رواية انا وزوج أختي الفصل الثامن بقلم جمانه السعيدي
ام يوسف جنت حيل مقتنعه بزواج علي ومريم
علي ما يتعوض ابد اني احسه مثل ابني مو ابن حماي
وحتى اكون مطمنه اكثر
على مريم وعلى نرجس
قررت اسوي خطه اضغط بيها على مريم حتى توافق
وما اضيع هاي الفرصه من ايدها ابد
مريم من جهه اني ما مقتنعه ابد بهذا الزواج
وارجع واكول شلون لو اخذو نرجس مني
وفكرة ان مستحيل واحد يتقبلني واني عندي تشوه ماتطلع من بالي ابد
ام يوسف بديت انفذ الخطه شويه شويه
واكفين بلمطبخ نشتغل اني ومريم وكتله اليوم ام علي موصفيله بنيه بت حلال وراح تروح تشوفها
بلعافيه عليها التاخذ علي
معدل وابن اصول
جمانه السعيدي
ثاني يوم بليل حضنت نرجس كدام مريم وكلت
يابيبي شلون لو ابوج اخذج من عدنا
تعودنا عليج بلبيت
مريم يمه ليش تكولين هيج
...يمه هاي الحقيقه ام علي جاي ادور مره بس تلكه بت حلال ازوج علي
وياخذون نرجس من عدنا
بديت اضغط اكثر على مريم لان كل يوم تتصل عليه
ام علي وتسئلني هااا ما وافقت
واني أكلها اصبري شويه عليه
طلعت للسوك واشتريت فستان وتراك النرجس
ومن رجعت للبيت كلت المريم قيسيهن عليها
باجر بيبيتها تريد تأخذها وياها
حتى البنيه الي راح يخطبونها العلي تشوفها
مريم ما ما اخليها تروح ابد شنو خطيبة علي تشوفها
شني هلمسكينه ويفترون بيها
يردون يكسرون خاطرها بنرجس حتى توافق
...بعد اهلها وهمه احرار بيها
مريم ماما فدوه كولي العلي يعوفلي نرجس ولله ما اتحمل ابتعد عنها ابد
....وليش انتي ما توافقين وتبقى نرجس طول العمر يمج
مريم ما اكدر تعرفين شنو ما اكدر
...شنو ماتكدرين انتي لا اول وحده ولا اخر وحده تاخذ زوج اختها وافقي ماما الخاطري اريد اطمن عليج
ولله علي خوش ولد وبس تتعودين علي راح تحبي
مريم بس بشرط
...شنو الشرط خل اسمع
...ابد ما يقربلي راح اوافق الخاطر نرجس
اذا قبل بهذا الشرط اني موافقه
ممنوع يقرب عليه لو يلمسني لمس
...الله يهديج ياماما
ام يوسف اتصلت بعلي وشرحتله الموقف وطلبت منه يصبر عليها منا لمن تتعود علي
فكرة ان تاخذ زوج اخته صعبه عليها كلش
وهي وافقت بس علمود نرجس تبقى وياها
علي خاله اني هم هاي الفكره صعبه عليه بس ما اريد اضلم نرجس وابعدها عن مريم
وراح اعوف كلشي للضروف
ام يوسف خلاص تعال بليل وفاتح عمك بلموضوع
وفعلا اجا يوسف واخو بليل وطلبو ايد مريم من ابوها
الصراحه ابو يوسف فرح حيل لان يحب علي
وهم يريد يخلي مريم ونرجس بايد امينه تحافظ عليهن
جمانه السعيدي
اتفقو بعد اسبوع المهر وعقد المحكمه
وزواج سكته بدون حفله ابد
ورا يومين ام علي جابت فلوس المهر وانطتهن الام يوسف
حتى اجهز مريم
مريم ماما اني لا اروح ولا اجي ولا اليه نفس بكلشي
انتي روحي واشتري اي شي يعجبج
ملابس ذهب بكيفج
بس اريد حجابات اريد البس حجاب
ام يوسف الله يبارك بيج ويحفظك ويسعدج حبيبتي
مريم واريد كم لبسه حلوه النرجس وقراصات واحذيه
وفعلا بدت ام يوسف اجهز مريم
اما علي رجع فتح البيت وبكلبه حسره شكبرها على زهراء
بكل مكان الهم ذكرى سويه
امه طلبت منه يبيع كل الاثاث ويكمل فلوسه ويشتري
غيره
من باب التفائل والتشائم تعرفون النسوان الكبار
ما يتوصن بهيج شغلات ابد
اخو علي جاب واحد وشال الاثاث كله
وقرر يكمل الفلوس من عندا ويشتري اثاث جديد هدية العرس
والفراش ام علي جابته
وعلي صبغ البيت من جديد وركب ستائر جديده
علي مستحيل انسا زهراء بيوم من الايام
بس اريد احافظ على الذكرى الوحيده الباقيه منها
اريد احافظ على نرجس
جمانه السعيدي
ام يوسف كملت كل الشغلات الضروريه بس مريم حتى ما تقبل تباوع عليهن
