گتله انطيك فلوس العرس تجهز بيها بيتكم وتمشون الكربلاء همه هاوين هيج .
كهلان:: ميخالف بس مو هسه احنا اتفاقنا تكضي سادس.
سلطان:: وياك بهاي بس همه هيج وكت المفروض متزوجين يعني بريا ما غلطان صبر ورضى بكلشي، وترى هوه يكضي وكته بالدوام شيجي على العشرة ايام مدري اخمسطعش يوم يعني ما يأثر على دراستها.
سكت كهلان ما راضي وهمه يحجون وياه لمن صــيهد مل وگاله
صــيهد:: من الاخير هوه وأختك متفقين ارضى وفضها لعبتوا ارواحنا .
كمت للتلفون اراسله بريا متحلفه بيه كالي
-شيحجون ميخالف بس خل اخوج يرضى
-صــيهد يجذب
-ليمت جذب جا صدك انا وياج متفقين رنـــه لا تصيرين لوته.
ذبيت التلفون متوتره لمن راحوا اجت ريـــمه يمي بالغرفة لان تدري بيه راح يجي يحاجيني، شويه وفتح الباب عاين علينه ما عاجبه گال
-باجر عگبه تتندمين تشوفين البنات كلها عدها ذكريات بعرسها وانتِ ماكو.
دنگت ساكته صاح
-مو احاچيج
شلت راسي اعاين بوجهه
-هاه؟
-ليش ما تردين عرس؟
-مالي نفس بيه، جنت متخيله كلشي بوجود عبود هوه الياخذني للصالون بيوم العرس وهو اليشبگني ويبجي، وهوه اليتعارك وي بريا من ناخذ صور سوه، كلشي كلشي جنت راسمته ومتخيلته للعرس عبود موجود بعد مالي نفس والله مالي نفس اسوي شي بدونه.
بجيت اجر نفس مختنگه طب للغرفة بساع جرني الصدره شابگني ضميت روحـــي بحضنه ابجي
-علمودج انا والله علمودج اخافن لا تكبرين وتنقهرين رنـــه بويه.
وخرني من صدره كاض وجهي بأثنين اديه مسح عيوني يحاجيني مختنك
-هاي هيه التردينه يصير بس شوفيلج هدوم بيض واخذي بيهن صور حتى يضلن ذكرى الج.
ريـــمه:: تلبس فستان وعباية بيض وتاخذ صور لا يضل بالك.
باسني براسي متحسر وطلع ريـــمه حطّت ايدها على گلبها تحجي
-الحمدلله من اقتنع.
-روحـــي وراه خاف انقهر مني.
مشت وراه تشوفه، تمددت بفراشي زهره تعاينلي هزيت راسي شكو
زهره:: ترى ما اگدر انامن بالغرفة اذا انتِ ما موجودة شلون تزوجين؟
-من يلتحق بريا اجي يمج.
هزت ايدها وتمددت بفراشها تحجي
زهره:: والله يا الله.
مسحت عيوني مبتسمه على حجيها اريد اغفى وما گدرت كمت للدوانيه غطيت حسين عدل قفلت باب الدوانيه الخارجي وفتحت الداخلي رجعت لفراشي شبگت شمس وغفيت
ثاني يوم وره ما رجعت من المدرسة خابرني گال
-باجر عندج امتحان؟
-لا
-جا حضري روحج خل نمشي هسه نجيب الغرفة وجم غرض للبيت لان باجر انا ملتحق.
-يله خوش
-جيبي شمسنا وياج.
-هههههه ماشي
سديت التلفون منه وركضت بدلت وزهره بدلت الشمس وريمه ركضت تخابر كهلان تبلغه خاف ما يرضى لمن اجه بريا طلعت اعاين بوجهه مبتسمه ومديت ايدي سلمت عليه باوسني يضحك وريمه تگله.
-رد بنيتنا بساع مو تبطون.
بريا::منين خايفه انتِ مو هل موديه حارس ويانه.
أشر على شمس وهيه تگله
-يا انه موديتها لو انتم؟
ضحكنا شال شمس وطلعنه صعدتض بصفه وشمس وره تكمز وحدها فر السيارة وعاينلي مبتسم فرحان وانه الضحكته اضــحك گال
-بس هذآ الالتحاق بدونج .
-النوب اضل انه احضر جنطتك
-هههههه اي تحمست ودي اغمض عين وافتح كاضيه هاي الايام.
ضحكت عيوني ضايعات عاين للدرب وشال ايدي يبوسها وشمس هم مدت ايدها باسها يضحك وكاض ايدي يعصر. اصابعي بين اصابعه جريتها من ايده بسرعة لمن شفت طــروادة وصيهد وسلطان رادين من الگيعان غطيت وجهي بالعباية وشمس تصيح
-خاالو... خالو.
وكف بريا سلم عليهم وانه مدري المن مغطيه وجهي گاله كهلان
-لا تبطون رنـــه عدها امتحان باجر.
بريا:: لا ماعدها باجر
-تحاضير اقصد
-دارستهن.
سلطان:: يله روحوا وجيب اليعجبك بريا ولا تكضك الفلوس اخوتك موجودين.
صــيهد:: ســليم الطاك يدفعلك اذا تحتاج
بريا:: الله لا يعوزني
طــروادة:: ليش ليش؟ رجل آختك المستقبلي مابيها شي يداينك وتردهن اله من يتزوج اختك شكو بيها؟
نزلت العبايه من عيوني اباوع بوجهم كهلان يشمر تمشر بالحجي سلطان يكح وصيهد متشمت.
بريا:: مثلك يعني؟ هسه من احتاج تدايني بعرسنا انا واختك؟
طــروادة:: لا ما اداينك، بس ســليم اليحب اختك ســليم ابن عمك تعرفه سليمنه اليحب اختك يداينك لان جواه هواي فلوس.
ضحك صــيهد وبريا شخط السيارة من يمهم يغلط عليهم
-لا تغلط
-خيولون جلبوا وين ما نكعد وكالوا ســليم شريف ســليم ما يكض السياج وصيهد يصيح ســليم ما يقطف ورد احمر شنّي ابتلينا كضينه السياج عليج چم سنة
حجاها والتفت عليَّ مبتسم طكيته على ايده اضــحك لمن وصلنه نزلت كاضه شمس من ايدها وبريا كضها من ايدها الثانية تمشينا سوه نعاين بالغرف وانه ما اعرف اختار بوحدي لو ما ادزن صوره بالگروب واخذ رأي البنات ما اقتنع افترينا هواي يراويني ويسأل
-هاه هاي ما تعجبج؟
-لا ما تعجبني.
