رواية جثة المركب الفصل الثالث بقلم محمود الأمين
كان صوت الجهاز بتاع الانعاش، الراجل كان بيموت ولقيت شروق خرجت بره الاوضه وبدات تنادي على الدكاتره والممرضين، مش عارف ايه اللي حصل؟!
مرة واحدة الراجل قطع النفس
الدكتور دخل وطلب جهاز صدمات الكهربا بسرعة وطلب مننا نستنى بره
شروق كانت عماله تعيط وبتقول هيروح زي ما سعاد راحت، حاولت اهون عليها وفهمتها ان ما فيش حاجه من دي هتحصل وان شاء الله هيكون كويس
رجعت طلعت تليفوني ورنيت على معتز اللي كان بيكلمني وبيقول انه عرف القاتل
اتصلت بيه مره واتنين، بس ما كانش بيرد عليا، استغربت هو مش بيرد ليه؟!
وقبل ما اتحرك من المستشفى عرفت ان والد سعاد دخل في غيبوبة وموضوع استجوابه بقى مستحيل
...
رجعت على المديرية وقتها لقيت هوجة، ولقيت العميد حسام بيستدعيني لمكتبه ما كنتش فاهم ايه اللي حصل وانا غايب، بس روحت على المكتب عنده واول ما قعدت اتكلم وقال
_ وصلت لفين في القضيه يا حضره الظابط؟
= هانت يا فندم قربنا جداً
_ ايوه يعني قدامك قد ايه؟!.. طبعا انت مش عارف ان في اتنين متهمين كانوا هيخلصوا على زميلهم التالت في الحجز بس قدرنا نلحقه
= مين يا فندم الاتنين وزميلهم التالت؟
_ المتهمين في قضيه الريس شحته.. سالم وكارم كانوا هيخلصوا على عثمان ومن الصبح الرائد معتز بيحقق في الموضوع
= طيب وعرف السبب او هما عاوزين يعملوا كده ليه؟
_ ما هو ده المطلوب، العيال اللي تبعنا في الحجز قالوا كلام خطير جداً عن القضية، قالوا انهم سمعوا سالم وكارم بيقولوا لعثمان انت السبب في اللي احنا فيه ولو ما تكلمتش احنا هنتكلم بس وقتها عثمان هددهم بموضوع قديم يعرفوا وهو ده السبب اللي خلاهم عاوزين يخلصوا منه
= بس التحريات اللي اتعملت ما فيهاش اي حاجه تخص عثمان
_ اكيد تحريات ناقصه، اكيد فريق البحث الجنائي ما شافش شغله كويس، المطلوب منك دلوقتي انك تروح للرائد معتز المكتب وفي اسرع وقت انا عاوز حل القضيه دي مفهوم يا حضره الظابط
= مفهوم يا فندم
...
روحت على المكتب واول ما دخلت لقيت سالم بيتكلم مع الرائد معتز وبيقول
_ احنا مش هنروح في ده يا باشا بسبب واحد غبي زي ده، انا هحكي لسيادتك
اول ما شافني كان هيسكت بس انا طلبت منه يتكلم وقعدت على الكرسي وكمل كلامه وقال
_ عثمان وسعاد هما اللي قتلوا الريس شحته بالاتفاق مع بعض، وسعاد كمان ما ماتتش سعاد لسه عايشه
= لا واحده واحده كده عليا، وعاوز اسمع الحوار من اوله وعلى اقل من مهلك احكي ايه اللي حصل بالظبط
_ حاضر يا باشا، هحكي كل حاجة
الموضوع بدأ لما الريس شحته جه في يوم المركب، ومعاه واحد غريب ما نعرفوش عرفنا عليه وقالنا اسمه عثمان وعرفنا انه من الجيزه مش اسكندراني زينا، بس كان باين عليه واد غلبان جاي ياكل لقمه عيش بالحلال وخلاص، في الاول كان الموضوع عليه صعب عشان عرفنا انه اول مره يشتغل في البحر وكمان مش اسكندراني لكن بعد كده بدأ ياخد على الشغل، كان بيقبل الاهانة في الوقت اللي انا وكارم كنا بنرفضها وبنتخانق مع الريس شحته وكنا مستغربين ازاي الشخص ده قابل على نفسه الاهانه دي!!
كان بيقول حاضر نعم على اي حاجه سواء كانت صح او غلط، والريس شحته يحب البني ادم اللي يبقى في طوعه، وعشان كده بدأ يعامله كويس ودخله بيته وكل معاه عيش وملح
لكن عشان هو نجس بص لمراته... سعاد اللي كانت اصلا بتتعامل باسوء طريقه من جوزها، يعني عثمان ليها كان طوق نجاة شخص ظهرلها في وسط العتمة
في البداية ما حدش كان ملاحظ حاجة، لكن لما اتكررت زياراته على بيت الريس شحته وخصوصا في غيابه بدانا نفهم ان في حاجه مش مظبوطة
ولما واجهته ما انكرش لا ده قال بكل بجاحة انه فعلاً على علاقه بسعاد وما حدش فينا قدر يتكلم عشان....
