رواية روح أيوب الفصل الرابع عشر بقلم رحبة
-دا حرام!
ازاي تعملي كدا ؟!
ردت عليا وهي بتعيط
-معرفش يا روح أنا فجأة فوقت لقيت نفسي بكلمه ومش قادرة أجمع الموضوع بدأ ازاي
-طب اهدي واحكيلي من الأول !
بصتلي بخوف
-وأيوب؟
حاولت أطمنها
-انتِ اختي يا فرح وسرك محدش هيعرفه ان شاء الله
قولي بقا عشان أعرف أتصرف معاكي ازاي !
بدأت تحكي وهي عينها في الأرض مكسوفة تبصلي
-في الأول المفروض كان معايا في التيم تبع مشروع للكلية والكلام كنا بنتكلم البنات سوا على جروب لوحدنا ونبعت التحديثات على الجروب الكبير اللي هما فيه وخلاص عشان منحتكش بيهم أوي
بس احتجت حاجة كان هو اللي هيخلصها واضطريت أدخل أكلمه خاص وبعدها معرفش ازاي الكلام جاب بعضه ولقيت إننا بنتكلم عن حاجات ملهاش دعوة بالمشروع ولا التيم وكان شعور جديد عليا
أنا عارفة إنه حرام بس مش عارفة اي اللي حصلي !
قالت كدا وعيطت
استنيت أما هديت واتكلمت
-انتِ غلطتي يا فرح وكويس إنك معترفة بده
أول مرة لما دخلتي كلمتيه علي الخاص مع إن ممكن تبعتيله على الجروب قدام باقي زمايلكم
وتاني مرة لما سمحتيله وسمحتي لنفسك إنكم تتمادوا في الكلام ويبقى بينكم أُلفة
وتالت مرة لما مفوقتيش نفسك من اللي بتعمله
انتِ عارفة ضوابط الإختلاط :
-من غير اُلفة
-بدون تلامس
-بدون خلوة
-بدون خضوع بالقول
-لحاجة
-على قدر الحاجة
كان المفروض تاخدي اللي محتاجاه وانتهينا !
ومتشيليش الكلفة بينكم دا مجرد زميل ليكي في الجامعة مش أكتر لاهو أخوكي ولا ينفع يبقى "صاحب"ليكي!
قعدت تعيط
سبتها تخرج اللي جواها
هي غلطت وعرفت غلطها وندمت يبقى فاضل التوبة!
لازم نفهم إن احنا هنا عشان نجاهد نفسنا ونحاول بإذن الله نغلب هوانا وشيطانا ونحاول على اد م نقدر نقلل المرات اللي بنقع فيها ولما نقع نتوب بسرعة عشان نقدر نوصل للجنة بإذن الله !
-فرح!
كفاية بُكا ،خلاص يا حبيبتي اللي حصل تتعلمي منه ويقربك لربنا أكتر مش العكس
اهدي كدا وقومي صلي ركعتين لربنا وادعي كتير واستغفري
يلا يا فروحة
-الحمدلله إنك هنا !
زي م أيوب بيقول انتِ رزق من ربنا لينا
حضنتها وقامت وسيبت لها مساحتها وخرجت
يا دوب بقفل الباب لقيت أيوب قدامي
-خضتني!
-سلامتك من الخضة
هي فرح كويسة ؟
-الحمدلله ،ليه؟
-أصل من الصبح جوا ومش عوايدها يعني
-عادي بتحصل متشغلش بالك هي دلوقت زي الفل
بصلي بشك
-انتِ كنت جوا دا كله ليه؟!
-اخس عليك يا أيوب مكنش العشم
مش عايزني اقعد مع فرح حبيبتي ؟
-بجد وايه كمان؟
محاولة فاشلة للهروب
-فيه تشيز كيك جوا تحفة هجبلك حته
وطلعت أجري علي المطبخ
-روح!
-روح-أيوب💗
-رُحْبَة💗
ربنا يعافينا جميعا يا رب