مشينه لغير مچان وهم افترينا لمن ملينه أحتار وياي گتله
-افتحلي نت وخل اشوفن رأي البنات اذا اضل وحدي كلشي ما اختار.
مشه اشتره رصيد وفعل نت صورلي اكثر غرفتين عجبنه وودينتهن بالگروب مــاسه وماريا بساع ردن وكل وحده اختارت شكل شويه وريمه ردت كالت اثنينهن لا وندى انطت رأيها ورأي بــدور وعمه ايمان درت البريا گتله
-ولا وحده امشينا الغير مچان.
-تردين غرفه تركيا؟
-لا ما اريدنها انه اركع البيبان حيل ماتضل يمي شهر وافلشها.
ضحك دنگ شال شمس وكضني من ايدي امشي وياه مبتسمه افترينا هوه عجبته وحده وانه وحده صورناهن وديناهن للگروب كلهن اختارن العجبته هوه بس هوه ضل يمدح الاختاريتها انه عباله اضوج درت عليه كتله
-شبيك ما ضايجة جا صدك انه ما اعرف اختار سوالف البيت، يله خل ناخذ هاي.
اتفق وي الولد دفع فلوس وخلاهم يحلمونها يودونها للقرية واحنا مشينا اختارينا كاونتر گال المطبخ وسوالفه فلوسه من وهـــب وصيهد ابتسمت افرح من أشوفهم دائماً بهيج مناسبه يوكفون واحد للثاني.
صار الليل واحنا بعدنا ما كاضين تعبـــت حيل ضل عدنا هواي نقص كال كافي هاي المهمات على ذوقنا والباقي حتى لو الولد يشتروته.
ردينه للقرية لكيناهم شادين الغرفة ضل بس الكاونتر بعد مالحك هوه التحق ووصه الولد يكملون شغلات البيت.
اعاين لكهلان بالبداية جان ضايج بس من يشوفني احجي وي ريـــمه بحماس وفرحانه كام يفرح الفرحتي وكل يوم من نبدل نريد نروح للمدرسة يكلي
-دراستج دراستج اهم من بريا
-ههههه والله ما اهمل دراستي لا تفكر هيج.
هز راسه خوش كلنه مبدلين وواكفين بالحوش وريمه تفتر ورانه تريد نطلع كبل لا علاوي يكعد ويضل يبجي علينه، النوب ملت. من عدنا جابت تلفونها تصورنا وتضحك
شمس لابسه جنطتها الوحيده بينا متحمسه واحنا لو بأيدنا نرجع للمخده نركض اجه وهـــب اخذ حسين وزهره ووراها اجه خط شمس بس فتحولها باب السيارة كالت للبنات الموجودات
-صباح الخيرر.
ضحك السايق مالتها حجي جبير بالعمر واسمعه گال
الكهلان
-شتوكلونها من الصبح؟ اجيبهم طافين مناه لمن شمس تصعد .
ضحك كهلان يگله هيه تحب الروضه اخذها وراح ضليت انه متانيه اجت يمي بــدور لمن اجانه الخط مشينه ضل بس كهلان متاني جــويريه ام كرش وصيهد .
اول ما وصلنه للمدرسة بــدور تتلفت واكرصها
-ما يجي بعد لا تتلفتين.
-لا شبيج جاي اشوف الجو.
-اي هم صح.
ضحكت ومشينا سوا تغيرت نفسيتي من اجيت وياها بمدرستها عالم مايعرفونه ولا يعرفون احنا من يا سلف ومنين اهلنه، واحنا هم ابتعدنا ماصاحبنه ابد، وندرس سوه وحده تسوي واهس للثانية الحد امتحانات نصف السنة تعبـــت ومن جهه حسين وزهره ما اگدر اعوفنهم بس على ريـــمه لان ماتلحك امها ردت تمرضت وساعة يم الدكتور ساعة ينومونها مستشفى سمنت حيل وبدت تطلع بجسمها تقرحات.
بــدور حجت يم اهلها كالتلهم رنـــه تلتهي وي حسين وزهره ما رضن ندى ورغد كالن احنا ندرسهم وصدك كمت اوديهم يمهن ومن يرجعون كهلان يسويلهم مراجعه، رديت اركز بامتحاناتي وكضه حيلي لمن كضن
ومن اول يوم عطلة بريا گال
-الج خمسة ايام باليوم الخامس اجي وثاني يوم نمشي الكربلاء
خلانه نركض وما ملحكين انه وريمه وماسه وماريا يوميه بمچان ساعة بصالون ساعة بالسوك حظي طاح كرهت الزواج والزاد الطين بله من شيخ حيدر خابر صــيهد كاله بيت سيد عباس يردون يجون يخطبون، كاله عدنا عرس تسودنت مشيت الكهلان احجي
-مو أمشي الكربلاء وهمه يخطبون ترى اسوي فلك.
كهلان:: من تردون.
-آي عبالي.
عاينلي ما عاجبه درت وجهي مستحيه لان حافه ووجهي متغير گال
-هوه ليمت يجي بريا؟
-باجر.
-خير ان شاءالله
كمت من يمه طلعت للحوش يم ريـــمه نسولف على روحتنا الكربلاء، يمشون ويانه بيت مــيثم النوب يعوفونه ويردون واحنا نضل يومين بكربلاء وراهنا نمشي البغداد هم نضل يومين ونرد الاهلنه بس ضليت ضايجة لان تمنيت ريمه التروح وياي كالت
-مــاسه ماتقصر وتدرين بيه لو اگدر والله ما اعوفنج.
هزيت راسي اي متحسره، بريا وصل الصبح وهم ولا ارتاح خلصها يركض اشتره هدوم راح للحلاق ولا شفته، ريـــمه حضرت غراضي وماسه عدها الفستان والعبايه البيض الالبسهن غاد كالوا الفجر نطلع نمت بين شمس وزهره گـــلبي يدك حييل وزهره تضم روحها بحضني وتشمني من كل گلبها بلا ما تحجي شبگتها ابوسها واحاجيه
-ما ابطي زهرتي وريمه گالت انه انامن يمهن
ابد ما حاجتني اسمع شهگتها وگلبي يوجعني ضليت شابگتها الحد ما نامت وانه گوه غفيت ما كعدت الا على ايد ريـــمه تدغني بجتفي وتهمس
-رنـــه.. رنـــه... عروستنا.
