رواية علي حافة الثأر الفصل الثالث والعشرون 23 بقلم زينب نور

فز من مكانه .. كعدت بقلق : منو ؟

- اكيد اهل الشيخ 

كام من مكانه وتوجه للباب .. فتحته طلعت بتهم .. سلمت عليه وكالتله : هذا سراحية ثلج خاف ماكو مي بارد .

شكرها واخذ المي منها واني كمت دا اروحله سد الباب وانطاني المي : شنو

- جابت إلنا مي ..

- هذه بنته للشيخ ؟

- ما اعرف والله ، تشربين

-اخذت دولكة المي شربت شوية وهو راح تمدد ع الفراش .. فتحلي اديه تمددت بصفه

حجه : من الصبح باجر لازم اطلع ادورلي بيت ايجار .

تمددت يمه حطيت راسي على ايده .. وايده الثانية ثناها وخلاها جوا راسه ويباوع للسگف : وحنبقى هشكل اني اكول لازم اواجهم واحل الموضوع وياهم

- كضيتي عمرج تلتفين بمواضيعج ما تواجهينها هسه من وصلت للعظم تصيحين اريد اواجه .. تواجهين ابيش تتنازلين ؟ لو شتسوين

- وهيج ابقى متخفية

-المشكلة المالها حل اليوم باجر الله يحلها

تنهد واندار عليه .. ابتسم : حيل مشتاقلج

حشرت روحي بصدرك : مو بگدي .. حيل مشتاقتلك

لمني بحضنه وامنت روحي بصفه ..

لحد الصبح .. حسيت هو كام بدل وطلع 

واني بقيت بمكاني .. لشوية حسيت تليفون يرج جوا الفراش 

شلت راسي سحبت التليفون من جوا رقم غريب .. عقدت حاجبي .. ردت اجاوب كلت خاف احد ميقبل اجاوبه .. تركته

انقفل الاتصال ورد مرة ثانية دك ..

بقيت اباوع للرقم .. دست رد .. ومطلعت ولا نفس .. اجاني صوت بنية : الو  .. الو .. عباس .. الو تسمعني 

انسد ..

كعدت لحيلي .. دا اريد اباوع للرقم عدل دخل للبيت هو : اجيت على تليفوني

ومد ايده جوا الفراش .. مجاوبت بس عاقدة حواجبي ولازمة التليفون واباوعله .. شافه بيدي : هو هذا بيدج واني ادور

اخذه مني بلا ميباوع بوجهي 

دار وجهه وطلع ! .. اخذت نفس وتعكر مزاجي كله بهالصباح 

كمت من مكاني فتت للحمام تحممت هو دخل للبيت كام يصيح : فيان .. فيان وينج .. فيااااان

معجبني اجاوب 

دك باب الحمام .. فتحه واني اسبح : اي دجاوبي مو جاي اصيحج

- اطلع خل اكمل حمامي

ابتسم : تريدين اسبحج

- لا شكرا .. اطلع بلا زحمة

- بلا زحمة !! 

هه ديلا ينتظروج برا بالبستان ع الريوك لتتأخرين

مجاوبته طلع .. كملت حمامي ولبست جينز وتيشيرت .. وطلعت من البيت .. ولدهم بالباب تشاردوا .. ضليت افتر وين راح الكاهم .. خلي ارجع للبيت

دا اريد اندار صاحت عليه بنية : ها عيوني منا

- مدا اندل

- خالتي البارحة مو وصتج تلبسين الجبة اللي انطتجياها

- اسفة نسيت

- شلون نسيتي جا غير زلم منا تشاردت من شافتج

- حروح البسها واجي

رجعت للبيت لبست الجبة مفتوحة .. مثل البشت 

ذبيت الحجاب منا ومنا وطلعت من البيت ومشيت ورا بيت الشيخ البستان موجود .. صاحتلي الحجية من بعيد رحتلها

ابتسمت بوجهه وكعدت .. 

