رواية ضحية امي الفصل العاشر بقلم جمانه السعيدي
شديت حيلي على القرايه
والمواد الي ما افتهم بيهن دخلت دورات وانزل دروس من اليوتيوب بلاضافه اشتغل مندوبة مبيعات
اني صح ما احصل بيهن ربح هواي
بس كنت اعتبره درس اتعلم منه شلون اكدر ابيع واشتري
واتعلم الماركات الاصليه والعاديه
وصل موعد المرافعه بيني وبين ياسين
واجاني قبل يوم وكام يصيح بلباب اله تطلعلي لقاء أريد اتفاهم وياها
جمانه السعيدي
طلعت وكفت بلباب وكتله شتريد احجي
ياسين هنا على الباب
لقاء اي هنا احجي وروح ترا مشغوله وماعندي وقت
ياسين اريد فرصه وحده ارجعيلي واني راح اتغير علمودج
لقاء لا بله سمعني زين تتغير علمودي
عمرك ثنيين وتلاثين سنه وانت نفس طباعك هسه تتغير علمودي
ماتغيرت من جنت يمك
كل كلام ماكو بينا افتهمت طلكني احسن اللك واليه
وروح لحك ازوج وحده نفس عقلك بلكت تكدر تعيش وياك
يجوز تحصلك طفل بدال ذاك الي كتلته
ياسين ما اطلكج اله اخليج معلكه لا انتي للسما ولا للكاع
اريد اشوف شلون تخلصين مني
لقاء الله يخلصني منك قابل انت اقوي من رب العالمين
رحنا ثاني يوم للمحكمه والمحامي مالته ما اجه
بقينا ننتضر
لقاء اني كلت للمحامي خلي القاضي يحكم واذا ما اجه
المحامي اذا حكم القاضي المحامي مالته ممكن يستانف
خلي انأجل اسبوع بلكت يحضر
رجعت دمي يفور شكد خبيث ياربي
ماشايفه واحد بحقارته وخباثته كاعد يلعب عليه
بس اني موكله أمري الرب العالمين هو يخلصني منه
قربت امتحاناتي وقررت اشد حيلي وامتحن والمواد الصعبه عليه ااجله دور ثاني
امتحنت وخلصت واجلت مواد ثنيين اريد اركز اكثر
وصل موعد المحاكمه مالتي
اجا يتبكبك كدام القاضي زوجتي واحبها واموت عليها
ومآ مقصر وياها ابد
وساكنه وحدها بلبيت
صار سؤ تفاهم بينا وضربته قابل اني اول واحد اخير واحد يضرب زوجته
ومستعد هسه كدامكم اعتذر منها وابوس ايدها
اصلا اني ما استغني عنها ابد
ومستعد الكل طلباتها كدامكم
واذا ما نفذت طلباتها حاكموني
لقاء سيادة القاضي اني مستحيل ارجعله
ضربني وعنفني وتهمني بشرفي والجوارين تشهد عليه
سنتين عايشه ويااا ويعرف بنفسه عدا ضعف
ومآ حجالي مخليني اراجع واخذ ادويه
وكلما اسئله يكول مابيه شي
واذا فتحت كدامه موضوع الاطفال يزعل مني
اني بعد ما ارجعله اريد اطلك واريد حقوقي كامله منه
القاضي بنتي اتعوذي من الشيطان زوجج حاس بغلطه وجاي يعتذر منج ومستعد الكل طلباتج
ليش ماتنطينه فرصه
ان أبغض الحلال عند الله الطلاق
لقاء ابد ما ارجع خلي يطلكني
القاضي راح انطيكم فرصه اخيره بلكت ينصلح حالكم ترا اصعب من وضعكم ونحلت الأمور بينهم ورجعو البعض
رجعت اتاجلت القضيه مره ثانيه
طلع من المحكمه وهو يباوع عليه ويضحك
عود انتي ماتكدرين عليه
باوعت علي وكلت حسبي الله عليك من رجال يعل حوبتي ماتتعداك دم ابني بركبتك انت ذبحته
بعد كم يوم اجا خالي وكال اكو سلفه ٢٥ مليون بلمصرف
بس يكفلج موضف
وتقدمين أوراق مشروعج يدرسونه وتاخذين الفلوس تبدين بيهن المشروع
بس يستقطعون منهن ليكدام الفائده
خالي كال اني اكفلج وابدي مشروعج
ومن راتب ابوج سددي