-هممم.
-كومي هم يله على ما تسبحين وتبدلين يجونج.
كعدت على حيلي كوه فاتحه عيني وهيه جابت شالي جان مشرور على الباب طبكته وخلته بالجنطة ورجعت علي جرتني من ايدي كمت وياها اخذت هدومي وطلعت لكيت كهلان واكف بالمطبخ يسوي ريوك غطيت هدومي عدل كح ودار وجهه مشيت للحمام بساع سبحت وطلعت اركض للصوبة واسمعه يحجي وي ريـــمه ما راضي
-توازت سبحت بارده وهسه تتمرض.
-تلبس هدوم ثكيله وتدفى.
سكت ضلوا يحوسون بالمطبخ اثنينهم شويه واجوا جايبين صينية الريوك كعدوا يمي گال
-تريگي خاطر لا تجوعين بالدرب.
ريـــمه:: حتى لو جاعت تاكل ترى ما ماخذينها يحلفونها.
تحجي وگوه كاضه ضحكتها وهوه يدور عيونه منها ما راضي تريكت وياهم ساكته مستحيه من كهلان كام غسل كرصت ريـــمه
-ليش تحرجيني گدامه.
-هههههه ولج ليمت شگلت؟
-مستحيه منه احس اريد اغطي وجهي.
وهي تضحك وتغمز كمت غسلت ومشيت ابدل اجت وراي تساعدني وتنتبه خاف انسى شي شويه ودك الباب طــروادة وكفت متوتره ومنحرجه طب للغرفة عاين بوجهي عيونه متروسه دموع وانه بس شفته دنگت مختنكه جن مدري وين رايحه ولا چن بيني وبينه حايط وبنصه باب.
وكف گدامي وزفر نفس بحسره شلت راسي اعاين بوجهه مدلي علبه حمره صغيرة اخذتها من ايده
-الله يهنيج ويسعدج حبيبتي.
بس رمشت طاحن دموعي جرني الحضنه شابگني بكل حيله يهمس
-يا روحـــي يا عزيزة ابوي وعزيزتي الله يسعدج ويهنيج .
ريـــمه:: كافي رنـــه مو زين تبجين شسالفة.
وخرني من صدره لام وجهي بين اديه والدمعه تتلولح برمشه باسني بين عيوني
-ديربالج على روحج.
مسحت عيوني اهز راسي اي وهو دار وجهه ومشه الغرفته ريـــمه مشت تحجي وي مــاسه من خابرتها وانه دنگت ابجي وابوس بزهره وشمس مدري شجاني جن راح افارگهن شهر مو جم يوم، طلعت من يمهن للدوانيه دنگت على حسين بسته غطيته وطلعت ريـــمه كاضه جنطتي وواكفتلي بالهول جانت تضحك عليّّ ومن صارت صدك بجت شبگتني حيل
ريـــمه؛: والله فرحانتلج من كل گـــلبي بس مدري ليش جاي ابجي.
وانه دموعي يجرن وولا اگدر احجي، دكوا الباب وخرت بسرعة مسحت عيوني وطلع كهلان شال جنطتي وحط ايده على جتفي طلعنه من الحوش بريا بسيارة وهـــب وميثم وعائلته بسيارته. وكفوا گدامنه اثنينهم كهلان يحجي وياهم وانه التفتت الريمه اوصيها على حسين والبنات، وهيه تمسح بعيونها وتهز راسه اي، جراني كهلان عليه اكثر يوصي بميثم وبريا
بريا:: انا ما ماخذها منك حايط على حايط وتضل گدام عيونك.
كهلان:: ميخالف انا جاي أوصيك، اعز منها ما عندي يوم التغلط وياها احسب روحك خسرتها وخسرتني لان اخذها منك وما اريد اعاين بوجهك.
مــيثم:: لا يابه شحده يغلط وياها غير اموته.
وبريا مبتسم ويهز راسه موافق ردني كهلان الصدره شابگني حيل ويهمس بأذني
-ما اوصيج بعد حبيبتي يابه.
وانه حجايه ما تطلع من عندي مختنگه ودموعي امسحن ويردن يجرن.
شال ايدي حطها بأيد بريا ويوصيه يدير باله من الطريق مشيت وي بريا ابجي واتلفت ضل كهلان واكف بالباب وريمه وراه تعاين من الباب صعدت بالسيارة وعيني عليهم لمن بريا افتر دكلهم هورن شال أيده كهلان مادرت وجهي لمن گمت بعد ما اشوفنهم.
بريا:: اشش كافي رنـــه صدك جذب ولج يومين تلاثة ونرد تكابلينهم عليمن البجي.
-بس أسكت اسكت
-شبيج؟؟
درت وجهي للجامه لافه روحـــي حيل ارجف من البروده وابجي، سكت فترة ومد ايده على ايدي
-رناتي.
درت وجهي اله عاين لعيوني ورد عاين للدرب
-كافي بچي
هزيت راسي خوش امسح بعيوني عرفني مطنكره سكت من عندي لمن صار الصبح ووكفنا حتى يجيب ريوك من بيت مــيثم يله شويه فكيت ورديت اضــحك.
نزلت وياه ماريا نزلت تحرك برجليها وتضحك تگله
-بريا اجي يمكم بالسيارة؟
-لا ما نرريدج.
يشمر عليها ويضحك لان مساع كايللها تعاي ويانه ماراضيه
مــاسه سوتلنه لفات وصبتلنه چاي وكفت يمها فاتحة باب السيارة واحجي وياها والولد واكفين على صفحة يسولفون گالت
-عليمن تبجين؟
-ما ادري والله على اهلي لا تذكريني ارد ابجي.
ماريا:: شنو شعورج وانتِ اليوم يوم زواجج.
عاينت بوجها مبتسمه وحجيت همس
-معليج خليها مفاجأة تجربينه بيوم عرسكم انتِ وو..
غمزتلها بلا ما اكمل الاسم وهي وماسه اثنينهم صاحن
-اششش.
وعاينن الميثم مرتبكات.
مــاسه:: ولج لا يسمعج
-حتى لو سمعني مــيثم عاقل ما يحجي.
هزت ايدها تضحك
مــاسه:: عاقل وطيب وحباب وكل الحلوات بيه بس يا يمه من يعاند ويقفل على سالفة يممه ولج گـــلبي شلعه.