ادور عباس ماكو .. البنات ديصبون اكل حطوا مقابيلي كلتلها : عباس وين

- يم الولد

- ها

الحجية : شرايدة منه

- لا بس دا اسأل

- انت منين

- هولير

- وين صايرة هاي هلير

- بالاقليم

- اقليم شنو يعني وين

- بكردستان

جاوبتها بنتها : يمه يعني بالشمال بالشمال

- ها انت كردية

- اي

- شلون تعرفتي اعلى اعبيس شجابج عليه شو سولفيلي يرحم ابيج يكولون ماخذج عن ولف

- مفهمت !

بنتها : يعني شلون تعرفتو

- هو الحارس الشخصي مالتي

- حارس شخصي شلون يحرسج يعني

- يمه يعني يشتغل عدها محامي

فيان : لا مو محامي .. حماية

- اي يعني يحاميلها

- يا وانت اشغلين عدج زلم يحامولج عود ليش

- ضرورة عمل

- خايبين ولا افتهم على حجيها المهم اكلي يمه

احجي بس مالي خلج احجي واسولف احجي بدون حلك راسي مشغول بالاتصال اللي معرفت منو صاحبته

.. شفت عباس من بعيد يضحك

تقرب هو وولد وكاموا يتشاقون ويا الحجية ويضحكون نص كلمهم مدا افتهمه مو عربي ..

ويباوعولي لان كلهم يضحكون بس اني عاقدة حاجبي .. 

شفت البنية بنتهم زودتها ويا عباس اتضربه وتكله : انهجم بيتك ولا تبطل سوالفك وعلي .. خايب موتتنا ضحك دهر الدهرك .

وهو يتشاقى ويضحك والرجال الوياه هم يتشاقى 

باوعلي غمزلي واشر بمعنى ( اكو شي ؟ ) 

رفعت حاجبي وانداريت عنه اتنهد .. عاد ساعتها وكف الضحك الزايد

شوية واجا كعد يمي : شبيج

- ما بيه شي

- يابويه .. ما بيها انعلسنا وعلي

- لتصير مقرف تعرفني اكره الحديث بهالطريقة

- فيان شبيج

- اسأل نفسك

حجيتها ودا اكوم .. 

انتبهوا اني تضايقت : وين تعاي

- دا اروح هنا الشمس صارت حارة

عفتهم ومشيت دخلت .. هو بقى يبررلهم شوية واجا ورايا .. دخل : صدك تحجين تاس قايمين بواحبنا ومنطينا بيت ومرحبين بينا ومضيفين هيج تتعاملين كدامهم

- واني شسويت !؟

- شبيج غير افتهم

- مو مشكلتي اذا انت متفتهم

- هو ما افتهم شنو غير اعرف شبييييج شني افتح كفى ايدي واشمها واعرف عدي مرايا سحرية وتحاجيني وتكلي شبيج وافهم غير تحجين حتى اعرف شبيج كالبه خلقتج من الصباحيات

- احترم نفسك وللتجاوز بهالالفاظ

- احترمي نفسج انت لجججججج خليني محترمج لا تطلعين اعصابي من الصبح

- اطلع برا

- فيان اني رجلج ما اشتغل عندج حتى تعامليني بهالشكل احترميييي

- مو بالاول تحترممممممم وحدة تشاقيك وتضربك واللخ من الصبح تتصل بيك وتسال عنك واني يا غافل الك ربك .. شمخربط من ورايا لما جنت مسافرة ومن الدا تتصل اكدر اعرف .

- اخربط شنو بتل بتل جاهل اني واخربط شو متعرفين تحجييييين احترمي نفسج

- عفت الكلام كله وجلبتلك بكلمة حتى تتهرب من الكلااااااام

- اجلب شنو چلب انيييي انت ليش تجلطيني فيااااان بالقران تكب راسي انعل ..

- شتنعل انت لا عبالك مستضعفني وشارد بيه وعبالك تستغلني لا يا حبيبي اصحى .. اني مستعدة هسه اطلع واكبر واحد بهالدولة ميحاسبني افتهمت لو لا .

