رواية تبديل عريس الفصل الثاني عشر بقلم جمانه السعيدي
سلسبيل.... حيل اتاذينا بلطريق لمن وصلنا
السيطرات صعب تقبل السيارات تعبر من محافظه المحافظه بسبب حضر التجول
بس بابا عندا معارف ويعرف ناس هواي
اذا الطريق ٣ساعات ونص صار خمس ساعات بسبب التأخير بلسيطرات
عمي كل شويه يتصل يسئل بابا وين وصلت
يطمن علي
طول الطريق بابا مشغل قرآن واني صورة امي ما تروح من بالي كل اللحظات الحلوه والموحلوه
صارت كدامي عبالك فلم
روحي مقبوضه عليها حزينه ومااعرف بعد الوكت شضاملي
وصلنا للمنطقه الي بيها بيت عمي
هلكد ما ماما جانت تحجي قبل عليهم وتخوفني من حياتهم
اتصورت بيوتهم قديمه شورارعهم تعبانه
منطقه فقيره ناسها عرب قديمين
بس اتفاجئت منطقه حلوه البيوت اغلبها بناء حديث
بيوت مبنيه على احلى الدزاينات الحديثه
بطريقه معماريه مرتبه الشوارع مبلطه اغلب البيوت
بابها سيارات حديثه
وصلنا البيت عمي ابو قائد
بيت جبير بناء حديث دنك عاليه واجهة البيت
حجر لون الحجر ذهبي ونحاسي وجوزي شكل البيت يخبل
باب البيت سيارتين حديثات
نزل بابا وكال
بابا....اول نروح نسلم على عمج ابو قائد وبعدين نرجع البيتنا
اني لابسه بنطرون جينز اسود وبلوز طويل اسود وحجاب
شايله جنطه زغيره سوده بايدي
اول مادخلنا اكو مضيف بيت عمي صاير بصف بيته غرفه طويله تقريبا عشرين متر طولها خاصه بلخطار
دخلنا من باب البيت جان الباب مفتوح
اول مادخلت حديقه شكبرها تخبل صايره من الجهه اليسرا
والجهه اليمنى مدخل البيت وباب المضيف الي صاير على البيت
بيت عمي عدهم علم بجيتنا انا وبابا من بغداد
لزمني بابا من ايدي ودخلنا على المضيف
بابا......صاح بصوت عالي السلام عليكم ابو قائد
عمي جان موجود بلمضيف وحده
بس شافنا وكف على حيله وصاح هله هله وكل الهله
طول وهيبه وشخصيه شوارب طوال يوكف عليهن الصكر
لابس دشداشه رصاصي جفيه وعكال
سلسبيل...حسيت كلمة الهله طالعه من كلبه مو هله عاديه
قرب سلم على بابا بعدين التفت عليه
فتح ادي ثنيبنهن وكال هله بالعزيزه الغاليه هله ياعمي
قربت علي حضني حيل وباسني براسي
ريحته شكد طيبه عطر مميز يبقى بالذاكره
عطر كله هيبه وشموخ
عمي...هله بالعزيز الغاليه شلونج البقيه بحياتج
سلسبيل...حياتك الباقيه الحمد لله
عمي...خوما تعبتو
بابا...اي ولله تعبونا بلسيطرات
عمي...شلونج عمو هله بيج بيتج من زمان واحنا نريد نشوفج طالت السنيين وانتي ماكوووو
كلنا نتمنى نشوفج ونتعرف عليج
سلسبيل...الله يحفظك عمو تسلم
جمانه السعيدي
عمي...احنا متانيينكم نتغده سوه تعالو ندخل للبيت
سلسبيل...مشا عمي قبلنا واني وبابا نمشي ورا
دخلنا للبيت حلو ومرتب ونظيف
صاح عمي بصوت عالي
عمي...وينج ام قائد تعاي بسرعه تعاي
طلعت زوجت عمي من جوه عمرها تقريبا ٥٥ او ٥٧
لابسه دشداشه تخبل وحجاب طويل
ام قائد....هله هله بلعزاز كل خطوه بالف هله شرفوتنا هله بيكم
سلسبيل...هله خاله شلونج
حضنتني وبقت تبوس بيه مو تكول اول مره تشوفني
لا عبالك تعرفني من زمان
التفت على بابا تسلم علي