-والله توقعت كلت هو وين اكو واحد بيه دم شعلان صاحي وما مسودن.
ماريا:: ملاحظة حتى حفيدات شعلان مجنونات
مــيثم:: يله بويه كضيتوا؟
سكتنا من اجه مــيثم وانه أأشر على ماريا انتِ المسودنه وانه اعقل وحده تضحك عليَّ.
صعدت بالسيارة عاين بوجهي ابتسم ومد ايده يكرص خدي
-اي هسه الوجهه ضحك.
-هههه.
-الخايسه خرعتني جبت الدرب افكر شمسويلها وگلبت خلقتها.
-هههههه والله من البارحة كلساع ابجي عبالك مدري وين رايحه.
-لحضني وين رايحه قابل.
-هاه بريا؟
-هااه؟
-شني هالحجي؟
رفع حاجبه يضحك هز راسه خوش ورد يعاين للدرب اخذتلي شويه اسولف وياه ساعة اتغزل بيه ساعة اتعارك النوب نعست نمت ويفززني من يحط اصبعه بحلكي عاينتله استغفر
-شسالفة.
-اكعدي سولفي وياي نعست لا انامن.
-عووفني شويه بعد.
غطيت وجهي بالعبايه توني غفيت ولزم بريك بقوة فززني ويضحك عليَّ بعدني اريد اتعارك وياه وخابره مــيثم رزله كلب وجهه زعلان بعد ما گدرت انام.
ضليت افتح حلويات وانطيه يهز راسه ما يريد اكلهن انه واعاينله ضاج
-اخوك واذا رزلك؟
عاينلي ما عاجبه ورد يعاين للدرب فتحت نستله جديدة عضيت منها ومديته اله عض منها ساكت
-يله اضــحك كافي تسوي روحك زعلان وانتَ گوه كاض ضحكتك.
-هههههه كله منج
ضحكت شويه وخابرتني ريـــمه كالت
-شمس تريدنج
بس گتلها الو كالت
-وين رحتي.
-للزيارة.
-ما كتيلي
-مو جنتي نايمه گتلج وما سمعتيني.
-هااا جا خاله
-عيون خاله
-جيبيلي لعابه.
-تدللين عساج على لعابه
ضحكت وسدت التلفون بوجهي، تعبـــت لمن وصلنه كبل اجرولنه فندق غرفتين غرفة انه والبنات وغرفه بريا وميثم گالوا نرتاح بيهن للعصر نروح نزور .
تمددت على الجرباية وماريا بصفي تعبانات وماسه ترتب الاغراض وطلعت وي مــيثم يجيبون غده، نمنا انه وماريا وحور منا لمن كعدتنا مــاسه صلينه الظهر واجوا الولد يمنه تغدينا سوا وبس كضينه غده مــيثم طلع كالت مــاسه راح يشوف مصورة ويأجر غرفة بغير فندق تعب ويانه حييل.
بريا مشه الغرفتهم يبدل وانه هم بدلت مــاسه وماريا عايفات روحهن ومحتارات بيه وبمكياجي يرتبن ويعدلن
-خفت خفت
مــاسه:: انجبي بس لا تكضينها هيج عيشي اليوم وجن ماكو اي شي.
-صح يله خوش
غمتني تضحك وكفت اعاين الروحي بالمراية فستاني الابيض وحجابي ماريا تعدل بيه وترتبه وماسه احتارت بالعباية البيضة لان ماگدرت اكضها بدون ردانات تطيح من عندي ثبتتها داير ما داير الحجاب ببروشات وضيعتهن وي التطريز ضحكت وانه اعاين بالمرايه فرحانه بشكلي وكلش عاجبني مثل ماردت واكثر
وكفت مــاسه تصورني متخرذله ومتوتره اكثر من عندي ندك باب الغرفة وركضت ماريا فتحته طب بريا مبتسم ويعدل بردن السترة وگفت عدل مبتسمه وماسه تهلهل بصوت ناصي تقرب يمي وانه ضاله ثابته بمچاني بس مبتسمه ما ادري شني الاسويه باسني براسي يضحك وماريا ركضت الجنطتها طلعت الساعة واجت نزعته ساعته ولبسته هديتها وكفنا سوه وماسه تصورنا وتودي الريمه لان ضلت بقلق ومتندمه لان ماخلت رغد يم امها واجت وياي.
ضلينه متانين لمن اجه مــيثم تعبان وجايب بوكيه ورد طبيعي غم بريا يحجي
-حتى هاي نسيتها هاج خويه.
اخذتها منه مبتسمه وحور دگت روحها تريد وحده من الوردات گال بريا
-تنطينها وحده.
-لا.
-عبالي عروس وتنحرجين وتستحين وتنطينها الها كلها.
-هههههههه.
شالها مــيثم يضحك طلعنه من الفندق مــاسه وماريا يصورن كل خطوة صعدت بالسيارة اخذت الدرب اصور مبتسمه واعاين بوجهه الفرحة تارسه عيونه ومن حماسه كلساع يبوس ايدي انحرجت گد ما باسها هم جريت ايده وبستها ضحكنا اثنينا
بريا:: لا تتوترين صيري سباعيه
-انه ما متوتره شسالفة قابل اول مره.
-شني؟
-اجي ازور شبيك قابل اول مره.
ضحك يهز راسه متحلف، مــيثم والبنات وصلوا گبلنه وماسه تعاين الميثم من يخابر المصوره المتفق وياها. وتغطي وحها بالعبايه تسوي روحها تبجي لمن أجت البنيه صورتنا فديوهات وصور سوا زرت من بعيد گال بريا
-باجر بالليل اجيبج تزورين.
-ان شاءالله... لان اذا تضل علي هسه اروحن اغسل وجهي واطب للصحن.
ضحك يعصر اصابعي بين اصابعه بدلنا مجان الحلقات ورغم المصوره تاخذلنه صور مــاسه وماريا هم يصورن وميثم كاض حور ويعاين علينه بفرحة مبتسم صورنا سوا وصور هو وبريا وانهه والبنات لمن صار الليل يله المصوره راحت واحنا طلعنه .
مشوا ويانه للفندق الجديد بس وصلونه ومن نزلنا نزلوا وكف مــيثم گدامنه يتباركلنا ويحاجيني
-انا هم اخوج احسبيني كهلان وشني التردينه يجرالج ولو بريا ضوجح اكسرلج ظهره.
