رواية قضية سعدية كامله جميع الفصول بقلم جمانه السعيدي
ليس الغرض من نشر القصه تشجيع الناس على الغلط
وإنما حتى ناخذ عبره ودرس
يعيش الإنسان طول عمره وهو يمشي صح وابد ما يغلط بحق احد
وما يجي بعقله ممكن بيوم يغلط غلطه تاخذه للاعدام
غلطه غير مقصوده
بس نهايتها مأساويه
القصه هلمره من مناطق شبه ريفيه
الحقيقه البطله ساكنه بناحيه
الناحيه تكون ازغر من القضاء اهل الناحيه عايشين
بااجواء ريفيه
رغم البيوت تكون مبنيه من الطابوق
وعدهم كهرباء وماي
بس اهل الناحيه يكونون بعدهم عايشين أجواء الريف
عادي تلكه ببيوتهم حيوانات مربين دجاج وبط واغنام
وابقار
والنسوان لبسهن كله لبس نساء الريف
وحتى العادات الريفيه القديمه كلها موجوده عدهم
سعديه بنيه من عائله بسيطه
عدها اخوان ثنيين اكبر منها وامها وابوها
باعتبار هي البنيه الوحيده والزغيره بلعائله
ابوها حيل متعلق بيها
بحيث سمحلها تخلص ابتدائيه
عكس البنات الي بمنطقتها اغلبهن ما داخلات مدارس
لو تدرس الحد صف ثالث ابتدائي وتترك المدرسه
بيتهم بيت بسيط مابي اثاث هواي
هنا فراشات وطباخ وكاونتر
وتلفزيون حتى فراشاتهم طابعهن ريفي بسيط
ابوها واخوانها يمتلكون ارض زراعيه
الأرض صايره بلجهه الثانيه من الناحيه
هاي الناحيه واقعه على الشط الجهه اليسرا من الشط كلها بيوت سكنيه
اما جهة اليمين عباره عن اراضي زراعيه
كل اهل المنطقه ماخذين كيعان هناك وكاعدين
يزرعون بيهن
يعني عايشين عيشت اهلهم قبل
يبيعون المحصول ويصرفون من فلوسه
بلاضافه اهل سعديه ماخذين قطعة الأرض الي بصف
بيتهم ويربطون بيها حلال
هاي القطعه بيها باب خارجي وباب داخلي
باب من بيت اهل سعديه على القطعه يدخلون منه حتى يتفقدون حلالهم
جمانه السعيدي
عدهم كم هايشه على كم رأس غنم وبط ودجاج
ام سعديه هي وسعديه مهتمات برعاية هاي المواشي
تنظيف الارضيه حلب الهايشه جمع البيض
توليد الهوايش اذا كانن حوامل
المهم بعد ما سعديه خلصت الابتدائيه كعدت بلبيت
لان هي تعتبر مدلله خلصت سادس
ثانيا تعرف تقرا وتكتب بعد ليش تكمل
وبعد اكو سبب المتوسطه حيل بعيده واخوانها مايقبلون
تمشي هيج مسافه كل يوم علمود المدرسه
اخوانها حسن وحسين
اكبر منها
حسين عمره ١٨ وحسن عمره ١٦ سنه
كانو تاركين الدراسه من الابتدائيه ويشتغلون وياا ابوهم بلكاع
بعد سنتين تقريبا من ترك سعديه للمدرسه
صار عمر حسن ٢٠ وحسين ١٨ هنا قرر ابوهم يزوجهم
يزوجهم ثنيبنهم مره وحده
حتى تكون تكاليف الزواج اقل
وهم تكون الفرحه فرحتين
بدت ام حسن تدور عرايس الولدها
اهم شرط يكونن بنات اوادم وشاطرات ويتحملن شغل وتعب
اخير شي ووقع الاختيار على بنات عمهم
مو اخوات بنات عم يعني حسن يزوج بت عمه جبار
وحسين يزوج بت عمه محمد
كان هذا الخيار الأنسب للاثنين
يعني مثل مايكول المثل الي تعرفه احسن من الي ما تعرفه
اهل الريف يعشقون زواج الاقارب
باعتبار منهم وبيهم مو غريبه ومايعرفون عنها شي
تمت الخطبه وتحدد موعد العرس
وكلشي كان ماشي مثل مايردون واحسن
اما بلنسه السعديه كان كلشي تمام وفرحانه بنات عمها
الي راح يكونن الها خوات
لان هي ماعدها خوات
بس اكو شي واحد مزعج بلنسبه الها
البيت الي مقابل بيتهم ساكن بي ابو هادي
تقريبا عمره ٤٢
رجال بعمر ابوها وصديق ابوها المقرب
مزوج ثنيين نسوان
وعنده ثمن اطفال ثنيين ولد اكبر منها والثالث نفس عمرها
والبقيه ازغر منها
هذاوالرجال لا شغل ولا عمل
عنده راتب وعنده قطعة ارض ولده يشتغلون بيها
وياهم زوجته الزغيره
وهو ماعنده شغل وعمل غير لازم الباب
للرايحه والجايه
يتحرش بلنسوان ومايعوف وحده بحالها
حتى سعديه رغم هي زغيره
كان يسمعها كلام غزل كلام ما يناسب عمره ولا مكانته
يعتبر جار وبمثابة عمها لان هو صديق ابوها شلون يتصرف هيج
جمانه السعيدي