اعرف هي ضايجه من هاي الزواجه بس ولله راح تغير رائيه بعد الزواج
من تعاشر علي وتكون ويا بيت واحد
راح تغير رائيها
اخذته قبل المهر بيوم واحد
للصالون كوه عليها
ماتقبل تروح وحتى الاسود ماتقبل تنزعه ابد
حفت وجها وسرحت شعرها وصبغته وميشت
ام الصالون موشافتها عابسه ووجها مايكصه الطبر
كل شويه تكله عيوني اضحكي انتي مغصوبه
ولا عدها اي ردت فعل ساكته وبس
جمانه السعيدي
مريم بيوم المهر الصبح اندكت الباب
بس اني ونرجس بلبيت امي طلعت للسوك تشتري شوية نواقص
فتحت الباب واذا عمار بوجهي
عيونه حمر وعصبي بس شافني
عمار ليش هيج ليش مريم جاوبيني
مريم سكتت ودنكت
عمار ليش مو اني احبج ومستعد انتضرج العمر كله
ليش توافقين على علي واني ترفضيني
علي بيش احسن مني
مريم اعذرني مو بيدي
عمار شنو موبيدج انتي مغصوبه على هذا الزواج
اذا مغصوبه كولي
اني هسه اخذج ونعوف العراق كله
مريم اني وياك ما مقسومين واحد للثاني
عمار ليش انتي تكولين هيج لوما عنادج جان هسه احنا مزوجين وعدنا طفل
ضليتي لا لا منا لمن ضيعتي كل الفرص
ولله احبج وكل الكائنات الي على وجه الأرض احبج
ومستعد بعد انتضرج
فدوه ارفضي هذا الزواج واني مستعد اجي اليله اخطبج من جديد
تردين اروح العلي واحجي وياااا
ماعندي مانع ابد
مريم ولله انت انسان طيب ومحترم بس لاتحاول
ابد شوف مستقبلك اني ما افيدك ابد
عمار اني الي اقرر منو يفيدني ومنو ما يفيدني
مريم خلاص ماعندي كلام ثاني اكوله تسمح تطلع ما اريد امي تجي وتشوف بلبيت
طلع عمار وطبك الباب حيل ورا
كلت بكلبي انت مسكين انت ضحيه مثلي
الله يجبر خاطرك وتلكه بنت الحلال الي تصونك وتحافظ عليك
بليل لبست دشداشه خليجي ماروني ومطرزه وخليت الشال على راسي وما خليت مكياج ابد
اجا علي هو واخو وجابو الشيخ وياهم
الشهود على العقد اخو علي ويوسف اخوي
ماكو اي احد غريب
من النسوان بس ام علي وزوجت اخو
كعدت وخليت نرجس بحضني
عقدلي الشيخ
وبعدين عقد العلي
صارا كدامي ليلة عقد علي وزهراء وشلون الفرحه ماليه البيت
كطع صفنتي وشرودي صوت ام علي وهي تباركلي
مريم الله يبارك ببج
شويه ودخل علي
حالق لحيته ومعدل شعرا ولابس قاط رصاصي
اول مره اشوفه لابس اللوان
من ماتت زهراء لليوم لابس اسود
كعد يمي وكال مبروك وسكت
مريم الله يبارك بيك
اني وعلي ابد ما حجينا اي شي بس امي وام علي يسولفن
قررو الزواج يوم الخميس
واني شرطت عليهم ما اريد اي مضاهر عرس
تجي سياره وتاخذنا اني وامي ونرجس للبيت وخلاص
وافقو بشرطي
جمعت كل ملابسي وملابس نرجس وحضرت نفسي
احساسي نفس احساس واحد ماخذينه البلد بعيد مابيه حياة
ومصيره مجهول
هذا الاحساس كان مسيطر عليه
اني ما ردت ابدل ابد ردت اروح بثوب عادي
بس امي صممت البس ثوب كريمي مخصر وبي شغل قليل
ولبست شال ويا
امي حاولت تخليني اخلي مكياج
بس اني ما قبلت ابد
جمانه السعيدي
اجت سياره بليل وكفت بلباب
نزل علي وصعد الجنط
صعدنا اني وامي ونرجس
وعلي كعد بلصدر
وصلنا للبيت لكينا عمتي ام علي وزوجت اخو منتضراتنا
زوجت اخو بس دخلنا هلهلت وطشت علينا جكليت
دخلنا كعدنا بغرفت النوم هواي متغير البيت
وكل الاثاث جديد
شويه وام علي كالت هذا عشاكم خليته بلفرن
واحنا رايحين
اني ما قبلت امي تعوفني صممت تبات وياي اليله
ما احس نفسي مرتاحه ابد
علي حضر العشى وكال يله ناكل لكمه
اني نفسي مسدوده وما اشتهي اي شي
اخذ نرجس بحضنه وكعد ياكل هو وياها
وامي تاكل وتسولف علي
واني بس شربت شويه مي
علي راح للغرفه الثانيه ينام وامي نضفت المواعين
واجت نامت وياي بغرفتي
ماكدرت انام صورت زهراء كبالي
واشم عطرها بلبيت
للصبح يله كدرت انام شويه