شلونك خويه شلونك زين البقيه بحياتكم انشاء الله اخر الاحزان
طلعت بنيين بت عمي شابه حلوه ومرتبه ضعيفه
حيل ضعيفه
طويله ملامحها حلوه
بنين...هله كل الهله
سلسبيل...سلمت عليه بحراره ورجعت حضنت بابه وباسته
ابو قائد...تفضلو هله بيكم يله ام قائد غداج بسرعه
تراهم من الصبح ما ماكلين
سلسبيل...كعدنا بلهول وعمي بقه يسئل على فاتحة امي
شلون صارت بغداد
بابا...ولله الفاتحه محد وصلها الناس تخاف من هذا المرض
عمي...حكها الوادم هذا موت مو لعبه
بابا...اني باجر اريد اسوي فاتحه الام سلسبيل
عمي.. ابشر فاتحه هنا بيتي باجر نلم الوادم كلها
ونجيب قارئ قرآن
وام قائد تعزم النسوان ونجيب ملايه فاتحت ام سلسبيل على حسابي
اليوم اخلي الولد يعزمون الوادم كلها
بابا....ولله ما تقصر ابو قائد
سلسبيل...اجا الاكل مدو سفره وبدو يوزعون عليها الاكل
كلشي طابخين باميه ودولمه ومرك لحم اصفر
وتمن على حبشكلات كميه الاكل جبيره
اتصل عمي على ولده
عمي...يله بويه وينكم هذا عمكم وصل تعالو سلمو علي
يله متانيينكم
سلسبيل...علما كملو نقل الاكل وتوزيع الماي
وصلو الولد قائد وعزام
قائد...السلام عليكم البقيه بحياتكم عمي
سلسبيل ..وكفت قائد باوع عليه شلونج سلسبيل
البقيه بحياتج
عزام...بقه يباوع عليه لان او ل مره يشوفني
شلونج بت عمي البقيه بحياتج
سلسبيل...حياتك الباقيه
عزام يشبه امه نسخه منها ام قائد شكل عمي بلضبط
اجت ام قائد وبنيين وكعدنا ناكل اني جنت محرجه
ما متعلمه على هيج جمعه كل عمري اني وماما وبيبي
٣ نفرات وماكو زلمه ويانا
عمتي ام قائد اجيب اكل وتخلي كدامي
ام قائد...اكلي اكلي ضوكي طبخنا اكلي
اذا ما يعجبج الاكل اسويلج غيره
سلسبيل...لا شنو غيره خير من الله نعمه عاشت ايدج
كملنا اكل نقلت المواعين وياهم وعمي تخبل
اكعدي اكعدي هنا يشتغلن خايفه عليهن
بس اني ماحبيت ابقى كاعده ويا الزلم
رحت للمطبخ اساعدهن
بنيبن........ اكعدي سولفي علينا واني انضف كلشي
انتي بيا مرحله
سلسبيل....مرحله ثانيه تحليلات
بنيبن...اني السنه اخيره علوم
سلسبيل...اكو جامعات قريبه عليكم
بنيبن...مو قريبه نص ساعه بلسياره ونوصل
ام قائد...تعاي اخذي الجاي بنيبن
سلسبيل...جيبي اني اخذه
اخذت الجاي قدمتلهم
عمي...عاشت ايدج قائد...شكرا عزام....عاشت ايدج
بابا...شكرا حبيبتي تسلمين
رجعت للمطبخ اخذت جاي وكعدت اسولف على بنيبن واشرب جاي
جمانه السعيدي
شويه وصاح بابا سلسبيل يله بابا نروح للبيت
عمي...خليها اليوم عدنا ما شبعنا منها شوف
بابا...اريدها تتعرف على اخوانها وتحضر غرفتها الي تكعد بيها
سلسبيل...رجع عمي حضني وباسني
عمي...انتي عزيزه بس شفتج طبيتي كلبي
سلسبيل...شكد حبيت كلمة طبيتي كلبي ودي احضنها
كلامه حلووو وبي محنه
قائد وعزام واكفين يباوعون عليه مبتسمين
سلسبيل...شكرا عمو الله يحفظك انت الي تنحب
متندمه ما تعرفت عليك من زمان
عمي...اي ولله دوم اكل البوج جيبها نشوفها ونتعرف عليها
سلسبيل...اني بعد مااعوفك كل يوم تلكاني هنا
عمي...ليش مااحضرلج غرفه وتكعدين عدنا هنا ويا بنيبن
بابا....اني اجيبها كل يوم هذا هم بيتها
