 |
اسكريبت مريم ونوح الفصل الثاني بقلم مريم الجنيدي
_ارجوكِ بلاش تعاقبيني بالشكل دا، والله أنا غلطان بس بلاش تعاقبيني كدا يا مريم أرجوكِ
_ أبعد عني أبعد
لما فوقت و لقيته ماسك أيدي و شكله مرعوب، بس أنا كنت في حالة صادمة، زي الضر.ورب على دماغه
كنت عايزة أبعد عن هنا بأي شكل، عايزة أمشي
_ استنى يا مريم أنتِ شكلك تعبانة، أنتِ كان مغمى عليكي و بقالي حبه بفوقك
_ مغمى علىّٰ ولا متخدره!!
_ أي! أي إللي بتقوليه دا، أنا مستحيل أعمل كدا
_مبقاش مستحيل عليك تعمل أي حاجة، أنا مش واثقة فيك، أنت أكيد خدرتني عشان أقعد، بس لا أنا مش هقعد فيها دقيقة كمان، همشي يعمي همشي
_ قولت مش هتمشي، أنتِ لي مش عايزة تفهمي خوفي، أنا كنت خايف يا مريم، أنا كنت بسعى لحياة كويسة لينا، بلاش تبقى أنانية في رد فعلك كدا؟!
_ يا بجحتك والله و أنت بتقلب الترابيزة و بتطلعني أنا الأنانية، أنا إللي اتصرفت من دماغي و مهتمتش بصحة مراتي و أي ممكن يحصل لها و أنا بديها حبوب منع الحمل بدون علمها، كأنها فاقدة الأهلية و ملهاش قرار تقرر هي عايزة أي، أنا إللي كنت بكذب، أنا إللي كنت ببص في عينيها و أقولها متخافيش بإذن الله هنجيب أحلى طفل، أنا إللي بخبي ياا دا أنا فعلًا طلعت أنانية و أنا معرفش، أنا إللي جبانة و بقول مبررات عبيطة
_ ممكن كفاية أنا قولت أنا غلطان و بعتذر و مستعد أعمل أي حاجة أنتِ عايزاها عشان تسامحيني
_ طلقني يا نوح، طلقني لأن مش قادرة ابص في وشك، مش قادرة أصدق برودك و إنك مفكر اللي عملته بسيط
_ طلاق مش هطلق، وخروج مش هتخرجي، و حياتنا هتستمر
_ آه دا أنت مجنون بقا! أنت مجنون، طب جنان بجنان أهو
بدأت اكسر في كل حاجة حواليا، كنت تعبانة و مرهقة بس بتشبث في آخر حبة طاقة عندي عشان أقدر أخرج، لأن حقيقي كنت خايفة و مش مآمنة و أنا معاه، إللي عمله هدم كل الثقة و كل الأمان
حاول يهديني بس أنا مسكتش غير لما خرج من الأوضة عشان يعملي حاجة اشربها يمكن أهدى، في الوقت دا أتصلت بأهلي و قولتلهم يجوا حالًا ..
_ أنتِ كبرتي الموضوع يا مريم، مشاكلنا نحلها مع بعض
_ أنت مش حاسس أنت عملت أي! مش حاسس بجد؟! أنا همشي مع أهلي حالًا
بابا أتدخل، و دا كانت صدمة لنوح إن كلمت أهلي، بس معرفش ياخد رد فعل لأن لقاهم قدامه
_ يا نوح يابني إللي عملته دا قادر يدمر مستقبل كبر، دي جريمة أنت كدا ممكن تمنع بنتي من فرصة الحمل و الإنجاب، دا تهور أنا مسمحش بي، إللي خلاك تحطلها حبوب زي دي و تضرها، ممكن تعمل أي حاجة تانية
_ بابا الكلام ملوش فايدة معاه، هو مش مستوعب هو عمل أي أصلًا، أنا هاجي معاك، أنا مستحيل أكمل مع شخص غير أمين و كذاب زيه
رغم محاولاته و اعتذراته الكتيرة بس أنا كنت بجد خايفة منه، و مصدومة، وروحت مع أهلي
فضل يبعت ليا
_مريم متسبنيش أنا آسف والله، أنا غلطان و أنا معترف بغلطي
طب ردي عليا، سامحيني والله أنا بحبك و نفسي يكون ليا أطفال منك
أنا كنت خايف والله و اتسرعت، أنا غبي
ممكن تردي عليا و نتفاهم
مريم بقالك شهر عند أهلك و مش عايزة تقابليني
مريم طب تعالي نكشف و نطمن
أنا والله سألت الدكتورة و قالت الدوا دا ملوش آثار جانبية
مريم والله أنا غبي، غبي و حقير بس مش عايز اخسرك
أنا عارف إن غدرت بيكِ و كذبت بس أنا آسف مش هتتكرر والله مستعد أعمل أي حاجة عشان اعوضك
مين مش بيغلط يا مريم، دي أول غلطة ليا أنا عمري ما زعلتك
عارف إن كان لازم أقولك، كان لازم اشاركك، بس... أنا مش هبرر أنا غلطان
ردي عليا بقا يا مريم شهرين بعيد عني كتير أوي والله
_ أنا عايزة أطلق من فضلك، مش عايزة أكمل معاك
_ مش هطلقك يا مريم أنسى
_ هتفضل معلقني بيك و أنا مش عايزة أعيش معاك!
