رواية جثة سليم الفصل الثالث بقلم محمود الأمين
تليفوني رن واللي كان بيتصل مدام زينب.. رديت عليها وطلبت منها تكلمني كمان نص ساعه عشان مش فاضي لكنها ردت عليا وقالت
_ يا باشا انا افتكرت حاجة، وما كنتش مركزه بسبب الحزن على ابني
= حاجه ايه يا مدام زينب؟
_ اليوم اللي اختفى فيه سليم، عمته جات لحد البيت وطلبت منه يروح معاها عشان يساعدها في تصليح الغسالة، اصل سليم رغم صغر سنه كان ربنا مديله موهبه في موضوع الاجهزه الكهربائية، ومن بعدها سليم ما رجعش البيت، ولما روحت سالت عليه عندها قالت انه مشي من بدري وانها ما تعرفش عنه حاجه ومستغربه ان ماروحش
= طيب يا مدام زينب، انا هخلص الحاجه اللي في ايدي واول ما ارجع المكتب هكلمك تيجيلي
_ تمام يا باشا
...
قفلت المكالمه مع مدام زينب وبصيت لعزت الصغير وطلبت منه يتكلم.. فاتكلم وقال
_ شوف يا باشا، انا هحكي كل حاجه من البداية عشان حضرتك تفهم الموضوع مشي ازاي؟
= طيب يا عزت احكي من الاول وانا سامعك
_ حضرتك تسمع عن الشخص الزوهري؟
= لا ايه الشخص الزوهري ده؟
_ ده شخص بيتولد بمواصفات خاصة، وبيكون مطلوب عند الدجالين والسحرة عشان دمه بيفتح المقابر الاثرية
= ايوه ايه داخل الكلام اللي انت بتقوله ده بسليم؟
_منا جايلك في الكلام يا باشا.. انا وقتها كنت شغال مع الشيخ عمار الفولي هو مش شيخ يعني هو دجال في اليوم ده طلب مني انا اروح معاه مشوار، كان الوقت متاخر.. ووقتها وصلنا قدام بيت واحده اسمها فوزيه والشيخ عمار خبط على الباب
فتحلنا واحد عرفت بعد كده ان اسمه ربيع، وانه يبقى اخو فوزية، واللي عرفته ان تحت بيت اللي اسمها فوزيه دي في مقبره اثريه وهما جايبين الشيخ عمار عشان يفتحها
الموضوع كان في البداية مجرد مقبره هتتفتح وكل واحد هياخد نصيبه، والاكيد انهم جايبين الشيخ عمار عشان حارس المقبره اللي بيكون من الجن
لكن الموضوع اختلف لما وصلنا للمقبره فعلاً، وقتها الشيخ عمار اتكلم وقال
_ حارس المقبره طالب دم شخص زوهري، سنه مايزيدش عن 15 سنه وما يقلش عن 10 سنين
وقتها رد على اللي اسمه ربيع ده وقال
= وانا هجيبلك الشخص ده منين؟.. وبعدين يعني ايه زوهري؟
..
وقتها الشيخ عمار فهمه يعني ايه الشخص الزوهري، بس كان صعب اننا نلاقيه بسهولة وفضل الموضوع ده متعلق شهور، لحد ما في يوم انا كنت في ميكروباص وكان راكب جنبي عيل عنده حوالي 12 سنه وهو بيديني الاجره عشان احاسب شوفت ايده وكان فيها كل العلامات اللي تثبت انه شخص زوهري، استنيت لحد اما نزل ونزلت وراه عشان اشوف هو ساكن فين؟!
والمفاجأة انه طلع ساكن في نفس المنطقه اللي ساكنه فيها الست فوزيه واخوها ربيع
وبلغت الشيخ عمار يومها، ولما بلغهم كانوا عاوزين يعرفوا الواد ده مين؟
فانا شاورتلهم على البيت اللي دخلوا، لكن وقتها الست فوزيه دي قالت
_ يا نهار اسود، ده بيت اخويا والواد اللي انت تقصده ده سليم ابنه
ورد ربيع وقال
= كده الموضوع ده تنسيه يا فوزية، لحد ما نلاقي حد تاني
بس وقتها الشيخ عمار دخل في الكلام وقال
_ وليه نشوف حد تاني؟.. هو انتوا فاكرين ان الموضوع سهل، اننا نلاقي شخص زوهري في المنطقه هنا تاني صعب، فكروا في الفلوس والعز اللي هتبقوا فيه وسيبكم بقى من موضوع القرايب وابن اخويا وابن اختي وركزوا في المصلحه اكتر
...
الاتنين بصوله واقتنعوا بكلامه، وبدأوا يخططوا عشان يشوفوا حل يقدروا يجيبوا بيه سليم لحد البيت، لحد ما الست فوزيه قالت انها هتتصرف
وفعلا عرفت تجيب الواد عندها البيت، والمفروض اليوم ده كنت هنفذ بالليل لكن الشيخ عمار بعتني مشوار للمقابر بس ده مشوار ملهوش علاقه بحوار سليم، كان حوار تاني ليه علاقه بنبش مقابر، ومن حظي الهباب اتقبض عليا يومها
بس بعد كده عرفت، انهم قتلوه بس برضه ما عرفوش يفتحوا المقبره، بس موضوع تقطيع الجسم ده ماحصلش قبل كده، وماعرفش هما عملوا كده ليه؟
......
