رواية اختفاء عمران الفصل الثالث بقلم محمود الأمين
لاحظت انه مفتوح.. مش عارف ليه حسيت بخطر، طلعت سلاحي ودخلت لجوه بحرص، لكني لقيت ادم غرقان في دمه، كان مضروب بالرصاص وفي حاجه مسكها في ايده ومتبت عليها جامد.. كانت ورقه مكتوب فيها ماهر صفوان.. لكن فجأة حسيت بخبطه جامده على دماغي ووقعت على الارض وكل حاجه حواليا ضلمت
فتحت عينيا لقيت نفسي على سرير في مستشفى، لكن ايدي كانت متكلبشه في السرير، ولقيت العميد مصطفى قاعد جنبي واتكلم وقال
_ انت كويس دلوقتي؟
= انا فين؟... وليه متكلبش؟!
_ انت متهم بقتل ادم ومقبوض عليك
= انا ما قتلتش حد، انا وصلت لقيته مقتول
_ الكلام ده تقوله في النيابه يا حضره الظابط
...
كنت حاسس اني بحلم، انا بقيت متهم في جريمة قتل!!
بعد ما الدكتور كتب على خروج اخدوني على النيابة، وكيل النيابة كان اسمه عزت ابو الخير.. راجل ما يعرفش ابوه وبيحب يطبق القانون، بدا التحقيق معايا وحكتله كل حاجه حصلت كان بيسمعني وبيهز دماغه وفي الاخر اتكلم وقال:
= اعتبرني مصدقك في كل كلمه قولتها، عندك دليل واحد انه كلامك صح ولا دي مجرد حكايه جاي تحكيها عشان تبرء بيها نفسك.
_ انا لو عندي دليل واحد كنت قبضت على عزيز الالفي، لكن للاسف انا مش معايا اي دليل عليه.
= وانا للاسف مضطر اطبق القانون، اكتب يابي، يحبس المتهم اربع ايام على ذمه التحقيق ويراعى له التجديد في الميعاد القانوني
أنا فجاه اتحولت من ظابط لمتهم وقاعد مع المجرمين في الحجز، لكن المحامي طمني ان الموضوع مساله وقت وهيخلص، وانا ما كنتش قلقان على قد ما المصيبه كانت كبيره، وقتها كنت بفكر في الرساله اللي سابها ادم قبل ما يتقتل،. اللي كان مكتوب فيها اسم ماهر صفوان، الاسم ده كان معلم في دماغي فضلت أبسال نفسي هو مين ماهر صفوان ده؟
اكيد ده شخص ليه علاقه باللي بيحصل، كنت حاسس اني مشتت مش عارف اخد قرار، وتاني يوم طلبت اني قابل رئيس المباحث، خرجوني من الحجز وقابلته:
_ خير يا ايمن بيه، طلبت تقابلني؟
= المرحوم قبل ما يموت، طلب مني اتحرى على اسم، وقال انه ليه علاقه بقضيه اختفاء عمران الالفي، وانا اصلا كنت رايحله بسبب الموضوع ده، فبستاذن حضرتك انك تعمل تحريات عن الاسم ده
_ ايمن بيه، انت قضيتك هي قتل فرد من جهاز أمن الدوله، حضرتك فاهم يعني ايه؟.. واللي انت جاي تطلبه مني دلوقتي، حاجه ما تخصش قضيتك أصلاً.
= يا فندم عزيز الالفي ابن عمران الالفي هو اللي ملفقلي القضيه دي، ادم كان وصل لمعلومات مهمه بتقول ان عمران الالفي لسه عايش، وانا كنت رايح عشان اعرف منه المعلومات دي، حضرتك لو تواصلت مع حد من امن الدوله.. هتتاكد ان عمران الالفي كان بيساعد جماعات للاضرار بالبلد. وهتتاكد كمان انهم عندهم نفس الشكوك دي
= الشخص اللي انت عايز تتحرى عنه اسمه ايه؟
_ ماهر صفوان، عاوز اعرف هل في شخص اسمه كده ولا لا؟
= الموضوع ده هيتم في سريه بس عشان انا عايز اثبت انك بريء، ويارب ما يثبتش العكس
....
رجعت الحجز تاني وبعد 48 ساعه، أخيراً ظهرت الحقيقه
_ تقرير الطب الشرعي جه في صالحك يا ايمن باشا، الطلقه اللي في جسم ادم مش من مسدسك، وكمان الكاميرات اللي موجود على اول الشارع اثبتت ان انت وصلت بعد وقوع الجريمه ب 10 دقايق
= الحمد لله يا فندم، أنا قولت لحضرتك اني مظلوم وماقتلتش حد
_ كان لازم دليل، انت ظابط وعارف احنا ما ينفعش نمشي ورا كلام مرسل
= اكيد طبعا عارف يا فندم
-اكتب يابني.. يخلى سبيل المتهم من سرايا النيابة بضمان محل اقامته
خرجت من النيابة ورجعت تاني لرئيس المباحث اللي اول ماشافني اتكلم وقال:
_ الف مبروك البراءه يا ايمن بيه.