هلكد ما تضوج منه اشتكت عند ابوها علي
سعديه....بويه فدوه ما تحجي ويا صاحبك
ابوي....صاحبي ياهوووو
سعديه...ابو هادي
ابوي...شبي ابو هادي
سعديه....ولله اكرها عينه عليه من اطلع وارجع
ويحجي حجي موحلو ترا اني بكبر بناته
عيب علي
ابوي...يتشاقا وياج غير عمج
سعديه... لا مو عمي فدوه شجابه العمامي المعدلين
هذا واحد ماعنده مستحه مرات اريد انزع نعالي واطكه على راسه
بلكت يرجعله عقله
سعديه هي وتحجي وياا ابوها وتشكيله من ابوهادي
سمعو خوانها
اخوانها ثنيينهم اعصاب مايقبلون باي تصرف غلط
اول شي هجمو على سعديه شلون اطلعين
وليش اطلعين من البيت
ولازم شاف عليج شي وكام يتحرش بيج
احنا بس نشوفه نعرف شلون راح نتصرف ويااا
بس ابو سعديه ماقبل بهذا الحجي
ماقبل اخوان سعديه يحجون عليها ولا قبل يقربون على ابو هادي
ابو هادي صديق عمره وجاره الباب بلباب
شلون يسوي وياا مشكله
ومن تسمع الناس متعاركين راح تسئل ليش تعاركتو
وهيج سمعت سعديه اتصير على كل السان
والبنيه بس تصير عليها سمعه بعد صعب الناس تحترم اهلها وخاصه بهيج مناطق
اخوان سعديه منعوها تطلع للشارع ابد
اذا تحتاج شي امها تروح بمكانها
ترا ابو هادي حتى على زوجت صديقه يباوع
انسان مايعرف ولا يقدر معنى الجوره
بي مرض اسمه النسوان
ماخذ نسوان ثنيين وبعده عينه على الرايحه والجايه
المهم سعديه انمنعت من الطلعه من البيت
بسبب جارهم ابو هادي
وهذا كان حكم اخوانها مو ابوها
انطوها انذار اذا سمعو طالعه من باب البيت يقتلوها
مايردون كلام زايد من الناس
ازوجو حسن وحسين ثنينهم بليله وحده
كان عرس حلو بااجواء ريفيه جميله عرس الاحباب
تلتم بي كل الناس القريبه والغريبه
ويكون حفل مميز
اتغيرت أجواء البيت بعد هذا العرس
البيت صار بي حس وأجواء عائليه حلوه
مافات شهرين اله زوجت حسن طلعت حامل
ومن بعدها بشهر حملت زوجت حسين
من بعد سنه صار البيت بي اطفال وأجواء حلوه
بعمر ١٥ سنه بدو العرسان يدكون الباب على بيت ابو حسن
يردون سعديه
سعديه بنيه حلوه بملامح ريفيه جميله
تقرا وتكتب من عائله محترمه
الناس كلها تحمد بااخلاقهم سعديه ابد ما تطلع من البيت
خدومه تعرف تشتغل كلشي
تعجن وتخبز وتعرف تهتم بلحلال
تحلب الهايشه وتنظف مكان الحلال حتى تعرف تسوي مطال
المطال هو اقراص تصنع من فضلات الحيوانات
وتنشف بلشمس يستعلموها يشعلون بيها نار
للتدفئه لو للخبز
يخلوها بلتنور ويشعلوها بما ان هي من فضلا نباتيه
بعد ما تنشف بلشمس تصبح قابله للاشتعال
ومرات اذا تكون عدهم كميه جبيره يبعيوها
الناس تشتريها النفس الغرض الي ذكرنا سابقا
اغلبكم يعرف شنو مطال والي مايعرف شرحناله
سعديه كانت بنيه شاطره وشريفه والف واحد يتمناها
بس هلكد ماعزيزه عد ابوها
كان متمسك بيها ويريد يزوجها الواحد يستاهلها
جمانه السعيدي
وصلت سعديه العمر ١٨ وهي مامزوجه
رغم عدهم بلريف هيج عمر تعتبر جبيره
البنات بلريف يزوجن بعمر ١٣ و ١٥
المهم امها كانت ضايجه من هذا الوضع
بتهاكبرت وبعدها مامزوجه رغم كل البنات الي بعمرها تزوجن وصارن امهات
بدا تحجي على ابوها
امي...انت ليش ما تقبل سعديه تزوج ترا البنات الي بكبرها
صار عدهن طفل وثنيين
ابوي....عزيزه عدي سعديه ومايهون عليه ازوجها
امي...يا رجال انت مادايم الها شنهي تاليتها تضل خدامه بهذا البيت
البت كبرت لازم تاخذهله زلمه يدير باله عليها
شنهي تاليتها ما تكلي
ابوي...من كثر معزتها مااريدها تطلع من هذا البيت
امي...لا ولله انت تريد تخرب عليها
ابوي...كون يخطبها واحد اني أرضه خليها تشوف
حياتها
امي...كون يخطبها واحد ترا هي كبرت وفاتها الزواج
ابوي...كولي يالله هسه ما تشوفين غير ابن الحلال
يدك بلباب
امي...جان اكول شي اكيف تعرس ويصير عدها بزره
حالها حال البنات
ابوي.. الله كريم
