 |
رواية ما وراء الاسرار الفصل الثالث بقلم هدير اسامة
تعويذة ايه يا أمينة أنا مش فاهمه حاجه
اهدي وافهميني كويس ، التمثال دا حقيقي ، واللعنة- بتاعته هتدمرنا كلنا .
خدت نفس عميق وحسيت إني ورطتها معايا
ـ أنا آسفة إني حكيتلك يا أمينة بس انتي اللي صممتي تقربي تاني من التمثال .
أمينة حاولت تتمالك أعصابها وخدت تنهيدة وبدون أي مقدمات لقيتها بتقولي
متتأسفيش ، التمثال دا جالك بسببي أنا .
بسببك !! بسببك ازاي ؟
تعالي بس معايا بسرعة نسافر المنيا وهحكيلك في الطريق وربنا يحلها .
نسافر المنيا! انتي متخيلة انتي بتقولي ايه؟
لازم نروح بيت جدي وندور هناك على أي حاجه تساعدنا .
جدك ! المكان اللي جدك مات فيه !! انتي بتهزري يا أمينة
لأ مش بهزر مش أحسن ما نموت هنا .
أمينة هو احنا ممكن نموت فعلا ؟
ـــــــــــــــــــ
من ساعتين تقريبا
لأ يا أمينة متقربيش من التمثال
أمينة ولا كإنها سمعاني وراحت تجيب التمثال من على الأرض لما وقع فجأه
لكن الصدمة الكبيرة إن شوفت التمثال بيقرب من أمينة أكتر ما أمينة بتقربله كإن هو اللي رايح في اتجاهها مش هي وفجأه أول ما لمسته
التمثال طلع نور شديد من عينه
و أمينة فضلت واقفه مكانها مصدومة وأنا بشدها لأ يا أمينة ابعدي
يا أمينة !
يا أمينة
فجأه لقيت صوتي انكتم وأنا بنادي عليها
غصب عني من يأسي قولت لعنة التمثال يا أمينة وفجأه صوتي اتسمع أول ما قولت لعنة التمثال يا أمينة
في ساعتها التمثال رجع لطبيعته تاني كإنه منكسرش والنور بتاعه اختفي ..
لقيت أمينة بتبصلي ووشها أحمر وبتقولي لعنة ايه ؟
شدتها من إيدها وطلعنا بره الأوضه خالص
خدت نفس عميق وقولتلها أنا احكيلك كل حاجه بس سامحيني أنا مكنش قصدي أورطك معايا
أمينة بحزم : احكيلي ايه حصل بالتفصيل
للأسف حكيتلها
أنا حسيت إن التمثال كان عاوز أمينة تعرف باللي حصل كإنها المقصوده ، بس غصب عني معرفتش أعمل حاجه علشان أمنعها ..
ـــــــــــــــــــــــ
نزلنا من البيت علشان نركب أي حاجه توصلنا لعربيات المنيا ، فجأه واحنا واقفين لقينا موكب نقل تمثال رمسيس الثاني ،
أنا فتحت بوي قولتلها أمينة أنا شوفت الموكب دا في التليفزيون هو احنا في سنة كام ؟
أمينة بهدوء: متركزيش مع أي حاجه بتحصل واي حاجه هتحصل ..
ركبنا عربية هتوصلنا لعربيات المنيا و٥ دقايق بالظبط ووصلنا ، الطريق في الطبيعي نص ساعة ، ازاي ٥ دقايق
، أنا مش هركز في حاجه ، أمينة قالتلي متركزيش 💔
حطيت ايدي في الشنطة وجيت أحاسب السواق .. الصدمة إني ملقتش السواق أصلا فجأه صوتت ولقيت الناس اتلمت من صوتي واللي يقولي عملك حاجه يا آنسة ؟ واللي يقول ايه اللي حصل ...
وكلام كتير
فجأه ملقتش أمينة ، فضلت أبص يمين وشمال هي فين ؟؟
أنا ايه جابني هنا !! ايه المكان دا !!
