رواية 120 كيلو الفصل الثالث بقلم جمانه السعيدي
رهف...عرفت من اول لحظه اني راح اشوف ضيم بهذا البيت
اذا خالتي اخت امي ماتريدني
وبتها أحقر منها ماكوووو
سلمت أمري لله وقررت اعيش وبس الحد ما رب العالمين يفرجها عليه
قررت خالتي مادام اني اجيت بيتها غصبا عليها
راح تشوفني المر
من هاي اللحظه شغل البيت كله صار عليه
خالتي هي وشكران لا شغل ولا عمل
اني اطبخ واغسل وانظف حتى ملابسهم اني اغسلهن
بلغساله
كل النهار شغل بدون استراحه
اذا شافتني كعدت راسا تطلع شغل من جوه الكاع
بس كون مااكعد
من يجي عمي يله ارتاح لان تخاف منه
ماتخليني اشتغل كدامه تخاف يصير عصبي عليها
ولله هذا عمي حرامات ماخذ خالتي
ما تستاهله طيب وحنين وكريم وشاغول
ومتدين الناس كلها تحبه وتحترمه
فات ست اشهر على وفاة اهلي واني على هذا الوضع
كل الشغل عليه
ومن ادخل للغرفه تكوم شكران تغلط عليه
واني ساكته مااكدر احجي لان وكيحه بس احجي وياها
تضربني وما يهمها اكبر واحد لان خالتي وياها
ادخل للغرفه بس من اريد انام ادخل بفراشي وكبل اغمض عيوني
رغم اني ابد مااحجي وياها ولا الي شغل بيها
بس هم ما تسكت
اول ماادخل تكول اجت سليمه كون الله ياخذج واخلص منج
لان ماببج حظ بقيتي على كلبي
جان رحتي ويا اهلج حتى اخلص منج المن بقيتي هنا
لو تكول اهوووو هم اجت هاي الغثه
لو الكاها شامره مي على فراشي ومبللته
لو تسوي نفسها تفوت من يمي ودوس على رجليه
لو على راسي
فات ست اشهر على وفاة اهلي واني وضعي من سئ
إلى اسوء
بس ساكته لان اني زغيره وكلشي مااعرف
وابد مو مال اعيش بيت وحدي
جمانه السعيدي
بيوم رجع عمي الصبح الساعه عشره جانت خالتي وشكران طالعات واني انضف
والولد نايمين بغرفتهم
عمي...وين خالتج
رهف...طلعت هي وشكران
عمي...وليش انتي تنظفين
رهف....عادي اني انظف كل يوم
عمي...وهنا شبيهن مكسرات مخليات طفله تنظف البيت وهنا طالعات ليش ماياخذنج وياهن
شلون بقيتي بلبيت وحدج
رهف....فدوه عمو لا تحجي كدامهن ولله يلعبن بيه لعب
انت ما موجود بلبيت حتى تحميني
فدوه ميخالف اني انظف ميخالف مااريد مشاكل
عمي...عوفي التنظيف بدلي وتعاي وياي
رهف...وووين عمو
عمي...بعدين تعرفين بدلي بسرعه
رهف دخلت لبست رداء اسود وحجاب اسود
عمي...يله امشينا
طلعنا من البيت وعمو اجر تكسي اخذنا ابو التكسي
وصلنا للمصرف
نزلت وعمو لزمني من ايدي ودخلنا للمصرف سوا
وعمو بدا يطلعلي إجراءات دفتر توفير
وخله بالدفتر خمسين ألف من جيبه
عمي...باعي رهف اني كملت معاملة راتب ابوج
وإنشاء الله من هذا الشهر يطلع الراتب
وبيتكم اجرته بعقد سنوي اي فلوس راح تجيج
من الراتب ومن الإيجار راح تكون باسمج
بهذا المصرف
اني مادايم اللج والدنيا تخوف على الاقل من تكبرين
عندج فلوس تصرفين منهن
وماتحاتجين احد هاي اني خليت اول ٥٠ الف من جيبي
صير سباعيه ولا تخافين من احد
البشر بس يخاف الناس تاكله حتلو اقاربه
ابد لا تحجين كدام خالتج ولا شكران عن الراتب ولا عن إيجار البيت
ولا حتى عن هذا الدفتر فهمتي لو لا
رهف.. اي فهمت
عمو...يله تعاي اشتري ملابس او حذاء شنو يعجبج
رهف...لا عمو شكرا عندي
عمي...اعتبريهن هديه مني
اخذني عمي اشتريت حذاء موديل جديد وشال وعطر
ورجعنا للبيت
جمانه السعيدي
لكينا خالتي راجعه للبيت هي وشكران
ولكت البيت بعد كامل تنظيف
دخلت قبل عمو بس شافتني خالتي زمخت عليه وين جنتي ليش ما منظفه البيت
دخل عمو وراي
عمي.. ليش اصيحين عليها طفله شتعرف بلتنظيف
بعدين مو عيب عليج انتي وبتج كل وحده شكبرها عايفات هاي الطفله تنظف البيت وحدها
انتي مو خالتها اخذيها وياج من اطلعبن
مسكينه مكسور خاطرها وانتي هيج تعامليها
خالتي... شنو نمونه التنظيف ليش ادافع عنها
عمي. اذا نمنونه نضفي انتي لو نمونه عليها وعليج مو نمونمه