ابتسمت اعاين بوجهه
-تسلم.
بريا:: يگلها اكسرلج ظهره تگله تسلم.
ضحكوا اثنينهم سلم عليه ومشوا رادين للفندق الاول واحنا صعدنا للغرفة الحاجزها النه مــيثم، دخلت مبتسمه افتر بيها تخبل وخرت العبايه نن عندي والحجاب
وافتريت اعاين بيها مرتبه بيها شموع وورد بريا طلع يجيب اغراضنا وانه اصور بالغرفة واودي الريمه گالت.
-مثل ما وصيتج رنـــه اسبحي والبسي الهدوم الگتلج عليهن وعيشي كلشي بتفاصيله بدون خوف.
-هاه نو أنه نعسانه كلت اتعشى وانامن.
-فنج الا أطيح حظج
مارديت عليها قغلت التلفون لمن طب بريا گال
-شمخليه بالجنطه ما تنشال.
اخذتها منه فتحتها اطلعلي هدوم وهو ذب سترته وقميصه يحجي ويسأل
-تتعشين هسه جوعانه؟
-لا اريدن اصلي هسه وبعدين نتعشى اكلك يجيبولنه چاي؟
-اي طبعاً
-اي خوش لان راسي ضل يوجعني.
عٌآيّمَ بوجهي عصرت راسي مناه ومناه گالَ
#يِّتّبِعٌ_تّګمَلَةّ_آلَبِآرتّ#تّګمَلَةّالبارت_85
#أرض_الـــــخناجر 🗡️
_هسه_وره_الصلاة_انزل_اجيبلج
حبوب_من_الصيدليه
هزيت راسي خوش... متوتره ومستحيه منه عبالك اول مره اشوفنه بس امثل على اساس ما مهتمه ولا شي والوضع عادي، دخلت سبحت وطلعت صليت وهو سبح وراي وتانه لمن كضيت صله وراي رتبت غراضي بين ما كضه صلاة كام وياي يسولف عادي ويعدل الاغراض وياي تمشيت من يمه اريد اشرد توترت.
مد ايده بسرعة وجرني شابگني من ظهري ضام وجهه برگبتي رجف جسمي وگلبي يدك حييل وهو يبوسني ويهمس
-لا تشردين من يمي.
غمضت عيوني وجهي مصخن وعقلي كل تركيزه وي شفايفه الدافيه ونغزات شاربه التمر على جلد رگبتي فزينا اثنينا من اندك الباب وهرت من يمه گوه اتنفس
مسح وجهه ورگبته مشه للباب فتحه وجاب العشه
-تعاي حبيبي
تمشيت يمه يرتب الاكل على الطاوله مبتسم كعدت گباله غير الموضوع وضل يسولف على الاكل واجاوبه والح
-اهم شي الچاي.
-ههههه شعنده كهلان كل ما يتنفس يشرب چاي
-گبل جنت ما احبنه هسه صايره اتسودن عليه.
-صار صار هسه اجيبلج چاي وتدللين
-واجبك حبيبي
عاين بوجهي يضحك
-شبيج انتِ؟
ضحكت اكل
-شبيه جا صدك واجبك يعني شني؟
-واجبي وتدللين.
سويتله بوسه مبتسمه گال
-ما اريدن بالهوا اريدن حقيقية.
-اكلهم والله طيب.
-اي صح.
-اي.
ضحك ودنك ياكل شويه وبدت الرسايل تدك بتلفونه، الولد نشروا صورته يتباركوله واصدقائة يراسلون گتله
-ها جنت تكلي الا عرس حتى الوادم تدري بيه تزوجت، هاي منشور واحد كلها درت بيك.
-مــيثم نشر
-خطيه مــيثم حسيته چن ابو فرحان بأبنه عيونه مدمعه.
-فـــدوه اروحنله.
ابتسمت وگمت اغسل اخذوا الاغراض وطلب چاي بس طلعت لگيته يمه كعدت على الكراسي گذامه اشرب وهو التهى بالتلفون جريت الكرسي وكعدت بصف اعاين وياه تعب گد ما رد گتله
-لا ترد محد يعتب عليك يدرون اليوم زواجك وملتهي.
شال راسه عاين بوجهي بدون ابتسامه وانه اردد الجملة براسي واعيدنها اقيس اذا بيها جفصات ماكو رد عاين بتلفونه وداله مــيثم رسالة
-طفي النت عوف الوادم واذا ضايجين اطلعوا تونسوا.
عاين بوجهي يسأل
-نطلع؟
-لا والله راسي يوجعني اريدن انام.
-هسه تنامين؟
تحمحمت ودنكت ارفع اجتافي ما ادري گال
-خل انزل اجيبلج حبوب راس
هزيت راسي خوش بدل وطلع ركضت للتلفون كتبت الريمه
-راح اموتن استحي استحي لابسه دشداشه وكاعده يمه والله ارجف لو بس يريد يكض ايدي
وديت الرساله اكل بأظافري فتحت عيني وسهكت مصدومة من لكيت الرسالة كاتبتها بگروب البنات ووي صدمتي دك التلفون بأيدي فززني رديت عليه متوتره
بريا:: ها رنـــه راح ابطي شويه مو تخافين
-ييمه وين رايح؟
-مالكيت صيدلية هناه
-خيولي تعال ما اريدن.
-لا شلون هسه الكه واجيج .
سديت التلفون منه صورت الرسايل حركني وكلهن متفقات على نفس النصيحة ولازم باول الرسالة امداج ، ولا تتوترين وتخافين اخلص من الصعب راسلتني على الخاص جاوبتها متوتره گالت.
-انتِ بكيفج بعد بس بريا يستاهل تعوضينه صبره وانتظاره وهم انتِ ترتاحين وتخلصين ما تضلين خايفه وتفكرين، صلي على محمد وكومي البسي وادعي ربي يسهل عليج، هاي سنة الحياة رنـــه واذا تم دواجك اليوم لو باجر هو وراح وراج.
-مستحيه.
-بس بالبداية، اقري الفاتحة الام البنين وان شاءالله تسهل.
-ان شاءالله.
عفت التلفون وگمت بدلت لبست الروب الجابته ريـــمه حلو ومو فاضح ، عاينت بالمرايه رتبت شعري وحطيت حمره وعطر اطكطك بأصابعي وادعي ، فزيت على صوت التلفون جاوبته اتحمحم گال
-اجيت خوما خفتي.