- اذا هيج روحي شكو مورطتني وياج ومهجولتني من بيتي ومكان وجاي لهنا .. اذا انت ما تحتاجيلي واني خلك واحد يشتغل عندج شعدج ويااااااي

- لتتهرب وجاوب

- ما اجاوب والا اخليها علّة بكلبج خووووش واعلمج شلون تحجين باحترام وتسألين باسلووووب ..

- اي لتجاوب .. اني مرح ابقى هنا

- ووين تروحين

- مو شغلك

- اسمعي لو تحركتي منا .. والعباس والسماني عباس ما تضلين على ذمتي يوم واحد

- احجيلك عود 

احجي وامشي الم بغراضي وارحف من العصبية 

نزعت الجبة مني بقوة وشمرتها بالكاع ودست عليها .. وكمت احط غراضي بالجنطة

- لا عبالج اخليج اطلعين اكسر رجلج وابو فاضل

- جرب

- لا تجربين عصبيتي اندمج والله

- نشوف

- فيان لتتخبلين وتفشلينا كدام الناس اعقلي

- عفت العقل الك

- هسه غير افتهم شتردين شبيج متخبلة فيان

كمت من على جنطتي بهمة ووكفت كدامه : هسه تحجي منو هذه الخابرت

- نور

- يا نور

- بنت ام غيث

عقدت حاجبي وتخصرتله : وشعدها تخابرلك بالله ومن شوكت انت وياها تتواصلون

- هي خابرتني قبل فترة واحتاجتني بشغلة ورادتني اقضيها الها بس صارت شغلتج وطلعت

- وشنو هذه الشغلة

- مذممتني المرة ما احجي .. ما اكدر

- ها متكدر .. اوكي 

رجعت لجنطتي الم بيها

- العندي حجيته غير هالحجي ما عندي .. والبنية ما عندي شي وياها

- لا هيج منها ومن كيفها خابرتك واتنخت بيك لييييش لانك السبع الشهك التركض تساعد كل النسوان

- ما ساعدتها وعلي اكلج اجيت وياااااااج

- بس منطيها مجال تحجي وتتصل

- جا اكلها عفية لتتصلين اخاف من مرتي هذا شلون حجي

- لا لازم تكعد اطبطبلها واداويها .. صاير لزكة مال جروح للنسوان

- يا نسوان ذني الاني ملزك جروحهن شو تتجاوزين حجي وحجيت بعد على شنو تلمين انجبي واكعد

فزيت من مكاني ووكفت كدامه بقوووه وخزرته : لتكول انجبي احتررررم

حط ايده على وجهي ودفني : ايييييه دولييي

- ليش تتجاوز

- لان انت مو مال احترام بالقران يا فيان بت ابوج شيلي الحنطة واطلعي بعلي لا ما اسحلج سحل واكتلج فلا اتسمى باسمي

- انت تكتلني

- هسه دجربي وشوفي اكتل لو ما اكتل .

عافني وطلع من البيت 

لزمت الجنطة فتحتها وكمت انثر وانتر واطشر غراضها بقوة وابجي شمرتها من عندي ..

بجيت لوحدي لحد مسكتت هو مرجع ابد 

للظهر دكو الباب رادوني احول لبيت الشيخ اتغدا .. اعتذرت منهم كلتلهم : اسفة جدا عندي صداع ما اكدر اجي 

فبعثولي صينية اكل للبيت بيها  اشكال انواع الاكل .. مجنت مشتهية اي شي ولا مديت ايدي

بقيت كاعدة ومرجعة ظهري للحايط .. 

وراها تمددت وافكاري تروح وتجي .. نمت ساعة مدري ساعتين وكعدت .. وهو مجاي

فتحت تلفزيون وكعدت 

الاخبار كلها مشتعلة عن تنظيم مسمي نفسه د١عش مكتسح الموصل وديتعدى المناطق والاخبار مشتعلة .

طفيت التلفزيون وشمرت الريموت مناقصني قهر دا اسمع هيج اخبار تكرف الگلب ..

