رواية جريمة عائلية الفصل الرابع بقلم محمود الأمين
_ انا مش عارف انت هتصدقني ولا لا؟.. بس الدبله دي كانت مع صابرين، انا كنت سايبها في بيتي
= حضرتك مدرك انك جاي دلوقتي تقول ان اللي قتل ابنك هي امه
_ انا فكرت كتير قبل ما اجي، بس للاسف دي الحقيقة، الدبله كانت في بيتي وصابرين شافتها معايا
= طيب ومراتك تعرف عاطف منين؟
_ عاطف، للاسف كان صاحبي واخويا كان اقرب واحد ليا، دخل بيتي الاولاني ايام ما كنت متجوز نعمه ودخل بيتي التاني اللي متجوز فيه صابرين، وشاف الاتنين يعني صابرين تعرفه
= استاذ اسامه، انا عاوزك تركز في الكلام اللي انا هقوله، لحد ما انت جيت وقولت الكلام ده كان الشك كله في مراتك الاولانيه نعمه، خصوصا انها كانت مدرسه في نفس المدرسه اللي كان فيها عاطف، بس كده مراتك ما قتلتش ابنك بس، مراتك كانت بتخونك مع عاطف
_ اللي تقتل ابنها ممكن تعمل اي حاجه، اوعى تفتكر ان انا مستغرب انت لو قلت ايه انا هصدقك، انا لما افتكرت اللي حصل كنت هاخد اكبر قرار غلط انا كنت هخلص عليها، بس انا ما اقدرش اقتل رغم كل حاجه اتعرضت عليها الفتره اللي فاتت، انا اضعف من اني اعمل كده
= طيب يا استاذ اسامه، احنا هنقدم الكلام ده للنيابة واكيد هيطلع اذن بالقبض على مراتك ولو اعترفت هتسهل علينا كتير أوى
_ اكيد مش هتعترف بسهوله، دي حيه ما اعرفش ازاي قدرت تعمل كده في ابنها
= انا عاوزك بس تهدى، وما تروحش البيت دلوقتي خالص لحد بس ما نقبض عليها
....
كنت مش مصدق اللي بسمعه وبتمنى يطلع كلام اسامه غلط، انتوا عارفين يعني ايه ام تقتل ابنها؟.. وتبيع اعضائه ده احنا كده في اخر الزمان، عقلي كان رافض يصدق، كنت بقول مستحيل ده يحصل اكيد الموضوع في حاجه غلط
اتاخد كلام اسامه في محضر رسمي وانه بيتهم مراته صابرين ان هي اللي ورا خطف ابنه وقتله، والنيابة طلعت اذن ضبط واحضار فعلاً رغم خوفي في البداية انها ترفض، المهم اتحركت قوه عشان تقبض عليها، طبعاً كانت مصدومه وهي شايفه الحكومه بتلبسها الكلبشات
وبعد شويه كانت واقفه قدامي، واول ما شافتني سالتني
_ هو انا مقبوض عليا ليه يا باشا؟.. انا ما عملتش حاجه؟
= متاكده انك ما عملتيش حاجه يا صابرين؟
_ ايوه متاكده، انا كنت قاعده في بيتي وانتوا جيتوا وقبضتوا عليا
= عارفه وانا صغير يا صابرين، سمعت انه في قطه اكلت عيالها كنت مستغرب ازاي ده يحصل؟ وكان المبرر وقتها انها اكلتهم عشان خايفه عليهم عمري ما اقتنعت بالكلام ده!.. ازاي ام ممكن تأذي عيالها
لحد ما جات القضية بتاعت ابنك، صعبتي عليا وكان قلبي محروق على ابنك اللي وقع في ايد ناس ماعندهمش رحمه، ما استكفوش بالقتل دول فتحوا جسمه وخدوا منه كل حاجه، في مقابل فلوس كتير من ناس عاوزين يشوفونا دايما في خراب
لحد ما جالي جوزك وقدم بلاغ فيكي انتي، اتهمك انك قتلتي الولد
_ جوزي قدم فيها بلاغ اني قتلت ابني؟.. ده اكيد مجنون
= والدبله، دبله رحيم اللي كانت معاكي ولقيناها في مكان الجريمة، جوزك قال ان الدبله دي كانت في البيت، ممكن اعرف وصلت ازاي الشقه اللي اتقتل فيها ابنك؟
_ ما اعرفش، بس انا مستحيل اقتل ابني، مستحيل
....