_ دا وقت زعل و هيروح لحاله، قوليلي أعمل أي و تسامحيني
_تبعد عني، و تروح تتعالج، لأن أنت مريض و أنا مش عايزة أعيش معاك
_ يمكن فعلًا مريض، بس حتى لو مريض مش هسيبك
_ روح اتعالج والله أنت مش طبيعي
_ أنا بحبك
_ إللي بيحب حد مش بيأذيه أنت دمرتني
_ أنا آسف والله أنا غلطان، أنا غبي، أنا عملت حاجة مش هسامح نفسي عليها، دي غلطة ... غلطة سامحيني
_ أنت عارف إنك كنت بتدمير هرموناتي أنت عارف إنك ممكن بسببك يجيلي عقم!!
_ أنا والله مافكرتش في كل دا، أنا فعلًا كان تفكيري سطحي، كنت خايف يجي طفل و اظلمه، كنت خايف من المسؤولية، و كنت خايف أقولك، دا ميمنعش إن كنت غلط، كنت أناني و مفكرتش غير في نفسي، كنت ساعات كتير بتردد احطه، و آه يا مريم كان ضميري بيتعذب و أنا شايفك نفسك في طفل، كنت ساعات كتير مش بحطه، و ساعات أرجع أقول لا أنا عايز حياة أفضل لينا كلنا، عايز اكون جاهز، كان شيطان في وداني والله، وجعك كان بيوجعني، و كان وجعي فوق وجعك إن بعمل كدا كنت ببقى مش طايق نفسي، بس يمكن أكون فعلًا جبان.... بس بعد كل دا ورغم كل حاجة أنا مش قادر أعيش منغيرك، والله ندمان، أنا كل يوم بدعي ربنا يغفر لي
عدى شهرين كمان، كان كل الناس بتقنعني إن أرجع، و إن اسامحه، و إن أي إنسان بيغلط، ولو وقفنا على كل غلط الحياة مش هتستمر و كل الناس هتطلق، بس لي محدش شاف وجعي!
_ أنا روحت لدكتور على فكرة، أنا عملت إللي قولتيلي عليه، مش ناوية ترجعي؟!
_ و بعد ما اتعالجت أنا مين يعالج ليا جروحي منك
_ أنا، أوعدك هخليكي تثقي فيا تاني، و مفيش قرار في حياتنا هاخده غير لما نتناقش فيه
_ أنا بقيت خايفة منك يا نوح، متخيل!
_مفيش أي حاجة ليا عندك تغفر ليا غلطتي!؟
_ كان ليك كتير اوي، كان ليك كل الحب بس
_ أنا آسف، أنا آسف إن كسرت الثقة بينا، أنا مستعد من بكرة نروح للدكتور نكشف و مستعد للبيبي، مستعد أكون أب لولادنا، مستعد اعوضك عن كل دمعة و كل وجع، مستعد أعمل أي حاجة عايزاها
_ نوح أنت عارف
_ نوح أتعلم الدرس كويس أوي، و أتعلم إزاي يحافظ على النعمة إللي ربنا عطهاله، و مستحيل يفرط فيها، أنتِ نعمة كبيرة في حياتي، و مش هبطل اعافر لحد ما تسامحيني و ترجعي، هاجي أخدك بكرة ...
_ هديك فرصة واحدة تعوض كل إللي عملته، فرصة واحدة بس....
في قرارات ممكن تدمر حياة أشخاص، قرارات أنانية أوي بنفكر فيها بشكل سطحي، لكن لازم تعرف إن بمجرد ما يتتجوز، قرارات حياتك مش بتبقى فردية، ولازم مشاركة، لازم تعرف العواقب بتاعتها، ولازم متهمش دور شريكك مهما كان أي القرار
تمت
