رواية قضية سعدية الفصل الثالث بقلم جمانه السعيدي
سعديه...دخل العريس وطبك الباب
اني جنت كاعده على الجربايه ومدنكه
فتح الكنتور جاب غطى تمدد وكال طفي الضوه
كمت طفيت الضوه ورجعت كعدت
رحيم...تعاي نامي
سعديه...كلبي كام يدك على السريع بلنسبه اليه رحيم واحد غريب
اصلا اني اليوم يله شفته
بعدين شو ما جابو عشى اني ما تعشيت
احنا اخواني بعرسهم كل واحد سويناله صينيه شكبرها مشاوي وفواكه وأشكال واللوان
ايجوز هو تعشى قبل لا يجي
بس ما سئلني اكلتي لو لا
وليش هلبخل يعني اني وامي ونسوان اخوتي وجهال
اتلاثه بس تلث مواعين غير عرس المفروض
الاكل أشكال واللوان
ليش مجاي يحاول يحجي وياي
او على الاقل يتعرف عليه هذا اول لقاء بينا
ليش هيج بارد يعني هما على النومه وبس
اني ماتوقعت ليلة عرسي راح تكون هيج بارده ومابيها طعم عبالك مغصوبين واحد على الثاني
المهم اتمددت بصفه
بدا يقرب عليه بدون اي كلام عبالك واجب علي وجاي يقضي
ماكدر يقرب عليه
حاول مره ثانيه ماكدر راسا لبس دشداشته وكال
خل انام اني تعبان
اني الصراحه فرحت
اريد اتعود علي مايصير هيج
نام واني هم نمت لان تعبانه حيل بس جوعانه
كوه يله كدرت انام بطني تقرقر
الصبح الساعه سبعه اندكت الباب
عمتي....اكعدو صار الصبح خاف تجينا ناس
سعديه...اني اصلا جنت كاعده بس ماكمت من مكاني
استحي اطلع منتظره رحيم يكعد ونطلع سوه
من سمعت صوت عمتي كمت لبست داشداشه وخليت الشال على راسي وطلعت
اني متعوده بيت اهلي اكعد من السته الصبح
جمانه السعيدي
لكيتهم بلمطبخ سلمت عليهم
عمتي كالت اكعدي اتريكي
كعدت خلت كدامي بيضه وحده سلك ونص خبزه
استغربت معقوله هذا ريوك عروسه
اخواني الصبح بيوم عرسهم دخل الهم الريوك للغرفه
كيمر عرب وكل احد ماعون بي عشر بيضات سلك
وماعون دبس
وست كرص خبز وقوري جاي
سعديه.... اخذت البيضه كشرتها واكلتها شربت جاي
كامن البنات يشتغلن اقصد جناينهم
كمت وياهن عمتي كالت اي اشتغلي خاف تبرد لحمتج
يعني قصدها اتعود على الكعده واصير كسلانه
البنات فرحانات بيه كمت اشتغل وياهن
شويه واجت امي جايبه الريوك وجايه
صينيه شكبرها وسلة متروسه ترس
ماعون جبير كيمر عرب وطاسه بيها كيلو دهن حر
وسفطة خبز شكبرها بيها عشرين كرصه
ودبة دبس ودبة راشي وماعون بيض بي تقرببا عشرين بيضه عرب مامطبوخات
اخذتهن منها عمتي وضمتهن وحتى ماكالت تعاي اتريكي
امي سألتني شلونج
سعديه...زينه
امي...اكلتي
سعديه...اي اكلت الحمد لله
مرت حماي طلعت المعجانه تعجن
عمتي صاحت عليها رجعيه هذا الخبز هواي
شويه وكعد رحيم سلم على امي راسا عمتي خلت ماعون الكيمر كدامه وكالت اتريك
امي...خلصتو شغلتكم
سعديه..استحيت من امي كتلها اي
لان اني مامفتهمه السالفه شنووو
كعدت امي شويه ورجعت البيتنا
كمل اكل رحيم وراح سبح وبدل وكعد بالديوانية ( الصاله )
خاف يجبهم احد
