رواية روح أيوب الفصل الحادي عشر بقلم رحبة
-محشي!
قالها أيوب لما خدته المطبخ عشان يساعدني في حاجة ولقا الحلل والورق مفروشين على الأرض
-ايه رأيك ؟
-وأنا هساعدك ازاي ؟
-هتلف !
-ألف ؟!
دا أنا مهندس ألف محشي !
-انت مهندس وزوج صالح فهتلف يلا بقا عشان نلحق نخلص
قعد على مضض وشويه واندمج معايا وقعد يحكيلي عن يومه واحنا بنلف المحشي، كان مبسوط!
أنا عارفه إنه بيحب يساعدني بينكشني في الأول لكنه هيرضى في الآخر !
-اي دا يا أيوب !
-ايه رأيك ؟
-رأيي في اي ؟!
-محشي على شكل مثلث قائم ومحشي على شكل مثلث متساوي الأضلاع استني شويه وهعمل مثلث حاد ان شاء الله
-الصبر يا رب
ودن القطة بقت مثلث متساوي الأضلاع؟
-دا اسمها العلمي بالنسبالي خدي بالك
-تحفة يا حبيبي استمر
كملنا لف وشويه ناكل رز المحشي ني وشويه يأكلني صوابع نية لإني بحبها!
-هو مفيش ورق عنب؟
بصيتله
-هو انت عايز ؟
-مش عارفه إني بحبه ؟ مفيش بجد؟
طلعت حلة من جمبي
-دي عملتها قبل م تيجي
ظهر على وشه الفرحة اللي هقتلها دلوقت
رفعت الغطاء
-اي دا؟!
-مش عارفه! دا ورق خس
-وأنا هعمل اي بيه أنا عايز ورق عنب
-على فكرة جربه دا أطيب وأنعم من ورق العنب
بصلي بإحباط
-ماشي
وكمل لف الورق
-انت زعلان؟
-الحمدلله على كل نِعَمِه بس أنا بستناكي تعملي ورق العنب، من ايدك طعمه أحلى و مبعرفش أكله من برا
شكلي معتدش عارف أكله غير من ايدك
كان بيتكلم وهو باصص للحلة قدامه
كفاية عليه كدا
-علي فكرة الحلة دي فيها اللي انت عايزه
-دا ورق خس يا روح
-تفتكر روح هتعمل اللي بتحبه وحبيبها لأ ؟
بصلي وقال
-قصدك اي ؟!
-تحت ورق الخس فيه ورق عنب يا أيوب عملتهم في حلة واحدة عشان هما حبه صغيرين وقولت أنكشك شويه لكني مقولتش إني معملتش ورق عنب
قال بفرحة
-تصدقي بالله ، انتِ أحن روح في الدنيا وربنا يطعمك من الجنة يا رب
-آمين يا رب
بس كل الفرحة دي عشان ورق عنب ؟!
-هو دا شويه ؟
وبعدين مش عشان كدا بس
ضحكت وقولت
-اومال؟!
-عشان القلب الحنين اللي ربنا رزقني بيه
اتكسفت
-طب لف حلو !
-مش عاجبك ؟
بصيتله
-عاجبني
قال بتسلية
-هو اي ؟
بصيتله باستهبال
-المحشي !🤎
-روح -أيوب💗
-رُحْبَة💗