كمت دا احاول اسشور شعري بس مدا الكي سشوار .. ولا حتى سيروم شعري لان مبلل وطلعت بالهوى نفش .. سويته ذيل حصان ورفعته

وبقيت كاعدة لوحدي متمددة 

لحد مصار الليل اجا هو اني هستوني غافية على حركته عبالي مدري شكو فزيت بقوة حتى هو فز من فزتي صاح : شبييييج

بس ويا فزتي تحرك كأنما شي ببطني .. 

لاول مرة اشعر روح بداخلي تحركت اني متأكدة اكو ضربة صارت ابطني .. شي مو اعتيادي ولا عايشته كبل

ابتسمت كتله : يمكن تحرك اي .. اتحرك

-هو ياهوه ؟

-الطفل

باوعلي وهز راسه ومشى حسيت استصغر شعوري فتح التلفزيون و كام يدور عالريموت

1

كتله : شنو يعني ميهمك

مجاوبني : انت ليش تتجاهلي

- هسه غير تسكت 

فتح الاخبار

-ليش دا تسكتني ؟ انت ليش هيج دا تعاملني .. اكولك الطفل تحرك تستهزأ بشعوري !؟

- بس خل اشوووف اسكتي دقيقتيييين تكدرييييييييين

- ليش دا تصيح

- اكلها سكتييييييييي خرب *********

صفنت : هذا صاحي ..

بقى واكف متبسمر كدام التلفزيون .. 

تركته وطلعت من البيت منتبه الي بكد ما باله بالأخبار 

كعدت ابجي بالحديقة لوحدي ..

مأجه ورايا .. ولا حس بيه 

حسيت رجال واكف بعيد باوع لناحيتي خفت ورجعت للبيت كتله : هذا الوضع اني ما اتحمله .. دا احجي وياك عوف الاخبار

- شتريدين

- ما اتحمل هيج وضع ما اعرف اتصرف ..

- انت دا تشرفين الاخبار لو لا

- اني وين احجي وانت وين تحجي

- وانت مهامج من الحجي غير روحججججج دشوفي الارهاب شلون سقط الموصل كلها

- واني شعليه بهالامور

- فيان اهلي ابغدااااااد

- وبغداد شجابها ع المرصل انت شدا تربط

- اااااايه اني شحجي حتى انت تفهمين .. لازم اجر بيت من باجر واحيب امي واختي هناك الوضع بعد مو زين

- يعني هماتين تجيب امك واختك بالبيت ويايا هنانه ؟

- جا اذبهن بالشارع

- لا بس اعتذر اني ما اكدر اعيش وياهم ..

- فيان رحمة الوالديج عوفيني من سوالفج هسه ترا بعلي دايخ وروحي واصلة ليجاي

- انت ليش دا تكلمني بهالطريقة !؟

-اهوووووو

نتر بوجهي .. ابتعدت منه بس قهرني 

كعدت لهناك كمت ابجي لوحدي اندارلي : اني شحاجيتج حتى تبجين

- تعاملك كلش قاسي ومحلو

- وبيش قسيت وياج الدنيا مكلوبة كلام وانت تصيحين ما اريد امك واختك

- شعلية بيها تنكلب او لا .. امك متحبني وممستعدة اكابلها هنا واساسا .. اني اريد اكمل شغلي بالوكالة محابة ابقى هنا بهالمدينة ما اعرف اعيش بيها

- يا وكالة يا صخام اكلها الارهاب استحل المناطق تكلي وكالة .. المانيا بنفسها هسه اذا بلشتي تلغي العقد الوادم جاي تتكتل

- وابقى بلى شغل

- تبقين بلا شغل شنو غير مرة حامل دجيبي وكومي على حيلج والله كريم .

- اني دا امل 

حجيتها وبجيت

- الله وعلي يمعودة بعدنا تونا وصلنا حتى بيت ممأجرين مليتي شني

- انت دا تأذيني هواية

- شمأذيج رحمة لوالديج انت شايفة طبعج لو لا ترا ومحمد شرنفص

- شوف تتجاوز

- ولج غير هذا الصددددددك

- يصير اكولك انت همجي

- واني همجي صدك !

- مو كل صراحة نحجيها انت تكولي شرنفص اني ما اقبل

- لا لحظة يعني انت تشوفيني همجي

- تركز بكلامي ولازم اتجاهل كلامك وتجاوزك .