الشي الي اني مستغربه منه
عمتي ما سئلتني ولا سئلت رحيم على ليلة العرس
ولا طلبت النيشان
حالها حال كل الامهات احنا هاي الشغله ماشيه عدنا
الولد الصبح يطلع نيشان العروسه
حتى يفتخر كدام اهله انو هو رجال وكدر ياخذ زوجته
بعدين كلت ايجوز همه عاداتهم مو مثلنا
جمانه السعيدي
اجت ناس تبارك النا وعمتي اخذت الواجب كله
كلما تجي وحده تبارك تاخذ الفلوس حتلو النسوان ينطني
الفلوس هيه تاخذهن
واذا لحاف فرشه بطانيه تاخذهن
تكول النسوان جايات علمودي مو علمودج
اني اسكت لان استحي
وهنا فعلا النسوان جايات علمودها
نص النسوان اني مااعرفهن
بس الي يجي من جماعتي او أقاربي الواجب اليه
اجا اليل وكنت خايفه بس مو مثل البارحه
خوفي اقل شويه لان تعودت على المكان
رحيم دخل للغرفه متأخر لان جان عدهم ناس تبارك
علمود العرس
بدل ملابسه ونام كلشي ما حجه وياي
ولا حاول يقرب عليه
اني بلنسبه اليه الموضوع عادي فرحت لان نام
خليت راسي على المخده ونمت
المشكله هو كل النهار عدهم خطار
ولا اجا ولا حجا وياي يعني احنا عرسان
المفروض هو يكون فرحان بيه
على الاقل نكعد نحجي اني ويااا حتى نتعرف واحد على الثاني
اني شفت اخواني اول زواجهم لازكين بلغرفه
مايقبلون يطلعون
حتى الاكل ندخله للغرفه
سكتت كلت ايجوز تعبان ايجوز يريد تخلص هوسة العرس
اليوم الثاني كعدتني عمتي من السته الصبح
رحت وياهم بلمطبخ
كلشي جابته امي امس من اجتني ماشفت منه شي
نفس الشي انطتني بيضه سلك ونص كرصه خبز
اكلتهن وسكتت كلشي ماشفت لادهن حر ولا دبس ولا كيمر
خوما اروح اسئلها اكلت البيضه وسكتت
هم كعد رحيم جابتله ماعون دهن حر ودبس وخبز
اتريك وراح كعد يستقبل الناس
الي محيرني ليش مايحجي وياي
مجاهلني بشكل مو معقول
هذا الوضع ابد ما يطمن لازم اكو شي اني مااعرفه
الغده كان مركه فاصوليا بدون لحم وتمن ابيض
اتغدينا ونضفت المطبخ ويا البنات
ماجان عدنا احد
اجا رحيم للغرفه
جمانه السعيدي
شافني كاعده على الجربايه وشامره الشال
رحيم...هاااكاعده هنا
سعديه...ماعدنا شي خلص الغده والمواعين انغسلن
رحيم..اريد انام ساعه وكعديني
خله راسه عل المخده ونام
اريد احجي وياا بس استحي شراح اكوله
خاف اني ماعاجبته
لو يريد وحده غيري شلون بيه مااكدر احجي ويااا
فات اسبوع كامل واحنا على هذا الحال
لا قربلي ولا حاول حتى بس ليلة العرس
وبعد ماحاول يقرب عليه
وحتى كلام ماكو بينا
بس اذا يريد شي يسئلني وهاي هي
بليل من يدخل للغرفه بس يخلي راسه على المخده ينام
احتاريت شلون اسكت لو اسئله
خاف اكو شي واني مااعرف
بيوم السابع اهلي عزمونا كلنا بيت عيالي كلهم
بس وصلنا البيت اهلي حسيت كلبي انفتح اكو ثكل وانشال من كلبي شكد فرحت من دخلت بيت اهلي
اكلت اكل مو طبيعي احس نفسي صار شهر بدون اكل
الصراحه اكل عيالي موطيب
دائما الطبخ بدون لحم والحد الان ماشفنا الدجاج
