 |
اسكريبت ايوب ورغد كامل بقلم حبيبه المصري
"عاش يا معلم والله، الله ينور عليك، الاكل مظبوط بالمسطرة"
وشي اتشنج، ورفعت حواجبي، مع نظرة قرف، وقولت بصراخ مكتوم :
- يعني بعد 3 ساعات واقفة فيهم في المطبخ تقولي عاش يا معلم!
هو حد قالك إني الصنايعي اللي في الموقع يا أيوب؟!
هز رأسه بلا مبالاة وهو بيقول بهدوء :
- مش بشكر في الأكل؟
هيبقى اللقب مش مهم.
- عارف طنط عايدة؟.
رد بتعجب :
- أمي!.
هزيت راسي وأنا بقول ببرود :
- لم هدومك بقى و روح اقعد عندها لحد ما تقتنع إني مراتك مش الصنايعي اللي في الموقع.
خلصت كلامي وأنا ببتسم ببرود، فالأكل وقف في زوره و فضل يكح جامد، ناولته كوباية مية وأنا بخبط على ظهره و بقول بقلق :
- اسم الله عليك يا حبيبي، براحة براحة.
حد نفس وهو بيقول بزهول :
- اروح عند أمي أيه!
دي ما صدقت تخلص مني و راحت قعدت عند خالتي وخالتي تطيق القرد ولا تطيقني!
صعب عليا يا قلب أمه الوسطاني المنبوذ، فطبطبت عليه وقولت بأسف :
- خلاص يا يويو، خليك في البيت، مش على آخر الزمن همرمط جوزي برضو.
- الله يكرمك ويحسن إليكِ يا رغد.
الواد واخداه ياعيني ناقص حنان أصله الوسطاني اللي جه في النص وسط حوسة.
- حبيبي يا جدع مفيش بينا الكلام ده.
- تصدقي بالله يا رغد؟، أنا ساعات لما بتكلم معاكِ بحس إني قاعد مع محمد صاحبي على القهوة.
طبطبت عليه وانا بقول :
- معلش معلش لازم برضو احسسك إني واحد صاحبك عشان ماتسيبنيش وتنزل تقعد مع محمد على القهوة.
- لا معلش محمد قعدته غير يا ماما.
وشي اتشنج كده و مسكته من هدومه وقولت :
- سمعني كده مين قاعدته أحلى يا قرة عيني؟
ابتسم بتوتر وقال بثقة :
- أنتِ طبعاً يا حياتي، هو حد يقدر يقول غير كده!.
طبطبت على شعره وقالت بابتسامة رضا :
- شاطر يا يويو.
- أنتِ ليه بتتعاملي مع شعري كإنه شعر قطة؟؟
رديت عليه وانا زعلانة عشان أصعب عليه و يجيبلي قطة :
- عشان سيادتك مش راضي تجيبلي قطة.
- ريحي يا ماما، دور المسكنة ده مش هياكل معايا.
رديت بإستنكار :
- هياكل معايا!
يابني أنا مراتك وربنا مش محمد.
قام و جابني من هدومي زي حرامي الشباشب وقال بغيظ :
- بت هتزهقيني هسيبلك البيت وانزل ألعب شطرنج مع محمد، و اكل معاه كيك، و هسيبك لوحدك تكلمي نفسك.
بصيتله بتحدي وقولت :
- ومالو يا بيبو، أهو أنت تاكل الكيكة الشايطة بتاعة محمد وانا آكل الكيكة الهشة بتاعتي.
ساب هدومي و بصلي ببراءة وقال :
- هو أنا قولتلك إنك جميلة إنهاردة؟.
- مش هتثبت.
- طب قولتلك إن ورق العنب تحفة.
- مش هتثبت، ريح نفسك.
- طب قولتلك إني بحبك؟
- برضو مش هتثبت.
- طب قولتلك إن سحر عينيكِ هو السحر الوحيد اللي حلال في العالم؟.
لا خلاص أنا اتثبت، فقولت برقة معرفش جت مين :
- عايزها شوكولاتة ولا برتقال ولا قرفة؟.
- الله أكبر.
قالها وهو بيصفق بسعادة كأنه طفل صغير، بحس اني متجوزة طفل بجد، بس بصراحة مسليني.
- فرقة بالله عشان بقالى كتير مكلتهاش.
- عينيا يا بيبو.
- بيبو بيبو مش مشكلة، المهم الكيكة.
- أنا ولا الكيكة يا أيوب؟
سألته وأنا ببصله بشر، مجاوبني برد كريتف الصراحة :
- الكيكة عشان اللي عاملاه الكيكة بتاعتي.
- يعني أنا كيكة!
- أحلى كيكة يا عمر أيوب.
- عايز جنبها كاكاو ولا قهوة بلبن؟
- كاكاو يا سكر.
- طب كفاية عشان اتثبت.
- يا سكر ياللي من حلاتِك هتجيبيلي السكر.
- أنا فعلًا هجيبلك السكر، بس مش من حلاوتي، من حلوياتي اللي عمال تاكل فيها من يوم كتب الكتاب.
~~~~~~~~~~~~~~~