خلص عزت كلامه وانا كنت بغلي كان نفسي امسكه واقتله في وقتها، لكنى قولتله
_ هطلعك من هنا، وهتقول الكلام ده في محضر رسمي وهتقوله كمان قدام النيابة فاهم ولا مش فاهم
= فاهم يا باشا تحت امرك
...
خرجت من السجن وفي ظرف 24 ساعه قدرت اجيب تصريح خروج للمسجون، واخدنا اقواله في محضر رسمي، وطلع امر بالقبض على فوزية ربيع والدجال اللي اسمه عمار, دخلت فوزية وربيع مع بعض، ووجهت كلامى لفوزية في البداية، وقولتلها طبعاً انتي عارفة المرادى انتي هنا ليه؟
فردت وقالت
_ لا.. جايبني ليه تاني هنا يا باشا؟.. ما انا حكيت كل اللي عندي
= كل اللي عندك، بعد ما قتلتوا الطفل مين اللي قطع جسمه انتي ولا ربيع؟
_ قتل.. قتلنا مين يا باشا؟
= كل حاجه اتعرفت يا فوزية، الشيخ عمار والمساعد بتاعه عزت الصغير اعترفوا على موضوع المقبره الاثريه ودم الشخص الزوهري
_ انا ما اعرفش حد بالاسامي دي؟
= الطفل دخل عندك وما خرجش بشهاده الجيران، ده غير امه اللي قالت انه كان معاكي اخر حاجه قبل ما يختفي، وباعتراف الدجال والمساعد بتاعه القضيه لابساكي انتي واخوكي ربيع، فالاحسن تعترفي عشان ده هيحسن موقفك في القضية
سكتت شوية
وبعدها اعترفت بكل حاجة
_ كل كلام الشيخ عمار والمساعد بتاعه حصل، الطمع كان عميني والانتقام من اخويا اللي اكل ورثي، وكان معايا ربيع اتفقنا على كل حاجة، وربيع هو اللي قطع الجثه بمنشار كهربا عشان ما حدش ياخد باله واحنا خارجين بيها من البيت
انا عارفه ان حكم الاعدام قليل عليا، بس صدقني انا ندمانة والله العظيم ندمانة
...
بصيت لربيع اللي كان ساكت وقولتله
_ ايه يا معلم ربيع، مش سامعلك صوت يعني، ما تشارك معانا في الحوار اللذيذ ده
= عاوزني اقول ايه يا باشا؟
_ كلام اختك صح ولا لا؟
= حصل يا باشا، احنا اللي قتلنا العيل الصغير وانا اللي قطعت جسمه بمنشار الكهربا
_ بالسهوله دي يا ربيع.. بتعترف انك قتلت ابن اخوك وقطعت جسمه بالمنشار
= زي ما هو بسهوله قبل على نفسه ياكل الميراث بتاعنا، وكان عايش متمتع بيه هو وعياله، فيها ايه لما يعيش القهره اللي كنا عايشينها ولا احنا مكتوب علينا القهرة والزعل وهو مكتوب عليه الفرحه
_ ايه السواد ده؟.. بس ده مش مبرر انك تقتل ابنه، انتوا مستوعبين عملتوا ايه؟.. لو مستوعبين تبقى كارثة
انتوا قتلتوا عيل صغير ما كملش 15 سنة عشان طمعكم وجشعكم وبعد كل ده، عمار طلع نصاب وما طلعش فيه مقبره ولا حاجة واهو هتتقدموا للمحاكمة واقدر اقولك انها اعدام ما فيهاش كلام، واظن انك عارف الكلام ده
= صدقني يا باشا مش فارقه، انا عارف من بدري ان دي النهايه بس اذا كانت فوزيه ندمانه او بتمثل قدامك انها ندمانه انا بقى مش ندمان ولو رجع بيا الزمن هعمل اللي عملته ده مليون مرة
_ انت لا يمكن تكون بني ادم، وانا لو عليا اعدمك بايدي بس للاسف انا بيحكمني قانون مش زيك شايفها غابه
...
وبعد ما خلصت تحقيقات مع كل المتهمين واللي فيها اعترف عمار والمساعد بتاعه بكل حاجة ، اترفع المحضر للنيابة، الاستاذ حامد ومراته كانوا مصدومين وهما بيسمعوا اقوال ربيع وفوزية ما حدش فيهم كان قادر يقتنع ويصدق انهم عملوا كده فعلاً
حاول الاستاذ حامد انه يقابلهم قبل ما يتعرضوا على المحكمة لكن الطلب اترفض، ما حدش كان عارف الراجل ده ممكن يعمل ايه لما يشوف اللي قتلوا ابنه قصاد عينيه
...
ويوم المحاكمه اصريت اني احضر بنفسي، المحامي بتاعهم ما كانش عنده حاجه يقولها، والنيابة كانت بتطالب باعدام المتهمين
المحكمه حكمت على الدجال عمار بالحبس لمده 15 سنه للتحريض على القتل وعلى المساعد بتاعه بسنة انا مع الشغل لممارسه اعمال السحر والدجل
وحكمت على ربيع وفوزية من اول جلسه باحالة اوراقهم الى فضيله المفتي
فرحه زينب في القاعة مع دموعها اللي كانت نازلة وطبطبت جوزها عليها انه اخيرا حق ابنهم رجع كانت دي هي النهايه المثالية لقضية سليم
انا عدي عليا قضايا كتير ما شفتش بشر بالبشاعه دي، بس فعلاً صدق اللي قال اننا بقينا شياطين ماشيه على الارض بنعمل اللي يرضينا وبس وناسيين ان في ربنا ناسيين يوم الحساب.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