ولا السمج
هما بلنسبه الهم الوضع طبيعي متعودين
بس اني متعوده على اكل زين بيت اهلي
احنا ناكل لحم لو سمج لو دجاج للغده
والعشى هم ناكل لحم وبيتنا دائما بي خير من الله مسواك
عيالي مايتسوكون كل يوم
والفواكه مانشوفها بلبيت من نكعد ناكل عمتي تقسم الاكل كل واحد هو وزوجته الهم ماعون واحد تمن وماعون زغير مرك ودائما المركه بدون لحم
بيوم عزموني اهلي اكلت اكل مو طبيعي
عبالك صار شهرده ماماكله
المهم امي سئلتني على وضعي ويا زوجي الي اني كلشي ما مفتهمه منه الحد الان
كتلها كلشي تمام وضعنا طبيعي
ولله استحي احجي بهذا الموضوع حتى ويا امي
من رجعنا قررت اجمع شجاعتي واسئل رحيم شكووو
دخلنا للغرفه وهو تمدد يريد ينام
سعديه...رحيم انت ماتريدني
رد عليه وهو يسحب الغطى على جسمه
رحيم...ياهو كال مااريدج
سعديه...وضعنا مو مال عرسان انت مغصوب عليه
رحيم...لا ما مغصوب عليج
سعديه...شكو فهمني
رحيم..ماكو شي بس تعبان ومو على بالي اقرب عليج
سعديه...شبيه ريحتي مو طيبه مو حلوه
رحيم...اني تعبان اريد انام
وانتي اللج خلك للحجي نامي واسكتي
فات شهر كامل على زواجنا ورحيم ما متقرب عليه
ولا حاول حتى يجرب
الموضوع بلنسبه اله عادي
الي فهمته هو عنده عجز قبل الزواج وكان يتهرب من موضوع الزواج بسبب هاي المشكله
ولذلك اتأخر بلزواج
والضاهر امه تعرف هاي السالفه
لان ساكته والا لها شغل بينا
جمانه السعيدي
هذا الزواج بس حتى الناس تسكت وما تسئل رحيم ليش ماازوج رغم عمره جبير
زواج وهمي واني كنت الضحيه بهاي الزواجه
وهو لان يعرف نفسه مايكدر مجاي يقرب عليه
اول ليله سوه نفسه يحاول حتى يوهمني هو انسان طبيعي
واسكت
واني لان مااعرف كلشي سكتت
لمن صار شهر واكثر على زواجنا واني بعدني بنيه
عدم محاولته يجرب لو تجربه وحده وتهربه مني طول الوكت
حتى مايكعد وياي ولا يحجي باي موضوع
يدخل للغرفه متاخر ويتحجج بلتعب حتى ينام وماااسئله
اي سوال
ولا احاول اقرب علي
يخاف من المواجهه خاف اكشف حقيقته
واني صرت طايحه بورطه اني كلت الامي كلشي تمام
بعد مااكدر ارجع اغير كلامي
هيج موضوع بلنسبه اليه حساس
استحي احجي بي واني افتهمت هذا الشي متاخر حيل
جنت اتوقع اكو مشكله بسيطه وراح تنحل
بس افتهمت من تصرفاته هاي المشكله عنده من زمان
لان لو شي جديد وتوه عرف نفسه عنده عجز
مجان سكتت
على الاقل راح الدكتور لو حاول يروح الشيخ
خاف مسحور
هيج موضوع مهم بلنسبه للرجال
اذاكان سليم ويعرف نفسه مابي شي وصار ويا هيج مستحيل يسكت
لازم يدور ويشوف الاسباب شنو
بس ماطول هو ساكت وأهله ساكتين والموضوع عنده عادي
اذن هو يعرف نفسه من زمان عنده هاي المشكله
جان بقى بلا زواج
ليش يورطني وياااا
اني بعد مااكدر ارجع الاهلي
اني جبيره مو زغيره اهلي فهموني اني جبيره
وتأخرت يله ازوجت
شلون ارجع وبأي عذر وشراح تكول عليه الناس