هز راسه وسكت .. 

مكام يحجي ويايه .. جعت اكلت الاكل معجبني .. تركت ورحت طلعت خيار ولبن اغمس واكل .. رجعت لكيته نايم

اخذت الريموت وكعدت على مسلسل مصري قديم مطلعي حلقة ورا حلقة لحد منمت ..

ثاني يوم طالع هو من الصبح 

اني كعدت طلعت فطرت ويا الناس .. وبقيت وياهم رغم مستغربين اسلوبي واني هماتين بس حاولت ابقى وياهم الكعدة وحدي واني انتظره تجلطني

لما صار الظهر ..

سمعت صوت عباس ديحجي 

تقدمت لكيته يضحك وهو يمر ويحاجي البنية انداريت  لبنت الشيخ : هذه شتصيرلكم

- بنت خالتي

-عايشة عدكم

- اي امها ميتة فتجي اغلب الايام يمنا وترجع لبيت جدي

- متزوجة

- لا ارملة

- عدها اطفال

- اي واحد ورجلها انجتل بعركة عشاير .. عدها بيت من رحلها بس اهلها ما يرضون تكعد بيها هالتريدلها رجل ينفكها هلبت تكعد وتستقر ابيتها وترتاح .

عباس فات لديوان الشيخ .. 

صبوا غدا وبنت خالتهم جابت الخبز وكعدوا يتغدون .. رادوا اشرب جاي وياهم صاحلي عباس .. كمت رحتلا ..

الشيخ كاعد كالي : تعالي سلمي ع الشيخ

ابتسمت ومديت ايدي 

ضحك الشيخ ودنك وهو يكول : كل الهاا 

 وعباس جر ايدي .. شمري السلام يمعودة مو تمدين ايدج

- خلها خلها لا تضايكها

- اي ردت احاجيج كدام الشيخ .. لكيت بيت ايجار بس شوية تعبان .. تروحين نشوفه العصر .. ما لكيت ايجار اليوم كلش

- لا ما نكعد ابيت تعبان

- على ما الكى بيت زين

- بس اخاف بيه حشرات

ضحك الشيخ : عمي البنية بت عز مو مالت ادوهرها بطلايبك يعبيس .. خلني اشوفنك خويلد عده خوش بيت جديد وواسع يمكني سمعته يريد يأجر المشتمل ماله .

- دخابره الواه شيخنا بلكت الله زين بالعباس بعز الظهر افتريت على بيت ما لكيت وين نا نروح ماكو ماجر لو تعبان

- سهلة

خابر .. رد الولد كاله راسده للبيع والله شيخ 

كاله والبيت شكد ايجاره .. كاله : كله رايد ابيعه والله

سده الشيخ كاله : مو نصيبكم حرامات عاد شلون بيت حديد وعلي ما صاله سنة من بناه هاليريد يبيع

- بيش ديبيعه

باوع عليه الشيخ : وبيكم شروه

عباس : لا يا شراية غير مطلوب لاذاني

فيان : اذا سعره متاسب شنو يمنع ناخذه

- منين اجيب

- هسه الفلوس فد مشكلة !؟

- لا عوفي 

غمزلي اسد السالفة

حجه الشيخ : انت عندج تشترين

- هو بييش ؟

- تريدين اسألج على سعره

عباس : لا لا شيخنا صدك جذب .. عوفها

- دخلني اخابره

مسمع لكلام عباس وخابر حان يكله : والله شيخ رايده ب١٥٠

حجه الشيخ : ب١٥٠ مليون رايده شكد مساحته .. اي ٥٠٠ متر حديقة واسعة يكول و .. وبيت نظيف .

- ٥٠٠ متر ب١٥٠ مليون بس !