بنيبن...الله عليج تعاي علينا
عزام...يقلد على بنيبن سوه صوته ضعيف
الله عليج تعاي علينا
بنيبن....هااا رجعنا الهاي السالفه
عزام...مو صوت تكول موس يشك الأذن شك
سلسبيل...قائد ما قبل عزام يحجي على بنيين راسا خنزر
طلعنا من بيت عمي اكو بيت بصف بيت عمي الحايط على الحايط بناء جديد مرتب بس مو مثل بيت عمي هيج كشخه
بابا....هذا بيت قائد هو وزوجته
الطابق الاول القائد والطابق الثاني يزوج بي عزام
درج خارجي ومن البيت اكو درج داخلي
سلسبيل...هو عزام خاطب
بابا...لا بعد يردون بت حلال تناسبهم
طلعنا من بيت عمي رايحين البيتنا واخيرا راح اشوف اخواني
بيت ابوي مو بعيد تقريبا اربع بيوت او خمسه عن بيت عمي
ما يقل فخامه عن بيت عمي
تقريبا نفس البناء ونفس الترتيب
دخلنا للبيت بابا شايل جنط ملابسي
اول ما دخلنا صاح بصوت عالي وينج ام عدي
تعاي
سلسبيل...دخلنا من باب المطبخ لا كتنا زوجت ابوي
طالعه من الهول جايه على المطبخ
شافتني وياا بابا وجها عابس ياستار
عبالك شافت ملك الموت
ام عدي...هله ابو عدي الله يساعدك
بابا...هله شبيج تعاي سلمي على سلسبيل
ام عدي...هله شلونج
سلسبيل...حسيت الكلمه طالعه بلكوه من حلكها
...هله خاله شلونج
ابد ماقربت عليه ولا باستني فرق سلامها عن سلام زوجت عمي شلون فرحت بيه
اعرف هيه تكره امي بس اني شنو ذنبي
حتى ما عازتني بوفاة امي
ابوي خنزر عليها بسبب سلامها البارد
بابا...شبيج تعاي قربي سلمي زين هاي اول مره تشوفيها
ليش سلامج بارد
سلسبيل...حتى اكسر حاجز الاحراج اني قربت سلمت عليها وبستها
بس هي حتى ما باستني بالكذب
صاح بابا......وينكم تعالو اجت اختكم تعالو سلمو عليها
راسا زوجت بابا عافتنا ودخلت جوه
اجو اخواني هاي اول مره اشوفهم
عدي....هلو سلسبيل البقيه بحياتج
سلسبيل...حياتك الباقيه
زوجت عدي ليلى....هلو اسيل البقيه بحياتي
قربت عليه وباستني سلامها بي حراره اكثر من زوجت بابا
مهند...هلو اسيل شلونج البقيه بحياتج
زوجت مهند....هلو اسيل شلونج جنت اتمنى اشوفج من زمان سلمت عليه بلهفه
علاء....الأخ الثالث ازغر مني سادس علمي سلم عليه
مؤمل...ازغر واحد. ثالث متوسط سلم عليه
كعدنا كلنا بلهول وبابا دخل يغير ملابسه بغرفته
زوجت بابا حبت تبين اني غير مرغوب بيه بيت ابوي
بدت تحجي بصوت عالي حتى اسمعها
ام عدي...المن جبتها وين راح تكعد
بابا...هذا البيت شكبرها تكعد بااحسن مكان مراح تكعد على راسج
أم عدي...الطابق الثاني الولد كاعدين بي هما ونسوانهم
وغرفه جوه النا اني وياك وغرفه للولد الزغار
هاي المحروسه وين تكعد
بابا...لا اطلعيني من طوري كلكم اطلعون وهيه تكعد بلبيت
طول عمرج عقلج زغير وخبيثه
حتى ما كتيلها البقيه بحياتج
يامرا خلي الله بين عيونج يتيمه ومكسور
هاي لو حده من خواتج جان حرتي وين خليتيها
بس لا هاي بت سميره عدوتج
جمانه السعيدي
ام عدي....اي وين تكعد مالها مكان انت بس تريد تحشرها بنصنا بعدين شفت شكلها
شلون جبتها تفتر بيها من بغداد لهنا بهذا لبسها
بنطرون ضابه جسمها وتفتر