= الله يبارك فيك، متشكر جداً، عملت ايه في الموضوع اللي قولتلك عليه.
_ الراجل اللي انت ادتني اسمه، هاجر امريكا من اسبوع، وما فيش اي حاجه تثبت ان ماهر صفوان ده هو عمران الالفي
= يعني كده خلاص، كل حاجه عملتها راحت وحق بنتي راح.
_ ايمن باشا حاول تنسى وتعيش حياتك خلاص اللي راح مش هيرجع
= عندك حق
_ بالمناسبه، العميد مصطفى كان عايزك.
روحت على مكتب العميد مصطفى.. واول ما دخلت قال
_ الف مبروك، نورت المديريه من تاني
= الله يبارك فيك يا فندم متشكر
_ انت قالب وشك ليه؟ انت زعلان مني؟
= عمران الالفي هرب على امريكا يا فندم، هرب عشان حضرتك رفضت تصدقني
_تاني يا ايمن، هترجع تقولي عمران الالفي تاني، ما تنسى يا اخي بقى الموضوع ده، عمران الالفي مات وما فيش اي دليل انه عايش، وفي تحليل حمض نووي بيثبت ده، ممكن بقى كفايه كده وتركز في حياتك
= حاضر يا فندم، حاضر
.....
بعد مرور 15 سنة كنت وقتها علقت رتبة عميد، قضيه ورا قضيه واترقيت ووصلت وكنت سامع اخبار من الاداره وقتها اني هترقى للواء، انا فاكر اليوم ده كويس كنت في المستشفى بسبب ان الضغط علي عليا شوية، وكان معايا السواق حازم طلبت منه يطلع عشان يسخن العربيه، لكن وانا معدي من قدام الاستقبال سمعت البنت اللي واقفه بتقول لواحدة زميلتها:
_ المريض ماهر صفوان اتسكن في غرفه 14.. كده عندنا كام غرفة فاضية؟
الاسم رن في وداني، معقول، معقول بعد السنين دي كلها عمران الالفي موجود هنا، في لحظه فكرت ان ممكن يكون تشابه اسماء وعشان كده قررت اتاكد بنفسي وطلعت على اوضه 14
لاحظت ان الدور فاضي وما فيش ممرضين معديين فدخلت
كان على السرير قدامي بصيت على وشه عشان اتاكد، ولقيته هو الشخص اللي انا مسكت صورته في يوم من الايام.. وكنت ببحث في قضيه اختفائه.. هو الشخص اللي حرمني من اعز الناس وكان هيلبسني جريمه ما عملتهاش
*********
سكت وانا بحكي لاصحابي لان ما ينفعش احكي اللي عملته وقتها، قربت منه والذكريات كانت عامله زي الوحش اللي بياكل في عقلي وقلبي، بصيت حواليا كويس وبعدها رفعت جهاز الاكسجين من علي وشه
فتح عينيه وبرق وكان بياخد نفسه بالعافيه، كنت بقوله
-انت مش عارف انا مين صح، اكيد مش عارف عشان عمرنا ما تقابلنا بس انت السبب في تدمير حياتي، انت السبب في خساره اعز الناس على قلبي انت اللي حولت حياتي لجحيم وعيشتني فيه لسنين طويلة، كنت بحلم باليوم اللي هطولك فيه انت وابنك وحلفت اني هموتك زي ما كنت السبب في موت بنتي
فضلت رافع من عليه ماسك الاكسجين لحد ما مات
*****
* روحت فين يا ايمن باشا؟.. عملت ايه لما شوفته قدامك على السرير
= هعمل ايه يعني الحكم واكيد سقط من عليه ولكن صورته صوره وبعته للعميد مصطفى اللي كان وقتها تقاعد أصلاً ولما شاف الصوره ورسالتي
اتصل بيا وقالي انت لسه فاكر، انسى انت بقيت لواء خلاص وهو ربنا ينتقم منه
بس يا سيدي خلصت الحكايه
* ربنا يرحمها يا ايمن باشا، تعيش وتفتكر
= طيب انا هستاذن عشان اتاخرت، وعندي شغل بكره الصبح
...
خرجت من عندهم بعد ما افتكرت كل حاجه حصلت، كان نفسي انتقامي من عمران الالفي يكون في النور والجرايد تكتب مصرع عمران الالفي على يد عميد شرطة
لكن المنشت اللي كتبوا الصحفي ممدوح واللي انا لسه محتفظ بيه كان هو اختفاء رجل الأعمال عمران الألفي .
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