باوعلي عباس : انت شبيج 

غمزلي

- ديكولك بـ ١٥٠

- لا عوفي

- ليش دنعوفه وهو هلكد رخيص

الشيخ: عندج هيج مبلغ

- ترا ١٥٠

بقى يباوع لعباس 

كاله : شيخ نتفاهم ونحجي ارتاح انت هسه

- عود ردولي خبر خاطر اخبر الولد اردنه

- ان شاءالله

كمنا اني وياه رحنا للبيت ، كالي : انت ليش تستصغريني كدام الشيخ هو الشنو تشترين ناوية تخليني كعيدي عندج

- ليش دا تباوع للموضوع بهالزاوية

- هي شني اباوع للموضوع بهالزاوية .. الغي السالفة كلش

- وليش دندور ايجار تعبان واحنا نكدر نشتري

- انت مو تريد ايجار انحلت اني اشتري وانت عود ادفعلي ايجار

- واجره منج

- عباس حرت وياك شلون يعني لا عندك تشتري ولا تخليني اشتري

- ناجر على كدنا وانتهينا

- وليش دناخذ بيت تعبان دا يكولك ٥٠٠ متر ب١٥٠ بالاحلام متلكى هيج سعر ابغداد ولا حتى بهوليير

-حتى اصير مضحكة للزلم هنا ويكولون مرت عباس اشترت بيت واستكعدته

- دا اكولك اجره

- ولا اجره

- طيب اشتري انت وسجله باسمك واعتبر فلوس الايجار فلوس قساط .. هسه مو هيج ناس تشتري بيوت واملاك بالتقسيط من الدولة هم يكول كاعد عد الدولة !

صفن: وبعد يومين متكعدين تعيريني بيهن وتكليلي بعتلك بيت بالاقساط

-شنو هالكلام !

-ما ادري خلي افكرلها

تركته وتمددت يمه .. نمت وهو بقى صافن يفكر .. 

كعده بعد شويا .. كال : موافق بس خلي ابالج هالموضوع انت الرايدته مو اني من هسه خلي نتفق اذا فد يوم عيرتيني بيه لو ذليتني بيه .. طلاكنا يصير على هالسالفة

- اوكي تمام .

- من وين راح تجيبين الفلوس !؟

- من ماما اخذهم .. لحد ما اكدر اسحبهم من البنك ..

- خابري ماما حاجيها

خذيت تليفونه خابرتها 

كالتلي : فيان اني اكول لو تعوفين هالشي وتجيبين عباس ونطلع للاقليم الوضع فد مرة متدهور هنا وديكولون حيوصلون بغداد

- محيقبل يعيش بالاقليم لان امه اكيد مراح تقبل

- اتركي وتعالي نروح اني وياج للاقليم

- ماما ما اكدر اروح .. اني حامل وحابة اعيش ايام حملي براحة وهو يمي

-وهسه شتريدين

- اريد اسحب فلوس من البنك

- ابوج عنده وكالة عامة منج وسحب فلوسج كلها

- على اي اساس سحب فلوسي هم هو منطينياهم هذا تعبي

- ما اعتقد سحبهم بسبب المشكلة ديكولون البنوك العراقية حتعلن افلاسها والدولة راح تمر بازمة اقتصادية ونصحونا نسحب اموالنا من البنوك ونحولها للاقليم افضل وامن .. وهيج سوا ابوج

- وهسه اريد فلوس اشتري بيت دا اريد استقر

- شكد محتاجة

- ١٥٠ مليون

- تشتري انت

- اي

- وشتسوين ابيت بالكوت شيعيشج هناك

- قررنا .. وحابة نشتري البيت

- اني سحبت كل فلوسي اليوم .. بس راح احولها كلها للخارج افضل ..

- انطني واني عندي ساعة بابا هدالياها باقية يمج بالبيت تجيب تقريبا هالسعر .. اخذيها وبيعيها

- واشون توصل الفلوس هلكد من بغداد للكوت

- ما اعرف .. انت امنيهم والله كريم

- اسويهم دفعتنين .. ماشي بس مو بس عباس خطر لازم فد واحد يكون وياه يامن ع الفلوس .

- تمام 

اتفقت وياها وسديت الخط ..