الشوارع كلها فاضية مافيش حد في الشارع
فجأه لقيت إيد بتشدني جامد بطريقة بشعة
صوتت تاني من الخوف وببص أشوف مين ماسكني من ايدي
لقيتها أمينة ولقيتها بتقولي متسلميش نفسك للتوهان ومتركزيش في حاجه ..
أمينة ايه بيحصل !
دي اللعنة
طب ما نموت على طول ليه بيحصل كده .
هي اللعنة كده توهان ٣ أيام وموت في اليوم الرابع ، ولازم نوصل لأي حاجه قبل اليوم الرابع
قلبي فضل يدق جامد وأنا بقولها
ولو موصلناش يا أمينة!
أمينة بثبات
هنوصل ...
أنا أول مره أشوف أمينة ثابته كده ، أمينة طول عمرها كتومه وهاديه ، أنا عمري ما شوفتها كده ..
ــــــــــــــــــ
ركبنا العربية واحنا ماسكين ايد بعض جامد ، وأمينة لقيتها بتقولي
جدي اتورط مع ناس في حوار مقبرة ، وكان لازم يكون في كبش فدا يفتحوا بيه المقبرة دي ، ولازم يكون طفل ، والطفل دا المفروض أنا ..
ايه انتي! جدك كان هيموتك علشان تمثال؟!
لأ جدي فهموه إني هنزل معاهم بس وهنطلع كلنا
جدي وافق على الأساس دا . لكن سمعهم بيتكلموا إنهم هيراضوه بعد فتح المقبرة بحاجه زيادة علشان يسكت وكده وإني كبش الفدا..
وبعدين ..
وبعدين جدي هربني ورجعلهم ، لقاهم كلهم واقعين على الأرض مدبوحين والمقبرة مفتوحة مافيهاش غير تمثال واحد ..
شكله ايه التمثال دا؟
هو التمثال اللي معاكي في الشنطة .
ايه ! انتي شوفتيه مع جدك .
للأسف جدي خده وروح بيه البيت وافتكر إنه كسب بدون خساير ، لكن فجأه جدي بدأت تجيله هلاوس وبعد ٣ أيام مات والتمثال اختفى .
طب مين عارف الحكاية دي ؟
ولا حد ، أنا بس اللي عارفه
بس انتي قولتي إن جدك هد البيت وصمم يحفر بنفسه .
المقبرة كانت تحت البيت .
أومال رايحين بيت مين دلوقتي؟
بيت جدي التاني اللي خدني هربني فيه .
أمينة أنا خايفه .
وأنا كمان خايفه ، لكن ما باليد حيلة لازم ننقذ نفسنا .
طب ليه التمثال دا ظهرلنا احنا ؟ وليه أنا بالتحديد .
جدك كان من ضمن اللي ماتوا في المقبرة .
جدي! جدي أنا !! ازاي
جدي قالي قبل ما نروح المقبرة إنك جايه معانا وهنلعب أنا وانتي هناك ، بس انتي مجيتيش ، أنا بس اللي جيت .
بس أنا مش فاكره حاجه ولا فاكره إني روحت المنيا قبل كده .
مسألتيش نفسك انتي مقطوعه من شجره ليه وفين أهلك؟
سألت بس أنا ملقتش أي إجابة .
جدي كان طول الفتره اللي بيهلوس فيها كان دايما ماسك ورق بيكتب فيه مذكراته وهنلاقي فيه الإجابة لكل حاجه .
قصدك تقولي إن أنا وانتي اللي فاضلين من عائلات الناس اللي دخلوا المقبرة .
بالظبط .
طب والرسائل اللي بتتبعتلي على الواتساب
مافيش رسائل دي مجرد هلاوس .
فجأة لقيت العربية وقفت والسواق نزل يشوف العطل فين
فجأه ملقتش أمينة جنبي
بصيت ورايا
ويارتني ما بصيت
لقيت منظر غريب مش قادره أتصوره .
لقيت كل الركاب عباره عن مومياوات ملفوفه بالأبيض وأنا لوحدي اللي في العربية بس اللي في العربيه ..
فضلت أنادي بأعلى صوت يا أمينة
يا أمينة
يا أمينة امسكي ايدي