-ها لا
-يله هاي راح اوصل.
سديت التلفون رايحه روحـــي وگلبي يريد ينفجر من صوت دگته اهفي على وجهي رايحه روحـــي واعاين لهدومي متندمه شسوي هسه شسوي، وكل الاجه ببالي تمددت بالگاع وشمرت شعري على وجهي على اساس مغمي عليَّ.
ثواني عدن وطب للغرفة يتغزل وبس لمحني صيح بفزه
-رررنه.
واجه يركض وانه من الهبطه حسيت صدك راح يغمى عليَّ.
جر راسي الحضنه ويطك على خدي متخرذل من الخوف حرت افتح عيني واطمنه لو انطم واضل مغمضه وفجأه سكت انخمش گـــلبي
شالني من الگاع للجربايه مشمره ايديي مناه ومناه حتى لا يكول كاعده عافني على الچرباية وغطاني حسيت بيه من طفه الضوه العالي وضل بس الخافت فتحت عيني لمحته ينزع بقميصة ظهره عليَّ وبس التفت غمضت عيوني وهو يهمس
-يا روحـــي من الوجع اغمى عليها.
بلعت ريك ساكته اريد اتحرك احس لان تقديت كل جسمي كام يحكني ونمل ، فجأه حسيت تمدد بصفي وتغطه وياي درت وجهي عليه فاتحة عيني واحجي
-هاه؟
بريا:: هاي شنو كعدتي؟
- احم وين انه ؟
-ببيتا تعاي الحضني تعاي.
جرني الصدره ودنك يبوس خدودي وداير ما داير شفايفي
-بريا
-هم
-أستحي والله.
ضحك وهر الغطا من وجهنه احس نار تطلع من وجهي مسح على خدي يعاين بعيوني
-جا هيج هيه رنـــه؟ تستحين تسوين روحج طايحه قطرة دم ماضلت بيه.
-صدك جان مغمي عليَّ ما اجذب.
-اممم
-صدكني من الخوف اغمى عليَّ.
-شنّي متزوجه طنطل؟
-نسولف بالطنطل؟ شياكل هوه؟
احجي اريد سالفة اجلب بيها والهيه ضحك من كل گلبه ودنك يبوسني بشفايفي يهمس
-ياكلج.
-بريا.
همست ارجف رفع وجه يعاين لعيوني ويتلمس خدودي بأطراف اصابعه
-روح بريا دنيتي كلها.
-كهلان وصاك عليَّ
هز راسه اي مبتسم تمدد بمچانه وجرني الصدره شبگني ساكت من حس صدك متوتره ومو مجرد دلع، ايده بشعري ويسولف وين نروح باجر ومن نمشي البغداد اندمجت اسولف وياه وهو يحضني اقوه ويقربني الصدره اكثر
-ببالج نروح بعد غير مچان؟
-لا هوه بس بغداد نروح نزور وتاخذني الهذا الجسر البيه طيور النورس
-صار
ابتسمت وقربت شفايفي الرگبته ابوسه تحرك عاين بوجهي تقرب يبوسني بنفس المكان وبنفس الطريقة عاينلي مبتسم غمضت عيني مستشعره دفوا لمسته وهدوئة
وعقلي مندمج وياه ووي صوته من يهمس اسمي بأذني ويتغزل بأرق الكلمات يحتضني بلهفة وخوف وايده تتفتل على جسمي بحب وشوگ.
كلشي بوجوده يختلف وكل دقيقة تمر بيناتنا خلدها عقلي .
اضم وجهي من عنده بصدره ويضحك يبوسني ويلمني على گلبه
-كلشي حلو يبدي وياج
غطيت وجهي بأيدي جرها يبوس اصابعي وزفر نفس براحة وحتى من اعرف بيه مغمض اغطي وجهي مستحيه من نفسي وولساعة بتلاثة ريـــمه كاعده بالها يمي صورتلها ايدي علامة انتصار ماتت من الضحك
-طاحظج.
-فكرت بشي اذا اخنك بريا هناه واطلع ياهو راح يدري بيه؟
-دهر الدهرح ودهر افكارج نامي رنـــه.
-اصلي الصبح وانامن.
-خوش.
وصدك صلينه الصبح ونمنا عود مخططين نكعد على وكت ونطلع نتونس تالي ولا رضيت اكعد لان نعسانه
-حبيبي رناتي.
-هممم.
-يله كافي اكعدي
درت وجهي منه متغطيه اكرهه روحـــي من واحد يكعدني من نومي.
دنك يبوس خدودي ويعصر خشمي
-يله بدويتي حتى بالليل تنامين على وكت ما تسهرين.
-خرررب ان.
كعدت ارطن وهو وخر من يمي يضحك ويحلف يصورني ويراويها الماسه، طبيت للحمام مطنكره لمن غسلت وصحصحت طلعت عاينتله كاعد يتباع تلفزون تقربت يمه شبگته من ظهره وبسته بخده
-صباح الخير.
جراني من ايدي الحضنه
-يا صباح العافيه
سندت راسي على صدره مغمضه وخرني بسرعة متحلف
-اموتنج اذا تردين تنامين
مسحت عيوني مبتسمه كعدت عدل تريكنا وطلعنه افترينا والعصر مشينا للزيارة ودي اضل كاعده طول عمره گبال الصحن، الحد الليل يله رجعنه على اساس الصبح نطلع البغداد خابرونه گالوا
-باجر خطبة بــدور.
-شني السالفة حا مو كلتوا لمن نرد؟
-الساده عدهم دورة سنة عمهم بعد چم يوم ويردون گبلها.
متت من القهر وطنگرت گال بريا
-الفجر تطلع نوصل اهلنه بالعشرة بهدعش گبل الخطبه، والنوب على اجازتي التجي اخذج البغداد شتكولين؟
هزيت راسي خوش وجريت تلفوني متحلفه ببدور خابرت ندى گتلها
-وين ام خنيس
-هاي هاج.
بــدور:: الو
-وحمس حيوانه تنحطبين وانه ما موجوده.
-والله ابجي عليج من الصبح الهسه رنـــه كلشي صار ركض والله كلشي ما فاهمه وصيهد اعصاب ما راضي على استعجالهم وتعاي شوفي بيتنا شلون مخبوص.
-راح اجي باجر
-جذابه!!!
-وعلي الفحر نطلع
-يمه علمودي؟
-اي جا علمود السيد
-يمه وعلي احبنج
حجتها تبجي وانه اضــحك عليها
-نجبي يله.