كلت لعباس الفلوس عد ماما بس حتسويهن دفعتين وتكول مو لازم وحده يجي ياخذهم بس بالاول لازم نشوف البيت

- هو خل اگل للشيخ .. واجي

راح شوية واجا كالي : بدلي خل نروح نشوف البيت

لبست البشت وطلعت اني وياه مشينا 

بس تعبت لزمت بايده : عباس ما اكدر امشي هواية الله يخليك وكف النا سيارة

راد سيارة تكسي تمر ماكو وكفت ستوتة 

كتله : صدك تحجي اصعد بهاية لا عباس

بعدني دا احجي دنك لف اديه على خصري وشالني وكعدتي بالستوتة .. وكعد يمي وهو يكلي : رجعي ليورا لا تكعين

ابتسمت والستوته تمشي تشيل وتركع والتراب منا ومنا يتطاير والجبة ع الواهس الطير والحجاب واكع اساسا احطه على راسي ويتزحلك عاد لفيته على ركبتي.. جانت فد تجربة مثيرة للجدل

وصلنا المكان عباس سلم ع الولد.. ودخل شفنا البيت 

جبير وحلو ومبني جديد بس المنطقة تقريبا ما بيها هواية ناس وماكو تبليط وبساتين هواية قريبة من المكان

الصراحة حبيت بيت بالريف وقريب من البساتين 

حابة اعيش هالتجربة .

اتفق ويا الولد .. ووقعوا وراحوا للشيخ والشيخ اتكفل عباس وكاله اخلي الولد يرحون وياك ..

تركني ابيت الشيخ 

وراح لبغداد .. جاب سيارة حمل جبيره بيها غرفة نومنا وشوية غراض النا ...

واحا انطى نص العربون واخذ البيت من الرجال واتفق هو وياه والشيخ على باقي الفلوس .. ونصب الغرفة .. وحط بعض الغراض ..

اجيت وياه للبيت حتى نكعد بيه 

بس مينكعد بيه لا بيه غراض مطبخ لا سبالت لا ثلاجة 

بطرك جرباية وفراش ومبردة يا دوب تذب هوا انطاها اله الشيخ

كتله : عباس راح اختنك من الحر عفية فدوة باجر جيب سبالت وثلاجة اشون نبقى هشكل

- اصبري بس هالفترة اتفقت وياه ابن عمي خلفه اطلع وياه جم يوم واداين من الشيخ بلكت واحيب سبلت بس اصبري

- واصبر ايام بهالحر وبطني هشكل لا الله يخليك والله ما اكدر لو مشايلة طفل ممكن بس الحمل اكلني اكل

- ومنين اجيب يا كلبي

- اخذ سواري هذا بيع وجيبه

- دسكتي انت كل شويه هاك ساعتي هاك سواري

- احسن منايمة بيه واني متزوهرة

- احلها

اتحملت يوم كوا على نفسي .. 

ثاني يوم .. هو طلع عماله اني متر مطلعت غير اللهم املي المبردة مي وارجع اكعد بمكاني حارة ورطوبة وفد لعبان نفس بعمري معايشة بهيج جو .. كلش دا اعاني ..

خطية هو كلش اتأذى علمودي لما شافني هشكل 

راح اتفق ويا ابو اقساط .. واخذ منه سبلت وبلازما وثلاجة وكاونتر وغسالة وكاله باليوم انطيك ٢٠ الف على يوميتي .. وابووالاقساط لانو يعرف الشيخ تساهل وياه

واجوي ولد الشيخ ساعدوه ونصبوا الكاونتر والثلاجة 

بحياتي محسيت بحاجة هالامور واهميتهم انولدت وهم متوفرين اعتيادي بس الواحد ميحس بقيمة الاشياء الا يفقدها ..

عيشة الفقر كلش صعبة 

اني اكدر ادفع بس عباس ميقبل ومتحملة لخاطره .. 

