رواية روح أيوب الفصل العاشر بقلم رحبة
-ايوا يا أيوب
-هو أنا لو قولتلك نروح نتغدى عند ماما النهاردة عشان أكلها وحشني هتقولي إن أكلك مش عاجبني؟
-هل دا معناه لو وافقت إني مش هطبخ النهاردة؟
-وهو كذلك
-موافقة طبعا ،تعالى عدِّي عليا من الشغل ونطلع على هناك
-ماشي يا حبيبي
اتبسطت إني مش هطبخ النهاردة
أنا عارفة إن أكلي بيعجب أيوب ،احنا لسه متجوزين من قريب وأكيد أكل طنط وحشه فعلا زي م أكل مامتي وحشني !
-يلا؟
-يلا،أنا عملت كيكة شوكلاتة بدل م ندخل كدا
-تسلم ايدك ،أنا قولتلهم واتبسطوا إننا جايين
-حاسه إني اتحرجت فجأة
هيقولوا اي ؟مبعرفش أطبخ ؟سيباك من غير أكل؟..
-بس بس!
انتِ عارفة إنهم مش هيقولوا كدا ان شاء الله
وبعدين أنا أصلا مش ببطل أشكر في أكلك فهما عارفين إنك بتطبخي أنا قايل لماما إني بس الأكل وحشني ، اعتبريها عزومة
بصيتله وابتسمت
-ماشي
هو أكلي بيعجبك بجد؟
-مفيش في حلاوته ،كفاية إنه طالع من ايدك
-إذا كان كدا ماشي
شويه ووصلنا
-ازيكم يا حبايبي
-ازيك يا طنط
كنت لسه محرجة برده ومش عارفة أبصلها
وهي تقريبا خدت بالها
-تعالي معايا بقا المطبخ يا روح ساعديني ،أيوب مش بيبطل كلام عن أكلك وحلاوته شكلي هغير منك
ابتسمتلها
-متقوليش كدا يا طنط ،طب دا احنا جايين عشان أيوب نفسه في أكلك
-طبيعي يوحشه مش بياكل منه عمره كله بس دا برده ميمنعش إن أكلك مُحَبَّب لقلبه
أبوسها !
الحمدلله على العيلة الطيبة الحنينة اللي وقعت فيها دي
دخلت معاها المطبخ تقريبا كانت كل حاجه خلصانه وأيوب مع عمو برا وحطينا الأكل على السفرة
-تسلم ايدك يا ماما !الأكل دا تحفة
-تسلم ايدك يا طنط
-بالهنا والشفا ،ابقى فكرني يا أيوب اديكم حاجات جاهزة على التسوية أنا مجهزاها جوا عشان تسهل عن روح شويه ،الشغل والبيت كتير عليها
-ربنا يبارك فيكي يا رب يا طنط
كملنا أكل بعدين أنا وأيوب قمنا نلم السفرة
-شوفتي محدش قال حاجه ازاي
-ايوا،ربنا يبارك لك فيهم
-ويبارك لي فيكي يا روح!
-يلا يا ولاد!
-بابا بينادي تعالي يلا نروح
-ايه رأيك في الكيكة يا عمو؟
-تحفة يا حبيبة عمو ،مبحبهاش غير من ايدك
-الحمدلله إنها عجبتك أنا عملاها عشانك
-والله يا حاج؟
جرا اي يا ماما متقولي حاجه
-هقول اي يا ابني م خلاص
ضحكنا كلنا وكان الجو جميل لحد م الجرس رن !
بوووم!
-أهلا يا سعاد تعالى
-ازيك يا حبيبتي أنا كنت قريبة قلت أعدي عليكم ،اي دا ؟دا أيوب ومراته هنا
-ازيك يا خالتو عامله اي
-الحمدلله ، ازيك يا روح
-الحمدلله بخير
دخلت قعدت وطنط عزمت عليها بالكيكة بتاعتي
مكنتش عايزاها تدوقها!
أول عزومة بعد الفرح كانت هي فيها وقعدت تعلق على أكلي بكلام معجبنيش فمكنتش عايزاها تدوقه تاني !
-انت اللي عاملاها دي يا منال؟
-لا دي روح جابتها وهي جاي عشان محمد بيحبها
-امم ، أنا قولت كدا برده حاسه ناقصها حاجه
أقوم أخبطها بحاجه وأرتاح!
-ناقصها اي يا طنط يا تري ؟
-ناقصها نَفَس يا حبيبتي ،لازم تشتغلي على نَفَسك في الأكل شويه
-مع إن عمو مأكدلي إنها جميلة وأيوب وطنط منال
-بجد؟
-ايوا ، عن إذنكم هشيل الأطباق
كان لازم تيجي يعني ؟
دي.ناقصها حاجه ،دي تحفة فنيه اللهم بارك
-هي فعلا تحفة فنيه
-أيوب !
هي حلوة صح؟
-الحلو ميطلعش منه إلا الحلو يا روح
تحبي نمشي؟
-مش هتضايق؟
-لا احنا قعدنا مع بابا وماما والوقت كان جميل الحمدلله
وماما أصلا قالتلي خد مراتك وامشي قبل م روح تتهور
-حماتي نور حياتي فعلا
-والله ؟
الكيكة لحماكي والحب لحماتك وأنا اي؟!
بصيتله بابتسامة هادية
-أنت الهدية اللى ربنا رزقني بيها وبسببها عرفتهم يعني أنت الأساس يا أيوب !
-أيوب بيحبك يا ست 🤎
ربنا يرزقنا بيوت هادية مليانة بركة ودفا في عفو وعافية يا رب
-روح-أيوب