اتقي الله يامره اتقي ربج هاي طفله حوبتها تعثرج
خالتي...انت ليش ادافع لها تشتغل بمكان ماكاعده بهذا البيت وتأكل وتشرب
عمي..هذا البيت بيتي مو بيتج
وتاكل وتشرب من راتب ابوها انتي ماخاسره عليها شي
خالتي.. اهو ترا انت جاي تكبر راسها عليه
تنظف وتشتغل حالها حالنا شنو تكعد واحنا نخدمها
عمي...لا تخدمنها ولا تخدمجن تشتغل شغل بسيط
لا تكلفيها فوك طاقتها
جمانه السعيدي
رهف..كانت عركه طويله بينهم وخالتي ابد ما سكتت
بقت تحجي ودردم وتغلط عليه طبعا مو كدام عمي
دخلت للغرفه شايله العلاكه بيها حذاء وشال
شكران...هااا فرحتي من علكتيها بين امي وابوي
من دخلتي بيتنا لليوم والمشاكل ما تنتهي
هو انتي فكر انتي بومه ماكو من وراج بس المشاكل
النوب ماخذها مشتريلها اي ششتريتي بله
اكل وشرب ونوم ومصرف ومشتريات
وين جنتي وين صرتي بعد شتريدين
رهف...سكتت لان بس احجي تكب عليه ومنا امها ترزلت بسببي
اسكت وأمري لله وحده
السنه سادس ابتدائي مرحله صعبه واني ماعندي وقت إقرار
كل الوقت تنظيف وغسل ملابس وطبخ
اني اصلا من زمان مستواي مو كلش
وشغل البيت ماخذ كل وقتي وجهدي
تخيلو شكران حتى ملابسها الداخليه وجواريبها
تكلي اغسليهن
طلعت بلدور الاول راسبه بست مواد
بنص السنه عدلتها صارن اتلاثه
دخلت بكلوريا وطلعت إكمال باربع دروس
خالتي وشكران يضحكن عليه
شكران تكول هو انتي كسلانه شعندج رايحه للمدرسه
اكعدي واسكتي انتي مكانج البيت
انتي احلى شغله لايكه عليج شغلة الخدامه
ثوب ومفصل عليج
جمانه السعيدي
عمي من شافني ضايحه
حجزلي يم معلمه بنفس شارعهم
وكل يوم يوصلني ويرجع يرجعني
خالتي ماقبلت
خالتي...هي شنو والدورات بنيه كسلانه تكعد وتسكت عليمن هلمصاريف كلها
عمي...ماخذه من فلوسج من ورث ابوج
فلوس ابوها وتصرف بيهن اسكتي ومالج شغل
بليل عمو يكعد يراجعلي الدروس الي اخذهن يم المعلمه
لمن يتاكد اني فهمت يله يعوفني
وكت الدرس يوصلني بايده ويرجع يرجعني
امتحنت دور ثاني ونجحت ولله ألحمد
اخذني عمو اشترالي ملابس مدرسه وجنطه
وقدملي بلمتوسط
ولله لوما عمو ومواقفه الحلوه وياي جان شصار بيه
يمكن متت من القهر
يعني تصرفات خالتي وشكران وياي مو طبيعيه
كلما اضوج اروح اكل كلما وحده منهن تسمعني كلام موحلو اروح اكل
ذبيت ضيمي على الاكل
هاي الطريقه الوحيده الي اخفف بيها عن نفسي
بديت اسمن والملابس كامت ماتجي عليه
بلبيت محد يصيحلي باسمي بس عمي
والبقيه يصيحولي الهايشه
هلكد مااكل
اذا يكعدون يتغدون اني ابقى اخر وحده ااكل ماعوني
واي واحد يبقى من عنده اكل اكله
واذا اكو بلجدر باقي اكل اكل
عمو كل يوم يجيبلي علاكة حلويات
خالتي...على كيفج صرتي جنج هايشه شكد تاكلين
ترا ينرادلج عشيره تشتغل حتى تلحك عليج
ماتبقين شي بلثلاجه
شكران.. اني اخاف على نفسي لا تاكلني بيوم من الايام
هاي الهايشه
خاف انام بليل وتكعد جوعانه وتاكلني
رهف...كلما انقهر منهن اروح اكل
منا لمن خلصت المتوسطه صار وزني ١٠٠ كيلو
اني طويله مو كصيره طولي ١٧٧ شايله السمن
بطولي
الثالث متوسط كعدلي عمي كعده دورات لكل المواد
وهو يرجع يقريتي بنفسه بليل
كلما يسمع خالتي تحجي على وزني
يزمخ عليها لا تحجين ماكله بيت ابوج
خليها تاكل انتي شنو
اني اتسوك وهي تطبخ مالج شغل بيها عوفيها بحالها
عود اضعفي انتي وصيري ريشقه
عمي...ولا يهمج عمو اكلي الف عافيه على كلبج
رهف....نجحت من الثالث متوسط بلدور الثاني ودرجاتي كلهن على الحافه
كلهن خمسينات
رحت للاعدادية وهناك اسمع البنات يتنمرن عليه
بلاضافه إلى شكران وصديقاتها ابد مايقبلن يعوفني بحاالي
كلما يشوفوني يشمرلي حجي
حتى يضوجني مااعرف اني بيش غاثتهن
اني الي شايله جسمي مو هنا ليش هلحجي الزايد بعد
كمت مااطلع من الصف
ابقى كاعده برحلتي وساكته
حتى أجنب الحجي والمشاكل