جان استحيت شيوخ وعليكم العتب وبتك تفتر بهذا البس
لازم جانت بغداد تمشي بهذا لبسها
هيه وامها لاعبات لعب نسوان وبغداد مالهن رداد
بابا...اش ولا كلمه اجي افرك حلكج فرك فهمتي لو لا
بتي خط أحمر ممنوع تقربين عليها
لو تمشي مصلخه مالج دخل بيها
ولا تعلين صوتج ما تخوفيني اذا ماعاجبج امشي ولي الاهلج اني ماعايزني هيج وجوه زفره
سلسبيل...كنا كاعدين كلنا ونسمع كلامهم
ماقهرني بس من كالت جانت هيه وامها لاعبات لعب
بابا صار عصبي وكام يغلط عليها
طلعت شلت جنطي لحكني عدي
عدي...وووين رايحه بابا مايقبل اطلعين من البيت
سلسبيل...اني ماجايه هنا حتى اخلق مشاكل
اني جايه اتعرف على اهلي
اهلي الي انحرمت منهم عشرين سنه اجيت اتعرف عليهم
لاتخاف مااروح بعيد
تعال وصلني البيت عمي لان جنطي ثكال
طلع عدي وياي وبابا بعده يصيح على زوجته بسببي
مشينا اني وعدي هو شايل جنطي ويمشي ويأي
خطيه محرج من كلام امه عليه
جمانه السعيدي
وصلنا البيت عمي حسيت نفسي محرجه اكثر
طلع عزام شافني بلباب
عزام...هله بت عمي عرفتج ترجعين علينا هلو عدي شلونك
عدي... هلو عزام سلسبيل اني ارجع للبيت
سلسبيل...بس ابتعد عدي
عزام...تعاي تعاي عرفتج تشردين من سميه
هما ولدها ما حاملينها غير تعارك الحياطين تعاي
تروحلج فدوه سميه وعشريتها
عزام...بنيين بنيين هاي بنيين تشبه مرت بباي
كلها مخبوصه بيها وهي لا نفع ولا دفع
طلعت زوجت عمي بس شافت عزام شايل الجنط
فهمت اكو مشكله
ما سئلتني شكوووو
راسا صاحت هله البيت بيتج عزام صعد جنطها فوك
يم بنيبن
سلسبيل. اخذني عزام اني وجنطي صعدنا فوك دخلنا بغرفة بنيبن
بيتهم من فوك ماشاء الله بي تلث غرف كبار وبيا صحيات
بنيبن...هله اي همزين رجعتي عليه ولله اني شكد حبيتج
انتي تنحبين
سلسبيل...انت الي ماكو منج تقبلين اكون ضيفه
عليج
بنيين...الله ياربي مودبه مو مثل عزوز بس يصنف عليه
الله عليج ابقى هنا وياي دوم
سلسبيل....فدوه تخبلين
قبل لا اكمل كلامي
سلسبيل...انفتح باب الغرفه ودخل بابا عليه
لابس تراك وشعره مخربط وعيونه حمر من العصبيه
بابا...ليش طلعتي من البيت هيه تطلع وانتي تبقين
بنيين عرفت اكو مشكله
طلعت من الغرفه حتى نحجي براحتنا
سلسبيل...بابا ترا فعلا ماعدكم غرفه اليه اني اريد غرفه وحدي
بابا.. هيه تطلع
سلسبيل...هيه مو حرب بيت عمي جبير واكعد بيتهم
وماعدهم احد غير بنيبن
مو بعيده عليك يمتى ماتريد تعال
لا تضغط عليه ولا عليها كلمن تاخذ راحتها بلمكان الي يعجبها
بابا...شلون اطلعين من بيت ابوج
هذا بيتج اللج حصه بي اكثر منها
سلسبيل...مو بعيده قريبه عليك مااريد مشاكل الله يخليك
بابا...اذا مااسود عيشتها مااسمي محمد
سلسبيل...ليش انت عصبي اني ما ضايجه
بلعكس هنا احسن حبيبي لا اضوج الخاطري
فدوه الحبيبي اني مقدره الموقف وما زعلانه
بابا....لا ولله سميه طول عمرها حقيره وماتعرف تقدر
الضروف
تكرهج لان اني بس احجي بيج ودائما اروح البغداد علمودج تحس انتي منافسه الها
سلسبيل...هو اني اغار عليك شلون هيه تريدها ماتغار عليك
ممكن ما تصير عصبي علمودي
