رواية روح أيوب الفصل الثاني عشر بقلم رحبة
-مش عايزة أتجوز خلاص!
قولتها لأيوب في التليفون وأنا ببص للشقة وبعيط !
-مالك بس اي اللي حصل ؟!
-انا اتضحك عليا يا أيوب !مكنتش فاكرة الجواز كدا
-مالك بس يا حبيبي فيه اي ونحله سوا؟
بصيت للشقة بحزن
-فيه هدوم كتير عايز تتغسل والمواعين وبكرا الجمعه وعايزة أنضف وعايزة أمسح حاجات كتير في الشقة ومطبختش
نسيت أطبخ يا أيوب !
أنا كدا فاشلة
قولت آخر جملة بعياط وأنا حاسه فعلا إني مش عارفة أعمل حاجه ، آه كنت بساعد مامتي في البيت قبل الزواج لكن إن كل حاجه تبقى عليا طلعت فعلا صعبة وأنا لسه متعودتش ،عارفة إن الحياة مش وردي دايما لكن بجد مش قادرة مكنتش متخيلة الموضوع كدا مش متعب على اد ما هو ضاغطني إني لازم أعمل أحسن حاجة عشان البيت دا مسؤليتي ولازم شقتي تبقى نضيفة لأعلى درجة طول الوقت ودا محسسني إني فاشلة ومش متقبلة إني عندي طاقة !
-يا نهار أبيض !
مين بس دي اللي فاشلة يا ست البنات ،اهدي وكل حاجة هتبقى تمام
أنا هجيب أكل وأنا جاي ،قومي كدا خدي دش هادي وروقي على حالك وأنا لما آجي هنعمل حاجة حلوة سوا نحل بيها المشكلة دي ،تمام؟
-تمام ، شكرا
-اقفلى يا روح الله يهديكي ،قال شكرا قال
قفلت وعملت زي ما قالي ، حاسة إني هديت شويه
مش عارفة أيوب بيقول ايه عليا دلوقت
مقصرة
مش عارفة تمشي أمور بيتها
بتدلع
مأفورة!
كلها احتمالات مش عايزة أتخيلها !
استعذت بالله من الشيطان وحاولت أشغل نفسي بأي حاجة عشان معيطش تاني على م أيوب ييجي
-روح!
-أنا هنا يا أيوب تعالى
كنت قاعدة في الاوضة على السرير متغطية باللحاف ومهدية النور وبتأمل في السقف -جلستي لما أكتئب - دخل وقال
-يلا أنا جبت الأكل ،قومي
-مليش نفس
-قومي بس يلا ، مش هاكل لوحدي أنا
قومت وأكلنا وبعدين لمينا الأطباق سوا وقعدنا في البلكونة وكل دا وأنا ساكتة
قام جوا يجيب حاجة وجه تاني
-اي دا؟!
-دي نوت بوك ،بس بعيدًا عن بتاعتك اللي بتكتبي فيها
دي مخصصة لمهام المنزل فقط !
-يعني اي مش فاهمة
-يعني هنا يا ستي هتكتبي قبل م تنامي مثلا تاني يوم بإذن الله عايزة تعملي اي ،يعني مش لازم تبقى التنضيفة الكبيرة للشقة في يوم واحد يتعبك لأ!
بدل م تعملي كل يوم ترويقة خفيفة وتهلكي نفسك في يوم تاني قسميها لأجزاء كل يوم شويه واكتبي خلصتي اي وفاضل اي
واكتبي الطلبات عشان متنسيش حاجة
واكتبي حتى أكلات الإسبوع لو تحبي عشان تطبخي على طول !
ها اي رأيك ؟!
-تحفة !
بجد مش عارفة أقولك اي ،ازاي مجتش في بالي وأنا أصلا النوت قدامي على طول تقريبا
-أي خدمة يا ستي
وأنا برده الوقت اللي هبقى موجود فيه هساعدك مش هسيبك ان شاء الله
ابتسمت له
-شكرا بجد يا أيوب
كنت خايفة تقول عليا مهملة أو بدلع أو حتي بأفور !
-من غير شكر بس يا ست!
دا واجبي أصلا إن أنا أفكر معاكي ونلاقي حلول لمشاكلنا ، أنا عارف إنك لسه متعودتيش حتي لو اتعودتي ايه المانع إني أساعدك برده أو إنك تلاقي حل يسهل من عليكي شويه ،مش لازم تهلكي نفسك عشان تبقى الزوجة المثالية ،وطالما البيت نضيف يبقى ليه لأ!
-ربنا يديمك ليا يا رب
-وميحرمنيش منك يا روح 🤎
الحياة مش دايما وردي ايوا
لكن لما نحاول نسهلها على بعض هتبقى أهدي وأحلى بإذن الله ،متستهونش بمشاعر حد حتى لو مش هتقدر تساعده !
وبس
-روح-أيوب 💗
-رُحْبَة💗