بس الصراحة بعد ما كعد الكاونتر والغراض وشغلي التلفزيون .. وسبلت .. فد عشت جو خاص ابيتي معايشته من كبل

يتسوك ع القدر الممكن خضروات لحم ميجيب كيلوات .. يجيب هيج بجيس كلش قليل .. اني اكوله ما احبه حتى مينحرج ويجيبه .. خطية لانو دا اشوفه يطلع ويا ابن عمه خلفه .. ويشتغل ويتعب ويهلك يادوب يحصل ٣٥ الف ٢٠ لابو الاقساط ١٠ يتسوك بيهن ٥ يشتري منهن جكاير وينطيني الباقي يخلي يمي

مرات منحتاج مسواك تبقاله الفلوس يكولي خليهن يمج اجمعيلي

فجمع تقريبا ٤٠ جاب هيج فراش ينكاله مدات 

هم العرب يستخدموها ما بحياتي استخدمته .. بس شكد فرحت من حابهم وخلاهم بالاستقبال اول مرة احب بيتي واعتز بيه

ومن كد ما ارتاحيت .. كمت احاول اقضي وقتي اتعلم طبخ حتى اسوي لعباس اكل طيب يومية اسوي حاجة مرات انجح مرات اخربها وهو يكولي شنو نقصها

مرات هو يكعد يعلمني ..

رغم عيشة فقر وبسيطة وهو تعبان بس بعمري محاسة بقيمة الحياة وجمالها بكد ما عشتها هافترة ويا عباس

وكلش كلش متفقين حتى منتعارك منتجادل 

يجي من الشغل تعبان حتى لو يصيح اتحمله اكول خطية اشوفها بنفسي لما جنت اتعب بالشغل خلكي يصير ضيق فاكوم اصيح هاي واني شغلي كان مكتبي ومجرد ع الحاسبك فكيف بيه وهو يشتغل عماله كلش انقهر عليه وهو مقدر حبي اله وتحملي

يمكن امور بسيطة ما جنت احس الها قيمة 

بس من يجي من الشغل وجايب مسواك وجايبلي وياه فد قطعة حلا لو علبة نوتيلا شكد افرح ..واشعر بشعور يجنن

وشوية شوية نلم .. ونجيبلنا فد حاجة للبيت 

هو كلش جبير واني ممستخدمه منه غير المطبخ و الغرفة مالتي وهم صايرين بصف بعض .

جانت اجمل فترة تقريبا 

لحد ما فد يوم نايمة خابرني عباس كال : اهلي جايين بالطريق راح اجيب دجاج مشوي اتسوين شي بس بدلي خاف ملابسج خفيفة

كمت سبحت وبدلت 

اندكت الباب .. دخلت الاماية كالتلي هلا بلا متسلم وتباوس 

بس اخته سلمت وباوستني هي واطفالها دا اريد اسد الباب شو مرت اخوه حسناء وجهاله كلهم اجوي !

كلت يلا الف هاا مشتاقيلا ويريدون يشوفوه 

مشت الاماية وهي تتفحص البيت اول مشافت كلاص جاي وصينية وماعون كالت : جا ما عرفتي تخضيهن عايفتهن شني يخضرن لو ما تصيرلج جارة

حجت اخته : يمه مو وكتها يمه هسه خل نصعد نشوف البيت

جان تكول لحسناء : صعدي شوفي غريفة الح لجهالج يكفن مريحات شلونهن صعدي

وصعدت علياء وحسناء مرت اخوه والجهال وراهم 

عفكقدت حاجبي : شنو يشوفون الغرف شيردون

شوية واجا عباس شايل الاكل شمره ع السنك وركض يبوس براسه امه ويحضن بيها .. وهي تكله : بس خو ابويت واسع ونفه .. بالعافية وبالخير

- الخير انت يمه شلونج شخبارج وعلي مشتاقلج

اني بالمطبخ صحت : عباس

- اي حبيبتي اجيت

- صجيجة حبيبي خايب زلمة ومنا جهال اخيتك واخوك ها حبيتي شني ما تستحي

ضحك وكام واجاني : ها كلبي

- جيتهم خطار لو يبقون هنا

- بعدين نحجي ميخالف

-لا ماكو بعدين هسه تكولي خطار لو يبقون

اجت امه : دخيلك ربي جاي اتحاسبينه سنعي كاعدين ابيت الخلفوج .. بيته ورايد يكعد اهله وياه انت يالكطعية ياهو المهيضج وتنكطين بسمج علينا ....