بدور:: مسحت عيوني اضــحك سديت التلفون منها ودرت الامي احاجيها
-راح تجي رنـــه يطلعون الفجر.
-يااا خطيه ليش ما گتيلها لا تجي.
-لا يمه اريدنها.
سكتت من عندي كمت وي البنات مخبوصات بالتنظيف وصيهد ما يتحاجه شلون كالهم مو هسه وهمه اصروا الا هسه صاحتله امي دنكت عبرت من يمه ساكته طب الغرفتها وسد الباب اجت جــويريه بساع حاطه ايدها على بطنها ورغد اجت تركض وكفن يم الباب وانه هم وكفت بصفهن اتصنت امي تعاتبه على عصبيته وهو يگلها
-خبث وياي سيد عباس
-ولك يمه سااده لا تغلط
-يمه جا هسه انا مجذب شد خباثة وياي وعنااااد الخايس.
-يا يييمه دهر الصابك ولك سيد.
-جا شني، دخيل جده هوه يجبرني والحسين لو ما بهذلت سيد جعفر اذا ما غطيته بالنهر انا مو صــيهد
-بطل هاي سوالفك اختك هم هاويته.
-فنهااا.
-شني الفنهاا شني؟ حجوا بيها وضل ببالها شافتهم رايدينها وكتلوا ارواحهم عليها هوته
-جا لا تكليلي انا گـــلبي . محترك وانتَ تمردين بيه صدك جذذب.
يحجي بحرگه ونسمع بس قوت الطكات ما ادري امي تطكه هوه يطك روحه گالها
-هسه گدام الوادم اسرط عليهم تجضي كليه يله ياخذونها.
-وحك ذاك الحسين يكون احجي وياك لو سويتها
-اختيي يمه اختي شني السالفة.
-جا شني بس انتَ عندك اخوات؟ شمالك جنك مسودن؟ متعجب يزوج اخته بعيد عنه الوادم انطت بناتها الغير دول.
-الوادم عدها گلب يصبر انا گـــلبي انا ما اگدر.
-لا تكسر فرحتها صــيهد يبعد امك .
سكت مده وبس حسيناه كام طشينه شاردات كل وحذه بصفحة طلع مت الغرفة عاين بوجهي غماني ومشه والبنات يضحكن، صعدت للغرفة اركض تمددت بفراشي ساعة اضــحك ساعة اتوتر واخاف مدري شلون نمت وكعدتني رغد من الصبح حتى نروح للصالون
-شو خفت يصير ابطل؟
رغد:: كومي لا الزكج بالگاع.
كمت بسرعة اعاينلهن كل وحده تركضلها بصفحة مستعجلات ودانه وهـــب للصالون انه ورغد واجت اخت السيد المتزوجة بالمدينة، انها منطيتها رقم رغد وخابرتها، سلمت عليها متوتره وهي تصلي على محمد وتحمد بأخوها واهلها انه ساكته ورغد ارد بمچاني ضلت يمنه ساعة ومشت.
ضل بالي يم رنـــه ما ادري بيها اجت لو بعدها بس عافتني ام الصالون شويه عاينت الرغد احاجيها
-خابري رنـــه شوفيها اجت.
مدتلي التلفون خابرتها انه وعيني للساعة صارت بهدعش شلعت گـــلبي يله ردت
-الو ها رنـــه شلونج
-هلا رغد
-ولج انه بــدور
-هلا بيج ها وين انتِ؟
-بالصالون وانتِ اجيتي بعدج؟
-هسه راح اوصل للقرية ربع ساعة بعد.
-ها خوش يله جا اشوفج ببيت اهلي
سديت التلفون منها رديته الرغد بين ما كملن المكياج والولد كلساع يخابرون على رغد صارت اعصاب وخلتني اتوتر اكثر عاينت بوجها احجي
-على كيفج رغد.
رغد:: مسحت وجهي اهز راسي اي حركوني حرك يله ما يله على اساس. بأيدي، عدلت بدلتها ورتبت شعرها عاينتلها گـــلبي يدك حييل مبتسمه والدمعه تارسه عيني مدري ليش ما جنه مخلينه على بالنه يجي يوم وتتزوج ابتسمت تهز راسها تسأل
-طالعه حلوه؟
مديت ايدي اعدل كذلتها
-تخبلين والله هنيال السيد بيج.
ضحكت بخجل متوتره خابرني وهـــب گال
- يله بالباب انا اطلعن.
غطيتها عدل سلت غراضنا وطلعنه بس فتخت الباب صار بوجهي مدلي بشت يغلط على صــيهد من وجهه عرفتهم متعاركين لازم ضروري عركتهم من مراسيم كل مناسبة ابد ابد ما يعدونها بدون عركه.
غطيتها وطلعت صعدتها بالسيارة وصعدت گدام يم وهـــب گالها
وهـــب:: بله خل اشوفن وجهج.
شالت الكبوس من راسها وعاينت بوجهه مبتسمه عاينلها هز راسه اي ررد يعاين للشارع عگدت حاجبي مستغربه. من حسيته يريد يبجي ومدري شلون صبر روحه لمن وصلنه البيت اهلي لگينه رنـــه والبنات گدامنه وبدور عافت الكلب وشبگت رنـــه مكيفه شلون اجت علمودها، سلمت على رنـــه اتباركلها ومالحكنه نرتاح گالوا وصلوا بيت سيد عباس انخبصنا متخرذلات وبدور تحلف بينه نصعد نصورهم من السطح
اخذت ما يا وصعدت فوك اصورهم من الشباك سياراتهم ترست قريتنا والساده والشيوخ الجايبهم منظرهم يقشعر البدن كالت ماريا
-هاي حتى خاف صــيهد يريد يتراجع لو يحطله شرط فنه التنفس يمهم بس يكح يكلوله مع الاسف تردنا.
-ههههه اسكتي هسه يجينا مدخن
-هو اربعه وعشرين ساعة مدخن رنـــه تكول مشعوط.
طكيتها على ايدها اضــحك نزلنه جوه سلمنه على العلويه والبنات، وهنه جايبات وياهن بعد اغراض رغم احنا مرتبين الميز هنه رتبنه اكثر، وكلساع وحده بيهن تبوس بــدور حييل فرحانات بيها وبدور وجها ينطي الوان من الخجل، كومناها لباب الدوانيه من رادوا يعقدون وتأشر الامي تريد تبجي وتسأل شگول نعلم بيها وهي انتهت گد ما توترت تريد تبجي، عقدوا ورجعناها المكانها مشغلات مولد ويصفكن اخواته ونسوان گرايبهم
لمن كالوا يطب الولد يلبسها الحلقة شالت راسها بخوف تهمس
-غطني.. رغد مــاسه غطني.