= عشان ايه؟
وهنا رد عثمان وقال
_ عشان البضاعه اللي كانت على المركب اللي هي المفروض تبع المعلم سليم واللي بعد كده اختفت سالم وكارم هما اللي سرقوها من على المركب بس انا ما رضيتش اشترك معاهم، ولما سالم عرف سري هددته اني هعرف الريس شحته وبقت حاجه قصاد حاجه
= طيب كمل انت يا عثمان.. قتلتوه ازاي ومين كان صاحب الفكرة؟
_ سعاد هي صاحبه الفكرة، قالت انها مش قادره تعيش مع الراجل ده تاني، بس كانت عاوزة سم يكون بطيء المفعول، عشان ما حدش يشك فيها.. واحد ومات في سرحه بحر بتحصل لكن لو مات دلوقتي وفي البيت ومره واحده الناس هتشك فيها
انا بس كلمت واحد معرفه شغال في معمل تحاليل، وعملي تركيبة عباره عن سم بطيء مفعول بس اخد فلوس كتير، وسعاد دفعت ما كانش عندها اي مشكلة، كل حاجه كانت ماشيه تمام وعلى الشعرة، لحد قبل التنفيذ بيوم
كان جوزها بره وكنت معاها في البيت، لكن فجأة لقينا اختها شروق داخله علينا، واول ما شافتنا كانت هتفضحنا وتخرب الدنيا، جريت وكتمت بوقها، وقولتلها لو اتكلمت هقتلها كانت خايفه مني وعشان كده سكتت، بس لما شحته مات واتكشف ان الموضوع في شبهه، هي رجعت وهددت وقتها قررت استغل الشبه اللي ما بينهم وعرفت ان سالم وكارم اتقبض عليهم والحكومه بتدور عليا انا كمان، كان لازم الموضوع يخلص بسرعة طلبت من سعاد تتصل بشروق اختها واول ما جت البيت ضربناها على دماغها وكتفناها.. كنا هنفتح شويه الغاز وهنخرج من البيت لحد ما تتخنق وتموت وكنا هنخفي جثتها
لكن اللي ما عملناش حسابه ان والد سعاد يجي في اللحظه دي، البيت كان كله ضلمه وهو مش معاه تليفون فعشان ينور لنفسه ولع بالولاعه اللي معاه فحصل الانفجار، ما اعرفش ايه اللي جابه في الوقت ده، بس اكيد شروق كانت معرفاه كل حاجه ولما اتاخرت جه على بيت سعاد عشان يشوف هي اتاخرت ليه؟!
سعاد عرفت ترسم الدور وقالت ان هي شروق وان اللي ماتت هي سعاد وبس هو ده كل اللي حصل
...
كنت لسه هرد عليه لكن افتكرت انى سايب سعاد مع ابوها في المستشفى، طلبت من الرائد معتز انه يرجع من المتهمين على الحجز وجريت طلعت على المستشفى كان لازم الحقها
واول ما وصلت هناك لقيت الامن ماسك سعاد، والدكتور قال
_ انا كنت لسه هكلمك، المجنونه دي كانت عاوزه تخلص على ابوها، الممرضه دخلت عليها الاوضه لقيتها بتكتم نفس ابوها بالمخدة بس الحمد لله قدرنا ننقذ الراجل
...
اتقبض على سعاد، ما كنتش مصدق الجحود اللي في قلبها قتلت جوزها واختها التوأم ودلوقتي كانت بتحاول تخلص على ابوها، ماكانش فارق معاها اي حاجة
ولما وصلنا المديرية اكدت باعترافاتها على كلام عثمان، وعرفنا مين هو الشخص اللي ادى التركيبه السامه لعثمان بس للاسف طلع سافر بره، والموضوع اتحول للمحكمة.. ومش قادر انسى كلام القاضي اللي وجه كلامه لسعاد وقال
_ ازاي قدرتي تعملي كده؟.. طيب جوزك وكان بيعاملك وحش، رغم ان ده مش مبرر للقتل.. لكن تقتلي اختك اللي من دمك وكنتب هتقتلي ابوكي
= اختي كانت طول عمرها بتغير مني، وبابا بيفرق ما بينا في المعاملة حتى في موضوع الجواز، هي اتجوزت المدرس المحترم وانا اتجوزت الريس بتاع الصيد والمراكب، رغم اني رفضت بس هو اجبرني على الموافقة انا كنت بكرههم ولما جات الفرصه اني اخلص منهم ما ترددتش
_ كل السواد ده جواكي لاهلك، لا حول ولا قوه الا بالله
...
المحكمه حكمت على عثمان وسعاد باحاله اوراقهم الى فضيله المفتيى، وبالنسبه لسالم وكارم ما كانش فيه اي حاجه تدينهم في موضوع المخدرات، ما كانش في اي ادلة وعشان كده خرجوا
والد سعاد اتوفى في المستشفى بعد اسبوع من الحكم، وقال قبل ما يموت انا مش مسامحها وغضبان عليها ليوم الدين
...
وبس، التعامل والتفرقة بياثروا فعلاً على البني ادم، والخيانه بقت اسهل حاجة نداري بيها على وجعنا
خلصت القصه وكل واحد اخد اللي يستحقه.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