كان باين عليها التوتر والقلق، وعشان اخليها تعترف اضطريت اكذب واشوف رد فعلها عامل ازاي
= طيب والكاميرات اللي صورتك وانت داخله الشقه اللي عايش فيها عاطف واللي اتقتل فيها بسبب السم اللي انتي حطيتيه في القهوه، ايه عندك مبرر انك روحتي الشقه اللي كان فيها عاطف
برقت ما قدرتش تخبي اكتر من كده وانهارت تماماً، واتكلمت وقالت
_ انا هعترف بكل حاجه، بس صدقني انا قتلت عاطف عشان انتقم منه، هو اللي قتل ابني مش انا اللي قتلته، هو اللي غير في الخطة واخد ابني مكان الولد اللي كنا متفقين انه يخطفوا
الموضوع بدأ بعد سفر جوزي بسنه ونص، اسامه اللي عمره ما عملني على اني بني ادمه كان متجوزني عشان ينسى الهانم اللي اسمها نعمة، كنت عارفه انه لسه بيحبها بس كنت مستحمله وساكته
بس انا ست وعندي احساس، وضعفت قدام اول كلمه حلوه اتقالتلى كانت من عاطف، في الاول كان بيحاول يتودد ليا وانا كنت ملاحظه ده بس بعد كده الموضوع اتطور وبقي علاقة
اوقات كتير كنت بستحقر نفسي، كنت بفكر انتحر لكن في النهايه كنت برجع
لحد ما في يوم جيه عاطف وعرض عليا عرض وقال
انه دخل على حاجه اسمها الانترنت المظلم وهناك عرف انهم بيتاجروا في كل حاجه غلط، لحد ما وصلنا لموضوع اننا ممكن نخطف طفل في البدايه كنت رافضه لكن هو اقنعني خصوصا لما اتواصل مع الناس دي وعرضوا علينا مبلغ كبير اوي، مبلغ مانحلمش بيه وافقت، بس كنت متفقه معاه اني انا اللي هحدد الطفل، كنت مختاره واحد عنده خمس اخوات يعني، اهله هيزعلوا عليه شويه بس لسه عندهم خمسه، كان لازم ابان اني بره الصوره خالص بس ما كنتش اعرف ان الغبي لما مش هيلاقي الواد ده بيلعب مع العيال في الشارع هيخطف عيل غيره من غير ما يرجعلى، وعشان ربنا ينتقم مني خلي عاطف يخطف ابني انا، هو ما كانش يعرف شكله، كل المقابلات كانت ما بينا في الشقه اللي كان عايش فيها وحتى المره الوحيده اللي جه ودخل فيها بيتنا ابني كان لسه حته لحمه حمرا
في اليوم ده اتصل بيا وقال انه خطف وخلص وخرج الاعضاء من جسم الطفل، وفي نفس الوقت انا كنت بدور على ابني
طلب مني اجي على العنوان اللي هيبعتهولى عشان اساعده في تنضيف الشقة ولكن العنوان كان عنوان شقه باسم اسامه والشقه دي انا عارفاها كويس بس ما كنتش اعرف ان عاطف مأجرها ولما دخلت الشقه اتصدمت، اتصدمت لان اللي على سرير التشريح كان ابني انا صرخت في عاطف اللي حط ايده على بقي عشان ما اتكلمش، فضل يقنعني ان الفلوس اللي جايه هتعوضني بس انا ما كنتش عايز عوض انا كنت عاوزه ابني، ولما عرف اني روحت وبلغت عن اختفائه وبلغت حضرتك خاف وساب كل حاجه مكانها وهرب، في الوقت ده انا كنت بين نارين اهرب واسيب كل حاجه ولا افكر ازاي البسها لحد غيرنا، وقتها افتكرت ان الدبله بتاعت رحيم في شنطتي طلعتها ورميتها على الارض وهربت انا كمان من الشقه من غير ما حد يشوفني
من وقتها وانا بخطط ازاي اقتل عاطف.. انا ما كنتش اعرف مكانه لحد ما هو كلمني ورجع تاني للنغمه بتاعة اني وحشته وعاوز يشوفني
وقتها كنت اتصرفت في سم الزرنيخ، روحت عنده وعملتله القهوة بايدي كنت مرتبه كل حاجة، شغلت تسجيل قديم على تليفونه عشان اللي يدخل الشقه يعرف ان في حد جوه، وسرقت التليفون التاني اللي كان بيكلمني منه، اه ما عاطف كان معاه تليفونين، مسحت كل بصماتي من المكان وانا اللي بلغت عن مكانه، الخطه كانت ماشيه تمام وكنت فاكره اني عمري ما هتكشف، لكن واضح اني كنت ناسيه موضوع الدبله كنت فاكره السنين اللي غابها جوزي عني هتنسيه هو كان سايب الدبله فين
وكنت بحاول ابعد الشكوك عني واتهم ناس كانت بتكرهني وبتتمنالي الاذيه، بس انا ندمانه، ندمانه على كل اللي عملته
....
خلصت كلامها وانا مش مصدق كميه القرف اللي حكيته، ومن غير ولا كلمه حبستها اربع ايام على ذمه التحقيق وبعدها اترحلت للنيابة، كانت جايبه محامي كبير يخرجها من القضية بس للاسف القضيه كانت لابساها لابساها، بس المحامي لعب على حته الناس كانت مريضه نفسيه، والمحكمه حولتها على المستشفى لمده 45 يوم للفصل في حالتها
بس شكلها فعلاً ندمت عشان بعد يومين بس المستشفى بلغتنا ان صابرين انتحرت، رمت نفسها من الدور الخامس، يعني عملت الكبائر في دنيتها وماتت كافره في النهاية ولسه الحساب اللي مستنيها في الاخره
...
انا عارف ان القصه صعبة ممكن في ناس تقول مستحيل تحصل، لكن للاسف الواقع بيقول غير كده، في الواقع بيحصل اكتر من كده وبندعي ان ربنا يرحمنا برحمته
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