وتأشر تعالن من كل عقلها كالتلها امه
-صار زوجج يمه ليش تتغطين؟
عاينت بوجها الفطيرة ساكته شويه ودخل سيد جعفر رافع راسه بس منزل عينه حتى لا يلمح وحده بينا متوتر وكل شوي يمسح كصته ويعدل شعره كالت ندى
-هو ضعيف وطويل وهي كصيره وجاي تسمن
-بعده بداية العشرينات اخذيلج سنتين بعد يتغير شكله كله
-اي والله صح
مشن اخواته يباركله ويسلمن عليه واختي كد ما مدنكه راسها راح تنگطع رگبتها مشيت يمها احاجيها شالت راسها تعاينلي وتأشر بحاجبها ما فهمتها
بــدور:: غير لو وحده منهن تنتبهه وتساعدني ارفع البدله واغطي صدري ولا التفتت عليه ولا شفته حتى ما ادري شنو لابس ويا لون. روحـــي رايحه وبس مدنكه تحمحم يحج وي امه كاض الحلقة ويگلهآ
-جنها چبيرة.
-لبسها واذا چبيرة نبدلها بعشرة تدلل حمامتك.
وانه ادوره وجهي الاهلي اسوي روحـــي ما اسمعهم ورغد تسحك برجلي وتهسم "مدي ايديج دور عليهم "
التفتتت الهم مديت ايدي الترجف گـــلبي يدك بقوة مد ايده الايدي كضها بكل جفه يحرك ابهامه على ظهر ايدي وبأيده الثانية لبسني الحلقة شلت راسي متوتره بس عيوني لمحنه ودنگت عصر اصابعي بين اصابعه وعاف ايدي وفاطمة خلت الحلقة بين اصابعي حتى البسها اله درت عليه ماده ايدي واعاين الاديه عايفهن بحضنه ما انطانياها
شلت راسي أعاين بوجهه لگيته يعاينلي وبس صارت عيني بعينه ابتسم ومدلي ايده دنگت ايدي ترجف ومن ردت اكض ايده حتى البسه الحلقه عصر اصابعي ورد فتح ايده حطيت الحلقة ياصبعه وزفرت نفس براحة ماضلت هالراحة غير ثانية وانتهت لمن امه طلعت گلادة وتراجي
عاينت الرغد اريد ابجي والله مستحيه شلون افهمهم زلمه لا اعرفنه ولايعرفني فجأة كعدت يمه مصلخة ويلبسني ذهب هاي شني
وياهي الاعاينلها من البنات تخزرني ما راضيه يشوفنها سهله بعد لان عبرنها.
حاجتني امه
-خلي يلبسج التراجي يمه.
قربت راسي اله. مدنگه واحس بأيده نزلت على كذلتي وبعدت شعري من اذني ورگبتي الوره ظهري تقرب يلبسني الترجيه مايعرف فاطمة ساعدته ومن راد يلبسني الثانية صار وجهي برگبته وكل ما اتنفس تنترس ريتي بعطره احس بروحي وجهي صخن وگلبي كلها تسمع صوت دگته لبسها. واخذ الگلاده قرب روحه يلبسني حسيت روحـــي بحضنه وشوي بعد يشبگني غمضت عيني ارجف. هنس يم اذني
-مبارك حمامة السادة
وخر شويه عاين بوجهي عيني بعينه متوتره وهو مبتسم
-الله يقدرني واسعدج
ايمان:: الله يهنيكم ويسعدكم يمه.
تشكر من امي وصاحوا عليه طلع هفيت على وجهي متوتره واخواته يصورن ويضحكن اجت ريـــمه يمي باوستني تريد تروح جلبت بأيدها
-ليشش؟
ريـــمه:: امي بالمستشفى عفت يمها خالتي واجيت شفتج وسلمت عليج هاي هيه بعد
تحجي بتعب مقهوره وصت رنـــه ومشت وهمه هم بساع بس عقدوا كالوا سله وكفت اسلم عليهن وحده وحده عافن الهدايا الجايبيهن يم امي وطلعوا ضلن بس بناتنا تمددت بالهول انه وبدلتي مهبوطه ورنه تهفي عليَّ تضحك
-گويم لا الزگج بالگاع عفت عرسي واجيتج.
-اردها الج والله.
رنـــه:: ضحكت اطك بيها كعدت على حيلها بس سمعت صوت صــيهد. طب للهول عاينلها وجهه مايكصه السيف زفر نفس مسح وجهه وفتح ايده الها مشتبه بساع شبگها مختنك ويباركلها گوه على روحه باسها براسها
صــيهد:: الله يسعدج ويهنيج.
وهيه من التوتر حتى ما ترد عليه، عفت البنات يمها وطلعت. اخذت الجهال ورديت البيت اهلي تعبانه سبحت وتمددت يم البنات خابرني بريا يسأل
-وين انتِ حبيبي.
-ببيت اهلي يم الجهال.
-خوش عاينــي انا راح اروحن الولد صاحبي مسوي عملية اسلم عليه واجي.
-براحتك.
سديت التلفون منه احجي وي زهره وشمس شويه واجت يمنه هاجر عيونها منفخة وما تحجي شي كابلت علي وكعدت ساكته.
بالليل خابرني كهلان ضايج
-ها شكو.
-ميلاد مو زينه اضن راح يبترون رجلها الثانية.
-ياااا.
-والله وهاي ريـــمه فلشت گـــلبي على ساعة يصير بيها شي.
-جا الولد وين؟
-موجودين يمها هم من الصدمة مايدرون شيسوون بالاخص العمليه على مسؤليتهم لان بيها خطورة.
-جا لا يسوونها.
-ما يصير
سكتت محتاره وكلها درت مشوا ولدنه للمستشفى الساعة بهدعش وافقوا ودخلوه للعمليات ضليت كاعده متوتره وخايفه على ريـــمه وبالي يمها
للساعة بتلاثة دك تلفوني گـــلبي اوجعني مت شفته كهلان
-الو.
واجاني صوته متحسر ومقهور
-ها رنـــه، تسمعيني؟
-اي ....