جان سحبت سلفه على راتب ابوي بس حمودي ساحب سلفه
بي وجاي يستقطعون نصه تقريبا
ايجوز هسه تكولون عندج راتب ابوج واشتريتي بيت
ليش تشتغلين
صحيح اني مامحتاجه هذا الشغل ماديا
بس محتاجته معنويااا الشغل حلوو وينمي الذات
ويعزز الثقه بالنفس
الناس الي تشتغل وتفكيرها مركزته بعملها ما تصير عدها أمراض نفسيه ابد
لان وقته كله يفكر شلون يطور عمله
اغلب الدكاتره تكول الإنسان يكبر ويعجز ويتمرض
من الكعده
بس تلكين الإنسان الي يشتغل حتلو جبير كله طاقه
سوينا الأوراق وكملناها وانطوني عشرين واستقطعو خمسه
يعني اخذ عشرين واسدد خمسه وعشرين
بقه ادور مكان افتح بي بقيت ادور وانشر على الفيس
منا لمن لكيت مكان كلش مناسب
المكان حيوي وبنص بغداد
قريب علي عيادات الدكاتره
صحيح الإيجار غالي شويه بس لازم اجازف وابدي
بس ترتيب المحل والديكور والجام والرفوف اخذ مني خمس ملايين
باقي الفلوس رحت اسوكت بيهن
اني عندي خبره واعرف الأشياء الي تحبها البنات
قصص وروايات عراقية كرار صلاح والميكب الاصلي
وصلت بضاعتي وبديت اجهزه بيومها راح وياي خالي والجهال يرتبون وياي
بديت اسوي دعايه على الفيس
خليت اسعار مخفضه حتى اجذب الزباين اليه
وانشر شغلات ماركه وجديده
هنا طلعتلي مشكله لا على البال ولا الخاطر
اكو ولد فاتح كوزمتك بصف المحل مالتي
حسيته حيل اضايق مني
رغم هو قديم حيل وعندا زباين
بس ضاج مني وخصوصا اني كمت ابيع بأسعار
اقل من السوك اريد اسحب الزباين
بس مقصدي زباينه هو
بلبدايه كنت اروح افتح المحل وارجع ومآ ابيع
الصراحه حيل ضجت لان اني مطلوبه سلفه
لازم اشتغل حتى اسدد
كمت انزل دعايه الشغلات هواي وبديت احفز الزباين
اكو هدايه
ومفاجئات بلمحل بدت تصير زبائن على المحل
هذا الشي خله كمال ينزعج مني هو اسمه كمال
مع ان الرزق على رب العالمين
وماكو واحد ياخذ رزق الثاني
ورا اسبوع من فتحت المحل
اجيت لكيت كدام المحل ماي هواي باوعت لكيت كمال
معلك مبرده زغيره والمي يوكع بلكاع وصاير كدام المحل مالتي
اول مره مسحته بلماسحه وسكتت
ثاني يوم موبس مي وياا وصاخه
رحت علي وكتله
لقاء السلام عليكم
....باوعلي ونزل حواجبه اهلا
...بس من رخصتك المي مال المبرده جاي يضايقني باب المحل جاي يتوصخ
....وشنو يعني شسويلج
...ممكن تخلي سطل يوكع بي المي او تصلح المبرده
تخلي طوافه حتى الماي الزايد مينزل
....ما يعجبني اسوي اي شي
...ليش انت جاي اتاذيني ولنبي وصا على سابع جار
...اذا ما عاجبج تصيرين جيراني شيلي منا
....لا على بختك هيج الواحد يستقبل جيرانه
خل اوصفلكم شكله شاب طويل صاحب عضلات
عيونه عسلي شعرا ولحيته بيهن شكار
شكله كلش أنيق ومرتب
كلشي بي حلو بس اخلاقه زفت
ما ادري شلون راح تخلص وياااا
على العموم اني ما احب المشاكل ابد
ومآ اريد ابدي حياتي المهنيه بمشكله
عفته ورجعت للمحل طلعت الماسحه ونضفت كدام المحل
ثاني يوم اشتريت سطل وبس وصلت خليته جوه المبرده
لان الماي صاير كدام محلي بلضبط
اتغيبت يومين عن المحل بسبب الامتحانات مالتي
ما اريد هاي السنه هم اضيع مني ضاع من عمري هواي سنيين بدون فايده
اريد ابدي صح هلمره واكون قويه
