رواية ڤيمبو الفصل الاول
في مكان غريب مش اول مره اشوفه ارض خضراء و السما لونها ازرق و الجو هادي ظهرت هي ايوه هي البنت الي بشوفها بقالي اكتر من عشر سنين هي جميله اوي لون بشرتها ابيض من الثلج و شعرها اسود طويل جداً و ناعم و لون عينيها احمر لون مميز مشفتهوش قبل كده لقيتها بتقرب مني و بتقولي
البنت: قريب هنتقابل
ـ بس امتى
البنت: هتعرف كل حاجه في وقتها
ـ استني متمشيش استني......
صحيت من النوم على صوت اخويا التوأم و هو بيقولي
أسر(اخويا): اصحى يبني كل ده نوم
ـ هي الساعه كام
أسر: الساعه بقت واحده و انت لسه مصحتش يلا عندنا درس
ـ يلهوي هو انا نمت كل ده ازاي محدش صحاني
أسر: ماما تعبت و هي عماله تصحيك وانت مش راضي تقوم راحت سيباك ترتاح شويه علشان كنت سهران امبارح بتذاكر
ـ طيب ماشي انا هقوم البس دلوقتي
أسر: اه صح مين الي كنت عمال تقولها استني وانت نايم
ـ متشغلش بالك انت روح البس يلا علشان الدرس
أسر: خلاص ماشي انا قولت اطمن عليك
ـ لبست علشان اروح الدرس اه صح نسيت اقول ليكم انا عندي ١٧ سنه و في تالته ثانوي كلها شهر و اخلص المهم نزلت انا و اخويا و روحنا درس العربي طبعا الحصه كانت ممله بس مش مهم خلصنا الحصه و طلعنا لقينا صاحبنا احمد مستنينا
احمد: اي يا جماعه عاملين ايه
ـ الحمد لله يا احمد انت عامل ايه
احمد: الحمد لله بقول لكم تعالوا نروح ناكل حاجه
أسر: لا يعم لازم نروح عندنا مذاكره الامتحانات الاسبوع الجاي
احمد: تعالوا بس ما احنا طول السنه بنذاكر ماجتش على يوم يعني
ـ ماشي بس مش هنتأخر
احمد: ماشي يلا بينا
روحنا المطعم و طلبنا اكل و طبعا اكلتنا المفضلة شاورما سوري المهم قعدنا و الاكل وصل
احمد: طبعا عيد ميلادكم هنقديه برا زي كل سنه
ـ لا مش هينفع السنه دي خالص ماما مصممه أننا نعمل السنه دي بالذات في البيت
احمد: خلاص ماشي اجي البيت و أجيب أصحابنا لو طنط معندهاش مانع يعني
أسر: للاسف يا احمد مش هينفع بردو ماما قالت لينا نعملوا احنا التلاته بس مش عارف اشمعنا السنه دي بالذات
احمد: خلاص ماشي نبقي نعوضها السنه الي جايه
ـ أن شاء الله احنا لازم نمشي دلوقتي الوقت اتأخر
احمد: ماشي سلام اشوفكم بكره
روحت البيت و قعدت اذاكر مش عارف مالي اليومين دول الاحلام بقت تزيد بطريقه غريبه اول مره يحصل كده من ساعة ما قربت على ١٨ سنه وانا بقيت بشوف الحلم ده كل ليله و كل مره تقول نفس الجمله حتى مش عارف اسمها ايه كل مره بتسبني و تمشي حقيقي تعبت مش عارف اركز خالص
الباب خبط.......
ـ ادخل
الام(مريم): اي يا حبيبي انت لسه صاحي
ـ اه بذاكر علشان الامتحانات
الام: ربنا معاك يا حبيبي مالك شكلك تعبان
ـ لا بس مصدع شويه
الام: اعملك قهوه طيب
ـ ماشي
شربت القهوه و قعدت اذاكر شويه بعدها دخلت نمت حلم نفس الحلم بس المره دي مختلف
ـ مش هتقوليلي اسمك اي
البنت: اسمي ليندا يا ماجد ليندا خليك فكره كويس
صحيت من النوم بدري على غير العادة من غير ما حد يصحيني كنت فرحان اوي اني عرفت اسمها ليندا ذات العيون الحمراء
عدا اسبوع و بدأت الامتحانات كانت صعبه بس الحمد لله عديناها بخير روحت البيت انا و اخويا أسر بعد آخر امتحان كنا مبسوطين مش علشان الامتحان سهل لا علشان أخيراً خلاصنا بعد معاناه دخلت ل ماما المطبخ
ـ عامله ايه يا ست الكل
الام: الحمد لله يا حبيبي
ـ لا قصدي عامله اكل ايه
الام: طيب امشي من هنا بدل ما اشتمك
ـ بهزر معاكي يا ست الكل المهم بعد ما تخلصي الاكل نادي عليا انا و أسر علشان هنموت من الجوع
الام: ماشي يا حبيبي
غيرت هدومي و قعدت اتفرج على التلفزيون شويه عقبال ما ماما تخلص الاكل جيه أسر و قعد جمبي
أسر: يااااااه أخيراً خلصنا كانت سنه متعبه اوي
ـ ايوه بجد انا اول مره اذاكر كده في حياتي
أسر: ايوه المهم دلوقتي فاضل يومين على عيد ميلادنا هنعمل ايه
ـ هنعمل ايه يعني ما ماما قالت هتظبط كل حاجه متشغلش بالك انت
أسر: ماشي تعامله ناكل يلا ماما بتنادي
ـ تمام
روحت اكل و في نص الاكل ماما قالت
الام: بعد يومين عيد ميلادكم كل سنه وانتم طيبين
ـ وانتي طيبه يا ماما
الام: بعد الاكل عيزاكم في حاجه مهمه
ـ اي هي
الام: قولت بعد الاكل
ـ ماشي
